„ნაციონალურმა მოძრაობამ“ მხარი დაუჭირა რეზოლუციას, რომლითაც ქართველ ჯარისკაცებს აბრალებდა ომის დანაშაულს, ამ ღალატს ჩვენ ვუყურებდით, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

პაპუაშვილის თქმით, ყველაფერს პასუხი უნდა გაეცეს.

„თავს ნუ მოიტყუებს ნურავინ, ამ ღალატს ჩვენ ვუყურებდით, ჩვენ ვართ ამ ქვეყნის მოქალაქეები, ჩვენ, როგორც მოქალაქეებმა, გამოვიარეთ 2008 წლის აგვისტო, ეს ყველაფერი ხდებოდა ჩვენ თვალწინ. „ნაციონალურმა მოძრაობამ“ მხარი დაუჭირა რეზოლუციას, რომლითაც ხელს ადებდნენ ქართველ ჯარისკაცებს და ომის დანაშაულს აბრალებდნენ. „ნაციონალურმა მოძრაობამ“ აღიარა ტალიავინის დასკვნა, რომლის მიხედვითაც, მიხეილ სააკაშვილმა გახსნა ცეცხლი. ყველაფერს უნდა გაეცეს პასუხი. „ქართულმა ოცნებამ“ შევძელით და შემოვაბრუნეთ საერთაშორისო სასამართლოებში მიმდინარე დავები, გავამართლეთ ქართველი ჯარისკაცები, რომლებსაც „ნაციონალური მოძრაობა“ სწორედ ევროსაბჭოს რეზოლუციის მეშვეობით აბრალებდა ომის დანაშაულს. გამართლდა ყველა ჯარისკაცი, სამხედრო და დამნაშავედ იქნა ცნობილი სეპარატისტული რეჟიმის ხელისუფლების წარმომადგენლები, ასევე გენერალი ბორისოვი, რომელზეც დაკავების ორდერიც კი გამოსცა ჰააგის სასამართლომ. გარდაცვლილია უკვე და, რა თქმა უნდა, ვერ აღსრულდება ორდერი, მაგრამ ეს გააკეთა „ქართულმა ოცნებამ“ და ჰააგის სასამართლომ დაადგინა, რომ 2008 წლის აგვისტოში ერთადერთი, ვინც ომის დანაშაული ჩაიდინა, იყო სეპარატისტული რეჟიმი და რუსი სამხედროები.

ასევე, სტრასბურგის სასამართლოს გადაწყვეტილებით, სასამართლო დონეზე აღიარებულ იქნა, რომ საქართველოს ტერიტორიები ოკუპირებული აქვს რუსეთს. მიუხედავად იმისა, რომ „ნაციონალური მოძრაობა“ ომის დანაშაულებს აბრალებდა ქართველ ჯარისკაცებს, რეზოლუციების და დასკვნების თანამონაწილე იყო, შევძელით და სტრასბურგის სასამართლოს ვაღიარებინეთ, რომ საქართველოს ტერიტორიები ოკუპირებულია რუსეთის მიერ, ჰააგის სასამართლოს ვაღიარებინეთ, რომ ომის დანაშაულები ჩადენილი იქნა მხოლოდ სეპარატისტული რეჟიმის თუ რუსი სამხედროების მხრიდან“, – განაცხადა შალვა პაპუაშვილმა.

რაც შეეხება კითხვას, „გაერო-ში რუსეთის წარმომადგენლის მოადგილემ წაიკითხა ციტატა „ქართული ოცნების“ პოლიტსაბჭოს განცხადებიდან, რატომ მოეწონა მას ეს განცხადება?“ – შალვა პაპუაშვილმა აღნიშნა:

„ვინ რა ციტატას წაიკითხავს და გამოიყენებს, ამაზე ჩვენ ვერაფერს ვიტყვით, მაგრამ კარგია, თუ უყურებენ ჩვენი განცხადებების ციტატებს, სადაც ისინი ასევე ამოიკითხავენ, რომ მთავარი მიზანი, რაც აქვს „ქართულ ოცნებას“, არის საქართველოს დეოკუპაცია. ამიტომ ეს ციტატებიც შეუძლიათ, წაიკითხონ“.

საქართველოს პარლამენტის თავმჯდომარე შალვა პაპუაშვილი დუბლინში ევროპის საბჭოს საპარლამენტო ასამბლეის პარლამენტის თავმჯდომარების კონფერენციაში მიიღებს მონაწილეობას.

კონფერენციაზე იგეგმება შალვა პაპუაშვილის სიტყვით გამოსვლა. სამიტში მონაწილეობის პარალელურად, ქართველი სპიკერი ორმხრივი შეხვედრების გამართვას აპირებს უცხოელ კოლეგებთან, მათ შორის, დაგეგმილია შეხვედრები ევროკავშირის წევრი ქვეყნების პარლამენტის თავმჯდომარეებთან. ამ ფორმატში შალვა პაპუაშვილის მხრიდან დისკუსიის მთავარი თემა იქნება ევროკავშირის 12 რეკომენდაცია, საქართველოს მიერ მიღწეული პროგრესი და ევროკავშირის წევრობის კანდიდატის სტატუსი.

შალვა პაპუაშვლის თქმით, ევროკავშირის წევრი ქვეყნების მხარდაჭერა მნიშვნელოვანია.

„დუბლინში ევროსაბჭოს წევრი ქვეყნების პარლამენტის თავმჯდომარეების სამიტი იმართება, სადაც, თემატური საკითხების გარდა, კოლეგებთან ორმხრივი შეხვედრების შესაძლებლობა იქნება. რა თქმა უნდა, ამ ფორმატსაც კიდევ ერთხელ გამოვიყენებთ პარლამენტებს შორის ურთიერთობის გასაღრმავებლად. ამავე დროს, ევროკავშირის წევრი ქვეყნების პარლამენტის თავმჯდომარეებთან საუბარი იქნება იმ გადაწყვეტილებაზე, რომელიც მისაღები აქვს ევროკავშირს, რათა გამოასწოროს შარშან დაშვებული შეცდომა. მნიშვნელოვანია, ამ თვალსაზრისით მათი მხარდაჭერა გვქონდეს“, – განაცხადა შალვა პაპუაშვილმა.

გვიხარია ჩვენი ოლიმპიელების შედეგები, ყველა ზეიმობს ამ გამარჯვებას, შთაბეჭდილება მრჩება, რომ სალომე ზურაბიშვილის მიზანი იყო, ამ ზეიმშიც რაღაც ხინჯი შეეტანა, რაშიც არ უნდა ავყვეთ, – ამის შესახებ საქართველოს პარლამენტის თავმჯდომარემ, შალვა პაპუაშვილმა ოლიმპიელების დახვედრის საზეიმო ცერემონიის შემდეგ ჟურნალისტებს განუცხადა.

პაპუაშვილის თქმით, „ქართველი ხალხის ზეიმს ვერაფერი გააფუჭებს“.

„შთაბეჭდილება მრჩება, რომ ქალბატონი სალომეს დღევანდელი განცხადების მიზანი სწორედ ის იყო, რომ ამ ზეიმშიც რაღაც ხინჯი შეეტანა, რაშიც არ უნდა ავყვეთ. მთელი ერი, ყველა ზეიმობს ამ გამარჯვებას და გვიხარია ჩვენი ოლიმპიელების შედეგები. მათ შორის უმაღლეს ჯილდოებზე წარდგენით ვეცადეთ, ოლიმპიელების მიმართ სახელმწიფოს დამოკიდებულება გვეჩვენებინა“, – განაცხადა შალვა პაპუაშვილმა.

საქართველოს პრეზიდენტმა, სალომე ზურაბიშვილმა ქართველ ოლიმპიელებს წარმატება მიულოცა და დღეს საღამოს დაგეგმილ ღონისძიებას გამოეხმაურა. პრეზიდენი მიიჩნევს, რომ ოლიმპიელების ასე სწრაფად დაჯილდოება არ შეიძლება და აღნიშნავს, რომ ამას თავისი მიზეზები აქვს. როგორც ზურაბიშვილმა დღევანდელ ბრიფინგზე განმარტა, ოლიმპიელების წარმატებები ყველამ ერთად უნდა იზეიმოს და სახალხო ზეიმის მოწყობას აპირებს. ამავდროულად, სალომე ზურაბიშვილის თქმით, ახლა იწყება პარალიმპიადა, რომელიც გრძელდება 8 სექტემბრამდე, შესაბამისად, ყველას მიღება ერთად გაიმართება.

50 000 ლარი პრემია გადაეცემა გუნდის უკლებლივ ყველა წევრს, რომელსაც მედალი არ მოუგია ოლიმპიურ თამაშებზე, თუმცა თავისი წვლილი შეიტანა საერთო წარმატებაში, – ამის შესახებ პრემიერ-მინისტრმა ირაკლი კობახიძემ ოლიმპიელების დახვედრის საზეიმო ცერემონიაზე სიტყვით გამოსვლისას განაცხადა.

მთავრობის მეთაურმა სპორტსმენებს მადლობა გადაუხადა და აღნიშნა, რომ თითოეული მათგანის წვლილი საერთო გამარჯვებაში განსაკუთრებულია.

ირაკლი კობახიძის თქმით, ასევე გაზრდილ პრემიებს მიიღებენ მწვრთნელები, სამედიცინო და სხვა პერსონალი, რომლებიც წარმოადგენდნენ საქართველოს ოლიმპიურ გუნდს.

„ჩვენ ვიცით, რამხელა მნიშვნელობა აქვს ერთმანეთის გვერდში დგომას, ერთმანეთის გამხნევებას და სწორედ ასეთი სულისკვეთება იყო ჩვენს ოლიმპიურ გუნდში, რასაც ყველა ვხედავდით, ერთმანეთს ამხნევებდით, ქომაგობდით. აქედან გამომდინარე, 28-ვე სპორტსმენის წვლილი საერთო გამარჯვებაში არის განსაკუთრებული და დიდი მადლობა ყველას ამისათვის. მითუმეტეს რომ, ამ გუნდში წარმოდგენილნი იყვნენ ჩვენი განსაკუთრებით ღვაწლმოსილი სპორტსმენები. არ შეიძლება, არ აღვნიშნოთ ქალბატონი ნინო სალუქვაძე, რომელიც მეათედ იყო წარმოდგენილი ოლიმპიადაზე და არა ერთგზის იყო ჩვენი გუნდის მედროშე. ქალბატონი ნინო არის ოლიმპიური ჩემპიონი, სამივე სინჯის მედლის მფლობელი, მრავალგზის მსოფლიო, ევროპის ჩემპიონი და რა თქმა უნდა, როცა ასეთი თანაგუნდელი გყავს შენს გუნდში, წარმატება უფრო იოლია. ასევე ცალკე მინდა ვახსენო ლაშა შავდათუაშვილი, ასევე სამივე სინჯის მედლის მფლობელი და მსოფლიო და ევროპის ჩემპიონი. ასეთი თანაგუნდელებით, კიდევ ერთხელ ვიტყვი, რომ ბევრად უფრო მარტივია წარმატება.

მინდა აღვნიშნო, რომ ამ წვლილის დასაფასებლად, 50 000 ლარი პრემია გადაეცემა გუნდის უკლებლივ ყველა წევრს, რომელსაც მედალი არ მოუგია ოლიმპიურ თამაშებზე, თუმცა თავისი წვლილი შეიტანა საერთო წარმატებაში. ასევე გაზრდილ პრემიებს მიიღებენ მწვრთნელები, სამედიცინო პერსონალი, სხვა პერსონალი, რომლებიც წარმოდგენილი იყვნენ ჩვენს გუნდში,” – განაცხადა ირაკლი კობახიძემ.

მთავრობის მეთაურმა აღნიშნა, რომ სპორტულ ასპარეზობებზე მიღებულ პრიზებთან ერთად, განსაკუთრებული ფასი აქვს სახელმწიფო ჯილდოს. ირაკლი კობახიძის თქმით, ჩემპიონები წმინდა გიორგის სახელობის გამარჯვების ორდენს, ხოლო პრიზიორები ღირსების ორდენს მიიღებენ.

„მე კიდევ ერთხელ მინდა აღვნიშნო, რომ ჩვენი პრიზიორები, ჩემპიონები წარვადგინეთ უმაღლეს სახელმწიფო ჯილდოებზე. ჩემპიონების შემთხვევაში, ეს არის წმინდა გიორგის სახელობის გამარჯვების ორდენი, ეს არის პრიზიორებისთვის ღირსების ორდენი და დარწმუნებული ვარ, ეს საქმე ბოლომდე იქნება მიყვანილი, წინასწარ მინდა, თითოეულ თქვენგანს მოგილოცოთ უმაღლესი სახელმწიფო ჯილდოები. ვფიქრობ, ეს არის ის ტრადიცია, რომელიც უნდა გაგრძელდეს. რა თქმა უნდა, განსაკუთრებული ფასი აქვს იმ ჯოლდოებს, რომელთაც თქვენ იღებთ სპორტულ ასპარეზობებზე, თუმცა სახელმწიფო ჯილდოს აქვს სხვა ფასი და მე ვფიქრობ, მომავალშიც ამ ტრადიციას აუცილებლად ასე გავაგრძელებთ. კიდევ ერთხელ ყველას მინდა, მოგილოცოთ. მადლობა გადაგიხადოთ და მინდა, მადლობა გადავუხადო ოლიმპიური გუნდის თითოეულ წევრს, თითოეულ სპორტსმენს, რომელიც იყო წარმოდგენილი ჩვენს ოლიმპიურ გუნდში.

კიდევ ერთხელ მინდა, მადლობა გადავუხადო ყველას, ვინც წვლილი შეიტანა ჩვენს უდიდეს წარმატებაში. მადლობა კულტურისა და სპორტის მინისტრს, ქალბატონ თეა წულუკიანს, ოლიმპიურ კომიტეტს, პირადად, ბატონ ლერი ხაბელოვს მისი განსაკუთრებული წვლილისთვის ამ გამარჯვებასა და წარმატებაში. მადლობა ყველა ფედერაციას, რომელიც წარმოდგენილი იყო ამ ოლიმპიურ თამაშებზე. წინ გველის პარალიმპიური თამაშები, რასაც ყველა დიდი ინტერესით ველოდებით და მინდა, თქვენთან ერთად, წარმატება ვუსურვო ამ თამაშების თითოეულ მონაწილეს, ჩვენი გუნდის წევრებს. კიდევ ერთხელ მინდა აღვნიშნო, რომ განსაკუთრებული იყო ეს ოლიმპიადა ჩვენი ქვეყნისთვის, იყო კიდევ ერთი ძალიან მნიშვნელოვანი და საამაყო ფურცელი ქართული სპორტის ისტორიაში და ყველას განსაკუთრებული მადლობა ამ ისტორიის დაწერისთვის,”- განაცხადა პრემიერმა.

მთავრობის მეთაურმა ასევე წარმატება მიულოცა ქართველ სპორტსმენებს, ლუკა მხეიძესა და გიორგი მეშვილდიშვილს, რომლებიც სხვა ქვეყნების სახელით ასპარეზობდნენ.

„ასევე მინდა, ცალკე მივულოცო ქართველებს, რომლებიც სხვადასხვა მიზეზის გამო, სამწუხაროდ, სხვა ქვეყნების სახელით ასპარეზობდნენ და მიაღწიეს წარმატებას. ლუკა მხეიძეს, რომელიც საფრანგეთის სახელით გამოდიოდა, მინდა მივულოცო ვერცხლის მედალი, ვიცე-ჩემპიონობა და გიორგი მეშვილდიშვილს მინდა, მივულოცო ასევე ბრინჯაოს მედალი, რომელიც გამოდიოდა აზერბაიჯანის სახელით,”- განაცხადა პრემიერ-მინისტრმა.

კანდიდატის სტატუსისგან განსხვავებით, მოლაპარაკებების საკითხი, როგორც თემა, შანტაჟისთვისაც კი არ გამოდგება. აქედან გამომდინარე, ჩვენს ქვეყანას არ აქვს დიდი რისკები, საბოლოო ჯამში, მაინც გაიხსნება მოლაპარაკებები, – ამის შესახებ საქართველოს პრემიერ-მინისტრმა, ირაკლი კობახიძემ განაცხადა.

კობახიძის თქმით, „როგორც კი გადაივლის სირთულეები, რომლის წინაშეც დგას რეგიონი, როგორც კი დასრულდება ომი უკრაინაში, მაშინვე შეიცვლება მიდგომები და დაფასდება ის მდგომარეობა, რომელიც დღეს არის საქართველოში ეკონომიკის, დემოკრატიისა თუ ნებისმიერი სხვა კუთხით“.

„რომელიმე ქვეყანა თუკი უახლოვდება მაქსიმალურად ევროკავშირს, ეს არის სწორედ საქართველო. სამწუხაროდ, უკრაინაში სხვა მდგომარეობაა, მოლდოვაში – სხვა, როგორც პოლიტიკური, ისე ეკონომიკური, დემოკრატიის, კორუფციის, ყველა თვალსაზრისით. ეს ორი ქვეყანა უფრო და უფრო შორდება ევროკავშირს. რეალურად, ჩვენ გვაქვს თვისებრივი დაახლოების პროცესი.

შინაარსობრივად საქართველო სულ უფრო მეტად უახლოვდება იმ სტანდარტებს, რომლებიც არის საჭირო ევროკავშირში გაწევრიანებისთვის. ეს გამოიხატება, მაგალითად იმაში, რომ ამ სამი წლის განმავლობაში დაახლოებით ცხრა მილიარდით გავასწარით მოლდოვას ეკონომიკით. იცით, რომ ეკონომიკური ზრდა არის ერთ-ერთი პრინციპული ფაქტორი ევროკავშირში გაწევრიანებისთვის, ჩვენ მოვახერხეთ ქვეყანაში მშვიდობის შენარჩუნება, მათ შორის გამჭვირვალობა ერთ-ერთი ევროპული ღირებულება უფრო მკაფიოდ დაინერგა ჩვენს ქვეყანაში. მაქსიმალურად ვნერგავთ ევროპულ სტანდარტებს და მუდმივი პროგრესი გვაქვს ყველა თვალსაზრისით. საბოლოო ჯამში, ეს აუცილებლად დაფასდება. არის რაღაც პატარა თამაშები, ამ თამაშების გამო 2022 წელს არ მოგვცეს კანდიდატის სტატუსი, თუმცა 2023 წელს მაინც მივიღეთ. ასეთი თამაშები თუ იქნება, წელს არა, მომავალ წელს მივიღებთ მოლაპარაკებებს, რაც არ არის პრინციპული იქიდან გამომდინარე, რომ, კანდიდატის სტატუსისგან განსხვავებით, მოლაპარაკებების საკითხი, როგორც თემა, შანტაჟისთვისაც კი არ გამოდგება. აქედან გამომდინარე, ჩვენს ქვეყანას არ აქვს დიდი რისკები, საბოლოო ჯამში, მაინც გაიხსნება მოლაპარაკებები.

2030 წლისთვის თუკი ვინმე იქნება მზად ევროკავშირში გაწევრიანებისთვის, ეს იქნება საქართველო კანდიდატ ქვეყნებს შორის. კანდიდატ ქვეყნებს შორის საქართველო დღეს არის ყველაზე დემოკრატიული, კანდიდატ ქვეყნებს შორის საქართველოში ტარდება ყველაზე დემოკრატიული არჩევნები, საქართველოში არის ბიზნესი ყველაზე მეტად თავისუფალი და ასე შემდეგ. კანდიდატ ქვეყნებს შორის კორუფციისგან ყველაზე თავისუფალი ქვეყანა არის საქართველო, ეს არის მთავარი და არა განცხადებები. განცხადებები ხან ასეთი კეთდება, ხან – ისეთი, ეს განცხადებები შემდეგ იცვლება. პოლიტიკური კონიუნქტურის ამბავია, მთავარია, შინაარსობრივად რამდენად არის ქვეყანა წელში გამართული და ამ კუთხით კანდიდატ ქვეყნებს შორის საქართველო ყველაზე მეტად არის წელში გამართული. შესაბამისად, როგორც კი გადაივლის სირთულეები, რომლის წინაშეც დგას ჩვენი რეგიონი, როგორც კი დასრულდება, პირველ რიგში, ომი უკრაინაში, მაშინვე შეიცვლება მიდგომები და მაშინვე დაფასდება ის მდგომარეობა, რომელიც არის დღეს საქართველოში ეკონომიკის, დემოკრატიისა თუ ნებისმიერი სხვა კუთხით“, – განაცხადა ირაკლი კობახიძემ.

კობახიძეს კითხვა დაუსვეს, რამდენად აქვს მოლოდინი, რომ ევროკავშირში გაწევრიანების საკითხზე საქართველოსთან მოლაპარაკებები წელს დაიწყება, კობახიძემ აღნიშნა:

„ყველაფერი შეიძლება, ასეც შეიძლება, ისეც შეიძლება, ეს არის პოლიტიკური საკითხი. შეიძლება წელს მოხდეს, შეიძლება გაისად. ასეც და ისეც, ჩვენი ორიენტირი არის 2030 წელი და დარწმუნებული ვარ, 2030 წლისთვის აბსოლუტურად რეალურია საქართველოს ევროკავშირში გაწევრიანება“.

თამარ ჩერგოლეიშვილმა და გიგა ბოკერიამ ახალი პარტია „ფედერალისტები“ დააფუძნეს.

პარტია „ფედერალისტების“ პრეზენტაცია თამარ ჩერგოლეიშვილმა გახსნა, რომელმაც აუდიტორიას პარტიის ახალი ლოგო წარუდგინა და სამომავლო გეგმებზე ისაუბრა.

„ფედერალიზმი არ არის მხოლოდ სახელმწიფო მოწყობა, ფედერალიზმი არის ის სისტემა, რომელიც წარმოქმნის ძალის ისეთ გაწონასწორებას და შეკავებას, სადაც ადამიანების სიცოცხლეს, მის უნარებს, მის შესაძლებლობებს განსაკუთრებული ფასი ედება და რაც მთავარია, ეს არის ჩვენთვის ძალიან ბუნებრივი“, – განაცხადა თამარ ჩერგოლეიშვილმა.

ჩერგოლეიშვილმა პარტიის სახელწოდების შერჩევის მიზეზზეც ისაუბრა და განმარტა, რომ არჩევნებთან დაკავშირებულ შეკითხვებს პასუხები სექტემბერში გაეცემა. ასევე, მისივე განცხადებით, პარტიის დამფუძნებელი ყრილობაც სექტემბერში ჩატარდება.

„ზუსტად ვიცით, რა უნდა გავაკეთოთ, ზუსტად ვიცით, რამ იმუშავა იქ, რამაც თქვენი ყურადღება ჩვენკენ მოაპყრო და ზუსტად ვიცით, ეს ყურადღება როგორ გავზარდოთ და გავაფართოოთ.

რაც შეეხება პარტიის სახელს, რატომ „ფედერალისტები“ – ორი დღის წინ ზუგდიდში ორი ბავშვი დაიწვა და ეს ერთდღიანი ფეისბუკ-მოთქმა ვნახეთ და ეს ახასიათებს, ზოგადად, სოციალურ მედიას, რომ რაღაც დიდი უბედურება მოხდება, ერთი დღე ხალხი ინერვიულებს და მერე ისევ რაღაც დიდი უბედურება ხდება. ამ ყველაფერზე ერთი პასუხი არსებობს სინამდვილეში – ბუნებრივია, ტრაგედიებს თავიდან ვერავინ აიცილებს, ტრაგედიები ყოველთვის მოხდება, მაგრამ იმისთვის, რომ ადამიანის სიცოცხლეს ფასი მიეცეს, იმისთვის, რომ ადამიანებმა შეძლონ თავისი სიცოცხლის უფლებისკენ, თავისუფლებისკენ, ბედნიერებისკენ სწრაფვის რეალიზება, საჭიროა, ეს თავს მოხვეული თავკომბალა სახელმწიფო დაიშალოს და აეწყოს ახალი სახელმწიფო, ახალი რესპუბლიკა, რომელიც დაფუძნებული იქნება ძლიერ მოქალაქეებზე. ამას ემსახურებოდა ის პრაიმერიზიც. ეს არის სწორი სისტემა, როგორც უნდა ვიმუშაოთ და სწორედ ამიტომ, ფედერალიზმი. ფედერალიზმი არ არის სახელმწიფო მოწყობა, ეს არის სისტემა, რომელიც ძალის ისეთ გაწონასწორებას წარმოქმნის, სადაც ადამიანის სიცოცხლეს, მის უნარებს, მის შესაძლებლობებს განსაკუთრებული ფასი ედება.

არჩევნების გარშემო დასმულ კითხვებს პასუხებს სექტემბერში გავცემთ. მინდა გთხოვოთ, თუ კი თქვენი ნდობა გვაქვს, ეს ერთი თვეც მინდა გთხოვოთ ნდობის გამოჩენა. ვიმოქმედებთ, პირველ რიგში, თქვენი ინტერესებიდან გამომდინარე და შემდეგ, ქვეყნის ინტერესების შესაბამისად, რაც გულისხმობს რუსული რეჟიმის შეცვლას“, – განაცხადა თამარ ჩერგოლეიშვილმა.