ბევრს არ უნდა, რომ საგანგებოდ მნიშვნელოვან პერიოდში – მხედველობაში „შუა დერეფანი“ მაქვს – საქართველოს ის ხელისუფლება მართავდეს, რომელიც მათ წინაშე ასკინკილაზე არ დახტის – არის ეს პოლიტიკური კონიუნქტურა, რასაც ჩვენი ვაიპოლიტიკოსების ბრიუსელის დერეფნებში სირბილი აძლიერებს, – ასეთია “ქართული ოცნების“ ერთ-ერთი ლიდერის გია ვოლსკის პასუხი კითხვაზე, რა რესურსი გააჩნია ოპოზიციას საქართველოსთვის კანდიდატის სტატუსის მინიჭების საკითხზე გავლენა მოახდინოს და ამ მხრივ, ევროკავშირის მიერ მისაღებ გადაწყვეტილებაზე იმოქმედოს.

ვოლსკის თქმით, “როდესაც ბრიუსელის კაბინეტებში შედიხარ, ხოლო გაერთიანებას 32 სუბიექტი წარმოადგენს, რომელთაც ჯერ კიდევ შალვას ფანჩატურში მოაწერეს ხელი, რა საკვირველია, ამას ევროპელი პოლიტიკოსი ითვალისწინებს“.

“თავი დააყენეთ იმ პოლიტიკოსის ადგილას, ვინც ფიქრობს, რომ საქართველოს მომავალი შესაძლოა, რუსეთს დაუკავშირდეს, თუკი არსებული ხელისუფლება დარჩება. მას გარკვეული პოლიტიკური ხედვები გააჩნია, ყველა ქვეყანას საკუთარი ინტერესი გააჩნია… გარდა ამისა, ბევრს არც ის უნდა, რომ ისედაც მუხლებზე დაცემული ოპოზიცია საერთოდ გაქრეს და განადგურდეს.

იმ სიტუაციიდან გამომდინარე, რაც მსოფლიოს ახასიათებს, ბევრს არ უნდა, რომ საქართველოს, საგანგებოდ მნიშვნელოვან პერიოდში – მხედველობაში “შუა დერეფანი“ მაქვს – ის ხელისუფლება მართავდეს, რომელიც მათ წინაშე ასკინკილაზე არ დახტის. არის ეს პოლიტიკური კონიუნქტურა, რასაც აძლიერებს როგორც ჩვენი ვაიპოლიტიკოსების სირბილი ბრიუსელის დერეფნებში, ვინც იქ ხვდებიან იმათი შეხედულებები და აზრიც – ასე რომ, დესტაბილიზაციის იდეის თანაავტორი არიან.

ავიღოთ ზელენსკი – უკრაინის სიტყვას საკმაოდ დიდი წონა აქვს. როდესაც ის მიტინგზე გამოდის და ხელისუფლების გადაგდებას და საზოგადოების მიერ რევოლუციური პროცესის განვითარებას ითხოვს, როდესაც ქვეყნიდან ელჩი მიჰყავს, ხოლო ჩვენს ელჩს უკრაინიდან დაუმსახურებლად კინწისკვრით აგდებს, რა თქმა უნდა, სხვა ვერაფერს იფიქრებ, რომ ეს არის გარკვეული შეთქმულება ქვეყნის წინააღმდეგ. ამას ხელს ის მოღალატეობრივი ნაბიჯები უწყობს, რასაც ჩვენი არა ერთი პოლიტიკური ოპონენტი – სინამდვილეში კი, რევოლუციური კომიტეტის წევრები სჩადიან“, – განაცხადა გია ვოლსკიმ.

მისი თქმით, დარწმუნებულია, რომ “ოპოზიციას საქართველოსთვის სტატუსის მიცემა დამღუპველად მიაჩნია, რადგან ეს მათ რევოლუციური სცენარის განვითარებაში ხელი შეეშლებათ“.

„ერთიანი ნაციონალური მოძრაობისა“ და „სტრატეგია აღმაშენებლის“ კოალიციის ლიდერებმა აშშ-ში ვიზიტის ფარგლებში, საერთაშორისო სავალუტო ფონდში მორიგი შეხვედრა გამართეს.

როგორც პარტიის პრესსამსახურის მიერ გავრცელებულ ინფორმაციაშია ნათქვამი, გიორგი ვაშაძემ, თინა ბოკუჩავამ, პეტრე ცისკარიშვილმა, სერგო ჩიხლაძემ და ალექსანდრე კრევო-ასათიანმა სავალუტო ფონდის წარმომადგენლებთან საქართველოში მიმდინარე რეფორმებსა და 2024 წლის არჩევნების მნიშვნელობაზე ისაუბრეს.

როგორც „სტრატეგია აღმაშენებლის“ საგარეო მდივანი, სერგო ჩიხლაძე აღნიშნავს, ამერიკელი პარტნიორები საქართველოში ანტიამერიკული და ანტიდასავლური პროპაგანდის გავრცელებას არ დაუშვებენ.

“შეხვედრების მეოთხეა დღე ვაშინგტონში. დღევანდელი შეხვედრები იყო სენატში, კონგრესსა და საერთაშორისო სავალუტო ფონდში. ჩვენი მეგობრების გზავნილი ყველგან საერთოა: 1. დააკვირდებიან მომავალ არჩევნებს და უკვე ახლა იწყება ამ პროცესზე დაკვირვება და მთავარი გზავნილია, რომ არცერთ გაყალბების შემთხვევას აღარ შეეგუება აშშ. 2. როგორც ევროკავშირში, ისე ნატო- ში ინტეგრაციის კუთხით აუცილებელია რეფორმები და ამ რეფორმების “აჯენდას” აკვირდება აშშ და მზად არიან, რომ ყველა ამ პროცესში დაგვეხმარონ. 3. არ იქნება დაშვებული და არავის გაუვა ანტიამერიკული და ანტიევროპული პროპაგანდა და ყველა ასეთი ადამიანი, პირდაპირ ვიტყვი, რომ დასანქცირდება ან სხვა სახის ზომები იქნება მათ წინააღმდეგ მიღებული. 4. ეს არის ვიზების გამარტივების საკითხი, საგანმანათლებლო პროგრამები, დემოკრატიული და სამოქალაქო საზოგადოების ხელშემწყობი და მხარდამჭერი პროგრამები აშშ-დან. აი, ეს არის საკითხების ნუსხა, რომლებზეც სრული მხარდაჭერაა აშშ- ს მხრიდან”, – განაცხადა ჩიხლაძემ

ირაკლი ღარიბაშვილის ორგანიზებით, სამხრეთ კავკასიაში მშვიდობისა და განვითარებისთვის არაერთი მოლაპარაკება მიმდინარეობდა, – ამის შესახებ აზერბაიჯანის პრემიერ-მინისტრმა ალი ასადოვმა ჰეიდარ ალიევის სახელობის თბილისის აზერბაიჯანული პროფესიული სახელმწიფო დრამატული თეატრის მშენებლობის დაწყების ცერემონიაზე სიტყვით გამოსვლისას განაცხადა.

აზერბაიჯანის პრემიერმა საქართველოს მთავრობის მეთაურს „აბრეშუმის გზის ფორუმზე“ მაღალი დონის მასპინძლობისთვის მადლობა გადაუხადა.

„მადლობა საქართველოს მთავრობას. პატივცემულო პრემიერ-მინისტრო, თქვენი მოწვევით ჩვენ გუშინ „თბილისის აბრეშუმის გზის ფორუმში“ ვიღებდით მონაწილეობას. პრემიერ-მინისტრს და ორგანიზატორებს მაღალი დონის სტუმართმოყვარეობისთვის კიდევ ერთხელ მადლობა მინდა გადავუხადო. როგორც პრემიერმა აღნიშნა, ირაკლი ღარიბაშვილის ორგანიზებით, სამხრეთ კავკასიაში მშვიდობისა და განვითარებისთვის არაერთი მოლაპარაკება მიმდინარეობდა“, – განაცხადა ალი ასადოვმა.

ოპოზიციონერ დეპუტატის, ხატია დეკანოიძის განცხადებით, პოზიტიური მოლოდინი აქვს, რომ საქართველო კანდიდატის სტატუსს მიიღებს. ხატია დეკანოიძის თქმით, საქართველოს მოქალაქეები კანდიდატის სტატუსს იმსახურებენ.

„Ჯერ არაფერია გადაწყვეტილი. უახლოეს ორ კვირაში ანალიზის ნაწილი იქნება, შემდეგ რეკომენდაცია და ბოლო ერთი სიტყვაა მთავარი იმ რეკომენდაციაში, რომელმაც შეიძლება, სივრცე დაუტოვოს ლიდერებს, დეკემბერში მიიღონ გადაწყვეტილება. პოზიტიური მოლოდინი მაქვს, ჩემი მანდატის ფარგლებში ყველაფერს ვაკეთებ და გავაკეთებ. საქართველოს მოქალაქეები იმსახურებენ კანდიდატის სტატუსს. ამით თუ ვინმე და რამე გაძლიერდება, ეს იქნება საქართველოს სახელმწიფო“, – განაცხადა ხატია დეკანოიძემ.

ამასთან, როგორც ხატია დეკანოიძემ აღნიშნა, სტატუსთან დაკავშირებით ოპოზიციაში არაერთგვაროვანი დამოკიდებულებაა.

„არსებობს არაერთგვაროვანი დამოკიდებულება და ხშირ შემთხვევაში ეს არაერთგვაროვანი დამოკიდებულება დაბნეულობაა. არაერთგვაროვანი დამოკიდებულებაც, ადამიანების შიშებიც ლეგიტიმურია. არაერთგვაროვან დამოკიდებულებაზე არაფერი მითქვამს ახალი, ისეთი,  რაც არ ჩანს ღია დისკუსიებში. კარგი იქნებოდა, თუ ერთიანი მძლავრი გზავნილი იქნებოდა. შესაძლებელია, რეზოლუცია დავარეგისტრიროთ, შესაძლებელია, წერილს მოვაწეროთ ხელი, მაგრამ ის, რომ არსებობს შიში, რადგან შესაძლებელია, ამან „ქართული ოცნება“ გააძლიეროს, ესეც ლეგიტიმურია, რასაც ზოგიერთი პარტიის წარმომადგენელი ღიად ამბობს. მაგალითად, „ევროპული საქართველო“ ამას ძალიან დიდი ხანია, ამბობს და ასეთი დისკუსიები სოციალურ ქსელში არსებობს.

მნიშვნელოვანია ერთიანი გზავნილი, მე კვლავ ამ აზრზე დავრჩები. სტატუსის გადავადება არ შეიძლება. არც განვიხილავ, რომ უნდა გადავავადოთ. შიდა არჩევნებია ევროკავშირის ბევრ ქვეყანაში, მალე არის ევროპარლამენტის არჩევნები და საქართველოზე ერთი აზრი მაინც არ არის. ამ გაფართოების ტალღაში თუ არ აღმოვჩნდებით, შეიძლება კოსოვოსთან ერთად, ერთ კალათაში აღმოვჩნდეთ. საქართველო არის რუსეთის პირისპირ და დარწმუნებული ვარ, კანდიდატის სტატუსის მიღება „ქართულ ოცნებას“ კი არ გააძლიერებს, პირიქით, გაცილებით მეტ პირობას დაუთქვამენ. ახლა სტატუსის მიღება მნიშვნელოვანია და ყველამ ეს უნდა თქვას“, – განაცხადა ხატია დეკანოიძემ.

მოგეხსენებათ, რომ აზერბაიჯანის თეატრს აქვს დიდი ისტორია ჩვენს ქვეყანაში, პირველი თეატრი დაფუძნდა 1872 წელს და დღეს ჩვენ ყველას გვიხარია, რომ თეატრის ახალ, თანამედროვე მშენებლობას ჩაეყრება საფუძველი და ძალიან მალე ჩვენს დედაქალაქს შეემატება კიდევ ერთი ღირსშესანიშნავი ადგილი, – ამის შესახებ საქართველოს პრემიერ-მინისტრმა ირაკლი ღარიბაშვილმა ჰეიდარ ალიევის სახელობის თბილისის აზერბაიჯანული პროფესიული სახელმწიფო დრამატული თეატრის მშენებლობის დაწყების ცერემონიაზე სიტყვით გამოსვლისას განაცხადა, სადაც მთავრობის მეთაური აზერბაიჯანის რესპუბლიკის პრემიერ-მინისტრ ალი ასადოვთან ერთად იმყოფებოდა.

მთავრობის მეთაურის თქმით, დღევანდელი დღე არის საქართველოსა და აზერბაიჯანის ძლიერი მეგობრობისა და თანამშრომლობის დასტური.

„მოგესალმებით, ბატონო პრემიერ-მინისტრო, ჩემო ძვირფასო კოლეგავ, მივესალმები აზერბაიჯანის მთავრობის წევრებს, აზერბაიჯანის რესპუბლიკის ელჩს, თბილისის მერს, პარლამენტის წევრებს, ჩვენს ელჩს, პატივცემულ სტუმრებს − ყველას მოგესალმებით. დღეს სასიხარულო დღეა, ვინაიდან მაქვს პატივი, მივიღო მონაწილეობა აზერბაიჯანის სახელმწიფო თეატრის მშენებლობის ცერემონიაში. მოგეხსენებათ, რომ აზერბაიჯანის თეატრს აქვს დიდი ისტორია ჩვენს ქვეყანაში, პირველი თეატრი დაფუძნდა 1872 წელს და დღეს ჩვენ, ყველას, გვიხარია, რომ თეატრის ახალ თანამედროვე მშენებლობას ჩაეყრება საფუძველი და ძალიან მალე ჩვენს დედაქალაქს შეემატება კიდევ ერთი ღირსშესანიშნავი ადგილი. ბატონო პრემიერ-მინისტრო, ძვირფასო სტუმრებო, დღევანდელი დღე არის დასტური ჩვენი მეგობრობის, ღრმა კავშირების, ძლიერი თანამშრომლობის. მოგეხსენებათ, რომ რამდენიმე კვირის წინ საქართველოში იმყოფებოდა ბატონი ილჰამ ალიევი, რომელთანაც ჩვენ გვქონდა ძალიან ნაყოფიერი შეხვედრა და საუბარი. ჩვენ ერთად დავათვალიერეთ აზერბაიჯანის ეროვნული ლიდერის − ჰეიდარ ალიევის გამოფენა. წელს აზერბაიჯანში აღინიშნება ჰეიდარ ალიევის 100 წლის იუბილე და სწორედ ამის ფარგლებში ჩვენ დღეს სიმბოლურად საფუძველს ჩავუყრით აღნიშნული თეატრის მშენებლობას. მე ასევე მინდა მადლობა გადავუხადო ბატონ პრემიერ-მინისტრს − ალი ასადოვს. მადლიერი ვარ, რომ თქვენ ჩამოხვედით თბილისში და მიიღეთ მონაწილეობა აბრეშუმის გზის ფორუმში. ჩვენ ამას ძალიან ვაფასებთ. ასევე ვაფასებთ იმ ფაქტს, რომ გუშინ ჩვენ ერთობლივად მნიშვნელოვანი შეხვედრებიც გავმართეთ − იყო სამმხრივი შეხვედრაც, საუბარი. საქართველო, როგორც მიუკერძოებელი, ნეიტრალური, ობიექტური შუამავალი და მეგობარი ორივე ქვეყნისა, არის დაინტერესებული იმით, რომ ჩვენს რეგიონში დამყარდეს გრძელვადიანი მშვიდობა და სტაბილურობა. ამაში ჩვენ, ჩვენი ქვეყანა და მე პირადად, როგორც მთავრობის მეთაური, მზად ვართ, რომ მივიღოთ მონაწილეობა. კიდევ ერთხელ მინდა მადლობა გადავუხადო პრემიერ-მინისტრს, მთავრობის წევრებს, მოწვეულ სტუმრებს − ყველას − და ვისურვებდი, რომ მალე ერთად გავხსნათ თეატრის ახალი შენობა”, – განაცხადა პრემიერმა.

როგორც ღონისძიებაზე აზერბაიჯანის პრემიერმა ალი ასადოვმა აღნიშნა, აზერბაიჯანელი ხალხის საერთო ეროვნული ლიდერის − ჰეიდარ ალიევის სახელობის თბილისის სახელმწიფო პროფესიული აზერბაიჯანული დრამატული თეატრის თანამედროვე სტილში გამოცოცხლება ისტორიული მოვლენაა.

„პატივცემულო პრემიერ-მინისტრო, თბილისის მერო, პატივცემულო ელჩებო, პატივცემულო დეპუტატებო, ქალბატონებო და ბატონებო, აზერბაიჯანელი და ქართველი ხალხის საუკუნეების განმავლობაში მეგობრულ, კეთილმეზობლურ, მშვიდობიან და ურთიერთგაგების პირობებში ცხოვრებას საფუძველს უქმნის სწორედ ისტორიულ ფესვებზე დამყარებული კულტურული ურთიერთობები. როგორც აზერბაიჯანში, ისე საქართველოში ისტორიულად ჩვენი ხალხის ეროვნულ ღირებულებებს, კულტურას, ენას, რელიგიას, ხელოვნებას, ლიტერატურას დიდ პატივს სცემენ და განსაკუთრებულად უყვართ. აზერბაიჯანის რამდენიმე სახელგანთქმული მოღვაწე, დიდი პიროვნებები საქართველოში მოღვაწეობდნენ და სიცოცხლის ბოლომდე აქ იმყოფებოდნენ.

ასევე საქართველოს არაერთი კულტურისა და ხელოვნების წარმომადგენლები აზერბაიჯანში საქმიანობდნენ, მნიშვნელოვანი წვლილი შეიტანეს საზოგადოებრივ და კულტურულ ცხოვრებაში.

ამ ყველაფრის ისტორიულ დასტურად ჯერ კიდევ 1872 წელს ქალაქ თბილისში თბილისის სახელმწიფო პროფესიული აზერბაიჯანული დრამატული თეატრის საქმიანობის დაწყებას აღვნიშნავდით. თეატრის გრძელვადიანი საქმიანობის განმავლობაში ქართული, აზერბაიჯანული და მსოფლიო ლიტერატურის კლასიკათა უკვდავი ნაწარმოებები დიდი წარმატებით იდგმებოდა.

დღეს აზერბაიჯანელი ხალხის საერთო ეროვნული ლიდერის − ჰეიდარ ალიევის სახელობის თბილისის სახელმწიფო პროფესიული აზერბაიჯანული დრამატული თეატრის თანამედროვე სტილში გამოცოცხლება ისტორიული მოვლენაა. ქალაქ თბილისში, ასეთ ლამაზ კუთხეში, თეატრის ახალი შენობის აშენებასთან დაკავშირებულ გადაწყვეტილებას დიდად ვაფასებთ.

ქალბატონებო და ბატონებო, მინდა ვისარგებლო შემთხვევით და საერთო ეროვნული ლიდერის ჰეიდარ ალიევის საქართველოსადმი თბილ დამოკიდებულებასთან დაკავშირებით გაგიზიაროთ რამდენიმე ნიუანსი. ჰეიდარ ალიევს აზერბაიჯანის ხელმძღვანელობის დროს მეზობელ ქვეყნებთან ყოველთვის მეგობრული ურთიერთობა ჰქონდა. რაც შეეხება საქართველოს, ეს განსაკუთრებული შემთხვევაა. ორივე ხელმძღვანელობის პერიოდში ჰეიდარ ალიევი საქართველოსა და ქართველ ხალხს დიდ პატივს სცემდა, განსაკუთრებული ყურადღებითა და სიყვარულით მიუდგებოდა.

ყველას ძალიან კარგად გვახსოვს, რომ ჰეიდარ ალიევს საქართველოს იმდროინდელ პრეზიდენტთან ედუარდ შევარდნაძესთან ურთიერთნდობაზე დაფუძნებული ძლიერი მეგობრული ურთიერთობა ჰქონდა. სწორედ მათი ლიდერობის მეშვეობით ქვეყანათა პოლიტიკურ, ეკონომიკურ, კულტურულ-ჰუმანიტარულ და სხვა დანარჩენ სფეროში ურთიერთობათა განვითარებას საფუძველი ჩაეყარა. ორივე ლიდერის პოლიტიკური კარიერა გამოირჩეოდა უნიკალურობით და ცნობილია მსგავსი ისტორიული პროცესებით. ასე რომ, მათ მეორედ ხალხის მოთხოვნით უკვე დამოუკიდებელი ქვეყნის მეთაურად გააგრძელეს პოლიტიკური მოღვაწეობა. მათი მეთაურობის დროს, სხვა სფეროების პარალელურად, ისინი თავიანთი ხალხის ეროვნულ ღირებულებებს, ენას, რელიგიას, კულტურას, ხელოვნებას, მუსიკას დიდ ყურადღებას აქცევდნენ, ყველაფერს აკეთებდნენ ამ მემკვიდრეობის შენარჩუნებისა და განვითარებისათვის. მინდა ისიც აღვნიშნო, რომ ჰეიდარ ალიევი ქართული ხელოვნების, კულტურის, ლიტერატურის, მუსიკის, კინოს დიდი თაყვანისმცემელი იყო.

ქალბატონებო და ბატონებო, ახლა პრეზიდენტ ილჰამ ალიევი და პრემიერ-მინისტრი ირაკლი ღარიბაშვილი ამ მდიდარ ისტორიულ ტრადიციას აგრძელებენ და დემოკრატიული გზით ავითარებენ ჩვენს დამოუკიდებელ ქვეყანათა ეროვნულ ინტერესებს.

იმედი მაქვს, რომ დღეს დაწყებული თეატრის პროფესიონალი კოლექტივი შესანიშნავად გამოიყენებს აქ შექმნილ პირობებს, ახალი პროექტებით ქალაქ თბილისის კულტურულ ცხოვრებაში დიდ წვლილს შეიტანს. ეს კი, თავის მხრივ, აზერბაიჯანისა და საქართველოს კეთილმეზობლურ, მეგობრულ და ძმურ ურთიერთობებს უფრო გააძლიერებს და კიდევ უფრო დააახლოებს ჩვენს ხალხს.

დარწმუნებული ვარ, რომ თეატრი კულტურისა და ხელოვნების მოყვარულთათვის ღირსეული საჩუქარი იქნება, ამასთან ერთად ქალაქ თბილისს, სადაც ისტორიისა და თანამედროვეობის იდეალური ჰარმონიაა, უფრო გაალამაზებს. საქართველოს დედაქალაქის კულტურულ კერად გადაიქცევა.

აღსანიშნავი ფაქტია ისიც, რომ ჰეიდარ ალიევის სახელობის ამ კულტურის კერის ახალი შენობის საძირკვლის ჩაყრის ცერემონია სწორედ მიმდინარე წელს − აზერბაიჯანელი ხალხის საერთო ეროვნული ლიდერის დაბადების 100 წლის იუბილეს − ემთხვევა. ჰეიდარ ალიევის შესანიშნავ იუბილესთან დაკავშირებით საქართველოშიც არაერთი ღონისძიება ჩატარდა.

საერთო ეროვნული ლიდერის ხსოვნისადმი ასეთი დიდი პატივისცემის გამო ჩემი და აზერბაიჯანის მთავრობის სახელით ბატონ ირაკლი ღარიბაშვილს, საქართველოს მთავრობასა და ქართველ ხალხს მადლობა მინდა გადავუხადო.

მინდა ერთი ნიუანსიც აღვნიშნო, აზერბაიჯანში, როგორც ყოველთვის, საქართველოს დიდებული პიროვნებები დიდი პატივისცემითა და სიყვარულით სარგებლობენ.

ასე რომ, ამ დღეებში აზერბაიჯანის სიდიდით მეორე ქალაქში – განჯაში − ცნობილი ქართველი პოეტის ნიკოლოზ ბარათაშვილის მემორიალური დაფა შეიქმნა, იმ შენობის წინ, სადაც ის ცხოვრობდა და მოღვაწეობდა.

ამასთან ერთად აზერბაიჯანის კახის რაიონში მოქმედი ქართული სახელმწიფო დრამატული თეატრი დიდი ქართველი მოღვაწის − ილია ჭავჭავაძის სახელს ატარებს და შესაბამისი წესით ოფიციალური სახე მიენიჭა.

კიდევ ერთხელ მადლობა ყველას ამ ღონისძიების ორგანიზებისათვის და გილოცავთ დღევანდელ ისტორიულ მოვლენას! მადლობა საქართველოს მთავრობას! პატივცემულო პრემიერ-მინისტრო, თქვენი მოწვევით ჩვენ გუშინ „თბილისის აბრეშუმის გზის ფორუმში” ვიღებდით მონაწილეობას. ბატონ პრემიერ-მინისტრს და ორგანიზატორებს მაღალი დონის სტუმართმოყვარეობისთვის კიდევ ერთხელ მადლობა მინდა გადავუხადო. როგორც ბატონმა პრემიერმა აღნიშნა, ბატონი ირაკლი ღარიბაშვილის ორგანიზებით სამხრეთ კავკასიაში მშვიდობისა და განვითარებისთვის არაერთი მოლაპარაკება მიმდინარეობდა”, – განაცხადა ალი ასადოვმა.

პრემიერ-მინისტრებმა შენობა დაათვალიერეს და პროექტის შესახებ დეტალური ინფორმაცია „სოკარ ენერჯი ჯორგიას” გენერალური დირექტორისგან – მაჰირ მამმედოვისგან მიიღეს.

ჰეიდარ ალიევის სახელობის თბილისის აზერბაიჯანული პროფესიული სახელმწიფო დრამატული თეატრი 1872 წელს დაარსდა და 1947 წლამდე მოქმედებდა, ხოლო შემდეგ უკვე 2004 წელს საერთო ეროვნული ლიდერის სახელით დაიწყო საქმიანობა.

აზერბაიჯანული დრამატული თეატრის ამ დრომდე არსებული შენობა ავარიულ მდგომარეობაშია, რის გამოც აუცილებელი გახდა ახლის აშენება. თეატრის ახალი შენობა საელჩოს გვერდით, ვახტანგ გორგასლის 25 ნომერში მდებარე მიწის ნაკვეთზე აშენდება. აღნიშნული ტერიტორია აზერბაიჯანული კაპიტალის კომპანიას „Confidence Group”-ს ეკუთვნის. ნაკვეთის ფართობი არის 2565 მ2.

ცერემონიას თბილისის მერი − კახა კალაძე, საქართველოში აზერბაიჯანის საგანგებო და სრულუფლებიანი ელჩი − ფაიგ გულიევი, აზერბაიჯანის რესპუბლიკაში საქართველოს საგანგებო და სრულუფლებიანი წევრი − ზურაბ პატარაძე და საქართველოსა და აზერბაიჯანის მთავრობათა წევრები ესწრებოდნენ.

მავნებელი ოპოზიციის გარდა, ყველას დიდი სურვილი და საფუძვლიანი მოლოდინი აქვს, რომ კანდიდატის სტატუსს მოგვანიჭებენ, – ამის შესახებ საპარლამენტო უმრავლესობის წევრმა, ბექა ოდიშარიამ განაცხადა.

ოდიშარიას თქმით, მმართველი გუნდის ძალისხმევამ, სხვადასხვა ქვეყანაში შეხვედრებმა შედეგი გამოიღო.

„ჩვენმა მონაწილეობამ ფორუმებზე, ევროპის სხვადასხვა დედაქალაქში პრემიერ-მინისტრის, პარლამენტის თავმჯდომარისა და ჩვენი სხვა ლიდერების შეხვედრებმა შედეგი გამოიღო. ამ ადამიანებმა, პირველ რიგში, გაიგეს, სინამდვილეში რა ხდება საქართველოში და არა ის მოდელირებული აპოკალიფსი, რომელსაც ე.წ. ქართული ოპოზიცია ავითარებს“, – განაცხადა ბექა ოდიშარიამ.