ლევან გაჩეჩილაძემ „2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებითი საგამოძიებო კომისიის“ სხდომაზე 7 ნოემბრის აქცია და განვითარებული მოვლენები გაიხსენა.

როგორც გაჩეჩილაძემ აღნიშნა, კინო „რუსთაველიდან“ გამოსულმა დაახლოებით სამი ათასმა კაცმა უმოწყალოდ სცემეს 30 კაცი, მათ შორის ლევან გაჩეჩილაძე, რომლებიც იმ დროს შიმშილობდნენ.

„2 ნოემბერს დავნიშნეთ მიტინგი, უკვე სამ თუ ოთხ ნოემბერს, შიმშილობა გამოვაცხადეთ, რადგან შტურმზე არ წავსულიყავით. 7 ნოემბერს, დილის ექვს საათზე ვიყავით 30 მოშიმშილე. დაახლოებით სამი ათასი ყვითელ „პლაშებში“ ჩაცმული კაცი გამოვიდა კინო „რუსთაველიდან“ და უმოწყალოდ დაგვიწყეს არა დარბევა, აწიოკება, ცემა. სპორტსმენებს, რომლებიც საჩხუბრად იყვნენ მოსული, ეხმარებოდნენ ყვითელფორმიანებს, რომლებზეც შემდეგ ამბობდნენ, დასუფთავების სამსახურიდან არიანო. ენით აღუწერელი ჟლეტა იყო. ეს 30 კაცი ყველა სერიოზულად დავზარალდით. მე 7 ნოემბრის დაზარალებულიც ვარ. ასე გაგვყარეს ტერიტორიიდან, სადაც ვიყავით და ვშიმშილობდით. შიმშილობის დროს პარლამენტის წევრებიდან ვიყავით მე და კობა დავითაშვილი. მივედით „რესპუბლიკელების“ ოფისში, სადაც ვთქვით, რომ ასე ნაცემი წამოსვლა არ შეიძლებოდა. მაშინ ჯერ კიდევ მუშაობდა „იმედი“. დალეწეს კამერები, ყველაფერი, ჟურნალისტები წაიყვანეს. საერთოდ გააქრეს იმ მოედნიდან ყველა, ვისაც ფოტოაპარატი და კამერა ეჭირა. უცებ გაქრა ეს ხალხი. ისეთი იზოლაცია მოუწყვეს, რომ ფიზიკურად ვეღარ დაინახავდი, სად წავიდნენ. მიუხედავად ამისა, „რესპუბლიკელების“ ოფისში მოვიდნენ ტელევიზიები, რაც შეგვეძლო, მოვუწოდეთ საზოგადოებას, გამოსულიყო. სოზარიც იყო და სოზარსაც ბევრი დეტალი, ნიუანსი ემახსოვრება. მე ვთქვი, რომ ჩვენ უნდა წავიდეთ და დავიბრუნოთ ის ტერიტორია, რაც დავკარგეთ-მეთქი. უკვე გაბევრებული, დაახლოებით ხუთი ათას კაცამდე წამოვედით და დავბრუნდით. სხვათა შორის, მშვიდობიანად შემოვედით, გაიწიენ, აღარ გვეჩხუბენ, რადგან დაგვინახეს, რომ ძალიან აღგზნებული, ძირითადად კაცების მასა მოვდიოდით, ხუთი დღის ნაშიმშილარი ხალხი. ასეთი დასისხლიანებულები რომ დაგვინახეს, შეიძლება გადარეულებადაც ჩაგვთვალეს და გახსნეს, ისევ შეგვუიშვეს იქ“, – განაცხადა ლევან გაჩეჩილაძემ.

ასევე ლევან გაჩეჩილაძემ გაიხსენა, როგორ წაიყვანეს კობა დავითაშვილი და სცემეს.

„კობა დავითაშვილმა მითხრა, სულ დალეწილია აპარატურა, წავალ ბაზარში და ახალს ვიყიდი, თუ ნებას დამრთავო. ვუთხარი, წადი-მეთქი. იქიდან მოიპარეს კობა დავითაშვილი და სასიკვდილოდ სცემეს. მართალი გითხრათ, არც დაბრუნებულა. მიუხედავად იმისა, რომ ხალხი ძალიან ბევრი იყო, არ გვაკეტინებდნენ გზას. ბევრი ხალხით მივაწექით და, საბოლოო ჯამში, რუსთაველიც გადავკეტეთ“, – განაცხადა ლევან გაჩეჩილაძემ.

ხალხის მიერ არჩეული ხელისუფლების „არალეგიტიმურად“ მოხსენიება, დეზინფორმაციასთან ერთად, დემოკრატიული ინსტიტუტების უარყოფაა. დემოკრატიის არაღიარების მიზანი კი ექსტრემიზმისთვის იდეოლოგიური ბაზის შექმნაა, – ამის შესახებ პარლამენტის თავმჯდომარე შალვა პაპუაშვილი სოციალურ ქსელში წერს.

როგორც შალვა პაპუაშვილი აცხადებს, საგანგაშოა, რომ ევროკავშირის და შვედეთის საელჩოები არ რეაგირებენ მათი მოქალაქეების ფულით ექსტრემიზმის წახალისებაზე.

„ხალხის მიერ არჩეული ხელისუფლების „არალეგიტიმურად“ მოხსენიება, დეზინფორმაციასთან ერთად, დემოკრატიული ინსტიტუტების უარყოფაა. დემოკრატიის არაღიარების მიზანი კი ექსტრემიზმისთვის იდეოლოგიური ბაზის შექმნაა. ესტონეთში რეგისტრირებულ „ენჯეოს“, „საერთაშორისო გამჭვირვალობა – საქართველოს“ ყველაზე დიდი დაფინანსება ევროკომისიისა და შვედეთის ბიუჯეტიდან აქვს. საგანგაშოა, რომ ევროკავშირის და შვედეთის საელჩოები არ რეაგირებენ მათი მოქალაქეების ფულით ექსტრემიზმის წახალისებაზე. პასუხისმგებლიანი დონორობა არა არჩევანი, არამედ საერთაშორისო-სამართლებრივი ვალდებულებაა, რომელიც „დახმარების ეფექტიანობის შესახებ“ პარიზის დეკლარაციით არის გამყარებული. მისი დარღვევა წესებზე დაფუძნებული საერთაშორისო წესრიგის დარღვევაა.

P.S. სპეკულაციის გამოსარიცხად აქვე ვიტყვი, რომ ეს არა „ცუდად საუბარი“ ან „თავდასხმა“, არამედ „ლეგიტიმური კრიტიკაა“, რომელსაც პასუხი სჭირდება“, – დაწერა შალვა პაპაუშვილმა.

https://www.facebook.com/shpapuashvili/posts/pfbid02mpskcMgtpFzisQ2VGsUHLvgXEP4PNAFcUbauhaLrWbWpHdWP9SrjJ2mhvhas62o3l

თუ კი ოდესმე წლების შემდეგ ვინმე იკითხავს, როდის დადგა საქართველოში დიქტატურა, თამამად შეგიძლიათ უპასუხოთ, რომ ის დადგა 2025 წლის 22 მაისს, – ამის შესახებ ორგანიზაცია „სამოქალაქო იდეის” დამფუძნებელმა, თინა ხიდაშელმა არასამთავრობო ორგანიზაციების საერთო ბრიფინგზე განაცხადა.

ხიდაშელის შეფასებით, „კოალიცია ცვლილებისთვის“ ერთ-ერთი ლიდერის, ზურაბ ჯაფარიძის დაკავება „არის კლასიკური შემთხვევა პოლიტიკური ანგარიშსწორების”.

„საქართველოში ყოველდღიურად პოლიტპატიმრების რაოდენობა იზრდება. ამ ქვეყანაში ყოველდღიურად ადამიანები ციხეში მიდიან, იმიტომ, რომ განსხვავებულად ფიქრობენ, რადგან მათ აქვთ გამბედაობა რეჟიმს დაუპირისპირდნენ და იმ ხელოვნურად შექმნილ ტყუილ ნარატივებს არ ეგუებიან, რომელსაც „ქართული ოცნება” იგონებს.

ზურაბ ჯაფარიძის შემთხვევა არის პრინციპულად მნიშვნელოვანი მთელი ქართული საზოგადოებისთვის და საერთაშორისო თანამეგობრობისთვის, რომ განსაკუთრებული ყურადღების ცენტრში აღმოჩნდეს. იმიტომ, რომ ის არის მოქმედი პოლიტიკური ლიდერი. ეს არის კლასიკური შემთხვევა პოლიტიკური ანგარიშსწორების და პატიმრობის.

ჩვენ, პირველად საქართველოს ისტორიაში, შეგვიძლია ვთქვათ, რომ მოქმედი პოლიტიკოსი საქართველოს ციხეში მივიღეთ. ასეთი რამ ჯერჯერობით საქართველოში არ მომხდარა. ის პარლამენტიდან რომ არ წასულიყო, ჩვენ გვეყოლებოდა პარლამენტის წევრი ციხეში, იმიტომ, რომ რეჟიმს არ დაემორჩილა.

თუ ვინმე საქართველოში სრულ ჭკუაზე მყოფი მეტყვის, რომ არსებობს რაიმე კავშირი „ნაციონალური მოძრაობის“ დროს მომხდარ დანაშაულებზე ზურაბ ჯაფარიძის, როგორც ან მონაწილის, ან მოწმის, ან რაიმე სხვა სტატუსით დაბარების, გამოკითხვის შესახებ, მაშინ ასეთივე წარმატებით ამ ქვეყანაში ნებისმიერი მოქალაქე შეუძლია თეა წულუკიანმა დაიბაროს და პასუხად თუ მიიღებს – „მე რა შუაში ვარ, არ მოვდივარ“, ციხეში ჩასვას. ამ მასშტაბის უსამართლობასთან გვაქვს საქმე. გარდა იმისა, რომ ტიპიურ, კლასიკურ, პოლიტიკურ ანგარიშსწორებას ვუყურებთ. ამიტომ ეს რეჟიმი სახიფათოა.

იმდენად არარსებული შემადგენლობიდან გაჩნდა პატიმარი, რომ ნებისმიერ ადამიანს შეუძლია რეჟიმმა ხელი მოკიდოს, ციხეში ჩასვას და შემდეგ თავი ამართლებინოს, რომ გვირაბი ბომბეიდან ლონდონამდე არ გაჰყავდა.

თუ კი ოდესმე წლების შემდეგ ვინმე იკითხავს, როდის დადგა საქართველოში დიქტატურა, თამამად შეგიძლიათ უპასუხოთ, რომ ის დადგა 2025 წლის 22 მაისს“, – განაცხადა თინა ხიდაშელმა.

„იმედში“ შეჭრა იმის დემონსტრირება იყო, რომ არავინ არსებობს ამ ქვეყანაში, არავითარი ჟურნალისტი, თუ მე გადამეღობები. „ტელეიმედი“ აშუქებდა იმას, რაც არ აწყობდა სააკაშვილის რეჟიმს, მათი აღქმით, და ასეც იყო, ღუპავდა ამ რეჟიმის რეპუტაციას, – ამის შესახებ „იმედის“ პროდიუსერმა, სოფო ნიკოლაიშვილმა პარლამენტის დროებითი საგამოძიებო კომისიის სხდომაზე განაცხადა.

მისი თქმით, „იმედის“ დარბევის შემდეგ თანამშრომლების გადაბირება დაიწყო „ჩაძირული გემიდან“.

„2007 წლის 7 ნომებერს მთელი დღის განმავლობაში იყო ხმები, რომ შეიძლება, „იმედშიც“ შემოვიდნენ. მას მერე, რაც რიყე დაარბიეს, ეს უფრო რეალისტური გახდა. ყოველი შემთხვევისთვის მანქანა ტელევიზიიდან მოშორებით გადავაყენე. ავტომატურად ხდებოდა ეს, ნამდვილად ვერ ვუშვებდით აზრად, რომ გაბედავდნენ და ტელევიზიასაც დაესხმებოდნენ თავს. ზუსტად 20:40 საათი იყო, „ქრონიკა“ გადიოდა, შემოჭრა დასასრულისკენ მოხდა. საშინელი ხმები ისმოდა. კოლეგებისგან ვიცი, მერე კადრებშიც ვნახეთ, ეს არ იყო შემოსვლა, არც შემოჭრა, ეს იყო თავდასხმა. სპეცდანიშნულების რაზმი შემოვარდა, ტერორისტები რომ უნდა აიყვანო და გაანადგურო, ამ განწყობით. ლეწავდნენ ყველაფერს – აპარატურას და რაც კი შეხვდებოდათ. პირველ სართულზე ჩვენი კოლეგები ხელებით წინ, იატაკზე დააწვინეს. შეანგრიეს საეთეროს კარი. მიზანი იყო სასწრაფოდ ტელევიზიის მაუწყებლობის გათიშვა. ეძებდნენ, საიდან გაეთიშათ, ამიტომ ყველაფერს ლეწავდნენ“, – განაცხადა სოფო ნიკოლაიშვილმა.

მისი თქმით, ხელისუფლებაში მოსვლის შემდეგ მიხეილ სააკაშვილმა მედიის განადგურება დაიწყო, მან მედიები მიიტაცა და ერთი აუღებელი ციხესიმაგრე „იმედი“ იყო.

„„იმედში“ შეჭრა იმის დემონსტრირება იყო, რომ არავინ არსებობს ამ ქვეყანაში, არავითარი ჟურნალისტი, თუ კი მე გადამეღობები. „ტელეიმედს“ ჰქონდა თავისი სარედაქციო თავისუფალი, ობიექტური პოლიტიკა და „ტელეიმედი“ აშუქებდა იმას, რაც არ აწყობდა სააკაშვილის რეჟიმს, მათი აღქმით, და ასეც იყო, ღუპავდა ამ რეჟიმის რეპუტაციას. ეს მოვლენები ასე არ დასრულებულა. „ნაციონალურ მოძრაობას“ სხვადასხვა მეთოდი აქვს, თუ როგორ გაანადგუროს თავისუფალი მედია. მინდა, აღვნიშნო, რომ ეს დროის საკითხი იყო. მიხეილ სააკაშვილმა ყველაზე კარგად იცოდა თავისუფალი მედიის ფასი. სწორედ მედიამ მოიყვანა ის, შევარდნაძის ოპონენტი იყო და ოპოზიციაში ახალგაზრდა ლიდერი და ა.შ. მედია ედგა მხარში რევოლუციის პერიოდში. მე მაშინ „მზეში“ ვმუშაობდი და „მზეს“ განსხვავებული პოზიციები ჰქონდა და ამის გამო ხშირად მოღალატეს მეძახდნენ მაშინაც. ამით იმის დაფიქსირება მინდა, რომ მე სააკაშვილის მხარდამჭერი არასდროს ვყოფილვარ. მიშა სააკაშვილმა რაც დაიწყო, როდესაც მოვიდა ხელისუფლებაში, ეს იყო მედიის განადგურება. მიიტაცა მედიები და ერთი აუღებელი ციხესიმაგრე იყო „იმედი“. დარბევის შემდეგ დაიწყო უმძიმესი პროცესები, ეს იყო „იმედის“ გამოშიგვნა შიგნიდან. გადაბირება თანამშრომლების „ჩაძირული გემიდან“. ასე გვარწმუნებდნენ, რომ „იმედი“ მაინც ვერ აღდგებოდა. თანამშრომლებზე იყო უდიდესი ზეწოლა“, – განაცხადა სოფო ნიკოლაიშვილმა.

მე, როგორც პოლიტიკაში გარკვეულს, ძალიან მეცინება იმ მეთოდებზე, პოლიტიკური ბრძოლის უჭკუო სტრატეგიებზე, რასაც დღეს ქუჩაში ან ქუჩის მიღმა ვხედავთ ჩვენი ხელისუფლების დასამარცხებლად, – ამის შესახებ  „2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელ დროებითი საგამოძიებო კომისიის“ სხდომაზე კომისიის თავმჯდომარე თეა წულუკიანმა განაცხადა.

წულუკიანის თქმით, „პოლიტიკურ ბრძოლაში თუ შედიხარ, მართალი უნდა იყო და სიმართლისთვის იბრძოდე“.

„ცუდი გამოცდილების შედეგად, მაგრამ, ვინც ნაბრძოლია რეჟიმთან, ის დღეს გამობრძმედილია და ხელისუფლებაშია. ამ ყველაფერს თავი მოუყარა ბიძინა ივანიშვილმა და მისი ხელმძღვანელობით დადგა გამარჯვების დღე. შესაბამისად, ეს გამოცდილება თითოეულმა ჩვენგანმა – ზოგმა ძალიან დიდი უბედურების, ზოგმა მეტ-ნაკლებად პრობლემების ხარჯზე მივიღეთ ბრძოლისას. ამიტომაც, მე, როგორც პოლიტიკაში გარკვეულს, პატარა გამოცდილების მქონე ადამიანს, ძალიან მეცინება იმ მეთოდებზე, პოლიტიკური ბრძოლის უჭკუო სტრატეგიებზე, რასაც დღეს ქუჩაში ან ქუჩის მიღმა ვხედავთ ჩვენი ხელისუფლების დასამარცხებლად. ცოტა მეტი ჭკუა და დაფიქრებაა საჭირო, რადგან „ქართული ოცნების“ ხელისუფლებას დღეს ვინც ებრძვის, იმ ექსტრემისტულ ჯგუფებს არც მორალი უმაგრებთ ზურგს. პოლიტიკურ ბრძოლაში თუ შემოდიხარ, მართალი უნდა იყო, სიმართლისთვის უნდა იბრძოდე“, –  აღნიშნა თეა წულუკიანმა.

ამასთან, როგორც თეა წულუკიანმა აღნიშნა, მართალი ბრძოლა არ არის, როდესაც პატიმრების გამაუპატიურებელი ადამიანების ხელისუფლებაში დაბრუნებისთვის იბრძვი.

„კომისიის გუშინდელი სხდომა იყო მორიგი უმძიმესი, როდესაც ჩვენ მოვისმინეთ, რომ გლდანის ციხეში არსებობდა ასეთი „ინსტიტუტი“: „კაციჭამია ფლოსტები“. ეს იყო „ფლოსტები“, რომლებსაც პატიმარს აძლევდნენ ფეხზე ჩასაცმელად. ეს ფლოსტები იყო გაცილებით უფრო გამძლე, ვიდრე ნებისმიერი ადამიანის სიცოცხლე – ეს ფლოსტები აგრძელებდა ცხოვრებას და ადამიანები კვდებოდნენ. ციხეში კლავდნენ ადამიანებს და ამ ფლოსტებს შემდეგ გადაიბარებდა სხვა ცოცხალი პატიმარი, რომელიც ასევე მოკვდებოდა. ამის შემდე, ალბათ, საერთოდ აღარაფერზე უნდა ვმსჯელობდეთ, მაგრამ ამ დარბაზში ვინც შემოვიდა, ვგულისხმობ დაზარალებულებსა და მსხვერპლებს, მათ არცერთი წუთით არ აქვთ ტკივილი დავიწყებული. ისინი არ დაუშვებენ, „ქართულმა ოცნებამ“ ისე გადავულოცოთ ახალგაზრდა თაობას ხელისუფლება, რომ მავნებლების პრობლემა მოგვარებული არ იყოს. მათ გვერდით როცა დგები, ეს არ არის მართალი ბრძოლა. „კაციჭამია ფლოსტებისთვის“, სააკაშვილისთვის, ყავარჯნით, „კასტილით“ და ცოცხით ადამიანის გაუპატიურებისთვის ვერავის დავაბრუნებთ ხელისუფლებაში. ამის დაბრუნებისთვის რომ იბრძვი, ეს არ არის მართალი ბრძოლა, სულ რომ 17 წლის იყო. ასაკი ავტომატურად არ ნიშნავს, რომ მართალი ხარ. ამიტომ, ბრძოლა, რომელშიც ერთვები, უნდა იყოს მართალი ბრძოლა, სიმართლისთვის, უკეთესისთვის ბრძოლა. ამას უნდა ცოტა მეტი ჭკუა, გამოცდილება. თავი არ უნდა გამოაყენებინო უსინდისო პოლიტიკოსს, რომელსაც მხოლოდ მავნებლობის გამოცდილება აქვს და არაფერი უკეთესი. ღიმილის მომგვრელია ის ვითომ სტრატეგიები, რაც პოლიტიკურ ოპონენტებს აქვთ. ჩვენ, „ქართული ოცნება“ მათ მცდელობებს ამ კომისიის ფარგლებითაც და კომისიის დასკვნითაც შევებრძოლებით, რათა აღარ დაბრუნდეს „კასტილით“, ცოცხით გაუპატიურებული პატიმრის ინსტიტუტი, პატიმრის წამება, სკამზე გამობმა და 24-საათიან რეჟიმში ცემა. მოსამართლე, რომელიც ათავისუფლებს პატიმარს რადგან ევროკავშირის ელჩმა ასე გადაწყვიტა – ეს არ გვინდა. მოსამართლემ თვითონ უნდა გადაწყვიტოს, გაათავისუფლოს თუ არა. ჩვენ არასდროს დავაბრუნებთ იმ რეჟიმს, სადაც უცხოელი არის საქართველოში ბატონი. ეს არის ის, რისთვისაც ვიბრძვით კვლავ და ეს ბრძოლა ბოლომდეა მისაყვანი“, – განაცხადა თეა წულუკიანმა.

რადგან საქართველოს ყველა სახელმწიფო ინსტიტუტს „ქართული ოცნების“ რეჟიმი აკონტროლებს, მოვუწოდებთ საერთაშორისო ორგანიზაციებს, მკაცრი შეფასება გამოხატონ ოპოზიციონერი პოლიტიკოსების, ყოფილი პოლიტიკოსების, არასამთავრობო ორგანიზაციების წარმომადგენლების, ჟურნალისტებისა და სხვა პროფესიის წარმომადგენლების პოლიტიკური დევნის თაობაზე – ამასთან, მოვუწოდებთ ეუთო/ოდირს, შემჭიდროებულ დროში დაიწყოს პოლიტიკური პატიმრების სისხლის სამართლის პროცესების მონიტორინგი საქართველოს პრეზიდენტის სალომე ზურაბიშვილის მიმართვის შესაბამისად,- ამის შესახებ არასამთავრობო ორგანიზაციების ნაწილის განცხადებაშია აღნიშნული.

როგორც განცხადებაშია ნათქვამი, არასამთავრობო ორგანიზაციები საერთაშორისო ორგანიზაციებს მოუწოდებენ, გამოიყენონ მათ ხელთ არსებული საერთაშორისო და შიდა ეროვნული სამართლებრივი მექანიზმები „ქართული ოცნების“ რეჟიმის სამართლებრივი პასუხისმგებლობის დაკისრებისთვის – ჩადენილი მასობრივი ადამიანის უფლებების დარღვევებისა და დემოკრატიული სახელმწიფოს პრინციპების შელახვის გამო“.

„არალეგიტიმური პარლამენტის არაკონსტიტუციურ საგამოძიებო კომისიაზე გამოუცხადებლობის გამო, „ქართული ოცნების“ რეჟიმი ოპოზიციონერ პოლიტიკოსებს დევნის.

სანქცირებული მართლმსაჯულების სისტემის მეშვეობით, რეჟიმი ცდილობს, დააზიანოს ქვეყანაში მიმდინარე უწყვეტი პროტესტი, ძალით მიაღწიოს პარლამენტის ლეგიტიმაციას და ველიდან გააქროს დემოკრატიული პროდასავლური ოპოზიციონერი პოლიტიკოსები.

2024 წლის საპარლამენტო არჩევნების მასობრივი გაყალბების შემდეგ, პარლამენტის ყველა წევრმა, „ქართული ოცნების“ წარმომადგენლების გარდა, უარი თქვა მანდატზე და საპარლამენტო საქმიანობას ბოიკოტი გამოუცხადა. ეუთო/ოდირის სადამკვირვებლო მისიის დასკვნით, წინა საპარლამენტო არჩევნებთან შედარებით, ეს არჩევნები არ იყო კონკურენტული და არც ფუნდამენტური თავისუფლებები იყო უზრუნველყოფილი. ევროსაბჭოს საპარლამენტო ასამბლეის ანგარიშის მიხედვით, 26 ოქტომბრის არჩევნებზე გამოვლენილმა დარღვევებმა გავლენა მოახდინა საარჩევნო პროცესის სამართლიანობაზე და შედეგების ლეგიტიმურობაზე.

აღნიშნულის გათვალისწინებით, 2025 წლის იანვარში ევროსაბჭოს საპარლამენტო ასამბლეამ მიიღო რეზოლუცია და საქართველოში ახალი საპარლამენტო არჩევნების ჩატარება მოითხოვა. ანალოგიური მოწოდება ჰქონდა ევროპარლამენტსაც.

არალეგიტიმური პარლამენტის ფარგლებში, საქართველოს კონსტიტუციის მოთხოვნების დარღვევით, „ქართული ოცნების“ რეჟიმმა შექმნა ე.წ. დროებითი საგამოძიებო კომისია. საქართველოს კონსტიტუციის მიხედვით, დროებით კომისიაში ოპოზიციის წარმომადგენლობა არ უნდა იყოს კომისიის წევრთა საერთო რაოდენობის ნახევარზე ნაკლები. თუმცა, ვინაიდან პარლამენტის ლეგიტიმაციას „ქართული ოცნების“ გარდა არავინ აღიარებს, არ არსებობს ოპოზიციაც, რომელიც საგამოძიებო კომისიაში იქნებოდა წარმოდგენილი. შესაბამისად, ერთპარტიული დროებითი საგამოძიებო კომისიის შექმნა საქართველოს კონსტიტუციის პირდაპირი დარღვევაა.

არაკონსტიტუციური დროებითი საგამოძიებო კომისიის მიზანია, „ქართული ოცნების“ რეჟიმის დანაშაულებრივი ქმედებები გადაფაროს ძველი ხელისუფლების დანაშაულებრივი ქმედებებით, პარალელურად კი პროპაგანდისტული მეთოდებით საინფორმაციო მანიპულაციები აწარმოოს. ამასთან, ამ არაკონსტიტუციური კომისიით „ქართული ოცნება“ ქმნის იმიტაციას, რომ პოლიტიკისგან დაცლილ არალეგიტიმურ პარლამენტში გარკვეული პოლიტიკური პროცესი თუ დებატი მიმდინარეობს.

არალეგიტიმური პარლამენტის არაკონსტიტუციური კომისიის ფარგლებში დაიბარეს ოპოზიციონერი პოლიტიკოსები, ყოფილი პოლიტიკოსები, არასამთავრობო ორგანიზაციის წარმომადგენლები, ჟურნალისტები და სხვა პროფესიის წარმომადგენლები.

სისხლისსამართლებრივი პასუხისმგებლობის შიშით ხდება ადამიანების დაბარება არაკონსტიტუციურ კომისიაზე, რათა მათი გამოცხადებით არალეგიტიმურმა პარლამენტმა იძულებითი ლეგიტიმაცია შეიძინოს.

საქართველოს პროკურატურამ სისხლისსამართლებრივი დევნა დაიწყო იმ პირების მიმართ, ვინც არალეგიტიმური პარლამენტის არაკონსტიტუციურ კომისიაზე არ გამოცხადდნენ – უწყებამ მათთვის აღკვეთის ღონისძიების შეფარდების მოთხოვნით უკვე მიმართა სასამართლოს.

აღნიშნულის მიზანია, რომ პოლიტიკური და საზოგადოებრივი ცხოვრებიდან გაქრნენ პარლამენტის ოპოზიციონერი წევრები და „ქართული ოცნების“ რეჟიმისთვის მიუღებელი პირები. შეგასხენებთ, რომ საქართველოს გენერალური პროკურორი და საქართველოს სასამართლო სისტემის ე.წ. კლანის ლიდერები სანქცირებულები არიან გაერთიანებული სამეფოს, ამერიკის შეერთებული შტატებისა და სხვადასხვა ევროპული სახელმწიფოების მხრიდან – სანქციების საფუძველი მართლმსაჯულების დამოუკიდებელი სისტემების „ქართული ოცნებისთვის“ დაქვემდებარება და ადამიანის უფლებების მასობრივი დარღვევაა.

ევროსაბჭოს საპარლამენტო ასამბლეამ 2025 წლის 10 აპრილის რეზოლუციაში დაგმო არალეგიტიმური პარლამენტის მიერ საპარლამენტო კომისიის შექმნა მისი ფართო უფლებამოსილების გამო. ამასთან, ასამბლეამ წუხილი გამოთქვა ოპოზიციისა და სამოქალაქო საზოგადოების წარმომადგენლების მიმართ სისხლისსამართლებრივი დევნის გამო. განსაკუთრებით აღინიშნა ევროსაბჭოს საპარლამენტო ასამბლეის ყოფილი წევრების კომისიაზე დაბარება მათ მიერ საპარლამენტო ასამბლეის წევრის უფლებამოსილების შესრულების გამო და აღინიშნა, რომ ეს ქმედება ეწინააღმდეგება საქართველოს მიერ ევროსაბჭოს წინაშე აღებულ ვალდებულებებს.

იმ ფონზე, როდესაც საქართველოს ყველა სახელმწიფო ინსტიტუტს „ქართული ოცნების“ რეჟიმი აკონტროლებს, მოვუწოდებთ საერთაშორისო ორგანიზაციებს, მკაცრი შეფასება გამოხატონ ოპოზიციონერი პოლიტიკოსების, ყოფილი პოლიტიკოსების, არასამთავრობო ორგანიზაციების წარმომადგენლების, ჟურნალისტებისა და სხვა პროფესიის წარმომადგენლების პოლიტიკური დევნის თაობაზე. ასევე, მოვუწოდებთ, გამოიყენონ მათ ხელთ არსებული საერთაშორისო და შიდა ეროვნული სამართლებრივი მექანიზმები „ქართული ოცნების“ რეჟიმის სამართლებრივი პასუხისმგებლობის დაკისრებისთვის – ჩადენილი მასობრივი ადამიანის უფლებების დარღვევებისა და დემოკრატიული სახელმწიფოს პრინციპების შელახვის გამო.

ამასთან, მოვუწოდებთ ეუთო/ოდირს, შემჭიდროებულ დროში დაიწყოს პოლიტიკური პატიმრების სისხლის სამართლის პროცესების მონიტორინგი საქართველოს პრეზიდენტის სალომე ზურაბიშვილის მიმართვის შესაბამისად“,- ნათქვამია განცხადებაში.

ხელმომწერი ორგანიზაციები: „ადამიანის უფლებათა ცენტრი“ – HRC; „დემოკრატიის კვლევის ინსტიტუტი“ – DRI ; „დემოკრატიის მცველები“ – DemDef; „ევროპულ-ქართული ინსტიტუტი“ – EGI; ეკონომიკური პოლიტიკისა და კვლევის ცენტრი – EPRC; „თბილისი პრაიდი“; „მრავალპარტიული დემოკრატიის ცენტრი“ EEMCD; „მწვანე ალტერნატივა“; „პარტნიორობა ადამიანის უფლებებისთვის“ – PHR; „პრევენცია პროგრესისთვის“; „საბჭოთა წარსულის კვლევის ლაბორატორია“ – SOVLAB; „საერთაშორისო გამჭვირვალობა საქართველო“ – TI; „სამოქალაქო იდეა“; „სამოქალაქო მოძრაობა თავისუფლებისთვის“; „სამოქალაქო საზოგადოების ფონდი“ – CSF; „საქართველოს ახალგაზრდა იურისტთა ასოციაცია“ – GYLA; „საქართველოს დემოკრატიული ინიციატივა“ – GDI; „საქართველოს რეფორმების ასოციაცია“; „საქართველოს მომავლის აკადემია“; „საფარი“; „ტოლერანტობის და მრავალფეროვნების ინსტიტუტი“ – TDI; „უფლებები საქართველო“ – RG; „ქალთა ინიციატივების მხარდამჭერი ჯგუფი“ – WISG; „ყვარლის ევროკლუბი“; „წამების მსხვერპლთა ფსიქოსოციალური და სამედიცინო რეაბილიტაციის ცენტრი“ – GCRT; „საქართველოს რეფორმების ასოციაცია“ – GRASS.

ჩვენი ევროკავშირში გაწევრიანების გზასთან დაკავშირებით მრავალი სპეკულაციაა, თუმცა ჩვენს პოლიტიკაში რეალური ცვლილება არ მომხდარა, – ამის შესახებ საქართველოს პირველმა ვიცე-პრემიერმა, ეკონომიკისა და მდგრადი განვითარების მინისტრმა, ლევან დავითაშვილმა „ევრონიუსთან“ განაცხადა.

„ჩვენ გვაქვს ერთადერთი პოლიტიკა, რომელიც მთავრობის მიერ ოფიციალურად დამტკიცებულ ინტეგრაციის დღის წესრიგს გულისხმობს. ამ დღის წესრიგის განხორციელებას ემსახურება ყველა სამთავრობო ინსტიტუცია, სამინისტრო და სააგენტო“, – აღნიშნა ლევან დავითაშვილმა.

მისივე თქმით, საქართველოს ეკონომიკისა და მდგრადი განვითარების სამინისტრო კოორდინაციას უწევს ღრმა და ყოვლისმომცველი თავისუფალი სავაჭრო სივრცის შეთანხმების (DCFTA) იმპლემენტაციის დღის წესრიგს, რომელიც საკმაოდ ფართოა.

„ჩვენ უკვე მოთხოვნების თითქმის 60% შევასრულეთ. აქტიურად ვახორციელებთ მნიშვნელოვან რეფორმებს ეკონომიკაში და ეკონომიკის სხვადასხვა სექტორში, მათ შორისაა ტრანსპორტი, ენერგეტიკა, ვაჭრობა და სხვა. ეს არის პრიორიტეტული დღის წესრიგი, რომელიც კვლავ ჩვენს პრიორიტეტად რჩება. ჩვენ სრულად ვართ ორიენტირებული DCFTA-ს განხორციელებასა და ინტეგრაციის პოლიტიკაზე. მკაფიოდ განვაცხადეთ, რომ ჩვენი მიზანია 2030 წლისთვის ევროკავშირის სრულფასოვანი წევრობა. გვესმის, რომ ეს ხანგრძლივი პროცესია, მაგრამ სრულად ვართ მიმართული ამ მნიშვნელოვანი რეფორმების განსახორციელებლად. ჩვენ კვლავ ერთგული ვართ ამ რეფორმების და ეს პროცესი ძალიან აქტიურად მიმდინარეობს“, – აღნიშნა პირველმა ვიცე-პრემიერმა.

„იმედში“ სპეცრაზმის შეჭრის დროს, ჩვენ კუთხეში მიგდებულები ვიყავით, გიორგი თარგამაძე გამოიყვანეს ქოლგით, ტანსაცმელი საკიდითაც კი გამოატანეს, გაიყვანეს ჩვეულებრივად, ჩვენ, პარლამენტის წევრები, ტყვეებივით ვყავდით, – ამის შესახებ პარლამენტის დროებითი საგამოძიებო კომისიის სხდომაზე „ხალხის ძალის“ წევრმა, ვიქტორ ჯაფარიძემ განაცხადა.

მისი თქმით, დეპუტატებსაც გაუკეთეს დერეფანი, თუმცა აგინებდნენ.

„ჩემი თვალით ვნახე, როდესაც გადავწყვიტე, რომ კომისიაზე უნდა მოვსულიყავი, გადავურეკე კახა კუკავას, გოჩა ჯოჯუას რამე ხომ არ მეშლება ან შეცდომით მახსოვდა და მათ დამიდასტურეს, რომ რასაც მე თქვენ გიყვებით იგივე დამიდასტურეს. გიორგი თარგამაძეს დერეფანი გაუკეთეს, მიაცილებდნენ ქოლგით, ტანსაცმელი საკიდითაც კი გამოატანეს, ჩვენც, დეპუტატებს, გაგვიკეთეს დერეფანი, მაგრამ გვაგინებდნენ“, – განაცხადა ვიქტორ ჯაფარიძემ.

როგორც ვიქტორ ჯაფარიძემ განაცხადა, „იმედში“ სპეცრაზმის შეჭრის დროს რამდენიმე დეპუტატი ერთ-ერთ ითახში იყო, რომელშიც  „ენ“ რაოდენობის ნიღბიანი შეიჭრა“.

„გამოგვიყვანეს ოთახიდან, ჰოლში დაგვაყენეს, პირით კედლისკენ, ტყვეებივით ხელებაწეული, დეპუტატები, პარლამენტის წევრები. ვალერი გელბახიანმა, მათ შორის ჩვენც, მაგრამ ვალერიმ უთხრა, რას აკეთებთ, ჩვენ ვართ პარლამენტის წევრები, თქვენ არ გაქვთ ჩვენი დაპატიმრების უფლება, თქვენ არღვევთ კონსტიტუციას და ა.შ. დაუწყო განმარტებები, რაზეც ავტომატის კონდახი მიიღო გვერდებში, რომ აი, ეს არის ჩვენი კონსტიტუციაო, ხმა, კრინტი. გავჩუმდით. გარკვეული პერიოდის შემდეგ ჩამოგვიყვანეს, კიბეებზე ჩამოვედით ფეხით, კუთხესთან დაგვაყენეს პარლამენტის წევრები, დაგვიყენეს დაცვა და ამ დროს მიდის ბათქა-ბუთქი, რეზინის ტყვიებს ისვრიან, წივილ-კივილი, რაღაც სასწაული ამბავი ხდება. ასეთ დროს ცუდად გახდა ვალერი იზორია, პარლამენტის წევრი, რომელსაც რამდენიმე ოპერაცია ჰქონდა გაკეთებული და ავადმყოფობდა. წნევამ აუწია, დავაწვინეთ იატაკზე, ვეხვეწებოდით, გვიკვდება კაცი რამე ქენით, გვიშველეთ, არ შემოგვაკვდეს. არავის რეაქცია არ ჰქონდა, გვაგინებდნენ“, – განაცხადა ვიქტორ ჯაფარიძემ.

მისი თქმით, შენობიდან 40 წუთის შემდეგ გამოიყვანეს, თუმცა მანამდე, მაშინდელ პარლამენტის თავმჯდომარესთან, „ნინო ბურჯანაჯესთან კახა კუკავა და ზვიად ძიძიგური მივიდნენ, უთხრეს, პარლამენტის წევრები არიან დაკავებული „იმედის“ შენობაშიო და გთხოვთ, რამე რეაგირება მოახდინეთო“.

„ნინო ბურჯანაძის ზარის შემდეგ გამოგვიყვანეს. რომ გამოგვიყვანეს, კორიდორივით იყო და გვაგინებდნენ იქიდან. გარეთ სასწრაფო დახმარების მანქანა იდგა, რაშიც გვითხრეს, რომ ჩასხედით და გაგიყვანენო. მანქანაში რომ ჩავსხედით, მაშინდელი „რუსთავი 2“ გახსოვთ როგორიც იყო, მოვარდა ერთ-ერთი ჟურნალისტი და შეკითხვების დასმა დაგვიწყო, აბა, რა ხდება, როგორ ხდება და როგორც ჩანს, მეც ძალიან აღელვებული ვიყავი და ვერ შევიკავე თავი, ალბათ უცენზუროდაც ვილაპარაკე და ვიყვირე, აღარ მახსოვს, რაზეც რომელიღაცა ნიღბიან პიროვნებას ჰქონდა რეაქცია, რომელი იყო, მაგის დედა და გადატენა ავტომატი და შემოყო სასწრაფოს მანქანაში. მე ვიყავი და მესროლე-თქო. კახა კუკავა გადამეფარა წინიდან, ბატონო ვიქტორ გაჩერდი თორემ დაგვხოცავენო. არ გაგრძელდა ეს დიდხანს, გამოგვიყვანეს იქიდან“, – განაცხადა ვიქტორ ჯაფარიძემ.

მიხეილ სააკაშვილის ციხიდან გამოშვების საკითხი დღეს მთლიანად მიბმულია ამ რეჟიმის შეცვლასთან, – ამის შესახებ საქართველოს ყოფილმა პრეზიდენტმა, სალომე ზურაბიშვილმა ტელეკომპანია „ფორმულას“ ეთერში განაცხადა.

სალომე ზურაბიშვილმა უპასუხა ჟურნალისტის კითხვას – რატომ არ შეიწყალა მიხეილ სააკაშვილი და ნანობს თუ არა დღეს ამას, რაზეც ყოფილმა პრეზიდენტმა აღნიშნა, რომ არ ნანობს, რადგან შეწყალებას შედეგი არ ექნებოდა.

„ნანობს ვერ იქნება, რადგან ამას შედეგი არ ექნებოდა. ეს კარგად უნდა გაიგოს ყველამ, სამართლებრივი კონტექსტი ისე იყო შექმნილი, რომ შეწყალება-არშეწყალება არაფერს შეცვლიდა. მეორე, მესამე საქმე იყო და გააგრძელებდნენ. არ გამოვიდოდა, არცერთი დღით  ციხიდან. მეორეა, ჩემი მორალური გადაწყვეტილება, რაზეც არ ვარ ვალდებული, რომ ახსნა-განმარტება გავაკეთო, თუმცა ვიტყვი, რომ ჩემთვის, როგორც პრეზიდენტისთვის, ეს გადაწყვეტილება, რომელსაც ეწინააღმდეგებოდა ნახევარი ქვეყანა, ჩემი მორალურიო პოზიციიდან მისაღებია. მესამე, დღეს მე არც ვნანობ და არც უარვყოფ, რასაც ვამბობდი, მაგრამ დღეს ძალიან მეცოდება, რადგან ეს გაუგებარი სიტუაციაა, რაც ხდება. ადამიანურად ადრეც მეცოდებოდა და ვცდილობდი, ვიდრე მქონდა რაღაც ურთიერთობა არსებულ მთავრობასთან, დამერწმუნებინა ისინი, რომ როგორც პრეზიდენტს, სხვანაირად მოქცეოდნენ და სამაჯურით გაეყვანათ გარეთ, როგორც ხდება დემოკრატიულ, ცივილიზებულ ქვეყნებში და არა ამ პროცესით. დღევანდელ დღეს მე არანაირი კავშირი და საუბარი არ მაქვს. ისიც უნდა ითქვას და გაიგონ, ვინც იცავენ სააკაშვილს, დღეს მისი გამოშვების საკითხი არის მთლიანად მიბმული ამ რეჟიმის შეცვლასთან. ყველაფერი, რაც კეთდება და აპირისპირებს ადამიანებს ოპოზიციაში, რაც ქმნის ისეთ საკითხებს, რაც ყველასთვის არ არის მისაღები, ასუსტებს ოპოზიციას, მთლიანად მუხტს, რომელიც ყველას გვინდა, რომ იყოს ერთიანი. უფრო გვაშორებს ერთიანი მიზნისგან, რომ ეს რეჟიმი შეიცვალოს და სამართლიანი გადაწყვეტილებები იყოს მიღებული“, – განაცხადა ზურაბიშვილმა.

პარტია „ახლის“ ერთ-ერთი ლერი ნიკა მელია 29 მაისს ჩანიშნულ სასამართლო სხდომაზე გამოცხადებას არ აპირებს. ამის შესახებ მან „ტვ პირველის“ ეთერში განაცხადა.

როგორც მელიამ აღნიშნა, გადაწყვეტილება ხალხის პატივისცემის გამო მიიღო და არ აპირებს პატიმრობისთვის მომზადებას.

„მივიღე გადაწყვეტილება, არ მივიღო მონაწილეობა და არ მივიდე 29 მაისს სასამართლოში. ამას ხალხის პატივისცემის გამო გავაკეთებ, რადგან მე დღეს რასაც ვუყურებდი, როგორ ექცეოდნენ იქ ქალებს, უფროსებს, უმცროსებს, ბავშვებს, არ მინდა, რომ ეს განმეორდეს. დარწმუნებული ვარ, ზურა ჯაფარიძეს ეს რომ სცოდნოდა, ანალოგიურ გადაწყვეტილებას მიიღებდა. იქნება წარმომადგენელი, ადვოკატი, მე პატიმრობისთვის არ ვაპირებ მომზადებას, ვაპირებ ცხოვრების მაღალი ტემპით გაგრძელებას, შეხვედრებს და ვნახოთ. სად ვიქნები, არ ვიცი“, – განაცხადა მელიამ.

ნიკა მელია სასამართლოში პარლამენტის დროებით საგამოძიებო კომისიაზე გამოუცხადებლობის გამო არის დაბარებული.

ჩვენი საზოგადოება მიეჩვია ჩვენი ინტერესებიდან გამომდინარე გადაწყვეტილების მიღებას, რა არის ჩვენთვის კარგი, ჩვენ თვითონ ვფიქრობთ, უღირს თუ არ უღირს ჩვენს ქვეყანას რაიმე საკითხი, – ამის შესახებ საქართველოს პრეზიდენტმა, მიხეილ ყაველაშვილმა „იმედის“ ეთერში განაცხადა.

„ადრე ვიყავით დამოკიდებული, რომ მოიწონებდა თუ არა რომელიმე ევროპარლამენტარი ან ელჩი ჩვენს გადაწყვეტილებას. გაიზარდა ჩვენი საზოგადოება და აბსოლუტურად სხვა რეალობაა საქართველოში, აღარ არის ლომჯარიასა და გიგაურის დღის წესრიგი ჩვენს ქვეყანაში და კარგად ჩანს ეს ყველაფერი. რადგან იქ ერთი ქსელი და ინსტრუქციაა, სხვას ვერ ეყრდნობიან და იმავე მეთოდებით ცდილობენ ჩვენთან სიტუაციის შეცვლას. ვერ მოხდება ეს ყველაფერი. არაერთხელ დავინახეთ, რომ შეუძლებელია ამის განხორციელება.

ჩვენ ამ ყველაფერში გამოცდილება შევიძინეთ. ვიცით მათი დამოკიდებულება, ვიცით, რომ მაკრონი ხვალ მობრუნდება და ხელს ჩამოართმევს და ახალი ფურცლიდან დაიწყებს. საქართველო და ეს რეგიონი სჭირდება ევროკავშირს და ჩვენ აუცილებლად უნდა განვაახლოთ ურთიერთობები სხვა რაკურსით.

ამიტომ ვართ ასე მყარად, რომ ჩვენი ინტერესებიდან ვმოქმედებთ და ჩვენი საზოგადოება, რომელმაც ჩვენ აგვირჩია, ამას გულისყურით ადევნებს თვალს“, – აღნიშნა მიხეილ ყაველაშვილმა.