ხალხის ძალის“ წევრი დავით ქართველიშვილი სოციალურ ქსელში უკრაინელი სამხედრო ანალიტიკოსის, პოლიტოლოგისა და პრეზიდენტის ადმინისტრაციის უფროსის ყოფილი მრჩევლის, ალექსეი არესტოვიჩის 2019 წელს ჩაწერილ ვიდეოინტერვიუს ავრცელებს, სადაც ის საუბრობს, რომ თუ უკრაინა NATO-ს წევრობისთვის MAP-ს მიიღებს, რუსეთი ომს დაიწყებს.

როგორც დავით ქართველიშვილი წერს, „ოთხ წელიწადში ამაზე უფრო რბილი, ჰუმანური, კეთილშობილური ფორმით – NATO-ს ფაქტორზე, როგორც უკრაინის ომის გამომწვევ ერთ-ერთ სავარაუდო ტრიგერზე – ისაუბრებენ საქართველოს პრემიერ-მინისტრი, რომის პაპი… მაგრამ პოლიტიკური კანიბალიზმის პარტიის წარმომადგენლები მათ ამის გამო „ჯვარს აცვამენ“:

„რას ნიშნავს თანამედროვე პოლიტიკური კანიბალიზმი? როდესაც იმყოფები კომფორტულ, მსუყე გარემოში, კმაყოფილი ხარ შენი ბისექსუალური იდენტობით, ბედნიერი ბრძანდები შენი სოციალურ-ფინანსური მდგომარეობის გამო და აუზის შემდეგ, ელიტარულ ღამის კლუბში გამგზავრების წინ, აუღელვებლად საუბრობ შენთვის უკვე საზარბაზნე ხორცად ქცეულ ადამიანებზე, ბავშვებზე, ერზე… წყნარად საუბრობ, რომ NATO-ს მხრიდან უკრაინისთვის MAP-ის მინიჭება აუცილებლად გამოიწვევს რუსეთის მხრიდან ამ მეზობელი ქვეყნის ფართომასშტაბური განადგურების მცდელობას: ავიადარტყმებით, ჰიდროელექტროსადგურებისა და სხვა სასიცოცხლოდ მნიშვნელოვანი ინფრასტრუქტურის განადგურებას, კიევის ალყაში აყვანას, უკრაინის ერთ გადამწვარ ტერიტორიად გადაქცევას… მაგრამ, რა გაეწყობაო – ასეთია ქვეყნის NATO-ში მიღების საფასური. მიუხედავად ამ გამანადგურებელი ომისა, რუსეთზე საბოლოო გამარჯვების შემდეგ, უკრაინას აუცილებლად მიიღებენ ჩრდილო-ატლანტიკური ბლოკის სრულფასოვან წევრად. მხოლოდ ასე და არანაირად – სხვა გზით. და ამ ომის ალბათობა არის მაღალი – 99%. და ეს ომი დაიწყება 2021, მაქსიმუმ – 2022 წელსო (ალექსი არესტოვიჩი, კიევი, 2019 წელი). ოთხ წელიწადში ამაზე უფრო რბილი, ჰუმანური, კეთილშობილური ფორმით – NATO-ს ფაქტორზე, როგორც უკრაინის ომის გამომწვევ ერთ-ერთ სავარაუდო ტრიგერზე – ისაუბრებენ საქართველოს პრემიერ-მინისტრი, რომის პაპი… მაგრამ პოლიტიკური კანიბალიზმის პარტიის წარმომადგენლები მათ ამის გამო „ჯვარს აცვამენ“, რამეთუ, არ შეიძლება კანიბალის კანიბალიზმში საჯაროდ დადანაშაულება. ეს მათ სასტიკად არ სიამოვნებს, რამეთუ – დისკრიმინაციის ნიშნებს მოიცავს…“ – წერს დავით ქართველიშვილი.

https://www.facebook.com/david.kartvelishvili.90/videos/562436262731984

„ცნობისათვის, 10 წლის წინ დევნილებზე გამოყოფილი თანხა 25 მილიონ ლარამდე იყო, ხოლო 2012 წლის შემდეგ ეტაპობრივად გაიზარდა და დღეს 235 მილიონამდე ლარს შეადგენს!“, – ამის შესახებ „ხალხის ძალის“ წევრი ზურაბ ქადაგიძე სოციალურ ქსელში წერს.

იგი ეხმიანება საქართველოს პრემიერ-მინისტრის დასავლეთ საქართველოში ვიზიტს, ახალი სპორტული ინფრასტრუქტურის მონახულებას და დევნილებისათვის ბინების გადაცემას. ქადაგიძე ოპოზიციურ ტელეარხებს მიმართავს და ამბობს, რომ მათ მთელი დღის წესრიგი მხოლოდ ფეიქსა და სკანდალზე აქვთ მორგებული, ხოლო პოზიტივს არ აშუქებენ.

„პირდაპირი ჩართვა ჯანდაბას არა, მაგრამ თქვენი მახინჯი ანტურაჟისათვის, ორი სიტყვით მაინც გეხსენებინათ რა მასშტაბის პროექტები ხორციელდება ქვეყანაში… თუმცა სად თქვენ და სად პოზიტივი? მთელი დღის წესრიგი, სკანდალზე, ფეიკზე, ძალადობასა და აბსტრაქტულ რეალობაზე გაქვთ მორგებული. მერე ყველა პოლიტიკურ პროცესს პირწმინდად აგებთ და გიკვირთ, რატომ ხართ იმ სანაგვეში, სადაც თქვენ თვითონ გაამწესეთ თავები! დღეს პრემიერი ირაკლი ღარიბაშვილი, პირადად გაეცნო „განახლებული რეგიონების“ მიმდინარე და დასრულებულ პროექტებს. სპორტული მოედნები, ოლიმპიური აუზი, სპორტული ინფრასტრუქტურა და განსაკუთრებით – 480 დევნილ ოჯახს, სრულად გარემონტებული ბინა გადაეცა და ჯამში 800-ზე მეტი ოჯახი მიიღებს. ცნობისათვის, 10 წლის წინ დევნილებზე გამოყოფილი თანხა 25 მილიონ ლარამდე იყო, ხოლო 2012 წლის შემდეგ ეტაპობრივად გაიზარდა და დღეს 235 მილიონამდე ლარს შეადგენს!“, – წერს ქადაგიძე ფეისბუკზე.

“კონსტანტინე ზატულინმა, რომელიც რუსეთის სახელმწიფო სათათბიროს დსთ-ის საქმეთა კომიტეტის თავმჯდომარის პირველი მოადგილეა, განაცხადა, უმჯობესი იქნებოდა „რუსეთი დალოდებოდა უკრაინის მხრიდან სამხედრო მოქმედებების დაწყებას და შემდეგ ეპასუხა, რაც აარიდებდა რუსეთს ფართომასშტაბიან სანქციებს” – წერს “ხალხის ძალის“ წევრი თამთა მეგრელიშვილი სოციალურ ქსელში. როგორც მეგრელიშვილი აღნიშნავს, 2008 წლის ომი დიდი სიმძიმე და ტრაგედიაა ქართული სახელმწიფოსათვის და ყოველი ქართველისათვის, თან მაშინ, როცა “ნაცმოძრაობამ“ დაუჭირა მხარი მოღალატეობრივ რეზოლუციას და დააბრალა საკუთარ ქვეყანას ომის დაწყება. “კონსტანტინე ზატულინმა, რომელიც რუსეთის სახელმწიფო სათათბიროს დსთ-ის საქმეთა კომიტეტის თავმჯდომარის პირველი მოადგილეა, განაცხადა, უმჯობესი იქნებოდა „რუსეთი დალოდებოდა უკრაინის მხრიდან სამხედრო მოქმედებების დაწყებას და შემდეგ ეპასუხა, რაც აარიდებდა რუსეთს ფართომასშტაბიან სანქციებს”. ანუ, მან საკუთარ განცხადებაში სწორება უკრაინაში “საქართველოს სცენარზე” გააკეთა?! ანუ, მიხეილ სააკაშვილის არაგონივრულმა პოლიტიკამ მწვანე აუნთო რუსეთს კიდევ უფრო დიდი აგრესიით შემოჭრილიყო ქართულ სახელმწიფოში?! ზატულინი აღიარებს, რომ უკრაინაშიც ისე უნდა მოქცეულიყვნენ, როგორც საქართველოში მოიქცნენ. 2008 წლის ომი დიდი სიმძიმე და ტრაგედიაა ქართული სახელმწიფოსათვის და ყოველი ქართველისათვის, თან მაშინ როცა „ნაცმოძრაობამ“ დაუჭირა მხარი მოღალატეობრივ რეზოლუციას და დააბრალა საკუთარ ქვეყანას ომის დაწყება“, – წერს მეგრელიშვილი facebook – ზე.