„ერთიანი ნაციონალური მოძრაობის“ თავმჯდომარე თინა ბოკუჩავა აცხადებს, რომ მისმა მეუღლემ, კოტე იოსელიანმა უტა ივანიშვილს ბოდიში მას შემდეგ მოუხადა, რაც გაიტაცეს და მასზე ზეწოლა განახორციელეს. ამის შესახებ თინა ბოკუჩავამ ბრიფინგზე განაცხადა.

„საზოგადოების ნაწილმა ნახა ვიდეო, რომელიც გუშინ ჩემმა მეუღლემ, კოტე იოსელიანმა გამოაქვეყნა, სადაც თითქოს ბოდიშს იხდის მის მიერ 2018 წელს გაკეთებული საჯარო კომენტარის გამო უტა ივანიშვილთან დაკავშირებით. მინდა, მოვყვე, რა მოხდა ამ ვიდეოს ჩაწერამდე. მეუღლეს ჩვენი საცხოვრებელი სახლის სადარბაზოს მიმდებარე ტერიტორიაზე, ვაკის აუზთან, სადაც ვცხოვრობთ ჩვენს სამ მცირეწლოვან შვილთან ერთად, ღამით ჩაუსაფრდა ხუთი ნიღბიანი პირი. მას თავს დაესხნენ, თუმცა მძიმე ფიზიკური დაზიანებების მიყენება ვერ შეძლეს. ამ ფიზიკური დაპირისპირების შედეგად, ჩემი მეუღლე ჩასვეს მანქანაში, აუხვიეს თვალები და თვალებახვეული, ხელებშეკრული გაიტაცეს უცნობი მიმართულებით. ჩვენთვის შეუძლებელია, დავადგინოთ ზუსტი ლოკაცია მისი გატაცების, რადგან იყო თვალებახვეული მთელი ამ პერიოდის განმავლობაში, თუმცა დისტანციიდან და ტრაექტორიიდან გამომდინარე, ვვარაუდობთ, რომ ის გაიტაცეს და შემდგომ მრავალი საათის განმავლობაში იმყოფებოდა ე.წ. მოდულის შენობაში.

ადგილზე მიყვანის შემდეგ, გამტაცებლები რვა საათის განმავლობაში ახორციელებდნენ მასზე ზეწოლას, უსახელებდნენ მისი ყოველდღიური გადაადგილების მარშრუტს. მათ შორის ჩვენი უფროსი, ათი წლის შვილის სკოლის და ჩვენი 2.5 წლის ტყუპების ბაღის ადგილმდებარეობას. მთელი ამ პერიოდის განმავლობაში მასზე ხორციელდებოდა ზეწოლა და მუქარა. ემუქრებოდნენ კონკრეტულად ბავშვების უსაფრთხოებით. მიუხედავად იმისა, რომ მე მთელი ღამის განმავლობაში ვცდილობდი მეუღლესთან დაკავშირებას, მას არ აძლევდნენ თავის პირად ტელეფონთან წვდომას. ყველას პირადი ცხოვრება პირადია, წერტილი, მაგრამ, ყველას კარგად გვესმის, რომ უტა ივანიშვილზე შვიდი წლის წინ გაკეთებული განცხადება, რომელზეც კოტემ ფაქტიდან სამ დღეშივე საჯაროდ მოიხადა ბოდიში, გუშინდელი კოტეს ძალადობრივი გატაცების რეალური მიზეზი არ არის და ეს არის მხოლოდ საბაბი. რეალური მიზეზი კი არის ჩემი დაშინება და ჩემი გაჩუმება. ბიძინა ივანიშვილის, მისი ოჯახის ყველა წევრის, კოტეს გამტაცებლების და გატაცების დამკვეთების, მათ შორის გელა გელაძის, რომელიც, როგორც მეუბნებიან, მე, როდესაც აშშ-ში პოლიტიკურ მეცნიერებას ვსწავლობდი, ვანო მერაბიშვილის ყურმოჭრილი მონა იყო, ყველას გასაგონად მინდა, გარკვევით ვთქვა – არ მეშინია, არ გავჩუმდები და ვიბრძოლებ თქვენი ძალადობრივი, მოღალატეობრივი რეჟიმის დემონტაჟისთვის. რეჟიმმა ჩათვალა, რომ ისინი მე ვერ მიჭერენ და ამიტომ გადაწყვიტეს ჩემზე განახორციელონ ზეწოლა ჩემი ოჯახით. კიდევ ერთხელ ვიტყვი, რომ არ მეშინია, არ გავჩუმდები და ყოველთვის ვიტყვი სიმართლეს, რადგან მხოლოდ სიმართლით შეგვიძლია, დავამარცხოთ რეჟიმის სიცრუე, სიმხდალე, რეჟიმის ბოროტება და მათი ღალატი.

აქვე ვიტყვი – მორიგი სიცრუე და თვალთმაქცობაა ადგილობრივი თვითმმართველობის არჩევნებზე ივანიშვილთან ვითომ შერკინება. ეს არის თავისა და ხალხის მოტყუება. აქაც უნდა ითქვას სიმართლე. ამ არჩევნებად წოდებულ სპეცოპერაციაში შესვლა, შეიძლება, იყოს მხოლოდ ივანიშვილთან გარიგების შედეგი და მე ძალიან დიდი იმედი მაქვს, ჩემთვის პატივსაცემი ადამიანები ივანიშვილთან ასეთ გარიგებაში არ შევლენ“, – განაცხადა თინა ბოკუჩავამ.

კოტე იოსელიანმა გუშინ სოციალურ ქსელში ვიდეო გამოაქვეყნა, სადაც „ქართული ოცნების“ დამფუძნებლის, ბიძინა ივანიშვილის შვილს, უტა ივანიშვილს ბოდიშს უხდის.

საქართველოში ვიღაცას პოლიტიკური პროცესი ჰგონია არა სერიოზული მსჯელობა, არამედ იარლიყების და „ფეისბუკით“ შეურაცხყოფების მიყენება, ამიტომ ვართ ამ დღეში, – ამის შესახებ „ლელოს“ ლიდერმა, მამუკა ხაზარაძემ ერთ-ერთი მედიის ეთერში განაცხადა.

ხაზარაძის თქმით, საჭიროა ოთხი კოალიციური გაერთიანების ფორმატში სერიოზული მსჯელობა.

„ყველას მოვუწოდებ, საკმაოდ მძიმე ვითარებაა და მოდით, ყველა ის ძალა, ენერგია და ცოდნა, რომელიც გვაქვს, დავუთმოთ იმას, რომ არგუმენტირებულად ვიმსჯელოთ. შეცდომა არ დავუშვათ, რომელიც ძალიან ბევრჯერ დაუშვა ოპოზიციამ წარსულში – ამიტომ არის ბიძინა ივანიშვილი 13 წელი ხელისუფლებაში – და ამის მერე ერთიანი პოზიციით გამოვიდეთ. სერიოზული მსჯელობა გვჭირდება ოთხი კოალიციური გაერთიანების ფორმატში. ეს არის ფორმატი, რომელმაც მოიგო არჩევნები, ეს არის ის ფორმატი პრეზიდენტთან, რომელიც ითხოვს ახალ არჩევნებს და პოლიტპატიმრების გამოშვებას. ეს მოთხოვნა არის ძალაში. რა იქნება უკეთესი: ბოიკოტი თუ არჩევნებში მონაწილეობა? – ჩვენ ვიცით ჩვენი პოზიცია. ჩვენ ყოველთვის ვართ ბრძოლის ხაზზე და ვართ ბრძოლაში შესვლის მომხრეები. მიგვაჩნია, რომ ახალი არჩევნები, პოლიტპატიმრების გამოშვება გაძლიერდება, თუ ჩვენ ამ ხელისუფლებას ადგილობრივ არჩევნებშიც დავამარცხებთ, მით უმეტეს, მოგებულია ხუთი ქალაქი, მაგრამ ეს მსჯელობის საკითხია, სხვას სხვანაირი აზრი აქვს. ამიტომ, დღეს, ხვალ და ამ დღეებში ვხვდებით პოლიტპატიმრების დედებს, აქტივისტებს, რომლებიც რუსთაველზე არიან, ვხვდებით იმ ადამიანებს, რომლებსაც უნდათ ნორმალური მსჯელობა.

როცა ლაპარაკია ფორმატზე, ეს ფორმატი გულისხმობს იმის გაგრძელებას, რაც იყო შარშან. ეს იყო პარტია, სადაც მოვაწერეთ ხელი. შემდეგ იყო ოთხი კოალიცია, რომელმაც გაიმარჯვა არჩევნებში. ჩვენ გვინდა, ამ ფორმატში გაგრძელდეს საუბარი. სამწუხაროდ, მარტო ჩვენი კოალიციაა წარმოდგენილი და რამდენიმე პარტია სხვა კოალიციიდან, მაგრამ სამი კოალიცია იქ არ მონაწილეობს. ამიტომ დიდი სურვილი მაქვს, ეს ფორმატი აღდგეს და ერთიანი ფორმატი შეიქმნას“, – განაცხადა მამუკა ხაზარაძემ.

რაებს არ იძახდნენ, ტოპ-ტვინები დავჯდებითო და ტოპ-ანალიტიკოსები დავდებთ [საპარლამენტო არჩევნების] გაყალბების სქემასო. რაებს არ ლაპარაკობდნენ. და ბიჭო, ამხელა რაღაც თუ დაგემართა, 1% შენი ამომრჩევლის, რატომ ვერ გამოგყავს გარეთ? ფული თუ არ გადაუხადე, მარშს რატომ ვერ აკეთებ? – განაცხადა თამარ ჩერგოლეიშვილმა მამუკა ხაზარაძეზე საუბრისას.

მისი შეფასებით, არჩევნების შემდეგ, „ლელოს“ ლიდერმა ამის გამო კრახი განიცადა.

„ამ ბარიერს ისე აფრინდებიან, თითქოს თვითონ არ ყვიროდნენ, გაყალბდა ის არჩევნები ასობით ათასი ხმითო. იმ ასობით ათას ხმაში „გირჩს“ რატომ არ გაუყალბდა მაშინ? რადგან იაგოს „გირჩია“? არც მე „მევასება“ იაგო, მაგრამ სიმართლე სიმართლეა. მხოლოდ იმ პარტიებმა უნდა ვილაპარაკოთო, ვის უკანაც ათობით და ასობით ათასი ამომრჩეველი დგასო, რაც გაყალბებულ არჩევნებში განისაზღვრა. და ეს ათობით და ასობით ათასი ამომრჩეველი სად იყო არჩევნების მერე, როდესაც ხმები გაყალბდა?

მისმა კოალიციამ მიიღო 190 ათას ხმამდე მგონი, შეიძლება მეშლება, მაგრამ სადღაც მაგ ფარგლებშია. 1900 კაცი მაინც რატომ ვერ გამოჰყავს ქუჩაში? 1%, 10%-ს კი არ ვთხოვ – 1%. რატომ ვერ გამოჰყავს ქუჩაში? სად არის ეს ათობით და ასობით ათასი კაცი? ანუ, ხომ უნდა მიხვდეს, რომ რაღაც გატეხილია მის პროცესში, თუ მის სასოწარკვეთილ ყვირილს „ხალხო გამოდით, არჩევნები გაგვიყალბებს“ 1 თვის განმავლობაში, მისი ამომრჩევლის – ვინც „ლელო“ შემოხაზა, იმის 1%-იც არ გამოეხმაურა. ცოტათი თავმდაბლობას ხომ უნდა სძენდეს ადამიანს, როდესაც ასეთი კრახი დაგემართება?“ – აცხადებს ჩერგოლეიშვილი.