მინისტერიალზე განვიხილეთ მოლდოვასა და საქართველოში არსებული ვითარება, ორივე ქვეყანა მომავალ კვირებში მნიშვნელოვანი არჩევნების წინაშე დგას, – ამის შესახებ ევროკავშირის საგარეო პოლიტიკური უწყების ხელმძღვანელმა, ჯოზეფ ბორელმა ევროკავშირის საგარეო საქმეთა მინისტერიალის შემდეგ გამართულ პრესკონფერენციაზე განაცხადა.

ბორელის თქმით, მომავალი საპარლამენტო არჩევნები საქართველოსთვის გადამწყვეტი ტესტი იქნება.

ამასთან, ჯოზეფ ბორელი აცხადებს, რომ მოლდოვა მნიშვნელოვან პროგრესს აღწევს ევროკავშირისკენ მიმავალ გზაზე, რუსეთის მზარდი დაშინების მიუხედავად.

„ჩვენ ვხედავთ, რომ რუსეთი არ იშურებს ძალისხმევას საარჩევნო პროცესის ჩასაშლელად ჰიბრიდული თავდასხმებისა და ამომრჩეველთა ფართოდ გავრცელებული უკანონო მოსყიდვის გზით. ჩვენ ვაფასებთ მოლდოვის მთავრობის გამძლეობას ამ უპრეცედენტო გამოწვევების წინაშე და განვაგრძობთ ჩვენ მხარდაჭერას. საქართველოში უარესი სურათია. მმართველი პარტიის ბოლოდროინდელი ქმედებები, განცხადებები და საარჩევნო დაპირებები ქვეყანას ევროპული გზიდან აშორებს და ავტორიტარიზმისკენ ხრის. სწორედ ამიტომ არის ევროკავშირში გაწევრიანების პროცესი ფაქტობრივად შეჩერებული. თქვენ იცით კომისიის მიერ მიღებული გადაწყვეტილებები ევროპული დაფინანსების ხელმისაწვდომობის თვალსაზრისით. დაველოდოთ მომავალ საპარლამენტო არჩევნებს, რომელიც გადამწყვეტი ტესტი იქნება საქართველოს დემოკრატიისა და მისი ევროკავშირისკენ მიმავალი გზისთვის“, – განაცხადა ბორელმა.

სწორედ მანდ ხართ ყველაზე მეტი ავტოგოლის ავტორები, ის ელჩები ვინც აქ ჩამობრძანდით და საქართველო საკუთარი საფეოდალო გგონიათ, – ასე ეხმიანება “ხალხის ძალის“ წევრი, ზურაბ ქადაგიძე, გერმანიის ელჩის, პეტერ ფიშერის განცხადებას – “დღეს ვიღაცამ ავტოგოლი გაიტანა“, რომელიც მან სავარაუდოდ თბილისის მერის, კახა კალაძის მისამართით სოციალურ ქსელში დაწერა.

ქადაგიძის განცხადებით, ფიშერი ამდენის უფლებას თავს იმიტომ აძლევს რომ თავი პლანტატორი ჰგონია და საქართველოს, როგორც საკუთარ საფეოდალოს, ისე უყურებს. მისი თქმით, უცხოელი დიპლომატების ასეთი ყელყელაობა 26 ოქტომბერს უნდა დასრულდეს.

“ვატყობ, ეს და კიდევ რამდენიმე ამის კოლეგა ელჩი, ბომბეი – ლონდონის რეისს გაჰყვება სამშობლოში მალე. რატომ ბედავს ამდენს?
იმიტომ რომ თავი პლანტატორი ჰგონია და თავის პლანტაციაში, რასაც უნდა იმას კადრულობს.

სწორედ მანდ ხართ ყველაზე მეტი ავტოგოლის ავტორები, ის ელჩები ვინც აქ ჩამობრძანდით და საქართველო საკუთარი საფეოდალო გგონიათ. შენ გგონია, ბუნდესტაგის სამარცხვინო წარმომადგენელი როთი, რომ ჩამოახირეთ აქ და საქართველოს მოქალაქეებს შეურაცხყოფა მოგვაყენა დაგვავიწყდა?! შენ ერთი განცხადებაც კი არ გაგიკეთებია შენი ქვეყნის შემარცხვენლის ნაძირალობაზე. 26 ოქტომბერს უნდა დასრულდეს ამათი
ყველას ყელყელაობა საქართველოში!“ – წერს ზურაბ ქადაგიძე Facebook-ზე.

ტექნიკური მთავრობის იდეასთან დაკავშირებით ოპოზიციის ვითომ აზრთა სხვადასხვაობა თამაშის ნაწილია, – განაცხადა მედიასთან საუბარში პარლამენტის დეპუტატმა დიმიტრი ხუნდაძემ.

მისივე თქმით, რადიკალური ოპოზიციას მართავს სალომე ზურაბიშვილი, რომელიც თავის გადაწყვეტილებებში თავად არ არის დამოუკიდებელი და დაკვეთებს ქვეყნის გარედან იღებს.

„სალომე ზურაბიშვილი რას გეგმავს, ვფიქრობ თავადაც არ იცის, თუმცა ის აკეთებს იმას, რასაც უკვეთენ. ტექნიკური მთავრობის წარდგენის ინიციატივა პირველი არ არის. გვახსოვს, რადიკალურმა ოპოზიციამ საზოგადოება რუსთაველის გამზირზე რომ შეკრიბა, თითქოსდა იმის საკითხავად ევროპა გსურთ თუ არაო? მაშინ არასამთავრობო ორგანიზაციების უდიდესი ნაწილი, პოლიტიკურ სცენაზე შეხტა და ტექნიკური მთავრობის ჩამოყალიბება მოითხოვა. რადიკალები და მასთან კავშირში მყოფი „ენჯეოები“, ისევ იმავე ორომტრიალში არიან, თუმცა მათი ეს მცდელობაც უშედეგოდ დასრულდება. საზოგადოება ხედავს, რომ გარე დაკვეთების შემსრულებელი და ოპოზიციური შტაბის ხელმძღვანელი სალომე ზურაბიშვილია. ყველაფერს აკეთებენ იმისთვის, რომ ქვეყანაში დათესონ ნიჰილიზმი და სხვადასხვა მოგონილი თემებით გადაფარონ არჩევნები.

საზოგადოებას უკვე ეტყობა რა გადაწყვეტილებას მიიღებს არჩევნების დღეს, რაც აწუხებს ოპოზიციას და მათ პატრონებს. მათ არ სურთ სიმშვიდე. ისინი საუბრობენ არჩევნების გაყალბებაზე, არადა თავად არიან არჩევნების გაყალბების მცდელობის ავტორები, როცა ISFED -ის დახმარებით სცადეს არჩევნების გაყალბება. არჩევნების უკვე გადაწყვეტილ შედეგს ვერანაირი ხერხით ვერ შეცვლიან.

ტექნიკური მთავრობის იდეასთან დაკავშირებით ოპოზიციის ვითომდა აზრთა სხვადასხვაობა თამაშის ნაწილია. სურთ წარმოაჩინონ, ისე, თითქოს სხვადასხვა აზრზე არიან, თავისუფალია მათი აზროვნება და პოლიტიკური პოზირება. რადიკალური ოპოზიცია იმართება ერთი კაბინეტიდან – ეს შტაბი დღეს მდებარეობს სალომე ზურაბიშვილის სასახლეში, მაგრამ არც სალომე ზურაბიშვილია დამოუკიდებელი თავის გადაწყვეტილებებში, რაშიც არაერთხელ დავრწმუნდით“, – განაცხადა დიმიტრი ხუნდაძემ.

საუკუნეების მანძილზე ქრისტიანობა, მართლმადიდებლობა არის ის, რაც იფარავს ჩვენს ქვეყანას და გვეხმარება, შევინარჩუნოთ ჩვენი თვითმყოფადობა, – განაცხადა საქართველოს პრემიერ-მინისტრმა ირაკლი კობახიძემ სვეტიცხოველში, სადაც სვეტიცხოვლობის დღესასწაულთან დაკავშირებით საზეიმო წირვას დაესწრო.

მთავრობის მეთაურმა ტაძარში შეკრებილ მრევლს ამბიონიდან მიმართა და სვეტიცხოვლობის დღესასწაული მიულოცა.

„სვეტიცხოვლობას ვულოცავ ჩვენს ქვეყანას, ვულოცავ დედა ეკლესიას, განსაკუთრებული მოწიწებით ვულოცავ უწმინდესსა და უნეტარესს, ჩვენს უძვირფასეს და უსაყვარლეს კათოლიკოს-პატრიარქს, ილია მეორეს, ვულოცავ ტახტის მოსაყდრეს, მეუფე შიოს, წმინდა სინოდის წევრებს, მღვდელმთავრებს, ყველა სასულიერო პირს, რომელიც ემსახურება ღვთის და ეკლესიის საქმეს ჩვენს ქვეყანაში. ვულოცავ მრევლს, გილოცავთ თითოეულ თქვენგანს, ვულოცავ განსაკუთრებით საზღვარგარეთ მცხოვრებ ჩვენს თანამემამულეებს. ვულოცავ მცხეთელებს, ღმერთის საჩუქარია, გერქვას მცხეთელი და იყო ამ დიდებული ქალაქის მკვიდრი. მცხეთა არის ადგილი, სადაც საქართველო პირველად ეზიარა ქრისტიანობას. ეს არის ის ადგილი, სადაც მეფე მირიანმა იხილა ღვთისგან მოვლენილი სასწაული, აღიარა ჭეშმარიტი ღმერთი და გააქრისტიანა ჩვენი ქვეყანა და მას შემდეგ, 17 საუკუნის მანძილზე ქრისტიანობა და მართლმადიდებლობა არის ის, რაც იფარავს ჩვენს ქვეყანას და გვეხმარება, შევინარჩუნოთ ჩვენი თვითმყოფადობა და დამოუკიდებლობა. როცა ვართ მცხეთაში, განსაკუთრებული სიმძაფრით უნდა შევახსენოთ საკუთარ თავს, რომ დღეს ქრისტიანობას, ჩვენს სარწმუნოებას სჭირდება გაფრთხილება და დაცვა. სამწუხაროდ, არიან ძალები, რომლებიც სხვადასხვა ქვეყანაში ებრძვიან ქრისტიანობას, სარწმუნოებას, ქრისტიანულ მორალურ დოგმებს. სამწუხაროდ, ეს ძალები იბრძვიან ქრისტიანობის წინააღმდეგ საქართველოშიც, თუმცა, როცა ერთად დგას ერი და ბერი, ქართველებს ვერავინ დაამარცხებს, ვერავინ დაამარცხებს სარწმუნოებას, ქრისტიანობას, მართლმადიდებლობას ჩვენს ქვეყანაში, ვერავინ დაამარცხებს რწმენას ჩვენს გულებში და ვერავინ დაამარცხებს ქრისტიანულ ფასეულობებს ჩვენს ცნობიერებაში. მინდა, მადლობა გადავუხადო ჩვენს დედა ეკლესიას, კათოლიკოს-პატრიარქს, ყველა მღვდელმთავარს, თითოეულ სასულიერო პირს მათი ღვაწლისთვის და მოღვაწეობისთვის ჩვენი ქვეყნის სულიერად გასაძლიერებლად. ღმერთი ფარავდეს ჩვენს ქვეყანას, ჩვენს დედა ეკლესიას, სვეტიცხოვლის მადლი ფარავდეს თითოეულ თქვენგანს, თქვენს ოჯახებს, გილოცავთ სვეტიცხოვლობას”, – აღნიშნა პრემიერ-მინისტრმა.

სვეტიცხოვლის ტაძარში სადღესასწაულო წირვა საპატრიარქო ტახტის მოსაყდრემ, სენაკისა და ჩხოროწყუს მიტროპოლიტმა შიომ, მღვდელმთავრებთან ერთად აღავლინა. ღვთისმსახურებას პრემიერ-მინისტრთან ერთად პარლამენტის თავმჯდომარე, თბილისის მერი, აღმასრულებელი და საკანონმდებლო ხელისუფლების წევრები ესწრებოდნენ.

სადღესასწაულო წირვის დასრულების შემდეგ, მთავრობის მეთაურმა, პარლამენტის თავმჯდომარესა და მეუფე შიოსთან ერთად, სვეტიცხოვლის ტაძრის ეზოში ნეკერჩხლის ნერგი დარგო.

ევროკავშირის ლიდერები გეგმავენ გააფრთხილონ საქართველო, რომ მისი მთავრობა ქვეყნის ევროკავშირისკენ გზას საფრთხეს უქმნის, – ამის შესახებ სააგენტო Reuters-ი 17-18 ოქტომბერს დაგეგმილი ევროპული საბჭოს სამიტის დასკვნების პროექტის ტექსტზე დაყრდნობით წერს.

Reuters-ის ცნობით, 17-18 ოქტომბერს ბრიუსელში გასამართი ევროკავშირის ლიდერების სამიტისთვის მომზადებული დასკვნების პროექტში ნათქვამია, რომ „ევროკავშირი ადასტურებს მზადყოფნას ქართველ ხალხს ევროპულ გზაზე მხარი დაუჭიროს, მაგრამ კიდევ ერთხელ გამოხატავს თავის სერიოზულ შეშფოთებას საქართველოს ხელისუფლების მიერ განხორციელებული ქმედებების მიმართ. ევროპული საბჭო აღნიშნავს, რომ მსგავსი ქმედებები საქართველოს ევროკავშირისკენ გზას საფრთხეს უქმნის და გაწევრიანების პროცესს დე ფაქტო აჩერებს“.

„ევროპული საბჭო საქართველოს ხელისუფლებისგან მოელის, რომ თავისუფალი და სამართლიანი საპარლამენტო არჩევნები უზრუნველყოს“, – ნათქვამია სამიტის დასკვნების პროექტში.

სააგენტო წერს, რომ 26 ოქტომბრის საპარლამენტო არჩევნებს საქართველოს საერთაშორისო პარტნიორები ყურადღებით აკვირდებიან.

თვალთმაქცობა და მასთან ერთად სიბოროტეა, ყველა რესურსი ჩადო იმაში, რომ ქვეყნის სათავეში კოლექტიური „ნაცმოძრაობა“ დააბრუნო – სწორედ ამ სპექტაკლს ხელმძღვანელობს სალომე ზურაბიშვილი, – ამის შესახებ ჟურნალისტებს პარლამენტის პირველმა ვიცე-სპიკერმა გია ვოლსკიმ განუცხადა.

ვოლსკის აზრით, ზურაბიშვილის მიზანია ოპოზიციის ლიდერი გახდეს და არჩევნებში ოპოზიციის მარცხის შემდეგ, თუ ქვეყანაში რევოლუციური პროცესები წარიმართება, შეურიგებლობას თავად ჩაუდგეს სათავეში და ხალხს დაანახოს, რომ ეს „სისხლიანი და სადისტი „ნაცმოძრაობის“ მართული პროცესი არ არის“.

„ქარტიას ხელი ყველამ მოაწერა, რითაც მორჩილება აღიარეს. ახლა ვითარება შეიცვალა. სალომე ზურაბიშვილისგან საკმაოდ ომახიანი მესიჯი მოდის, რომ ოპოზიციის წამყვანი ლიდერი ის არის, ხოლო მიხეილ სააკაშვილის ლიდერობა და ის პოლიტიკური ძალა, ვინც სისხლი დაღვარა და ქვეყნის ტერიტორიების დიდი ნაწილი ოკუპანტს ჩააბარა, აღარ არსებობს. ეს სპეციალური მესიჯია, ქარტიაც სწორედ იქითკენ არის მიმართული, რომ წინ სალომე ზურაბიშვილი წამოწიონ.

ზურაბიშვილი თვლის, რომ შეუძლია შეცვალოს რაკურსი, დამოკიდებულება, ტრენდი და თავისი მეთაურობით ოპოზიციას სხვა სახე მისცეს, რომ ის არის მთავარი ადამიანი, ვინც პრემიერ – მინისტრის კანდიდატურას, ე.წ. ტექნიკურ მთავრობას წარმოადგენს და ამით ყველა ბედნიერი უნდა იყოს, ვინაიდან ამას ერთი და განუმეორებელი ლიდერი სალომე ზურაბიშვილი აკეთებს.

ეს დასავლეთისთვისაც გარკვეული მესიჯია, თუმცა კონსენსუსის მიღწევა გართულდება”, – განაცხადა გია ვოლსკიმ.

ცნობისთვის, პრეზიდენტმა სალომე ზურაბიშვილმა 12 ოქტომბერს გამართულ ბრიფინგზე განაცხადა, რომ ის ტექნიკური მთავრობის წარდგენას არჩევნებამდე გეგმავს. სალომე ზურაბიშვილმა “ქართული ქარტიის” ხელმომწერებს ქარტიის შესრულებისკენ მოუწოდა.

 ჩვენ პატივს ვცემთ, რა თქმა უნდა, სეკულარიზმის პრინციპს, რომელიც არის ასახული კონსტიტუციაში და ურთიერთობები სახელმწიფოს და ეკლესიას, ხელისუფლებას და ეკლესიას შორის ეფუძნება სწორედ ამ პრინციპს, – განაცხადა საქართველოს პრემიერ-მინისტრმა ირაკლი კობახიძემ ჟურნალისტის კითხვის საპასუხოდ.

პრემიერმა ხაზი გაუსვა, რომ სახელმწიფო და ეკლესია არის გამიჯნული ერთმანეთისგან.

„დღეს არის სვეტიცხოვლობა და ყველამ უნდა ისაუბროს ამ დღეს, რა თქმა უნდა, ჩვენი ქვეყნის მთლიანობაზე, აქ იგულისხმება, როგორ ფიზიკური, ასევე სულიერი მთლიანობა და გამთლიანება. ეს არის ჩვენი მთავარი ეროვნული ამოცანა. რაც შეეხება სახელმწიფოს და ეკლესიას, ბუნებრივია, სახელმწიფო და ეკლესია არის გამიჯნული ერთმანეთისგან. ჩვენ პატივს ვცემთ, რა თქმა უნდა, სეკულარიზმის პრინციპს, რომელიც არის ასახული კონსტიტუციაში და ურთიერთობები სახელმწიფოს და ეკლესიას, ხელისუფლებას და ეკლესიას შორის ეფუძნება სწორედ ამ პრინციპს. რაც შეეხება ზოგადად ეკლესიის წარმომადგენლების, სასულიერო პირების დამოკიდებულებას პოლიტიკურ საკითხებთან მიმართებით, ის, რომ მათ აქვთ კონკრეტული დამოკიდებულება, ეს თქვენ არც უნდა გაგიკვირდეთ და არც უნდა გეწყინოთ.
თქვენ ხაზი გაუსვით იმას, რომ მთელი ამ პერიოდის განმავლობაში ტენდენცია იკვეთება და კიდევ ერთხელ გავიმეორებ, რომ არც უნდა გეწყინოთ და არც უნდა გაბრაზდეთ ამის გამო“, – აღნიშნა პრემიერმა.