„ქართული ოცნების” დამფუძნებელი და საპატიო თავმჯდომარე, ბიძინა ივანიშვილი არაბთა გაერთიანებული საამიროების პრეზიდენტს, შეიხ მოჰამედ ბინ ზაიედ ალ ნაჰაიანს შეხვდა. ინფორმაციას „ქართული ოცნება“ ავრცელებს.

მათივე ცნობით, შეხვედრას ასევე ესწრებოდა საქართველოს პრემიერ-მინისტრი, ირაკლი კობახიძე, ეკონომიკისა და მდგრადი განვითარების მინისტრი მარიამ ქვრივიშვილი, საგარეო საქმეთა მინისტრი მაკა ბოჭორიშვილი და მთავრობის ადმინისტრაციის ხელმძღვანელი, ლევან ჟორჟოლიანი.

„ქართული ოცნების“ საპატიო თავმჯდომარემ შეიხ მოჰამედ ბინ ზაიედ ალ ნაჰაიანს ვიზიტისათვის მადლობა გადაუხადა და ორი ქვეყნის მეგობრული ურთიერთობის მნიშვნელობას გაუსვა ხაზი.

„მოხარული ვარ, რომ იმყოფებით საქართველოში და მაქვს პატივი, გიმასპინძლოთ ჩვენს ქვეყანაში. ბოლო წლების განმავლობაში ჩვენ ქვეყნებს შორის ურთიერთობები კიდევ უფრო გაღრმავდა, რისთვისაც მინდა მადლობა გადაგიხადოთ. მისასალმებელია, რომ კიდევ უფრო მყარი ხდება საქართველოსა და გაერთიანებულ საამიროების შორის ეკონომიკური კავშირი, რაც მომავალში სარგებლის მომტანი იქნება ორივე ქვეყნისათვის. ინვესტიცია, რომელსაც საქართველოში ახორციელებთ, კიდევ უფრო დააახლოებს საქართველოსა და გაერთიანებულ საამიროებს. მადლობას გიხდით ჩვენი ქვეყნის მიმართ გულთბილი და მეგობრული დამოკიდებულებისთვის. მინდა გამოვთქვა იმედი, რომ ჩვენ კიდევ არაერთხელ შევხვდებით ერთმანეთს და პარტნიორული ურთიერთობა მომავალში კიდევ უფრო გაღრმავდება“, – განაცხადა შეხვედრის დროს ბიძინა ივანიშვილმა.

არაბთა გაერთიანებული საამიროების პრეზიდენტმა, შეიხ მოჰამედ ბინ ზაიედ ალ ნაჰაიანმა „ქართული ოცნების“ საპატიო თავმჯდომარეს მასპინძლობისთვის მადლობა გადაუხადა და აღნიშნა, რომ ქვეყნებს შორის მჭიდრო ეკონომიკური კავშირები უახლოეს მომავალში კიდევ უფრო მაღალ ნიშნულზე აიწევს.

„მოხარული ვარ, რომ თქვენს ულამაზეს ქვეყანაში ვიმყოფები და მაქვს პატივი, პირადად მიწევს თქვენთან შეხვედრა. როგორც იცით, ჩვენ ვახორციელებთ 6 მილიარდიან ინვესტიციას საქართველოში, რომელიც სტარტს უახლოეს დღეებში აიღებს. ასევე გამოვხატავ მზადყოფნას, დავაფინანსო ქართველი სტუდენტების სწავლება გაერთიანებულ საამიროებში და დავეხმარო თქვენს ახალგაზრდებს ხელოვნური ინტელექტის მიმართულებით ცოდნის გაღრმავებაში. ჩვენს ქვეყნებს შორის მეგობრული ურთიერთობა მნიშვნელოვანი და სარგებლიანია ორივე მხარისათვის, ამიტომ გამოვხატავ მზაობას, კიდევ უფრო მეტი ინვესტიცია ჩავდოთ საქართველოში, რაც უაღრესად საინტერესოა პირადად ჩემთვის, როგორც ქვეყნის პრეზიდენტისთვის. კიდევ ერთხელ მინდა მადლობა გითხრათ გულთბილი მასპინძლობისთვის“, – განაცხადა შეიხ მოჰამედ ბინ ზაიედ ალ ნაჰაიანმა.

არაბთა გაერთიანებული საამიროების პრეზიდენტის, შეიხი მოჰამედ ბინ ზაიედ ალ ნაჰაიანის საქართველოში ოფიციალური ვიზიტი დასრულებულია.

საქართველოში არაბთა გაერთიანებული საამიროების პრეზიდენტის შეიხ მოჰამედ ბინ ზაიედ ალ ნაჰაიანის ვიზიტის ფარგლებში ნაყოფიერი დისკუსიები გავმართეთ ყველა სტრატეგიული მიმართულებით, – წერს საქართველოს პრემიერ-მინისტრი ირაკლი კობახიძე სოციალურ ქსელ X-ში.

როგორც ირაკლი კობახიძე აღნიშნა, განიხილეს თანამშრომლობის შემდგომი გაღრმავების შესაძლებლობები.

„პირველად მქონდა პატივი თბილისში მემასპინძლა არაბთა გაერთიანებული საამიროების პრეზიდენტისთვის, მისი უდიდებულესობა შეიხ მოჰამედ ბინ ზაიედ ალ ნაჰაიანისთვის. ვიზიტის ფარგლებში ნაყოფიერი დისკუსიები გავმართეთ ყველა სტრატეგიული მიმართულებით. განვიხილეთ თანამშრომლობის შემდგომი გაღრმავების შესაძლებლობები და განვამტკიცეთ ჩვენი საერთო ერთგულება ორმხრივი ურთიერთობების განვითარების მიმართ. დარწმუნებული ვარ, რომ ერთობლივი ძალისხმევით ეს ისტორიული ვიზიტი კიდევ უფრო გაამყარებს ჩვენს პარტნიორობას და ორივე ქვეყნის საერთო ინტერესებს“, – წერს ირაკლი კობახიძე.

დღეს გვინდა საზოგადოებას მივაწოდოთ ინფორმაცია ე.წ. ხელისუფლების მორიგ დანაშაულზე, რომელიც ამჯერად უკვე ბავშვების მიმართ ჩაიდინა და საფრთხე შეუქმნა თბილისის 116-ე საჯარო სკოლის დაახლოებით 1 200-მდე მოსწავლეს, – ამის შესახებ „გახარია საქართველოსთვის“ პარტიიდან ზღვისუბნის ოლქის მაჟორიტარობის კანდიდატმა ეკა უდესიანმა დღევანდელ ბრიფინგზე განაცხადა.

როგორც უდესიანმა აღნიშნა, მშობლებმა სასწავლო წლის დაწყების შემდეგ გაიგეს, რომ სკოლის შენობა ავარიულ მდგომარეობაშია და სასწავლო პროცესი დაუყოვნებლივ უნდა შეჩერდეს.

მისივე თქმით, შენობის მდგომარეობის შესახებ ინფორმირებული იყო სკოლის ადმინისტრაცია და შესაბამისი სახელმწიფო უწყებები, თუმცა ინფორმაცია მიზანმიმართულად დამალეს.

„საზოგადოებისთვის უნდა გახდეს ცნობილი, რომ 2025 წლის 15 სექტემბერს აღნიშნულ სკოლაში სასწავლო პროცესი განახლდა, თუმცა უკვე 17 სექტემბერს, გაკვეთილების დასრულების შემდეგ, მშობლებმა მიიღეს შეტყობინება სასწავლო პროცესის დაუყოვნებლივ შეწყვეტის შესახებ. მიზეზი იყო ის, რომ სკოლა ავარიულ მდგომარეობაში იმყოფებოდა და ექვემდებარებოდა გადაუდებელ დემონტაჟს.

კრიტიკულია ის გარემოება, რომ სკოლის ავარიული მდგომარეობის შესახებ ინფორმირებული იყო როგორც სკოლის ადმინისტრაცია, ასევე ყველა შესაბამისი სახელმწიფო უწყება. მიუხედავად ამისა, ინფორმაცია მიზანმიმართულად დამალეს, რათა სასწავლო პროცესის დაწყების დღეს, ექსპლუატაციიდან ამოღებული სკოლების რიცხვს კიდევ ერთი არ დამატებოდა.

ეს არის არა მხოლოდ უპასუხისმგებლობა, არამედ არის ბავშვებისა და პედაგოგების სიცოცხლისა და ჯანმრთელობის პირდაპირი საფრთხის ქვეშ დაყენება.

სწორედ ეს არის „ქართული ოცნების“ მმართველობის სახე – სიცრუე, ტყუილი ზრუნვა ბავშვებზე, პასუხისმგებლობისგან გაქცევა და საკუთარი პოლიტიკის გამართლების მიზნით ადამიანების სიცოცხლის საფრთხეში ჩაგდება.

ხელისუფლებას მოუწევს პასუხის გაცემა თითოეული ასეთი გადაწყვეტილებისთვის, რადგან საქართველოს მომავალი – ბავშვები ჩვენთვის მთავარი ღირებულება, რომლის საფრთხეში ჩაყენებას ვერავის ვაპატიებთ”, – განაცხადა უდესიანმა.

ჩვენ ვართ მაქსიმალურად დაინტერესებული, რომ ყველა მიმართულებით კიდევ უფრო მეტად გაღრმავდეს თანამშრომლობა, პარტნიორობა ჩვენს ორ ქვეყანას შორის, – ამის შესახებ საქართველოს პრემიერ-მინისტრმა ირაკლი კობახიძემ არაბთა გაერთიანებული საამიროების პრეზიდენტ, შეიხ მოჰამედ ბინ ზაიედ ალ ნაჰიანთან შეხვედრისას განაცხადა.

მთავრობის მეთაურმა პრეზიდენტს საქართველოში სტუმრობისთვის მადლობა გადაუხადა.

„თქვენო უმაღლესობავ, უღრმესი მადლობა მინდა, გადაგიხადოთ საქართველოში ჩამობრძანებისთვის. დღეს არის განსაკუთრებული მნიშვნელობის დღე ჩვენთვის. ჩვენ პირველად ვმასპინძლობთ არაბთა გაერთიანებული საამიროების დელეგაციას პრეზიდენტის ხელმძღვანელობით, რაც ჩვენთვის არის უდიდესი პატივი და კიდევ ერთხელ უღრმესი მადლობა მინდა, გადაგიხადოთ საქართველოში ჩამობრძანებისთვის. თქვენი საქართველოში ვიზიტი არის ჩვენთვის იმის გამოხატულება, რომ თქვენ გაქვთ ინტერესი ჩვენი ქვეყნის მიმართ და ჩვენ ამას ძალიან ვაფასებთ და უღრმეს მადლობას გიხდით ამისათვის“, – განაცხადა პრემიერ-მინისტრმა.

მისივე თქმით, საქართველოსა და არაბთა გაერთიანებული საამიროებს აქვთ ურთიერთობებში ძალიან კარგი დინამიკა, ძალიან მჭიდრო პოლიტიკური და ეკონომიკური თანამშრომლობა.

„ჩვენ ვართ მაქსიმალურად დაინტერესებული, რომ ყველა მიმართულებით კიდევ უფრო მეტად გაღრმავდეს თანამშრომლობა, პარტნიორობა ჩვენს ორ ქვეყანას შორის. ჩვენ ასევე მოხარული ვართ, რომ კომპანიები თქვენი ქვეყნიდან ძალიან აქტიურად არიან წარმოდგენილი ჩვენს ქვეყანაში. არის 4 მსხვილი კომპანია, რომელიც ოპერირებს საქართველოში და წარმატებით, მათ აქვთ ყველა პირობა შექმნილი საქართველოში ეკონომიკური აქტივობისთვის. ჩვენ ასევე მოხარული ვართ, რომ თქვენი ლიდერობით ჩვენ ხელი მოვაწერეთ ძალიან მნიშვნელოვან საინვესტიციო ხელშეკრულებას, რომელიც ითვალისწინებს საქართველოში ეკონომიკური აქტივობების განხორციელებას Eagle Hills-ის და EMAAR-ის მიერ და მადლობა თქვენ მხარდაჭერისთვის. ეს არის ჩვენთვის ძალიან მნიშვნელოვანი ინიციატივა. ასევე ძალიან ვაფასებთ თანამშრომლობას, რომელიც უკავშირდება თბილისში მშრალი პორტის განვითარებას და იმედი გვაქვს, რომ ასეთი ინიციატივები მომავალში იქნება კიდევ უფრო მეტი და კიდევ უფრო გაღრმავდება ჩვენს ქვეყნებს შორის როგორც პოლიტიკური, ისე ეკონომიკური თანამშრომლობა. თქვენი ვიზიტი მყარ საფუძველს ჩაუყრის ჩვენს შემდგომ პროდუქტიულ თანამშრომლობას ყველა მიმართულებით. კიდევ ერთხელ უღრმესი მადლობა მინდა გადაგიხადოთ საქართველოში ჩამობრძანებისათვის. ეს დღე არის განსაკუთრებული მნიშვნელობის ჩვენი ქვეყნისთვის და თითოეული ჩვენგანისთვის“, – განაცხადა ირაკლი კობახიძემ.

დიდი ბრიტანეთის მთავრობამ ბიზნესმენი ლევან ვასაძე და ყოფილი მთავარი პროკურორი ოთარ ფარცხალაძე დაასანქცირა.

შესაბამისი განცხადება ბრიტანეთის მთავრობამ გაავრცელა.

„დღეს დიდმა ბრიტანეთმა სანქციები დაუწესა საქართველოსთან დაკავშირებულ აქტორებს, რომლებიც ეკონომიურად და იდეოლოგიურად მხარს უჭერენ კრემლს. სანქციების პაკეტის მიზანია მათი საქმიანობის გამოაშკარავება და სხვა მსგავსი აქტორების შეკავება. სანქციების სიაში შესულია ორი ნავთობგადამზიდი, რომლებმაც რუსული ნავთობი შეიტანეს ქალაქ ბათუმის პორტში, „ჩრდილოვანი ფლოტის“ ფარგლებში. „ჩრდილოვანი ფლოტი“ – მოძველებული და სახიფათო ხომალდებია, რომლებსაც კრემლი იყენებს, რათა შეინარჩუნოს ენერგორესურსებიდან მიღებული შემოსავალი, რაც არის რუსეთის მთავარი წყარო უკრაინაში უკანონო ომის დასაფინანსებლად. სანქციების ამ პაკეტში შესულ ორ გემს აეკრძალებათ დიდი ბრიტანეთის პორტებში შესვლა და არ მიეცემათ წვდომა გაერთიანებული სამეფოს გემების სარეგისტრაციო სისტემაზე. ქართველი პოლიტიკოსი და მედიამფლობელი ლევან ვასაძე დასანქცირდა საკუთარი პლატფორმებზე პრორუსული დეზინფორმაციის გავრცელებისთვის. ასევე, სანქციების სიაში მოხვდა ბიზნესმენი ოთარ ფარცხალაძე, რომელსაც მჭიდრო კავშირი აქვს რუსეთთან და „ქართული ოცნების“ მმართველ შტოსთან. ეს მოქმედებები მოჰყვა 2024 წელს დიდ ბრიტანეთსა და საქართველოს შორის ურთიერთობების გაუარესებას, რაც გამოწვეული იქნა მმართველი პოლიტიკური პარტიის, „ქართული ოცნების“ მოქმედებების შედეგად, კერძოდ კი, კრემლის მიერ მიღებული კანონების მსგავსი საკანონმდებლო ცვლილებების შემოღებით, სამოქალაქო საზოგადოების დევნითა და პოლიტიკური ოპონენტების დაპატიმრებით“, – ნათქვამია ბრიტანეთის მთავრობის განცხადებაში, რომლის თარგმანიც საქართველოში დიდი ბრიტანეთის საელჩოს გვერდზე გამოქვეყნდა.

ძვირფასო მეგობარო, ბატონო პრემიერ-მინისტრო ძალიან ბედნიერი ვარ საქართველოში ჩემი ვიზიტით, ჩვენს ორ ქვეყანას აქვს საერთო ხედვა სტაბილურობის, მშვიდობის, ადამიანებს შორის ურთიერთობის მიმართულებით, – ამის შესახებ არაბთა გაერთიანებული საამიროების პრეზიდენტმა, შეიხმა მოჰამედ ბინ ზაიედ ალ ნაჰიანმა საქართველოს პრემიერ-მინისტრ ირაკლი კობახიძესთან მთავრობის ადმინისტრაციაში გამართულ შეხვედრაზე განაცხადა.

მისი თქმით, საქართველოსა და არაბთა გაერთიანებულ საამიროებს შორის მჭიდრო კავშირი არსებობს და შემდგომში ამას კიდევ დაამტკიცებს ქვეყნებს შორის თანამშრომლობის გაღრმავება და მრავალი პროექტის განხორციელება.

„ძვირფასო მეგობარო, ბატონო პრემიერ-მინისტრო ძალიან ბედნიერი ვარ საქართველოში ჩემი ვიზიტით. თქვენთან კიდევ ერთხელ შეხვედრა აბუ-დაბიში შეხვედრის შემდეგ, დადასტურება ჩვენი თანამშრომლობის გაგრძელების. ვისარგებლებ შემთხვევით და მოგილოცავთ დაბადების დღეს. გისურვებთ წარმატებას, ბედნიერ ცხოვრებას, ჯანმრთელობას. საქართველოსა და საამიროებს შორის მჭიდრო კავშირი არსებობს. შემდგომში ამას კიდევ დაამტკიცებს ჩვენი თანამშრომლობის გაღრმავება და კიდევ მრავალი პროექტის განხორციელება. განსაკუთრებით, ვაჭრობის, ბიზნესის, ეკონომიკის, მრეწველობის და ენერგეტიკის სფეროში და ისეთ სექტორებში, რომელიც არის პრიორიტეტული ორ ქვეყანას შორის. მინდა აღვნიშნო სავაჭრო ურთიერთობების გაზრდა ჩვენს ქვეყნებს შორის, რომელიც მილიონობით დოლარს აღწევს. ეს თანამშრომლობა დიდ მოცულობებზე გადის და ეჭვგარეშეა, რომ ეკონომიკური თანამშრომლობა ორ ქვეყანას შორის გაგრძელდება, განსაკუთრებით სატრანსპორტო მიმართულებით. საამიროები ხელს შეუწყობს ხელშეკრულებების მიხედვით პარტნიორობის განვითარებას, რომელსაც  სხვადასხვა საინვესტიციო კომპანიები ახორციელებენ. ეს აძლიერებს საქართველოსა და საამიროებს შორის ურთიერთობას. ჩვენს ორ ქვეყანას აქვს საერთო ხედვა სტაბილურობის, მშვიდობის, ადამიანებს შორის ურთიერთობის მიმართულებით. ასევე ორივე ქვეყანა მონაწილეობას იღებს კულტურულ სფეროში თანამშრომლობის გაღრმავებაში, მდიდარი მემკვიდრეობის გაზიარებაში, რაც წარმოადგენს საფუძველს ჩვენი ქვეყნების განვითარებისთვის. მინდა დაგიდასტუროთ, რომ საამიროები გააძლიერებს პარტნიორობას ზოგადად კავკასიის რეგიონის ქვეყნებს შორის და ხელს შეუწყობს სტაბილურობას მშვიდობას და საერთო ინტერესებს. მშვიდობა არის ძირითადი ღერძი ეკონომიკის განვითარებისა და გაძლიერებისთვის. კიდევ ერთხელ მადლობას გიხდით და ვუსურვებ საქართველოს და ქართველ ერს სტაბილურობას, განვითარებას და წარმატებას“, – განაცხადა არაბთა გაერთიანებული საამიროების პრეზიდენტმა.

ყველა უცხოელს მოვუწოდებ, პასუხისმგებლობით მოეკიდონ თავიანთ თანხებსა და შეხვედრებს. ტერორისტებთან და ექსტრემისტებთან შეხვედრების გატარებას არ ვაპირებ და იქნება მხილებული, – ამის შესახებ პარლამენტის თავმჯდომარემ, შალვა პაპუაშვილმა განაცხადა.

მისივე თქმით, ქვეყანაში არსებობს შიდა ტერორისტული დაჯგუფება, რომლის მიზანი ძალადობრივი გზით ხელისუფლების შეცვლაა.

„ვხედავთ, რომ არის ნულოვანი მხარდაჭერა ოპოზიციის მიმართ. არის მარგინალიზებული ჯგუფი ადამიანებისა, რომლებსაც არაფერი არ გააჩნიათ, გარდა ისტერიის, ბოღმის, ძალადობისა და შეურაცხყოფის ნთხევისა. ის, რასაც პრეზიდენტი ტრამპი ეძახის შიდა ტერორიზმს, აი, ასეთი შიდა ტერორისტული ჯგუფი გვყავს, რომელსაც ღამით ეწყება ემოციური გაღიზიანება და ვხედავთ მათ მოძრაობას ქუჩაში. დილით, ღმერთის წყალობით, მშვიდად არიან, როგორც ვატყობთ და ქალაქს და ქვეყანას შეუძლია, მშვიდად იცხოვროს. ეს შიდა ტერორისტული დაჯგუფებაა, რომლის გაცხადებული მიზანიც არის ძალადობრივი გზით ხელისუფლების შეცვლა. მათ გაცხადებული აქვთ, რომ უარს ამბობენ დემოკრატიულ გზაზე, მათი დიდი ნაწილი ფორმალურად ჩაეხსნა არჩევნებს, არ იღებენ მონაწილეობას, მეორე ნაწილი ფორმალურად იღებს მონაწილეობას, მაგრამ ესეც ამ გეგმის ნაწილია. ხალხის მხარდაჭერის იმედი არ აქვთ, თუმცა ზუსტად ამ ღამის გამწვავებებით ვხედავთ, რაზე არიან წამსვლელები, ესენი არიან ჩარლი კირკის მკვლელის იდეოლოგიის მატარებელი ადამიანები. ვნახეთ, მათ შორის აქ, რა რეაქციები ჰქონდათ ამ მკვლელობაზე, როგორ ქილიკობდნენ, გაუხარდათ. ეს არის იგივე ტერორისტული იდეოლოგია, რომელიც დღეს აშშ-ს უქმნის პრობლემას. ასე რომ, ამ შიდა ტერორისტების მხრიდან არაფერი გამორიცხული არ არის. ამიტომ საზოგადოება ფხიზლად უნდა იყოს“, – განაცხადა პაპუაშვილმა.

როგორც პაპუაშვილმა აღნიშნა, ევროკავშირის ელჩი არ პასუხობს ქართველი ხალხის კითხვებს, სად და რატომ იხარჯებოდა ევროკავშირის თანხები?

„ძალიან დეტალურად ვაკვირდებით უცხოელების კონტაქტს ამ რადიკალებთან. ყველა ელჩი, ყველა უცხოელი, რომელიც მათ ხელს ართმევს თავის საელჩოში, სახლში ეპატიჟება სადილზე, ვახშამზე თუ ა.შ., რომელიც ნორმალიზებას ახდენს რადიკალების და ექსტრემისტების, მათი თანამონაწილეობა იქნება, თუკი რაიმე ძალადობრივი ქმედება მოხდა ამ შიდა ტერორისტული დაჯგუფების მხრიდან. კიდევ ერთხელ მინდა, მივმართო უცხოელებს, რომლებიც საქართველოში არიან დიპლომატიური თუ არადიპლომატიური მისიებით, ამ ჯერზე პასუხისმგებლობას ნუ აირიდებენ. ჩვენ გვახსოვს შარშან  დეკემბერში მათ მიერ დაფინანსებული „ენჯეოების“ ძალადობრივი თავდასხმები პოლიციაზე, ცეცხლის წაკიდება და ა.შ., დღემდე გვახსოვს დუმილი. არცერთს არ გაუკიცხავს ეს ძალადობა, შიდა ტერორიზმი, რომელიც, დღეს ირკვევა, აი, გამოძიებიდანაც ჩვენ გვესმის, რომ ევროკავშირის ფული ამ შიდა ტერორისტების დაფინანსებაში იხარჯებოდა. დღემდე ერთი განცხადებაც არ გვაკადრა ევროკავშირის ელჩმა. ქართველი ხალხი ღელავს, ფიქრობს, როგორ იხარჯებოდა ევროკავშირის ფული. ევროკავშირის ელჩი დამალულია თავის საელჩოში და კითხვებს, რომელიც საზოგადოებას აქვს, არ პასუხობს. არ პასუხობს, თუ როგორ და რატომ  იხარჯებოდა ევროკავშირის ფული ამ ძალადობრივ დაჯგუფებებზე. ასე რომ, ყველა უცხოელს მოვუწოდებ, პასუხისმგებლობით მოეკიდონ თავიანთ თანხებს და თავიანთ კომუნიკაციას. ტერორისტებთან, რადიკალებთან, ექსტრემისტებთან შეხვედრების გატარებას მე პირადად არ ვაპირებ და ყოველ ჯერზე იქნება ამის მხილება“, – განაცხადა პაპუაშვილმა.