„ძლიერი საქართველოს“ ერთ-ერთი ლიდერი, ალეკო ელისაშვილი დუშეთის დროებითი მოთავსების იზოლატორში დააბრუნეს.

როგორც „ინტერპრესნიუსს“ კლინიკა „ვივამედში“ განუცხადეს, ელისაშვილმა საავადმყოფო ამბულატორიული მომსახურების გაწევის შემდგომ, წუხელვე დატოვა.

„ჩვენთან იყო, გუშინ საღამოს გაეწია ამბულატორიული მომსახურება და გუშინვე გაეწერა“,- განაცხადეს „ვივამედში“.

ამასთან, „ინტერპრესნიუსი“ ესაუბრა ალეკო ელისაშვილის ადვოკატს, გიორგი რეხვიაშვილს, რომელმაც განაცხადა, რომ ამ დროისთვის, მათ ელისაშვილის ჯანმრთელობის მდგომარეობის შესახებ ინფორმაცია არ აქვთ.

„გუშინ დატოვა „ვივამედი“ და გადაიყვანეს ისევ დუშეთის იზოლატორში, თუმცა მისი ჯანმრთელობის მდგომარეობის შესახებ ინფორმაცია არ გვაქვს. სამედიცინო დაწესებულება ინფორმაციას არ გვაწვდის. კლინიკიდან ინფორმაციის გამოთხოვა დროს მოითხოვს. რამდენიმე საათში გვეცოდინება, როდესაც გადმოიყვანენ თბილისში, ვინაიდან დღეს პროცესი მიმდინარეობს აღკვეთის ღონისძიებასთან დაკავშირებით. გამომძიებლისგან ზარს ველოდები, სხდომა ნებისმიერ დროს შეიძლება ჩაინიშნოს“,- განაცხადა ადვოკატმა.

მხოლოდ „ნაციონალური მოძრაობის“ წარმომადგენელი თუ შეძლებდა დააბულინგოს და გამოაქვეყნოს იმ ადამიანების პერსონალური ინფორმაცია, რომლებიც საკუთარი სიცოცხლისა და ჯანმრთელობის ფასად იცავენ სახელმწიფო ინსტიტუტებს, სახელმწიფოს სუვერენიტეტსა და მშვიდობას, – განაცხადა პარლამენტის ფრაქცია „ქართული ოცნების“ აპარატის უფროსმა ავთანდილ კუნჭულიამ.

მისი თქმით, სპეცრაზმელების პერსონალური ინფორმაციების გამოქვეყნებით ისინი რუსულ საქმეს აკეთებენ.

„მითუმეტეს, ვინ, თუა არა „ნაციონალურმა მოძრაობამ“ ძალიან კარგად იცის, რომ ეს ადამიანები მონაწილეობას იღებდნენ 2008 წლის აგვისტოს ომში. შესაბამისად პერსონალური ინფორმაციების გამოქვეყნებით პირდაპირ რუსულ საქმეს აკეთებენ“, – განაცხადა კუნჭულიამ.

რადიკალებმა სპეცრაზმელთა სიები გაასაჯაროვეს და სამართალდამცველების ოჯახის წევრებს ბრალდებებით სახლებში მიუვარდნენ.

საქართველოს პრეზიდენტი სალომე ზურაბიშვილი აცხადებს, რომ ლუქსემბურგის საგარეო საქმეთა მინისტრთან არ უსაუბრია.

სალომე ზურაბიშვილმა საქართველოს პირველ არხთან ინტერვიუს დროს უპასუხა კითხვას ლუქსემბურგის საგარეო საქმეთა მინისტრის, ქსავიე ბატელის იმ განცხადებაზე, სადაც ბატელი ამბობს: „გვთხოვეს, არ ვაღიაროთ არჩევნები, თხოვნა იყო პრეზიდენტისგანაც. ვისურვებდი ანგარიშის ნახვას, იყო თუ არა არჩევნები სამართლიანი, ეს თუ ქართველი ხალხის ნებაა, პატივი უნდა ვცეთ“.

„წაგიკითხავთ სიას: პოლონეთი – ანჯეი დუდა, ლიეტუვა – გიტანას ნაუსედა, ლატვია – ედგარს რინკევიჩსი, ესტონეთი – ალარ კარინსი, მოლდოვა – მაია სანდუ, ფინეთი – ალექსანდრე შტუბი, გერმანია – ფრანკ ვალტერ შტაინმაიერი, დანია – მეტე ფრედერიქსენი, რუმინეთი – ელენსა ლასკონი, შვედეთი – ულფ კრისტენსონი. ამერიკა, სენატორები – შაჰინი, კუნსი, კარდინი და კიდევ სამი. ევროპული საბჭო – ანტონიო კოსტა, ევროპის საბჭო – ალან ბერსე, ევროპული პარლამენტი – რასა იუკნევიჩიენე, ევროკომისია – მარტა კოსი, ევროკომისია – ურსულა ფონ დერ ლაიენი, ევროკომისია – კაია კალასი. ესენი არიან ამ ბოლო დღეებში ის ადამიანები, რომლებსაც მე ვესაუბრე. ლუქსემბურგთან არ მისაუბრია. არ ვიცი, საიდან, არ მისაუბრია. შეიძლება, ვიღაცისგან რაღაც გაიგო და გადმოსცა, როგორც შეეძლო, მე არ მისაუბრია ლუქსემბურგის საგარეო საქმეთა მინისტრთან“, – განაცხადა სალომე ზურაბიშვილმა.

კითხვაზე, – „სხვა მინისტრებთან, ვისაც ესაუბრეთ, იყო ასეთი ფორმულირებული თხოვნა, რომ არ ყოფილიყო აღიარებული? მტკიცებულებები მიწოდებული გაქვთ?“ – ზურაბიშვილმა უპასუხა: „აბა რა. აბა რა. მტკიცებულება არის ქუჩაში. მეტი რა გინდათ? მე არ ვარ მტკიცებულებების დამლაგებელი, მაგრამ არასამთავრობო ორგანიზაციებმა, დამკვირვებელთა ორგანიზაციებმა მოაგროვეს ძალიან ბევრი მტკიცებულება, ეს მტკიცებულებები არის სტრასბურგში, ასევე, მე შევიტანე საკონსტიტუციოში ორი მიმართულებით სარჩელი“.

საზოგადოებას პირდაპირ ავუხსნი ძალიან ვრცლად და ძალიან ნათლად, რა იქნება ჩემი პოზიცია იმის მერე, რაც არალეგიტიმური პარლამენტი აირჩევს არალეგიტიმურ პრეზიდენტს, – ამის შესახებ პრეზიდენტმა, სალომე ზურაბიშვილმა საზოგადოებრივი მაუწყებლის ეთერში განაცხადა.

აღნიშნულით მან უპასუხა კითხვას, რას გულისხმობდა მის მიერ გაკეთებულ განცხადებაში, სადაც აღნიშნავდა, რომ არალეგიტიმური პარლამენტი ვერ აირჩევს ახალ პრეზიდენტს და მისი მანდატი გრძელდება მანამ, სანამ არ იქნება ლეგიტიმურად არჩეული პარლამენტი.

„ამის დრო მოვა… არაერთი საჯარო სიტყვა მექნება და საზოგადოებას პირდაპირ ავუხსნი ძალიან ვრცლად და ძალიან ნათლად, რა იქნება ჩემი პოზიცია იმის მერე, რაც არალეგიტიმური პარლამენტი აირჩევს არალეგიტიმურ პრეზიდენტს. გაიგებთ დროულად“, – აღნიშნა პრეზიდენტმა.

მოწოდება არ გამიკეთებია არავის მიმართ, არც დიდების, არც ბებიების, არც ბაბუების, არც ზრდასრული ადამიანებისთვის და ახლა ბავშვებისთვის რატომ უნდა გამეკეთებინა მოწოდება? – ამის შესახებ საქართველოს პრეზიდენტმა, სალომე ზურაბიშვილმა საქართველოს პირველ არხთან ინტერვიუში განაცხადა.

წამყვანმა სალომე ზურაბიშვილს ჰკითხა, რომ პრეზიდენტის მხრიდან „კეთდება მოწოდებები კონკრეტული უწყებების მისამართითაც, მათ შორის, სასწავლო დაწესებულებების მისამართით და იყო განცხადება, რომ უნივერსიტეტების შემდეგ სკოლებიო“, სალომე ზურაბიშვილმა განაცხადა, რომ ეს არის დეზინფორმაცია.

„არა, არა, ამაზე გაგაჩერებთ. ეს არის წარმოუდგენელი დეზინფორმაცია და პროპაგანდა, არ გვინდა. მე ნუ მიბრუნებთ, რას ვამბობ, წარმოუდგენელია. არანაირი მოწოდება. იყო ინგლისურად, ჯერ ერთი, და მოწოდებები საქართველოში ინგლისურად არ კეთდება სოციალურ ქსელში, რომელიც არის უცხოელებისთვის. ეს არის აღწერა იმისა, რომ სკოლებშიც დაიწყო იგივე. და ახლა ვინმეს თუ წარმოუდგენია, რომ მე ვარ დედა და ბებია და შემიძლია, მოვუწოდო სკოლის ბავშვებს, რომ გამოვიდნენ, გაოგნებული ვარ, რომ შეიძლება, ვიღაცას საპატრიარქოში იმას სჯეროდეს, რომ მე შეიძლება, ასეთი მოწოდება გავაკეთო. მოწოდება არ გამიკეთებია არავის მიმართ, არც დიდების, არც ბებიების, არც ბაბუების, არც ზრდასრული ადამიანებისთვის და ახლა ბავშვებისთვის რატომ უნდა გამეკეთებინა მოწოდება? მე იქ ვწერ, რაც არის, რაც მიმდინარეობს ქვეყანაში, რადგან ვიცი, რომ ჩემი პოსტები იკითხება და ამით ვავრცელებ იმ ინფორმაციას, რაც, სამწუხაროდ, არ ვრცელდება სხვანაირად. ის არ იყო მოწოდება და ტყუილად ნუ მოეკიდებით რაღაც სისულელეს. ფაქტი არის, მე ვნახე ფაქტი, სურათები, სადაც მოსწავლეები გამოდიოდნენ ძალიან საინტერესო პლაკატებით“,- განაცხადა სალომე ზურაბიშვილმა.

კითხვაზე, სწორია თუ არა არასრულწლოვნების ჩართვა საპროტესტო აქციებში, სალომე ზურაბიშვილმა უპასუხა, რომ არავინ ჩაურთავს.

„მე ხომ არავინ ჩამირთავს. გეტყვით, ვინ ჩართო ეს ბავშვები და ახალგაზრდები ამ მოძრაობაში, ვინც წაიყვანა რუსეთისკენ, რადგან მარო მაყაშვილზე რომ ვლაპარაკობთ, ვინ იყო მარო მაყაშვილი? გამახსნეთ. ეს იყვნენ იმდროინდელი ახალგაზრდები, რომლებმაც ვერ აიტანეს, რომ რუსეთი შემოდიოდა დასაპყრობად და ეს დარჩება, რაც გინდათ, ის თქვით. მე არავინ არ გამომიწვევია და არავისთვის მოწოდება არ გამიკეთებია და ცხოვრებაში არ გავაკეთებ, რადგან თუ ერთი რამის მჯერა ყველაზე მეტად, ეს არის ადამიანის თავისუფლების. ყველას აქვს თავისი გზა, თავისი არჩევანი და, ბოლოსდაბოლოს, როცა ის დრო მოდის, თავის სინდისთან მარტო რჩება. ამიტომ არავის არა აქვს უფლება, რომ ვინმეს მოუწოდოს.

თუ მოწოდებაზე გადავალთ, აბა, ახლა ვთქვათ, ვინ მოუწოდა ჩვენს სპორტსმენებს, რომ შემოსულიყვნენ პოლიტიკაში? ჩვენ რომ ვიყავით გაერთიანებული მთელი ერი ფეხბურთის დროს, ასეთი ბედნიერი მომენტი ბოლო წლებში საქართველოსთვის არ ყოფილა, როგორც ევროფეხბურთში შესვლა საქართველოსი და ვინ ჩართო ეს ხალხი პოლიტიკაში? ვინ მოუწოდა? ან ჩვენი ოლიმპიელები ვინ შემოიყვანა პარლამენტში, ან რა ესაქმებათ პარლამენტში, ეს არ არის ერის დაყოფა?

სპორტსმენებს შეუძლიათ, პოლიტიკურ პროცესებში იყვნენ, მაგრამ არ უნდა ჩართო. არ უნდა დაყო. მთელი ეს ისტორია იმას აჩვენებს, რომ საქართველო არის ძლიერი, როცა არის გაერთიანებული და თუ ჩვენ გვქონდა და გვაქვს დაპირისპირება, პოლარიზაცია, რომელიც მხოლოდ საქართველოსი არ არის, მთელ მსოფლიოს მოედო ეს პოლარიზაცია, მაგრამ ჩვენ გვქონდა ის ბედნიერება, რომ ორ მომენტში – ფეხბურთზე და ოლიმპიადაზე მართლაც ვიყავით გაერთიანებული და არავის არ ჰქონდა უფლება, რომ ეს დაეშალა. ვიდრე ჩვენ ერთად დავდიოდით გერმანიის სხვადასხვა ქალაქში და ქართული დროშა ყველას ეჭირა, მე სადაც ვიყავი, არავინ არ კითხულობდა ეს ოცნებისტია, თუ ოპოზიციაა, თუ ვინ არის. ეს დაშალა საარჩევნოდ „ოცნებამ“. სხვამ არავინ, სხვას არავის არ გამოუყენებია პოლიტიკურად ეს ადამიანები“, – განაცხადა ზურაბიშვილმა.

საქართველოს პრეზიდენტმა, სალომე ზურაბიშვილმა 2 დეკემბერს სოციალურ ქსელში პოსტი გამოაქვეყნა, სადაც დაწერა: „უნივერსიტეტების შემდეგ ახლა სკოლების დროა, მთელი საქართველოს მასშტაბით გამოხატონ სოლიდარობა საპროტესტო აქციების მიმართ“.