საქართველოს პრემიერ-მინისტრი ირაკლი ღარიბაშვილი უნგრეთის პრემიერ-მინისტრს, ვიქტორ ორბანს შეხვდა. შეხვედრაზე საუბარი შეეხო ორ ქვეყანას შორის არსებულ ურთიერთობებსა და სამომავლო თანამშრომლობის პერსპექტივებს როგორც ორმხრივ, ისე მრავალმხრივ ფორმატებში.

ასევე, შეხვედრაზე საუბარი შეეხო კონსერვატიული პოლიტიკური მოქმედების ყოველწლიური კონფერენციის ჩატარების მნიშვნელობას.

ხაზი გაესვა კონფერენციაზე გაჟღერებულ გზავნილებს, რომელთა უმრავლესობა არაერთი ქვეყნისთვის საერთო ღირებულებებს წარმოადგენს. განიხილეს საქართველო-უნგრეთს შორის ეკონომიკური თანამშრომლობის გაღრმავების პერსპექტივები ვაჭრობის, ინვესტიციების, ტურიზმის, სოფლის მეურნეობის სფეროებში.

საქართველოს პრემიერ-მინისტრის თქმით, საქართველო უნგრეთთან ეკონომიკური თანამშრომლობის შემდგომი გაძლიერებისთვის არსებული პოტენციალის სრულად რეალიზების მიზნის ერთგული რჩება. შეხვედრაზე განიხილეს საქართველოს ევროკავშირში ინტეგრაციის პერსპექტივა. აღინიშნა საქართველოსთვის კანდიდატის სტატუსის მინიჭებასთან დაკავშირებით უნგრეთის მხარდამჭერი განცხადებების მნიშვნელობა.

ირაკლი ღარიბაშვილის თქმით, რეკომენდაციების დიდი ნაწილი შესრულებულია და მიღწეული პროგრესის გათვალისწინებით, საქართველო კანდიდატის სტატუსს იმსახურებს, რომელსაც ქვეყანა წლის ბოლოსათვის ელოდება.

შეხვედრის შემდეგ, პრემიერ-მინისტრ ირაკლი ღარიბაშვილისა და საქართველოს დელეგაციის პატივსაცემად, უნგრეთის პრემიერ-მინისტრის, ვიქტორ ორბანის სახელით, სამუშაო სადილი გაიმართა.

„ხალხის ძალის“ ერთ-ერთი ლიდერი დიმიტრი ხუნდაძე უნგრეთში გამართულ „კონსერვატიული პოლიტიკური მოქმედების კონფერენციას“, რომელსაც პრემიერი ირაკლი ღარიბაშვილი დაესწრო, სოციალურ ქსელში ეხმაურება.

როგორც დიმიტრი ხუნდაძე წერს, სწორედ ევროპული კონსერვატიზმი არის საუკეთესო პოლიტიკური იდეოლოგია საქართველოსთვის, რათა ქვეყანამ შეინარჩუნოს წარსული, ამავდროულად, კი განვითარდეს, როგორც ევროპული სახელმწიფო.

„ევროპული კონსერვატიზმი საუკეთესო პოლიტიკური იდეოლოგიაა საქართველოსთვის, რათა შევინარჩუნოთ ტრადიციები და განვავითაროთ ჩვენი ქვეყანა, როგორც ევროპული სახელმწიფო.

დღეს, უნგრეთში გამართული „კონსერვატიული პოლიტიკური მოქმედების კონფერენცია“ უმნიშვნელოვანესი ღონისძიება იყო არა მხოლოდ ევროპისთვის, არამედ, მთელი მსოფლიოსთვის. ახალ პოლიტიკურ წესრიგში უმთავრესი პრინციპი სწორედ კონსერვატიზმი და ეროვნული ფასეულობების დაცვა უნდა იყოს, რომელიც ასე გათელა და გაანადგურა დღეს გამეფებულმა ულტრალიბერალიზმმა.

როგორც საქართველოს პრემიერ-მინისტრმა აღნიშნა, ახალ რეალობაში ახალი, სამართლიანი წესრიგი უნდა დამყარდეს, რომელიც დაფუძნებული იქნება ტრადიციულ ფასეულობებსა და უნივერსალურ ღირებულებებზე. ევროპის უძველესი ერების ხიბლიც სწორედ ეს არის და არა ის თავსმოხვეული ლიბერალიზმი, რომელიც თითქოსდა ევროპული ღირებულებებია.

ადამიანის უფლებების დაცვა და სიტყვის თავისუფლება სულ სხვაა, რომელიც ნამდვილად არის დასავლეთის მონაპოვარი, მაგრამ ეს თანხვედრაში უნდა იყოს ერი-სახელმწიფოების პოლიტიკურ მრწამსთან. ლიბერალიზმმა არ უნდა შეურაცხყოს ჩვენი რელიგია, ადათ-წესები და ტრადიციები, ფეხქვეშ არ უნდა გათელოს ჩვენი ფასეულობები, ახალგაზრდობა არ უნდა გარყვნას ყალბი ღირებულებებით.

სწორედ ევროპული კონსერვატიზმი არის საუკეთესო პოლიტიკური იდეოლოგია საქართველოსთვის, რათა შევინარჩუნოთ წარსული და განვავითაროთ ჩვენი ქვეყანა, როგორც ევროპული სახელმწიფო. მხოლოდ ეს უნდა იყოს ჩვენს ახალგაზრდებთან საუბრის თემა, რომლებიც გადაიბარებენ ქვეყნის მართვის სადავეებს მომავალში.

უნდა გვჯეროდეს, რომ მრავალსაუკუნოვან ევროპას და მის ნაწილს – საქართველოს, მომავლის პერსპექტივაში თვითმყოფადობისა და ეროვნული იდენტობის შენარჩუნების მყარი გარანტი ექნება. ეს არის ჩვენი პოლიტიკური ნებაც და მოქალაქეობრივი ვალდებულებაც“, – წერს დიმიტრი ხუნდაძე.

„ნაციონალური მოძრაობა“ აღარ იმართება კაბინეტიდან, ვეღარ იმართება. ადგილებზე პარტიის ხელმძღვანელების ბედს გადაწყვეტენ ამომრჩევლები. შესაბამისად, ეს პროცესი დამთავრდება 20 მაისამდე და პარტია გამოვა კიდევ უფრო გაძლიერებული, – ამის შესახებ „ერთიანი ნაციონალური მოძრაობის“ თავმჯდომარემ ლევან ხაბეიშვილმა განაცხადა, რითაც პარტიის რეგიონულ ორგანიზაციებში თავმჯდომარეების არჩევნების თაობაზე ნიკა მელიას განცხადებას გამოეხმაურა.

ხაბეიშვილის თქმით, ეს არჩევნები პარტიას სჭირდება.

„არჩევნები ჩანიშნულია, არჩევნები სჭირდება პარტიას. პარტია უნდა იყოს ძლიერი ინფრასტრუქტურულად და კონკრეტული მანდატები უნდა ჰქონდეს ადგილზე ხალხისგან. „ნაციონალური მოძრაობა“ აღარ იმართება კაბინეტიდან, ვეღარ იმართება [მომავალშიც] და ყველამ კარგად უნდა იცოდეს, რომ ადგილებზე პარტიის ხელმძღვანელების ბედს გადაწყვეტენ ამომრჩევლები. შესაბამისად, ეს პროცესი დამთავრდება 20 მაისამდე და პარტია გამოვა კიდევ უფრო გაძლიერებული. პოლიტიკური პარტია პოლიტიკურ პროცესებს ვერ შეწყვეტს, ეს წარმოუდგენელი რამეა. ჩვენ პოლიტიკური პარტია ვართ და პოლიტიკურ პარტიას მოუწოდო პოლიტიკური პროცესების შეწყვეტისკენ, ცოტა უცნაურია. თქვენ, ჟურნალისტები 19 აპრილს იყავით, სადაც დავაანონსე არჩევნების გამოცხადების შესახებ და ორი კვირა გავიდა მას შემდეგ. ამიტომ, არათუ კონკრეტულ ადამიანებთან, საზოგადოებასთან მქონდა [საუბარი], საზოგადოება ჩავაყენეთ საქმის კურსში და ცხადია, ამ ორი კვირის განმავლობაში, აბსოლუტურად ყველა დონეზე იყო კონსულტაციები, მათ შორის პარტიის ყველა მოქმედ თავმჯდომარესთან, რომელიც მოვალეობას ასრულებს. შევხვდით, გავიარეთ კონკრეტული საკითხები და პარტიაში მიღებულ იქნა არჩევნების ჩატარების გადაწყვეტილება, ეს აღარ შეიცვლება. პარტიაში პოლიტიკური პროცესი დასრულდება ძალიან მალე და პარტია იქნება გაძლიერებული“, – განაცხადა ლევან ხაბეიშვილმა.

ცნობისთვის, ნიკა მელიას თქმით, იმ ვითარებაში, როდესაც სააკაშვილთან დაკავშირებით ევროპული სასამართლოს გადაწყვეტილებამდე რამდენიმე კვირა დარჩა, „აუცილებელია, პარტიაში არ იქნას დაშვებული არანაირი პოლიტიკური პროცესი, რომელიც ხელს შეუწყობს დაპირისპირების, დეზინტეგრაციის და გაუცხოების გაღრმავებას“.

„ჩვენი უმთავრესი ამოცანაა, შეწყდეს ყოველგვარ შიდაპარტიულ საკითხზე, მათ შორის პარტიულ არჩევნებზე საუბარი, რადგან დაუშვებლად მიგვაჩნია შესაძლო შიდა დაპირისპირებებისა და თავდასხმების ახალი კერების გაჩენა“, – განაცხადა მელიამ.

ახლა მოიგონეს, რომ თურმე, პარლამენტმა, ჩვენ უნდა დავსხდეთ და გამოვიძიოთ „ქოლცენტრების საქმე“, რითაც რეალურად ხელი უნდა შევუშალოთ პროცესს. რა დამატებით ბენეფიტზეა საუბარი?! უფრო კარგად რა უნდა გააკეთო? მეტი იცი? მეტად ჩაჰყვები სიღრმეში, თუ რა? ერთადერთი შეიძლება ხელი შეუშალო, – ამის შესახებ „ქართული ოცნების“ აღმასრულებელმა მდივანმა მამუკა მდინარაძემ ოპოზიციის მიერ ინიცირებულ ქოლცენტრების საქმეზე საგამოძიებო კომისიის შექმნის საკითხზე საუბრისას განაცხადა.

„ბევრი მიზეზი არსებობს იმის, თუ რატომ სურთ მათ „ქოლცენტრების საქმეზე“ საგამოძიებო კომისიის შექმნა. პირველ რიგში, სურთ გადაფარონ ქართველი სამართალდამცველების უდიდესი წარმატება. ამაზე რთულად გამოსაძიებელი საქმე რომელი შეიძლება იყოს, ბევრის დასახელება ალბათ, თითოეულ ჩვენგანს გაგვიჭირდება; ამაზე რთულად დასამტკიცებელი ბრალდება რომელი შეიძლება იყოს, ალბათ, გაგვიჭირდება დასახელება რომელიმე მუხლის; ურთულესი საქმეა, ბევრ ქვეყანაში ამის გამოვლენას ვერც ახერხებენ. იციან, რომ არსებობს ქოლცენტრები, მაგრამ ვერ ახერხებენ. ქართველმა სამართალდამცველებმა ეს შეძლეს ზოგ შემთხვევაში გერმანელ და სხვა ევროპელ ჩვენ მეგობრებთან, ამ ქვეყნების სამართალდამცველებთან ერთად. რიგ შემთხვევაში დამოუკიდებლად და აღმოფხვრეს უამრავი დანაშაული. დროთა განმავლობაში მიდის ინტენსიური მუშაობა ქართველი სამართალდამცველების ამასთან დაკავშირებით და პრაქტიკულად ნულამდეა დაყვანილი და აღარ არსებობს ქოლცენტრები და თუ სადმეა, ამაზე დღესაც გრძელდება მუშაობა. ამას დაემატა კიდევ ჩვენი მეგობარი ქვეყნების სამართალდამცველებთან ერთად მუშაობა და კიდევ დაემატა გახსნილი საქმეები. ამაზე უამრავი ბრიფინგი ჩატარდა, დაიხურა ქოლცენტრები, გამოვლენა და მათი ლიკვიდაცია მოხდა, უამრავი ადამიანი დააკავეს და ამის ფონზე, როდესაც გამოძიება მიმდინარეობს, სადმე კიდევ კუდები ხომ არ არის დარჩენილი და ამის აღმოფხვრა მოხდეს, ახლა მოიგონეს, რომ თურმე, პარლამენტმა, ჩვენ უნდა დავსხდეთ და გამოვიძიოთ, რითაც რეალურად ხელი უნდა შევუშალოთ ამ პროცესს. რა დამატებით ბენეფიტზეა საუბარი?! უფრო კარგად რა უნდა გააკეთო? მეტი იცი? მეტად ჩაჰყვები სიღრმეში, თუ რა? ერთადერთი შეიძლება ხელი შეუშალო. ჩვენ ხომ ვიცით, რომ „ნაცმოძრაობის“ საკმაოდ მსხვილი ფლანგი გამოიკვეთა უკვე. BBC ჯერ სად იყო, როდესაც ქართველი სამართალდამცველები ამ კვალს დაადგნენ. ახლა თუ რაიმე კვალს დადგნენ, გადაჭრან და დაუდონ მასალები, რომ აგერ იქმნება საფრთხე. უამრავი კითხვის ნიშანი ჩნდება და რაც მთავარია, ქოლცენტრების შესახებ კომისია, დარწმუნებით შეიძლება ითქვას, რაიმე ჭეშმარიტების დადგენას არ ემსახურება“, – განაცხადა მდინარაძემ.

ოპოზიცია ქოლცენტრების საქმეზე საგამოძიებო კომისიის შექმნის ინიციატივის კენჭისყრაზე გატანას ცდილობს.

BBC-მ კეზერაშვილის თაღლითური სქემის შესახებ საგამოძიებო ფილმი გაავრცელა. მასში დეტალურადაა ნაჩვენები და მოყოლილი, თუ როგორ მიდის კვალი დავით კეზერაშვილამდე. ფილმში დავით კეზერაშვილი „მისტერ ოფშორად“ არის მოხსენიებული. ამასთან, დასახელებულია კონკრეტული სახელები და გვარები, თუ ვისი მეშვეობით მართავს ე.წ. თაღლითურ სქემას საქართველოს თავდაცვის ყოფილი მინისტრი.