„როცა გასვლით შეხვედრაზე ძალიან მეგობრულად მიგიღეს, კარგი დახვედრა მოგიწყვეს, რას ერჩოდი ამ ხალხს? არ იყო სწორი ქმედება“, – ამის შესახებ დედაქალაქის მერმა გადაცემა „ღამის კურიერში“ სტუმრობისას ისაუბრა.

კახა კალაძე კიდევ ერთხელ გამოეხმაურა „დინამო არენაზე“ საქართველო-სომხეთის მატჩზე მომხდარ ინციდენტს და აღნიშნა, რომ მსგავსი საქციელი დასაგმობია.

„ცხადია, არ იყო სასიამოვო სანახავი. ძალიან ბევრი კომენტარი მოვისმინეთ ამასთან დაკავშირებით. ბევრმა აბსოლუტურად სხვა მიმართულებით წაიყვანა თემა, რაც არავითარ შემთხვევაში არ უნდა დავუშვათ. თუნდაც საუბარი იმაზე, რომ ეს ჩვენს ძმობას, მეგობრობას აზიანებს. ამ კონტექსტში არ უნდა განვიხილოთ. ფაქტი აუცილებლად დასაგმობია. კატეგორიულად მიუღებელია მსგავსი ქმედება. როცა გასვლით შეხვედრაზე ძალიან  მეგობრულად მიგიღეს, კარგი დახვედრა მოგიწყვეს, რას ერჩოდი ამ ხალხს? არ იყო სწორი ქმედება. ამ ტიპის ქმედებები დამაზიანებელია.  შესაძლოა, შემდეგი თამაშები გულშემატკივრის გარეშე ჩატარდეს და მაყურებელს დასწრება აუკრძალონ. ვიმედოვნებთ, რომ უეფა ამ ტიპის გადაწყვეტილებას არ მიიღებს.

კიდევ ერთხელ მივმართავ ჩვენს სომეხ და-ძმებს – მათ მეგობრობას და ძმობას ვუდასტურებთ. რამდენიმე ადამიანის უგუნური ქმედება ამ ურთიერთობას ვერ შეცვლის“, – აღნიშნა კახა კალაძემ.

ამასთან, თბილისის მერმა მადლობა გადაუხადა ეროვნული ნაკრებს იმისთვის, რომ ბოლო ორ თამაშში მაღალი კლასი აჩვენეს.

„ჩვენს ბიჭებს კიდევ ერთხელ მივულოცავ ამ საოცარ გამარჯვებას. ორივე შეხვედრაში გუნდმა მაღალი კლასი აჩვენა და ეს, რა თქმა უნდა, თითოეული ფეხბურთელის, მთავარი მწვრთნელის, ფეხბურთის ფედერაციის დამსახურებაა. უღრმესი მადლობა მინდა გადავუხადო ქართველ გულშემატკივარს. მე ერევანშიც ვიმყოფებოდი თამაშზე და იქ ნამდვილად არ იგრძნობოდა ის, რომ ნაკრები გასვლით შეხვედრას ატარებდა. იმდენი გულშემატკივარი იყო თითქოს, თბილისში ვთამაშობდით“, – განაცხადა კახა კალაძემ.

ხაზარაძე-ჯაფარიძის ნებაზე არ არის დამოკიდებული საგამოძიებო კომისიის მუშაობა. თუ თავს აარიდებენ საგამოძიებო კომისიაში მონაწილეობას, მათ მიმართ, როგორც დამნაშავე პირთა მიმართ, შესაბამისი სანქცირების გამოყენება მოხდება, – განაცხადა „დღის ქრონიკაში“ რადიკალურ ოპოზიციაზე საუბრისას საპროცედურო საკითხთა და წესების საპარლამენტო კომიტეტის თავმჯდომარემ, დავით მათიკაშვილმა.

წამყვანმა მას გკითხა, რას ფიქრობს იმაზე, რომ საგამოძიებო კომისიის სხდომაზე დაბარებულები არიან მამუკა ხაზარაძე და ბადრი ჯაფარიძე და რამდენად შეაფერხებს მათი გამოუცხადებლობა კომისიის სრულფასოვან მუშაობას.

„საგამოძიებო კომისია ამ ეტაპზე დაკავებულია სწორედ ბიზნესის რეკეტის და ამ ჭრილში ადამიანის უფლებების უმძიმესი დარღვევის ფაქტებით. ჩვენ ხარძიანის ძალიან მძიმე საქმე მოვისმინეთ ცოტა ხნის წინ. იგეგმება ასევე ბიზნესის წართმევის სხვა ფაქტების გამოძიება. ის, რომ ხაზარაძეს და ჯაფარიძეს სურთ არ მიიღონ მონაწილეობა იმ პროცესში, რომელიც კიდევ ერთხელ გამოავლენს მათ მიერ საკუთარი ქვეყნის წინააღმდეგ, სადისტური რეჟიმის სასარგებლოდ ჩადენილ გარემოებებს, ეს გასაგებია, მაგრამ სისხლის სამართლის კოდექსი პირდაპირ ითვალისწინებს მუხლს, სადაც შავით თეთრზე წერია, რომ თუ არ დაემორჩილები კომისიის მოთხოვნას, სისხლის სამართლის პასუხისმგებლობა დაგეკისრება და ჯარიმის გარდა, პატიმრობასაც ითვალისწინებს. ხაზარაძე-ჯაფარიძის ნებაზე არ არის დამოკიდებული საგამოძიებო კომისიის მუშაობა. თუ თავს აარიდებენ საგამოძიებო კომისიაში მონაწილეობას, მათ მიმართ, როგორც დამნაშავე პირთა მიმართ, შესაბამისი სანქცირების გამოყენება მოხდება“, – აღნიშნა მათიკაშვილმა.

საპარლამენტო დელეგაციის წევრები სერბეთში შეხვედრებს მართავენ.

საგარეო ურთიერთობათა კომიტეტის თავმჯდომარე ნიკოლოზ სამხარაძე დეპუტატებთან ერთად, სერბ კოლეგას შეხვდა. სამხარაძემ ბელგრადში პარლამენტის კომიტეტების თავმჯდომარეებთან დაგეგმილ სხვა შეხვედრებზეც ისაუბრა.

„ასევე შეხვედრები გვექნება ევროპასთან ინტეგრაციის კომიტეტის თავმჯდომარესთან. ხვალ დაგეგმილია თავდაცვისა და განათლების კომიტეტების თავმჯდომარეებთან შეხვედრა. შევხვდებით საგარეო საქმეთა მინისტრსა და პრეზიდენტის საგარეო მრჩეველს.

საქართველოსა და სერბეთს გააჩნიათ საკმაოდ ბევრი საერთო მახასიათებელი. ორივე ვართ ევროკავშირის წევრობის კანდიდატი ქვეყნები. ჩვენ საბოლოო, საგარეო-პოლიტიკური ამოცანა არის ევროკავშირში წევრობა. ასევე, ორივე ქვეყანას აქვს ტერიტორიული მთლიანობის პრობლემა. გამოწვევებია პოლარიზაციასთან დაკავშირებით. ჩვენ გვაქვს ძალიან კარგი პოლიტიკური ურთიერთობები, რომელიც უნდა გადაითარგმნოს უფრო მეტ დაახლოებაში.

გვსურს, რომ თბილისში გაიხსნას სერბეთის საელჩო. გვსურს, რომ საქართველოს დიპლომატიური წარმომადგენლობა სერბეთში უკვე გადაიქცეს სრულფასოვან საელჩოდ. გვაქვს ეკონომიკურ საკითხებზე პერსპექტივები, რომ გავზარდოთ ვაჭრობა, ტურიზმი, ხალხთა შორის მიმოსვლა“, – განაცხადა სამხარაძემ.