ქვეყნის ეროვნული ინტერესების ღალატში გაჯიუტებული ივანიშვილი პირადად აგებს პასუხს კონსტიტუციის უხეში დარღვევის, კრემლიდან მომდინარე უზარმაზარი საფრთხეების უპრეცედენტოდ გაძლიერების, ევროატლანტიკური კურსისა და დემოკრატიზაციის დაბლოკვის გამო, – ამის შესახებ ოპოზიციონერი დეპუტატი, არმაზ ახვლედიანი სოციალურ ქსელში წერს.

არმაზ ახვლედიანის განცხადებით, ახლა ოპოზიციური ერთობის დროა და დაუყოვნებლივ საგანგებო საკოორდინაციო საბჭო უნდა შეიქმნას.

„დადგა დრო, პატრიოტი მოქალაქეების, ჩვენი საამაყო სტუდენტების მტკიცე, უწყვეტ, გრანდიოზულ პროტესტს მხარი აუბას და სწორი სამართლებრივ-პოლიტიკური გეზი მისცეს ოპოზიციის ერთობამ.

მოვუწოდებ ოპოზიციონერ კოლეგებს, პარტიების ლიდერებს, დაუყოვნებლივ შევქმნათ საგანგებო საკოორდინაციო საბჭო, რომელიც სასწრაფოდ შეიმუშავებს და გააცნობს საზოგადოებას ქვეყნის უმწვავესი კრიზისიდან გამოყვანის, არჩევნების ნორმალურ გარემოში ჩატარებისა და დემოკრატიზაციის გეგმას.

უნდა შევთანხმდეთ, რომ: საბჭოს ყველა ნაბიჯი სრულ შესაბამისობაში იქნება კონსტიტუციასთან;

საგანგებო საკონსულტაციო საბჭო დაკომპლექტდება სამართლიანობის და თანაბრობის პრინციპით.

რუსული კანონის საბოლოოდ მიღების შემთხვევაში, მოვითხოვთ და მივაღწევთ არსებული მთავრობის გადადგომას და უახლოეს ერთ თვეში ტექნიკური მთავრობის შექმნას, რომელიც დაკომპლექტდება უმაღლესი რეპუტაციისა და პროფესიონალიზმის მქონე პირებისგან.

ტექნიკური მთავრობა პრიორიტეტულად იმუშავებს ევროკავშირში შემდგომი ინტეგრაციის და არჩევნების სამართლიან გარემოში ჩატარების გადაუდებელ საკითხებზე.

საგანგებო საკოორდინაციო საბჭო მჭიდროდ ითანამშრომლებს პროტესტში მონაწილე საზოგადოებრივ ჯგუფებთან და დასავლელ პარტნიორებთან.

საქართველოს კრემლის ჭაობიდან ამოყვანა და ევროპულ სახელმწიფოდ გადაქცევა ახლა თითოეული შეგნებული მოქალაქისა და პასუხისმგებლიანი პოლიტიკოსის ღირსების საქმეა!“, – წერს არმაზ ახვლედიანი.

საქართველოში მშვიდობიანი დემონსტრანტები საქართველოსა და ევროკავშირის დროშებს ატარებენ, რაც ევროპასთან ინტეგრირებული წარმატებული და დემოკრატიული მომავალისთვის მათ იმედებს ასახავს , – ამის შესახებ USAID-ის ხელმძღვანელი, სამანტა პაუერი აცხადებს.

„საქართველოში მშვიდობიანი დემონსტრანტები საქართველოსა და ევროკავშირის დროშებს ატარებენ, რაც ევროპასთან ინტეგრირებული წარმატებული და დემოკრატიული მომავალისთვის მათ იმედებს ასახავს. ეს კანონპროექტი სამოქალაქო საზოგადოებასა და დამოუკიდებელ მედიას ჩაახშობს, რაც საქართველოს ევროკავშირის კანდიდატურას ძირს გამოუთხრის“, – წერს სამანტა პაუერი X-ზე.

რაც შეეხება თბილისის სამოქალაქო ომს, მაიდანს და ა.შ. და ამის გახსენებას, რა თქმა უნდა, საქართველოში ეს სცენარი ვერ შედგება, ამის არავითარი რესურსი არ აქვს იმ პოლიტიკურ უმცირესობას, რომელიც არის, ყველაფერთან ერთად, აბსოლუტურად დისკრედიტირებული, –  ამის შესახებ საქართველოს პრემიერ-მინისტრმა ირაკლი კობახიძემ მთავრობის ადმინისტრაციაში გამართულ ბრიფინგზე ჟურნალისტის კითხვის პასუხად განაცხადა.

მისივე თქმით, საქართველოს უკრაინიზაცია ვერ შედგება.

„ნული კოორდინაცია, სრული დისკრედიტაცია, ეს არის საერთო სურათი რადიკალურ ოპოზიციაში, ასეთ ვითარებაში, რა თქმა უნდა, ვერავითარი მაიდანი და ამ ქვეყნის უკრაინიზაცია ვერ შედგება, ეს არ არის იანუკოვიჩის უკრაინა. მინდა, შეგახსენოთ, ეს არის წელში გამართული სუვერენული სახელმწიფო, რომელსაც შეუძლია რეაგირება ძალადობის ნებისმიერ მცდელობაზე. შესაბამისად, საქართველოში უკრაინული სცენარი არ შედგება.

აქვე მინდა, შეგახსენოთ, როცა მაიდანს გვახსენებენ, თუ რა იყო მაიდნის გაგრძელება, ეს იყო, საბოლოო ჯამში, ერთი და მეორე ომი. პირველი ომის შედეგად უკრაინამ დაკარგა თავისი ტერიტორიების 8 %, ამას მოყვა მეორე ომი და ზემოდან კიდევ 12 %-ის დაკარგვა, ეს არის უმძიმესი შედეგები, რაც მიიღო უკრაინამ ამ პროცესებიდან, მაიდნიდან პირველ რიგში. ჩვენს ქვეყანაში ამას არ დავუშვებთ. მით უმეტეს მაშინ, როცა ეს ძალადობრივი პოლიტიკური გაერთიანება, პოლიტიკური უმცირესობა ცდილობს, რომ ასეთი სცენარი განახორციელოს,“- განაცხადა ირაკლი კობახიძემ.

ექსპერტი ედიშერ გვენეტაძე სოციალურ ქსელში პრემიერ-მინისტრის, ირაკლი კობახიძის განცხადებას ეხმიანება, რომლის თქმითაც, ხვალ საქართველოს პარლამენტი იმოქმედებს საქართველოს მოსახლეობის უმრავლესობის რაციონალური ნების შესაბამისად და მესამე მოსმენით მიიღებს კანონს, რომელიც გარედან თავს მოხვეული ე.წ. პოლარიზაციის დასრულებაში უმნიშვნელოვანეს წვლილს შეიტანს.

გვენეტაძის თქმით, სავსებით მართალია პრემიერი, პარლამენტმა კანონი უნდა მიიღოს და საქართველოში უნდა შეწყდეს, გარედან დაფინანსებული სახელმწიფო რყევები.

„სავსებით მართალია პრემიერი – პარლამენტმა კანონი უნდა მიიღოს და რაც მთავარია კანონი უნდა აღსრულდეს!
ბოლოს და ბოლოს საუკუნის მესამედის გავლის შემდეგ (33 წლის) საქართველოში უნდა შეწყდეს, გარედან დაფინანსებული სახელმწიფო რყევები!

და „მშვიდობა ნახოს საქართველომა!“
ასეც იქნება!“, – წერს ედიშერ გვენეტაძე.

საქართველოს პრემიერ-მინისტრი ირაკლი კობახიძე აცხადებს, რომ ლიეტუვის პარლამენტის წევრის, ჟიგიმანტას პავილიონისის „გამჭვირვალობის შესახებ კანონპროექტის“ საწინააღმდეგო აქციაზე მისვლა საქართველოს სუვერენიტეტის მიმართ უხეში დამოკიდებულების გამოვლინებაა.

როგორც პრემიერ-მინისტრმა აღნიშნა, ვიღაცებს არ მოსწონთ, გულზე არ ეხატებათ საქართველოს სუვერენიტეტი.

„ჟიგიმანტას პავილიონისის აქციაზე მისვლა არის, რა თქმა უნდა, იმის მაჩვენებელი, თუ როგორია ამ ადამიანების დამოკიდებულება სახელმწიფოსა და მისი სუვერენიტეტის მიმართ. ამდენი ხანი ჩვენ რასაც ვამტკიცებთ, იმის დასტური წარმოადგინა ბატონმა პავილიონისმა. ჩვენ ვამტკიცებთ, რომ ვიღაცებს არ მოსწონთ, გულზე არ ეხატებათ საქართველოს სუვერენიტეტი. როდესაც კადრულობს კონკრეტული ქვეყნის პარლამენტის წევრი, უცხო ქვეყნის წარმომადგენელი პოლიტიკოსი, რომ უხეშად ჩაერიოს ამ ქვეყნის შიდა პოლიტიკურ საქმეებში, ამით ხომ ამტკიცებს იმას, რასაც ჩვენ ვამტკიცებდით ამდენი ხნის განმავლობაში, რომ ეს არის მათი დამოკიდებულება, მაგრამ ჩვენ არ ვაპირებთ, ლოიალური დამოკიდებულება გამოვავლინოთ ასეთი ინციდენტების მიმართ, რაც უკავშირდება საქართველოს სუვერენიტეტის მიმართ უხეში დამოკიდებულების გამოვლინებას“, – განაცხადა ირაკლი კობახიძემ.

ჩვენ ვიბრძვით ჩვენი ქვეყნის დამოუკიდებლობისა და სუვერენიტეტისთვის, გრძელვადიანი მშვიდობის, გრძელვადიანი სიმშვიდის უზრუნველყოფისთვის, რათა ქვეყანას უკრაინის სცენარი ავარიდოთ თავიდან, – ამის შესახებ საქართველოს პრემიერ-მინისტრმა, ირაკლი კობახიძემ მთავრობის ადმინისტრაციაში გამართულ ბრიფინგზე ჟურნალისტის კითხვის პასუხად განაცხადა.

ირაკლი კობახიძის თქმით, სანქციების თემა არის არასერიოზული, მით უმეტეს იმ ფონზე, როდესაც ბიძინა ივანიშვილს ისედაც აქვს დე ფაქტო სანქციები დაწესებული.

„სანქციები არის აბსოლუტურად არასერიოზული, მით უმეტეს, სანქციები ბიძინა ივანიშვილის მიმართ, რომელსაც ისედაც აქვს დე ფაქტო სანქციები დაწესებული. კიდევ ერთხელ გავიმეორებ, მან ორი მილიარდი დოლარი მიანდო დასავლეთს, თუმცა ეს თანხა აღმოჩნდა გლობალური ომის პარტიის ხელში. ანუ მასზე დე ფაქტო ისედაც მოქმედებს ეს სანქციები. ასეთ ვითარებაში აბსოლუტურად არასერიოზულია საუბარი ბიძინა ივანიშვილის სანქცირებაზე.

რაც შეეხება დანარჩენ პოლიტიკოსებს, პირადად მე, დეპუტატებს და ა.შ. ხშირად გვესმის ასეთი განცხადებები. ჩვენთვისაც ზუსტად ისეთივე არასერიოზულია, უფრო არასერიოზულია კიდევ, ვიდრე ბიძინა ივანიშვილისთვის. წარმოიდგინეთ, რომ ბიძინა ივანიშვილს ჰქონდა დასაკარგი ორი მლრდ დოლარი, სასწორზე დადო მან ორი მლრდ დოლარი, ჩვენ არაფერი გვაქვს დასაკარგი ამის მსგავსი. აქედან გამომდინარე, თუ ბიძინა ივანიშვილი გვაძლევს ასეთ მაგალითს, თუ მისთვის არის არასერიოზული საუბარი დე ფაქტო თუ ფორმალურ სანქციებზე, თქვენ წარმოიდგინეთ მით უმეტეს ჩვენთვის როგორი არასერიოზულია ამაზე საუბარი.

ჩვენ ვიბრძვით ჩვენი ქვეყნის დამოუკიდებლობისა და სუვერენიტეტისთვის, გრძელვადიანი მშვიდობის, გრძელვადიანი სიმშვიდის უზრუნველყოფისთვის, იმისათვის, რომ ქვეყანას უკრაინის სცენარი ავარიდოთ თავიდან. ამ ქვეყანაში ადამიანები 3 000 წელია, თავს სწირავენ ქვეყნის დამოუკიდებლობისა და ქვეყნის ინტერესებისთვის. ასეთ პირობებში ვიღაცამ ვიზებით დაგაშანტაჟოს, ან რაღაცის გაყინვით დაგაშანტაჟოს, ისინი უბრალოდ არ იცნობენ ქართველი კაცის ბუნებას. ვისაც აზრად მოსდის სანქციებით შანტაჟი, ასეთი ადამიანი უბრალოდ არ იცნობს ქართველი კაცის ბუნებას“, – განაცხადა პრემიერმა.

კონგრესის საგარეო ურთიერთობათა კომიტეტის რამდენიმე წევრი „უცხოური გავლენის გამჭვირვალობის“ კანონთან დაკავშირებით ირაკლი კობახიძეს მიმართავს.

„დღეს, წარმომადგენლებმა, წარმომადგენელთა პალატის საგარეო ურთიერთობათა კომიტეტის წევრმა და თავმჯდომარემ, გრეგორი მიქსმა და მაიკლ მაკკოლიმ, ევროპის ქვეკომიტეტის წევრთან და თავმჯდომარესთან უილიამ კიტინგთან და თომას კინთან ერთად, წერილით მიმართეს საქართველოს რესპუბლიკის პრემიერ-მინისტრს ირაკლი კობახიძეს, რომელშიც გმობენ კანონპროექტს „უცხოური აგენტების“ შესახებ, რომელიც ამჟამად პარლამენტში მუშავდება. მათ ამ წერილში შეუერთდა 25 კოლეგისგან შემდგარი ორპარტიული ჯგუფი, მათ შორის ოსტინ სკოტი და გერი კონოლი.

„უცხოური აგენტების“ კანონპროექტი საქართველოს მთავრობას მისცემს უფლებას, შევიწროება, სტიგმატიზაცია და ჯარიმები დააწესოს საქართველოს სამოქალაქო საზოგადოების ორგანიზაციებსა და დამოუკიდებელ მედიასაშუალებებზე, მათ შორის მათზე, რომელთაც მიიღეს მხარდაჭერა შეერთებული შტატებისა და ევროპელი პარტნიორებისგან“, – ნათქვამია განცხადებაში.

“იმ შემთხვევაში თუ ჩვენ თავს დავუხრით უარგუმენტო და სიცრუეზე დაფუძნებულ საბჭოური ტიპის გარე დირექტივებს, მომავალში ასეთივე წარმატებით მოგვთხოვენ მაგალითად, ოჯახური ღირებულებებისა და არასრულწლოვანთა დაცვის შესახებ კანონის არმიღებას, ერთნაირსქესიანთა ქორწინების დაკანონებას, ნარკოტიკების ლეგალიზაციას, უკონტროლო იმიგრაციის დაშვებას და მრავალ სხვა მანკიერებას, რომელცი სხვადასხვა ქვეყანაში ძალიან სწრაფი ტემპით იკიდებს ფეხს” – პრემიერმინისტრი ირაკლი კობახიძე

შემიძლია დაგიდასტუროთ, რომ იყო ბიძინა ივანიშვილის მიმართ თხოვნა შეხვედრასთან [ჯეიმს ო’ბრაიანთან] დაკავშირებით, რაზეც ბიძინა ივანიშვილმა უარით უპასუხა – რაც შეეხება სანქციების თემას, ეს არის აბსოლუტურად არასერიოზული,- ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებს განუცხადა, რითაც გამოეხმაურა ინფორმაციას, რომ „ევროპისა და ევრაზიის საკითხებში აშშ-ის სახელმწიფო მდივნის თანაშემწეს ჯეიმს ო’ბრაიანს ხვალ საქართველოში სანქციების პაკეტი ჩამოაქვს და ბიძინა ივანიშვილს შეხვდება“.

კობახიძის თქმით, ბიძინა ივანიშვილის პოზიციაა, რომ შანტაჟის ქვეშ ვერავითარ შეხვედრას ვერ გამართავს. ამასთან, როგორც პრემიერი ამბობს, ივანიშვილს სანქციების თემა არ აინტერესებს, რადგან მის მიმართ „დე-ფაქტო სანქციები ისედაც მოქმედებს“.

„თავად ბიძინა ივანიშვილს არ აინტერესებს ეს საკითხი, გამომდინარე იქიდან, რომ ამ საკითხს არასერიოზულად მიიჩნევს. რაც შეეხება ო’ბრაიანის ვიზიტს, შემიძლია დაგიდასტუროთ, რომ იყო ბიძინა ივანიშვილის მიმართ თხოვნა შეხვედრასთან დაკავშირებით, რაზეც ბიძინა ივანიშვილმა უარით უპასუხა. ამას თავისი ახსნა და განმარტება ჰქონდა. ასევე იყო გასული თვეების განმავლობაში შემთხვევები, როდესაც სხვა უცხოელ დიპლომატებს და პოლიტიკოსებსაც უთხრა უარი ბიძინა ივანიშვილმა შეხვედრაზე. ამაზე ინფორმაცია მაქვს იქიდან გამომდინარე, რომ მე მთხოვდნენ ხოლმე ამ საკითხების შეთანხმებას. ყველა შემთხვევაში უარის მიზეზი იყო ერთი და იგივე. ბიძინა ივანიშვილი აცხადებდა, რომ ისედაც არის დე-ფაქტო სანქციების ქვეშ. გაყინული აქვს 2 მილიარდი დოლარი, რომელიც დასავლეთს მიანდო, მაგრამ აღმოჩნდა „გლობალური ომის პარტიის“ ხელში. აქედან გამომდინარე, ბიძინა ივანიშვილის პოზიციაა, რომ შანტაჟის ქვეშ ის ვერავითარ შეხვედრას ვერ გამართავს. ეს არის მისი მკაფიო პოზიცია. როგორც კი დასრულდება შანტაჟი და დე-ფაქტო სანქციები, შეიძლება ნებისმიერი შეხვედრა შედგეს, მაგრამ დღეს ესაა ბიძინა ივანიშვილის პოზიცია. აქედან გამომდინარე ასეთი შანტაჟი და მუქარა როგორც არ ჭრიდა 2022 წლის მარტიდან, როდესაც თანხები გაუყინეს უკრაინაში ომის დაწყების შემდეგ, ასევე ვერ გაჭრის მასზე ასეთი შანტაჟი და მუქარა. ვერავინ გადაადგმევინებს ბიძინა ივანიშვილს სახელმწიფოს საწინააღმდეგო ნაბიჯებს, ვერავითარი შანტაჟისა და მუქარის პირობებში. სანქცია ხომ თავისთავად შეიცავს შანტაჟსა და მუქარას. ეს არის არასერიოზული თემა ამ ყველა ამ გარემოების გათვალისწინებით“,- განაცხადა ირაკლი კობახიძემ. შეგახსენებთ, რომ მედიაში გავრცელდა ინფორმაცია, რომ ევროპისა და ევრაზიის საკითხებში აშშ-ის სახელმწიფო მდივნის თანაშემწეს, ჯეიმს ო’ბრაიანს, რომელიც საქართველოში ჩამოდის, ბიძინა ივანიშვილის სანქცირების პაკეტი ჩამოაქვს და ბიძინა ივანიშვილსაც შეხვდება.