საქართველოს პარლამენტის თავმჯდომარე არჩილ თალაკვაძე ეროვნულ-დემოკრატიული ინსტიტუტის (NDI) საქართველოს ოფისის ახალ დირექტორს, ალან გილამს ტელეკონფერენციის ფორმატში შეხვდა. ამის შესახებ ინფორმაციას პარლამენტის პრესსამსახური ავრცელებს.

ამავე ინფორმაციის თანახმად, საუბარი შეეხო არჩევნებთან დაკავშირებით საქართველოს პარლამენტის მიერ გატარებულ საკანონმდებლო რეფორმებს, წინასაარჩევნო კამპანიის მიმდინარეობას, „კოვიდ 19“-თან დაკავშირებულ უსაფრთხოების ზომებს და სადამკვირვებლო მისიების საქართველოში ჩამოსვლის საკითხს. შეხვედრაში ვიცე-სპიკერი კახა კუჭავა და პარლამენტის საგარეო ურთიერთობათა კომიტეტის თავმჯდომარე ირაკლი ბერაია, ასევე NDI-ს ადგილობრივი ოფისის თანამშრომლები მონაწილეობდნენ.

„საქართველო საიმედო დემოკრატიული პარტნიორია. ჩვენ გავატარეთ მნიშვნელოვანი დემოკრატიული რეფორმები და მზად ვართ არსებითად პროპორციული სისტემით თავისუფალი და სამართლიანი არჩევნების ჩასატარებლად. საქართველო აძლიერებს დემოკრატიას და მოხარული ვართ, რომ ჩვენი საერთაშორიო მეგობრები და სტრატეგიული პარტნიორები ამ პროცესს მხარს უჭერენ. ყველა სათანადო ზომა, რათა გლობალური პანდემიის პირობებში დამკვირვებლები საქართველოში ჩამოვიდნენ, მიღებულია”, - განაცხადა არჩილ თალაკვაძემ.