ხვალიდან ბაქო-თბილისი-ბაქოს მიმართულებით მატარებლის ბილეთები გაიაფდება, რეისების რაოდენობა კი გაიზრდება.

ამის შესახებ ინფორმაციას აზერბაიჯანის რკინიგზა ავრცელებს.

კომპანიის ცნობით, საერთაშორისო მიმართულებით მგზავრთა მზარდი მოთხოვნის დაკმაყოფილებისა და მგზავრობის შესაძლებლობების გაფართოების მიზნით, ბაქო-თბილისი-ბაქოს მარშრუტზე ყოველდღიურად 4 რეისი შესრულდება. შედეგად, მგზავრთა ადგილების რაოდენობა 386-დან 564-მდე გაიზრდება, რაც დაახლოებით 50%-იან ზრდას ნიშნავს.

დამატებითი რეისების დანიშვნით მგზავრებს უფრო ხელმისაწვდომ ფასად გადაადგილების შესაძლებლობა ექნებათ. კერძოდ, ახალ რეისებზე სტანდარტული კლასის ბილეთების ღირებულება 36 აზერბაიჯანული მანათიდან დაიწყება.

ახალი, დაბალბიუჯეტიანი შეთავაზების ფარგლებში მგზავრები 30%-ით იაფად შეძლებენ გადაადგილებას.