ერთადერთი დასკვნა, რაც შეიძლება ჩვენ გამოვიტანოთ დღევანდელი პასუხიდან არის ის, რომ ჩამოყალიბებული პოზიცია საქართველოსთან მიმართებაში არ არსებობს, სწორედ იმ კონტექსტში, როდესაც საუბარი ეხება ამერიკის ეროვნულ ინტერესებს. მთელი მოსმენის და არა მხოლოდ მოსმენის, აშშ-ს საგარეო პოლიტიკის ღერძი დღეს ტრიალებს ამერიკის ეროვნული ინტერესების გარშემო, – განაცხადა საგარეო საქმეთა მინისტრმა, მაკა ბოჭორიშვილმა გადაცემაში „ღამის კურიერი“, აშშ-ის სახელმწიფო მდივნის, მარკო რუბიოს მიერ აშშ-ის წარმომადგენელთა პალატაში მოსმენაზე საქართველოს შესახებ გაცემულ პასუხთან დაკავშირებით.

როგორც მან აღნიშნა, ჯო უილსონის მიერ დასმული იყო სრულიად დეზინფორმაციული კითხვა და როდესაც რუბიოს პასუხს ვაფასებთ, მთლიან კონტექსტს უნდა შევხედოთ, რას შეეხებოდა განხილვა, რაზე იყო ზოგადად აქცენტები გაკეთებული.

„პირველ რიგში ალბათ ვიდრე რუბიოს პასუხზე ვისაუბრებდეთ უნდა აღვნიშნოთ კითხვა, რომელიც გაჟღერდა კონგრესში და როგორ იყო ეს კითხვა ფორმულირებული და დასმული, კითხვა, რომელიც დასვა ჩვენთვის კარგად ნაცნობმა ჯო უილსონმა, რომელიც სრულიად დეზინფორმაციულ ნარატივზე იყო აგებული, ყველა წინადადება თუ ყველა სიტყვა, რომელიც გაჟღერდა საქართველოსთან მიმართებაში, იყო სრულიად დეზინფორმაციული, ის აბსოლუტურად აცდენილია რეალობას და არცერთი მის მიერ გაჟღერებული პოზიცია არ შეესაბამება სიმართლეს. აქედან გამომდინარე, პირველ რიგში ალბათ უნდა შევაფასოთ ის, თუ რა კონტექსტში მოხდა საქართველოს საკითხის ხსენება კონგრესის მოსმენაზე. მან არასწორი ინფორმაცია გააჟღერა არჩევნებთან დაკავშირებით და რა თქმა უნდა ხელისუფლებასთან დაკავშირებით.

თუ შევაფასებთ უილსონის კითხვას, სად არის ანტიამერიკული ხელისუფლება საქართველოში? დღეს სრულ თანხვედრაშია ჩვენი ხელისუფლების პრიორიტეტები, იდეოლოგიურად რომ შევხედოთ, აშშ-ს ახალი ადმინისტრაციის პრიორიტეტებთან და ამ ფონზე რა თქმა უნდა როდესაც რუბიოს პასუხს ვაფასებთ, ჩვენ მთლიან კონტექსტს უნდა შევხედოთ, რას შეეხებოდა განხილვა, რაზე იყო ზოგადად აქცენტები გაკეთებული“, – განაცხადა მაკა ბოჭორიშვილმა.

„სტრატეგია აღმაშენებლის“ ლიდერი გიორგი ვაშაძე 50 000-ლარიან გირაოს გადაიხდის. ამის შესახებ „პალიტრანიუსს“ პარტიის ერთ-ერთმა ლიდერმა, პაატა მანჯგალაძემ განუცხადა. როგორც „ინტერპრესნიუსის“ ინფორმაციაშია აღნიშნული, მანჯგალაძემ განაცხადა, რომ ვაშაძის მიერ გირაოს გადახდის შესახებ გადაწყვეტილება პარტიის პოლიტსაბჭოზე მიიღეს.

გიორგი ვაშაძეს დროებითი საგამოძიებო კომისიაზე გამოუცხადებლობის საქმეზე აღკვეთის ღონისძიების სახით 50 000-ლარიანი გირაო 23 აპრილს შეეფარდა. სასამართლომ ვაშაძეს გირაოს გადახდის ვადად 30 დღე განუსაზღვრა.

ინფორმაციისთვის, გიორგი ვაშაძე საქართველოს პარლამენტში შექმნილმა დროებითმა საგამოძიებო კომისიამ 15 აპრილს დაიბარა, თუმცა ვაშაძე სხდომაზე არ გამოცხადდა, რის შემდეგაც ის ჩვენების მისაცემად პროკურატურაში დაიბარეს.

გიორგი ვაშაძეს ბრალდება სისხლის სამართლის კოდექსის 349-ე მუხლით წაუყენეს, რაც „საქართველოს პარლამენტის დროებითი საგამოძიებო კომისიის მოთხოვნის შეუსრულებლობას“ გულისხმობს. აღნიშნული ისჯება ჯარიმით ან თავისუფლების აღკვეთით ვადით ერთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.

გედი ფოფხაძე ის ადამიანი არ არის, ვინც ასეთ განცხადებას მხოლოდ თავისი სახელით აკეთებს, მისი ფიგურა, როგორც პოლიტიკოსის, ცალკე განსახილველი თემაა და ალბათ მისი ფენომენი სახელმძღვანელოებში უნდა შევიდეს, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.

ვოლსკის თქმით, მყარი მოსაზრება არსებობს, რასაც 26 მაისისთვის ახმოვანებენ.

„ეს მოსაზრება გუშინ არ გაჩნდა. 2021 წლიდან მოყოლებული ეს თემა მუდმივად ტრიალებს და კონკრეტულ ქმედებებში არაერთხელ იყო გადაზრდილი. დავინახეთ, რომ მათმა რადიკალიზმმა ჯერ შედეგი ვერ მოიტანა და ახლა 26 მაისზე აქვთ ყურადღება გადატანილი. კოლექტიური „ნაცმოძრაობა“ „მაიდნის“ თბილისში გამეორების მომხრეა. თბილისში ამიტომ იყვნენ ჩამოსულები ბალტიისპირეთის საგარეო საქმეთა მინისტრები. ამას ღაღადებს „მაკკეინის ინსტიტუტის“ ინსტრუქცია. ხაბეიშვილმა რადიკალიზმზე საუბარი გუშინ ხომ არ დაიწყო? ეს არის საქართველოს წინააღმდეგ შეთქმულთა ჯგუფი, რომელიც ქვეყანაში „მაიდანის“ მოწყობას ცდილობს. ეს სცენარი სისხლისღვრას და შეტაკებას უკავშირდება. ვინაიდან 26 ახლოვდება, ფიქრობენ, რომ ბნელი ძალების კონსოლიდაცია მოახდინონ“, – განაცხადა ვოლსკიმ.

ოპოზიციონერმა გედევან ფოფხაძემ განაცხადა, რომ რადიკალიზაციის და პიკეტირების მომხრეა – „სხვას ვერ მოვუწოდებთ, მსხვერპლად იქცეს, მაგრამ ვისაც მიგვაჩნია, რომ ქვეყნის ბედი წყდება, ამისთვის მზად უნდა ვიყოთ“.

დღეს არანაირი განცხადება არ მაქვს, კონკრეტულად რის გაკეთებას ვგეგმავთ, მაგრამ საკითხი განიხილება, – ამის შესახებ აშშ-ის სახელმწიფო მდივანმა, მარკო რუბიომ კონგრესის წარმომადგენელთა პალატის საგარეო საქმეთა კომიტეტის წინაშე სიტყვით გამოსვლისას, კონგრესმენ ჯო უილსონის მიერ დასმული კითხვის საპასუხოდ განაცხადა.

ჯო უილსონი დაინტერესდა, რის გაკეთებას აპირებს სახელმწიფო დეპარტამენტი „ქართულ ოცნებასთან“ მიმართებით.

„მადლიერი ვარ ტრამპის ადმინისტრაციის მტკიცე პოზიციისთვის საქართველოში ანტიამერიკული „ქართული ოცნების“ რეჟიმის მიმართ. მათ გააყალბეს არჩევნები საქართველოში 26 ოქტომბერს. მათ კრიმინალიზაცია მოახდინეს ამერიკასთან ასოცირების შესახებ. მათ გააძევეს ამერიკული კომპანიები, დაბლოკეს ვაჭრობა და წიაღისეულის ხელმისაწვდომობა შუა დერეფანში, მიჰყიდეს საქართველო ჩინეთის კომუნისტურ პარტიას. მათ არაერთხელ შეურაცხყვეს პრეზიდენტი ტრამპი და ამერიკის ხელმძღვანელობა. ამის გათვალისწინებით, ძალიან მადლიერი ვარ, რომ რონდელის ფონდთან ერთად, გამოქვეყნდა ანგარიში, რომელიც მიუთითებს კონტროლზე ჩინეთის კომუნისტური პარტიის მიერ საქართველოში და მსურს, ეს წარმოვადგინო ჩანაწერისთვის. გარდა ამისა, 200 დღის განმავლობაში, თავისუფლების მოყვარული ქართველები გმირულად გამოდიან ქუჩაში, ეხვევიან ამერიკულ დროშებში და ატარებენ პრეზიდენტ ტრამპის პოსტერებს. თქვენი ხელმძღვანელობით, რა გაკეთდება იმისთვის, რომ სახელმწიფო დეპარტამენტმა საქართველოს ხალხის სახელით რეალური ფასი დააკისროს ანტიამერიკულ „ქართულ ოცნებას“?“, – მიმართა ჯო უილსონმა რუბიოს.

მარკო რუბიომ პასუხად აღნიშნა, რომ აშშ-ის მიზანია ეროვნული ინტერესები.

„როგორც ნებისმიერი სხვა საკითხი, დავუბრუნდები იმას, რაც ვთქვი ჩემს შესავალ განცხადებაში, შეერთებული შტატების მიზანია ჩვენი ეროვნული ინტერესები. ამიტომ ჩვენ შევხედავთ ამას და ვიტყვით, არის თუ არა ჩვენი ეროვნული ინტერესი ანტიამერიკული მთავრობის არსებობა მსოფლიოს მნიშვნელოვან ნაწილში და თუ არა, მივიღებთ შესაბამის ზომებს, რათა ამ მთავრობამ ფასი გადაიხადოს. ეს საკითხი ამჟამად განხილვის პროცესშია, ჩვენ ვეძებთ ვარიანტებს და დამატებით შესაძლებლობებს. დღეს არანაირი განცხადება არ მაქვს კონკრეტულად იმის შესახებ, რის გაკეთებას ვგეგმავთ, მაგრამ შემიძლია, გითხრათ, რომ ეს არის საკითხი, რომელიც განიხილება და კიდევ ერთხელ ვიტყვი, ეს შესანიშნავი მაგალითია იმის, თუ რატომ მივმართავთ ჩვენს რეგიონულ ბიუროებსა და ჩვენს ადგილობრივ ოფისებს, რომ მოგვცენ რეკომენდაციები იმის შესახებ, თუ რა ზომები იქნება ყველაზე ეფექტური, რომელზეც მთავრობა, ანტიამერიკული მთავრობა ყველაზე მეტად რეაგირებს“, – განაცხადა მარკო რუბიომ.

მას შემდეგ, რაც მე გამოვაცხადე, რომ არ შეიძლება, ენდო ივანიშვილის არჩევნებს და საქართველოში უნდა ჩავატაროთ რამე ალტერნატიული და ვთქვით, რომ ეს უნდა იყოს ინტერნეტ არჩევნები, უკვე გვაქვს სამი შემოთავაზება, – ამის შესახებ პაატა ბურჭულაძემ განაცხადა.

ბურჭულაძის თქმით, სპეციალისტები ევროპიდან და ამერიკიდან განიხილავენ, რომელია ყველაზე სანდო.

„ძალიან დიდი აჟიოტაჟი გამოიწვია სატელეფონო არჩევნებმა. უნდა გითხრათ, რომ ასეთი არჩევნები უკვე ჩატარდა ესტონეთში. იმის შემდეგ, რაც მე გამოვაცხადე, რომ საქართველოში არ შეიძლება, ენდო ივანიშვილის არჩევნებს და ჩვენ უნდა ჩავატაროთ რამე ალტერნატიული და ვთქვით, რომ ეს უნდა იყოს ინტერნეტ არჩევნები, უკვე გვაქვს სამი შემოთავაზება, სამივე ჩამოვა. ჩვენ მოვიყვანთ საზღვარგარეთიდან, ევროპიდან, ამერიკიდან სპეციალისტებს და ვეტყვით, რომელია ყველაზე სანდო. რომელიც იქნება ყველაზე სანდო, ამის შემდეგ შევთავაზებთ „ქართულ ოცნებას“, რომ ჩაერთოს ამ საქმეში და ჩაატაროს სამართლიანი არჩევნები. სხვა არჩევნების ჩატარებას აზრი არ აქვს, რადგან ბიძინა ივანიშვილი და ის კალანდარიშვილი დაიწერენ, რამდენსაც უნდათ“, – აღნიშნა პაატა ბურჭულაძემ.

კითხვაზე, „აღნიშნული აპლიკაციის შექმნაში მიიიღებს თუ არა თქვენი შვილი მონაწილეობას?“, – ბურჭულაძემ უპასუხა:  „არა, ბატონო. ტექნიკურს ნუ მეკითხებით, მე გეუბნებით შინაარსს, შემდეგ დასხდებიან სპეციალისტები, როგორც საქართველოდან, ისე ევროპიდან და ამერიკიდან და განიხილავენ, რომელია ყველაზე სანდო. ჩვენ გვაქვს უკვე ამის სამი ვარიანტი“.

პაატა ბურჭულაძე განმარტავს, რომ ეს აპლიკაცია უკვე შექმნილია. „ერთი ევროპაშია, ორი – ამერიკაში. ისინი ჩამოდიან და როგორც კი ჩამოვა, გეტყვით“, – აღნიშნა პაატა ბურჭულაძემ.

ამასთან, პაატა ბურჭულაძე ამბობს, რომ ოპოზიციონერი კოლეგების პოზიციაა, რომ „ქართულ ოცნებას“ ყალბი და ცრუ არჩევნები არ უნდა ჩაატარებინონ.

„ყველანი გავერთიანდით აქ, ყველანი იყვნენ, „ლელოც“ იყო, „ნაციონალური მოძრაობაც“, 4 ნომერიც იყო, ინაშვილის პარტიაც იყო, ლევან ცუცქირიძე, ყველანი იყვნენ“, – განაცხადა პაატა ბურჭულაძემ.

პაატა ბურჭულაძის თქმით, ხალხი კიდევ ერთხელ არ უნდა მოტყუვდეს.

„უნდა ავუხსნათ ხალხს, რომ არ უნდა მოტყუვდნენ, მერამდენედ უნდა მოტყუვდნენ. ხომ იცით, რომ ეს იქნება ცრუ არჩევნები. ჩვენ ვართ მართლები, ეგ არის ჩვენი ბერკეტი. ჩვენ ვართ მართლები და ისინი არიან მატყუარები“, – განაცხადა პაატა ბურჭულაძემ.

პაატა ბურჭულაძე ამბობს, რომ ხალხთან ერთად, ყველა პოლიტიკური პარტიის მიზანი უნდა იყოს „მავნებელი მთავრობის მოშორება“.

„დაიმახსოვრეთ ყველამ, მე არ ვქმნი აქ პოლიტიკურ პარტიას, ჩვენ არ ვართ პოლიტიკური პარტია, ჩემი მიზანი იყო, გამეერთიანებინა პოლიტიკური პარტიები, ხალხთან ერთად, ყველა პოლიტიკურ პარტიას უნდა ჰქონდეს ერთი მიზანი, მოვიშოროთ ეს მავნებელი და ჩვენი ხალხის მტერი მთავრობა, ამას მივაღწევთ კიდეც“, – აღნიშნა პაატა ბურჭულაძემ.