რუსეთმა კრემლზე თავდასხმა, სავარაუდოდ, თავად მოაწყო – ISW

89
spot_img

რუსეთმა კრემლზე თავდასხმა, სავარაუდოდ, თავად მოაწყო, რათა ფართო საზოგადოებრივი მობილიზაციისთვის პირობები შეექმნა, – ამის შესახებ ომის შემსწავლელი ინსტიტუტი (ISW) იუწყება.

ISW-ის ანალიტიკოსების განცხადებით, რუსეთის ხელისუფლებამ ახლახან მიიღო ზომები საჰაერო თავდაცვის გასაძლიერებლად, განსაკუთრებით მოსკოვში და ამიტომ ნაკლებად სავარაუდოა, რომ ორ დრონს საჰაერო თავდაცვის რამდენიმე ფენის გადაკვეთა და კრემლამდე მიღწევა შეძლებოდა.

გარდა ამისა, 2023 წლის იანვრის შემდეგ რუსეთის ხელისუფლებამ მოსკოვის ცენტრში „პანცირის“ საზენიტო სარაკეტო კომპლექსები განათავსა. ასეთი საჰაერო თავდაცვის ტექნიკას კი უპილოტო საფრენი აპარატების აღმოჩენა და განადგურება წამებში შეუძლია.

„კრემლის დაუყოვნებელი, შეთანხმებული და კოორდინირებული რეაგირება ინციდენტზე მიუთითებს იმაზე, რომ თავდასხმა ქვეყნის შიგნით მომზადდა“, – ნათქვამია მოხსენებაში.

ექსპერტები აღნიშნავენ, რომ კრემლმა დაუყოვნებლივ დაადანაშაულა უკრაინა ტერაქტში და ოფიციალური პირების განცხადებები სწრაფად დაემთხვა ამ ბრალდებას.

„დრონის თავდასხმა შიგნიდან რომ არ ყოფილიყო მოწყობილი, ეს მოულოდნელი იქნებოდა. ასევე, სავარაუდოა, რომ რუსეთის ოფიციალური პასუხი თავიდან გაცილებით არაორგანიზებული იქნებოდა. მაგალითისთვის, კრემლმა ვერ უზრუნველყო დროული და თანმიმდევრული პასუხი გაცემა ბალაკლიასა და ხერსონის დაკარგვაზე 2022 წლის სექტემბერსა და ნოემბერში“, – აღნიშნულია ანგარიშში.

ISW-ის ექსპერტების თქმით, კრემლს შეუძლია, რომ მომხდარი ფაქტი 9 მაისის ღონისძიების გაუქმების ან შემდგომი შეზღუდვების გასამართლებლად გამოიყენოს.