ტრანსატლანტიკური ალიანსი ფართოვდება რუსეთისკენ და არა – პირიქით, ამიტომ მოსკოვი საკუთარი უსაფრთხოების დასაცავად დგამს ნაბიჯებს, – ასე გამოეხმაურა რუსეთის პრეზიდენტის პრესსპიკერი დიმიტრი პესკოვი ნატო-ს გენერალური მდივნის, იენს სტოლტენბერგის განცხადებას.
საუბარია იენს სტოლტენბერგის განცხადებაზე, რომლის მიხედვითაც, რუსეთის მიერ ბელარუსში ბირთვული იარაღის განთავსების შესახებ განცხადება აჩვენებს, რომ ჩინეთისა და რუსეთის ერთობლივი განცხადება ცარიელი დაპირებებია.
„ნატო აფართოებს თავის საზღვრებს რუსეთთან და არა – რუსეთი, რომელიც თითქოს საკუთარი სამხედრო ინფრასტრუქტურის ნატო-ს საზღვრებთან განთავსებას ცდილობს“, – აღნიშნა პესკოვმა.
რუსეთს ტაქტიკური ბირთვული იარაღის ბელარუსში გადატანის ზუსტი თარიღი არ დაუსახელებია, მაგრამ, პუტინის თქმით, საწყობების მშენებლობა ივლისის ბოლოს უნდა დასრულდეს. საბჭოთა კავშირის დაშლის შემდეგ ეს იქნება რუსეთის ბირთვული არსენალის პირველი განლაგება მის საზღვრებს გარეთ.
