ირანის პრეზიდენტის, იბრაჰიმ რაისის სიკვდილი არ ცვლის აშშ-ის ფუნდამენტურ პოზიციას ირანის მიმართ, – ამის შესახებ აშშ-ის სახელმწიფო დეპარტამენტის სპიკერმა, მეთიუ მილერმა განაცხადა.

„იბრაჰიმ რაისი იყო ირანელი ხალხის რეპრესიების სასტიკი მონაწილე თითქმის ოთხი ათწლეულის განმავლობაში. ის მონაწილეობდა ადამიანის უფლებათა მრავალრიცხოვან, საშინელ დარღვევაში, მათ შორის, ასრულებდა მთავარ როლს 1988 წელს ათასობით პოლიტპატიმრის არასამართლებრივ მკვლელობაში. ადამიანის უფლებების ყველაზე საშინელი დარღვევა მოხდა მისი პრეზიდენტობის დროს, განსაკუთრებით ქალთა მიმართ უფლებების დარღვევის კუთხით. ჩვენ ვწუხვართ სიცოცხლის ნებისმიერი დანაკარგის გამო. არ გვინდა, ვნახოთ, რომ ვერტმფრენის ჩამოვარდნისას ვინმე დაიღუპება, მაგრამ ეს არ ცვლის რეალობას, რომ, როგორც ირანის პრეზიდენტს, მას ხელები სისხლიანი ჰქონდა. ჩვენი ფუნდამენტური მიდგომა ირანის მიმართ არ შეცვლილა და არ შეიცვლება. ჩვენ გავაგრძელებთ ირანის ხალხის მხარდაჭერას, რათა დაიცვან თავიანთი უფლებები, თავიანთი მისწრაფებები ღია, თავისუფალი საზოგადოებისა და დემოკრატიისკენ“, – განაცხადა მილერმა.

მისივე თქმით, ირანმა დახმარება სთხოვა ვაშინგტონს მას შემდეგ, რაც ირანის პრეზიდენტის, იბრაჰიმ რაისის ვერტმფრენი ჩამოვარდა, მაგრამ აშშ-მა ლოგისტიკური მიზეზების გამო დახმარების გაწევა ვერ შეძლო.

„ჩვენ არ ვაპირებთ ბოდიშის მოხდას ჩვენი სანქციების რეჟიმისთვის. ირანის მთავრობამ გამოიყენა თავისი თვითმფრინავი აღჭურვილობის გადასაზიდად ტერორიზმის მხარდასაჭერად, ასე რომ, ჩვენ გავაგრძელებთ ჩვენი სანქციების რეჟიმის აღსრულებას. საბოლოო ჯამში, ირანის მთავრობაა პასუხისმგებელი ამ გადაწყვეტილებაზე, რომ გაფრენილიყვნენ 45 წლის ვერტმფრენით“, – აღნიშნა მილერმა.

„არავითარი საჭიროება მმართველ გუნდს არჩევნების გაყალბების არ აქვს, ამას ქუჩაც მეტყველებს,“ – განაცხადა მედიასთან საუბარში პარტია ხალხის ძალის“ გენერალურმა მდივანმა, დეპუტატმა დიმიტრი ხუნდაძემ.

მისივე თქმით, უახლოეს დღეებში კონგრესში უნდა განიხილონ კანონპროექტი, სადაც ნათქვამია, რომ თუ საქართველოს მმართველი გუნდი ანტიდასავლურ რიტორიკას შეცვლის და ჩაატარებს სამართლიან არჩევნებს, მაშინ მათი მხრიდან გაიზრდება სამხედრო დახმარება და დაიწყება ვიზალიბერალიზაციაზე მსჯელობაც.

„კონგრესში ამ დღეებში უნდა განიხილონ კანონპროექტი, სადაც ნათქვამია, რომ თუ მმართველი გუნდი ანტიდასავლურ რიტორიკას შეცვლის და თუ სამართლიან არჩევნებს ჩაატარებს, მაშინ საქართველოსთვის გაიზრდება სამხედრო დახმარება ანუ მეტ იარაღს მოგვაწვდიან, დაიძვრება ვიზალიბერალიზაციის თემაც ანუ შერბილდება სავიზო რეჟიმი, ასევე საუბარია სავაჭრო ურთიერთობების ხელმისაწვდომობაზეც.

საგულისხმოა, რომ ამას ამერიკულ მხარეს „ქართული ოცნება“ საყვედურის სახით სრულიად დამსახურებულად ისედაც ეუბნებოდა, რადგან ჩვენი 30-წლიანი ურთიერთობა ამ ყველაფერს იმსახურებდა. ეს საყვედური დაუკავშირეს არჩევნებს, თუმცა სრულიად უადგილოდ.

პირობად სამართლიანი არჩევნების ჩატარება უადგილოა, რადგან მმართველი გუნდი ამ პირობის გარეშეც, სამართლიანი არჩევნების ჩატარებას აპირებს. აქამდეც ასე უქნია და ახლაც ასე იზამს. არავითარი საჭიროება მმართველ გუნდს არჩევნების გაყალბების არ აქვს, ამაზე ქუჩაც მეტყველებს. მე არ ვთვლი თავებს, მაგრამ საარჩევნოდ ხმები ითვლება,“ – განაცხადა დიმიტრი ხუნდაძემ.

აშშ-ს შეთავაზების პაკეტი “Megobari” საქართველოსთვის, რომელიც გულისხმობს სავიზო რეჟიმის გამარტივებას, შეღავათიან სავაჭრო პირობებსა და გაუმჯობესებულ სამხედრო მხარდაჭერას, არის მხოლოდ დასაწყისი იმ უდიდესი სარგებლისა, რასაც ივანიშვილი და მისი რეჟიმი ეღობება , – ამის შესახებ „სტრატეგია აღმაშენებლის“ ლიდერმა გიორგი ვაშაძემ განაცხადა.

მისი თქმით, „თუ ჩვენ დავამარცხებთ “ქართულ ოცნებას”, საქართველოს ექნება წარმოუდგენლად დიდი შესაძლებლობა თავისუფალ სამყაროში“.

„ეს არის ნამდვილი მეგობრული აქტი, რომელიც შეეხება თითოეულ ქართულ ოჯახს, თითოეულ ჩვენს მოქალაქეს. ამ პერსპექტივისა და შესაძლებლობის დაკარგვის უფლება არ გვაქვს! ბრძოლა ბოლომდე!“, – წერს ვაშაძე სოციალურ ქსელში.

Politico -ს ინფორმაციით, აშშ საქართველოსთვის მნიშვნელოვანი სამხედრო, სავაჭრო პაკეტის გადაცემასა და სავიზო რეჟიმის ლიბერალიზაციას განიხილავს, თუ ანტიდემოკრატიული კურსი შეიცვლება.

საზოგადოების 29 აპრილის და შემდეგ უკვე 17 მაისის მასშტაბური გამოსვლა იყო ნიშანი ზუსტად იმისა, რომ საქართველომ აირჩია სუვერენიტეტი მონობის ნაცვლად; აირჩია გამჭვირვალობა გაუმჭვირვალობის ნაცვლად და აირჩია ევროპული ღირებულება ქართულ ღირებულებასთან ერთად, საბჭოთა მენტალიტეტის ნაცვლად, – განაცხადა მედიასთან საუბარში პარტია „ხალხის ძალის“ აღმასრულებელმა მდივანმა გურამ მაჭარაშვილმა.

მისივე თქმით, მას აქვს იმედი, რომ ქვეყანაში განვითარებული მოვლენები პოზიტიურად დასრულდება და ყველა შეიცვლის რიტორიკას. „რატომ იცით? დაინახეს, რომ ჩვენ ღირსება დავიცავით,“ – აღნიშნა მან.

„გერმანიის ბუნდესტაგის საგარეო საქმეთა კომიტეტის თავმჯდომარემ, მიხაელ როთმა, მას შემდეგ რაც, დაინახა, რომ ქართული საზოგადოების აბსოლუტური უმრავლესობა მის სიტყვებს არ ეთანხმებოდა და ეს უმრავლესობა იყო ბევრად მეტი, ვიდრე მან მიტინგზე ნახა, აი მაშინ კი შეცვალა რიტორიკა და თქვა, რომ არ არის გამორიცხული, „ქართულმა ოცნებამ“ არჩევნები მოიგოს იმიტომ, რომ ოპოზიცია არის დანაწევრებულიო ანუ ოპოზიციას დააბრალა ყველაფერი.

გარწმუნებთ, რომ ამ რიტორიკას შეცვლიან, თუ აკვირდებით უკვე შეცვლილიც არის. რატომ იცით? დაინახეს, რომ ჩვენ ღირსება დავიცავით. ნახეთ ხომ თურქეთმა როგორ მიიღო ჩვენი პრემიერ – მინისტრი? ეს იყო ჟესტი იმისა, რომ მათ თვალში საქართველო, როგორც სახელმწიფო შედგა და დიდი მადლობა მათ ამისათვის. ჩინეთის ელჩის განცხადებაც იყო ზუსტადაც რომ დიპლომატიური. მან დაადასტურა, რომ მართლა პატივს სცემს საქართველოს, როგორც დამოუკიდებელ ქვეყანას და როგორც სტრატეგიულ პარტნიორს. მისი განცხადება, რომ არ ერევიან ჩვენს საშინაო საქმეებში, არის დასტური სტრატეგიული პარტნიორობის. თუმცა აქაურმა ელჩებმა ჩამოიყვანეს თავიანთი ქვეყნების მინისტრები, რომლებმაც გაგვლანძღეს და ამ ყველაფერს ტაში დაუკრეს აქციაზე მდგომმა ადამიანებმა.

ეს არის მონობა, ის ფსიქოლოგია, რომელიც დამუშავდა მთელი ამ ხნის განმავლობაში. შედეგი, დარწმუნებული ვარ, აუცილებლად იქნება პოზიტიური იმიტომ, რომ საზოგადოების 29 აპრილის და შემდეგ უკვე 17 მაისის მასშტაბური გამოსვლა იყო ნიშანი ზუსტად იმისა, რომ საქართველომ აირჩია სუვერენიტეტი მონობის ნაცვლად; აირჩია გამჭვირვალობა გაუმჭვირვალობის ნაცვლად და აირჩია ევროპული ღირებულება, ქართულ ღირებულებასთან ერთად, საბჭოთა მენტალიტეტის ნაცვლად,“ – განაცხადა გურამ მაჭარაშვილმა.

ემანუელ მაკრონ, ოლაფ შოლც ვწუხვარ, მაგრამ შორიდან, დამკვირვებლის პოზიციაში ყოფნა ზიანს აყენებს ევროკავშირსაც და ქართველ ხალხსაც, – ამის შესახებ ევროპარლამენტარი მირიამ ლექსმანი სოციალურ ქსელში წერს და აზიარებს საფრანგეთის პრეზიდენტის, ემანუელ მაკრონისა და გერმანიის კანცლერის, ოლაფ შოლცის განცხადებას საქართველოში მიღებული „უცხოური გავლენის გამჭვირვალობის შესახებ“ კანონთან დაკავშირებით.

„ვწუხვარ, მაგრამ შორიდან, დამკვირვებლის პოზიციაში ყოფნა ზიანს აყენებს ევროკავშირსაც და ქართველ ხალხსაც. ჩვენ არ შეგვიძლია, ვიყოთ ლეთარგიული, როცა „ქართული ოცნება“ ძირს უთხრის დემოკრატიას და ქართველი ხალხის ევროპულ მისწრაფებებს“, – წერს ლექსმანი.

საფრანგეთის პრეზიდენტმა, ემანუელ მაკრონმა და გერმანიის კანცლერმა, ოლაფ შოლცმა ერთობლივი განცხადება 19 მაისს გაავრცელეს. განცხადებაში ნათქვამია: „საქართველოს ევროპული გზა გაწერილია, მაგრამ წინსვლის სიჩქარე და მიმართულება საქართველოზეა დამოკიდებული“.

ნათელია, რომ “ოცნება” “ოცნება” არაა, “ეს ცუდი სიზმარია”, ცუდი ოცნება – მას არ შეუსრულებია ის პირობა, რომელიც ქართველ ხალხს მისცა წლების წინ, – ასე აფასებს საქართველოში განვითარებულ პროცესებს ამერიკელი კონგრესმენი სტივ კოენი.

შეერთებული შტატების წარმომადგენელთა პალატის წევრი, ტენესის შტატის დემოკრატი კონგრესმენი და ჰელსინკის კომისიის წევრი „ამერიკის ხმის“ ქართულ რედაქციასთან ინტერვიუში საუბრობს იმაზე თუ რას უნდა ელოდოს საქართველოს ხელისუფლება აშშ-საქართველოს პარტნიორობის ამ ეტაპზე.

„ვფიქრობ შეერთებულ შტატებს, ევროპის უმეტესობის მსგავსად, ნაკლები სურვილი ექნება მიიღოს, კარი გაუღოს საქართველოს ევროკავშირში, რაც მგონია, რომ საქართველოს სურს და რაც ის ადგილია, საითკენაც საქართველო ეკონომიკურადაც უნდა მიილტვოდეს. კანონი, რომელიც მათ მიიღეს, ქართველი ხალხის დიდ ნაწილს არ მოსწონს, არ მიესალმება. ქუჩებში გამოსული ადამიანების რაოდენობა ფენომენალურია.

ეს მახსენებს იმ დღეს, როცა “ოცნებამ” არჩევნებში [პირველად] გაიმარჯვა. მაშინ ვნახეთ უამრავი ადამიანი ქუჩებში, მთავარ გამზირზე. რა თქმა უნდა, [მას შემდეგ] “ოცნება” “კოშმარად” იქცა და არ იყო ის, რაც უნდა ყოფილიყო. იმის ნაცვლად, რომ მთავრობა გამხდარიყო უფრო ღია და გამჭვირვალე, კანონის მეტი უზენაესობით, ის უფრო პრორუსული გახდა. კანონი, რომელიც მათ მიიღეს, ავალდებულებს ნებისმიერ ჯგუფს, რომელიც დაფინანსების 20%-ს იღებს უცხოეთიდან, გამოცხადდეს უცხო ქვეყნის მთავრობის აგენტად. ეს ნამდვილად არ არის მაღალი სტანდარტი. არიან ჯგუფები და ადამიანები, რომლებიც დემოკრატიის, გამჭვირვალობის, კანონის უზენაესობისთვის მუშაობენ, მაგრამ ამ ჯგუფში მოხვდებიან. ეს კი არ ნიშნავს, რომ ისინი რამენაირად უცხო ქვეყნის მთავრობების აგენტები არიან.

სამწუხაროა, რომ ეს კანონი მიიღეს. ნათელია, რომ “ოცნება” “ოცნება” არაა, “ეს ცუდი სიზმარია”, ცუდი ოცნება. მას არ შეუსრულებია ის პირობა, რომელიც ქართველ ხალხს მისცა წლების წინ“, – აცხადებს კონგრესმენი.

კონგრესმენი ფიქრობს, რომ კანონპროექტის მიღების მიზანი „არის სამოქალაქო საზოგადოების წევრების ხმის ჩახშობა, მათი, ვინც ცდილობს, რომ დემოკრატიასთან დაკავშირებული საკითხები წინ წამოსწიოს, დაიცვას დემოკრატია და კანონის უზენაესობა, უმცირესობების უფლებები, სიტყვის თავისუფლება”, რაც მისი თქმით, „ქართულ ოცნებას“ არ სურს.

„ არ მგონია, რომ “ქართულ ოცნებას” ეს სურს. ვფიქრობ, მათ რუსეთთან დაახლოება უნდათ…

როცა თბილისში ჩავედი, და მათ არჩევნებში გაიმარჯვეს, ვფიქრობდი, რომ პარტიის სახელიც შესანიშნავად იყო შერჩეული. წინა ხელისუფლებას ბევრი ცუდი ჰქონდა გაკეთებული, ბევრი კითხვის ნიშანი იყო მათ მიმართ, “ქართულ ოცნებას” კი კარგ სახელთან ერთად, კარგი კამპანია ჰქონდა, მაგრამ მათ ეს სტანდარტი ვერ დააკმაყოფილეს. ყველაფერი სიცრუე აღმოჩნდა.

ხშირად ვხედავთ იმას, რომ ავტორიტარული მთავრობა, როცა ძალაუფლებას მიიღებს, ცდილობს ის ოპოზიციის წინააღმდეგ გამოიყენოს და მას დააბრალოს ის, რასაც ხშირად თავად აკეთებს.

ისინი [უნგრეთის ლიდერის, ვიქტორ] ორბანის მსგავსად იქცევიან, არ სურთ თავიანთ ქვეყნებში იმ ხალხის გავლენა, ვინც მათ ავტორიტარულ ძალაუფლებას კითხვის ნიშნის ქვეშ დააყენებს” , – დასძენს კოენი.

კონგრესმენი ფიქრობს, რომ ქართველი ხალხი დასავლეთთან კავშირებს ემხრობა, რაც არ ჩანს მთავრობისგან, შესაბამისად კოენის აზრით, ეს არის მოძრაობა სტალინიზმისკენ.

„ქართველი ხალხი ნამდვილად ასე ფიქრობს, ემხრობა ევროკავშირთან, ევროპასა და ამერიკასთან კავშირებს, მაგრამ ჩვენ არ გვინახავს ეს ამ მთავრობისგან. ვხედავთ მოძრაობას სტალინიზმისკენ…

ვისურვებდი, საქართველოს ევროკავშირის წევრად გახდომა მენახა. ვფიქრობ, სწორედ ესაა მათი სურვილი. მაგრამ რუსეთს სურს, ისინი კვლავ გახდნენ საბჭოთა კავშირის წევრები, თავი მეორე. [16 წლის წინ] ისინი შეიჭრნენ სამხრეთ ოსეთში და ყოველგვარი სინანულის გარეშე მიიტაცეს საქართველოს ნაწილი, რომელიც კვლავ ოკუპირებული აქვთ. რუსეთი საქართველოს მეგობარი არ არის, მაგრამ „ქართული ოცნება“ როგორც ჩანს, ფიქრობს, რომ არის. და მათ აიღეს ეს თავისი კანონი პირდაპირ რუსეთისგან. ესაა ტიპური რუსული კანონი, რომელიც იქ აქვთ, და რითაც ისინი ემსგავსებიან რუსეთს” ,- აღნიშნავს კოენი.

კონგრესმენის აზრით, საქართველოს ხელისუფლება „უფრო მეტად არიან რუსეთისკენ გადახრილნი, ვიდრე – დასავლელი მოკავშირეებისკენ. მათი გრავიტაცია რუსეთისკენაა, რომელსაც მათი ქვეყნის ნაწილი ოკუპირებული აქვს”.

ასევე, კოენმა უპასუხა „უცხოური გავლენის გამჭვირვალობის შესახებ“ კანონპროექტსა და ე.წ. ფარას – “უცხოეთის აგენტების რეგისტრაციის აქტს” შორის მსგავსებასა და განსხვავებას შორის დასმულ კითხვასაც.

“ “ფარა” ეხება ლობისტურ საქმიანობას, ის არ ეხება სამოქალაქო ორგანიზაციებს, ეს მათ არანაირ პრობლემას არ უქმნის. ის გავლენას ახდენს ლობისტებზე. ორგანიზაციებზე, რომლებიც სხვა ქვეყნის მთავრობების მიზნების მიღწევას ცდილობენ. არის განსხვავება იმაში, რომ ეცადო მოახრჩო სამოქალაქო საზოგადოება ან ეცადო, რომ გაიგო, რას წარმოადგენენ ორგანიზაციები, რომლებიც შენს ქვეყანაში, მის ლიდერებზე გავლენით ცდილობენ, რეგულაციების შეცვლას სხვა ქვეყნის ინტერესების სასარგებლოდ და ლობირებით”, – აღნიშნავს ის.

მორიგი არაადეკვატური განცხადებაა ოპოზიციის წარმომადგენლების მხრიდან, წარსულშიც არაერთხელ მოგვისმენია ასეთი. იმის ნაცვლად, რომ ჩვენს საზოგადოებას, ხელისუფლებას დაუდგნენ გვერდით იმ მნიშვნელოვანი საკითხის გარშემო, რაც არის უკრაინის მიმართ მხარდაჭერა, აკეთებენ ასეთ გაუგებარ განცხადებას, – ამის შესახებ „ქართული ოცნების“ წევრმა, არჩილ თალაკვაძემ განაცხადა.

თალაკვაძის თქმით,  რეალურად უკრაინაში დღეს არის ძალიან მძიმე ვითარება, უკრაინელი ხალხი იცავს თავისუფლებას, ტერიტორიულ მთლიანობას, სუვერენიტეტს.

„საქართველო აკეთებს ყველაფერს, რაც შეუძლია უკრაინელი ხალხის და უკრაინის მხარდასაჭერად. რა თქმა უნდა, ვინც ახლა ამბობს, რომ უკრაინის დღევანდელი ვითარება არის მარტივი და სასურველი, ის ატყუებს საზოგადოებას. პირიქით, ახლა მთელი ცივილიზებული სამყარო ვდგავართ უკრაინის გვერდით სწორედ იმიტომ, რომ უკრაინაში მიმდინარეობს ბრუტარული ომი“, – განაცხადა თალაკვაძემ.

საქართველოს პრემიერ-მინისტრმა, ირაკლი კობახიძემ მთავრობის სხდომაზე განაცხადა: „აქციების ერთ-ერთმა ლიდერმა განაცხადა, რომ შურს უკრაინელების, ეს არ არის შემთხვევითი წამოცდენა, მათთვის მთავარი დავალებაა, საქართველომ უკრაინის ბედი გაიზიაროს“.

პრემიერ-მინისტრმა, ჩვენ გამოვთქვით მზადყოფნა, რომ განვიხილოთ ყველა არგუმენტირებული შენიშვნა. მიუხედავად იმისა, რომ წინა დღეებში ასეთი რიტორიკა გვესმოდა, ქალბატონმა სალომე ზურაბიშვილმა წარმოადგინა ვეტო, რომელსაც არცერთ მუხლთან დაკავშირებით სამართლებრივი არგუმენტაცია და შენიშვნა არ მოჰყვება, – ამის შესახებ „ქართული ოცნების“ წევრმა, არჩილ თალაკვაძემ განაცხადა.

თალაკვაძის თქმით, მმართველი გუნდი მზად იყო ნებისმიერი დასაბუთებული შენიშვნის განხილვისთვის.

„საქართველოს პარლამენტმა მიიღო გამჭვირვალობის შესახებ ისეთი კანონი, რომლის მსგავსიც აქვს ევროკავშირის 15 ქვეყანას, ვგულისხმობ გამჭვირვალობის რეესტრებს, ასევე ამერიკის შეერთებულ შტატებს, ავსტრალიას და ახლა უკვე კანადაც მუშაობს ამაზე. პრეზიდენტის, ოპოზიციის, საერთაშორისო აქტორების მხრიდან იყო არაერთი განცხადება, რომ მრავალი არგუმენტი არსებობს და შენიშვნა კანონთან დაკავშირებით. პრემიერ-მინისტრმა, ჩვენ გამოვთქვით მზადყოფნა, რომ განვიხილოთ ყველა არგუმენტირებული შენიშვნა. მიუხედავად იმისა, რომ წინა დღეებში ასეთი რიტორიკა გვესმოდა, ქალბატონმა სალომე ზურაბიშვილმა წარმოადგინა ვეტო, რომელსაც არცერთ მუხლთან დაკავშირებით სამართლებრივი არგუმენტაცია და შენიშვნა არ მოჰყვება. ეს არის პოლიტიკური მოტივაციით გამოგზავნილი ვეტო, რომ საპროტესტო აქციას, მოქალაქეების ემოციებზე ზეგავლენას როგორმე შეუწყოს ხელი. ვიმეორებ. ჩვენ მზად ვიყავით ნებისმიერი არგუმენტის, დასაბუთებული შენიშვნის განხილვისთვის. იყო საერთაშორისო პარტნიორებისგან მოწოდებებიც, რომ პრეზიდენტმა ვეტოში ასახოს ეს შენიშვნები, მაგრამ, როგორც ხედავთ, ქალბატონი სალომე ზურაბიშვილი არ დაელოდა ამ შენიშვნებს, არ დაელოდა არგუმენტაციას, რომელზეც ისიც ამბობდა, რომ ჰქონდა შენიშვნები. ნაჩქარევად წარმოადგინა ვეტო, რომელშიც მხოლოდ პოლიტიკური მოტივაცია არის მოცემული. შესაბამისად, ამით მან დახურა ის სივრცეც, რომლითაც მისივე არგუმენტების, ოპოზიციის არგუმენტების ან საერთაშორისო არგუმენტების განხილვა სურდათ“, – განაცხადა თალაკვაძემ.

საქართველოს პრეზიდენტმა, სალომე ზურაბიშვილმა „უცხოური გავლენის გამჭვირვალობის შესახებ“ კანონს ვეტო დაადო.

პრეზიდენტის საპარლამენტო მდივნის, გიორგი მსხილაძის განცხადებით, პრეზიდენტის ვეტოში ასახულია კონსტიტუციის ოთხი მუხლი, რომელიც ირღვევა „უცხოური გავლენის გამჭვირვალობის შესახებ“ კანონით და განმარტებულია, თუ რატომაა ეს კანონპროექტი რუსული.

„პრეზიდენტის ვეტო არის მოტივირებული, მასში არის აღწერილი კონსტიტუციის ოთხი მუხლი, რომელიც ირღვევა ამ კანონით. არის განმარტებული, რატომაა აღნიშნული კანონი რუსული. არის მოყვანილი მისი მიღების მოტივაცია, რა ფორმით იყო ეს კანონი მიღებული, რომ ეს არის ჩვენთვის მიუღებელი და დაუშვებელი“, – აღნიშნა გიორგი მსხილაძემ.

პარლამენტმა „უცხოური გავლენის გამჭვირვალობის შესახებ“ კანონი მესამე მოსმენით 14 მაისს მიიღო. საქართველოს პრეზიდენტმა, სალომე ზურაბიშვილმა „უცხოური გავლენის გამჭვირვალობის შესახებ“ კანონს ვეტო 19 მაისს დაადო.

საქმე მიჰყავთ იქითკენ, თითქოს მე ვარ რაღაც ძალადობრივის ორგანიზატორი, – ამის შესახებ „გირჩი-მეტი თავისუფლების“ ლიდერმა, ზურაბ ჯაფარიძემ საქალაქო სასამართლოში გამოკითხვის დასრულების შემდეგ განაცხადა.

კითხვაზე, შესაძლებელია თუ არა, რომ დააკავონ, ზურაბ ჯაფარიძე პასუხობს, რომ „შეიძლება კი. მიდი და ამტკიცე, რომ ის ჩანაწერი სამი წლის წინაა გაკეთებული. მაგ სტადიაში არიან, რომ ყველაფერი შეიძლება მოხდეს“.

„თავიდან ზოგადი კითხვები დამისვეს, ამ და ამ რიცხვში სად იყავიო. შემდეგ საუბარი წაიყვანეს იქითკენ – „იმედმა“ სუს-ის მიერ გაკეთებული ჩანაწერები რომ გაუშვა. ეს ჩანაწერები ორი ან მეტი წლის წინ არის გაკეთებული. იმ ჩანაწერებში რაღაცებს ამბობო, მოკლედ, სამი წლის წინ რაც ვილაპარაკე, მაგას ამ აქციებს აბამენ. კითხვები იყო, ოდესმე დაგიორგანიზებიათ თუ არა, ძალადობრივი რაღაც. ვეუბნებოდი, რომ არა. [საქმე] მიჰყავთ იქითკენ, რომ თითქოს მე ვარ რაღაც ძალადობრივის ორგანიზატორი. დღეს მორჩა და მერე რას იზამენ, არ ვიცი. ხმის ნიმუში გვინდაო და არ მოგცემთ – მეთქი“, – განაცხადა ზურაბ ჯაფარიძემ.