Home Blog

“ოპოზიციის ლიდერებს და მათ რუპორ აქტივისტებს მივმართავ! საკუთარი ხალხის მიმართ ამხელა ზიზღს როგორ იტევთ?!”

ოპოზიციის ლიდერებს და მათ რუპორ აქტივისტებს მივმართავ! საკუთარი ხალხის მიმართ ამხელა ზიზღს როგორ იტევთ?! , – ამის შესახებ პარლამენტის ვიცე-სპიკერი ნინო წილოსანი სოციალურ ქსელში წერს.

წილოსანის თქმით, უკვე ერთი კვირაა ოპოზიცია და მათი აქტივისტები ზიზღს ავლენენ ქვეყნის უმრავლესობის მიმართ, მათი სამოქალაქო პოზიციის, ასაკის, გარეგნობის, სოციალური მდგომარეობის და პოლიტიკური პრეფერენციების გამო.

„ოპოზიციის ლიდერებს და მათ რუპორ აქტივისტებს მივმართავ!
საკუთარი ხალხის მიმართ ამხელა ზიზღს როგორ იტევთ?!
უკვე ერთი კვირაა თვალს ვადევნებთ რამხელა აგრესიას და ზიზღს ავლენთ ქვეყნის უმრავლესობის მიმართ, მათი სამოქალაქო პოზიციის, ასაკის, გარეგნობის, სოციალური მდგომარეობის და პოლიტიკური პრეფერენციების გამო. რამ შეგაძულათ ასე საკუთარი მოსახლეობა? რამ შეგაშინათ ასე საკუთარი ხალხის?
დღეს, თქვენგან განსხვავებით, მშვიდობიანი მიზნით შეიკრიბება უამრავი ადამიანი! მიუხედავად იმისა, რომ ქართველი ერის წინაშე უდიდესი დანაშაული მიგიძღვით და ამ ადამიანების დიდი ნაწილი სრულ ტერორში გყავდათ თქვენი მმართველობის დროს, ჩვენ მაინც ცივილიზებულად მოგექცევით და თქვენსავით კაციჭამიები არასდროს გავხდებით!“ – წერს წილოსანი.

ანტონიო გუტერეში უკრაინაზე რუსეთის დარტყმებს გმობს და ბირთვული უსაფრთხოებისთვის შექმნილ რისკებზე საუბრობს

გაერო-ს გენერალური მდივანმა, ანტონიო გუტერეშმა მკაცრად დაგმო რუსეთის მიერ უკრაინაში დრონებითა და რაკეტებით განხორციელებული თავდასხმების უახლესი ტალღა და განაცხადა, რომ დარტყმები კვლავ საფრთხეს უქნის ზაპოროჟიეს ატომურ ელექტროსადგურზე ბირთვულ უსაფრთხოებას, – ამის შესახებ გაერო-ს პრესსპიკერის, სტეფან დუჟარიკის განცხადებაშია აღნიშნული.

გაერო-ს გენერალურმა მდივანმა შეშფოთება გამოთქვა სახიფათო ესკალაციისა და მშვიდობიან მოსახლეობაში მსხვერპლის ზრდის გამო. მან კიდევ ერთხელ გაიმეორა, რომ მშვიდობიან მოსახლეობასა და კრიტიკულ ინფრასტრუქტურაზე თავდასხმები აკრძალულია საერთაშორისო სამართლით და ცეცხლის დაუყოვნებლივ და უპირობო შეწყვეტის მოწოდებით გამოვიდა.

„ამ დარტყმებმა შეაფერხა ზაპოროჟიეს ატომური ელექტროსადგურის ენერგომომარაგება, რაც კიდევ ერთხელ ხაზს უსვამს ბირთვული უსაფრთხოებისთვის არსებულ რისკებს. გენერალური მდივანი კიდევ ერთხელ მოუწოდებს უკრაინაში სრული, დაუყოვნებლივი და უპირობო ცეცხლის შეწყვეტისკენ, როგორც პირველი ნაბიჯისკენ სამართლიანი, ყოვლისმომცველი და მდგრადი მშვიდობისკენ, გაერო-ს ქარტიის, საერთაშორისო სამართლისა და გაერო-ს შესაბამისი რეზოლუციების შესაბამისად“, – აღნიშნულია განცხადებაში.

რუსეთი ესტონეთს, შესაძლოა 5-7 წელიწადში თავს დაესხას – მარკ რუტე

რუსეთი ესტონეთს ახლა არ დაესხმება თავს, მაგრამ შეიძლება ეს ხუთ-შვიდ წელიწადში გააკეთოს, – ამის შესახებ ნატო-ს გენერალურმა მდივანმა, მარკ რუტემ The New York Times-თან ინტერვიუში განაცხადა.

მას სთხოვეს კომენტარი გაეკეთებინა New Yorker-ში გამოქვეყნებულ სტატიაზე, რომელშიც აღწერილია ესტონეთში ჩატარებული წვრთნები, რათა შემოწმებულიყო მისი მზადყოფნა რუსეთის შესაძლო შეჭრისთვის. სტატიის ავტორები აცხადებენ, რომ ესტონეთს არ ჰყავს საჰაერო ძალები და საზღვაო ფლოტი. წვრთნებში, დამპყრობელი არმიის გუნდს „შესაძლებლობების უპირატესობა“ ჰქონდა – მეტი მძიმე ჯავშანი, მეტი შორ მანძილზე სროლა. სტატიაში აღნიშნულია, რომ წვრთნები, ძირითადად, ესტონეთისთვის კარგად არ წარიმართა.

„ყველაფერი, რაც New Yorker-შია აღწერილი, სწორია. თუმცა ეს არ არის „გამოსაღვიძებელი ზარი“, რადგან ჩვენ გვაქვს ყველა გეგმა, რომ თუ ესტონეთს თავს დაესხმებიან – და რუსებმა ეს იციან – ჩვენი რეაქცია გამანადგურებელი იქნება. დეტალებში ვერ შევალ, რადგან ვიცი, რომ ვლადიმერ პუტინი ამ პროგრამებს აკვირდება. თუმცა, ჩვენ უნდა დავრწმუნდეთ, რომ არა მხოლოდ ეს გეგმები გვაქვს, არამედ გვყავს ხალხი და სამხედრო აღჭურვილობაც, რომელიც ამას მხარს დაუჭერს. სწორედ ამიტომ გვჭირდება მეტის დახარჯვა. თუმცა, საქმე იმაში არ არის, რომ ესტონელები მარტო დარჩნენ. ნატო-ს სრული ძალა, მათ შორის შეერთებული შტატების სრული მხარდაჭერა, მოვა დასახმარებლად. პუტინმა ეს იცის. სწორედ ამიტომ არ დაესხმება თავს დღეს ესტონეთს. თუმცა, შესაძლოა, ხუთ ან შვიდ წელიწადში დაესხას თავს, თუ ყველა ამ დამატებით ინვესტიციას არ განვახორციელებთ“, – აღნიშნა რუტემ.

ილონ მასკმა საკუთარი პოლიტიკური პარტიის შექმნის შესახებ განაცხადა

SpaceX-ის დამფუძნებელმა და Tesla-ს ერთ-ერთმა დამფუძნებელმა ილონ მასკმა საკუთარი პარტიის შექმნა გამოაცხადა.

„დღეს შეიქმნა „ამერიკის პარტია“, რათა დაგიბრუნოთ თავისუფლება“, – დაწერა მან საკუთარ სოციალურ ქსელ X-ში იმ გამოკითხვის შედეგების შემდეგ, რომელიც მანამდე ჩაატარა და რომელშიც დაახლოებით 1.3 მილიონმა ადამიანმა მიიღო მონაწილეობა.

გამოკითხვის მონაწილეთა 65%-ზე მეტმა მხარი დაუჭირა იდეას „ორპარტიული სისტემისგან დამოუკიდებლობის შესახებ“. „გსურთ ახალი პოლიტიკური პარტია? და თქვენ ის გექნებათ!“ – განაცხადა მასკმა და დასძინა: „როდესაც საქმე ფლანგვისა და კორუფციის გამო ჩვენი ქვეყნის გაკოტრებას ეხება, ერთპარტიულ სისტემაში ვცხოვრობთ და არა დემოკრატიაში“.

ონლაინ-გამოკითხვა მასკმა მას შემდეგ დაიწყო, რაც აშშ-ის პრეზიდენტმა დონალდ ტრამპმა „დიდ და მშვენიერ“ საგადასახადო კანონს მოაწერა ხელი, რომელიც არც სახელმწიფო ვალის ზედა ზღვრის გაზრდას გამორიცხავს. ინიციატივამ მასკის მწვავე კრიტიკა გამოიწვია და მისი და თეთრი სახლის ხელმძღვანელს საჯარო კონფლიქტის მთავარი მიზეზი გახდა.

ამ ეტაპზე უცნობია დაარეგისტრირა თუ არა მასკმა პარტია ოფიციალურად.

6 ივლისის ასტროლოგიური პროგნოზი

ვერძი

რთული დღეა. გირჩევთ კონფლიქტებს ერიდოთ და არავის არაფერი დაჰპირდეთ – დიდი ალბათობით, პირობის შესრულება გაგიჭირდებათ. ეცადეთ დღის უმეტესი ნაწილი სახლში გაატაროთ და მხოლოდ ის აკეთოთ, რაც სიამოვნებას განიჭებთ. რთული საქმეები უმჯობესია სამომავლოდ გადადოთ, რადგან დღეს ასეთ საქმეებში წინსვლას ვერ მიაღწევთ. ნუ გადაიღლებით. ვარსკვლავები ხშირად დასვენებას და განწყობის ამაღლებას გირჩევენ.

კურო

შესაძლოა, ამ დღეს პირად ცხოვრებაში მოულოდნელი და დაუფიქრებელი გადაწყვეტილება მიიღოთ. განმარტოებისთვის ხელსაყრელი დღეა, ამიტომ გირჩევთ შეხვედრები და ურთიერთობები შეამციროთ. ამ დღეს მთელი ყურადღება საქმეზე უნდა გადაიტანოთ და წვრილმანებზე დრო არ დაკარგოთ. პროფესიულ საქმიანობაში დაშვებულმა შეცდომებმა შეიძლება თავი შეგახსენოთ. ეცადეთ, ნეგატიურ გრძნობებს არ აჰყვეთ და მხოლოდ სასიამოვნო თემებზე იფიქროთ.

ტყუპები

ტყუპებო, ყურადღება მოიკრიფეთ და იმოქმედეთ, რადგან იღბალი თქვენს მხარესაა. გირჩევთ ძალები ეკონომიკაში ან პოლიტიკაში მოსინჯოთ. ამ დღეს საკუთარ თავში ახალ, სრულიად უცნობ თვისებებს აღმოაჩენთ და მიხვდებით, რომ „მეორე სუნთქვა“ გეხსნებათ. დღის მეორე ნახევარში ფრთხილად უნდა იყოთ – არსებობს სამსახურში კონფლიქტებისა და საგზაო შემთხვევების შესაძლებლობა.

კირჩხიბი

სავარაუდოდ, საკუთარი მოუთმენლობის გამო დაწყებულ საქმეს ბოლომდე ვერ მიიყვანთ. კომპრომისის ძიების ნაცვლად, ცდილობთ გარშემო მყოფებს საკუთარი აზრი თავზე მოახვიოთ, რამაც შეიძლება კონფლიქტამდე მიგიყვანოთ. შესაძლოა, რაღაც ისე არ ხდება, როგორც თქვენ გსურთ, თუმცა ყველაფრის ერთდროულად კეთებით საქმეს ვერ უშველით. თუ ვინმესთან შერიგებას და მობოდიშებას აპირებთ, უკეთეს დროს ვერ იპოვით

ლომი

ამ დღეს ახალი საქმის დაწყება არ შეიძლება, რადგან სასურველი შედეგის მიღწევა გაგიჭირდებათ. გამორიცხული არ არის, რომ ვიღაცის საიდუმლო გაიგოთ და აქედან სარგებელი მიიღოთ. თავი შეიკავეთ ახალი საქმის დაწყებისგან და უარყავით ყველა საქმიანი შეთავაზება – ისინი პრობლემების გარდა არაფერს მოგიტანთ. რომელიღაც ბიზნეს პარტნიორი თქვენს მოტყუებას ეცდება, ამიტომ ყველა საბუთი ყურადღებით უნდა შეამოწმოთ.

ქალწული

ამ დღეს სამუშაო თქვენგან ჩვეულებრივზე მეტ ძალისხმევას და მოთმინებას მოითხოვს. გირჩევთ პირად ცხოვრებაში მეტი სიმტკიცე გამოიჩინოთ. თუ პარტნიორის ერთგულებაში ეჭვი გეპარებათ, ნუ დააყოვნებთ, ეცადეთ თამამი გადაწყვეტილება მიიღოთ. ამ დღეს შესაძლებლობა გექნებათ, რომ კარიერული და ფინანსური მდგომარეობა გაიუმჯობესოთ. საღამოს მოულოდნელი სიახლეებს მიიღებთ, მაგრამ დასკვნების გამოტანამდე ინფორმაცია უნდა გადაამოწმოთ.

სასწორი

იღბლიანი დღეა. მნიშვნელოვანი შეხვედრა გელით, რომელიც თქვენს ცხოვრებას მთლიანად შეცვლის. სავარაუდოდ, საინტერესო შეთავაზებას მიიღებთ და დაუფიქრებლად უნდა დათანხმდეთ. საქმე თუ პირველ ცდაზე არ გამოდის, მეორედ უნდა სცადოთ. თუ სიმტკიცეს გამოიჩენთ და უკან არ დაიხევთ, სასურველ შედეგს აუცილებლად მიიღებთ.

მორიელი

ეცადეთ საკუთარ გრძნობებში გაერკვეთ. სავსებით შესაძლებელია, რომ ყველაფერი გაცილებით უკეთაა, ვიდრე თქვენ ფიქრობთ. გარშემო მყოფებს თქვენი წარმატება ახარებთ, თუმცა შესაძლოა, გამოჩნდეს ადამიანი, რომელიც ეცდება დაგაზიანოთ. უახლოეს დღეებში სამსახურში პრობლემებს უნდა ელოდოთ. გირჩევთ, გადაწყვეტილებები ფრთხილად მიიღოთ, შედეგები და რისკები ობიექტურად შეაფასოთ.

მშვილდოსანი

გრძნობთ, რომ დასვენება გჭირდებათ. დაღლილობა, რომელიც ბოლო დროს გამუდმებით გაწუხებთ, გამოწვეულია ემოციური სტრესით. გარშემო მყოფებთან ურთიერთობაზე უარს ამბობთ, რასაც ყველაზე მეტად თქვენი ოჯახი განიცდის. შეეცადეთ ეს მოცემულობა შეცვალოთ და საყვარელი ადამიანები დაამშვიდოთ. დღის მეორე ნახევარში შესაძლოა, თავის ტკივილმა და მაღალმა წნევამ შეგაწუხოთ.

თხის რქა

შესაძლოა დილას თავი შეუძლოდ იგრძნოთ. ყოველდღიური პრობლემების მოგვარება დიდ ძალას მოითხოვს, მაგრამ ამის სამომავლოდ გადადება არ შეიძლება. ეცადეთ ყველა დაწყებული საქმე დაასრულოთ, რადგან სახლში სიმშვიდე თქვენი კეთილდღეობის გასაღებია. საღამოს სასიამოვნო სიახლე გელით. ვარსკვლავები გირჩევენ, სახლიდან გახვიდეთ, ახალ ადგილებს ეწვიოთ და „თვალს წყალი დაალევინოთ“. გარშემო მყოფებთან აქტიური ურთიერთობა დაუვიწყარ ემოციებს გაჩუქებთ.

მერწყული

ბიზნესში ან პროფესიულ საქმიანობაში მოულოდნელი სირთულე გელით. ასეთ სიტუაციაში ბევრია დამოკიდებული კოლეგებზე, რომლებსაც შეუძლიათ რთული სიტუაციიდან გამოსავალი იპოვონ. ინტუიციის და პირადი ხიბლის დამსახურებით თქვენი სასიცოცხლო პოტენციალი იზრდება. გამორიცხული არ არის, რომ ფულის შოვნის ახალი გზები აღმოაჩინოთ.

თევზები

ეცადეთ, საყვარელ ადამიანს, მის საქმეებს და საზრუნავს მეტი ყურადღება მიაქციოთ, სასურველია სიურპრიზი ან რომანტიკული პაემანი მოუწყოთ და ურთიერთობა გააძლიეროთ. შესაძლოა, ამ დღეს მაცდური შეთავაზება მიიღოთ, რომელიც გამოცდილ ადამიანებთან ერთად უნდა განიხილოთ და გადაწყვეტილება ამის შემდეგ მიიღოთ.

სომხეთის საგარეო საქმეთა სამინისტრომ თურქეთის პრეზიდენტის მიერ ე.წ. ზანგეზურის დერეფნის შესახებ გაკეთებულ განცხადებას გამოეხმაურა

სომხეთის საგარეო საქმეთა სამინისტრომ თურქეთის პრეზიდენტის მიერ ე.წ. ზანგეზურის დერეფნის შესახებ გაკეთებულ განცხადებას გამოეხმაურა.

როგორც სომხეთის საგარეო უწყებაში განაცხადეს, „სომხეთი იყო და რჩება დაინტერესებული რეგიონული ურთიერთკავშირების გაფართოებით და ეკონომიკურ განვითარებით. სწორედ ამ გაგებით სომხეთის რესპუბლიკამ წამოიწყო ინიციატივა „მშვიდიბის გზაჯვარედინი“ და წარადგინა შესაბამისი ცალკეული იდეები, გადაწყვეტილებები და კონსტრუქციული წინადადებები“.

„ჩვენი მოსაზრებით, მათ შეუძლიათ, უზრუნველყონ ორმხრივად სასარგებლო შედეგები როგორც რეგიონის ქვეყნებისთვის, ისე პარტნიორებისთვის, რომლებიც დაინტერესებულნი არიან კომუნიკაციების უფრო ფართო გეოგრაფიული ქსელის განვითარებით. როგორც ადრე, ისე ახლაც სომხეთის რესპუბლიკის ხედვა რეგიონში სატრანსპორტო ინფრასტრუქტურის განბლოკვის შესახებ დაფუძნებულია სუვერენიტეტის, კომუნიკაციებზე ეროვნული იურისდიქციის ფუძემდებლურ პრინციპებზე და, როგორც ცნობილია, არ გულისხმობს სხვა ლოგიკას. მსჯელობა დაინტერესებულ პარტნიორებთან გრძელდება“, – ნათქვამია სომხეთის საგარეო უწყების განცხადებაში.

ცნობისთვის, მანამდე თურქეთის პრეზიდენტმა, რეჯეფ თაიფ ერდოღანმა განაცხადა, რომ „სომხეთი, რომელიც თავდაპირევლად ზანგეზურის დერეფნის წინააღმდეგ გამოდიოდა, ახლა უფრო მოქნილ მიდგომას მისდევს ეკონომიკურ ინტეგრაციაში მონაწილეობის თვალსაზრისით“.

,,დასხედით დახურულ კარს მიღმა და არ გამოხვიდეთ, ვიდრე არ შეთანხმდებით ერთიან სტრატეგიაზე”- ნინო ლომჯარია

დასხედით დახურულ კარს მიღმა ყველანი ერთად, არ გამოხვიდეთ, ვიდრე არ შეთანხმდებით ერთიან სტრატეგიაზე, თქვენი გახლეჩვის და არჩევნებზე ცალ-ცალკე გასვლის შედეგებს ვიმკით ყველა, – ამის შესახებ არასამთავრობო ორგანიზაციის, „საქართველოს ევროპული ორბიტის“ დამფუძნებელი ნინო ლომჯარია სოციალურ ქსელში წერს.

მისი თქმით, მოუმზადებლად, გახლეჩილი და ერთმანეთს გადაკიდებული ოპოზიციით, ამომრჩევლის მობილიზაციის გარეშე არჩევნებზე გასვლა პრაგმატულობა კი არა – უპასუხისმგებლობაა.

„გახარიას და „ლელოს“ თუ ამდენი საერთო ჰქონდათ პოლიტიკური ბრძოლის ხერხებზე, რატომ არ გაერთიანდნენ საპარლამენტო არჩევნების წინ? ხუთი და ოთხი ნომერი თუ ასეთი ერთიანია პოლიტიკური ბრძოლის ფორმაში, რატომ გაიყვნენ საპარლამენტო არჩევნების წინ? ცხადი ხომ იყო, რომ მასშტაბური გაყალბება იქნებოდა, ევროინტეგრაციას გააჩერებდნენ, სამოქალაქო სექტორს დახურავდნენ და პოლიტიკოსებს ციხეში გაუშვებდნენ? რატომ არ მოუსმინეს ამომრჩევლის დაკვეთას? რატომ არ დადგნენ საკუთარ ეგოზე მაღლა? ახლაც, ახალგაზრდების, ქალების, შშმ პირების სისტემური წამების, ციხეში გამომწყვდევის, სამსახურებიდან გამოყრის, ფინანსური რეპრესიების შემდეგაც რომ ვერ ერთიანდება ოპოზიცია ერთიან სტრატეგიაზე, ამას რა ქვია? ვინ ხართ თქვენ?

ახლა, რაც შეეხება „პრაგმატულობას“. თვითმმართველობის არჩევნებზე არ იქნება არც საერთაშორისო, არც ადგილობრივი სადამკვირვებლო მისიები. თვითმმართველობის არჩევნებზე გამსვლელი პარტიების მიერ დოკუმენტირებულ დარღვევებზე და სასამართლოებში წაღებულ დავებზე მე არაფერი მსმენია. არც მათი პარტიების წევრების ნაბრძოლ და დაცულ ხმებზე მსმენია რამე საარჩევნო უბნებზე. არჩევნებზე გასვლა მარტო სიის შედგენა და ფბ რეკლამა არ არის. კი, არჩევნები მასშტაბურად გაყალბდა, კი, პოლიტიკოსები უკანონოდ სხედან ციხეში, მაგრამ ასე მოუმზადებლად, გახლეჩილი და ერთმანეთს გადაკიდებული ოპოზიციით, ამომრჩევლის მობილიზაციის, კომისიის წევრებ და დამკვირვებელ მოუმზადებელი არჩევნებზე გასვლა პრაგმატულობა კი არ არის, უპასუხისმგებლობაა, რეპრესირებულ მოქალაქეებზე ემოციური ძალადობაა, საკუთარი ქვეყნის და აქამდე არსებული საპროტესტო სტრატეგიის საბოტაჟია, ლანგარზე მირთმეული საჩუქარია „ოცნებისთვის“.

ამიტომ, სანამ დროა, დასხედით დახურულ კარს მიღმა ყველანი ერთად და არა ტელევიზორებში, არ გამოხვიდეთ, სანამ არ შეთანხმდებით ერთიან სტრატეგიაზე და მერე გამოაცხადეთ ერთიანი გადაწყვეტილება. თქვენი გახლეჩვის და არჩევნებზე ცალ-ცალკე გასვლის შედეგებს ვიმკით აქ ყველა. ხალხის დაკვეთაა ეს და ემსახურეთ ხალხს“, – წერს ნინო ლომჯარია.

„კახური ტრადიციული მეღვინეობის ჯგუფის“ დამფუძნებელი ზურაბ ჩხაიძე განცხადებას ავრცელებს

„კახური ტრადიციული მეღვინეობის ჯგუფის“ დამფუძნებელი ზურაბ ჩხაიძე განცხადებას ავრცელებს.

როგორც ჩხაიძე განმარტავს, მისი შვილის დაკავების საქმესთან დაკავშირებით აბსურდული ბრალდებები და დაუსაბუთებელი სპეკულაციები ვრცელდება.

„არსებულ სიტუაციაზე საუბარი მხოლოდ იმიტომ გადავწყვიტე, რომ სიმართლე არ დაიკარგოს იმ აბსურდულ ბრალდებებსა და დაუსაბუთებელ სპეკულაციებში, რასაც ბოლო დღეებში კონკრეტული ჟურნალისტებისგან ვისმენ. რამდენიმე დღის წინ ჩემი შვილი ნამდვილად დააკავეს, შენახვის უფლებით ოფიციალურად გაფორმებული იარაღის, ხაზს ვუსვამ, გაფორმებული იარაღის ერთი სახლიდან მეორეში – აგარაკზე უნებართვოდ გადატანის გამო. ეს, რა თქმა უნდა, კანონდარღვევაა, მაგრამ ერთ-ერთი მსუბუქი კატეგორიის.

მიუხედავად ამისა, პროკურატურამ აღკვეთი ღონისძიების ყველაზე მკაცრი ფორმა – წინასწარი პატიმრობა მოითხოვა. სასამართლომ, ყველა არსებითი გარემოების გათვალისწინებით – ნასამართლობის არქონა, პიროვნული მახასიათებლები, მუდმივი სამსახური ევროპაში და სხვა – საპატიმრო გირაო შეუფარდა (მაქსიმალურად მაღალი ოდენობით). პროკურატურა გადაწყვეტილებას სააპელაციოში ასაჩივრებს. საბოლოო შედეგი ჯერ კიდევ გაურკვეველია. ამ ფონზე მელაძის ჟურნალისტები სვამენ აბსურდულ კითხვებს – „როგორ დაალაგე საქმე სასამართლოში?“ – ამ დროისთვისაც, ჩემი შვილი კვლავ პატიმრობაში რჩება. და არც ის ვიცი, რა განაჩენს გამოიტანს სასამართლო.

ჩემს ოჯახს ნამდვილად დიდი სანერვიულო შეხვდა, მაგრამ კანონის წინაშე ყველა თანასწორია. და როგორც მე ვემორჩილები მის თითოეულ ნორმას, იგივე უნდა იყოს სხვისთვისაც – იქნება ის ჟურნალისტი თუ სხვა პროფესიის ადამიანი. არავის აქვს უფლება, გამოგონილი ტყუილები და განზრახ გავრცელებული დეზინფორმაცია, თავისი პოლიტიკური მითების გასამყარებლად გამოიყენოს“, – აღნიშნულია განცხადებაში.

სხვადასხვა ქვეყანაში მცხოვრები ქართული დიასპორის წარმომადგენლები, ქართველი ემიგრანტების სახელით, ევროკავშირის საგარეო საქმეთა საბჭოს მიმართ გავრცელებულ განცხადებას ემიჯნებიან

სხვადასხვა ქვეყანაში მცხოვრები ქართული დიასპორის წარმომადგენლები,
ქართველი ემიგრანტების სახელით, ევროკავშირის საგარეო საქმეთა საბჭოს მიმართ გავრცელებულ განცხადებას ემიჯნებიან. ქართველი ემიგრანტები გავრცელებულ განცხადებაში წერენ, რომ ისინი დაუშვებლად მიიჩნევენ და ემიჯნებიან მოთხოვნებს, მათ შორის საქართველოს ხელისუფლების წინააღმდეგ ცალკეული ზომების გატარებას.

საბერძნეთის ქართული დიასპორული ორგანიზაციების ალიანსი ემიგრანტების სახელით გაკეთებულ განცხადებას ეხმაურება და დაუშვებლად მიიჩნევს სრულიად ემიგრაციის და ზოგადად გარკვეული ჯგუფების მიერ ყველა ემიგრანტის სახელით განცხადებების კეთებას.

საბერძნეთის ქართული დიასპორული ორგანიზაციების ალიანსი ასევე დაუშვებლად მიიჩნევს და ემიჯნება დიასპორის სახელით გაკეთებულ განცხადებას, თითქოს ემიგრანტები ითხოვენ ევროკავშირისგან დასანქცირდეს საქართველოს ხელისუფლება და საქართველოს ოფიციალური წარმომადგენლები.

“ჩვენ, საბერძნეთის რესპუბლიკაში მცხოვრები ემიგრანტები ვემიჯნებით განცხადებას, რომელიც გაკეთდა გარკვეული ჯგუფის მიერ, თითქოს ქართული დიასპორა და ემიგრაცია ემიჯნება ქართული სახელმწიფოს და ევროკავშირს სთხოვს დაუწესოს სანქციები მას.

ჩვენ საბერძნეთში მცხოვრები ქართველი ემიგრანტები არ ვიზიარებთ ამ განცხადებას და ვგმობთ, ემიგრაციის სახელით გაკეთებულ მსგავს პეტიციას. – ნათქვამია საბერძნეთის ქართული დიასპორული ორგანიზაციების ალიანსის მიერ გაკეთებულ განცხადებაში.

მსგავსი განცხადება გაავრცელა არერთმა დიაპორულმა ორგანიზაციამ, მათ შორის: 

“ქართული დიასპორის საზოგადოებრივმა ცენტრმა”; “საქართველო-საბერძნეთის მეგობრობის ასოციაციამ”, “ევროპის ქველმოქმედ ქალთა კავშირმა”, ესპანეთში მოქმედმა დიასპორულმა ორგანიზაციამ -” Asociación de la Republica de Georgia e Inmigrantes”; პოლონეთის ქართული დიასპორა”; მილანის სამშობლო გულით სატარებელი, ასევე განცხადებები გაავრცელეს ინდივიდუალურმა პირებმა. 

“მეგობრებო, ამერიკაში მცხოვრები ემიგრანტები, ემიჯნებიან განცხადებას რომელიც გაკეთდა გარკვეული ჯგუფის მიერ, თითქოს ემიგრაცია ემიჯნება სახელმწიფოს  და ევროკავშირს სთხოვს დაუწესოს სანქციები.  ჩვენ არ ვიზიარებთ ამ განცხადებას და ვგმობთ, ემიგრაციის სახელით გაკეთებულ მსგავს პეტიციას”,-წერს სოციალურ ქსელში მერიკო კარტოზია.

“ვემიჯნებით განცხადებას, რომელიც ბოლო დროს გავრცელდა გარკვეული ჯგუფის მიერ –  თითქოსდა ემიგრაცია “ემიჯნება საქართველოს სახელმწიფოს” და “ევროკავშირს სთხოვს სანქციების დაწესებას ჩვენს ქვეყანაზე”.მსგავსი გზავნილები კატეგორიულად მიუღებელია და ჩვენ არ ვიზიარებთ ამ მიმართვის არც შინაარსს და არც ტონს. ვგმობთ ნებისმიერ მცდელობას ემიგრაციის სახელით გაკეთდეს განცხადებები, რომლებიც დიასპორის საერთო აზრს არ გამოხატავს”,- ნათქვამია ვალენსიაში მოქმედი ორგანიზაციის განცხადებაში. 

“ლელოს” გადაწყვეტილებას არც დადებითად ვაფასებ და არც უარყოფითად, ვაფასებ “ლელოურად” -იაგო ხვიჩია

„ლელო“ და მისი დაფინანსებული „ტვ პირველი“ თავიდანვე იყვნენ იმ ხალხის მაწყევართა რიგში, ვინც არჩევნებში ვაპირებდით მონაწილეობას. მე ახლა მაინტერესებს, როგორ შეცვლიან ჭიკჭიკს „ტვ პირველის“ და „ლელოს“ მხრიდან მოსყიდული სხვა ჟურნალისტები იმის სასარგებლოდ, რომ თავიდანვე იყვნენ არჩევნებში შესვლის მომხრე, – ამის შესახებ „გირჩის“ ერთ-ერთმა ლიდერმა, იაგო ხვიჩიამ განაცხადა.

ამასთან, როგორც ხვიჩიამ აღნიშნა, თვითმმართველობის არჩევნებში მონაწილეობის შესახებ „ლელოს“ გადაწყვეტილებას არც დადებითად არც უარყოფითად ვაფასებ.

„დანარჩენი, ყველაფერი თავისთავად, ცხადია. ბატონი ხაზარაძე იბრძვის საპატიო მეორე ადგილისთვის ადგილობრივი თვითმმართველობის არჩევნებზე და ბუნებრივია, ეს ასე უნდა მომხდარიყო და არა სხვაგვარად. მგონი, „ნაცმოძრაობა“ ამ არჩევნების მერე ნამდვილად იქნება გადაშენების პირას მყოფი პარტია, მათ არ ეყოლებათ საკუთარი წარმომადგენლები არც საკრებულოებში, არც პარლამენტში და არც სადმე სხვაგან. არ ექნებათ დიდი წითელი ხუთიანი და შესაბამისად, ალბათ ბოლო პოლიტიკურ ნაბიჯს ერთმანეთის ლანძღვაში და ჩხუბში ხარჯავენ, რაც, ცხადია, ბუნებრივი იყო, რადგან ასე თუ გაგრძელდებოდა უიდეოდ 4,5,9,25-ის ყვირილი, ისინი ერთმანეთში საბოლოო ჯამში იჩხუბებდნენ. ამ ჩხუბს ვუყურებთ ახლა ჩვენ. „ლელოს“ გადაწყვეტილებას არც დადებითად ვაფასებ და არც უარყოფითად, „ლელოურად“ ვაფასებ. „ლელოს“ ეს აზრი ვიდრე თავში მოუვიდოდა, ჩვენ დიდი ხნით ადრე ვამბობდით, რომ არჩევნებში უნდა მივიღოთ მონაწილეობა ერთიანი კანდიდატით, „ქოცების“ დასამარცხებლად და არა ისე „ლელოურად“, როგორც ახლა ხდება – ჯერ აგინო ხალხს, ვინც არჩევნებში იღებს მონაწილეობას, მერე თვითონ მიიღო მონაწილეობა და ხალხს მოუწოდო, რომ სხვანაირად ქცევა არასწორია“, – განაცხადა ხვიჩიამ.

როგორ დღეს გახდა ცნობილი, კოალიცია „ლელო – ძლიერი საქართველო“ თვითმმართველობის არჩევნებში მონაწილეობას მიიღებს.

კობა კობალაძე – საკმაოდ ბევრი თარიღია ჩვენს თანამედროვე ისტორიაში, როდესაც სამაგალითო გმირობის მომსწრენი გავხდით. ერთ-ერთი ასეთი ეპიზოდი იყო კამანში – დიდება გმირებს

32 წელი კამანის ტრაგედიიდან. დღეს, აფხაზეთში, სოფელ კამანში დატრიალებული ტრაგედიიდან 32 წელი შესრულდა.

ამ თარიღთან დაკავშირებით, ვეტერანების საქმეთა სახელმწიფო სამსახურის დირექტორმა, გენერალ-მაიორმა კობა კობალაძემ და აფხაზეთის ავტონომიური რესპუბლიკის მთავრობის თავმჯდომარემ გიორგი ჯინჭარაძემ, გმირთა მემორიალი გვირგვინით შეამკეს და საქართველოს ტერიტორიული მთლიანობისთვის ბრძოლებში დაღუპულ მეომრებს პატივი კიდევ ერთხელ მიაგეს.
ქვეყნის ერთიანობისთვის დაღუპულ გმირთა ხსოვნისთვის პატივის მისაგებად, გმირთა მემორიალზე, ასევე, იმყოფებოდნენ ვეტერანების საქმეთა სახელმწიფო სამსახურის დირექტორის მოადგილეები_ მირონ ჩიგოგიძე და ჯანდრი უბირია, აფხაზეთის ა/რ მთავრობის თავმჯდომარის მოადგილე, ანზორ მარგიანი, ა(ა) იპ ‘’ახალგაზრდობა და ვეტერანები ეროვნული თავდაცვისა და უსაფრთხოებისათვის’’ დირექტორი, ედუარდ ჯიშკარიანი, აფხაზეთის მეომართა კავშირისა და ომში დაღუპულთა ოჯახის წევრები, ვეტერანები.

ილორის წმინდა გიორგის სახელობის ტაძრის მღვდელმსახურმა დეკანოზმა ლევანმა (ჯანაშიამ) ქვეყნის ერთიანობისთვის დაღუპულ მებრძოლთა სულის მოსახსენებელი პანაშვიდი აღავლინა.

‘„საკმაოდ ბევრი თარიღია ჩვენს თანამედროვე ისტორიაში, როდესაც სამაგალითო გმირობის მომსწრენი გავხდით. ერთ-ერთი ასეთი ეპიზოდი იყო კამანში… მედგარი და გულიანი ადამიანები ცხოვრობდნენ იქ; როდესაც მათზე ბევრად ძლიერი მტერი იერიშს ახორციელებდა და მიხვდნენ, რომ ძალის სიჭარბე სჯობნიდა თავდადებას, თავის თავზე გამოიძახეს საარტილერიო ცეცხლი. ჩვენს გვერდით მაცხოვრებელ მოქალაქეებს ჰქონდათ ეს უპრეცედენტო გმირობის მაგალითები… დიდება გმირებს! ყველა იმ ადამიანს, ვინც ჩვენი ქვეყნის ძლიერებისთვის, თავისუფლებისთვის იბრძვის, იბრძოდა და შესწირა თავი,’’-განაცხადა კობა კობალაძემ.

კამანელებისთვის, 5 ივლისის ფართომასშტაბიანი შემოტევა, მოულოდნელი არ ყოფილა. წინა დღეს, მოწინააღმდეგის დესანტმა, სოფელ ახალშენსა და „ზეგანის“ მთაზე განახორციელა შეტევა. ახალშენი აიღეს, „ზეგან“-ში დესანტი გადმოსხეს, მაგრამ ძლიერი წინააღმდეგობის გამო, დამატებითი ძალები არ დაახმარეს. ქართველებმა, ერთი ვერტმფრენი იმ დროს ჩამოაგდეს, როცა დესანტი მიწაზე ეშვებოდა. ამ დესანტიდან უკან გამობრუნებული ერთ-ერთი მებრძოლი, კამანელებმა, ტყვედ აიყვანეს. მისგან მიწოდებული ინფორმაციით გაირკვა, რომ ზემო ეშერაში განლაგებული იყო გენერალ ლებედის სპეცდანიშნულების 1500 კაციანი რაზმი, რომელიც მეორე დღეს, 5 ივლისს, სამად დაიყოფოდა და მასშტაბური იერიშით აიღებდა კამანს, შემდეგ შრომას და იქ დაიკავებდა პოზიციებს. შრომა მაღლობზეა და შრომის აღების შემდეგ, სოხუმის აღება, ძალიან ადვილი გახდებოდა.

ამ ვითარებაში, კამანელებისთვის სოფელში დარჩენა სიკვდილის ტოლფასი იყო, თუმცა, არც ერთ მათგანს უფიქრია გაქცევა, პირიქით, მებრძოლებს მათი მეუღლეები, დები გვერდით დაუდგნენ და ბრძოლაში მათ ტოლს არ უდებდნენ. განსაკუთრებით აღსანიშნავია სვანი ქალბატონის, მერი პაკელიანის გმირობა, რომელმაც ტყვედ ჩავარდნას, სიკვდილი არჩია_ტაძრის ეზოში გახსნა ხელყუმბარა, თავი აიფეთქა და თან 4 ბოევიკიც გამოასალმა სიცოცხლეს. მტერმა არც მონასტრის წინამძღვარი, მღვდელმონაზონი ანდრია (ყურაშვილი) დაინდო; მტრის კითხვაზე-_ვისია ეს მიწაო, ბერმა უპასუხა: ‘’ეს მიწა ღვთისააო’’, რის გამოც, იგი, ეკლესიის ეზოში სიცოცხლეს გამოასალმეს! მათ არც მონასტრის აღმდგენი, ეროვნებით აფხაზი, სამაგალითო მამულიშვილი, იური (გიორგი) ანუა დაინდვეს და დახვრიტეს.
თავგანწირული ბრძოლის მიუხედავად, საკუთარი სოფლის შენარჩუნება, კამანელებმა, ვერ შესძლეს; მოწინააღმდეგემ, სოფელში გადარჩენილი ქართველები, ტყვედ აიყვანა და სასტიკად გაუსწორდა. აფხაზების თქმით, ერთ-ერთი სახლიდან, მთელი დღის განმავლობაში ისროდა ვიღაც, სანამ ის სახლიც არ ააფეთქეს.

კამანში დაღუპული გმირები: მღვდელმონაზონი ანდრია (ყურაშვილი), ური (გიორგი) ანუა, ზაზა პაკელიანი, მერი პაკელიანი, ავთო კახიანი, ვლადიმერ კახიანი, ელგუჯა გვიჩიანი, ადამ (ედიკა) გვიჩიანი, გოგი გურჩიანი, ზურაბ გურჩიანი, მალხაზ კახიანი, ალექსანდრე გამსახურდია, ვალო ჩხეტიანი, ეგნატე კვიციანი, ზური გიორბელიძე, მერაბ ჩხეტიანი, მურთაზ ჩხეტიანი, ინდიკო ჩხეტიანი, რევაზ კვანჭიანი, შოთა კვანჭიანი, გუნდიერ გულედანი, გენადი გადრანი, თამაზ ჩხეტიანი, ანზორ სუბელიანი.
#დიდებაგმირებს! 

4 ოქტომბერი არის დე ფაქტო ხელისუფლების წინააღმდეგ დე ფაქტო არჩევნებში ბრძოლა, ეს არის მოქალაქის ინდივიდუალური პროტესტი და განაჩენი რეჟიმისადმი, ჩვენ შევდივართ ამ ბრძოლაში -მამუკა ხაზარაძე

დღეს კოალიცია „ძლიერი საქართველო“ ოფიციალურად და დეკლარირებულად იწყებს ბრძოლას საქართველოს თითოეული მოქალაქისთვის, თითოეული ადამიანის უფლებისთვის, თითოეული ახალგაზრდის მომავლისთვის და თითეული ხანდაზმულის კეთილდღეობისთვის, ჩვენ შევდივართ ბრძოლაში, – ამის შესახებ „ლელოს“ ერთ-ერთი ლიდერი მამუკა ხაზარაძე სოციალურ ქსელში წერს.

მისი თქმით, დანაშაულია ამ არჩევნების ადგილობრივ არჩევნებად იდენტიფიცირება, 4 ოქტომბერი არის დე ფაქტო ხელისუფლების წინააღმდეგ დე ფაქტო არჩევნებში ბრძოლა.

„სამწუხაროდ, საქართველოს ე.წ. პრეზიდენტი არის მასხარა! გუშინ ივანიშვილის სათამაშოს მიერ გაკეთებული ვაჭრული შეთავაზება იყო „კაგებეს“ და სუს-ის დაგეგმილი ავანტიურა „ძლიერი საქართველოს“ წინააღმდეგ! დღევანდელი ეს ღონისძიება დაიგეგმა რამდენიმე დღის წინ, მოხდა პარტიის რეგიონული ლიდერების ინფორმირება და თბილისში მოწვევა, ანონსი დაიგზავნა მედიაში და გატარდა შესაბამისი ღონისძიებები, რათა ჩვენ გაგვეხმოვანებინა პარტიის საბოლოო გადაწყვეტილება. სწორედ იმიტომ, რომ ხელი შეეშალათ ჩვენთვის, სწორედ იმიტომ, რომ ივანიშვილს და „ქართულ ოცნებას“ეშინია პროდასავლური ოპოზიციის ჩართვის ამ ბრძოლაში, ივანიშვილის პრეზიდენტმა გუშინ დადგა ის მაკარადი, რაც ჩვენ ვიხილეთ. სულ ტყუილად, „ძლიერ საქართველოს“აქვს თავისი გეგმა, „ძლიერ საქართველოს“ აქვს თავისი გზა, რომელიც ქართველი ხალხის, საქართველოს მოქალაქეების ინტერესებს ემსახურება და ამ გზიდან ვერავინ გადაგვიყვანს, განსაკუთრებით „ქართული ოცნება“, „კაგებე“, სუს-ი და ივანიშვილის სათამაშო პრეზიდენტი. ერთადერთი გზა, რაც დღეს ჩვენ ივანიშვილის რუსულ ოლიგარქიული რეჟიმის წინააღმდეგ გვაქვს, არის ბრძოლა! ბრძოლა ყველა შესაძლო მიმართულებით და ყველა შესაძლო ველზე!

ბრძოლა ქუჩაში – აქციებით, პროტესტით, დაუმორჩილებლობით! ბრძოლა საერთაშორისო ასპარეზზე – არაღიარებით, სანქციებით, იზოლაციით! ბრძოლა არჩევნებში – 3000 ახალი პროტესტის კერის გაჩენით, დაპირისპირების ახალი კერების შექმნით, პროტესტის ახალი ენერგიის მობილიზებით! საქართველოს თითოეული მოქალაქის ინტერესის დაცვა და ყველა ადამიანისთვის პროტესტის გამოხატვის უფების მიცემა – ეს არის ჩვენი, პოლიტიკოსების და პოლიტიკური პარტიების ვალდებულება და ამოცანა.

დღეს კოალიცია „ძლიერი საქართველო“ აკეთებს თავის განაცხადს. დღეს კოალიცია „ძლიერი საქართველო“ ოფიციალურად და დეკლარირებულად იწყებს ბრძოლას საქართველოს თითოეული მოქალაქისთვის, თითოეული ადამიანის უფლებისთვის, თითოეული ახალგაზრდის მომავლისთვის და თითეული ხანდაზმულის კეთილდღეობისთვის – ჩვენ შევდივართ ბრძოლაში. ჩვენ შევდივართ დიქტატურის და რუსული რეჟიმის წინააღმდეგ კიდევ ერთ წინააღმდეგობაში.

აქვე, მინდა, მივმართო პროდასავლურ ოპოზიციას, ჩვენ ერთიანი მიზანი გვაქვს – ამ რეჟიმის დასრულება. პატივს ვცემთ ყველა ოპოზიციური პარტიის არჩევანს. თუმცა ჩვენ ვირჩევთ ბრძოლას კიდევ ერთ დამატებით ველზე. რაც ყველაზე მთავარია, პროევროპულ ოპოზიციურ პარტიებს ერთი მიზანი გვაქვს, რეჟიმის დამარცხება.

როგორც გამოჩნდა, სტრატეგია ავირჩიეთ სხვადასხვა. ჩვენ, „ძლიერი საქართველო“ მზად ვართ სრული ჩართულობისთვის და სრული თანამონაწილეობისთვის, ისევე როგორც აქამდეც ტოტალურად და სრული რესურსით ვიყავით ჩართული პროტესტში და ქუჩის აქტივისტურ წინააღმდეგობაში. ჩვენი მხრიდან ეს ბრძოლა და პროტესტი გაძლიერდება!

აქვე, მზად ვართ და ვთავაზობთ პროდასავლურ ოპოზიციას, გავაძლიეროთ ერთმანეთი ჩვენს ბრძოლებში, მზად ვართ ერთობისთვის პროდასავლურ ოპოზიციასთან და მზად ვართ კოალიციური მუშაობისთვის!

დანაშაულია ამ არჩევნების ადგილობრივ არჩევნებად იდენტიფიცირება. 4 ოქტომბერი არის დე ფაქტო ხელისუფლების წინააღმდეგ დე ფაქტო არჩევნებში ბრძოლა, ეს არის საქართველოს თითოეული მოქალაქის ინდივიდუალური პროტესტი და განაჩენი რეჟიმისადმი! რეჟიმის წინააღმდეგ ჩვენი ბრძოლა ერთობლივად მოსაგებია“, – წერს მამუკა ხაზარაძე.

ევროკავშირი მომდევნო კვირაში ისრაელის წინააღმდეგ სანქციების დაწესების წინადადებით გამოვა -EURACTIV

ევროკავშირი მომდევნო კვირაში ისრაელის წინააღმდეგ სანქციების დაწესების წინადადებით გამოვა, – ამის შესახებ „ევროაქტივი“ წერს.

როგორც გამოცემა წერს, ევროკავშირის საგარეო ქმედებათა სამსახური აპირებს, გამოვიდეს წინადადებით, რომელიც ღაზის სექტორში ადამიანის უფლებების დარღვევის გამო ისრაელის წინააღმდეგ სანქციების დაწესებას ითვალისწინებს.

როგორც ვარაუდობენ, ევროკავშირის საგარეო უწყების წინადადება მოიცავს ისრაელთან ასოცირების შეთანხმების სრულად ან ნაწილობრივ შეჩერებას, ან ისრაელისთვის შეიარაღების მიწოდებაზე ემბარგოს დაწესებას.

სხვა ნაბიჯები, რომლებიც ევროკავშირში განიხილება, ასევე ითვალისწინებს ცალკეული თანამდებობის პირების მიმართ სანქციების დაწესებას, სავაჭრო შეზღუდვებს და ევროკავშირსა და ისრაელს შორის მეცნიერების სფეროში თანამშრომლობის შეჩერებას.

აღნიშნული ზომების უმეტესობა ევროკავშირში უკვე განიხილებოდა, თუმცა ეს იქნება პირველი შემთხვევა, როდესაც ევროპის საგარეო ქმედებათა სამსახური ოფიციალურად წარადგენს ისრაელის წინააღმდეგ სანქციების წინადადებას.

„ევროაქტივის“ ცნობით, ევროკავშირის საგარეო საქმეთა მინისტრები საკითხზე 15 ივლისს დაგეგმილ ევროპული საბჭოს სხდომაზე იმსჯელებენ.

123...2,858Page 1 of 2,858
ჩვენი არქივი

კონტაქტი

მის: ქ.თბილისი, მ.კოსტავას 59

ტელ: +995 32 93 44 05

ელ.ფოსტა: editor@geotimes.ge

ნავიგაცია

ონლაინ გაზეთი Geotimes.ge

დამატებითი რესურსი