აშშ-ს წარმომადგენელთა პალატის მიერ უკრაინის დახმარების პაკეტზე კენჭისყრა გლობალური სენსაცია გახდა. როგორც ჰოლივუდურ ფილმში, ინტრიგა კენჭისყრის დასრულებამდე დარჩა. პრესამ წარმომადგენელთა პალატის გადაწყვეტილებას უკვე ისტორიული უწოდა და პოლიტიკურ ასპარეზზე ახალი გმირი გამოჩნდა – აშშ-ს წარმომადგენელთა პალატის სპიკერი მაიკ ჯონსონი.
აშშ-ს პრესაში ჯონსონს ადიდებენ მისი გამბედაობისთვის. აშშ-ს კონგრესში ტრამპისტები ემუქრებოდნენ ჯონსონს გადადგომის ინიცირებით, თუ ის უკრაინის დახმარების პაკეტს კენჭისყრაზე დააყენებდა. მაგრამ ჯონსონმა, მიუხედავად კარიერული რისკისა, გადადგა ეს ნაბიჯი.

The Washington Post-ის სარედაქციო სტატიაში აღნიშნულია, რომ უკრაინის, ისრაელისა და ტაივანისთვის დახმარების პაკეტების კენჭისყრით აშშ-ს მოკავშირეებმაა “შვებით ამოისუნთქეს”. მათ მიიღეს სიგნალი, რომ შეუძლიათ დაეყრდნონ აშშ-ს მხარდაჭერას რთულ დროს. გაზეთის რედაქცია აღნიშნავს, რომ აშშ-ის ლიდერობა მსოფლიოში არ იქნება წარმატებული ასეთი პოლიტიკური გამბედაობის გარეშე, რომელიც ჯონსონმა გამოიჩინა.

https://www.washingtonpost.com/opinions/2024/04/21/mike-johnson-ukraine-house-funding-bill-allies/
The Washington Post-ის მიმომხილველის კარენ ტუმულტის სტატიაში საუბარია იმაზე, თუ რამხელა გამბედაობა დასჭირდა ჯონსონს დახმარების პაკეტის კენჭისყრაზე გასატანად.

https://www.washingtonpost.com/opinions/2024/04/21/house-speaker-mike-johnson-courage/
ტელეარხის CNN-ის მიმომხილველი სტივენ კოლისონი იწყებს სტატიას კონგრესის კენჭისყრის შესახებ ჯონსონის გამბედაობაზე საუბრით.

https://edition.cnn.com/2024/04/20/politics/mike-johnson-ukraine-aid-russia-zelensky-putin/index.html
კიდევ ბევრი ასეთი მაგალითის მოყვანა შეიძლება. ფაქტია, რომ მაიკ ჯონსონი აღიარეს გმირად, რომელიც დრამატული პოლიტიკური ჩიხიდან გამოვიდა. ამერიკულ საზოგადოებას უყვარს გამარჯვებული. შეერთებული შტატების პოლიტიკურ ჰორიზონტზე ახალი ვარსკვლავი გაბრწყინდა – მაიკ ჯონსონი.

მაგრამ, სადაც არის გამარჯვებული, იქვე არის დამარცხებულიც. ამ შემთხვევაში ეს დონალდ ტრამპია. აშშ-ის ყოფილმა პრეზიდენტმა კონგრესში ექვსი თვით დაბლოკა უკრაინის დახმარება. ტრამპისტებმა სპიკერი კევინ მაკკარტიც კი გადააყენეს, რათა ხელი შეეშალათ უკრაინის დახმარებისთვის.

ახალი სპიკერი მაიკ ჯონსონი ტრამპის მარიონეტად ითვლებოდა, რომელიც მის ყველა მითითებას შეასრულებდა. რადგან ტრამპი ეწინააღმდეგებოდა უკრაინის დახმარებას, იმის შანსი, რომ ჯონსონი ამ საკითხს კენჭისყრაზე გაიტანდა, თითქმის ნულის ტოლფასად ითვლებოდა. მაგრამ ჯონსონი აკეთებს დამოუკიდებელ პოლიტიკურ ნაბიჯს ტრამპის ნების საწინააღმდეგოდ და ხდება გმირი.

ჯონსონის გმირობა გარკვეულ ახსნას მოითხოვს. ფაქტია, რომ აშშ-ს რესპუბლიკური პარტია ორ ბანაკად გაიყო: ტრამპისტ-იზოლაციონისტებად და რეიგანისტ-ინტერნაციონალისტებად. შეერთებულ შტატებში დღეს ხშირად იხსენებენ რონალდ რეიგანს, რომელიც ატარებდა ძლიერ საგარეო პოლიტიკას, რომელმაც შეძლო კომუნიზმის დამარცხება. მაშინ როცა დონალდ ტრამპს რესპუბლიკური პარტია ლოზუნგით „ამერიკა პირველ რიგში“ იზოლაციონიზმისკენ მიჰყავს.

ტრამპი წარმატებული პოპულისტი და დემაგოგია. რესპუბლიკურ პარტიაში მას კონკურენტები არ ჰყავდა. რესპუბლიკური პარტიის “ძველი გვარდია” ნიკი ჰეილის ეყრდნობოდა, მაგრამ მან პრაიმერი დონალდ ტრამპთან წააგო.

ტრამპის იზოლაციონისტური საგარეო პოლიტიკა უკრაინის ომისა და ახლო აღმოსავლეთში გაუარესებული სიტუაციის ფონზე საფრთხეს უქმნის შეერთებული შტატების ეროვნულ ინტერესებს. რესპუბლიკურ პარტიაში „რეიგანისტები“ ვერ შეეგუვნენ ამ მდგომარეობას. მათ დონალდ ტრამპის ახალი ალტერნატივა მაიკ ჯონსონში იპოვეს. უკრაინის, ტაივანისა და ისრაელისთვის დახმარების პაკეტის მიღების შემდეგ პრესა ჯონსონს „რეიგანისტების“ ლიდერს უწოდებს, რომელმაც ტრამპისტებს პოლიტიკური მარცხი მიაყენა.

უნდა აღინიშნოს, რომ ჯონსონმა კენჭისყრაზე წარადგინა კანონების საკუთარი ვერსიები და არა ის, რასაც ბაიდენის ადმინისტრაცია დაჟინებით მოითხოვდა. ეს ჯონსონის კანონებია. და ისინი უფრო მკაცრია, ვიდრე თეთრი სახლის მიერ შემოთავაზებული. გარდა უკრაინის დახმარებისა, ჯონსონმა დაამატა კანონი აშშ-ში რუსული აქტივების კონფისკაციის შესახებ, რომელიც ასევე გადაეცემა უკრაინის დახმარების ფონდს. საუბარია 6 მილიარდ დოლარზე. ეს არ არის ძალიან დიდი თანხა, მაგრამ ეს არის პრეცედენტი და სიგნალი ევროკავშირისთვის შესაბამისი კანონის მისაღებად. ევროპაში კი დაახლოებით 300 მილიარდი დოლარის რუსული აქტივების კონფისკაციაა შესაძლებელი.

ჯონსონმა ასევე დაამატა კანონი შეერთებულ შტატებში ჩინური მობილური აპლიკაციის Tik Tok-ის აკრძალვის შესახებ.

ტრამპი Tik Tok-ის აკრძალვის წინააღმდეგი იყო. ამრიგად, ჯონსონმა ტრამპისტებს რამდენიმე დარტყმა მიაყენა. მათ ბრძოლა ყველა თვალსაზრისით წააგეს.

ასეთი დიდი წარმატების შემდეგ, მაიკ ჯონსონი გახდა მნიშვნელოვანი პოლიტიკური ფიგურა. ჯონსონი პრესის და რესპუბლიკური პარტიის ელიტების მხარდაჭერით სარგებლობს.

პარალელურად, სასამართლოში დონალდ ტრამპის წინააღმდეგ საქმე განიხილება. არსებობს შესაძლებლობა, რომ ტრამპი მსჯავრდებული იყოს სისხლის სამართლის დანაშაულისთვის. ამ შემთხვევაში, ტრამპი ვერ შეძლებს არჩევნებში მონაწილეობას.

ტრამპი ოფიციალურად ჯერ არ არის რესპუბლიკური პარტიის საპრეზიდენტო კანდიდატი. კანდიდატის ოფიციალური წარდგენა უნდა მოხდეს რესპუბლიკური პარტიის ყრილობაზე. თუ ტრამპი რბოლას დატოვებს, მაშინ რესპუბლიკურ პარტიას ახალი გმირი ჰყავს – მაიკ ჯონსონი.

ავთანდილ წულაძე –პოლიტოლოგი, პოლიტოლოგიის დოქტორი

ევროპამ უნდა მიგვიღოს ისეთი, როგორებიც ვართ, ჩვენ მეგობრებს ვცნობთ, ვაღიარებთ, მაგრამ ქართველებს გვაქვს ჩვენი იდენტობა, ხასიათი, კულტურა, მენტალობა, რომლის წაშლას არ და ვერ დავუშვებთ, – ამის შესახებ საპარლამენტო უმრავლესობის ლიდერმა, „ქართული ოცნების“ აღმასრულებელმა მდივანმა მამუკა მდინარაძემ ჟურნალისტებთან განაცხადა.

მისივე თქმით, საქართველო ევროპაში კი არ უნდა შევიდეს, არამედ ევროპა უნდა იყოს ქართველებთან ერთად.

„რომ ლაპარაკობენ, რომ ევროპელებთან პრობლემები გვექმნება „ოჯახურ ღირებულებათა და არასრულწლოვანთა დაცვის შესახებ“ კანონით, ევროპამ უნდა მიგვიღოს ისეთი, როგორებიც ვართ. ჩვენ გვაქვს ჩვენი ხასიათი. ჩვენ მეგობრებს ვცნობთ, ვაღიარებთ, მაგრამ ქართველებს გვაქვს ჩვენი იდენტობა, ხასიათი, კულტურა, მენტალობა, რომლის წაშლას არ და ვერ დავუშვებთ. ამას არ გვაპატიებს არც ჩვენი მომავალი და არც ქართველი ხალხი. ჩვენ ევროპაში კი არ უნდა შევიდეთ, ევროპა ქართველებთან ერთად, ეს არის ჩვენი სწორი დამოკიდებულება იმიტომ, რომ ქართველები არიან ევროპის მათ შორის არქიტექტორები თავისი წარსულით, დემოკრატიით, საუკუნოვანი დემოკრატიული, ევროპული, ქრისტიანული ისტორიით“, – აღნიშნა მდინარაძემ.

29 აპრილს ვნახავთ შეკრებას დემოტივირებული და შერცხვენილი ადმინისტრაციული რესურსით, ხალხით, რომელსაც სახის დამალვა და საქართველოს მომავლის წინაშე თავის დახრა მოუწევს, – ასე ეხმაურება პარტია „ახალის“ თანათავმჯდომარე ნიკა მელია “ქართული ოცნების” მიერ 29 აპრილს დაანონსებულ აქციას.

„29 აპრილს, ვნახავთ შეკრებას დემოტივირებული და შერცხვენილი ადმინისტრაციული რესურსით, ხალხით, რომელსაც სახის დამალვა და საქართველოს მომავლის წინაშე თავის დახრა მოუწევს…

წარსულისა და მომავლის ჭიდილში, წარსულს არასოდეს გაუმარჯვია, შვილებთან დაპირისპირება არავის მოუგია”- წერს მელია სოციალურ ქსელში.

„ქართული ოცნება“, 29 აპრილს, საქართველოს პარლამენტის შენობის წინ, საყოველთაო-სახალხო შეკრებას გეგმავს. აღნიშნული შეკრება „უცხოური გავლენის გამჭვირვალობის შესახებ“ კანონპროექტის მხარდაჭერას უკავშირდება

რომელიმე მოქალაქეს ერთი ღერი თმა რომ ჩამოუვარდეს, პერსონალურად ივანიშვილის და იმ ადამიანების დამსახურება იქნება, რომლებმაც მწვანე ღილაკს ხელი დააჭირეს, – ამის შესახებ „გახარია საქართველოსთვის“ დეპუტატმა, ანა ბუჩუკურმა ჟურნალისტებთან საუბრისას განაცხადა, რითაც 29 აპრილს, პარლამენტის წინ, „ქართული ოცნების” მიერ დაანონსებულ შეკრებას გამოეხმაურა.

მისივე თქმით, „ქართული ოცნების” ხელისუფლება საზოგადოებას ერთმანეთს აპირისპირებს.

„ხელისუფლების პასუხისმგებლობაა, რომ ქვეყანაში სამოქალაქო მშვიდობა უზრუნველყოს, ეს არის ხელისუფლება, რომელიც საზოგადოებას ერთმანეთთან აპირისპირებს. რაც არ უნდა მოხდეს, ერთ ადამიანს ერთი ღერი თმა რომ ჩამოუვარდეს, ეს იქნება პერსონალურად ივანიშვილის და პერსონალურად ამ ადამიანების დამსახურება, რომლებმაც მწვანე ღილაკს დააჭირეს ხელი. ამ ხალხს თუ ჰგონია, რომ მხოლოდ ივანიშვილის სახელს ამოეფარებიან და ინდივიდუალურად არ იქნება პასუხისმგებლობა მათზე, მათ შორის, პირველ რიგში, მორალური პასუხისმგებლობა საკუთარი ქვეყნის და ქვეყნის ეროვნული ინტერესების დაზიანებაზე, ძალიან ცდებიან. ისტორია იწერება ახლა და არქივი ყველაფერი ინახავს,” – განაცხადა ბუჩუკურმა.

უნგრეთის პრემიერ-მინისტრის, ვიქტორ ორბანის განცხადებით, დასავლეთს უკრაინაში ჯარების შეყვანამდე ერთი ნაბიჯი აშორებს, თუმცა, მისი მტკიცებით, ბუდაპეშტის ამაში ჩათრევას არ დაუშვებს.

„ევროპის ლიდერები უკვე ჩაფლული არიან ომში, ისინი ომს აღიქვამენ როგორც საკუთარ ომს და აწარმოებენ მას, როგორც საკუთარ ომს“, – წერს ორბანი სოციალურ ქსელში და აღნიშნავს, რომ თავდაპირველად საუბარი იყო მხოლოდ ჩაფხუტების გაგზავნაზე, შემდეგ კი მკაცრ სანქციებამდე, თვითმფრინავებისა და მილიარდობით ევროს გადაცემამდე მივიდნენ.

„ფული, ფული, იარაღი, მაგრამ ვითარება არ უმჯობესდება, ერთი ნაბიჯი გვაშორებს დასავლეთის მიერ ჯარების უკრაინაში გაგზავნას.

ჩვენ უნგრელებმა ვიცით რა არის ომი. ჩვენთვის საკმარისია. დარწმუნებული ვარ, რომ ამ ომისგან თავი შორს უნდა დავიჭიროთ. ეს ჩვენი ომი არ არის. ჩვენ არ გვინდა ომი და არ გვინდა, რომ უნგრეთი კვლავ იქცეს დიდი სახელმწიფოების სათამაშოდ. ამიტომ ჩვენ მხარი უნდა დავუჭიროთ მშვიდობას – შინ, ბრიუსელში, ვაშინგტონში, გაერო-სა და ნატო-ში“, – წერს უნგრეთის პრემიერი.

„ქართული ოცნება“ 29 აპრილს საქართველოს პარლამენტის წინ საყოველთაო-სახალხო შეკრებას ატარებს.

„უცხოური გავლენის გამჭვირვალობის შესახებ“ კანონპროექტი ჯერ კიდევ განხილვის პროცესშია. თუმცა, უკვე ცხადია, რომ შარშანდლისგან განსხვავებით, წელს რადიკალურმა ოპოზიციამ შეცდომაში ჩვენი თანამოქალაქეების მხოლოდ მცირე ნაწილის შეყვანა შეძლო.

პოლიტიკური ოპოზიციის მიერ ორგანიზებული აქციების მონაწილეთა რაოდენობამ პიკზე 9,500 შეადგინა. აშკარაა, რომ კეზერაშვილის, ხაზარაძის და მდიდარი „ენჯეოების“ არაკეთილსინდისიერი დონორების მიერ რადიკალური ოპოზიციის გაძლიერებაში ჩადებულმა მრავალმილიონიანმა ინვესტიციამ არ გაამართლა. ქართული საზოგადოება უკვე იმდენად არის პოლიტიკურად მომწიფებული, რომ ვერავითარი ფულით მას შეცდომაში ვერ შეიყვან.

სოციოლოგიური კვლევების თანახმად, დღეს „ქართული ოცნების“ რეიტინგი 60 პროცენტს აჭარბებს, ხოლო ერთადერთ ოპოზიციურ პარტიას, რომელიც ბარიერის გადალახვას ახერხებს, მხოლოდ 12-პროცენტიანი რეიტინგი აქვს. ამ ფონზე, პოლიტიკურად გაკოტრებული რადიკალური ოპოზიცია, მდიდარი „ენჯეოები“ და ე.წ. პრეზიდენტი ხალხის სახელით გვესაუბრებიან, რაც ჩვენი მხარდამჭერების, საქართველოს მოსახლეობის აბსოლუტური უმრავლესობის სამართლიან გაღიზიანებას იწვევს.

ვითვალისწინებთ ჩვენი მხარდამჭერების თხოვნას და მომავალ ორშაბათს, 29 აპრილს, საქართველოს პარლამენტის სასახლის წინ ვატარებთ საყოველთაო-სახალხო შეკრებას.

მოგიწოდებთ, ჩვენი ქვეყნის პატრიოტმა თანამოქალაქეებმა მთელი ქვეყნიდან ერთად ვუთხრათ უარი შავი ფულით საქართველოში რევოლუციის, მართლმადიდებელ ეკლესიაზე თავდასხმის, რელიგიური სარჩულით პოლიტიკური ინტერვენციის, ლგბტ-პროპაგანდის, ნარკოტიკების პროპაგანდის, სახელმწიფო ინსტიტუტების დისკრედიტაციის, რადიკალიზმისა და ე.წ. პოლარიზაციის დაფინანსებას.

პოლიტიკურად და მორალურად გაკოტრებულ პოლიტიკურ უმცირესობას ვერ მივცემთ სპეკულირებისა და ხალხის სახელით საუბრის უფლებას. ყველას დავანახებთ, სად დგას ქართველი ხალხის უდიდესი უმრავლესობა, რომლისთვისაც ძვირფასია სიმართლე და ჭეშმარიტი ევროპული ფასეულობები, რომლისთვისაც ძვირფასია ჩვენი ტრადიციული ეროვნული ღირებულებები – მამული, ენა და სარწმუნოება.

ერთად ვუთხრათ არა – შავ ფულს და ერთად ვუთხრათ კი – გამჭვირვალობას, ჭეშმარიტ ევროპულ გზას, დამოუკიდებელ და სუვერენულ საქართველოს!“, – აღნიშნულია განცხადებაში.