საქართველოში მმართველი რეჟიმის ქმედებები არა უბრალოდ უნდა დავგმოთ, არამედ ძალიან ნათელი სიგნალი მივცეთ სანქციების დაწესებით და ხელმძღვანელით, ოლიგარქ ივანიშვილით უნდა დავიწყოთ. ამის შესახებ ევროპარლამენტარმა რიჰო ტერასმა ევროპარლამენტში საქართველოს შესახებ გამართულ პლენარულ სხდომაზე განაცხადა.

თავის გამოსვლაში მან ისაუბრა საქართველოში დემოკრატიასთან მიმართებით არსებულ ვითარებაზე და აღნიშნა, რომ მდგომარეობა უარესდება.

ევროპარლამენტარის თქმით, საქართველოს პრემიერ-მინისტრ ირაკლი კობახიძის განცხადება ოპოზიციის აკრძალვის შესახებ, არა უბრალოდ საგანგაშო ნიშანია – მტკიცებულებაა დიქტატურის, რომელიც თავის შანსს ელის.

“დემოკრატიასთან მიმართებით ვითარება საქართველოში ათწლეულზე მეტია უარესდება. ივანიშვილის მთავრობის პირველ წლებში მან და მისმა ქვეშევრდომებმა ევროატლანტიკური გზისა და დემოკრატიული რეფორმების გზის გაგრძელების შესახებ გამოაცხადეს. ოპოზიციიდან ჩვენი ქართველი კოლეგების არაერთ დელეგაციას ვუმასპინძლეთ ამ შენობაში და ისინი დასაწყისიდანვე გვაფრთხილებდნენ: “გთხოვთ, ყურადღებით იყავით, ვინაიდან, ივანიშვილის რეჟიმი იმისთვისაა, რომ ძალაუფლება მიიტაცოს”.

ყოველი არჩევნების დროს სულ უფრო მეტ ძალადობრივ ინციდენტებსა და წინასაარჩევნო ღონისძიებებს ვხედავდით, რომელსაც რეჟიმთან დაახლოებული ხალხი აორგანიზებდა, ოპოზიციურ ლიდერებს აპატიმრებენ და თავისუფალ მედიას აჩუმებენ.

პრემიერ-მინისტრ [ირაკლი] კობახიძის ცოტა ხნის წინანდელი განცხადება ოპოზიციის აკრძალვის შესახებ, თუ “ქართული ოცნება” მომავალ არჩევნებში გაიმარჯვებს, არა უბრალოდ საგანგაშო ნიშანია – მტკიცებულებაა დიქტატურის, რომელიც თავის შანსს ელის. მმართველი რეჟიმის ქმედებები არა უბრალოდ უნდა დავგმოთ, არამედ ძალიან ნათელი სიგნალი მივცეთ სანქციების დაწესებით იმ ხალხსა და ორგანიზაციებზე, რომლებიც პასუხისმგებელნი არიან საქართველოში დემოკრატიის ჩამოშლისთვის. და ხელმძღვანელით – ოლიგარქ ივანიშვილით – უნდა დავიწყოთ, რათა მაგალითი შევქმნათ”, – განაცხადა ტერასმა.

საქართველოს მომავალი, მათ შორის ევროკავშირისკენ გზა, თავიდან ბოლომდე მისი მოქალაქეებისა და ლიდერების ხელშია , – ამის შესახებ ევროკომისიის ვიცე-პრეზიდენტმა, ვერა იუროვამ ევროპარლამენტში საქართველოს შესახებ გამართულ პლენარულ სხდომაზე განაცხადა.

იუროვას თქმით, მნიშვნელოვანია პოლიტიკურმა ლიდერებმა პოლარიზაცია შეამცირონ, ხოლო არჩევნები მშვიდობიან და ინკლუზიურ გარემოში უნდა ჩატარდეს.

ამასთან

“საქართველოს მომავალი, მათ შორის ევროკავშირისკენ გზა, თავიდან ბოლომდე მისი მოქალაქეებისა და ლიდერების ხელშია. საპარლამენტო არჩევნების წინ მნიშვნელოვანია, რომ პოლიტიკურმა ლიდერებმა პოლარიზაცია შეამცირონ და მოქალაქეებთან პოზიტიურად ჩაერთონ. არჩევნები მშვიდობიან და ინკლუზიურ გარემოში უნდა ჩატარდეს”, – დასძინა მან.

იუროვას თქმით, ევროკავშირი გააგრძელებს ქვეყანაში ყველა განვითარების მონიტორინგს. იუროვამ განაცხადა, რომ საქართველოსთვის ევროკავშირის კარი ღია რჩება, თუმცა ხაზი გაუსვა ევროკავშირის პრინციპებთან თანხვედრის აუცილებლობას.

„ევროპულ გზაზე ნამდვილი პროგრესი დამოკიდებულია დემოკრატიულ და მდგრად რეფორმებზე, რომლებიც თანხვედრაშია ევროპული ინტეგრაციის საკვანძო პრინციპებთან. პოლიტიკური მრავალფეროვნების, ადამიანის უფლებების, აქტიური სამოქალაქო საზოგადოების და დამოუკიდებელი მედიის დაცვა ასევე ცენტრალურია [ევროკავშირის] გაფართოების პროცესისთვის.

ევროკავშირის კარი ღია რჩება და მზად ვართ მხარი დავუჭიროთ ქვეყანას რეფორმებიც ყველა ძალისხმევაში, მაგრამ ნათლად დავგმობთ ნებისმიერ ქმედებას, რომელმაც შეიძლება ძირი გამოუთხაროს დემოკრატიას, ადამიანის უფლებებს და კანონის უზენაესობას. ეს ყველაფერი ქართველი ხალხის სასარგებლოდაა”, – განაცხადა იუროვამ.

საქართველოს მთავრობის უპრეცედენტო ანტიდემოკრატიული ქმედებებისა და რიტორიკის საპასუხოდ საქართველოს ევროკავშირში გაწევრიანების პროცესი შეჩერდა. ამის შესახევ ევროკომისიის ვიცე-პრეზიდენტმა, ვერა იუროვამ ევროპარლამენტში საქართველოს შესახებ გამართულ პლენარულ სხდომაზე განაცხადა.

ვიცე-პრეზიდენტმა იუროვამ ისაუბრა საქართველოს მთავრობის ქმედებების საპასუხოდ ევროკავშირის მიერ გატარებულ ზომებზე, თუმცა განაცხადა, რომ გამოსავალი მარტივია: „თუ არსებობს პოლიტიკური ნება“. იუროვას თქმით, საქართველოს მთავრობამ უნდა დაიწყოს კანონების გაწვევით, რომლებიც ეწინააღმდეგება საქართველოს გაცხადებულ სურვილს, რომ გახდეს ევროკავშირის წევრი.

“უპირველეს ყოვლისა, მსურს მადლობა გადაგიხადოთ თქვენ, ევროპულ პარლამენტს, იმისთვის, რომ ხმამაღლა საუბრობთ საქართველოში არსებულ ვითარებაზე და ევროკავშირს ქმედებებისთვის მოუწოდებთ, საქართველოს მთავრობის უპრეცედენტო ანტიდემოკრატიული ქმედებებისა და რიტორიკის საპასუხოდ ევროკავშირმა შესაბამისი ზომებით უპასუხა. საქართველოს ევროკავშირში გაწევრიანების პროცესი შეჩერდა, პოლიტიკური კონტაქტები დაქვეითდა, “ევროპული მშვიდობის მექანიზმის” მეშვეობით ევროკავშირის მხარდაჭერა, რომელიც 30 მილიონს ევროს შეადგენდა, შეჩერდა, ხოლო მხარდაჭერის პორტფოლიო გადახედვის პროცესშია.

ჩვენ არაერთხელ მოვუწოდეთ საქართველოს ოფიციალურ პირებს, რომ შეაბრუნონ საკუთარი ქმედებების კურსი და ჩვენი კომუნიკაცია გავზარდეთ საქართველოს მოქალაქეებთან. ბევრ თქვენგანს გაახსენდება მსგავსი მოწოდებები. ეს ზომები შესაძლოა შებრუნებულ იქნას და გამოსავალი მარტივია – თუ არსებობს პოლიტიკური ნება.

საქართველოს ოფიციალურმა პირებმა უნდა დაიწყონ კანონების გაწვევით, რომლებიც ეწინააღმდეგება საქართველოს გამოთქმულ სურვილს, რომ გახდეს ევროკავშირის წევრი, კონკრეტულად კი კანონები, რომლებიც ფუნდამენტურ უფლებებსა და თავისუფლებებს ზღუდავენ”, – განაცხადა იუროვამ.

ცენტრალურ საარჩევნო კომისიაში (ცესკო) სახალხო დამცველთან და მასთან არსებულ ეროვნულ უმცირესობათა საბჭოს წევრებთან, ასევე ცესკოში შექმნილი ეთნიკური უმცირესობების საკითხებზე მომუშავე ჯგუფის წარმომადგენლებთან შეხვედრა გაიმართა.

შეხვედრა ცენტრალური საარჩევნო კომისიის (ცესკო) თავმჯდომარემ და სახალხო დამცველმა გახსნეს. გიორგი კალანდარიშვილმა დეტალურად გააცნო ინფორმაცია  არჩევნების მოდერნიზების, ელექტრონული ტექნოლოგიების გამოყენებისა და მათი დანერგვის მნიშვნელობის შესახებ. ასევე ისაუბრა ადმინისტრაციის მიერ ეთნიკური უმცირესობების ინფორმირების მიზნით უკვე განხორციელებული და მიმდინარე საქმიანობის შესახებ.  

საარჩევნო ადმინისტრაციისა და სახალხო დამცველის აპარატს შორის არსებული თანამშრომლობის მნიშვნელობაზე ისაუბრა სახალხო დამცველმა  ლევან იოსელიანმა. მან დადებითად შეაფასა საარჩევნო ადმინისტრაციის მიერ ეთნიკურ უმცირესობების ინფორმირების მიმართულებით განხორციელებული აქტივობები.  

ცესკოში შექმნილი ეთნიკური უმცირესობების საკითხებზე მომუშავე ჯგუფის ხელმძღვანელმა სოფიო სიჭინავამ შეხვედრის მონაწილეებს წარუდგინა პრეზენტაცია, რომელიც ეთნიკური უმცირესობების წარმომადგენელთა არჩევნებში თანაბარ მონაწილეობას ეხებოდა. მან ასევე ისაუბრა ეთნიკური უმცირესობებით მჭიდროდ დასახლებულ რეგიონებში მცხოვრები ამომრჩევლებისთვის განხორციელებული პროექტების, მათი ინფორმირების, ტრენინგების, სწავლების ცენტრთან ერთად ადმინისტრირებული სერტიფიცირების პროცესის შესახებ, რომელიც ეთნიკური უმცირესობებით დასახლებულ რეგიონებში მათთვის გასაგებ ენაზე ჩატარდა.

შეხვედრის დასასრულს გაიმართა საარჩევნო ტექნოლოგიების დემონსტრაცია და იმიტირებული კენჭისყრა. შეხვედრის მონაწილეებს საშუალება ჰქონდათ პრაქტიკაში გამოეცადათ ვერიფიკაციისა და ხმის მთვლელი აპარატების მუშაობა.  შეხვედრის მონაწილეებს გადაეცათ ეთნიკური უმცირესობების წარმომადგენლების საარჩევნო პროცესებში ჩართულობის მიზნით საარჩევნო ადმინისტრაციის მიერ გაწეული საქმიანობის შესახებ ახალი საინფორმაციო ბროშურები, ასევე მხარდაჭერის მიმღები პირებისთვის არჩევნებში მონაწილეობის გზამკვლევი, რომელიც სომხურ და აზერბაიჯანულ ენებზეა ნათარგმნი.

რატომ? რა გავაკეთეთ, სად გადავდგით ნაბიჯი უკან?! რისი გულისთვის? – იმის გამო, რომ მოვიკითხეთ, თუ სად იხარჯება ეს ფული? – ეს რაღაც უსამართლობაა! – ასე ეხმაურება პარლამენტის პირველი ვიცე-სპიკერი გია ვოლსკი ევროკავშირის წარმომადგენლობის განცხადებას, რომლის ინფორმაციით, საქართველო დემოკრატიის უკუსვლის შედეგად 121 მილიონი ევროს ოდენობით ევროკავშირის დახმარებას დაკარგავს.

ვოლსკი ევროკავშირის წარმომადგენლობის განცხადებას “პოლიტიკურად ანგაჟირებულს“ უწოდებს.

„ეს რაღაც უსამართლობაა! ჯერ ერთი, რატომ არის დემოკრატიის უკუსვლა?! – იმიტომ, რომ დესპოტ სააკაშვილს არ ვათავისუფლებთ თუ იმიტომ, რომ ლგბტ პროპაგანდის წინააღმდეგ კანონს ვიღებთ?

რა გავაკეთეთ, სად გადავდგით ნაბიჯი უკან?! რისი გულისთვის? – იმის გამო, რომ მოვიკითხეთ, თუ სად იხარჯება ეს ფული? – რა უბედურებაა, საიდან მოიტანეს! ასეთი დამოკიდებულება ქვეყნისა და ხალხის მიმართ უსამართლოა და ვერ გავითვალისწინებთ განსაკუთრებით იმ შემთხვევაში, როდესაც ყველა რეიტინგი საქართველოს წინ აყენებს როგორც დემოკრატიის, ასევე ნებისმიერი სხვა მიმართულებით.

ყველა ადამიანს, ვინც ასეთ განცხადებებს აქვეყნებს, ვურჩევ, ევროსაბჭოს ბოლო კვლევა წაიკითხოს, თუ სად არის საქართველო თავისი დემოკრატიით, ეკონომიკით, ღიაობით და გამჭვირვალობით. როდესაც ასეთ განცხადებას ვკითხულობთ, დამატებით უნდა ვიკითხოთ, რატომ, რა არის ამის მიზეზი? სად გადავდგით უკან ნაბიჯი?!

რაც შეეხება იმ პროექტს, რომელიც ამ თანხებით უნდა განხორციელებულიყო და უკავშირდება არა კონკრეტული არასამთავრობო ორგანიზაციების დაფინანსებას, არამედ სოფლის მეურნეობას, განათლებას ან სხვა მნიშვნელოვან სფეროებს, რა საკვირველია, აქ პასუხისმგებლობა საკუთარ თავზე სახელმწიფომ უნდა აიღოს და რესურსების მობილიზაცია გააკეთოს, რათა დარგში ჩამორჩენა არ იყოს“, – განაცხადა გია ვოლსკიმ.

საქართველოში ევროკავშირის წარმომადგენლობამ სამეზობლო პოლიტიკისა და გაფართოების შესახებ მოლაპარაკებების საკითხებში ევროკომისიის გენერალურ დირექტორატზე (DG NEAR) დაყრდნობით გაავრცელა ინფორმაცია, რომ საქართველო დაკარგავს ევროკავშირის დახმარებას 121 მილიონი ევროს ოდენობით ქვეყანაში დემოკრატიის უკუსვლის შედეგად. ამავე ცნობებით, 2022 და 2023 წლებიდან დარჩენილი თანხები, რომელიც უშუალოდ ხელისუფლებისთვის იყო განკუთვნილი, დაიკარგება.

საქართველო დაკარგავს ევროკავშირის დახმარებას 121 მილიონი ევროს ოდენობით ქვეყანაში დემოკრატიის უკუსვლის შედეგად,- ამის შესახებ ინფორმაციას საქართველოში ევროკავშირის წარმომადგენლობა სამეზობლო პოლიტიკისა და გაფართოების შესახებ მოლაპარაკებების საკითხებში ევროკომისიის გენერალურ დირექტორატზე (DG NEAR) დაყრდნობით ავრცელებს.

ინფორმაციის თანახმადვე, 2022 და 2023 წლებიდან დარჩენილი თანხები, რომელიც უშუალოდ ხელისუფლებისთვის იყო განკუთვნილი, დაიკარგება.

„ყოველწლიურად გამოყოფილი თანხები იმავე წელს მთლიანად არ იხარჯება, შესაბამისად 2022 და 2023 წლებიდან დარჩენილი თანხები, რომელიც უშუალოდ ხელისუფლებისთვის იყო განკუთვნილი, დაიკარგება.

ინფორმაციაში ნათქვამია, რომ 2022-2024 წლებში ევროკავშირისგან „121.3 მილიონი ევრო შეჩერდა/გადანაწილდა დემოკრატიულ სტანდარტებთან მიმართებით უკუსვლის საპასუხოდ, განსაკუთრებით, საქართველოს სამოქალაქო საზოგადოებისა და მედიის წინააღმდეგ მიმართული „უცხოური გავლენის გამჭვირვალობის შესახებ“ კანონის მიღების შემდეგ“. 2022 წელს გამოყოფილი თანხებიდან შეჩერებული/გადანაწილებულია 12 მილიონი ევრო, 2023 წლიდან 72, ხოლო 2024 წლიდან 37.3 მილიონი ევრო“, – აღნიშნულია ინფორმაციაში.

მშვიდობის გარეშე შეუძლებელია იმ კეთილდღეობაზე და პროექტების განხორციელებაზე საუბარი, რასაც ჩვენ ვგეგმავთ, – განაცხადა დედაქალაქის მერმა, კახა კალაძემ.

ჟურნალისტების შეკითხვაზე, თუ რატომ არ ესწრებოდნენ „ქართული ოცნების“ საარჩევნო პროგრამის წარდგენას პარტიის ლიდერები, კახა კალაძემ განაცხადა, რომ ღონისძიებას მხოლოდ მთავრობის წარმომადგენლები ესწრებოდნენ.

„წარდგენას პოლიტიკური ლიდერები არ ესწრებოდნენ. არ იყო ბატონი ბიძინა ივანიშვილი, ირაკლი ღარიბაშვილი, მამუკა მდინარაძე და პარლამენტის მაღალი თანამდებობის მქონე პირები. იქ იყვნენ მთავრობის წარმომადგენლები, მათ შორის, მეც ვიყავი, როგორც დედაქალაქის მერი და იყო საზოგადოება, რომელსაც წარვუდგინეთ ჩვენი ხედვა, თუ რას ვგეგმავთ.

თქვენ ხომ გამოდიოდით და ამბობდით, რომ „ქართულ ოცნებას“ ეკონომიკის მიმართულებით სალაპარაკო არაფერი აქვსო?“ ჩვენ გუშინ ვაჩვენეთ ხალხს, რამდენი რამეა გაკეთებული, შედარებები იყო მოყვანილი, რა ხდებოდა 2012 წლამდე და დღეს რა პროგრესი გვაქვს, საით მივდივართ, როგორია ჩვენი ხედვა ეკონომიკური განვითარების, ინფრასტრუქტურის მოწესრიგების, განათლების, ჯანდაცვის თვალსაზრისით. არ არსებობს სფერო, სადაც „ქართულ ოცნებას“ არ აქვს მიღწევა. ჩვენ ყველა ამ მიმართულებით გვაქვს ხედვა, რა გვინდა, რა უნდა გავაკეთოთ. ეს ყველაფერი პრემიერ-მინისტრმა, ირაკლი კობახიძემ წარადგინა“, – აღნიშნა კახა კალაძემ.

რაც შეეხება საარჩევნო პროგრამის მთავარ პუნქტებს – ტერიტორიული მთლიანობის აღდგენა და სიღარიბის სრულად დაძლევა, კახა კალაძის თქმით, ამ ყველაფრის მიღწევა შესაძლებელია ქვეყანაში მშვიდობისა და ეკონომიკური განვითარების მიღწევის შედეგად.

„ჩვენ შეგვიძლია სხვადასხვა თემაზე ბევრი ვისაუბროთ, მაგრამ ყველაზე მთავარი არის ის, რომ ქვეყანაში მშვიდობა იყოს. ამის გარეშე შეუძლებელია, ამ კეთილდღეობაზე და იმ პროექტების განხორციელებაზე საუბარი, რასაც ვგეგმავთ. ვიცით, რამხელა უბედურება მოაქვს ომს და არავის ვუსურვებ იმის გამეორებას, რაც, სამწუხაროდ, ახლა უკრაინაში ხდება.

მთავარი არის მშვიდობა, რაც მოიტანს იმის შესაძლებლობას, რომ ქვეყანა ეკონომიკურად განვითარდეს. ეს კი ჩვენი ქვეყნის მოსახლეობაზე პირდაპირ აისახება. ერთ-ერთი სერიოზული გამოწვევაა სიღარიბე, ამას პრემიერმაც ხაზი გაუსვა. გვახსოვს, სიღარიბის ზღვარს მიღმა რამდენი ადამიანი იყო, დღეს რამდენია მათი რაოდენობა, სადამდე ჩამოვიდა. ჩვენ გვინდა, რომ ისტორიულ მინიმუმამდე დავიყვანოთ გაჭირვებული ადამიანების რაოდენობა. სხვადასხვა პროგრამის განხორციელებით ხელს შევუწყობთ და დავეხმარებით ასეთ ოჯახებს იქამდე, სანამ თითოეული ოჯახი არ ამოისუნთქებს და ბედნიერი არ იქნება“, – განაცხადა თბილისის მერმა.

ასევე, კითხვაზე, საერთაშორისო პარტნიორებთან ურთიერთობის გადატვირთვა როდის მოხდება, კახა კალაძე პასუხობს, რომ ეს შესაძლებელი იქნება მას შემდეგ, რაც უკრაინაში მიმდინარე ომი დასასრულს მიუახლოვდება.

„არსებულ მოცემულობაში, როდესაც უკრაინაში ომია და ვხედავთ იმ მძიმე შედეგებს, რა თქმა უნდა, ჩვენთვის მსგავსი რისკები დღესაც არსებობს. არის მოწოდებები და მცდელობები, რომ საქართველოში მეორე ფრონტი გაჩნდეს. ჩვენ გვჯერა და დარწმუნებული ვართ, როგორც კი ომი მილევად რეჟიმში გადავა, რა თქმა უნდა, მოხდება ურთიერთობების გადატვირთვა. შევძლებთ, რომ პარტნიორებთან ურთიერთობები კიდევ უფრო გავაღრმაოთ, მიმზიდველი და საინტერესო გავხადოთ“, – აღნიშნა კახა კალაძემ.