პარლამენტის ვიცე-სპიკერი ნინო წილოსანი მიიჩნევს, რომ ნიკა გვარამიამ მის მიერ გაკეთებული განცხადებებით კახელები განსაკუთრებით შეურაცხყო.

წილოსანმა კომენტარი გააკეთა იმ ფაქტზე, რომ ნიკა გვარამიას დღეს კახეთში საკუთარი პარტიის წინასაარჩევნო შეხვედრაში მონაწილეობა არ მიუღია.

„ნიკა გვარამიამ შეურაცხყო თითოეული ადამიანი, თითოეული კუთხე და განსაკუთრებით ეს კახელების მიმართ იყო გაცხადებული. კახელების იმედი მაქვს, კარგა ხანი არ მისცემენ მას საშუალებას, რომ თავისი პოლიტიკური მიზნებით შევიდეს კახეთში. ყველამ კარგად დაინახა რა იდენტობის და რა შინაარსის მატარებელია გვარამია თავისი პარტნიორებითა და თანაგუნდელებით“, – აღნიშნა წილოსანმა.

ნიკა გვარამია კახეთში საკუთარი პარტიის წინასაარჩევნო შეხვედრაში არ მონაწილეობს. პარტიის სხვა წევრებს არ სურთ პასუხის გაცემა კითხვაზე, რატომ ვერ ჩავიდა გვარამია კახეთში.

„ქართული ოცნების“ ამოცანაა, საზოგადოებას უთხრას დაუჯერებელი ტყუილი, „ამას ხომ არ მოიტყუებიანო“, დაახლოებით ასეთი რამ, – ამის შესახებ “გირჩის” დეპუტატმა იაგო ხვიჩიამ ჟურნალისტებს “ქართული ოცნების” წინასაარჩევნო პროგრამასთან დაკავშირებით განუცხადა.

მისი აზრით, “ოცნების” პროგრამა ემსახურება იმას, რომ დაპირებების არშესრულება იმას დააბრალონ, რომ “ქართველმა ხალხმა საკონსტიტუციო უმრავლესობა არ მისცა”.

„ქართული ოცნების” ამოცანაა საზოგადოებას უთხრას დაუჯერებელი ტყუილი. დაუჯერებელი იმ გაგებით, რომ ხალხმა ვერ დაიჯეროს, რომ ეს ტყუილია. „ამას ხომ არ მოიტყუებიან“ – დაახლოებით ასეთი რამ უნდათ, მაგრამ ყველაფერი მცდარია – თუ “ნაციონალური მოძრაობის” გასამართლება გინდოდა და ამისთვის ითხოვ საკონსტიტუციო უმრავლესობას, ეს გქონდა და “ნაციონალური მოძრაობა” არ გაგისამართლებია; ასევე, საკონსტიტუციო უმრავლესობას ითხოვ იმისთვის, რომ აფხაზეთი დაიბრუნო. შეგიძლია აფხაზეთი დაიბრუნო და ვინც არ დაგიჭერს მხარს საკონსტიტუციო უმრავლესობით, იმათ დასასჯელად ჩაატარო რიგგარეშე არჩევნები და ყველა ბარიერს მიღმა დარჩება შენ გარდა. ასევე გეების საფრთხის მოსახსნელად – არ ვიცი, საქართველოში ეს საფრთხე სად შეამჩნიეს, მაგრამ თუ დღევანდელი კონსტიტუცია ქართულ საზოგადოებაში გეების მოჭარბების საფრთხეს ქმნის, ეს კონსტიტუციაც მათი მიღებულია, ამიტომ ვერავის დააბრალებენ, კონსენსუსზე წავედით ვინმესთანო“, – განაცხადა იაგო ხვიჩიამ.

გარდა ამისა, ხვიჩია გამოეხმაურა, ერთი მხრივ, რუსეთის საგარეო დაზვერვის განცხადებას, რომ ამერიკელები საქართველოში რევოლუციას გეგმავენ და მეორე მხრივ „ქართული ოცნების“ შეფასებას, რომ მსგავსი განცხადება მხოლოდ ჩრდილოეთიდან არ კეთდება. ხვიჩიას შეფასებით, ხელისუფლების აღნიშნული არგუმენტი არაა ისეთი, რომ ნორმალურმა ადამიანმა მხარი დაუჭიროს.

„როდესაც არგუმენტად მოგყავს, რომ არა მხოლოდ რუსეთია ჩემს გვერდით, არამედ ჩინეთიც ჩემთანაა, ეს სხვა სტილის არგუმენტია, ვიდრე ისეთი, რომ ნორმალურმა ადამიანმა მხარი დაუჭიროს. ნორმალურ ადამიანს ეუბნები, რუსეთი და ჩინეთი ჩემი არგუმენტის გვერდით არიან და ამაში მხარი დამიჭირეო?! თავიდან ვთვლიდი, რამე ხომ არ დაუშავეს „ქოცებმა“ რუსებს, რომ ისეთი განცხადება გამოაქვეყნეს, რომ “ქართული ოცნებისთვის” მომგებიანი არ იყო, მაგრამ მერე თვითონ რომ დაეთანხმნენ ამას, უცნაურია, რადგან ეს მათ სასარგებლოდ არ უნდა მუშაობდეს ამ საზოგადოებაში“,- განაცხადა ხვიჩიამ.

დღეს ჩვენ მაქსიმალურად გვჭირდება მშვიდობის შენარჩუნება. ერთადერთი პოლიტიკური ძალა, რომელსაც ამის რეალური ძალა და სურვილი აქვს, ეს „ქართული ოცნებაა“, – ამის შესახებ დედაქალაქის მერმა, კახა კალაძემ „ქართული ოცნების“ ლიდერების საარჩევნო გზავნილებზე საუბრისას განაცხადა.

მისი თქმით, პრაგმატული პოლიტიკა, რომელსაც მმართველი პარტია ატარებს, ქვეყანას ტერიტორიული მთლიანობის აღდგენამდე მიიყვანს, რა საკითხზეც ხელისუფლება აქტიურად მუშაობს.

„სამწუხარო მოცემულობა გვაქვს. ჩვენ გვახსოვს მთელი თვეების განმავლობაში, როგორი მოწოდებები მოდიოდა მეორე ფრონტთან დაკავშირებით, სანქციებთან დაკავშირებით, საუბარი იმაზე, რომ ურჩევნიათ ბომბები ცვიოდეს, ასეთი პოლიტიკისა და განცხადებების მაგივრად და ა.შ. ეს საფრთხეები არსად წასულა, ჯერაც არსებობს, იმის გათვალისწინებთ, თუ რა ხდება რეგიონსა თუ მსოფლიოში. შესაბამისად, დღეს ჩვენ მაქსიმალურად გვჭირდება მშვიდობის შენარჩუნება. ერთადერთი პოლიტიკური ძალა, რომელსაც ამის რეალური ძალა და სურვილი აქვს, ეს ‘ქართული ოცნებაა“.

ერთ-ერთი მთავარი პრიორიტეტი, რომელიც „ქართულ ოცნებას“ გააჩნია და ემთხვევა თითოეული ქართველის განწყობასა და ფიქრს, ვისაც ეს ქვეყანა უყვარს, ეს არის ტერიტორიული მთლიანობა. დღევანდელ მოცემულობაში ყველაფერი შესაძლებელია და ჩვენი პრაგმატული პოლიტიკა მიმართულია იქითკენ, რომ მოვახერხოთ ტერიტორიული მთლიანობის აღდგენა და თანაცხოვრება ჩვენს დებთან და ძმებთან, ოსებთან და აფხაზებთან.

ყველა ხედავს თუ რა ვითარებაა ქვეყანაში, „ნაციონალური მოძრაობა“, რომელიც კოლექტიური სახით არის წარმოდგენილი, გარედან იმართება. მათ თავიანთი ინტერესები აქვთ, რომელიც ქვეყნის ინტერესებთან აცდენაშია. მათ აქვთ კონკრეტული დავალებები. გვახსოვს თუ რა განცხადებებს აკეთებდნენ მეორე ფრონტთან, სანქციებთან დაკავშირებით. ამ ყველაფრით ისევ ჩვენი ქვეყნის მოსახლეობა დაზარალდებოდა. ამიტომ ეს საფრთხეები დღესაც არსებობს და გზავნილები, რომელიც გაჟღერებული იყო ბიძინა ივანიშვილისა და სხვა ლიდერების მხრიდან მნიშვნელოვანია. საზოგადოებას უნდა ჰქონდეს ინფორმაცია, თუ რა პროცესები მიმდინარეობს, არის საკითხები, რომლებზეც ღიად ვერ ვსაუბრობთ, თუმცა მოსახლეობა დღეს ნათლად ხედავს საფრთხეებს და გამოწვევებს. ამისთვის საჭიროა ერთიანობა, რომ დავიცვათ ამ ქვეყნის ინტერესი“, – განაცხადა კახა კალაძემ.

თუ შეთქმულების თეორიაა, რომ რუსეთი საკუთარი რიტორიკით ემთხვევა „ქართული ოცნების“ რიტორიკას, საინტერესოა, რატომ ვერ ვახერხებთ გავაფრთხილოთ ჩვენი „პარტნიორი“ რუსები, არ გააკეთონ ჩვენი მხარდამჭერი განცხადებები და არ დაგვაზიანონ? – ვერანაირი რიტორიკა ვერ იქნება გაიგივებული “ქართული ოცნების” პროქართულ იდეოლოგიასთან, – ამის შესახებ “ქართული ოცნების” დეპუტატმა ბექა ოდიშარიამ ჟურნალისტებს განუცხადა, რითაც უპასუხა შეფასებას, რომ “ქართული ოცნების” რიტორიკა, ემთხვევა რუსეთის განცხადებას, რომ ამერიკელები საქართველოში რევოლუციას გეგმავენ.

ოდიშარიას თქმით, რუსეთს თავისი გეოპოლიტიკური ინტერესები აქვს და ასეთივე ინტერესები იკითხება სხვა პოლუსებიდანაც.

„თუ შეთქმულების თეორია, რომ რუსეთი საკუთარი რიტორიკით ემთხვევა “ქართული ოცნების” რიტორიკას და მეორე მხრივ მხარს უჭერს “ქართული ოცნების”, ნამდვილად ქართული პარტიის, დაბრენდვას რუსულ პარტიად, რატომ ვერ ვახერხებთ გავაფრთხილოთ ჩვენი “პარტნიორი” რუსები, რომ არ გააკეთონ ჩვენი მხარდამჭერი განცხადებები და არ დაგვაზიანონ? იმაზე ვთანხმდებით, რომ ასეთი განცხადებები მხოლოდ “ქართულ ოცნებას” აზიანებს. მათ აქვთ თავიანთი პოლიტიკური დღის წესრიგი, რომელშიც ერთიანი, ძლიერი საქართველო არ შედის. ამას დიდი ანალიტიკა არ სჭირდება. რუსეთს თავისი გეოპოლიტიკური ინტერესები აქვს.

სამწუხაროდ, ასეთივე პოლიტიკური ინტერესები და მერკანტილური დამოკიდებულება საქართველოს მიმართ იკითხება არა მხოლოდ ჩრდილოეთ, არამედ სხვა პოლუსებიდანაც. სწორედ ამ საფრთხეებიდან თავის აცილების პოლიტიკას ატარებს “ქართული ოცნება”, რაც არავის აწყობს. შესაბამისად, ვერანაირი რიტორიკა, ვერ იქნება გაიგივებული “ქართული ოცნების” პროქართულ, პატრიოტულ, სუვერენულ იდეოლოგიასთან“, – განაცხადა ბექა ოდიშარიამ.

ცნობისთვის, რუსეთის საგარეო დაზვერვის განცხადებით, ამერიკელები საქართველოში „ფერად რევოლუციას“ ამზადებენ.

უწყების მტკიცებით, ამისათვის ქართული პროდასავლური არასამთავრობო ორგანიზაციები რეკრუტების დიდ რაოდენობას აგროვებენ, რათა ყურადღებით დააკვირდნენ ხმის მიცემის პროცესს. მათ ევალებათ „აუცილებელი ფაქტების“ იდენტიფიცირება და დაფიქსირება.

„ამერიკელები საქართველოში „ფერად რევოლუციას“ ამზადებენ. რუსეთის ფედერაციის საგარეო დაზვერვის სამსახურის პრეს-ბიურო იუწყება, რომ, მიღებული ინფორმაციის თანახმად, თეთრი სახლი უკიდურესად უკმაყოფილოა 26 ოქტომბრის საპარლამენტო არჩევნების წინ საქართველოში არსებული ვითარებით“, – აღნიშნულია განცხადებაში.