Home Blog

“ოპოზიციის ლიდერებს და მათ რუპორ აქტივისტებს მივმართავ! საკუთარი ხალხის მიმართ ამხელა ზიზღს როგორ იტევთ?!”

ოპოზიციის ლიდერებს და მათ რუპორ აქტივისტებს მივმართავ! საკუთარი ხალხის მიმართ ამხელა ზიზღს როგორ იტევთ?! , – ამის შესახებ პარლამენტის ვიცე-სპიკერი ნინო წილოსანი სოციალურ ქსელში წერს.

წილოსანის თქმით, უკვე ერთი კვირაა ოპოზიცია და მათი აქტივისტები ზიზღს ავლენენ ქვეყნის უმრავლესობის მიმართ, მათი სამოქალაქო პოზიციის, ასაკის, გარეგნობის, სოციალური მდგომარეობის და პოლიტიკური პრეფერენციების გამო.

„ოპოზიციის ლიდერებს და მათ რუპორ აქტივისტებს მივმართავ!
საკუთარი ხალხის მიმართ ამხელა ზიზღს როგორ იტევთ?!
უკვე ერთი კვირაა თვალს ვადევნებთ რამხელა აგრესიას და ზიზღს ავლენთ ქვეყნის უმრავლესობის მიმართ, მათი სამოქალაქო პოზიციის, ასაკის, გარეგნობის, სოციალური მდგომარეობის და პოლიტიკური პრეფერენციების გამო. რამ შეგაძულათ ასე საკუთარი მოსახლეობა? რამ შეგაშინათ ასე საკუთარი ხალხის?
დღეს, თქვენგან განსხვავებით, მშვიდობიანი მიზნით შეიკრიბება უამრავი ადამიანი! მიუხედავად იმისა, რომ ქართველი ერის წინაშე უდიდესი დანაშაული მიგიძღვით და ამ ადამიანების დიდი ნაწილი სრულ ტერორში გყავდათ თქვენი მმართველობის დროს, ჩვენ მაინც ცივილიზებულად მოგექცევით და თქვენსავით კაციჭამიები არასდროს გავხდებით!“ – წერს წილოსანი.

“ალიბაბას” საერთაშორისო პლატფორმაზე ქართული პავილიონი განთავსდება – მიხეილ ხიდურელი

სააგენტოს „აწარმოე საქართველოში“ დირექტორმა მიხეილ ხიდურელმა ჩინეთში, ქალაქ ჰანჭოუში, „ალიბაბას“ სათაო ოფისში შეხვედრა გამართა.

შეხვედრისას მხარეებმა განიხილეს ქართული პავილიონის განთავსება „ალიბაბას“ საერთაშორისო პლატფორმაზე Alibaba.com, რომელსაც 300 მილიონზე მეტი მომხმარებელი ყავს.

„ძალიან საინტერესო და პროდუქტიული შეხვედრა გვქონდა „ალიბაბას“ საერთაშორისო ურთიერთობების ხელმძღვანელთან. გვინდა საქართველო რაც შეიძლება მალე შეუერთდეს მსოფლიოში უმსხვილეს B2B პლატფორმას ეროვნული პავილიონით. ეს უნიკალურ შესაძლებლობას მისცემს ქართველ მეწარმეებს საგრძნობლად განავითარონ ბიზნესი და პროდუქცია გაიტანონ ექსპორტზე“ – განაცხადა მიხეილ ხიდურელმა.

„ალიბაბა“ 1999 წელს დაარსდა და იგი მსოფლიოში ერთ-ერთი წამყვანი ტექნოლოგიური კომპანიაა, რომელიც ამჟამად 6 ბიზნეს ჯგუფს აერთიანებს.

 თუ ნაცების 9 წლიან რეპრესიებს ოდნავ არაესთეტიკურად ან გოიმურად აღწერ, არ გაქვს უფლება დიდად ილაპარაკო წამებაზე და წამებასაც ფასი ეკარგება, შენ გაგაკრიტიკებენ-გური სულთანიშვილი

ფილოსოფოსი, გური სულთანიშვილი „ქართული ოცნების” წინასაარჩევნო კლიპთან დაკავშირებით ლიბერალური საზოგადოების მხრიდან გაკეთებულ შეფასებებს იხსენებს.

სულთანიშვილი აღნიშნავს, რომ ამ კლიპს მოყვა მთელი ამბავი, ლიბერალების მხრიდან და მთავარი ფუნდამენტი, ანუ შინაარსი არ შეიმჩნიეს (წამება და რეპრესიები). ეს თითქოს ასე უნდა გავიგოთ, შენ თუ ნაცების 9 წლიან რეპრესიებს ოდნავ არაესთეტიკურად ან გოიმურად აღწერ, არ გაქვს უფლება დიდად ილაპარაკო წამებაზე და წამებასაც ფასი ეკარგება, შენ გაგაკრიტიკებენ.

“ერთ დეტალზე მინდა გავამახვილო ყურადღება. წინასაარჩევნოდ, გახსოვთ ალბათ, კლიპი გაკეთდა, სადაც ცოლ-ქმარი დაწოლას აპირებენ და არჩევნებზე არ წავიდეთო ამბობს ქმარი, მერე ესიზმრება ყველა ის საშინელება რაც შეიძლება მოჰყვეს არ წასვლას, ამ შემთხვევაში კოლექტიური ნაცების მობრუნება, რომელიც დგას, სისტემურ წამებასა და ტოტალურ რეპრესიებზე, მოკვლაზე და გაუპატიურებაზე, ბიზნეს რეკეტზე და გამოხატვის სრულად გაქრობაზე.

ამას მოყვა მთელი ამბავი, ლიბერალების მხრიდან, რომ ჰოი და რუსული კალკი ყოფილაო, ატეხეს ერთი გნიასო და მთავარი, ფუნდამენტი, ანუ შინაარსი, ვაბშე არ შეიმჩნიეს (წამება და რეპრესიები). ეს თითქოს ასე უნდა გავიგოთ, შენ თუ ნაცების 9 წლიან რეპრესიებს ოდნავ არაესთეტიკურად ან გოიმურად აღწერ, არ გაქვს უფლება დიდად ილაპარაკო წამებაზე და წამებასაც ფასი ეკარგება, შენ გაგაკრიტიკებენ.

იმაზე რომ რა არის ცენტრალური საკითხი და ყურადღების გადატანა პერიფერიულ საკითხებზე, ერთი ანეკდოტი მახსენდება, ცოლი შეუსწრებს ქმარს საყვარელთან და ქმარი უწყებს ჩხუბს პარასკევს არ უნდა ჩამოსულიყავი ხუთშაბათის მაგივრადო?

პ.ს. არ იფიქროთ ჩემი რეკლამაა და მაგიტომ ვიცავ თავგამოდებით, უბრალოდ იმ დღეს ვსაუბრობდით და ვარჩევდით მეგობრები..”- წერს სულთანიშვილი სოციალურ ქსელში.

ტრამპმა თავდაცვის მდივნის პოსტზე „ფოქს ნიუსის“ წამყვანი წარადგინა

აშშ-ის არჩეულმა პრეზიდენტმა, დონალდ ტრამპმა Fox News-ის წამყვანი და არმიის ვეტერანი, პიტ ჰეგსეთი თავდაცვის მინისტრის თანამდებობაზე დაასახელა, – ინფორმაციას CNN-ი ავრცელებს.

„პიტმა მთელი ცხოვრება გაატარა, როგორც მეომარმა ჯარებისა და ქვეყნისთვის. პიტი მკაცრი, ჭკვიანი და ჭეშმარიტად სწამს „ამერიკა უპირველეს ყოვლისა“. პიტის სათავეში ყოფნით ამერიკის მტრები გაფრთხილებულები არიან – ჩვენი არმია კვლავ დიდი იქნება და ამერიკა არასოდეს დაიხევს უკან“, – აღნიშნა ტრამპმა.

ჰეგსეთს სამხედრო სამსახურში ყოფნის დიდი ხნის გამოცდილება აქვს, ის ავღანეთისა და ერაყის მისიებშიც მსახურობდა.

გერმანიაში ვადამდელი საპარლამენტო არჩევნები 2025 წლის 23 თებერვალს გაიმართება

გერმანიაში ვადამდელი საპარლამენტო არჩევნები 2025 წლის 23 თებერვალს გაიმართება. თარიღი ქვეყნის პრეზიდენტმა ფრანკ ვალტერ შტაინმაიერმა მმართველი კოალიციისა და ოპოზიციის ლიდერებთან შეხვედრის შემდეგ დაამტკიცა.

მანამდე, 16 დეკემბერს ბუნდესტაგში მთავრობის ნდობის საკითხზე კენჭისყრა გაიმართება. ქვეყნის პრეზიდენტის განცხადებით, თუ პარლამენტი უნდობლობას გამოუცხადებს ფედერალურ კანცლერს, ის სწრაფად მიიღებს გადაწყვეტილებას პარლამენტის დათხოვნის შესახებ. პრეზიდენტმა ასევე მოუწოდა ყველა საპარლამენტო ჯგუფს, პასუხისმგებლობით და ერთობლივად განიხილონ, კიდევ რომელი საკანონმდებლო წინადადებების განხორციელებაა შესაძლებელი ამ საკანონმდებლო პერიოდში გერმანიის შიდა და გარე უსაფრთხოების უზრუნველსაყოფად.

გერმანიის მთავრობაში კრიზისი მას შემდეგ დაიწყო, რაც 6 ნოემბერს გერმანიის კანცლერმა გადაწყვიტა, თანამდებობიდან გაეთავისუფლებინა ფინანსთა მინისტრი, „თავისუფალი დემოკრატების“ წევრი ქრისტიან ლინდნერი. ამის გამო მმართველი კოალიცია, რომელშიც „სოციალ-დემოკრატები“, „მწვანეები“ და „თავისუფალი დემოკრატები“ შედიოდნენ, ფაქტობრივად, დაიშალა.

აშშ-მა იემენში „ჰუსიტების“ იარაღის საწყობი დაბომბა

აშშ-ის შეიარაღებული ძალების ცენტრალური სარდლობის ძალებმა იემენში „ჰუსიტების“ იარაღის საწყობი დაბომბა.

ინფორმაციას პენტაგონი ავრცელებს.

„ამ ობიექტებში სხვადასხვა ტიპის თანამედროვე იარაღი ინახებოდა, რომელსაც ირანის მიერ მხარდაჭერილი „ჰუსიტები“ ამერიკულ და საერთაშორისო სამხედრო და სამოქალაქო გემებზე წითელი ზღვის და ადენის ყურის საერთაშორისო წყლებში თავდასხმებისთვის იყენებდნენ“, – განაცხადა პენტაგონის პრესმდივანმა, გენერალ-მაიორმა პეტ რაიდერმა.

საჰაერო იერიშში მონაწილეობდნენ აშშ-ის სამხედრო-საჰაერო და საზღვაო ძალები, მათ შორის F-35 ტიპის გამანადგურებელი თვითმფრინავები. „როგორც მოისმინეთ, ჩვენ გავაგრძელებთ „ჰუსიტებისთვის“ იმის თქმას, რომ მათი უკანონო და გაუაზრებელი თავდასხმები პასუხგაუცემელი არ დარჩება“, – დასძინა რაიდერმა.

დონალდ ტრამპმა ილონ მასკი „მთავრობის ეფექტიანობის დეპარტამენტის“ ხელმძღვანელად დაასახელა

აშშ-ის არჩეულმა პრეზიდენტმა დონალდ ტრამპმა განაცხადა, რომ ილონ მასკი და ვივეკ რამასვამი „მთავრობის ეფექტიანობის დეპარტამენტს“ უხელმძღვანელებენ, – ინფორმაციას CNN-ი ავრცელებს.

„ეს ორი მშვენიერი ამერიკელი ერთად გახსნის გზას ჩემი ადმინისტრაციას სამთავრობო ბიუროკრატიის დაშლის, ჭარბი რეგულაციების შემცირების, უსარგებლო ხარჯების შემცირებისა და ფედერალური სააგენტოების რესტრუქტურიზაციისკენ“, – აღნიშნა ტრამპმა.

მისი თქმით, დეპარტამენტი მუშაობა დასრულდება არაუგვიანეს 2026 წლის 4 ივლისისა.

„მცირე მთავრობა, მეტი ეფექტურობითა და ნაკლები ბიუროკრატიით, იქნება შესანიშნავი საჩუქარი ამერიკისთვის დამოუკიდებლობის გამოცხადების 250 წლისთავზე. დარწმუნებული ვარ, ისინი წარმატებას მიაღწევენ! ”- განაცხადა ტრამპმა.

ილონ მასკის თქმით კი ახალი დეპარტამენტი შოკისმომგვრელი იქნება იმათთვის, ვინც ჩართულია სამთავრობო რესურსების გაფლანგვაში.

„ეს შოკისმომგვრელ ტალღებს გადასცემს სისტემას და ნებისმიერს, ვინც მონაწილეობს სამთავრობო გაფლანგვაში, რაც უამრავი ადამიანია!“ – აღნიშნა მასკმა.

მილიარდერი მეწარმის, ილონ მასკის კომპანიების შემადგენლობა მოიცავს ელექტრომობილების კომპანია Tesla-ს, სოციალური მედიის პლატფორმა X-ს და სარაკეტო კომპანია SpaceX-ს.

რამასვამი ფარმაცევტული კომპანიის დამფუძნებელია, რომელიც კენჭს იყრიდა „რესპუბლიკელების“ საპრეზიდენტო კანდიდატობისთვის, მაგრამ მოგვიანებით საარჩევნო რბოლას გამოეთიშა და მხარდაჭერა დონალდ ტრამპს გამოუცხადა.

ჩვენი ამოცანაა, საერთო არ შედგეს პარლამენტის სხდომა, აბა რატომ ვართ ქუჩაში?! -ანა დოლიძე

სიების ჩახსნა შესაძლებელი გახდება მას შემდეგ, რაც პარლამენტის უფლებამოსილება იქნება ცნობილი, ამის შემდეგ ჩვენ იურიდიულად ყველაფერს სწორად გავაკეთებთ – დღეს იქ არ წავალთ, სადაც გვეტყვიან, უკაცრავად, სამუშაო საათები არ არის, – ამის შესახებ „ძლიერი საქართველოს“ ერთ-ერთმა ლიდერმა, ანა დოლიძემ „პალიტრანიუსის“ გადაცემაში „პოლიტიკური სივრცე“ განაცხადა.

როგორც დოლიძემ „ძლიერი საქართველოს“ პარლამენტში არ შესვლასთან დაკავშირებით საუბრისას განაცხადა, პარტიის მიზანი არა მხოლოდ პარლამენტში არ შესვლაა, არამედ არის ის, რომ საერთოდ არ შედგეს მეთერთმეტე მოწვევის პარლამენტის პირველი სხდომა.

„რა თქმა უნდა, ვაპირებთ საპარლამენტო სიების ჩახსნას და ეს ნათქვამიც გვაქვს. „ძლიერი საქართველო“ ვართ კოალიცია, სადაც 4 პარტია შედის: „პარტია ხალხისთვის“, „ლელო“, „თავისუფლების მოედანი“ და „მოქალაქეები“. ცალ-ცალკე ყველა ლიდერს ეს განცხადება გაკეთებული აქვს. იძულებული ვარ ავხსნა რა ხდება დღეს, რა საკითხთან გვაქვს საქმე და იძულებული ვარ, რომ მოქალაქეებისთვის განვმარტო იურიდიული საკითხების მოკლე კურსი. მოქალაქეები იმსახურებენ იმას, რომ ვთქვათ – ჩვენ ამ პარლამენტში არ შევალთ და ამ პარლამენტს ქმედით უნარიანობას არ მივანიჭებთ.

გარდა ამისა, ჩვენი ამოცანაა, საერთოდ არ შედგეს ეს სხდომა. აბა რატომ ვართ ქუჩაში?! ორი კვირაა ქუჩებს ვკეტავთ, ყველა არა, ჩვენ ვკეტავთ ქუჩებს, იმიტომ, რომ არ გვინდა ეს სხდომა საერთოდ შედგეს. ჩვენ ყველანაირი ძალებით ვეცდებით, რომ სხდომა არ შედგეს“, – განაცხადა დოლიძემ.

როგორც ის განმარტავს, სიების ჩახსნა შესაძლებელი იქნება მაშინ, როდესაც პარლამენტის უფლებამოსილება იქნება ცნობილი, ხოლო ყველა განცხადება, რაც მანამდე კეთდება, დოლიძის თქმით, არის სიმბოლური ტიპის პოლიტიკური განცხადებები.

„როდესაც საუბარია უფლებამოსილების შეწყვეტაზე და სიების ჩახსნაზე, ეს არის სხვადასხვა რაღაც. ორივე შეიძლება მოხდეს მხოლოდ მაშინ, როდესაც პარლამენტის უფლება-უნარიანობა იქნება ცნობილი. საარჩევნო კოდექსის 120-ე მუხლი. მაპატიეთ, ვისაც იურიდიულზე არ გინდოდათ ჩაბარება. ყველაფერი რაც მანამდე კეთდება, მსგავსი განცხადებები არის სიმბოლური ტიპის პოლიტიკური განცხადებები.

რამდენჯერაც ვიღაცას მოაფიქრდება – „აბა კიდე გააკეთეთ განცხადება!“… სიების ჩახნა შესაძლებელი გახდება მას შემდეგ, რაც პარლამენტის უფლებამოსილება იქნება ცნობილი, ამის შემდეგ ჩვენ იურიდიულად ყველაფერს სწორად გავაკეთებთ. დიდი ხანია განცხადებები უკვე დაწერილი გვაქვს. დღეს იქ არ წავალთ, სადაც გვეტყვიან, რომ უკაცრავად, სამუშაო საათები არ არის“,- განაცხადა ანა დოლიძემ.

გარდა ამისა, დოლიძემ ოპოზიციის სამოქმედო სტრატეგიაზე საუბრისას აღნიშნა, რომ მათი მთავარი ამოცანაა ხელი შეუშალონ ცესკოს შემაჯამებელი ოქმის შედგენაში და არ შედეგს პარლამენტის სხდომა.

„ჩვენი შუალედური ამოცანა ხელი შევუშალოთ ცესკოს შემაჯამებელი ოქმის შედგენაში. ის ამას უახლოეს დღეებში გააკეთებს. საპროტესტო მოძრაობა მუშაობს იმაზე, რომ ეს გააკეთოს. მეორე შუალედური ამოცანაა, არ შედეგს საქართველოს პარლამენტის სხდომა, ამ ყველაფერს ვაკეთებთ მშვიდობიანი წინააღმდეგობის მეშვეობით. ამის შემდეგ, მიუხედავად იმისა თუ რა მოხდება, ჩვენი ბრძოლა გრძელდება. ეს არის პროევროპული მოძრაობა, აპოთეოზი არის საქართველოს გათავისუფლება და ევროკავშირში შეყვანა“, – განაცხადა დოლიძემ.

13 ნოემბრის ასტროლოგიური პროგნოზი

ვერძი

ენერგიით სავსე ხართ, რაც საშუალებას გაძლევთ, დიდი მოცულობის სამუშაოს გაუმკლავდეთ და რთული საკითხები მოაგვაროთ. ამით ისარგებლეთ და დღეს დაწყებული საქმის დასრულებას ხვალისთვის ნუ გადადებთ. თქვენი პიროვნული ხიბლი და დახვეწილი იუმორი საინტერესო ადამიანებს იზიდავს. აუცილებელი არ არის, რომ ყველაფერი მარტომ აკეთოთ, შეგიძლიათ საკუთარი მოვალეობები სხვა ადამიანებს გაუნაწილოთ.

კურო

დღეს შეგიძლიათ ნებისმიერი საკითხი თქვენს სასარგებლოდ მოაგვაროთ. ცხოვრებაში ცვლილებების ნუ შეგეშინდებათ – მათ მხოლოდ პოზიტივი მოაქვთ და სიტუაციის გაუმჯობესებაში გეხმარებიან. ისარგებლეთ კარგი შესაძლებლობებით და შეთავაზებებს დაეთანხმეთ. ზოგი პრობლემა თავისთავად, მოულოდნელი გზებით მოგვარდება. თუ დახმარება გჭირდებათ, ნუ მოგერიდებათ და კოლეგებს ან საყვარელ ადამიანებს დაუკავშირდით – ისინი აუცილებლად მხარს დაგიჭერენ.

ტყუპები

ამ დღეს შანსი მოგეცემათ, რომ საკუთარი ცხოვრება შეცვალოთ და ის ცვლილებები განახორციელოთ, რაზედაც ყოველთვის ოცნებობდით. ურთიერთობა დადებით ემოციებს და პერსპექტიულ იდეებს მოგიტანთ. ახალი პროექტები პირველივე წუთებიდან შეფერხდება, ამიტომ უმჯობესია, უკვე დაწყებული საქმეების დასრულებაზე იზრუნოთ. ყურადღებით უსმინეთ გარშემო მყოფთა საუბრებს და შეიძლება ყველა კითხვაზე პასუხი იპოვოთ.

კირჩხიბი

ამ დღეს შოპინგი მხოლოდ იმედგაცრუებას მოგიტანთ. გადადეთ შესყიდვები, ნუ დახარჯავთ ფულს 13 ნოემბერს. მნიშვნელოვანი გადაწყვეტილების წინ მოუსმინეთ საყვარელი ადამიანების რჩევებს, რომ შეცდომა არ დაუშვათ. რთული პროექტის დასრულების შემდეგ თავს გადაღლილად გრძნობთ, ამიტომ ვარსკვლავები გირჩევენ, რამე სასიამოვნო ან გემრიელი იყიდოთ, რაც განწყობას აგიმაღლებთ.

ლომი

ეცადეთ, მეტი თავშეკავება გამოიჩინოთ და ურთიერთობა შეზღუდოთ. ამ დღეს გარშემო მყოფებთან საერთო ენას ვერ პოულობთ, ამიტომ მოსალოდნელია კამათი. უსაფუძვლო პრეტენზიების გამო ახლობელ ადამიანებთან ურთიერთობის გაფუჭება არ ღირს, ამიტომ ეცადეთ, კომპრომისი იპოვოთ. რისკისა და ექსპერიმენტების ნუ შეგეშინდებათ, მთავარია დამოუკიდებლად იმოქმედოთ და დახმარებისთვის სხვებს არ მიმართოთ.

ქალწული

ამ დღეს აქტიურობა უნდა შეამციროთ და მოლოდინის პოზიცია დაიკავოთ. ბევრი პრობლემა შეიძლება თქვენი მონაწილეობის გარეშე გადაწყდეს, თუმცა საყოფაცხოვრებო საკითხები საყვარელ ადამიანებთან ერთად უნდა მოაგვაროთ. ეცადეთ, საკუთარი სიტყვები აკონტროლოთ და გარშემო მყოფებს კრიტიკული შენიშვნებით თავი არ მოაბეზროთ.

სასწორი

თუ თქვენს ცხოვრებაში პრობლემა გაჩნდა, ეს ნიშნავს, რომ მნიშვნელოვან საკითხთან დაკავშირებით არასწორი გადაწყვეტილება მიიღეთ, თუმცა შეცდომის გამოსწორება ჯერ კიდევ შეიძლება. იზრუნეთ საკუთარ და ოჯახის წევრთა ჯანმრთელობაზე. ნუ გადაიღლებით და ეცადეთ, იმუნური სისტემა გაიძლიეროთ.

მორიელი

ერთმა უმნიშვნელო მოვლენამ შეიძლება გავლენა მოახდინოს თქვენს ცხოვრებაზე და თქვენი ჩვეული განრიგი შეცვალოს. მთავაირა, რომ არ დაიბნეთ და მომხდარი თქვენს სასარგებლოდ გამოიყენოთ. შოპინგისთვის არახელსაყრელი დღეა – შეძენილი იმედს გაგიცრუებთ. თუ საქმიან მოლაპარაკებას გეგმავთ, კარგად დაფიქრდით, რას მიიღებთ შეთავაზებისგან საბოლოოდ და მოგიწევთ თუ არა საკუთარ ინტერესებზე უარის თქმა.

მშვილდოსანი

დაგროვილმა დაღლილობამ შეიძლება თავი იჩინოს. მცირე წინააღმდეგობაზე მზად ხართ, დენთივით იფეთქოთ, ამიტომ ვარსკვლავები გირჩევენ, კონტაქტები შეზღუდოთ, აქტივობა შეანელოთ და დამკვირვებლის პოზიციას დასჯერდეთ. ნუ გადაიღლებით, ნელა იმუშავეთ და ხშირად დაისვენეთ. უმჯობესია, საკუთარი მოსაზრებები თქვენთვის შეინახოთ და კამათში არ ჩაერთოთ.

თხის რქა

ყურადღებით მოუსმინეთ, რაზე საუბრობენ თქვენ ირგვლივ და ეცადეთ, მნიშვნელოვანი ინფორმაცია არ გამოტოვოთ. ამბავი, რომელსაც დღეს გაიგებთ, განწყობას აგიმაღლებთ და მოტივაციას გაგიზრდით. უმჯობესია ახალი პროექტების დაწყება სამომავლოდ გადადოთ – მოულოდნელი პრობლემების გამო მათი წარმატებით დასრულება გაგიჭირდებათ. შესაძლოა შეხედულების შეცვლა მოგიწიოთ რაღაც საკითხზე, რომელსაც დიდი ხანია, სარგებლობა არ მოაქვს და წინსვლაში ხელს გიშლით.

მერწყული

გაუთვალისწინებელი პრობლემები და უსიამოვნებები გელით. მათი მოგვარებისთვის არასტანდარტული მეთოდებით მოქმედება დაგჭირდებათ. ამ დღეს სიტყვაზე ნურავის ენდობით და მტკიცებულებები მოითხოვეთ. ფრთხილად იყავით იმ ადამიანებთან ურთიერთობაში, რომლებიც ერთი შეხედვით იდეალურად გამოიყურებიან.

თევზები

გირჩევთ, დილა მშვიდად გაატაროთ და ნაკლები ისაუბროთ. შემთხვევით ნათქვამმა ნებისმიერმა სიტყვამ შეიძლება კონფლიქტი გამოიწვიოს. ბევრი გეგმა გაქვთ და ახლა მათი განხორციელებისთვის შესაფერისი დროა. სამსახურში რამდენიმე მნიშვნელოვანი საკითხის მოგვარება მოგიწევთ. თუ პრეტენზიები გამოთქმას აპირებთ, ეცადეთ, ეს ისე გააკეთოთ, რათა არავინ გაანაწყენოთ.

ესპანეთში მოსალოდნელი ქარიშხლის გამო მეტეოროლოგებმა მეოთხე დონის გაფრთხილება გამოსცეს

ესპანეთში მოსალოდნელი ქარიშხლის გამო ახალი გაფრთხილება გამოიცა.

ესპანეთის მეტეოროლოგიურმა სამსახურმა ქვეყნის უმეტესი ნაწილისთვის 12 ნოემბრიდან 15 ნოემბრის ჩათვლით ახალი გაფრთხილება გამოსცა.

ვალენსიაში, კატალონიასა და ანდალუსიის ზოგიერთ რაიონში მოსალოდნელი უამინდობის გამო, გაფრთხილების მეოთხე დონე გაიცა

11 ნოემბერს ანდალუსიაში ძლიერი წვიმა მოვიდა, რამაც წყალდიდობა გამოიწვია, თუმცა მეტეოროლოგები ვარაუდობენ, რომ ახალი ქარიშხალი იმდენად ძლიერი არ იქნება, როგორც ორი კვირის წინ იყო.

შეგახსენებთ, რომ წყალდიდობის შედეგად ესპანეთში 220-ზე მეტი ადამიანი დაიღუპა, სულ მცირე, 89 ადამიანი კვლავ დაკარგულად ითვლება.

დონალდ ტრამპმა ეროვნული უსაფრთხოების მრჩევლად კონგრესმენი მაიკ უოლცი დაასახელა

აშშ-ის არჩეულმა პრეზიდენტმა დონალდ ტრამპმა ეროვნული უსაფრთხოების საკითხებში მრჩევლად კონგრესმენი მაიკ უოლცი გამოაცხადა. ამის შესახებ აშშ-ის პრეზიდენტად არჩეული დონალდ ტრამპი სოციალურ ქსელში წერს.

ტრამპმა აღნიშნა, რომ მისი სამომავლო ეროვნული უსაფრთხოების მრჩეველი არის “ექსპერტი ჩინეთის, რუსეთის, ირანისა და გლობალური ტერორიზმის მხრიდან მომავალი საფრთხეების საკითხში”.

“მაიკი ჩემი, “ამერიკა უპირველეს ყოვლისა” საგარეო პოლიტიკის პროგრამის, მყარი მხარდამჭერი იყო და ძალის მეშვეობით მშვიდობისკენ ჩვენი სწრაფვის დიდი მომხრე იქნება”, – წერს ტრამპი.

ცნობისთვის, მაიკ უოლცი აშშ-ის კონგრესის ქვედა პალატაში – წარმომადგენელთა პალატაში – ფლორიდის შტატს წარმომადგენს და პირველი “მწვანე ბერეტია” (მსახურობდა ამერიკული არმიის სპეციალური დანიშნულების ძალებში), ვინც ამერიკის კონგრესში იქნა არჩეული. წარმომადგენელთა პალატაში უოლცი ჩინეთის წინააღმდეგობისა და ჩინეთის რესურსებზედამოკიდებულების შემცირების თემებით არის დაკავშირებული და “რესპუბლიკურ პარტიაში” პეკინის ერთ-ერთ მთავარ კრიტიკოსად ითვლება.

ასი ათასი მოწამის ხსენების დღესთან დაკავშირებით დაგეგმილი ღონისძიებების გამო მეტეხის ხიდზე მოძრაობა დროებით შეიზღუდება

ასი ათასი მოწამის ხსენების დღესთან დაკავშირებით დაგეგმილი ღონისძიებების გამო 13 ნოემბერს მეტეხის ხიდზე ტრანსპორტის მოძრაობა დროებით ორმხრივად შეიზღუდება. ამის შესახებ ინფორმაციას თბილისის მერია ავრცელებს.

დედაქალაქის მერიის ცნობით, 11:00-დან 21:00 საათამდე სატრანსპორტო საშუალებებს გადაადგილება აეკრძალებათ ევროპის მოედნიდან ვახტანგ გორგასლის მოედნის მიმართულებით.

„გორგასლის ქუჩიდან მომავალი ავტომობილები გადაადგილდებიან კოტე აფხაზის ქუჩის საშუალებით, თავისუფლების მოედნის მიმართულებით. ევროპის მოედნიდან მოძრავ ავტომობილებს გადაადგილება შეეზღუდებათ მეტეხის ხიდის მიმართულებით, ხოლო წრიული მოძრაობა დარჩება უცვლელი.

რაც შეეხება საზოგადოებრივ ტრანსპორტს, ავტობუსები: N301, N331, N333, N345, N350, და N371, ასევე, მიკროავტობუსები: N538, N547, N550 და N580 ევროპის, მოედნის ნაცვლად, გადაადგილდებიან კოტე აფხაზის ქუჩაზე და თავისუფლების მოედნიდან მგზავრებს დადგენილი სქემით მოემსახურებიან.

უკუმიმართულებისას ცვლილება შეეხება მხოლოდ N333-ის მარშრუტს. კერძოდ, მიკროავტობუსი ვაზისუბნის დასახლების მიმართულებით მოძრაობისას კოსტა ხეთაგუროვის ქუჩიდან დაუკავშირდება ბარათაშვილის ქუჩას, ქეთევან დედოფლის გამზირს და შემდეგ იმოძრავებს დადგენილი სქემით“, – აღნიშნულია ინფორმაციაში.

13 ნოემბერს, მეტეხის ხიდზე, ასი ათასი მოწამის ხსენებასთან დაკავშირებით, პარაკლისი აღევლინება

ხვალ, 13 ნოემბერს, მეტეხის ხიდზე პარაკლისი აღევლინება, – ამასთან დაკავშირებით ინფორმაციას სოციალურ ქსელში საქართველოს საპატრიარქოს საზოგადოებასთან ურთიერთობის სამსახური ავრცელებს.

„გაცნობებთ, რომ 2024 წლის 13 ნოემბერს, 17:00 საათზე, მეტეხის ხიდზე ასი ათასი მოწამის ხსენებასთან დაკავშირებით პარაკლისი აღევლინება“, – აღნიშნულია ინფორმაციაში.

ცნობისთვის, თბილისის მერიის ინფორმაციით, ასი ათასი მოწამის ხსენების დღესთან დაკავშირებით დაგეგმილი ღონისძიებების გამო, 13 ნოემბერს მეტეხის ხიდზე ტრანსპორტის მოძრაობა დროებით, ორმხრივად შეიზღუდება.

123...2,297Page 1 of 2,297
ჩვენი არქივი

კონტაქტი

მის: ქ.თბილისი, მ.კოსტავას 59

ტელ: +995 32 93 44 05

ელ.ფოსტა: editor@geotimes.ge

ნავიგაცია

ონლაინ გაზეთი Geotimes.ge

დამატებითი რესურსი