პრეზიდენტის ადმინისტრაციის მუშაობაში ან პრეზიდენტის მიღებულ გადაწყვეტილებებში შემჩნეოდა დიდი დოზით „ნაციონალური მოძრაობის“ მიმართ სიმპათიები, – ამის შესახებ ჟურნალისტებთან ადამიანის უფლებათა კომიტეტის თავმჯდომარე მიხეილ სარჯველაძემ განაცხადა, რითაც პრეზიდენტის ადმინისტრაციიდან „ნაციონალურ მოძრაობაში“ ალექსანდრე კრევო-ასათიანის გადასვლას გამოეხმაურა.

„ცუდად გამოიყურება, როდესაც აღმოჩნდება, რომ არც თუ უმნიშვნელო თანამდებობაზე მომუშავე ადამიანი აღმოჩნდება, რომ პირველივე დაძახებაზე იშიფრება როგორც „ნაციონალური მოძრაობის“ ინტერესების გამტარი მოხელე“, – აღნიშნა მიხეილ სარჯველაძემ.

პრეზიდენტის ადმინისტრაციიდან „ნაციონალურ მოძრაობაში“ ალექსანდრე კრევო-ასათიანი გადავიდა, რომელიც ფრაქციაში საგარეო მიმართულების სამსახურის უფროსის მოადგილედ დაინიშნა და რომელმაც პრეზიდენტის პოზიციების გახმოვანება დაიწყო. პრეზიდენტის ადმინისტრაციამ განცხადება გაავრცელა, რომლის თანახმადაც ალექსანდრე კრევო-ასათიანი არასდროს იკავებდა პრეზიდენტის მრჩევლის პოზიციას და ის იყო სტაჟიორი.

ვიღაცას ვითომ „ნაცობაზე“ და ხუთიანობაზე აქვს პრობლემა, მაგრამ მაინც ხუთიანის დინებას მიჰყვება. „ნაცმოძრაობა“ არის ერთი დიდი კლასტერი, რომლის შიგნითაც შესაკრებთა გადანაცვლებით ჯამი არ იცვლება, „ნაცი“ არის „ნაცი“, – ამის შესახებ ფრაქცია „ქართული ოცნების“ თავმჯდომარემ მამუკა მდინარაძემ განაცხადა.

„არანაირი პერსპექტივა „ნაცმოძრაობას“ და მის კლასტერს, ვინც არ უნდა გადაანაცვლონ შიგნით, ერთი მიზეზის გამო არ აქვს. მათ პროპაგანდა და პიარკამპანია აგებული აქვთ ტყუილზე. მათი მთავარი სლოგანი იქნება, რომ მოაშორონ რუსული ხელისუფლება და საქართველოში რუსული ხელისუფლება არ არის. საქართველოში ქართული, ეროვნული ხელისუფლებაა. როგორც კი შენ შეეცდები, რომ პიარულად ისეთი რაღაც მიჰყიდო ადამიანებს, რომელიც საფუძველშივე ტყუილია, ძალიან სპეკულაციურია, ძალიან მდაბიოა და ამაზე გინდა ააგო შენი პოლიტიკური მომავალი, გამორიცხულია, რომ ტყუილმა სიმართლეზე გაიმარჯვოს, ბოროტებამ სიკეთეზე გაიმარჯვოს. ამიტომ „ნაცმოძრაობას“ არანაირი კონფიგურაციით არ აქვს პერსპექტივა, არ აქვს გამარჯვების შანსი“, – განაცხადა მამუკა მდინარაძემ.

პატიმარი ციხეში რჩება, ეს აჩვენებს, რომ ლობისტურ კამპანიაში ფული არაეფექტურადაა დახარჯული, ამიტომ სააკაშვილს მოვუწოდებდი, რომ ასე ფულის ხარჯვას თავი დაანებოს და სხვანაირად ხარჯვას მიჰყოს ხელი, – ამის შესახებ “გირჩის” დეპუტატმა იაგო ხვიჩიამ ჟურნალისტებთან განაცხადა, რითაც აშშ-ის იუსტიციის დეპარტამენტის ვებგვერდზე გიული ალასანიასა და მიხეილ სააკაშვილის მიერ დაქირავებული ლობისტური კომპანიის აქტივობების შესახებ გამოქვეყნებულ ახალ ინფორმაციას გამოეხმაურა.

როგორც მან აღნიშნა, როცა ადამიანი ციხეშია, პიარ-კამპანიაში ფულის ხარჯვა შედეგის მისაღწევად სწორი გამოსავალი არ არის.

“რაც არ უნდა ეწეროს შიგნით და რამდენი ფულიც არ უნდა იყოს დახარჯული, რასაც შედეგი გვაჩვენებს, არაეფექტურად არის დახარჯული, ამიტომ სააკაშვილს მოვუწოდებდი, რომ ასე ფულის ხარჯვას თავი დაანებოს და სხვანაირად მიჰყოს ფულის ხარჯვას ხელი, რადგან მოგეხსენებათ, ძირითადად ეს ფული იხარჯება პიარ კამპანიებში და როცა ციხეში ზიხარ, პიარ კამპანიაში ფულის ხარჯვა არ არის მაინც და მაინც სწორი გამოსავალი. შეიძლება არ ყრის ფულს, ამით სხვა იმიჯს ქმნის დასავლეთში, პოლიტიკური დევნილის, პუტინის პატიმრის და ა.შ. მაგრამ შედეგი იმ თვალსაზრისით, რომ პატიმარი ისევ ციხეში რჩება, მიღწეული არ არის. დიდი ხნის წინ ვსაუბრობდით, რომ “ნაციონალური მოძრაობისგან” ტაქტიკის შეცვლა იყო აუცილებელი, დიდი ხნის წინ ვითხოვდით სააკაშვილის საზღვარგარეთ გადაყვანას და სხვები ითხოვდნენ გორის ციხეში გადაყვანას თბილისიდან, მათ შორის, “ნაციონალური მოძრაობის” წევრები, როცა ერთი მილიონი დაიხარჯა საადვოკატო საქმიანობაში, ვიძახდით, რომ უცნაურად იქცევიან ეს ადვოკატები, მაგრამ არ გვიჯერებენ, მოგეხსენებათ, მიხეილ სააკაშვილი არ არის დამჯერი ადამიანი, მით უმეტეს, ჩვენს მიმართ, ამიტომ როგორც თვითონ მიაჩნია საჭიროდ თავის ფულის ხარჯვა, წარმატებას ვუსურვებ ამაში,”- განაცხადა ხვიჩიამ.

აშშ-ის იუსტიციის დეპარტამენტის ვებგვერდზე გიული ალასანიასა და მიხეილ სააკაშვილის მიერ დაქირავებული ლობისტური კომპანიის აქტივობების შესახებ ახალი ინფორმაცია გამოქვეყნდა.

გამოქვეყნებული ინფორმაციის მიხედვით ცნობილი ხდება ის აქტივობები, რომელიც ლობისტურმა კომპანიამ განახორციელა, მათ შორის არის რეზოლუციების დაწერა და ევროპარლამენტისთვის მიწოდება, სააკაშვილის შესახებ სტატიების მომზადება, კომუნიკაცია ევროპარლამენტარებთან და ა.შ.

საქართველოს პრემიერ-მინისტრმა ირაკლი ღარიბაშვილმა საქართველოში ჩეხეთის რესპუბლიკის საგანგებო და სრულუფლებიან ელჩთან პეტრ მიკისკასთან გამოსამშვიდობებელი შეხვედრა გამართა.

მთავრობის ადმინისტრაციაში გამართულ შეხვედრაზე განიხილეს ორ ქვეყანას შორის არსებული პარტნიორობის ძირითადი მიმართულებები.

პრემიერ-მინისტრმა აღნიშნა, რომ საქართველოსა და ჩეხეთის რესპუბლიკას შორის ორმხრივი ურთიერთობები დინამიკურად ვითარდება როგორც ორმხრივ ფორმატში, ასევე საერთაშორისო ორგანიზაციების ფარგლებში.

მთავრობის მეთაურმა დიპლომატს საქართველოს სუვერენიტეტის და ტერიტორიული მთლიანობის, ასევე ევროპული და ევროატლანტიკური ინტეგრაციის გზაზე მტკიცე მხარდაჭერისთვის მადლობა გადაუხადა და მას მომავალ საქმიანობაში წარმატებები უსურვა.

ვესაუბრებით „სტრატეგია აღმაშენებელს“, რათა სხვადასხვა პროდასავლური პარტიებსა და ლიდერებთან ერთად გამარჯვების პლატფორმა შევქმნათ. მივესალმებით ყველას, ვინც ამ გამარჯვების პლატფორმაში საკუთარ თავს დაინახავს და ასევე, მივესალმებით იმ ფაქტს, თუ ცალკე პროდასავლური პარტიებიც გააკეთებენ ერთობას, – ამის შესახებ „ნაციონალური მოძრაობის“ თავმჯდომარემ ლევან ხაბეიშვილმა ჟურნალისტებს განუცხადა.

მისივე თქმით, „ნაციონალურ მოძრაობის“ ბაზაზე გაკეთდება მთავარი გამარჯვების ცენტრი ბიძინა ივანიშვილის და რუსული პარტიის წინააღმდეგ.

„ჩემი მთავარი დაპირება, მათ შორის ჩვენი ამომრჩევლისთვის, საზოგადოებისთვის იყო, რომ „ნაციონალური მოძრაობა“ აუცილებლად, ყველა ჯერზე, ინფრასტრუქტურულად, ლოჯისტიკურად გაძლიერდებოდა. ამას უახლოეს დღეებში საზოგადოება ნახავს. ცხადია, ვესაუბრებით „სტრატეგია აღმაშენებელს“ და ეს გულისხმობს იმას, რომ სხვადასხვა პროდასავლური პარტიებსა და ლიდერებთან ერთად გამარჯვების პლატფორმა შევქმნათ. მივესალმებით ყველას, ვინც ამ გამარჯვების პლატფორმაში საკუთარ თავს დაინახავს და ასევე, მივესალმებით იმ ფაქტს თუ ცალკე პროდასავლური პარტიებიც გააკეთებენ ერთობას. ჩვენ საქმეს განახებთ უახლეს დღეებში. გამიხარდებოდა სხვა ოპოზიციურმა პარტიებმაც რომ მიიღონ კონკრეტული გადაწყვეტილებები და ან „ნაციონალურ მოძრაობასთან“ ერთად გააკეთონ გამარჯვების პლატფორმა და ჩვენ ღია ვართ, ან თავად გააკეთონ, აჩვენონ საზოგადოებას თანამშრომლობის მაგალითი. მივესალმებით პროდასავლური პარტიების ერთობას, იმიტომ, რომ „ნაციონალურ მოძრაობის“ ბაზაზე გაკეთდება მთავარი გამარჯვების ცენტრი ბიძინა ივანიშვილის და რუსული პარტიის წინააღმდეგ“, – განაცხადა ლევან ხაბეიშვილმა.