რუსეთის დედაქალაქი და მოსკოვის ოლქი გასული ღამის განმავლობაში უკრაინული უპილოტო საფრენი აპარატების მასშტაბური თავდასხმის სამიზნე გახდა, რის გამოც სამ წამყვან აეროპორტში ფრენები დროებით შეაფერხეს.

მოსკოვის მერ სერგეი სობიანინის განცხადებით, დედაქალაქის მიმართულებით 600-ზე მეტი დრონი იქნა გაშვებული. მისივე მტკიცებით, რუსეთის საჰაერო თავდაცვის ძალებმა მოსკოვთან მიახლოებისას 200-ზე მეტი დრონის ჩამოგდება შეძლეს, თუმცა თავდასხმის ტალღები რამდენიმე საათის განმავლობაში, უწყვეტად მიმდინარეობდა.

რუსეთის საჰაერო ტრანსპორტის ფედერალურმა სააგენტომ ("როსავიაცია") ფრენებზე შეზღუდვები დააწესა ვნუკოვოს, დომოდედოვოსა და ჟუკოვსკის აეროპორტებში. შეზღუდვების გამო, სტამბოლიდან მოსკოვის მიმართულებით მიფრინავმა ორმა თვითმფრინავმა კურსი შეცვალა და უკან გაბრუნდა.

 დამოუკიდებელი რუსული მედიასაშუალებების ცნობით, ძლიერი აფეთქებების სერია დაფიქსირდა ქალაქ ნარო-ფომინსკთან, რომელიც მოსკოვის სამხრეთ-დასავლეთით მდებარეობს.

ოფიციალური უწყებების განცხადებით, ნგრევისა და მსხვერპლის შესახებ ინფორმაცია ამ დროისთვის არ გავრცელებულა. ეს ოქტომბრის თვეში მოსკოვის საჰაერო სივრცეზე განხორციელებული უკვე მერვე მასშტაბური თავდასხმაა.