ასოცირების საბჭო მიესალმა საქართველოს მზაობასა და საკანონმდებლო ჰარმონიზაციის კუთხით ქვეყნის მიერ გადადგმულ ნაბიჯებს, რომელიც მიზნად ისახავს ევროკავშირის როუმინგის ერთიან სივრცეში „Roam like at Home“ ინტეგრაციას, – ამის შესახებ საქართველოსა და ევროკავშირს შორის გამართული ასოცირების საბჭოს მე-8 სხდომის შემდეგ გამოქვეყნებულ ერთობლივ პრესრელიზშია აღნიშნული.

ერთობლივი განცხადება პრესისთვის საქართველოსა და ევროკავშირს შორის გამართული ასოცირების საბჭოს მე-8 სხდომის შემდეგ გამოქვეყნდა.

როგორც დოკუმენტშია აღნიშნული, საბჭო ასევე მიესალმა ევროკავშირის მზაობას, მიიღოს გადაწყვეტილება ასოცირების შეთანხმებაში შესაბამისი კანონმდებლობის დამატების მიზნით ცვლილებების შეტანის შესახებ.

„ასოცირების საბჭომ მადლიერება გამოხატა „ერასმუს პლუს“, „ჰორიზონტი ევროპის“ და „შემოქმედებითი ევროპის“ პროგრამებში საქართველოს ძლიერ ჩართულობასთან დაკავშირებით.

ასოცირების საბჭო მიესალმა საქართველოს ძალისხმევას სამოქალაქო დაცვის სისტემისა და შესაძლებლობების მოდერნიზების კუთხით და გამოხატა მოლოდინი, რომ საქართველო შეასრულებს საბჭოს სხდომის ფარგლებში გაზიარებულ გზამკვლევ დოკუმენტს, რომელიც მიზნად ისახავს საქართველოს ევროკავშირის სამოქალაქო უსაფრთხოების მექანიზმში ინტეგრაციის ხელშეწყობას.

ასოცირების საბჭომ ხაზგასმით აღნიშნა, რომ აღმოსავლეთ პარტნიორობა და მისი მედეგობაზე ორიენტირებული ჩარჩო კვლავ აქტუალურია და გააგრძელებს ფუნქციონირებას გაფართოების პროცესზე დამატებით. ასოცირების საბჭომ ხაზი გაუსვა ამ მიმართულებით 2024 წელს კონკრეტული შედეგების მიღწევის მნიშვნელობას.

შეხვედრას თავმჯდომარეობდა საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენელი, ჯოზეფ ბორელი. საქართველოს დელეგაციას ხელმძღვანელობდა პრემიერ-მინისტრი. შეხვედრაში ასევე მონაწილეობა მიიღო სამეზობლოსა და გაფართოების საკითხებში ევროკომისარმა, ოლივერ ვარეიმ“, – აღნიშნულია ერთობლივ პრესრელიზში.

ინფორმაციას საქართველოს მთავრობა ავრცელებს.

2023 წელს დედაქალაქში 111 მილიონი ლარის ფული ივანიშვილის პარტიამ და კალაძემ ჯარიმებით მოიპარა – კალაძემ დამატებით ასი შტატი დაამატა, რომ 2024 წელს დამატებით 10 მილიონი ლარის ჯარიმა დაწეროს, – ამის შესახებ „ერთიანი ნაციონალური მოძრაობის“ თავმჯდომარემ, ლევან ხაბეიშვილმა განაცხადა.

მისივე თქმით, „ივანიშვილი და კალაძე ასეთ კაბალურ პირობებში ხალხს კანონის სახელით ძარცვავენ და ეს ყველაფერი უნდა დასრულდეს“.

„2023 წელს მხოლოდ დედაქალაქში 111 მილიონი ლარის ჯარიმა დაწერეს, 2012 წელს 20 მილიონი ლარი თბილისს ჯარიმებიდან და საურავებიდან შესდიოდა, ამის შემდეგ გახდა უკვე 25 მილიონი, 2017 წელს 27 მილიონი იყო, როცა კალაძე გახდა მერი, ძალიან სწრაფადვე 32 მილიონი გახადა, შემდეგ 65 მილიონი გახდა და ახლა უკვე 2023 წელს თქვენი ჯიბეებიდან 111 მილიონი ლარი გამოიღო ივანიშვილის პარტიამ და კალაძემ. კიდევ დამატებით ასი შტატი დაამატა კალაძემ, რომ 2024 წელს 10 მილიონი ლარის ჯარიმა დამატებით დაიწეროს, ეს უნდა შევცვალოთ, რადგან ამას ივანიშვილი ხალხს არ დაჰპირებია, ივანიშვილმა და კალაძემ ხალხი მოატყუა, ამის შეცვლა, ცხადია, შეიძლება. როდესაც ასე კაბალური პირობებში ადამიანებს ძარცვავენ კანონის სახელით, ეს უნდა დასრულდეს“, – განაცხადა ლევან ხაბეიშვილმა, რომლის კომენტარსაც პარტია „ნაციონალური მოძრაობა“ ავრცელებს.

ჩვენთვის ცნობილი ხდება, რომ საქართველოს პრეზიდენტად წოდებული თანამდებობის პირი აპირებს, ვეტო დაადოს საარჩევნო კოდექსში ცვლილებებს, ეს ჩვენთვის მოულოდნელი არ ყოფილა, მან უღალატა ქვეყნის ძირითად კანონს, სამაგიეროდ არის „ნაციონალური მოძრაობის“ რადიკალური მესიჯბოქსის გამხმოვანებელი, – ამის შესახებ „ქართული ოცნების“ წევრმა, ანრი ოხანაშვილმა განაცხადა.

ოხანაშვილის თქმით, სალომე ზურაბიშვილი, „ნაციონალური მოძრაობა“ ემზადებიან არჩევნების დისკრედიტაციისთვის და არჩევნების გაყალბების სცენარს წინასწარ აანონსებენ.

„ფაქტია, რომ მისი ეს ე.წ. ვეტოც ემსახურება ამ მიზანს. რეალურად რას უპირისპირდება ზურაბიშვილი? ჩვენ ვამბობთ, რომ ცესკო უნდა იყოს იმ ფორმით დაკომპლექტებული, რომ ცესკო-ს დამოუკიდებელი, მაღალი რეპუტაციის, დიდი გამოცდილების მქონე პირებმა, რომლებიც არ არიან პარტიული, არამედ დამოუკიდებელი, უზრუნველყონ არჩევნების ადმინისტრირება. ეს პრინციპი აღიარებულია ევროკავშირის ქვეყნების აბსოლუტურ უმრავლესობაში და ეს პრინციპი არის სწორი და დემოკრატიული. ამ პრინციპს ეწინააღმდეგებიან ზურაბიშვილი და „ნაციონალური მოძრაობა“. გვთავაზობენ, რომ არჩევნების ადმინისტრირება უნდა უზრუნველყოს ოპოზიციამ. რეალურად ისინი გვეუბნებიან, რომ „ნაციონალურმა მოძრაობამ“, „ლელომ“ და სხვებმა უნდა ჩაატარონ არჩევნები, უზრუნველყონ არჩევნების ადმინისტრირება. ჩვენ ვეუბნებით, რომ რომელიმე პარტიამ კი არ უნდა უზრუნველყოს, არამედ ნეიტრალურმა და მაღალი კვალიფიკაციის მქონე პირებმა. ამას ეძახიან ვენეციის კომისიის რეკომენდაციებთან შეუსაბამობას“, – განაცხადა ოხანაშვილმა.

საქართველოს პარლამენტმა „საარჩევნო კოდექსში“ ცვლილება მესამე მოსმენით მიიღო. ამასთან, პრეზიდენტის ადმინისტრაციაში განაცხადეს, რომ სალომე ზურაბიშვილი „საარჩევნო კოდექსში“ ცვლილებებს ვეტოს დაადებს.

შემოდგომაზე დავითვლით, ვინ რამდენ პროცენტს იღებს, გვარამიას ან ნებისმიერის მხრიდან დღეს ხმამაღალი ლაპარაკი, ბაქიბუქია, – ამის შესახებ პარტია „მოქალაქეების“ წევრმა, ალეკო ელისაშვილმა განაცხადა.

ელისაშვილს კითხვა დაუსვეს ნიკა გვარამიას მიერ ერთ-ერთი მედიის ეთერში გაკეთებულ განცხადებაზე, სადაც ამბობს, რომ მელია, „დროა“, „გირჩი“, „ლელო“ ძალიან მნიშვნელოვანი აქტორებია პოლიტიკურ სივრცეში და არჩევნებზე ჯამურად შეუძლიათ, იყვნენ 25 პროცენტს ზემოთ.

„ვერაფერს გეტყვით. ერთია, რომ ვინ რასაც არ უნდა ბაქიბუქობდეს,ზოგი 25, ზოგი 60 პროცენტს იღებს, წიწილების არ იყოს, შემოდგომაზე დავითვლით, ვინ რამდენ ხმას, ვინ რამდენ პროცენტს იღებს. ამიტომ დღეს ასეთი ხმამაღალი ლაპარაკი გვარამიას ან ნებისმიერის მხრიდან, ბაქიბუქია. დღევანდელი გადმოსახედიდან, რა თქმა უნდა, რეალობას აცდენილია“, – განაცხადა ალეკო ელისაშვილმა.

საქართველოს პრემიერ-მინისტრი ირაკლი კობახიძე ბრიუსელში შეხვედრებს განაგრძობს. მთავრობის მეთაური ევროპარლამენტის პრეზიდენტს რობერტა მეცოლას შეხვდა.
ევროპა

რლამენტის პრეზიდენტმა ირაკლი კობახიძეს პრემიერ-მინისტრის თანამდებობაზე დანიშვნა მიულოცა და წარმატებები უსურვა. თავის მხრივ, ირაკლი კობახიძემ რობერტა მეცოლას მხარდაჭერისთვის მადლობა გადაუხადა.

მხარეებმა ევროკავშირში გაწევრიანების გზაზე საქართველოს მიერ მიღწეული პროგრესი შეაჯამეს, ასევე მიმოიხილეს ევროკავშირში საქართველოს ინტეგრაციის უზრუნველსაყოფად განხორციელებული და მიმდინარე ღონისძიებები.

პრემიერ-მინისტრმა საქართველოსთვის კანდიდატის სტატუსის მინიჭების მნიშვნელობაზე ისაუბრა და აღნიშნა, რომ მისი ხელმძღვანელობით საქართველოს მთავრობა ქვეყნის ევროკავშირში გაწევრიანების პროცესში შემდგომი პროგრესის მისაღწევად მუშაობას აგრძელებს.

ირაკლი კობახიძემ ხაზი გაუსვა ევროკავშირში საქართველოს გაწევრიანების პროცესში ევროპარლამენტის როლსა და მისი მხარდაჭერის მნიშვნელობას. მხარეებმა საქართველოსა და ევროპარლამენტს შორის არსებული თანამშრომლობის დინამიკა შეაფასეს და პარტნიორობის გაძლიერების მზაობა გამოთქვეს.

შეხვედრაზე ირაკლი კობახიძემ და რობერტა მეცოლამ განიხილეს რეგიონსა და მსოფლიოში არსებული უსაფრთხოების გამოწვევები და მათი გადაჭრის გზებზე იმსჯელეს. აქცენტი გაკეთდა საქართველოს ოკუპირებულ რეგიონებში არსებულ ვითარებაზე.

ირაკლი კობახიძემ ევროპარლამენტის პრეზიდენტს საქართველოს ევროპული და ევროატლანტიკური მისწრაფებების, ასევე საქართველოს სუვერენიტეტისა და ტერიტორიული მთლიანობის ურყევი მხარდაჭერისთვის მადლობა გადაუხადა.

პრემიერ-მინისტრმა ევროპარლამენტის საპატიო სტუმართა წიგნში სამახსოვრო ჩანაწერი დატოვა.

ინფორმაციას საქართველოს მთავრობის ადმინისტრაცია ავრცელებს.

მჭიდროდ ვმუშაობთ სამოქალაქო საზოგადოების ჯგუფებთან, ოპოზიციურ პარტიებთან, მმართველ პარტიასთან და განსაკუთრებით ცენტრალურ საარჩევნო კომისიასთან, რათა საქართველოს მოქალაქეებმა იცოდნენ, რომ მათი ხმა სამართლიანად იქნება დათვლილი, რომ მათი ხმები ფარულია და რომ პროცესი არის თავისუფალი და სამართლიანი,- ამის შესახებ საქართველოში ამერიკის შეერთებული შტატების ელჩმა რობინ დანიგანმა ჟურნალისტებს განუცხადა.

მისი თქმით, შეერთებული შტატები ორიენტირებულია, რომ საქართველოს თავისუფალი, სამართლიანი და კონკურენტული არჩევნების უზრუნველყოფაში დაეხმაროს.

„მოდით, არჩევნებზე უფრო ზოგადად ვისაუბრებ. საქართველოშიც და ამერიკის შეერთებულ შტატებშიც საარჩევნო წელია. სამართლიანი არჩევნები ძლიერი დემოკრატიის ქვაკუთხედია. ასე რომ, შეერთებული შტატები ორიენტირებულია, რომ დაეხმაროს საქართველოს, თავისუფალი, სამართლიანი, კონკურენტული არჩევნების უზრუნველყოფაში. ჩვენ მჭიდროდ ვმუშაობთ სამოქალაქო საზოგადოების ჯგუფებთან, ოპოზიციურ პარტიებთან და მმართველ პარტიასთან და განსაკუთრებით ცენტრალურ საარჩევნო კომისიასთან, რათა საქართველოს მოქალაქეებმა იცოდნენ, რომ მათი ხმა სამართლიანად იქნება დათვლილი, რომ მათი ხმები ფარულია, და რომ პროცესი არის თავისუფალი და სამართლიანი.

ასე რომ, მე მოუთმენლად ველი, რომ ქართველებმა გამოიყენონ თავიანთი დემოკრატიული უფლება და მისცენ ხმა და ამერიკელებმაც იგივე გააკეთონ შეერთებულ შტატებში“,- აცხადებს დანიგანი.