დღეს რომ ევროკავშირის ეკონომიკის ზრდა ერთი პროცენტია და საქართველოში ათი პროცენტი, ეს იმიტომ არის, რომ ჩვენ ეკონომიკურად სწორად ვფიქრობთ. თუ ვიზები ჩაკეტეს, ტურისტი არ შეუშვეს, რომელიც ფულს ხარჯავს იმ ქვეყანაში, ესე ზრდაც არ ექნებათ, ქართველი ხალხი ამაზეც უნდა დავფიქრდეთ, – განაცხადა პარლამენტის თავმჯდომარე შალვა პაპუაშვილმა „იმედის ეთერში“.

წამყვანმა მას ჰკითხა, ელოდება თუ არა ევროკავშირისგან ვიზალიბერალიზაციის შეჩერებას და თუ ასე იქნება, რა რეაქცია ექნება ხალხს.

„უვიზო რეჟიმის შეჩერებასთან დაკავშირებით არანაირი მოლოდინი, რომ საქართველოსთან დაკავშირებით ნეგატიური გადაწყვეტილება იქნება, არ მაქვს. თუმცა ეს ძალიან სწორი აქცენტია იმისთვის, რომ მივხვდეთ საით იყურება ევრობიუროკრატია. ეს ეხება 61 ქვეყანას და ეს არის ინსტრუმენტი პოლიტიკური ზეწოლისა და შანტაჟისთვის. როგორც ჩანს, დღეს ბრიუსელის ბიუროკრატიის ნაწილს სურს, რომ ჰქონდეს ბერკეტები სხვა ქვეყნებზე გავლენის მოსახდენად. ხალხი, რომელიც გველაპარაკება ევროპულ ღირებულებებზე და სიტყვა ღირებულება რომ ძალიან მოსწონთ, ასე ცივსისხლიანად, პრაგმატულად ხალხზე ზეწოლით ფიქრობს ხელში ჰქონდეს ინსტრუმენტი, რომ გავლენა მოახდინოს სხვა ქვეყნების პოლიტიკაზე. ამასაც უნდა შევხედოთ ძალიან რაციონალური თვალით.

რაც შეეხება საქართველოსთან დაკავშირებით უვიზო მიმოსვლის შეჩერებას, ამის არანაირი საფუძველი არ არსებობს. დღეს ვუსმენდი გერმანიის ელჩის ინტერვიუს, რომელმაც თქვა, რომ ვიზა, ეს არის პრივილეგია, უნდა დავაფასოთო. სიმართლე გითხრათ, ცოტა ეს აროგანტულობა სამწუხაროდ ახასიათებს გერმანიის ელჩს. ღვთიური მანანაა უვიზო მიმოსვლა?! ჩვენც უვიზო გვაქვს გერმანელებისთვის და რა?! ბოდიში მომითხოვია ყველასთან, მაგრამ ეს უვიზო მიმოსვლა გულისხმობს ქართველი ტურისტის წასვლას გერმანიაში, საფრანგეთში, იქ ფულის დახარჯვას და იქაურ ეკონომიკაში ფულის შეტანას. დღეს რომ ევროკავშირის ეკონომიკის ზრდა 1%-ია და საქართველოში 10%, ეს იმიტომ არის, რომ ჩვენ ეკონომიკურად სწორად ვფიქრობთ. თუ ვიზები ჩაკეტეს, ტურისტი არ შეუშვეს, რომელიც ფულს ხარჯავს იმ ქვეყანაში, ესეც [ზრდა] არ ექნებათ. ქართველი ხალხი ამაზეც უნდა დავფიქრდეთ. არის მცდელობა ადამიანების ემოციებზე ითამაშონ, რომ მერე ვიზა გექნება ასაღები და ვეღარ ჩახვალ ბერლინსა, თუ ფრანკფურტშიო. ეს 21-ე საუკუნის პოლიტიკას ეკადრება?! ეს არის ასი წლის წინანდელი მეთოდები, როდესაც ცდილობდნენ სხვა ქვეყნებზე გავლენა მოეხდინათ“, – აღნიშნა პაპუაშვილმა.

რასაც სჩადის ზოგიერთი ელჩი და ბიუროკრატი, ეს არის ანტიევროპა, – ამის შესახებ საქართველოს პარლამენტის თავმჯდომარე შალვა პაპუაშვილმა „იმედის“ ეთერში განაცხადა.

„დიდი ხნის განმავლობაში დომინანტი მსოფლიო პოლიტიკაში და ევროპის პოლიტიკის განმსაზღვრელი იყო აშშ. ამერიკის შეერთებული შტატები სახავდა ყველა ვექტორს, რომელსაც ევროკავშირი, როგორც მთლიანი და მისი ბევრი წევრი მიჰყვებოდა, მათ შორის ომთან დაკავშირებითაც.

ამერიკაში ხელისუფლების ცვლილებასთან ერთად ეს ვექტორი შეიცვალა, მათ შორის მოხდა გარკვეული დისტანცირება და დაბნეულია ევროკავშირის ბიუროკრატია, მათ შორის დაბალი კვალიფიკაციის გამო. მილიონიანი სივრცეა ევროკავშირი, ბევრი ქვეყნით და სხვადასხვა პოლიტიკური ძალით. ჩვენ თავს ნუ დავიმდაბლებთ, ნუ გვგონია, რომ ყველა ჩვენზე ჭკვიანია ყველგან. ესტონეთის საგარეო საქმეთა მინისტრი არის ამის ნათელი მაგალითი“, – აღნიშნა შალვა პაპუაშვილმა.

საფრანგეთის ელჩს „ნაცები“ რომ დემოკრატია ჰგონია, ესაა პრობლემა. წამების სისტემის შემქმნელი პარტიის წარმომადგენლებისთვის ხელფასის გადახდას რომ ეძახის ადამიანი დემოკრატიის განვითარებას, ზედმეტია აქ საუბარი, – განაცხადა პარლამენტის თავმჯდომარემ შალვა პაპუაშვილმა გადაცემაში „იმედი LIVE“ საფრანგეთის საელჩოს მიერ გავრცელებულ ინფორმაციაზე, რომლის თანახმადაც, „საბჭოთა წარსულის კვლევის ლაბორატორია“ სამოქალაქო საზოგადოების პროექტების მხარდასაჭერად, საელჩოს მიერ გამოცხადებული კონკურსის გამარჯვებულია.

„საფრანგეთის ელჩს „ნაცები“ რომ დემოკრატია ჰგონია, ესაა პრობლემა. რომელი საგამოძიებო კომისია უშველის ამ ადამიანს. წამების სისტემის შემქმნელი პარტიის წარმომადგენლებისთვის ხელფასის გადახდას რომ ეძახის ადამიანი დემოკრატიის განვითარებას, ზედმეტია აქ საუბარი, ღირებულებითი სხვაობა ხომ ჩანს?! რაც შეეხება ამ კონკრეტულ შემთხვევას, ეს არის იმის თქმა, რომ როგორც ჩანს, არ მივაჩნივართ ხალხად, არაფერს მნიშვნელობა არ აქვს. ძალიან კარგად იციან, „ნაციონალური მოძრაობისთვის“, მათი იდეოლოგებისთვის ფულის მიცემა რა რეაქციებს გამოიწვევს“, – აღნიშნა პაპუაშვილმა.

პარლამენტის ვიცე-სპიკერი, პარტია „ხალხის ძალის“ თავმჯდომარე სოზარ სუბარი ანაკლიის პორტში ჩინური კომპანიის შემოსვლის საკითხს მედიასთან ეხმიანება.

დეპუტატის თქმით, არცერთ ამერიკულ კომპანიებს ინტერესი არ გამოუთქვამს ანაკლიის პორტთან მიმართებით, თუმცა თუ გამოთქვამენ, ხელისუფლების პასუხი დადებითი იქნება. თუმცა, სოზარ სუბარის თქმით, ეკონომიკური თვალსაზრისით, ქვეყნისთვის ანაკლიის პორტში ჩინური კომპანიის შემოსვლა უფრო მომგებიანი იქნება, რადგან ტვირთი, რომელმაც ანაკლიის პორტში უნდა გაიაროს ჩინურია.

„როდესაც ჩვენი ოპოზიცია ხმაურობს, მაგალითად – ჩინური კომპანია შემოვიდეს თუ არა ანაკლიაში, პასუხი არის მარტივი – ჯერ ერთი ამერიკელებს არანაირი ინტერესი არ გამოუვლენიათ ამ პორტის მიმართ, არცერთ ამერიკულ კომპანიას არ უთქვამს – ჩვენ ჩავდებთ ფულს ამ პორტის მშენებლობაშიო. თუ ჩადებენ იმ შემთხვევაში, ჩვენ, რა თქმა უნდა, თანხმობას ვეტყვი, რადგან პოლიტიკურად მნიშვნელოვანია მათი შემოსვლა, თუმცა ეკონომიკური თვალსაზრისით ჩინური კომპანიის შემოსვლა უფრო მომგებიანია, რადგან ამ პორტის გავლით ჩინეთის ტვირთების მოზიდვა ძალიან მნიშვნელოვანია. ანაკლიის პორტში 49%-იანი წილის ფლობა გაზრდის ჩინელი ინვესტორების ინტერესს, რომ თავისი ტვირთი აქ გაატარონ და არა სადმე სხვაგან.

რაც შეეხება ამერიკულ კომპანიებს, მათ ამდენი ხანი არ გამოავლინეს ინტერესი და არა მგონია, რომ ახლა გამოავლინონ. შესაბამისად, საკითხი ასე კი არ დგას, ამერიკელი ინვესტორი ჯობა თუ ჩინელი, არამედ საკითხი დგას შემდეგნაირად: როგორ ვიქცევით იმ შემთხვევაში, თუ ამერიკელები გვეტყვიან – ჩვენ არ შემოვდივართ, არ გვაინტერესებს ეს პორტი, მაგრამ ჩინელები არ შემოუშვათ, რადგან მათთან სავაჭრო ომი გვაქვსო. პირადად ჩემი პასუხი ასეთ შემოთავაზებაზე არის – არავითარ შემთხვევაში! ეს პორტი სჭირდება საქართველოს. რადგან სამაგიეროდ რას ვიღებთ? – არაფერს! შესაბამისად, ეს არის არა შემოთავაზება, არამედ ჩვენთვის საზიანო და მიუღებელი ულტიმატუმი, რაზეც, რა თქმა უნდა, უარი უნდა ვთქვათ.

სხვა საქმეა, თუ ანაკლიის პორტში ჩინური კომპანიის არშემოშვების სანაცვლოდ ჩვენ გვექნება რაიმე სხვა შემოთავაზება, რომელიც შეიძლება უფრო უკეთესი და მნიშვნელოვანი იყოს ქვეყნის ეკონომიკური განვითარებისთვის, შეიძლება ვისაუბროთ ამაზე. არ მინდა ამ ტერმინის გამოყენება, მაგრამ „ვივაჭროთ“ იქნებოდა უფრო სწორი ფორმულირება“, – განაცხადა სოზარ სუბარმა.

ესტონეთის საგარეო საქმეთა მინისტრი მარგუს ცაჰკნა „გრანტების შესახებ“ საქართველოს კანონში ცვლილებებს ეხმაურება. ამის შესახებ ცაჰკნა სოციალურ ქსელ „იქსში“ წერს.

„გუშინ საქართველოში ნაჩქარევად მიღებული ცვლილებები მოითხოვს, რომ დონორებმა სამოქალაქო საზოგადოების მხარდამჭერი პროექტების დასაფინანსებლად მთავრობის თანხმობა მიიღონ.

ეს საფრთხეს უქმნის სამოქალაქო საზოგადოების დამოუკიდებლად ფუნქციონირებას და საქართველოს ევროპას კიდევ უფრო მეტად აშორებს“, – წერს მარგუს ცაჰკნა.

საქართველოს, სომხეთსა და აზერბაიჯანს შორის მინისტრის მოადგილეების დონეზე დღეს შედგა პირველი შეხვედრა, ეს არის ძალიან მნიშვნელოვანი დიალოგი, რომელსაც მასპინძლობს თბილისი, – ამის შესახებ საქართველოს საგარეო საქმეთა მინისტრმა, მაკა ბოჭორიშვილმა განაცხადა.

მინისტრის თქმით, აღნიშნული სამმხრივი ფორმატი კარგი შესაძლებლობაა, რომ განხილული იყოს რეგიონისთვის მნიშვნელოვანი საკითხები.

„საქართველოს, სომხეთისა და აზერბაიჯანის საგარეო საქმეთა სამინისტროს წარმომადგენლების მონაწილეობით გაიმართა შეხვედრა, რაც კარგი შესაძლებლობაა, რომ განვიხილოთ საკითხები, რომლებიც შეეხება ჩვენს რეგიონს. საქართველოს აქვს მიზანი, რომ ჩვენს რეგიონში მაქსიმალურად შევუწყოთ ხელი მშვიდობას და სტაბილურობას. რა თქმა უნდა, მნიშვნელოვანია ორივე მეზობელთან, აზერბაიჯანთანაც და სომხეთთანაც ურთიერთობები ამ ფორმატში. ეს პირველად ხდება. ჩვენ შევძელით, რომ სამუშაო ფორმატში გვემსჯელა რეგიონისთვის მნიშვნელოვან საკითხებზე. იმედი მაქვს, რომ კვლავ გაგრძელდება მუშაობა სამივე ქვეყანას შორის აღნიშნულ ფორმატში და შევძლებთ მომავალში სამივე ქვეყნისთვის მნიშვნელოვანი საკითხების გარშემო მსჯელობას და მუშაობის გაგრძელებას“, – განაცხადა ბოჭორიშვილმა.

ქართველი კინორეჟისორი, გოგა ხაინდრავა, რომელიც ლიეტუვის მიერ დასანქცირებულთა შორისაა, ლიეტუვის ხელისუფლებას ღია წერილით მიმართავს.

კერძოდ, გოგა ხაინდრავა მიმართავს ლიეტუვის პრეზიდენტ გიტანას ნაუსედას, პრემიერ-მინისტრ ინგრიდა შიმინიტეს, საგარეო საქმეთა მინისტრ კიასტუსის ბუდრის და საქართველოში ლიეტუვის ელჩს, დარიუს ვიტკაუსკასს.

როგორც ხაინდრავა აღნიშნავს, მსგავს სამარცხვინო გადაწყვეტილებებს XX-ე საუკუნეში ბოლშევიკური და ნაცისტური რეჟიმები იღებდნენ.

„თანამედროვე ევროპული პორნოლიბერალიზმის ისტორიაში უპრეცედენტო გადაწყვეტილება. ლიეტუვის ამჟამინდელმა ხელისუფლებამ სანქციები დაუწესა ადამიანს იმ საბაბით, რომ ის არის მშობელი. თქვენ დაასანქცირეთ საქართველოს მოქალაქე გიორგი კობახიძე მხოლოდ იმის გამო, რომ ის არის საქართველოს პრემიერ-მინისტრ ირაკლი კობახიძის მამა. მსგავს სამარცხვინო გადაწყვეტილებებს XX-ე საუკუნეში ბოლშევიკური და ნაცისტური რეჟიმები იღებდნენ. თუმცა თუ გავითვალისწინებთ თანამედროვე ლიეტუვის იდეოლოგების, ევროკავშირის დეპუტატების, საბჭოთა კავშირის კომუნისტური პარტიის ცენტრალური კომიტეტის პირველი მდივნის, მიხეილ გორბაჩოვის თანამებრძოლების − ამხ. იუნკევიჩიანეს და ამხ. კუბილიუსის როლს ЗА ПЕРЕСТРОЙКУ-ს მოძრაობის პროცესში, საბჭოთა კავშირის შენარჩუნების მიზნით, უნდა ვივარაუდოთ, რომ სანქცირებულთა სიაში მოხვედრილი ადამიანების ხვედრი გასაკვირად ლმობიერია. შემდეგი ნაბიჯი, სავარაუდოდ, ჰააგის საერთაშორისო სასამართლოში სარჩელის შეტანა იქნება, რათა პორნოლიბერალური, ფაშისტური იდეოლოგიისთვის მიუღებელ საქართველოს მოქალაქე მამაკაცებს, აეკრძალოთ შვილების გაჩენის პროცესში მონაწილეობა. რაც შეეხება თქვენი მონა-მორჩილის სანქცირების ფაქტს, თქვენი მხრიდან ეს არის სახელმწიფო თაღლითობის კლასიკური ნიმუში. თქვენ ისე მიგაღებინეს ეს გადაწყვეტილება, რომ არც კი ჩაგახედეს იმ ადამიანის დოსიეში, ვისი დასანქცირებაც გიბრძანეს. რას წარმოადგენს დღეს თქვენი „ევროპული“ მორალი და „სამართალი“, ამას ადამიანის უფლებათა ევროპული სასამართლოს განაჩენში გაეცნობით, რომელიც აუცილებლად დადგება. ამას გპირდებით თქვენც და ევროპულ საზოგადოებასაც.

P.S.: ყურადღება! თუ თქვენ დააპირებთ ჩემი მშობელი მამის დასანქცირებასაც, ჩემი გაჩენისათვის, აუცილებლად შესაბამის ბრძანებაში მიუთითეთ: სანქცირებულია − ПОСМЕРТНО! ვინაიდან ჩემი მამა აწ გარდაცვლილია. P.P.S.: თუ აღმოაჩენთ, რომ პუტინის რუსეთთან ღვინით ვაჭრობის პროცესში, თქვენი მარაგები იწურება და მოსალოდნელია შეფერხება, მზად ვართ, ჩვენი ოჯახის „ხაინდრავას მარანი“-ს კოლექციიდან მოგაწოდოთ ქართული ღვინის საუკეთესო ნიმუშები. ლიეტუველი ხალხისადმი ტრადიციული პატივისცემით. პორნოლიბერალური სანქციების ქვეშ მყოფი ქართველი კინორეჟისორი გიორგი ხაინდრავა“, – ნათქვამია გოგა ხაინდრავას ღია წერილში.

ლიეტუვამ საქართველოს სანქცირებული მოქალაქეების სრული სია 15 აპრილს გამოაქვეყნა. აღნიშნული პირები ლიეტუვამ სხვადასხვა დროს დაასანქცირა.

სანქცირებულ პირებს შორის არიან: ბიძინა ივანიშვილი, ირაკლი კობახიძე, ვახტანგ გომელაური, ვაჟა სირაძე, კახა კალაძე, თეა წულუკიანი, მამუკა მდინარაძე, დიტო სამხარაძე, გრიგოლ ლილუაშვილი. სანქციები ასევე შეეხო შემდეგ პირებს: მილერი ლაგაზაურს, მირზა კეზევაძეს, შალვა ბედოიძეს, მიხეილ ჩინჩალაძეს, გოგა ხაინდრავას, შალვა თადუმაძეს, ირაკლი ქარსელაძეს, კახი ბექაურს, ოთარ რომანოვ-ფარცხალაძეს, ირაკლი რუხაძეს, ლევან მურუსიძეს, ვიქტორ ჯაფარიძეს, ლაშა ჯოხაძეს.

ადამიანი, რომელიც ყოველთვიურად ფინანსდება რუსეთიდან, არ შეიძლება აკეთებდეს ანტირუსულ საქმეს, – განაცხადა „დღის ქრონიკაში“ პარლამენტის თავმჯდომარის მოადგილე ნინო წილოსანმა.

უმრავლესობის წევრი გამოეხმაურა „ქრონიკის“ ინფორმაციას, რომლის მიხედვითაც ელენე ხოშტარიას ოჯახს რუსეთიდან აპრილში 250 ათას დოლარამდე ჩაერიცხა.

წილოსანის თქმით, მაშინ, როდესაც ხოშტარია ფაქტობრივად რუსულ ფულზე ზის, მას ჰყოფნის თავხედობა, რომ ვინმეს რუსი ან პრორუსი უწოდოს.

„ელენე ხოშტარიას რომ გაეზარდა დაფინანსება, რა თქმა უნდა, ალბათ არავის გვიკვირს, რადგან ის ზუსტადაც რომ ოკუპანტის საქმეს აკეთებს. ამ ქვეყანას უთხრის ძირს და ფაქტობრივად მუდმივი რევოლუციური პროცესების რეჟიმში ჰყავს. ელენე ხოშტარიას როდესაც ეკეტება სხვადასხვა დაფინანსების წყაროები, რომელიც ჩვენთვის აქამდე ცნობილი იყო, მას რჩება მუდმივი დაფინანსების წყარო რუსეთიდან და, რა თქმა უნდა, საკითხავიც აღარ არის ალბათ, რისთვის ჯილდოვდება ეს ადამიანი ყოველთვიურად და განსაკუთრებით გაზრდილი ჰონორარით. მისი აქტივობა ალბათ ყველასთვის ცნობილია და შესაძლოა ეს პირდაპირ პროპორციული იყოს იმასთან, რასაც ის აკეთებს აქ. ამიტომ, რა თქმა უნდა, ამ ადამიანის მორალურ მხარეზეც აღარ ვსაუბრობ, როდესაც ის იკვებება რუსეთიდან და ფაქტობრივად რუსულ ფულზე ზის. ამის შემდგომ ყოფნის თავხედობა, რომ ვინმეს უწოდებს რუსს ან პრორუსს. თავისთავად, აქ უკვე მისი აღარც როგორც პოლიტიკოსის, არამედ უბრალოდ როგორც ადამიანის მორალიც ცნობილია, მაგრამ ფაქტია, რომ ამას ყოველ ჯერზე სათანადო შეფასება უნდა მიეცეს. ადამიანი, რომელიც ყოველთვიურად ფინანსდება რუსეთიდან, არ შეიძლება აკეთებდეს ანტირუსულ საქმეს. თან ვიცით მათივე წარმოდგენით როგორი ქვეყანა არის რუსეთი და როდესაც რუსეთი მას გარკვეულწილად არ ასანქცირებს, თუ არ უწყვეტს ამ დაფინანსებას, რა თქმა უნდა, ისმის კითხვა, რისთვის უხდის ამ ფინანსურ მადლობას რუსეთი ელენე ხოშტარიას“, – აღნიშნა წილოსანმა.