“საჭიროა ომის დასრულება, ვიდრე ნატო თავის რიგებში უკრაინის დამატებას განიხილავს” – ბაიდენი

82
spot_img

ამერიკის პრეზიდენტის, ჯო ბაიდენის განცხადებით, უკრაინა ჯერ მზად არ არის ნატო-ში გაწევრიანებისთვის. მისივე თქმით, საჭიროა ომის დასრულება, ვიდრე ალიანსი თავის რიგებში უკრაინის დამატებას განიხილავს.

აღნიშნულის შესახებ ბაიდენმა „სიენენთან“ ექსკლუზიურ ინტერვიუში განაცხადა.

„არ მგონია, რომ ნატო-ში არის ერთსულოვნება იმასთან დაკავშირებით, შევიდეს თუ არა უკრაინა ნატო-ს ოჯახში ახლა, ამ მომენტში, ომის შუაგულში“, – აღნიშნა ბაიდენმა.

აშშ-ის პრეზიდენტის თქმით, ის ვოლოდიმირ ზელენსკის ვრცლად ესაუბრა უკრაინის მხარდაჭერის საკითხზე და აღნიშნა, რომ აშშ განაგრძობს უკრაინის უსაფრთხოებისა და იარაღით უზრუნველყოფას რუსეთთან ომის დასასრულებლად, მიუხედავად იმისა, რომ ნატო-ში უკრაინის წევრობის შესახებ განხილვის დაწყება ნაადრევი იყო.

ამასთან, ბაიდენმა უკრაინისთვის კასეტური საბრძოლო მასალის გადაცემის საკითხზე საუბრისას განაცხადა, რომ რთული გადაწყვეტილება იყო, თუმცა დარწმუნებულია, რომ ეს უკრაინისთვის აუცილებელია, რადგან ქვეყანას საბრძოლო მასალა ამოეწურა.

შეგახსენებთ, 7 ივლისს თეთრ სახლში განაცხადეს, რომ აშშ უკრაინას კასეტურ საბრძოლო მასალას გადასცემს.