„2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი საგამოძიებო კომისიის“ სხდომაზე გიული ავალიშვილმა თავისი ძმის კლინიკაში ყოფნის პერიოდი გაიხსენა.

როგორც ავალიშვილმა აღნიშნა, კლინიკის დერეფანი ბადრაგით იყო სავსე და იმის უფლებაც არ ჰქონდა, დიალიზზე მყოფი ძმისთვის საჭმელი მიეტანა.

„ღუდუშაურის კლინიკაში ჰყავდათ ორი-სამი კვირა, ძალიან მძიმედ იყო. ხომ შემეძლო, როგორც პატრონს, იქ მაინც მიმეტანა საჭმელი, რაც შეიძლებოდა დიალიზზე მყოფი ავადმყოფისთვის. სადაც იწვა, იმ პალატამდე დერეფანში რომ გამევლო, იმის შიშიც კი მქონდა, ბადრაგით იყო სავსე. ვინმე თუ იცნობდა, არ უნდა გამევლო იქ. გავლაც კი არ შემეძლო, რომ კარი თუ იქნებოდა ღია, შორიდან დამენახა ჩემი ძმა. რომელ საჭმელზეა საუბარი? იმ ხელისუფლების მეთაურს საკუთარი დედა აწვდის საჭმელს, მე რატომ არ შემეძლო? არ მომცეს უფლება, მიმეტანა საჭმელი ჩემი ძმისთვის და დღეს ის ცოცხალი ყოფილიყო. საკვების შეტანის უფლებას არანაირად არ გვაძლევდნენ. მერეც, კვირაში სამი დღე დაჰყავდათ ღუდუშაურში და შემდეგ – გაგუას კლინიკაში და იქაც არ შეგვეძლო, ახლოს მიკარების უფლება არ გვქონდა. ეზოში ვიდექით და უნდა დაგვენახა, მანქანიდან რომ ჩამოიყვანდნენ. სიარული არ შეეძლო და ერთი სართულით ქვემოთ ლიფტით ჩაჰყავდათ. ვხედავდი, ჩემი ძმა ხელიდან მეცლებოდა, მაგრამ შველა არ შემეძლო. რატომ არ შემეძლო? ხომ იყო ქვეყანა, ხომ უნდა ყოფილიყო სამართალი?“ – განაცხადა გიული ავალიშვილმა.

როგორც კომისიის სხდომაზე გიული ავალიშვილმა აღნიშნა, „სისხლიანი რეჟიმი ხელისუფლებაში ვერ დაბრუნდება“.

„ძალიან გამწარებული ვარ ჩემს ყოფილ პრეზიდენტზე, რომელიც ვითომ მე ავირჩიე. ხელისუფლებაში მოსვლა უნდა სისხლიან რეჟიმს – ისინი ვერასდროს დაბრუნდებიან ხელისუფლებაში. ან როგორ ითხოვენ, მორალური უფლება აქვთ? რამდენი უდანაშაულო ადამიანის ცოდვა ადევს მათ ზურგს, ამ ცოდვებს ვერასოდეს მოინანიებს, მაგრამ პირადად მე, როგორც ჭეშმარიტი ადამიანი, მაინც ჯანმრთელობას, დიდხანს სიცოცხლეს ვუსურვებ. მინდა, გამცეს პასუხი, რატომ მომიკლა მისმა რეჟიმმა უდანაშაულო ძმა? მხოლოდ ჩემი ძმა არ იყო ეს, ჩემი ძმის მსგავსი ძალიან ბევრია, ძალიან ბევრი დედა არის ატირებული, ბევრი ოჯახი ისეა ამოწყვეტილი, როგორც ჩემი ოჯახი. მას გვარის გამგრძელებელი არ დარჩა, მომისპო ძმა, რატომ? მინდა მიპასუხოს“, – განაცხადა გიული ავალიშვილმა.

„პროკურატურის შესახებ“ კანონში ცვლილებები შედის, რომლის გათვალისწინებით, გენერალური პროკურორის არჩევის წესი იცვლება. პარლამენტში ცვლილებების ინიცირება მომავალ კვირას მოხდება, პროექტის განხილვა კი დაჩქარებული წესით წარიმართება.

ცვლილებების მიხედვით, გენერალური პროკურორის ვადის გასვლამდე არაუგვიანეს ექვსი თვის, ხოლო უფლებამოსილების ვადამდე შეწყვეტის შემთხვევაში, საპროკურორო საბჭო გენერალური პროკურორის კანდიდატის პარლამენტისთვის წარსადგენად პროცესს დაუყოვნებლივ იწყებს, რომელიც ერთი კვირის ვადაში დასრულდება. პროექტის თანახმად, გენერალური პროკურორის კანდიდატის დასახელების უფლება ექნება საპროკურორო საბჭოს თითოეულ წევრს, რომელსაც უფლება ექნება, მხოლოდ ერთი კანდიდატი დაასახელოს. ამის შემდეგ, პროცედურის მიხედვით, გენერალური პროკურორის კანდიდატს საპროკურორო საბჭოს სხდომაზე კენჭი ეყრება. კენჭისყრა ღია იქნება, კანდიდატი მხარდაჭერილად ჩაითვლება, თუ მას ხმას მისცემს საპროკურორო საბჭოს სრული შემდგენლობის უმრავლესობა.

ცვლილებებით კონკრეტდება, რომ თუ წარდგენის პროცესში, ერთი კანდიდატი მონაწილეობდა და მან ვერ დააგროვა ხმების საჭირო რაოდენობა, წარდგენის პროცესი ხელახლა დაიწყება. თუ ორი კანდიდატი მონაწილეობდა და ვერცერთმა ვერ დააგროვა ხმების საჭირო რაოდენობა, იმ კანდიდატს, რომელმაც მეტი ხმა მიიღო, ხელახლა ეყრება კენჭი. თუ მან ამ შემთხვევაშიც ვერ დააგროვა ხმების საჭირო რაოდენობა, წარდგენის პროცესი ხელახლა დაიწყება. თუ ორზე მეტი კანდიდატი მონაწილეობდა და ვერცერთმა ვერ დააგროვა ხმების საჭირო რაოდენობა, მეორე ტური გაიმართება იმ ორ კანდიდატს შორის, რომლებმაც ყველაზე მეტი ხმა მიიღო. თუ ამჯერადაც ვერცერთმა კანდიდატმა ვერ მიიღო საპროკურორო საბჭოს არანაკლებ სრული შემადგენლობის უმრავლესობის მხარდაჭერა, საპროკურორო საბჭო ერთი კვირის ვადაში, ამ მუხლის მეოთხე პუნქტით გათვალისწინებული წესით, კანდიდატის წარდგენის პროცედურას ხელახლა დაიწყებს. თუ ორმა ან მეტმა კანდიდატმა ხმების თანაბარი საჭირო რაოდენობა მიიღო, გადამწყვეტი იქნება საპროკურორო საბჭოს თავმჯდომარის ხმა.

ცვლილებების მიხედვით, საპროკურორო საბჭო მხარდაჭერილ კანდიდატს შესაბამისი დასაბუთებით საქართველოს პარლამენტს წარუდგენს. თუ წარდგენილმა კანდიდატმა საქართველოს პარლამენტის წევრთა ხმათა საჭირო რაოდენობა ვერ მიიღო, საპროკურორო საბჭო, ამ მუხლის მეოთხე და მეხუთე პუნქტებით გათვალისწინებული წესით, კანდიდატის წარდგენის პროცედურას ხელახლა დაიწყებს.

დღეს მოქმედი კანონით, საპროკურორო საბჭო გენერალური პროკურორის კანდიდატს კონსულტაციების საფუძველზე ერთი თვის ვადაში არჩევდა, რომელსაც პარლამენტს წარუდგენდა.

გენერალური პროკურორის არჩევას 76 დეპუტატის მხარდაჭერა სჭირდება.

საქართველოს შინაგან საქმეთა სამინისტრო კვლავ განაგრძობს ნარკოდანაშაულის წინააღმდეგ უკომპრომისო ბრძოლას და ნარკოტიკული საშუალებების გამსაღებლების მიმართ კანონით განსაზღვრული უმკაცრესი ზომების გატარებას, – ამის შესახებ შინაგან საქმეთა მინისტრის მოადგილემ, ალექსანდრე დარახველიძემ უწყებაში გამართულ ბრიფინგზე განაცხადა.

ალექსანდრე დარახველიძის თქმით, შინაგან საქმეთა სამინისტრო აგრძელებს შეურიგებელ ბრძოლას აღნიშნული დანაშაულის წინააღმდეგ.

„გვსურს, საზოგადოებას მივაწოდოთ ინფორმაცია, ბოლო დღეების განმავლობაში შინაგან საქმეთა სამინისტროს თანამშრომლების მიერ გატარებული საპოლიციო ღონისძიებების შესახებ. როგორც საზოგადოებას მივაწოდეთ ინფორმაცია, ცენტრალური კრიმინალური პოლიციის დეპარტამენტის თანამშრომლების მიერ, ბოლო დღეებში ჩატარებული ოპერატიული და საგამოძიებო მოქმედებების შედეგად, განსაკუთრებით დიდი ოდენობით ნარკოტიკული საშუალების უკანონო შეძენა-შენახვისა და განსაკუთრებით დიდი ოდენობით ნარკოტიკული საშუალების შემცველი მცენარის უკანონო დათესვა-მოყვანის ბრალდებით, უცხო ქვეყნის ორი მოქალაქეა დაკავებული.

დაკავებული პირების პირადი და საცხოვრებელი სახლების ჩხრეკისას ამოღებულია განსაკუთრებით დიდი ოდენობით სხვადასხვა სახის ნარკოტიკული საშუალება, მათ შორის: 7 ლიტრზე მეტი თხევადი „კოკაინი“ და 40 გრამი „კოკაინის“ კრისტალები. ასევე, ამოღებულია ნარკოტიკული საშუალების დასაფასოებლად საჭირო ნივთები.

გამოძიებით დადგინდა, რომ ბრალდებულებს დროებით საცხოვრებელ ბინაში მოწყობილი ჰქონდათ ლაბორატორია და თხევადი „კოკაინის“ გამოყენებით, ნარკოტიკულ საშუალებას კუსტარული წესით ამზადებდნენ. ნარკოტიკული საშუალების შემცველი მცენარის კულტივირებისთვის მოწყობილი სპეციალური სათბურიდან ამოღებულია განსაკუთრებით დიდი ოდენობით 20 ძირი „მცენარე  კანაფი“.დანაშაული 20 წლამდე ან უვადო თავისუფლების აღკვეთას ითვალისწინებს.

შინაგან საქმეთა სამინისტრო კვლავ განაგრძობს ნარკოდანაშაულის წინააღმდეგ უკომპრომისო ბრძოლას და ნარკოტიკული საშუალებების გამსაღებლების მიმართ კანონით განსაზღვრული უმკაცრესი ზომების გატარებას.

საზოგადოებას კიდევ ერთხელ შევახსენებთ, რომ საქართველოს პარლამენტის მიერ ნარკოდანაშაულისთვის, კერძოდ, ნარკოტიკული საშუალებების შეძენა-შენახვისა და მათი რეალიზაციისთვის სასჯელი მნიშვნელოვნად გამკაცრდა. ასევე დამატებით დაწესდა ადმინისტრაციული პატიმრობა ნარკოტიკების მოხმარებისთვის.

ბოლო პერიოდში სამართალდამცველების მიერ გამოვლენილია ნარკოდანაშაულის – 2 370 ფაქტი. ასევე, აღნიშნული დანაშაულის ჩადენისთვის პასუხისგებაში მიცემულია – 1 712 პირი, მათგან ნარკოტიკული საშუალების გასაღებისთვის პასუხისგებაში მიცემულია – 157 პირი.

პოლიციის მიერ სხვადასხვა სისხლის სამართლის საქმეზე გატარებული მასშტაბური ღონისძიებების შედეგად ამოღებულია: 4 500 აბი „სუბოტექსი“ და „სუბოქსინი“; 2,5 კგ „მეთადონი“; 1 კგ „ალფა პვპ“; 2,7 კგ „პრეგაბალინი“ იგივე „ლირიკა“; 72 კგ „მარიხუანა“; 150 კგ „მცენარე კანაფი“. შინაგან საქმეთა სამინისტრო აგრძელებს შეურიგებელ ბრძოლას აღნიშნული დანაშაულის წინააღმდეგ“, – განაცხადა ალექსანდრე დარახველიძემ.