Home Blog

“ოპოზიციის ლიდერებს და მათ რუპორ აქტივისტებს მივმართავ! საკუთარი ხალხის მიმართ ამხელა ზიზღს როგორ იტევთ?!”

ოპოზიციის ლიდერებს და მათ რუპორ აქტივისტებს მივმართავ! საკუთარი ხალხის მიმართ ამხელა ზიზღს როგორ იტევთ?! , – ამის შესახებ პარლამენტის ვიცე-სპიკერი ნინო წილოსანი სოციალურ ქსელში წერს.

წილოსანის თქმით, უკვე ერთი კვირაა ოპოზიცია და მათი აქტივისტები ზიზღს ავლენენ ქვეყნის უმრავლესობის მიმართ, მათი სამოქალაქო პოზიციის, ასაკის, გარეგნობის, სოციალური მდგომარეობის და პოლიტიკური პრეფერენციების გამო.

„ოპოზიციის ლიდერებს და მათ რუპორ აქტივისტებს მივმართავ!
საკუთარი ხალხის მიმართ ამხელა ზიზღს როგორ იტევთ?!
უკვე ერთი კვირაა თვალს ვადევნებთ რამხელა აგრესიას და ზიზღს ავლენთ ქვეყნის უმრავლესობის მიმართ, მათი სამოქალაქო პოზიციის, ასაკის, გარეგნობის, სოციალური მდგომარეობის და პოლიტიკური პრეფერენციების გამო. რამ შეგაძულათ ასე საკუთარი მოსახლეობა? რამ შეგაშინათ ასე საკუთარი ხალხის?
დღეს, თქვენგან განსხვავებით, მშვიდობიანი მიზნით შეიკრიბება უამრავი ადამიანი! მიუხედავად იმისა, რომ ქართველი ერის წინაშე უდიდესი დანაშაული მიგიძღვით და ამ ადამიანების დიდი ნაწილი სრულ ტერორში გყავდათ თქვენი მმართველობის დროს, ჩვენ მაინც ცივილიზებულად მოგექცევით და თქვენსავით კაციჭამიები არასდროს გავხდებით!“ – წერს წილოსანი.

“ზელენსკის მიმართ ნდობა იკარგება: პრეზიდენტმა უპატიებელი შეცდომა დაუშვა, როცა ანტიკორუფციული ორგანოების წინააღმდეგ მიმართული კანონპროექტი მოიწონა”-Daily Telegraph

„ზელენსკის მიმართ ნდობა იკარგება: პრეზიდენტმა უპატიებელი შეცდომა დაუშვა, როცა ანტიკორუფციული ორგანოების წინააღმდეგ მიმართული კანონპროექტი მოიწონა“ – ასეთი სათაურით არის გამოქვეყნებული სტატია ბრიტანულ გაზეთ „დეილი ტელეგრაფში“ (The Daily Telegraph), რომლის ავტორი სემიულ რამანი უკრაინულ საზოგადოებაში ბოლო დროს შექმნილ პოლიტიკურ სიტუაციას აანალიზებს.

გთავაზობთ პუბლიკაციას მცირე შემოკლებით:

ომის უბედურების ფონზე უკრაინელთა ერთიანობაში ბზარები გაჩნდა: ამ დღეებში ასობით ადამიანმა კიევში, ლვოვში, დნიპროში და ოდესაში საპროტესტო აქციები გამართა ვერხოვნა რადას მიერ სასწრაფოდ მიღებული იმ კანონის წინააღმდეგ, რომელიც კორუფციის წინააღმდეგ მებრძოლი სტრუქტურების სტატუსს არეგულირებს.

კანონპროექტი №12414 ეხება უკრაინის ანტიკორუფციულ ეროვნულ ბიუროს და სპეციალიზებულ ანტიკორუფციულ პროკურატურას, რომლებიც ბოლო დრომდე დამოუკიდებელ სტრუქტურებს წარმოადგენდნენ, ახლა კი უკრაინის გენპროკურატურას დაექვემდებარნენ.

გენერალურ პროკურორს კი თანამდებობაზე პირადად პრეზიდენტი ვოლოდიმირ ზელენსკი ნიშნავს.

კანონმა უკრაინაში აღშფოთება გამოიწვია ორი მიზეზით:

პირველი – ეს არის სერიოზული უკან დახევა კორუფციასთან ბრძოლაში. მმართველობის პირველ წლებში პრეზიდენტ ვოლოდიმირ ზელენსკის ბრალს უყენებდნენ იმისთვის, რომ იგი ბოროტად სარგებლობს სისხლის სამართლის საქმეების აღძვრით პოლიტიკური ოპონენტების წინააღმდეგ, მათი დისკრეტიზაციის მიზნით – მაგალითად, პრორუსული „ოპოზიციური ბლოკის“ ლიდერის ვიქტორ მედვედჩუკისა და ყოფილი პრეზიდენტის პეტრო პოროშენკოს მიმართ. შეიქმნა არცთუ უსაფუძვლო აზრი, რომ ვოლოდიმირ ზელენსკი შერჩევითი სამართლით სარგებლობდა, რის გამოც მისი პოპულარობა დაეცა და ჩრდილი მიადგა მის როგორც რეფორმატორის რეპუტაციას.

რუსეთ-უკრაინის ომის დაწყების შემდეგ ვოლოდიმირ ზელენსკი შეეცადა თავისი არასასიამოვნო იმიჯი შეეცვალა და ამ მიზნით რადიკალური ანტიკორუფციული ზომები მიიღო. პრესაში გამოქვეყნებული იმ ფაქტების საფუძველზე, რომ უკრაინის თავდაცვის სამინისტრო არმიისათვის განკუთვნილ კვების ზოგიერთ პროდუქტს (მაგ. კვერცხს) საბაზრო ფასებზე უფრო ძვირად ყიდულობდა. პრეზიდენტმა მინისტრი ალექსი რეზნიკოვი თანამდებობიდან მოხსნა. მართალია, თვითონ უშუალოდ მინისტრი კორუფციაში არ დაუდანაშაულებიათ, მაგრამ მან ვერ უზრუნველყო კორუფციის ალაგმვა.

იმ პერიოდშივე ვოლოდიმირ ზელენსკიმ, მექრთამეობის ბრალდებით, დაკავებული პოსტებიდან გაათავისუფლა რიგი მაღალჩინოსნები, რომლებიც პასუხისმგებლები იყვნენ არმიაში გაწვევისა და მობილიზაციის საკითხში. ისინი დაპატიმრებულები იქნენ. გარდა ამისა, უკრაინის უშიშროების სამსახურმა დააკავა ხუთი მაღალჩინოსანი, რომლებსაც ბრალი წაუყენეს ჭურვების შესაძენად გამოყოფილი თანხების მითვისება-დატაცებაში…

ბუნებრივია, ამ ზომების მიღებამ ფართო მხარდაჭერა პოვა როგორც უკრაინაში, ასევე მის ფარგლებს გარეთაც, საერთაშორისო საზოგადოებაში, მაგრამ დღეს, როცა პრეზიდენტმა ხელი მოაწერა №12414 კანონპროექტის ძალაში შესვლას, ისევ დაიწყო კრიტიკა ვოლოდიმირ ზელენსკის წინააღმდეგ, რომ იგი პოლიტიზებულად უდგება დანაშაულის წინააღმდეგ ბრძოლას. გარდა ამისა, პრეზიდენტის შეცდომას წარმოადგენს ის, რომ მან დაუშვა ბრძოლა გავლენისათვის ორ სახელმწიფო სტრუქტურას – უშიშროებისა და ანტიკორუფციულ სამსახურებს შორის. ამჯერად უშიშროებამ ანტიკორუფციულ სამსახურს სძლია: უშიშროების სამსახურის თანამშრომლები შეიჭრნენ ანტიკორუფციული ბიუროს ოფისში, გაჩხრიკეს და რიგი თანამშრომლები დააკავეს – „რუსეთის ჯაშუშობაში“ ეჭვმიტანილის ბრალდებით.

მეორე მიზეზი – დამოუკიდებელი ანტიკორუფციული ორგანოების დაქვემდებარება გენპროკურატურისადმი სერიოზული დარტყმას ნიშნავს, მიმართულს უკრაინის ევროკავშირში ინტეგრაციის წინააღმდეგ. ევროკავშირის გაფართოების საქმეთა კომისარმა მარტა კოსმა ვერხოვნა რადას მიერ მიღებული კანონი „უკან დახევად“ შეაფასა და ხაზი გაუსვა, რომ თუ უკრაინას ევროკავშირის წევრობა სურს, მას დამოუკიდებელი ანტიკორუფციული სტრუქტურები უნდა ჰქონდეს. გარდა ამისა, კანონის მიღებით რისკის ქვეშ დგება აშშ-ის მხარდაჭერაც. MAGA-ს ბანაკში იმ ადამიანებმა, რომლებსაც არ მოსწონთ დონალდ ტრამპის შებრუნება უკრაინისაკენ, მკაცრად გააკრიტიკეს ვოლოდიმირ ზელენსკის გადაწყვეტილება. მაგალითად, კონგრესის წარმომადგენელთა პალატის დეპუტატმა ჯორჯიის შტატიდან მარჯორი ტეილორ გრინმა უკრაინელ დემონსტრანტებს ვოლოდიმირ ზელენსკის დამხობისაკენ მოუწოდა და ამ ფონზე კიდევ ერთხელ ხაზი გაუსვა, რომ იგი უკრაინისათვის გაწეულ დახმარებას მხარს არ უჭერს
იმის მიუხედავად, რომ უკრაინის ხელისუფლების მიერ მიღებული გადაწყვეტილებები საკმარისი საფუძველია პროტესტებისათვის, დაწყებული ანტისამთავრობო გამოსვლები იმაზეც მიანიშნებს, რომ უკრაინულ საზოგადოებაში ღრმა განხეთქილება არსებობს. მოსახლეობაში ხელისუფლების წინააღმდეგ უკმაყოფილების მუხტი ძლიერდება: ვოლოდიმირ ზელენსკიმ საომარი მდგომარეობით ისარგებლა, საპრეზიდენტო არჩევნები გაურკვეველი ვადით გადადო და ამით მან ქვეყნის მართვის სადავეები ვადის განუსაზღვრელად საკუთარ ხელში ჩაიგდო, ანუ რეალურად აბსოლუტური ძალაუფლება მიიღო.

საინტერესოა და პარადოქსულიც კი ვოლოდიმირ ზელენსკის პოლიტიკურ ოპონენტთა რეაქცია: მათ ენთუზიაზმით დაუჭირეს მხარი კანონპროექტის მიღებას. მაგალითად, ყოფილმა პრემიერ-მინისტრმა იულია ტიმოშენკომ, რომელმაც მესამე ადგილი დაიკავა მიღებული ხმების რაოდენობით 2019 წლის საპრეზიდენტო არჩევნებში, უკრაინის დასავლელი პარტნიორები გააკრიტიკა და განაცხადა, რომ ისინი კიევის გაკონტროლებას ანტიკორუფციული ბიუროს მეშვეობით ცდილობენ.
რატომ დაიკავა იულია ტიმოშენკომ (და სხვებმაც) ზელენსკის მხარე? საქმე იმაშია, რომ ვოლოდიმირ ზელენსკიმ არამარტო გადაიბირა ოდესღაც გავლენიანი ოპოზიციური ძალები, არამედ დააშინა კიდეც: პრეზიდენტმა უფლებამოსილება განუსაზღვრელად გაუფართოვა თავის მრჩეველს, პრეზიდენტის ოფისის ხელმძღვანელს ანდრეი ერმაკს და ამით ხელი შეუწყო იმ ადამიანების დევნას, რომლებიც კორუფციას ამხელდნენ. რასაკვირველია, ასეთი მოქმედება შეუმჩნეველი არ დარჩენილა: 2024 წლის იანვარში Transparency International-ის უკრაინის ფილიალმა განაცხადა, რომ ჟურნალისტებზე თავდასხმებმა სისტემატური ხასიათი მიიღო. რამდენიმე თვის შემდეგ კი, აპრილში, უკრაინულმა უფლებადამცველმა ორგანიზაციებმა მანიფესტიც გამოაქვეყნეს ამ სამარცხვინო პრაქტიკის წინააღმდეგ. სამწუხაროდ, უშედეგოდ.

პრეზიდენტის ასეთი ხისტი მოქმედება მის მიმართ შექმნილ დამოკიდებულებას ამძიმებს: საზოგადოებაში მტკიცდება აზრი, რომ ვოლოდიმირ ზელენსკი ნამდვილად ძალაუფლების მოყვარულ პოლიტიკოსს და ავტორიტარულ ლიდერს წარმოადგენს.

კიევში გაჩენილი ლოზუნგები – „ჩვენ არჩევანი ევროპაზე გავაკეთეთ და არა დესპოტიაზე“ და „მამაჩემს სიცოცხლე ამისთვის არ გაუწირია“ – ამის ნათელი მაგალითია.

იმ შემთხვევაშიც კი, თუ უშიშროების სამსახური ანტიკორუფციულ ბიუროში რომელიმე პრორუსულად განწყობილ თანამშრომელს ან „რუსეთის ჯაშუშს“ აღმოაჩენს (რაც არ არის გამორიცხული), ვოლოდიმირ ზელენსკისათვის ძნელი იქნება მის მიმართ გაჩენილი ეჭვების გაფანტვა, რომ იგი ძალაუფლებას თავის სასარგებლოდ იყენებს.
კანონპროექტისადმი გამოხატული მხარდაჭერა ვოლოდიმირ ზელენსკის არა იძულებით შეცდომას წარმოადგენს, რომელიც მას არ ეპატიება და რომელიც ქვეყნის მთავარ უპირატესობას ემუქრება: მტრის წინააღმდეგ მებრძოლი უკრაინის ურყევ სიმტკიცეს.

მოამზადა სიმონ კილაძემ

წყარო:

ევროკავშირის ელჩის გაძევების საკითხი არ განიხილება, მაგრამ, ჩემზე რომ იყოს დამოკიდებული – გავაძევებდი, რადგან პირველ რიგში, პატივი უნდა სცენ ქართულ სახელმწიფოებრიობას-კახა კალაძე

თბილისის მერი კახა კალაძე მიიჩნევს, რომ ევროკავშირთან უვიზო მიმოსვლის შესაძლო გაუქმებაც იმ შანტაჟის ნაწილია, რომელსაც ქართველი ხალხი ბოლო პერიოდის განმავლობაში ხედავს.

როგორც მან შესაბამისი შეკითხვის საპასუხოდ განაცხადა, ის განცხადებები, რაც საქართველოსთან მიმართებით კეთდება, სიცრუითაა გაჯერებული.

„ეს არ არის პირველი შემთხვევა. მუქარები და შანტაჟი გრძელდება. განცხადებები,  რასაც ვისმენთ დაფუძნებულია ცილისწამებაზე, სიცრუეზე. ზოგადად, იმ განცხადებებს, რომლებიც ორ კანონთან დაკავშირებით მოვისმინეთ, საერთოდ არ გააჩნიათ კავშირი ვიზალიბერალიზაციასთან. ისინი მთელი ამ ხნის განმავლობაში ამბობდნენ, რომ კანდიდატის სტატუსი ქართველ ხალხს მისცეს და დღეს გამოდიან ინიციატივით, ქართველ ხალხს ის სიკეთე წაართვან, რაც ვიზალიბერალიზაციასთან არის დაკავშირებული. რეალურად, არც საქართველო აინტერესებთ, არც ქართველი ხალხი. მათ აქვთ მხოლოდ და მხოლოდ ერთი ინტერესი – საქართველო და ქართველი ხალხი გამოიყენონ თავიანთი დიდი პოლიტიკური თამაშებისთვის და თავიანთი ინტერესების გასატარებლად, როგორც ეს უკრაინასთან მიმართებაში გააკეთეს“, – განაცხადა კახა კალაძემ.

თბილისის მერი საქართველოში ევროკავშირის ელჩის მიერ ბოლო პერიოდში გაკეთებულ განცხადებებსაც გამოეხმაურა და აღნიშნა, რომ ევროკავშირის ოფიციალური წარმომადგენელი ასრულებს დავალებას და რასაც ეუბნებიან, იმას ამბობს.

„ყველაზე დიდი უბედურება არის ის, რასაც მაგალითად, ევროკავშირის ელჩისგან ვისმენთ; რასაც ვისმენდით არჩევნების პროცესში. არ ვიცი, როდის გააკეთა მსგავსი განცხადება და თუ მართლა გააკეთა, ქვეყნიდან გასაგდებია. ესეც, რა თქმა უნდა, იმ პოლიტიკის გაგრძელებაა, რასაც საქართველოსთან მიმართებაში ვხედავთ.
პიროვნულად მე მასთან საწინააღმდეგო არაფერი მაქვს, ნორმალური ადამიანია, მაგრამ ევროკავშირის ელჩი თავის სტატუსს იყენებს და მავნებლობს. ცხადია, ის ასრულებს დავალებას – რასაც ეუბნებიან, იმას აჟღერებს“, – აღნიშნა კახა კალაძემ.

კითხვაზე – ხომ არ დადგება საქართველოდან ევროკავშირის ელჩის გაწვევის საკითხი, თბილისის მერი პასუხობს, რომ ეს მხოლოდ და მხოლოდ მისი შეხედულებაა და მსგავსი საკითხი არ განიხილება.

„ეს ჩემი დამოკიდებულება და ხედვაა კონკრეტულ საკითხთან დაკავშირებით. ჩემზე რომ იყოს დამოკიდებული, რა თქმა უნდა, გავაძევებდი, რადგან პირველ რიგში, პატივი უნდა სცენ ქართულ სახელმწიფოებრიობას. ევროკავშირის,
ნებისმიერი ქვეყნის ელჩს არანაირი უფლება არ აქვს, ჩაერიოს ქვეყნის შიდაპოლიტიკურ საქმეებში, ხელი შეუწყოს საზოგადოების დაპირისპირებას, პოლარიზაციას. მე ელჩთან, როგორც ადამიანთან რაიმე საპირისპირო კი არ მაქვს?

მას აქვს სტატუსი, ის არის ევროკავშირის წარმომადგენელი და ოფიციალური პირი ქვეყანაში. კეთილი უნდა ინებოს და თავი შეიკავოს მსგავსი ტიპის განცხადებებისგან, რომლებიც გაჯერებულია ტყუილით, სიცრუით, ახალისებს
ექსტრემიზმს, ბოროტებას და ყველაფერ უბედურებას, რაც ქვეყანაში ხდება“, – განაცხადა თბილისის მერმა.

მისივე განმარტებით, ხელისუფლების ცვლილება ქვეყანაში დაპირისპირებისა და სახელმწიფო გადატრიალების ხარჯზე ვერ მოხდება, რადგან ამისთვის არსებობს ცივილური გზა – არჩევნები.

„თუ ვინმეს ხელისუფლების ცვლილება უნდა, ეს გადატრიალების და რევოლუციების გზით არ და ვერ იქნება. არსებობს არჩევნები, ცივილიზებული ფორმა, როდესაც უნდა მიხვიდე, დააფიქსირო შენი აზრი, თუ ვინ გინდა და
არჩევნების გზით მოხდეს ხელისუფლების გადაბარება. ევროკავშირის ბიუროკრატიას არ მოეწონა ის შედეგები, რომელიც დადგა 26 ოქტომბერს.

ისინი დამარცხდნენ და ყველა გზას, მეთოდს იყენებენ იმისთვის, რომ ქვეყანაში მოახდინონ სახელმწიფო გადატრიალება, დაპირისპირება, პოლარიზაცია და ა.შ. რა უბედურებაც ხდება ქვეყანაში, ყველაფერი მოდის დასავლური ბიუროკრატიიდან, მათი დაფინანსებით, მხარდაჭერით, მათი ფინანსური შესაძლებლობებით“, – აღნიშნა დედაქალაქის მერმა.

პროკურატურამ ბათუმში, სასტუმრო „ბილიონერის“ მიმდებარე ტერიტორიაზე განხორციელებული სროლის და განსაკუთრებით დიდი ოდენობით ნარკოტიკული საშუალების უკანონო შეძენა, შენახვის ფაქტზე ორ პირს ბრალდება წარუდგინა

საქართველოს პროკურატურამ ბათუმში, სასტუმრო „ბილიონერის“ მიმდებარე ტერიტორიაზე განხორციელებული სროლის, ცეცხლსასროლი იარაღის და საბრძოლო მასალის მართლსაწინააღმდეგო შეძენა, შენახვა, ტარების და განსაკუთრებით დიდი ოდენობით ნარკოტიკული საშუალების უკანონო შეძენა, შენახვის ფაქტზე თურქეთის რესპუბლიკის ორ მოქალაქეს ბრალდება წარუდგინა. ინფორმაციას პროკურატურის პრესსამსახური ავრცელებს.

უწყების ცნობით, შინაგან საქმეთა სამინისტროს მიერ ჩატარებული გამოძიებით დადგინდა, ბრალდებულებმა მართლსაწინააღმდეგოდ შეიძინეს და ინახავდნენ ცეცხლსასროლ იარაღს, რითაც ერთ-ერთმა ბრალდებულმა ბათუმში, ჟიული შარტავას ქუჩაზე მდებარე სასტუმრო „ბილიონერის“ მიმართულებით რამდენიმე გასროლა განახორციელა. სროლის შედეგად დაზიანდა სასტუმროში შესასვლელი კარის შუშა, გარე ფასადი და უხეშად მოხდა საზოგადოებრივი წესრიგის დარღვევა.

„გამოძიებით ასევე დადგინდა, რომ ბრალდებულებმა უკანონოდ შეიძინეს და ინახავდნენ განსაკუთრებით დიდი ოდენობით 7,974 გრ. ნარკოტიკულ საშუალება კოკაინს (ფუძე), რაც სამართალდამცველებმა ბრალდებულების პირადი და საცხოვრებელი ადგილის ჩხრეკის შედეგად ამოიღეს.

სამართალდამცველებმა ბრალდებულები 22 ივლისს დააკავეს, მათ ბრალდება საქართველოს სისხლის სამართლის კოდექსის 236-ე მუხლის მე-6 ნაწილის „ა“ ქვეპუნქტით (ცეცხლსასროლი იარაღის და საბრძოლო მასალის მართლსაწინააღმდეგო შეძენა, შენახვა, ტარება, ჩადენილი ჯგუფურად), 239-ე მუხლის მე-3 ნაწილით (ხულიგნობა, ესე იგი ქმედება, რომელიც უხეშად არღვევს საზოგადოებრივ წესრიგს და გამოხატავს საზოგადოებისადმი აშკარა უპატივცემულობას, ჩადენილი ძალადობის მუქარით, წინასწარი შეთანხმებით ჯგუფის მიერ, ცეცხლსასროლი იარაღის გამოყენებით) და 260-ე მუხლის მე-3 ნაწილის „ა“ ქვეპუნქტით (განსაკუთრებით დიდი ოდენობით ნარკოტიკული საშუალების უკანონო შეძენა, შენახვა) წარედგინათ, რაც სასჯელის სახედ და ზომად 20 წლამდე ან უვადო თავისუფლების აღკვეთას ითვალისწინებს. პროკურატურამ ბრალდებულებისთვის აღკვეთის ღონისძიების სახით პატიმრობის შეფარდების შუამდგომლობით სასამართლოს უკვე მიმართა“, – აღნიშნულია ინფორმაციაში.

აგვისტოში წარვადგენთ მაჟორიტარობის კანდიდატებს, იქნებიან ახალი სახეებიც – კალაძე

„არჩევნებისთვის მზადება უკვე დაწყებული გვაქვს. არასდროს ვწყვეტთ კომუნიკაციას ხალხთან და ეს არის ჩვენი გუნდის ძალიან დიდი სიძლიერე“, – ამის შესახებ დედაქალაქის მერმა მედიასთან ადგილობრივი თვითმმართველობის საკითხზე კომენტირებისას ისაუბრა.

კახა კალაძის თქმით, მას არ სურს ოპოზიციაზე საუბარი, რადგან ისინი თავად ვერ გარკვეულან მიიღებენ თუ არა არჩევნებში მონაწილეობას, ან ვინ იქნება მერობის მათი კანდიდატი.

„ვფიქრობ ძალიან მნიშვნელოვანია ადგილობრივი თვითმმართველობის არჩევნები, რადგან საქმე ეხება კონკრეტულ უბნებში, რაიონებში საყოფაცხოვრებო პირობების გაუმჯობესებას. ბოლო წლებში ბევრი კარგი პროექტი განხორციელდა, როგორც დედაქალაქში, ასევე რეგიონებში, სოფლებში, ქალაქებში. ცხადია, არსებობს გამოწვევები. მე თბილისზე ძალიან ბევრი შემიძლია ვისაუბრო, რადგან ყველა პრობლემა ვიცით, რაც უნდა მოგვარდეს და რა უნდა გაკეთდეს. გვაქვს საკმაოდ ამბიციური გეგმები. ოპოზიციაზე არ მინდა ვისაუბრო. ეს არ არის ჩემი საქმე. თავად ვერ გარკვეულან ერთმანეთში. არსებითი მნიშვნელობა არ აქვს, ვინ, როგორი ფორმით წარდგება არჩევნებში. მთავარი არის ის, რომ ჩვენ არჩევნებისთვის მზადება უკვე დაწყებული გვაქვს. არასდროს ვწყვეტთ კომუნიკაციას ხალხთან და ეს არის ჩვენი გუნდის ძალიან დიდი სიძლიერე. ერთადერთი პარტია, ვისაც რეალურად გააჩნია კონკრეტული ხედვა, თუ რა უნდა გაკეთდეს თუნდაც დედაქალაქში და როგორ ვუპასუხოთ გამოწვევებს, ეს არის „ქართული ოცნება-დემოკრატიული საქართველო“, – აღნიშნა დედაქალაქის მერმა.

რაც შეეხება ჟურნალისტის კითხვას, იქნება თუ არა კახა კალაძე თბილისის მერობის კანდიდატი, მისი თქმით: „თქვენ ძალიან ნერვიულობთ ჩემს კანდიდატურაზე. გაგიხარდებათ, როგორც მოქალაქეს, მე რომ ვიყო თბილისის მერი? დაელოდეთ და თავის დროზე ყველაფერი ცხადი გახდება“.

მისივე თქმით, „ქართული ოცნება“ აგვისტოში მაჟორიტარობის კანდიდატებს წარადგენს და მათ შორის ახალი სახეებიც იქნებიან.

„აგვისტოში უკვე წარვადგენთ მაჟორიტარობის კანდიდატებს და დეტალურ ინფორმაციას მივაწვდით საზოგადოებას. გვეყოლება ახალი სახეებიც. მნიშვნელოვანია ხალხში გასვლა, პირდაპირი კომუნიკაცია. ვინც დიდი ხანია საკრებულოშია და ჩვენს გუნდს წარმოადგენს, მათ მოსახლეობასთან კონტაქტი არასდროს გაუწყვეტიათ. ახალი სახეებიც პირველივე დღიდან ჩაერთვებიან ამ პროცესში“, – განაცხადა კახა კალაძემ.

დოკუმენტი გაჯერებულია სიცრუით და ცილისწამებით, გამოაშკარავდა ისიც, თუ რის შედეგად მოხდა ამ ყველაფრის ჩაწერა -კახა კალაძე “მეგობარ აქტზე”

„მეგობარი აქტი“ გაჯერებულია სიცრუით და ცილისწამებით, გამოაშკარავდა ისიც, თუ რის შედეგად მოხდა ამ ყველაფრის ჩაწერა – პატივცემულ უილსონს 87 ათასი აქვს აღებული იმაში, რომ საქართველო გააშავოს, – განუცხადა დღეს დედაქალაქის მერმა კახა კალაძემ, აშშ-ის სენატში „მეგობარი აქტის“ შეჩერებასთან დაკავშირებით, ჟურნალისტებს.

კახა კალაძის თქმით, მისთვის უცნობია, საბოლოოდ რა გადაწყვეტილება იქნება მიღებული „მეგობარ აქტთან“ დაკავშირებით.

„რა გადაწყვეტილება იქნება მიღებული აღნიშნულ აქტთან დაკავშირებით, არ ვიცი. ერთი შემიძლია გითხრათ, რომ აქტი სრულად გაჯერებულია სიცრუით, ცილისწამებით, ტყუილით. უკვე გამოაშკარავდა ისიც, თუ რის შედეგად მოხდა ამ ყველაფრის ჩაწერა აქტში. სულ 360 ათასია გადახდილი, ხოლო კონკრეტულ კონგრესმენს, პატივცემულ უილსონს 87 ათასი აქვს აღებული იმაში, რომ საქართველო გააშავოს და ცრუ ინფორმაციით გააჯეროს აღნიშნული დოკუმენტი. ეს არის მოცემულობა, რეალობა და ეს არის სიმართლე, რაც ცნობილი გახდა FARA-ს კანონით“, – განაცხადა კახა კალაძემ.

მისი თქმით, ყველა ხვდება, თუ რატომ ეწინააღმდეგებიან საქართველოში FARA-ს ანალოგიური კანონის მიღებას.

„ზოგადად, აღნიშნული კანონის მიღების აუცილებლობა არ იქნებოდა, რომ არა ის შემოტევები, სახელმწიფო გადატრიალების მცდელობები, რაც ქვეყანაში ბოლო წლების განმავლობაში რამდენჯერმე ვიხილეთ. თუმცა, არავის არაფერი გამოუვა – ჩვენ ხალხთან ერთად დავიცავთ ქვეყნისა და ქართველი ხალხის ინტერესს“, – აღნიშნა დედაქალაქის მერმა.

AI-ს საერთაშორისო დღის აღსანიშნავად თიბისიმ განსხვავებული კონცეფციის AI Meet-up ჩაატარა

AI-ს საერთაშორისო დღის ფარგლებში, სპეციალურად თიბისი IT აკადემიის ალუმნისთვის AI Meet-up გაიმართა, რომელსაც 100-მდე სტუდენტი დაესწრო. ღონისძიება, რომელიც თიბისი IT აკადემიისა და თიბისის Data & AI გუნდის ერთობლივი ორგანიზებით შედგა, მიზნად ისახავდა მონაწილეთა ცოდნის გაღრმავებასა და პრაქტიკული გამოცდილების მიღებას ხელოვნური ინტელექტის მიმართულებით.

ღონისძიების პირველი ნაწილი დაეთმო თიბისის AI და მონაცემთა მიმართულების ლიდერების ინსპირაციულ Spark Talks-ებს, რომელიც ეხებოდა ხელოვნური ინტელექტის ყოველდღიურ საჭიროებებსა და ტექნიკურ ასპექტებს – მონაცემთა დამუშავებიდან დაწყებული, Generative AI-ის გამოყენებით ეფექტური ბრძანების წერის ტექნიკებით დასრულებული.

ღონისძიების მეორე ნაწილი განსხვავებული კონცეფციით წარიმართა – ინტერაქციული Dilemma Game-ის ფორმატში. მონაწილეებმა გუნდებად იმუშავეს რეალურ ბიზნეს-ქეისებზე. თამაში ფოკუსირებული იყო AI სისტემების უზუსტობებზე, ეთიკურ საკითხებზე, რისკების მართვასა და მომხმარებელზე ალგორითმული გადაწყვეტილებების გავლენაზე.

“ღონისძიება კიდევ ერთხელ უსვამს ხაზს ჩვენს სტრატეგიულ მიდგომას – ხელი შევუწყოთ ცოდნაზე დაფუძნებული ტექნოლოგიური ეკოსისტემის განვითარებას და ახალგაზრდების გაძლიერებას” – თქვა თათა ანჯაფარიძემ, თიბისი IT აკადემიის ლიდმა, რომელიც მონაწილეებს აკადემიის ტექ კომუნის გაძლიერების მნიშვნელობაზე ესაუბრა.

თიბისისთვის AI არის ყოველდღიურობის ნაწილი, სტრატეგიული მიმართულება და ქვეყნის ციფრული მომავლის შენების ერთ-ერთი მთავარი ძრავა.

2014 წლიდან დღემდე, თიბისი არაერთ მნიშვნელოვან AI პროექტს ახორციელებს და სხვადასხვა მიმართულებით ინტეგრირებული ხელოვნური ინტელექტი ყოველდღიურად ცვლის კომპანიის შიდა პროცესებსა და მომხმარებელთან ურთიერთობას. უკვე წარმატებით განხორციელდა მრავალი ინიციატივა; ხოლო რიგი მასშტაბური პროექტები რეალიზაციის პროცესშია.

თიბისი გეგმავს, მომავალშიც აქტიურად განავითაროს AI ეკოსისტემა ქვეყანაში, დარჩეს მისი ერთ-ერთი მთავარი კონტრიბუტორი და წამყვანი მოთამაშე როგორც ბიზნესში, ისე განათლებისა და ინოვაციების სფეროში.

(R)

მიგრაციის დეპარტამენტის თანამშრომლებმა ჩატარებული სპეციალური საიმიგრაციო კონტროლის ღონისძიების შედეგად უცხო ქვეყნის 13 მოქალაქე დააკავეს

უკანონო მიგრაციის წინააღმდეგ ბრძოლის ფარგლებში, შინაგან საქმეთა სამინისტროს მიგრაციის დეპარტამენტის თანამშრომლებმა, სპეციალური საიმიგრაციო კონტროლის ღონისძიება ჩაატარეს, – ამის შესახებ შსს-ს მიერ გავრცელებულ ინფორმაციაშია ნათქვამი.

„მოპოვებული ინფორმაციის საფუძველზე, ღონისძიების ფარგლებში დეპარტამენტის თანამშრომლების მიერ გადამოწმდა კონკრეტული ლოკაციები, რაც მიზნად ისახავდა საქართველოში კანონიერი საფუძვლის გარეშე მყოფ უცხო ქვეყნის მოქალაქეთა გამოვლენას. კომპლექსური ღონისძიების შედეგად, დაკავებულია უცხო ქვეყნის 13 მოქალაქე. მათ შორის არიან – იორდანიის, ეგვიპტის, პაკისტანის, ინდოეთისა და თურქეთის მოქალაქეები.

დადგინდა, რომ ისინი ქვეყანაში იმყოფებოდნენ „უცხოელთა და მოქალაქეობის არმქონე პირთა სამართლებრივი მდგომარეობის შესახებ“ საქართველოს კანონით დადგენილ მოთხოვნათა დარღვევით“, – აღნიშნულია შსს-ს ინფორმაციაში.

მათივე ცნობით, ამჟამად აღნიშნული პირები მოთავსებულნი არიან მიგრაციის დეპარტამენტის დროებითი განთავსების ცენტრში და მიმდინარეობს შესაბამისი პროცედურები მათი ქვეყნიდან გაძევების მიზნით.

„მიგრაციის დეპარტამენტი სპეციალური საიმიგრაციო კონტროლის ღონისძიებას განახორციელებს რეგულარულად, რათა უზრუნველყოს „უცხოელთა და მოქალაქეობის არმქონე პირთა სამართლებრივი მდგომარეობის შესახებ“ საქართველოს კანონის ეფექტიანი აღსრულება“, – აცხადებენ შსს-ში.

პარტია „ანა დოლიძე – ხალხისთვის“ ადგილობრივ თვითმმართველობის არჩევნებში მონაწილეობას არ მიიღებს

პარტია „ანა დოლიძე – ხალხისთვის“ 4 ოქტომბერს, ადგილობრივი თვითმმართველობის არჩევნებში მონაწილეობას არ მიიღებს.

შესაბამისი განცხადება პარტიის ლიდერმა, ანა დოლიძემ ბრიფინგზე გააკეთა.

ანა დოლიძემ თვითმმართველობის არჩევნებს მსხვერპლშეწირვა უწოდა და განაცხადა, რომ მასში მონაწილეობა გაუმართლებელია.

„არ მივცემთ საშუალებას “ქართულ ოცნებას”, რომ საერთაშორისო ასპარეზზე სასაუბრო შეიქმნას, რომ არჩევნები ნორმალურად ჩაატარა”,- განაცხადა დოლიძემ.

ამასთან, მისივე თქმით, პარტია არჩევნების ბოიკოტსაც არ უერთდება და აღნიშნა, რომ რესურსების დახარჯვა, რომ „სოფელ-სოფელ იარო და ადამიანებს მოუწოდო, რაღაც არ გააკეთონ, არასწორია”.

„ჩვენს ძალებს მოვახმართ იმას, რომ შენარჩუნდეს უვიზო მიმოსვლა და სანქციები იყოს გამოყენებული კორუმპირებული და ძალაუფლებით თრობაში შესული ადამიანის მიმართ”,- განაცხადა დოლიძემ.

ადგილობრივ თვითმმართველობის არჩევნებში მონაწილეობას ოპოზიციური პარტიებიდან „ლელო – ძლიერი საქართველო“ და „გახარია საქართველოსთვის“ აპირებენ. მათ არჩევნებთან დაკავშირებით ურთიერთშეთანხმების მემორანდუმს ხელი 14 ივლისს მოაწერეს. რაც შეეხება სხვა ოპოზიციურ პარტიებს, 8 მათგანს ოფიციალურად გაცხადებული აქვს, რომ ადგილობრივ არჩევნებს ბოიკოტს უცხადებენ და მასში მონაწილეობას არ აპირებენ.

ვაპირებ, არჩევნებში მივიღო მონაწილეობა, უახლოეს მომავალში გვექნება ოფიციალური წარდგენა, მზადება უკვე დაწყებული გვაქვს და მალე გავხსნით საარჩევნო კამპანიას -კახა კალაძე

ქალაქის მოქმედი მერი ვარ, ვაპირებ, არჩევნებში მივიღო მონაწილეობა, ამაზე პრემიერ-მინისტრმაც ღიად ისაუბრა, – ამის შესახებ თბილისის მერმა, „ქართული ოცნების“ გენერალურმა მდივანმა, კახა კალაძემ გადაცემაში „იმედი LIVE“ განაცხადა.

ამგვარად კალაძემ უპასუხა კითხვას – ვის ელოდება კონკურენტებად თვითმმართველობის არჩევნებზე და ვინ შეიძლება გახდეს მისი საპირწონე?

როგორც კალაძემ აღნიშნა, კონკურენტებზე საუბარი არ სურს, მისი მხრიდან უხერხული იქნება.

ამასთან, კალაძის თქმით, „ქართული ოცნება“ საარჩევნო კამპანიას მალე დაიწყებს.

„უახლოეს მომავალში გვექნება უკვე ოფიციალური წარდგენა. ამის შემდეგ დავასახელებთ ასევე მაჟორიტარობის კანდიდატებს როგორც დედაქალაქში, ასევე მთელი ქვეყნის მასშტაბით. ჩვენ მზადება, მუშაობა უკვე დაწყებული გვაქვს და ძალიან მალე გავხსნით საარჩევნო კამპანიას, რომელიც გადავა აქტიურ ფაზაში. კონკურენტებს რაც შეეხება, კიდევ ერთხელ ვიმეორებ, არ მიყვარს ამაზე ლაპარაკი. მე ვესაუბრები ხალხს იმ გამოწვევებზე, პრობლემებზე, რომლებიც აქტუალურია, რომლებიც აწუხებს თბილისი მოსახლეობას“, – აღნიშნა კახა კალაძემ.

მისივე თქმით, თვითმმართველობის არჩევნებზე მმართველი პარტია გამარჯვებას მოიპოვებს.

„რეიტინგებს რაც შეეხება, პირდაპირ შემიძლია ვთქვა, რომ „ქართული ოცნება“ არის ის ძალა, რომელიც ყველა მუნიციპალიტეტში, ყველა ოლქში როგორც საკრებულოს დონეზე, ასევე მერების თვალსაზრისით მიიღებს 100-პროცენტიან გამარჯვებას“, – განაცხადა კახა კალაძემ.

PSP-ს კიდევ ერთი სიახლე – ამერიკული „შუგაბიარპროს“ (SugarBearPro) ვიტამინები ჯანსაღი ცხოვრებისთვის!

 

PSP-ს კიდევ ერთი განსაკუთრებული სიახლე ქართველ მომხმარებლებს ჯანსაღი ცხოვრებისთვის – ამერიკული კომპანია “შუგაბიარპროს” (SugarBearPro) -ს ვიტამინები თქვენი თმის, კანის, ფრჩხილის ჯანმრთელობის, ძილის ხარისხის გაუმჯობესების, იმუნიტეტის გაძლიერების, ქალის ჯანმრთელობისა და ენერგიის მოსამატებლად.

“შუგაბიარპრო” ამერიკული კომპანიაა, რომელმაც სახელი გაითქვა ინოვაციური, გემრიელი და მარტივად მისაღები ვიტამინების წარმოებით. ბრენდის მისიაა, ჯანსაღი ცხოვრების წესი ხელმისაწვდომი და სასიამოვნო გახადოს თანამედროვე მომხმარებლისთვის. 2015 წლიდან აწარმოებს პროდუქტებს FDA-ის რეგულაციებისა და GMP სტანდარტების სრული დაცვით.

პროდუქტები დამზადებულია ბუნებრივი, ჰიპოალერგიული და ვეგანური ფორმულებით, არ ტესტირდება ცხოველებზე (cruelty-free), არ შეიცავს ხელოვნურ დანამატებს, გლუტენს, სოიოსა და რძის პროდუქტებს, აქვს შესანიშნავი გემო და უზრუნველყოფს მომხმარებლის ჯანმრთელობას და სილამაზეს.

იდეა შეექმნათ ვიტამინები გემრიელი, საღეჭი ფორმით, რაც ჯანსაღი ცხოვრების წესს უფრო მარტივსა და მიმზიდველს გახდიდა საფუძვლად დაედო კომპანიის პირველი პროდუქტის – ცისფერი დათუნიას ფორმის საღეჭ ვიტამინებს თმისთვის, რომლის ინოვაციურმა ფორმატმა და სასიამოვნო გემომ პროდუქტს სწრაფად მოუტანა საერთაშორისო აღიარება. კომპანია აქტიურად არის ჩართული გარემოს დაცვით პროექტებში, დიდ მნიშვნელობას ანიჭებს ეკოლოგიურად სუფთა და გადამუშავებადი შეფუთვის გამოყენებას.

„შუგაბიარპროს“ ძალისხმევა, ყველასთვის მარტივი გახადოს ჯანსაღი ცხოვრების ხელშწყობა, PSP-ს მთავარ საზრუნავს პირდაპირ ეხმიანება, მომხმარებლის ჯანმრთელობასა და სილამაზეზე ზრუნვა 30 წელზე მეტია PSP-ეს მთავარი პრიორიტეტია“- აცხადებენ PSP-ში.

(R)

თიბისის განათლების შესაძლებლობები სტუდენტებისთვის:  გაიცანით ქეთი ქუთათელაძე

თიბისისთვის განათლება მნიშვნელოვანი სტრატეგიული მიმართულებაა და ამ გზაზე ახალი თაობის მხარდაჭერას აქტიურად განაგრძობს. თიბისი საგანმანათლებლო ფონდ „ვიზიონერის“ პარტნიორია და რამდენიმე სტუდენტს სრულად უფინანსებს სწავლის საფასურს, მათ შორისაა თავისუფალი უნივერსიტეტის ბიზნესის სკოლის სტუდენტი ქეთი ქუთათელაძე.   

“ჩემი მიზნების და ოცნებების ასრულება პირდაპირ უკავშირდება განათლებას, რადგან ის ცოდნა, რომელსაც უნივერსიტეტში ვიღებ, რეალურ ბიზნეს გარემოში უნდა გამოვიყენო. ამიტომ, მგონია, რომ განათლებას კრიტიკული როლი აქვს ჩემს კვალიფიკაციურ პერსონალად ჩამოყალიბებაში, წარმატების მიღწევაში, ჩემი და გარშემომყოფების ცხოვრების ხარისხის ამაღლებაში და საბოლოოდ, ქვეყნის განვითარებაში.”

ქეთის ამბავში განათლებას უამრავი, ერთმანეთისგან განსხვავებული და თან ერთმანეთთან მჭიდროდ დაკავშირებული ფუნქცია აქვს. თუმცა, ერთ-ერთი, მისი აზრით, ყველაზე გამორჩეული, განათლებით საკუთარი თავის აღმოჩენაა. ძიება იმ ინტერესების, რომლებიც პროფესიულ გზაზე თვალებს აგინთებს და ნებისმიერ მომენტში დაგაჯერებს – შენი შესაძლებლობები უსაზღვროა და ამ ამბავში შეუძლებელიც შესაძლებელია. 

ქეთის სჯერა, რომ განათლება არის ის, რაც დიდი გამარჯვებებისკენ მიმავალ გზაზე აუცილებლად სჭირდება. განათლებით შექმნის ამბავს, რომელსაც საკუთარი თავის რწმენით სწორედ ისე დაასრულებს, როგორც თავის ოცნებებში წარმოუდგენია.

“არა მხოლოდ განათლების კუთხით, საკუთარი თავის რწმენა ცხოვრების ნებისმიერ ასპექტში გადამწყვეტი მნიშვნელობისაა. შეიძლება გზის ბოლოს იყო მისული და საკუთარ თავში ეჭვის შეტანამ მოგაბრუნოს, როცა გამარჯვებამდე ძალიან ცოტა გაკლდა. ამიტომ უნდა გჯეროდეს, რომ შენს ცხოვრებას შენ აკონტროლებ და შეგიძლია, გადადგა თამამი ნაბიჯები, რომლებიც შენს ოცნებებს რეალობას აქცევს.”

სიცოცხლე უსასრულო აღმოჩენაა და ამ გზაზე თითოეული ადამიანი უნიკალურ ამბავს ქმნის. განათლება, განსაკუთრებით ახალი თაობის ცხოვრებაში, ამ ამბების ერთ-ერთი მთავარი მიმართულებაა. განათლების ამ რთულ, მაგრამ უსაზღვროდ საინტერესო მოგზაურობაში, საკუთარი ამბის შექმნაში ახალგაზრდებს თიბისი ეხმარება.

როგორი ამინდი იქნება 24 ივლისს საქართველოში

24 ივლისს ქუთაისში დღისით +32 და ღამით +22 გრადუსია მოსალოდნელი, სინოპტიკოსები წვიმიან ამინდს ვარაუდობენ.

ოზურგეთში უნალექო დღე იქნება. დღისით +32 გრადუსი დაფიქსირდება, ღამით კი +22. ბათუმშიც მზიანი დღეა. დღისით ჰაერი +32 გრადუსამდე გათბება, ხოლო ღამით +24 გრადუსი დაფიქსირდება.

ფოთში დღისით +32 გრადუსი დაფიქსირდება, ღამით კი +24 გრადუსია მოსალოდნელი. მზიანი ამინდია ზუგდიდშიც, სადაც დღისით ტემპერატურა +30, ღამით კი +23 გრადუსია ნავარაუდევი.

მზიანი ამინდია სოხუმში. +31 გრადუსია მოსალოდნელი დღისით, ღამით +23 გრადუსი დაფიქსირდება.

მესტიაში წვიმას ვარაუდობენ, დღისით +29 გრადუსი იქნება, ღამით კი +13 გრადუსი დაფიქსირდება. ამბროლაურშიც იწვიმებს. ჰაერი +29 გრადუსამდე გათბება, ღამით კი +13 გრადუსი დაფიქსირდება.

ჭიათურაში ნალექიანი დღე იქნება, დღისით +31 გრადუსი, ღამით კი +18 გრადუსი დაფიქსირდება.

ახალციხეში იწვიმებს. დღისით ჰაერი +31 გრადუსამდე გათბება, ღამით კი ტემპერატურა +16 გრადუსი იქნება.

ბორჯომშიც ნალექიანი დღეა, +32 იქნება დღისით, ღამით კი +15 გრადუსი დაფიქსირდება. წვიმაა მოსალოდნელი ბაკურიანშიც, დღისით +27 გრადუსია მოსალოდნელი, ღამით +9 გრადუსი დაფიქსირდება.

გორში უნალექო დღე იქნება. დღისით +35 გრადუსი, ღამის განმავლობაში კი +17 გრადუსი დაფიქსირდება. ცხინვალში მზიანი დღეა, ტემპერატურა +32 გრადუსი იქნება, ღამით კი +16 გრადუსი დაფიქსირდება.

გუდაურში წვიმიანი ამინდია მოსალოდნელი. დღის განმავლობაში +22 გრადუსი დაფიქსირდება, ღამით კი ჰაერის ტემპერატურა +10 გრადუსი იქნება.

ომალოში ნალექიან ამინდს ელოდებიან, დღისით +25, ღამით კი +11 გრადუსი დაფიქსირდება.

ლაგოდეხში მზიანი ამინდია. ჰაერის ტემპერატურა დღის განმავლობაში +38 გრადუსი იქნება, ღამით კი +24 გრადუსი დაფიქსირდება.

ნალექიანი დღე იქნება თელავში, +34 გრადუსი დაფიქსირდება, ღამით კი +22 გრადუსია ნავარაუდევი.

წვიმიან დღეს ვარაუდობენ გურჯაანში. დღისით +35 გრადუსი, ღამით კი +22 გრადუსი დაფიქსირდება.

სიღნაღში უნალექო ამინდია. დღისით +36 გრადუსი იქნება, ღამით +23 გრადუსი დაფიქსირდება.

რუსთავში წვიმიანი დღეა. დღისით +37 გრადუსია მოსალოდნელი, ღამით კი +23 გრადუსი დაფიქსირდება.

თბილისშიც სავარაუდოდ, იწვიმებს. ჰაერის ტემპერატურა დღისით +37 გრადუსს მიაღწევს, ღამით კი +22 გრადუსი იქნება.

123...2,887Page 1 of 2,887
ჩვენი არქივი

კონტაქტი

მის: ქ.თბილისი, მ.კოსტავას 59

ტელ: +995 32 93 44 05

ელ.ფოსტა: editor@geotimes.ge

ნავიგაცია

ონლაინ გაზეთი Geotimes.ge

დამატებითი რესურსი