პოლონეთის საგარეო საქმეთა მინისტრი რადოსლავ სიკორსკი არ იზიარებს აშშ-ის პრეზიდენტ დონალდ ტრამპის მოსაზრებას, რომ უკრაინის მიერ რუსეთის ტერიტორიაზე განხორციელებული დარტყმები დიზელის საწვავის დეფიციტს იწვევს.

„მე სხვანაირად ვფიქრობ", - განაცხადა სიკორსკიმ დასმული კითხვის საპასუხოდ, რომელიც თეთრი სახლის ლიდერის მიერ გაკეთებულ განცხადებას ეხებოდა.
13 სექტემბერს შეერთებული შტატების პრეზიდენტმა დონალდ ტრამპმა თავის უკრაინელ კოლეგას ვოლოდიმირ ზელენსკის მოუწოდა, შეწყვიტოს რუსეთის ტერიტორიაზე დიზელის საწვავის ობიექტებზე საჰაერო იერიშები, რადგან თეთრი სახლის ლიდერის თქმით, ეს საწვავის დეფიციტს იწვევს.

„ბატონმა ზელენსკიმ ერთი რამ უნდა გააკეთოს. მან უნდა შეწყვიტოს რუსეთში დიზელის საწვავის მარაგების განადგურება. ვინაიდან ეს დეფიციტს იწვევს. დეფიციტი ახლო აღმოსავლეთის გამო არაა, ეს იმით არის გამოწვეული, რაც რუსეთსა და უკრაინას შორის ხდება. ასე რომ, ბატონ ზელენსკის ვესაუბრეთ ამაზე. ნუ ურტყამთ დიზელის საწვავს, ვინაიდან ეს მთლიანად მსოფლიოს აზიანებს. არ გვინდა, რომ დიზელის საწვავს ურტყამდეს," - განაცხადა ტრამპმა.