ვინც გინდა დააწეროს ბანერს „რუსული“, მაგრამ ხოშტარიამ არა – უხერხული და სასაცილოა, ის რუსეთის საქმეს აკეთებს – ეს არის პროვოკაცია, როგორ შეიძლება პროტესტი იყოს, როცა „გაგანია“ რუსეთის მიერ დაფინანსებული ქალი დადის და ბანერებზე აწერს სიტყვა „რუსულს“, – ამის შესახებ „ქართული ოცნების“ დეპუტატმა, თენგიზ შარმანაშვილმა ჟურნალისტებთან განაცხადა, რითაც მმართველი პარტიის მერობის კანდიდატის, თბილისის მოქმედი მერის კახა კალაძის საარჩევნო ბანერზე, „კოალიცია ცვლილებისთვის” ერთ-ერთი ლიდერის, ელენე ხოშტარიას მიერ გაკეთებულ წარწერას – „რუსული ოცნება” გამოეხმაურა.

მისივე თქმით, ხოშტარიას მიმართ კანონით გათვალისწინებული ღონისძიებები გატარდება.

„რასაც გინდა, ვინც გინდა დააწეროს სიტყვა „რუსული”, მაგრამ ხოშტარიასგან ეს აბსოლუტურად სასაცილო და მიუღებელია. პუტინი ვინმეს ერთ თეთრს მისცემს რუსეთის ფედერაციიდან, თუ მას ის მტრად მიაჩნია, ან თუ მიაჩნია, რომ ის პოლიტიკურ დაჯგუფებას ხელმძღვანელობს, რომელიც ანტირუსულ პოლიტიკას ატარებს?! იმის ხელში რუსეთიდან გადმორიცხული ერთი რუსული რუბლი აღმოჩნდება?! მართლა სულელები ვგონივართ და მართლა სულელები ჰგონია ამომრჩეველი, რომ ამას ვერ ხვდებოდეს?! ეს ათი ათასობით დოლარი, რომელიც რუსეთიდან მოემართება, მიდის სწორედ ამ საქმიანობისკენ. ის აკეთებს მათ საქმეს. ამაზე კითხვების დასმა უკვე უხერხული და სასაცილოც არის. ვინც გინდა დააწეროს „რუსული“, მაგრამ ხოშტარიამ არა. უხერხული და სასაცილოა“, – განაცხადა შარმანაშვილმა.

ცნობისთვის, ელენე ხოშტარიამ გაავრცელა ვიდეო, სადაც ის “ქართული ოცნების” მერობის კანდიდატის, თბილისის მოქმედი მერის საარჩევნო ბანერს აწერს: “რუსული ოცნება” და განაცხადა, რომ ამ ფორმით სოლიდარობას უცხადებს მეგი დიასამიძეს, რომელიც რამდენიმე დღის წინ სწორედ კახა კალაძის საარჩევნო ბანერის დაზიანების ფაქტზე დააკავეს, სასამართლომ კი 2000-ლარიანი გირაო შეუფარდა.

მოგვიანებით, შინაგან საქმეთა სამინისტრომ ელენე ხოშტარიას მიმართ საარჩევნო ბანერების დაზიანების ფაქტზე გამოძიება დაიწყო. კერძოდ, გამოძიება სისხლის სამართლის კოდექსის 187-ე მუხლით დაიწყო, რაც ნივთის დაზიანებას ან განადგურებას გულისხმობს.

საარჩევნო ადმინისტრაცია აგრძელებს მედიის წარმომადგენლების ინფორმირებას მიმდინარე საარჩევნო საკითხების შესახებ. ცენტრალური საარჩევნო კომისიისა (ცესკო) და სწავლების ცენტრის ორგანიზებით მორიგი სამუშაო შეხვედრა ამჯერად სატელევიზიო და ონლაინმედიის წარმომადგენლებთან გაიმართა. 

სამუშაო შეხვედრა ცესკოს თავმჯდომარე გიორგი კალანდარიშვილმა და სწავლების ცენტრის დირექტორმა ნათია ზაალიშვილმა გახსნეს. მათ მიმდინარე საარჩევნო პროცესებში მედიის როლსა და მნიშვნელობაზე ისაუბრეს. გიორგი კალანდარიშვილის თქმით მედიის წარმომადგენელთა ინფორმირება არჩევნებისა და ზოგადად საარჩევნო პროცესის შესახებ განსაკუთრებით მნიშვნელოვანი და აუცილებელია, რადგან სწორედ მედია არის ერთ-ერთი მნიშვნელოვანი რგოლი საზოგადოების ინფორმირებისთვის. 

„ჩვენ მიერ შეთავაზებული სამუშაო ფორმატით მედიის წარმომადგენლებს შესაძლებლობა აქვთ ინსტიტუციის პირველი  პირებისგან მოისმინონ სრულყოფილი, ამომწურავი ინფორმაცია მათთვის საინტერესო ყველა საარჩევნო საკითხზე, მათ შორის მოახლოებული 4 ოქტომბრის არჩევნების შესახებ. გვქონდა ძალიან საინტერესო დიალოგი. ამომრჩეველთა ინფორმირების მიმართულებით მედიის როლის გათვალისწინებით, ასეთი შეხვედრები ძალიან მნიშვნელოვანია და ხელს უწყობს მათი ცნობიერების ამაღლებას, შემდგომ კი გადამოწმებული ინფორმაციის მიწოდებას ამომრჩევლებისთვის”, – განაცხადა გიორგი კალანდარიშვილმა.

2 დღის განმავლობაში სამუშაო შეხვედრის ფარგლებში მონაწილეებმა კენჭისყრის პროცესში საარჩევნო ტექნოლოგიების დანერგვისა და გამოყენების პროცესი მიმოიხილეს, დეტალურად ისაუბრეს 4 ოქტომბრის მუნიციპალიტეტის ორგანოთა არჩევნებთან დაკავშირებულ საკითხებზე და მედიის უფლებრივი მდგომარეობასა და როლზე არჩევნების გაშუქების პროცესში. 

გაიმართა აქტიური დისკუსია, მედიის წარმომადგენელთა კითხვებს ცესკოს თავმჯდომარემ, მოადგილე გიორგი შარაბიძემ და სწავლების ცენტრის დირექტორმა ნათია ზაალიშვილმა ამომწურავად უპასუხეს. 

სამუშაო შეხვედრა 13-14 სექტემბერს გაიმართა და მასში მონაწილეობა მედიის 40-ზე მეტმა წარმომადგენელმა მიიღო.

ხაბეიშვილის სახელი გავიდა, გასცდა საქართველოს ფარგლებს, ეს იყო მისი მიზანი, ის ნიშნა დაეკავებინა, რომელიც მისი აზრით, ქვეყანაში იყო დაუკავებელი, როდესაც რადიკალიზაცია, ექსტრემიზმი არ იყო სათანადოდ განვითარებული, ლიდერი არ ჰყავდა და ჩაუდგა ამ მიმართულებას სათავეში, – ამის შესახებ საქართველოს პარლამენტის თავმჯდომარის პირველმა მოადგილემ, გია ვოლსკიმ უკანონო ქმედების ჩასადენად მოხელისათვის ქრთამის დაპირებისა და სახელმწიფო ხელისუფლების დამხობისაკენ საქვეყნოდ მოწოდების ფაქტზე „ნაციონალური მოძრაობის“ პოლიტსაბჭოს თავმჯდომარეზე, ბრალდებულ ლევან ხაბეიშვილზე საუბრისას განაცხადა.

მისივე თქმით, კონსპირაციული შეთქმულებაა საქართველოს წინააღმდეგ, სადაც „ხაბეიშვილის ნაირი ტიპები მონაწილეობენ“.

„სიტყვა – „მშვიდობიანი“ შემდეგ შემოიტანა თავის ტერმინოლოგიაში. ხაბეიშვილზე ალაპარაკდა საზოგადოება, პოლიტიკური სივრცე, ხაბეიშვილის სახელი გავიდა, გასცდა საქართველოს ფარგლებს. ეს იყო მისი მიზანი, ის ნიშა დაეკავებინა, რომელიც მისი აზრით, ქვეყანაში დაუკავებელი იყო, როდესაც რადიკალიზაცია, ექსტრემიზმი არ იყო სათანადოდ განვითარებული, ლიდერი არ ჰყავდა და ჩაუდგა ამ მიმართულებას სათავეში.

ეს ჩვეულებრივი მოვლენა არ არის, მაშინ, როდესაც ამას გარკვეული ქმედებები ახლავს და მოწოდებები, რომელიც აკრძალულია კანონით და კონსტიტუციის მოთხოვნების.

ეს არ არის მხოლოდ პერფორმანსი ან მოწოდება, კონკრეტულ ქმედებაში აისახება. ადვოკატების პოზიცია, რომ ეს ქრთამის მიცემის თუ ფულადი ანაზღაურების მიცემის დაპირება ეხება არჩევნების ან ხელისუფლების შეცვლის მომავალ პერიოდს, სადაც გაიცემა უწყისის მიხედვით მოღალატეებისთვის რაღაც სასაჩუქრე თანხა, აზრს მოკლებულია.

შეთავაზების გარდა, არსებობს სხვა მუხლი, რომელიც უკავშირდება მოწოდებებს და ქმედებებს, რომელიც მიმართულია იქით, რომ ქვეყანა შეუქცევად პროცესში წავიდეს, ტურბულენტურ ზონაში შევიდეს, როდესაც ნგრევაა გარანტირებული ქვეყნისთვის. ამას თანამოაზრეებიც გამოუჩნდნენ, სისხლისღვრაზე თავი არ უნდა შევიკავოთო, პირდაპირ ამბობენ. სამწუხაროა, რომ გამოდიან მაღალჩინოსნები ზოგიერთი ქვეყნის ამ მიმართულებას უჭერენ მხარს. კონსპირაციული შეთქმულება საქართველოს წინააღმდეგ, სადაც ხაბეიშვილისნაირი ტიპები მონაწილეობენ“,- აღნიშნა ვოლსკიმ

ამასთან ის, თავდაცვის ყოფილი მინისტრის, ჯუანშერ ბურჭულაძის დაკავებასაც გამოეხმაურა.

როგორც ვოლსკი აღნიშნავს, „რასაც მოვუსმინეთ ადვოკატებისგან, სერიოზულ დაფიქრებას განაპირობებს ყველასთვის, ვინც გადაწყვიტა, რომ სახელმწიფოს ბიუჯეტზე შეიქმნას კეთილდღეობა“.

„წინასწარ ნურაფერს დავამტკიცებთ. იმედი გვქონდეს, იქნებ რაღაც შეცდომაა დაშვებული. სამწუხაროდ, ეს შეცდომა არ ჩანს. ბურჭულაძე ჩვენი მეგობარი, გუნდის წევრია, უნდა ვიცოდეთ, რომ დანდობა არ იქნება, თუ კორუფციასთან გვაქვს საქმე. საქართველო მოწინავე პოზიციას იკავებს კორუფციასთან ბრძოლის მიმართულებით, მალე კიდევ დავინახავთ, რომ წინ ვართ, ეს არ უნდა მოხდეს ისეთი ადამიანები ხარჯზე, რომლისგანაც ასეთ ღალატს არ ველოდებით. თუ სადმე არსებობს კორუფცია, ამას ცხელი შანთით უნდა ამოშანთვა“, – აღნიშნა ვოლსკიმ.