რაც ვიცით დადასტურებულად, მე მგონი ავლაბარში რუსეთი არ არის და ავლაბარში კონკრეტულ მისამართზე მიდიოდა ეს ასაფეთქებელი ნივთიერება. ეს არის უკრაინის ხელისუფლების გაგება ძმობის და მეგობრობის, რომ თბილისში შემოიტანო 2,5 კგ ასაფეთქებელი ნივთიერება, რომელმაც შეიძლება მთელი უბანი ჰაერში აწიოს? – განაცხადა შალვა პაპუაშვილმა „ჰექსოგენის“ საქმეზე საუბრისას. ის ეჭვის ქვეშ აყენებს დაკავებულის მიერ გაჟღერებულ ვერსიას იმის შესახებ, რომ ასაფეთქებელი ნივთიერება საბოლოოდ რუსეთში უნდა გადაეტანა და ამბობს, რომ ამ ფაქტის დადასტურების შემთხვევაში უკრაინული სპეცსამსახურები საკუთარი სამხედრო მიზნის მისაღწევად ქართველ ხალხს სწირავდნენ.

„2,4 კილოგრამი ჰექსოგენი რას ნიშნავს, დაგუგლეთ და გაიგებთ. ეს არის ასაფეთქებელი ნივთიერება. თვითმფრინავში არ აგატანინებენ „დეზადორს“ ან სანთებელას, იმიტომ რომ საშიშია, შეიძლება მთელი თვითმფრინავი ააფეთქო. აი 2,5 კილო ჰექსოგენი ავლაბრის კონკრეტულ მისამართზე რომ იქნებოდა, იქ შემთხვევით ხო შეიძლება რაღაც მომხდარიყო? ხომ შეიძლება, რომ შემთხვევით, ზემოქმედების შედეგად აფეთქდეს, ან ტრაილერი გადაბრუნებულიყო და აფეთქებულიყო, ან იმ სახლში აფეთქებულიყო – მთელ ავლაბარს ხომ აიტანდა ცაში? აი ამას გვიკეთებდნენ უკრაინის სპეცსამსახურები. უკრაინის სპეცსამსახური, სადაც ქართველი გია ლორთქიფანიძე მუშაობს, ამას გეგმავდა და ეგუებოდა იმ აზრს, რომ შეიძლება აფეთქდეს, მაგრამ ჯანდაბას, აიწიოს ავლაბარი და თბილისი ჰაერში, ოღონდ თავიანთ მიზნებს მიაღწიონ რუსეთში. აი რომ დავიჯეროთ ის ვერსია, ოღონდ რუსეთს ზიანი მიაყენონ და ჯანდაბამდე გზა ჰქონიათ ქართველ ქალებს და ბავშვებს, აქ რომ აფეთქებულიყო?

ჩვენ რას გადაგვეკიდნენ? ომი აქვთ – იომონ. შეეშვან საქართველოს ჩათრევას თავის ომში. ეს არ არის საქართველოს ომი. როდესაც ჩვენ, მათ შორის რუსეთთან ომი გვქონია, არავინ ჩაგვითრევია ჩვენს ომში და არავის ქვეყანა არ დაგვიყენებია რისკის ქვეშ და აქ რომ არის ხალხი, რომელიც დღეს საღამოთაც გამოვა რუსთაველის გამზირზე და პარლამენტთან დადგებიან და უკრაინის ხელისუფლების განდიდებით იქნება დაკავებული“, – განაცხადა პაპუაშვილმა.

მისივე თქმით, საქართველოს მთავრობა არაფერს ამბობს, რადგან უკრაინა ომშია, მაგრამ მოვა დრო, ომი დასრულდება და საქართველო პასუხს მოითხოვს უკრაინის ხელისუფლებისგან. მან ასევე აღნიშნა, რომ ამ ტვირთმა ლამის ნახევარი ევროკავშირი გამოიარა ისე, რომ არავის გაუჩერებია.

ცენტრალური საარჩევნო კომისიის (ცესკო) თავმჯდომარე საერთაშორისო ორგანიზაციებისა და საქართველოში აკრედიტებული დიპლომატიური მისიების წარმომადგენლებს შეხვდა. შეხვედრა გიორგი კალანდარიშვილმა გახსნა და დეტალურად ისაუბრა მიმდინარე საარჩევნო საკითხებისა და 4 ოქტომბრის არჩევნებისთვის მზადების პროცესზე. როგორც მან აღნიშნა, საარჩევნო ადმინისტრაცია აქტიურად ემზადება 2025 წლის 4 ოქტომბრის არჩევნების საერთაშორისო სტანდარტების შესაბამისად ჩასატარებლად, რომლის ფარგლებშიც არაერთ მნიშვნელოვან და მასშტაბურ სამუშაოებს ატარებს. მისი თქმით, საარჩევნო პროცესების გამჭვირვალობა და ანგარიშვალდებულება ცესკოს საქმიანობის პრინციპულ საფუძველს წარმოადგენს.

„მორიგი სამუშაო შეხვედრა გაიმართა დიპლომატიური მისიებისა და საერთაშორისო ორგანიზაციების წარმომადგენლებთან, რომლის ფარგლებშიც მათ მივაწოდეთ დეტალური და ამომწურავი ინფორმაცია 4 ოქტომბრის არჩევნების სამზადისზე, ასევე განხორციელებული და მიმდინარე მასშტაბური სამუშაოების შესახებ, რომელიც მიზნად ისახავს აღნიშნული არჩევნების მაღალპროფესიულ დონეზე ადმინისტრირებას. ჩვენ გვქონდა ინფორმაციის მიმოცვლის საშუალება დიალოგისა და კითხვა-პასუხის რეჟიმში, რომლის ფარგლებშიც მათ ამომწურავი და სრულყოფილი ინფორმაცია მივაწოდეთ მიმდინარე სარჩევნო საკითხებთან დაკავშირებით. ჩვენი მაღალი ანგარიშვალდებულებიდან, გამჭვირვალე და ღია საქმიანობიდან გამომდინარე, რა თქმა უნდა, მომავალშიც გაგრძელდება ასეთი ტიპის სამუშაო შეხვედრები, როგორც საერთაშორისო ორგანიზაციებთან, ასევე სხვა ჩართულ მხარეებთან“,-აღნიშნა გიორგი კალანდარიშვილმა.

4 ოქტომბრის არჩევნებზე რეგისტრირებული საარჩევნო სუბიექტები, რეგისტრაციის პროცესი, სადამკვირვებლო და მედია ორგანიზაციები, საარჩევნო კომისიების  დაკომპლექტება და მათი გადამზადება, ამომრჩეველთა ინფორმირება და ამომრჩევლებისთვის და პარტიებისთვის შეთავაზებული სიახლეები – ეს ის მცირე ჩამონათვალია, რომელზეც ცესკოს თავმჯდომარემ ასევე დეტალურად ისაუბრა. 

შეხვედრის ფარგლებში გაიმართა აქტიური დისკუსიაც. დიპლომატიური კორპუსისა და საერთაშორისო ორგანიზაციების წარმომადგენლებმა მათთვის საინტერესო კითხვებზე პასუხები გიორგი კალანდარიშვილისგან და ცესკოს თავმჯდომარის მოადგილე გიორგი შარაბიძისგან მიიღეს.

საერთაშორისო ორგანიზაციებისა და საქართველოში აკრედიტებული დიპლომატიური მისიების წარმომადგენლებთან შეხვედრა დღეს ცესკოში გაიმართა. აღნიშნული შეხვედრა ცხადყოფს, რომ საარჩევნო ადმინისტრაციისთვის პრიორიტეტია არა მხოლოდ შიდა პროცესების ეფექტიანად წარმართვა, არამედ ღია, საერთაშორისო ორგანიზაციებთან კოორდინირებული თანამშრომლობა. ეს ასევე  ადასტურებს ადმინისტრაციის მზადყოფნას, საარჩევნო პროცესები წარმართოს მაქსიმალურად გამჭვირვალე, ღია და ინკლუზიური ფორმატით. აღსანიშნავია, რომ მსგავსი ტიპის შეხვედრები არა მხოლოდ ინფორმაციის მიწოდების საშუალებაა, არამედ უზრუნველყოფს დიალოგს, უკუკავშირის მიღებასა და თანამშრომლობის გაღრმავებას.

შეხვედრას ცესკოს თავმჯდომარის გარდა ასევე ესწრებოდნენ ცესკოს თავმჯდომარის მოადგილე გიორგი შარაბიძე,  ცესკოს აპარატის/იურიდიული დეპარტამენტის უფროსი გიორგი სანტურიანი და სპიკერი ნათია იოსელიანი.

ინტელექტუალური საკუთრების მსოფლიო ორგანიზაციამ გლობალური ინოვაციების 2025 წლის ანგარიშის ფარგლებში მთავრობის ეფექტიანობის ინდექსი გამოაქვეყნა.

„მთავრობის ეფექტიანობის“ შეფასების 100%-იანი სისტემით საქართველომ 62,5% დაიმსახურა, მსოფლიოში 35 ადგილზე გავიდა და ევროპის საუკეთესო ოცეულში მოხვდა. საქართველო უსწრებს დიდი შვიდეულის ერთ ქვეყანას, ევროკავშირის და ნატოს წევრ 16 სახელმწიფოს და ევროკავშირის კანდიდატ ყველა ქვეყანას. მთავრობის ეფეტიანობის რეიტინგში საქართველოს ჩამორჩება: ესპანეთი, კვიპროსი, ხორვატია, ლატვია, იტალია, პოლონეთი, მალტა, უნგრეთი, ალბანეთი, მონტენეგრო, სლოვაკეთი, საბერძნეთი, ბულგარეთი, ჩრდილოეთ მაკედონია, რუმინეთი, თურქეთი და ა.შ.

მთავრობის ეფექტიანობის ინდექსი მსოფლიო ბანკის გლობალური მმართველობის ინდიკატორებს ეფუძნება და ოფიციალური განმატების მიხედვით ასახავს „საჯარო სერვისების ხარისხს, საჯარო სამსახურის ხარისხსა და პოლიტიკური ზეწოლისგან მისი დამოუკიდებლობის ხარისხს, პოლიტიკის ფორმულირებისა და განხორციელების ხარისხს და მთავრობის ერთგულების სანდოობას ასეთი პოლიტიკის მიმართ.“

დღეს ვიზალიბერალიზაციის გაუქმების არანაირი სამართლებრივი საფუძველი არ არსებობს, – განაცხადა მაკა ბოჭორიშვილმა პირველი არხის ეთერში. საგარეო საქმეთა მინისტრის თქმით, საქართველოს ხელისუფლება ყოველთვის კეთილსინდისიერად აკეთებდა და აკეთებს ყველაფერს, რომ ეს სიკეთე საქართველოს მოქალაქეებს ჰქონოდათ. მან ასევე აღნიშნა, რომ ვიზალიბერალიზაცია „ქართული ოცნების“ ხელისუფლების დამსახურებაა.

„ვიზალიბერალიზაციის გაუქმებისთვის არანაირი საფუძველი არ არსებობს. რა თქმა უნდა, ჩვენ ვხედავთ, რომ ფანტაზიებს არ აქვს საზღვარი. ძალიან ბევრი საკითხის მიბმა და დაკავშირება ხდება ამ საკითხთან. ჩვენ ვნახეთ ერთგვარი მცდელობები, რომ თავად ევროკავშირის პროცედურებში შესულიყო გარკვეული გამარტივებული წესები იმისთვის, რომ უფრო მარტივად მომხდარიყო უვიზო რეჟიმის შეჩერება. ერთგვარად, სხვა აქტუალური თემა არ დგას დღეს ევროკავშირში და შეგვიძლია, დავუკავშიროთ საქართველოს საკითხს, თუმცა, რა თქმა უნდა, ამას სჭირდება გარკვეული პროცედურები, მხარდაჭერა და ეს მხარდაჭერა უნდა არსებობდეს ევროკავშირის წევრ სახელმწიფოებს შორის; უნდა არსებობდეს, რა თქმა უნდა, საფუძვლები იმისთვის, რომ მსგავსი გადაწყვეტილება მიიღოს ევროკავშირმა“, – განაცხადა ბოჭორიშვილმა.

მისი თქმით, საზოგადოებამ იცის, რომ საქართველოს მოეთხოვა გარკვეული ანგარიშზე დამატებითი ინფორმაციის წარდგენა, რაც საგარეო საქმეთა სამინისტრომ, საქართველოს ხელისუფლების სხვადასხვა ორგანოს მიერ განხორციელებული ქმედებების საფუძველზე, მიაწოდა ევროკავშირის მხარეს.

„რა თქმა უნდა, ჩვენ ყველაზე ხშირად გვესმის ფრაზა, თითქოს საქართველოს ხელისუფლება არაფერს აკეთებ, რომ დაიცვას უვიზო მიმოსვლა და ამას ვინც ამბობს, ალბათ იქვე უნდა ვკითხოთ, თუ რა არის ის, რასაც საქართველოს ხელისუფლება არ აკეთებს იმისთვის, რომ დაიცვას უვიზო მიმოსვლა. რა თქმა უნდა, ჩვენ მივალთ ორ კანონამდე, რომელსაც იყენებენ დღეს იმისთვის, რომ დააზიანონ საქართველოს ინტერესები, რომელიც არაფერ შუაში არ არის უვიზო მიმოსვლასთან, რომელსაც არაფერი საერთო არ აქვს ჩვენი მოქალაქეების თავისუფალ გადაადგილებასთან ევროკავშირის წევრ ქვეყნებში. მეც ვარ ის პოლიტიკოსი, რომელმაც სრულიად გაცნობიერებულად მხარი დავუჭირე კანონს გამჭვირვალობის შესახებ“ და მხარი დავუჭირე კანონს „ოჯახური ღირებულებების შესახებ“ მარტივი მიზეზით, ეს სჭირდება ჩვენი ქვეყნის უსაფრთხოებას, ეს სჭირდება სტაბილურობას და ამას აქვს ძალიან სერიოზული საფუძვლები, თუ რატომაც მიიღო საქართველოს ლეგიტიმურმა ხელისუფლებამ, ხალხის მიერ არჩეულმა პარლამენტმა ეს ორი კანონი. ეს არის სრულიად ლეგიტიმური გადაწყვეტილებები ხალხის მიერ არჩეული ხელისუფლების, ხალხის მიერ არჩეული პარლამენტის, რომლის უკანაც დგას ამომრჩეველი და ჩვენ, „ქართული ოცნების“ ხელისუფლება ჩვენს ამომრჩეველს, იმ ადამიანებს, ვინც დგანან ჩვენ უკან, რა თქმა უნდა, ვერ ვუღალატებთ ვერანაირი შანტაჟის ფასად“, – განაცხადა ბოჭორიშვილმა.

შეკითხვაზე, ამ პირობებში რატომ არის გაიგივებული ეს ორი კანონი ნაკისრი ვალდებულებების შესრულებასთან, მაკა ბოჭორიშვილმა განაცხადა, რომ საზოგადოებას ახსოვს, რა პროცესები წარიმართა ამ კანონებთან, განსაკუთრებით, „გამჭვირვალობის კანონთან“ დაკავშირებით.

„ეს იყო სრულიად მიუღებელი, რადგან სწორედ გამჭვირვალობა შეუშლიდა ხელს იმ ორგანიზაციების მოქმედებას თუ საქმიანობას, იმ თვალსაზრისით, რომ გამჭვირვალე გახდებოდა ჩვენი საზოგადოებისთვის, თუ საიდან ფინანსდებიან პოლიტიკოსები, ჩვენ რომ ვეძახით, და საიდან ფინანსდება პოლიტიკაში ჩვენი ოპოზიცია, თუ როგორ ხდება ე.წ. არასამთავრობო სექტორის, სამოქალაქო საზოგადოების მონაწილეობა ქართულ პოლიტიკაში. ჩვენ ვერ მოვატყუებთ ჩვენს საზოგადოებას. რა თქმა უნდა, ჩვენს საზოგადოებას ეს უნდა სცოდნოდა, უნდა იცოდეს და ეს გააკეთა სწორედ იმ კანონმა, რომელიც შეეხებოდა გამჭვირვალობას არასამთავრობო ორგანიზაციების. ეს სჭირდებოდა ჩვენი ქვეყნის სტაბილურობას და ჩვენი ქვეყნის უსაფრთხოებას. სწორედ ამიტომ იქნა მიღებული ეს გადაწყვეტილებები“, – განაცხადა ბოჭორიშვილმა.

საგარეო საქმეთა მინისტრმა ასევე აღნიშნა, რომ ნებისმიერი ევროპული სახელმწიფო გააკეთებდა იმავეს, თუკი ეს დასჭირდებოდა მათი უსაფრთხოების და სტაბილურობის დაცვას.

„ნებისმიერი სახელმწიფო იქნება ღია, განიხილოს უცხო ქვეყნის დაფინანსება და ჩარევა საკუთარ საშინაო საქმეებზე, როგორც საფრთხე. ასე რომ, საქართველო არ უნდა იყოს ის გამონაკლისი, რომ ჩვენ ამაში ვხედავდეთ გარკვეულ საფრთხეებს, როდესაც ვსაუბრობთ უცხოურ ჩარევებზე და უცხოურ დაფინანსებებზე“, – განაცხადა ბოჭორიშვილმა.

გასაკვირი არ უნდა იყოს, რომ ბოკერია და ბარამიძე ბრიტანეთის საელჩოში იმყოფებოდნენ და ალბათ დირექტივებს იღებდნენ თავიანთი პატრონებისგან, – ასე გამოეხმაურა თბილისის მერი კახა კალაძე ოპოზიციის წარმომადგენლების, გია ბარამიძისა და გიგა ბოკერიას მიერ გამართულ შეხვედრას ბრიტანეთის საელჩოში.

როგორც მან აღნიშნა, ადგილობრივი დიპკორპუსი ქვეყანაში საზოგადოების გახლეჩასა და დაპირისპირებას ახალისებს.

„როდესაც ვსაუბრობთ ადგილობრივი დიპლომატების ჩართულობასა და კავშირზე ამ ძალადობრივი ჯგუფებთან, რა თქმა უნდა, ბრიტანეთის საელჩო ერთ-ერთი მოწინავეა ამ ყველაფერში, რომლებიც ახალისებენ ქვეყანაში საზოგადოების გახლეჩას, დაპირისპირებას, რევოლუციის მოწყობის მცდელობას. გასაკვირიც არ უნდა იყოს, რომ ბოკერია და ბარამიძე ბრიტანეთის საელჩოში იმყოფებოდნენ და ალბათ დირექტივებს იღებდნენ თავიანთი პატრონებისგან“, – აღნიშნა თბილისის მერმა.

კახა კალაძე ასევე გამოეხმაურა დიდი ბრიტანეთის პარლამენტის წევრის, ჯეიმს მაკლერის მიერ გაკეთებულ იმ განცხადებას, რომელიც პარტია „ქართული ოცნების“ საპატიო თავმჯდომარის, ბიძინა ივანიშვილის შესაძლო დასანქცირებასა და საპროტესტო აქციებზე დაკავებულთა გათავისუფლებას ეხება.

„რამდენჯერ უნდა დაასანქციროთ ბიძინა ივანიშვილი? ის განცხადებები და მაგალითები, რომელზეც საუბრობთ, აბსოლუტურად ყველაფერი ტყუილზე, სიცრუეზე და ცილისწამებაზეა დაფუძნებული. ეს არის დღევანდელი სამწუხარო რეალობა. რომელია პოლიტპატიმარი? „მოლოტოვის კოქტეილს“ რომ ესროდა პოლიციელს თუ ჯოხს რომ ურყამდა და ქვებს ესროდა? რეალურად ვუყურებ და ვხედავ ყველაფერს, რაც ხდება. პოლიციელთან, რომელიც დგას და იცავს საზოგადოებრივ წესრიგს, მიდის ახალგაზრდა და ესვრის „მოლოტოვის კოქტეილს“, აქვს მცდელობა, ცოცხლად დაწვას ადამიანები, გამოდიხართ და გმირად გინდათ შერაცხოთ და მე ვუყურებ ცალმხრივად მოვლენებს? ერთნი არიან ესენი, რა ვერ გაიგეთ? აქაურ აკაცუკებს ჰყავთ თავიანთი პატრონები. ჩვენი პარტნიორი არის ქართველი ხალხი და ნურავის ჰგონია, რომ ეს ქვეყანა უნდა იმართებოდეს გარედან. ამას ვერ ეღირსებით ვერასდროს. ამ ქვეყანას მართავს ქართველი ხალხი. რაც შეეხება განცხადებებს, როგორც ევროპარლამენტარების, სხვადასხვა თანამდებობის პირების, იგივე ბრიტანეთის წარმომადგენლების მხრიდან, რომლის მაგალითიც მოიყვანეთ, არის სიცრუეზე, ტყუილსა და ცილისწამებაზე დაფუძნებული“, – განაცხადა კახა კალაძემ.

დღეს სამყარო თანხმდება, რომ ძალადობრივი პროტესტი დემოკრატიის მტერია.
ამის ფონზე სკანდირება – „ევროკავშირი მხარს უჭერს ელენეს“, ძალადობის მხარის არჩევაა, – წერს პარლამენტის თავმჯდომარე შალვა პაპუაშვილი სოციალურ ქსელში.

პაპუაშვილი ამით დონალდ ტრამპის განცხადებას ეხმაურება, რომელმაც განაცხადა, რომ როდესაც აქტივისტები სამოქალაქო ინფრასტრუქტურას აზიანებენ და პოლიციას ქვებს ესვრიან, ეს არა საპროტესტო აქცია, არამედ სისხლის სამართლის დანაშაულია.

„დღეს, სამყარო თანხმდება, რომ ძალადობრივი პროტესტი დემოკრატიის მტერია.
ამის ფონზე, „ევროკავშირი მხარს უჭერს ელენეს“ სკანდირება, ძალადობის მხარის არჩევაა.
ბრიუსელი უნდა დაუბრუნდეს საბაზისო ევროპულ ღირებულებებს – კანონის უზენაესობას და ადამიანის უფლებების პატივისცემას“, – წერს პაპუაშვილი.

ელენე ხოშტარია შსს-მ კახა კალაძის საარჩევნო ბანერის დაზიანების ფაქტზე 15 სექტემბერს დააკავა.