ჩვენ მეტი პროტესტი გვინდა, მეტი ერთიანობა გვინდა, მეტი კონსოლიდაცია გვინდა და ახლა უკვე გვჭირდება კონკრეტული ფორმალური მექანიზმების შექმნაც, რომელიც საერთაშორისო საზოგადოებასთან სხვა ტიპის ურთიერთობას დაიწყებს, – ამის შესახებ კოალიცია „ერთიანობა-ნაციონალური მოძრაობის“ ერთ-ერთმა ლიდერმა, გიორგი ვაშაძემ ორბელიანების სასახლეში მისვლის დროს განაცხადა, სადაც საქართველოს პრეზიდენტის და ოპოზიციური პარტიების, ასევე არასამათავრობო ორგანიზიების წარმომადგენლების შეხვედრა მიმდინარეობს.

მისი თქმით, პოლიტიკურ-საზოგადოებრივმა ჯგუფებმა უნდა ჩამოაყალიბონ კონკრეტული ფორმალური მექანიზმები, რომელიც საზოგადოების მხრიდან ლეგიტიმაციის მატარებელი იქნება.

„ქართული ოცნების“ ხელწერა არის ტყუილი. ტყუილი არა მარტო საქართველოში, არამედ მთელი მსოფლიოს მასშტაბით, ყველგან იტყუებიან, მსოფლიო მასშტაბით მატყუარას იმიჯი და სტატუსი აქვს, მაგალითად, თვითმარქვია ირაკლი კობახიძეს. ჩვენთვის ახლა ყველაზე მნიშვნელოვანია, თუ რას ვაკეთებთ ჩვენ. ჩვენ მეტი პროტესტი გვინდა, მეტი ერთიანობა გვინდა, მეტი კონსოლიდაცია გვინდა და ახლა უკვე გვჭირდება კონკრეტული ფორმალური მექანიზმების შექმნაც, რომელიც საერთაშორისო საზოგადოებასთან სხვა ტიპის ურთიერთობას დაიწყებს. პოლიტიკურ-საზოგადოებრივმა ჯგუფებმა უნდა ჩამოაყალიბონ კონკრეტული ფორმალური მექანიზმები, რომელიც იქნება ლეგიტიმაციის მატარებელი საზოგადოების მხრიდან, ეს არის წნეხის კიდევ ერთი მექანიზმი, რომ იცოდნენ, მათ ხელისუფლებას არათუ არავინ აღიარებს, არამედ იქნება ის ძალაუფლების წყარო, ხალხის ლეგიტიმაციის აღჭურვილი ადამიანები, მათ შორის სალომე ზურაბიშვილის თაოსნობით, რომელიც გააგრძელებს საერთაშორისო საზოგადოებასთან და ქვეყნის შიგნით ხალხთან ერთად ურთიერთობას“, – განაცხადა გიორგი ვაშაძემ.

ეუთო/ოდირის საბოლოო ანგარიში მნიშვნელოვან ყურადღებას ამახვილებს ამომრჩეველთა მონაცემების არასწორად გამოყენების შესახებ ჩვენი პარტიის მიერ გამოთქმულ ეჭვებზე, როდესაც მოვითხოვეთ ბაზების გასაჯაროება, რაზეც ეჭვის საფუძვლიანობის მიუხედავად ცესკო-მ დაუსაბუთებელი უარი განაცხადა, – ამის შესახებ პარტია „საქართველოსთვის“ განცხადებაშია აღნიშნული.

განცხადაში ნათქვამია, რომ 26 ოქტომბრის საპარლამენტო არჩევნებთან დაკავშირებული ეუთო/ოდირის საბოლოო ანგარიშის თანახმად, ამომრჩეველთა დაშინების, მედია მიკერძოების, არათანაბარი პირობების და ხმის მიცემის ფარულობის დარღვევის ერთობლიობა ცხადყოფს, რომ არჩევნებმა ვერ დააკმაყოფილა ძირითადი დემოკრატიული სტანდარტები და ეუთო-ს წინაშე აღებული ვალდებულებები, რაც თავისუფალი და სამართლიანი არჩევნების ჩატარებისთვის არის აუცილებელი.

„ანგარიშში ასევე ხაზგასმულია ისეთი საკითხები, როგორიცაა: საქართველოს საარჩევნო კანონმდებლობაში ბოლო პერიოდში განხორციელებული ცვლილებები, რომლებიც ვერ აკმაყოფილებს საერთაშორისო სტანდარტებს და ძირს უთხრის დემოკრატიული არჩევნების პრინციპს; საარჩევნო დარღვევებზე დავის გადაწყვეტის ეფექტური სამართლებრივი მექანიზმების არარსებობა.

ანგარიში ასევე მნიშვნელოვან ყურადღებას ამახვილებს ამომრჩეველთა მონაცემების არასწორად გამოყენების შესახებ ჩვენი პარტიის მიერ გამოთქმულ ეჭვებზე, როდესაც მოვითხოვეთ ბაზების გასაჯაროება, რაზეც ეჭვის საფუძვლიანობის მიუხედავად ცესკო-მ დაუსაბუთებელი უარი განაცხადა.

ანგარიში პირდაპირ აკავშირებს არჩევნებთან, ქვეყანაში მიმდინარე მასიურ საპროტესტო აქციებს და ხაზს უსვამს აქციების ძალადობრივად დაშლისა და მომიტინგეთა დაპატიმრების ფაქტებს. ასევე, ანგარიში საუბრობს აქციების მონაწილეთა და ჟურნალისტების მიმართსასტიკ მოპყრობაზე.

ანგარიშში გამოთქმული უკიდურესად კრიტიკული შეფასებების ერთობლიობა ქმნის არჩევნების გაყალბების სისტემურ და კომპლექსურ სურათს და ცალსახად უნდა ითქვას, რომ არჩევნების შედეგები არ ასახავს საქართველოს მოსახლეობის ნებას.

ქვეყანაში შექმნილი მძიმე სისტემური კრიზისიდან ერთადერთი გამოსავალია ჩატარდეს ახალი არჩევნები, გაუმჯობესებულ წინასაარჩვენო გარემოში, პარიტეტულად დაკომპლექტებული საარჩევნო ადმინისტრაციისა და პოლიტიკურად ნეიტრალური სახელმწიფო სტრუქტურების პირობებში“, – აღნიშნულია განცხადებაში.

ეუთო/ოდირის დასკვნა ცხადყოფს, რომ არჩევნების ჩატარების ხარისხი იყო მაღალი, – ამის შესახებ ცენტრალური საარჩევნო კომისიის თავმჯდომარემ, გიორგი კალანდარიშვილმა განაცხადა.

მისივე თქმით, გასათვალისწინებელია ანგარიშში მოცემული როგორც დადებითი მხარე, ასევე შენიშვნები და რეკომენდაციები, რაც საჭიროებს ანალიზს საარჩევნო პროცესის შემდგომ განვითარებისთვის.

„სადამკვირვებლო ორგანიზაციების, განსაკუთრებით ეუთო/ოდირის როლი მნიშვნელოვანია არჩევნების მთლიანობის უზრუნველსაყოფად. შესაბამისად, გამოქვეყნებული დასკვნა ფაქტობრივად ცხადყოფს, რომ არჩევნების ჩატარების ხარისხი იყო მაღალი. ის კარგად იყო ადმინისტრირებული, განსაკუთრებით პროცედურულ, ტექნიკურ ნაწილში, რაც, თავის მხრივ, მიუთითებს არა მხოლოდ ტექნიკურ გამართულობას, არამედ პროცედურულ გამართულობასაც. რა თქმა უნდა, ანგარიშს როდესაც ვკითხულობთ გასათვალისწინებელია, როგორც დადებითი მხარე, ასევე შენიშვნები და რეკომენდაციები, რაც მოცემულია ანგარიშში. ეს თავის მხრივ, საჭიროებს ანალიზს, შესწავლას. მისი გათვალისწინება უზრუნველყოფს საარჩევნო პროცესის შემდგომ განვითარებასა და გაძლიერებას. არამხოლოდ საქართველოში, არამედ ჩვენ თუ ვნახავთ სხვადასხვა ქვეყნების შეფასებებს ევროპული და მსოფლიო მასშტაბით კარგად ამოვიკითხავთ, რომ ეს არის ამ კომპლექსურობის ნაწილი, როცა საუბარია როგორც პროგრესზე, მიღწევებზე ასევე სხვადასხვა მიმართულებით წუხილზე, შენიშვნებზე და ამის შედეგად მოცემულ რეკომენდაციებზე.

ჩვენ ანგარიშს ვკითხულობთ ობიექტურად, კომპლექსურად და ვიღებთ როგორც დადებით შეფასებებს, ისევე, როგორც ანალიზს ვუკეთებთ იმ მიგნებებს, რაც მოცემულია დოკუმენტში. ეს დაგვეხმარება, რომ მათ შორის ეუთო/ოდირთან შემდგომი თანამშრომლობის გზით დავადგინოთ ის მექანიზმები, რომელიც ამ რეკომენდაციების შესრულებაში ინსტიტუციას კომპეტენციის ფარგლებში დაეხმარება, რათა ერთობლივი ძალისხმევით უზრუნველვყოთ შემდგომი განვითარება საარჩევნო პროცესის, მათ შორის საარჩევნო პროცედურებისა და სხვადასხვა საკითხების, რომელიც აღნიშნულია დოკუმენტში“, – განაცხადა კალანდარიშვილმა.

მისივე თქმით, როგორც მოსალოდნელი იყო ეუთო/ოდირის ანგარიშმა გამოიწვია გარკვეული ინტერპრეტაციები, რადგან მისი წაკითხვა ხდება არა კომპლექსურად, არამედ მხოლოდ იმ ფრაგმენტებში, რომელიც კონკრეტული ჩართული მხარისთვის ხელშესახები და საყურადღებოა.

„თუმცა, ვფიქრობ, დოკუმენტი იმთავითვე იძლევა მკაფიო განმარტებებს კონკრეტულ საკითხებთან დაკავშირებით, რაც ფაქტობრივად სპობს სივრცეს შემდგომი მანიპულაციისთვის. ვფიქრობ, ობიექტური შეფასების ნაწილში იმთავითვე გასაგებია დოკუმენტის მთავარი სულისკვეთება, რომელიც მათ შორის ჩვენს ინსტიტუციასთან მიმართებაში კარგი ადმინისტრირების ხარისხით, ფაქტობრივად ასრულებს მთელ რიგ სპეკულაციებს.

ეუთო ფაქტობრივად არანაირად არ საუბრობს საზღვარგარეთ არჩევნებში მონაწილეობის საკითხზე. ჩვენ კარგად გვახსოვს, მთელი საარჩევნო წლის განმავლობაში სხვადასხვა ჩართული მხარის მხრიდან იყო მანიპულაციურად წარმოჩენილი ის პროცესი, რომელიც ითვალისწინებს საარჩევნო უბნების შექმნას უცხოეთში. ფაქტობრივად, ამ ნაწილში არც კანონმდებლობით გათვალისწინებული რეგულაციები, არც ცესკო-ს მოქმედებები არ არის შეფასებული, რაც ხაზს უსვამს, რომ ცესკო მოქმედებდა საერთაშორისო პრაქტიკისა და მოქმედი კანონმდებლობის შესაბამისად. ამ ნაწილში არ არსებობს რაიმე წუხილი, რაც იმთავითვე ხაზს უსვამს, რომ ყველა ბრალდება იყო აბსოლუტურად უსაფუძვლო, რაზეც ჩვენ არაერთხელ გვისაუბრია“, – აღნიშნა კალანდარიშვილმა.

გვაქვს გარკვეული კითხვები, მოსაზრებები სხვადასხვა საკითხებთან დაკავშირებით, ეს არ ნიშნავს, რომ სრულად და ერთმნიშვნელოვნად ვიზიარებთ ეუთო/ოდირ-ის დოკუმენტში მოცემულ ინფორმაციას, მაგრამ მისი კომპლექსურად წაკითხვის შემთხვევაში, ეს იძლევა სწორი დასკვნების გაკეთების შესაძლებლობას, – ამის შესახებ ცენტრალური საარჩევნო კომისიის თავმჯდომარემ, გიორგი კალანდარიშვილმა განაცხადა.

მისივე თქმით, დასკვნის შესახებ კითხვებს ეუთო/ოდირს გაუზიარებენ.

„აღსანიშნავია, რომ ეუთო-ოდირის დასკვნაში ამომრჩეველთა სიებთან მიმართებით საუბარია, რომ სიების შემუშავების პროცესი იყო სრულად ინკლუზიური. ჩართულ მხარეებს ჰქონდათ სიების გამოთხოვის შესაძლებლობა. არცერთ მხარეს გამოთხოვილ სიებთან მიმართებაში არ წარმოუდგენია ადმინისტრაციაში რაიმე წუხილი, შენიშვნა შემდგომი სიების განვითარებასთან მიმართებით.

ასევე აღნიშნულია ტექნოლოგიური საშუალებების გამართულად მუშაობისა და საერთაშორისო სტანდარტებთან თავსებადობის მაღალი პროცენტი. ეუთო/ოდირი პირდაპირ წერს, რომ მიუხედავად საკანონმდებლო ვალდებულების არარსებობისა, საარჩევნო ადმინისტრაციამ ჩაატარა ტექნოლოგიების შესაბამისობის აუდიტი, რომელმაც ფაქტობრივად, პასუხი გასცა ყველა მანიპულაციას ამ პროცესთან მიმართებით. რა თქმა უნდა, ამ საკითხთან მიმართებით არის შემდგომი რეკომენდაციები. მათ შორის იყოს აღმოფხვრილი და მოწესრიგებული სხვადასხვა მხარის მიერ გამოთქმული წუხილები. რა თქმა უნდა, ინსტიტუცია დაუბრუნდება, განიხილავს ამ საკითხებს და იმსჯელებს, როგორ გააუმჯობესოს ეს ნაწილი.

რა თქმა უნდა, ჩვენ გვაქვს გარკვეული კითხვები, მოსაზრებები სხვადასხვა საკითხებთან დაკავშირებით. ეს არ ნიშნავს, რომ სრულად და ერთმნიშვნელოვნად ვიზიარებთ დოკუმენტში მოცემულ ინფორმაციას, მაგრამ მისი კომპლექსურად წაკითხვის შემთხვევაში, ეს იძლევა სწორი დასკვნების გაკეთების შესაძლებლობას. ამ დასკვნის შესახებ ჩვენს კითხვებს, წუხილებს გავუზიარებთ ეუთო/ოდირს, როდესაც გვექნება შემდგომი შეხვედრა. როგორც იცით, ესეც ერთ-ერთი ნაწილია ამ სადამკვირვებლო მისიის, მისი მეთოდოლოგიის. ისევ გვექნება განხილვები, რადგან ჩვენ სადამკვირვებლო მისიის წარმოების ყველა ეტაპზე გვქონდა მათთან შეხვედრა და ინფორმაციის მიმოცვლა. საუბარია ობიექტური და ვერიფიცირებული ინფორმაციის მიწოდებაზე. ამ შემთხვევაშიც გავუზიარებთ მათ ჩვენს ხედვას სხვადასხვა საკითხებთან დაკავშირებით. მათ შორის, თუ რამ გამოიწვია ისეთი შეფასებისა და ისეთი დასკვნის შესაძლებლობა. აქ საუბარია წმინდად ჯანსაღ, კონსტრუქციულ პროცესზე, რათა, როგორც მათთვის, ისე ჩვენთვის იყოს გამჭვირვალე ეს პროცესი და არ დარჩეს კითხვის ნიშნები შეფასებებთან მიმართებით“, – განაცხადა კალანდარიშვილმა.

სამწუხაროა, რომ აშშ-ის დამარცხებული ადმინისტრაცია ბოლო დღეებს იყენებს, რათა თავს დაესხას ქართველ ხალხს და ხელისუფლებას, – ამის შესახებ პარლამენტის თავმჯდომარემ, შალვა პაპუაშვილმა განაცხადა.

მისივე თქმით, აშშ-ის სანქციები არასწორ დამოკიდებულებას აჩვენებს ქართველი ხალხის მიმართ.

„უპირველეს ყოვლისა, ეს არის კიდევ ერთი თავდასხმა აშშ-ის წარმავალი ადმინისტრაციისა ქართველ ხალხზე. სამწუხაროა, რომ არჩევნებში დამარცხებული ადმინისტრაცია მის ბოლო დღეებს იყენებს, რათა თავს დაესხას ქართველ ხალხს და მის ხელისუფლებას. ეს არის მძიმე ლაქა ქართულ-ამერიკულ ურთიერთობებში, განსაკუთრებით, როდესაც საქმე ეხება ჩვენს სამართალდამცავ და უსაფრთხოების სისტემას. სულ რამდენიმე დღის წინ ჩვენ ვნახეთ ანგარიში, რომელიც შეეხებოდა უსაფრთხოების სისტემას, მათ შორის საქართველოში და შეეხებოდა ტერორიზმის წინააღმდეგ ბრძოლას. ვნახეთ განსაკუთრებული შექება საქართველოს სამართალდამცავი და უსაფრთხოების სისტემისა. ვის აქებენ იქ?! იქ აქებენ შსს-ს და მის მინისტრს. იქ აქებენ სახელმწიფო უსაფრთხოების სამსახურს და მის ხელმძღვანელს. იქ აქებენ პროკურატურას და მის ხელმძღვანელობას. მათ ეხებათ, მათი დამსახურებაა, რომ აშშ-ის უწყებები მადლობას გვიხდიან, რომ საქართველოში არცერთი ფაქტი არათუ ტერორიზმის არ დაფიქსირებულა, არც ერთი ფაქტი არ დაფიქსირებულა რეკრუტირებისა საქართველოს მოქალაქეებისა ტერორისტულ ორგანიზაციებთან

თქვენ გახსოვთ, რა პრობლემები ჰქონდა წლების წინ საქართველოში ამ მიმართულებით და ზუსტად ამ ადამიანების, ვახტანგ გომელაურის და სხვების დამსახურებაა, რომ საქართველოში უსაფრთხო გარემო არის, არა მხოლოდ საქართველოს მოქალაქეებისთვის, არამედ უცხოეთის მოქალაქეებისთვის, უცხოელი დიპლომატებისთვის და ყველასთვის, ვინც ჩვენი ქვეყნის სტუმარია. ამის ფონზე, ასეთი გადაწყვეტილებების მიღება რა თქმა უნდა, კიდევ ერთხელ აჩვენებს, რომ ეს არის ძალიან არასწორი დამოკიდებულება ქართველი ხალხის მიმართ. აღარ გავიხსენებ სხვა რამეს, იმ გვერდში დგომას, რაც ქართველმა ხალხმა დავანახეთ აშშ-ს, ამერიკელ ხალხს, ამიტომ ეს გადაწყვეტილება, უპირველეს ყოვლისა ეწინააღმდეგება ამერიკელი ხალხის ინტერესს. სამწუხაროა, რომ არჩევნებში დამარცხების შემდეგ ადმინისტრაცია, რომელსაც მომდევნო ლეგიტიმაციაზე უარი უთხრა ამერიკელმა ხალხმა, ამერიკელი ხალხის სახელით აზიანებს ქართველ ხალხთან ურთიერთობას“, – განაცხადა პაპუაშვილმა.

პაპუაშვილმა აღნიშნა, რომ სანქციების შესახებ გადაწყვეტილებები ქართველ ხალხს ვერ დააზიანებს.

„ეს გახლავთ სრულად აშშ-ის წარმავალი ადმინისტრაციის პასუხისმგებლობა, როდესაც ასეთი უსამართლო გადაწყვეტილებები მიიღება. ჩვენ ამაზე გავლენა არ გვაქვს. ვხედავთ, რომ ეს არის კიდევ ერთხელ თვითნებური გადაწყვეტილება ადმინისტრაციის, რაც აზიანებს ამ ურთიერთობებს. მნიშვნელოვანია, რომ იყო მათ შორის ეს რაღაც სავიზო შეზღუდვების, თუ სანქციების საკითხიც. ვხედავდით ჩვენ, რომ თვეების განმავლობაში მუქარის ინსტრუმენტად იყო გამოყენებული სხვადასხვა პოლიტიკური ჯგუფების მხრიდან შიგნით, თუ გარეთ. ეს მუქარა განხორციელდა და ვნახეთ, რომ საქართველოში ისევ ისე თენდება და ღამდება, როგორც აქამდე თენდებოდა და ღამდებოდა. საქართველო წინ მიდის, ჩვენი საზოგადოება წინ მიდის და რა თქმა უნდა, ასეთი გადაწყვეტილებები ჩვენს ხალხს ვერ დააზიანებს. ერთადერთი რასაც აზიანებს ასეთი გადაწყვეტილებები, ეს არის იმ ქვეყნების, თუ ხელისუფლებების რეპუტაცია, რომლებიც ამგვარ გადაწყვეტილებებს იღებენ“, – აღნიშნა პაპუაშვილმა.

ნიშანდობლივია, რომ ანგარიშში გაკრიტიკებულია ზოგიერთი პოლიტიკური პარტიის მცდელობა, თავიანთი წარმომადგენლები საარჩევნო დამკვირვებლებად წარმოედგინათ და შეეგზავნათ საარჩევნო უბნებზე, რაზეც, როგორც გახსოვთ, ჩვენი კვლევაც მიუთითებდა, რომლითაც რადიკალურ ოპოზიციასთან პირდაპირ დაკავშირებული 37 სადამკვირვებლო ორგანიზაცია ვამხილეთ, – ამის შესახებ საქართველოს პარლამენტის თავმჯდომარე შალვა პაპუაშვილმა დღეს გამართულ ბრიფინგზე განაცხადა.

მისივე თქმით, რადიკალური ოპოზიციის თითქმის ორთვიანი ისტერიის ფონზე, ეუთო/ოდირის ანგარიშის მთავარი დამსახურება მაინც ის არის, რომ მან საბოლოოდ ამხილა ოპოზიციის ცრუ ბრალდებები, რომლითაც ისინი უკვე ორი თვეა, არჩევნების შედგების გაყალბებულად გამოცხადებას ცდილობდნენ.

„სრულად დაიმსხვრა რადიკალური პარტიების, „ენჯეოების“ და სალომე ზურაბიშვილის ცრუ ნარატივი უცხოეთში მცხოვრები მოქალაქეებისთვის საარჩევნო უფლების შეზღუდვის შესახებ, რაც საკონსტიტუციო სასამართლოსთვის მიმართვის ერთ-ერთი საბაბიც კი იყო. ამას გარდა, შეგახენებთ, რომ უცხოელებთან კომუნიკაციისას სალომე ზურაბიშვილი ამ ბრალდებას საპარლამენტო არჩევნების შეუმდგარად გამოცხადებისთვის ერთ-ერთ მთავარ მიზეზად ასახელებდა. ამ ხმაურიანი ცრუ კამპანიის ფონზე, მართლაც გამანადგურებელია მათთვის, რომ ეუთო/ოდირს ეს საკითხი არათუ პრობლემურად, საერთოდ ნახსენებიც კი არ აქვს და ამით საბოლოო წერტილი დაუსვა საზღვარგარეთ მყოფი ჩვენი მოქალაქეებისთვის საარჩევნო უფლების ვითომდა შეზღუდვის შესახებ სპეკულაციას.

ეუთო/ოდირის ანგარიშით სრულად განადგურდა რადიკალური პარტიების, „ენჯეოების“ და სალომე ზურაბიშვილის ცრუ ბრალდება 300 000 ხმის გაყალბების შესახებ, რომელიც მათი ვერსიით არსაიდან გაჩნდა და „ქართულმა ოცნებამ“ მიიწერა. არც პირდაპირ და არც ირიბად ამ ანგარიშში რაიმე მსგავსი არც წერია და არც გამომდინარეობს. ერთი სიტყვითაც არ არის ნახსენები, რომ ან ხმის მიცემისას, ან ხმის დათვლისას, ან ოქმის შედგენისას რაიმე გაყალბებას, მანიპულაციას თუ ე.წ. საარჩევნო კარუსელს ჰქონდა ადგილი. ამავე კონტექსტში, გაბათილდა კიდევ ერთი ყალბი ნარატივი, როდესაც საქსტატის მიერ გამოქვეყნებული მოსახლეობის რაოდენობის და ცესკო-ს მიერ დადგენილი ამომრჩევლების რაოდენობის ურთიერთ დადარებით ცდილობდნენ ემტკიცებინათ, რომ მოხდა არარსებული ამომრჩევლის ბიულეტენების ჩაყრა და ამ მითიური 300 000 ხმის მიწერა. ეუთო/ოდირმა დაადასტურა, რომ ამომრჩევლების სიის სიზუსტესთან დაკავშირებით რაიმე კითხვები არ არსებობს.

სრულად დაიმსხვრა რადიკალური პარტიების, „ენჯეოების“ და სალომე ზურაბიშვილის ყალბი ბრალდება თითქოსდა რეგისტრაციის აპარატებში სიების დუბლირების და „ერთი პირადობის მოწმობით 17-ჯერ ხმის მიცემის“ შესახებ. სიების დუბლირება გამოირიცხა ამერიკული კომპანიის მიერ ჩატარებული დამოუკიდებელი აუდიტის დასკვნითაც და ეუთო/ოდირის ანგარიშითაც.

განადგურდა კიდევ ერთი სამარცხვინო ტყუილი, რომელსაც სალომე ზურაბიშვილი რადიკალურ პარტიებთან და ზოგიერთ მათ მოკავშირე უცხოელ აქტორთან ერთად ავრცელებდა არჩევნებში თითქოსდა რუსეთის ჩარევის შესახებ. ეუთო/ოდირმა არათუ დაადგინა, მას ეჭვის დონეზეც კი არ აქვს გამოთქმული რაიმე ვარაუდი არჩევნებში რუსეთის ჩარევასთან დაკავშირებით.

ბოლო ხავსი, რომელსაც რადიკალური პარტიები, „ენჯეოები“ და სალომე ზურაბიშვილი არჩევნებიდან მეხუთე დღეს ჩაეჭიდნენ: საარჩევნო ბიულეტენზე მარკირების მეორე მხარეს გაჟონვა. შეგახსენებთ, რომ ამ საბაბით ისინი უბნების 90%-ის ბათილად ცნობას და ამით ახლად არჩეული პარლამენტის შეკრების ჩაშლას ცდილობდნენ. ეუთო/ოდირის ანგარიშის თანახმად მათ დაკვირვებების 94% მარკირების მეორე მხარეს გამოჩენის შემთხვევა საერთოდ არ დაუფიქსირებიათ. დაკვირვების მხოლოდ 6%-ში მათ მართალია დააფიქსირეს მარკირების მეორე მხარეს გამოჩენის შემთხვევა, თუმცა, მათი შეფასებით ამას მხოლოდ პოტენციურად შეეძლო ფარულობის დარღვევა; ხაზს ვუსვამ, რომელსაც მხოლოდ „პოტენციურად შეეძლო ფარულობის დარღვევა“ და არა „რომლითაც ფარულობა დაირღვა“. ამასთან, ეუთო/ოდირი ფარულობის დარღვევის რისკის შემცველ მთავარ გარემოებებად აბსოლუტურად სხვა საკითხებს ასახელებს. ესენია: თავად ამომრჩევლის მიერ ბიულეტენის არასწორად განთავსება, უბანზე ხალხის დიდი რაოდენობა, უბნის შიდა პერიმეტრის მოწყობა და ა.შ. ასე, რომ მითი ბიულეტენის მონიშვნის საყოველთაო გაჟონვის შესახებ საბოლოოდ დაიმსხვრა“, – აღნიშნა პაპუაშვილმა.

მისივე თქმით, ერთი ანგარიშით დაიმსხვრა რადიკალური პარტიების, „ენჯეობის“, სალომე ზურაბიშვილის და მათი უცხოელი შემგულიანებლების ხუთი მთავარი ტყუილი, რომლითაც ისინი ქართული დემოკრატიისთვის ძირის გამოთხრას და მილიონზე მეტი ამომრჩევლისთვის ხმის წართმევას ცდილობდნენ.

„საზოგადოებას შევახსენებ, რომ არაფერი ახალი ამ ხალხის ხელწერაში არ არის. 2012 წლის შემდეგ ეს უკვე მერვე არჩევნებია, რომელსაც რადიკალური ოპოზიცია გაყალბებულად აცხადებს. საუბრობენ უპრეცედენტო გაყალბებებზე, ოღონდ იმ ფონზე, როდესაც ოპოზიციას საარჩევნო უბნებზე ჯამში 24 000 კომისიის წევრი ჰყავდა და ამდენივე წარმომადგენელი, საიდანაც მხოლოდ ცხრამ დააფიქსირა განსხვავებული აზრი საარჩევნო უბნის ოქმის შედგენისას. საუბრობენ უპრეცედნტო დარღვევებზე, ოღონდ იმ ფონზე, როდესაც საარჩევნო უბნებზე რეკორდული რაოდენობის – 25 000 – ადგილობრივი და უცხოელი დამკვირვებელი იყო, შედეგად კი სულ 1200 საჩივარი დაიწერა, მაშინ როდესაც 2020 წლის არჩევნებისას საჩივრების რაოდენობა 2000-ზე მეტი იყო. საუბრობენ უპრეცედენტო ძალადობა, ოღონდ იმ ფონზე, როცა 3111 უბანზე ორ მილიონზე მეტი ამომრჩევლის პირობებში სახალხო დამცველის ანგარიშში სულ ძალადობის 13 ინციდენტი აღიწერა და ეუთო/ოდირმა ამას იზოლირებული შემთხვევები დაარქვა.

სწორედ ამიტომ არის, რომ, როგორც წინა შვიდ შემთხვევაში, ახლაც რადიკალურ ოპოზიციას, საბოლოო ჯამში, მოუწევს ქართველი ხალხის ნების აღიარება და დემოკრატიულ ჩარჩოებში დაბრუნება. დასანანი მხოლოდ ის არის, რომ ამასობაში გადის ძვირფასი დრო და ფუჭად იხარჯება ჩვენი ხალხის ენერგია და ემოციები, რომელიც ჩვენი ქვეყნის წინსვლას უნდა მოხმარდეს“, – აღნიშნა პაპუაშვილმა.