კომუნიკაციების კომისიამ 2024 წლის საპარლამენტო არჩევნების წინასაარჩევნო პერიოდის გაშუქებისას კანონმდებლობის დაცვის მიზნით, მაუწყებლებისთვის საარჩევნო საკითხების რეგულირებასთან დაკავშირებით გზამკვლევი გამოაქვეყნა. ინფორმაციას ამის შესახებ კომუნიკაციების კომისია ავრცელებს.

მათივე ცნობით, გზამკვლევის მიზანია, მაუწყებლებისთვის მკაფიო და განჭვრეტადი გახადოს ის საკითხები, რომლებიც არჩევნების გაშუქებისას საქართველოს კანონმდებლობასთან სრულ შესაბამისობაში უნდა იყოს.

„გამოქვეყნებული დოკუმენტი საინფორმაციო-სარეკომენდაციო ხასიათისაა და მაუწყებლებს დაეხმარება მათი საქმიანობის სწორად წარმართვაში, ასევე მედიის წარმომადგენლებისთვის წინასწარ განჭვრეტადი იქნება წინასაარჩევნო მედიამონიტორინგისას კომუნიკაციების კომისიის როგორც ხედვები, ისე კანონმდებლობის დარღვევების შემთხვევაში, კომისიის მიდგომები.

გზამკვლევში მიმოხილულია მაუწყებლებისთვის განსაზღვრული ვალდებულებები, მათ შორის პოლიტიკური რეკლამის მიმართ მოთხოვნები, ასევე, მაუწყებლების ვალდებულებები ფასიან და უფასო პოლიტიკური რეკლამის ეთერში განთავსებასთან, საზოგადოებრივი აზრის კვლევების გამოქვეყნებასა და წინასაარჩევნო დებატებთან დაკავშირებით, როგორც შინაარსობრივი, ისე გავრცელებისთვის განსაზღვრული პერიოდის კუთხით. დოკუმენტში ასევე მოცემულია მედიის მიერ საარჩევნო საკითხების მომწესრიგებელი კანონმდებლობის დარღვევისთვის პასუხისმგებლობის დაკისრების სამართლებრივი ნორმების მიმოხილვა, მათ შორის „მაუწყებლობის შესახებ“ საქართველოს კანონის, საარჩევნო კოდექსისა და კომუნიკაციების კომისიის მიერ მიღებული დადგენილებების შესაბამისად.

კომუნიკაციების კომისია იმედოვნებს, რომ გზამკვლევი მაუწყებლებს კანონმდებლობით დაკისრებული ვალდებულებების შესრულებაში დაეხმარება“, – ნათქვამია კომუნიკაციების კომისიის მიერ გავრცელებულ ინფორმაციაში.

„ერთიანობა – ნაციონალური მოძრაობის“ პოლიტიკური მდივანი გიორგი ბარამიძე შტაბის ოფისში გამართულ ბრიფინგზე 2008 წლის ომის შესახებ „ქართული ოცნების“ პოლიტსაბჭოს განცხადებას და „ნაციონალური მოძრაობის“ შესაძლო გასამართლების შესახებ მმართველ გუნდში გაკეთებულ განცხადებებს გამოეხმაურა.

გიორგი ბარამიძის თქმით, საზოგადოება მათ 26 ოქტომბერს საკადრის პასუხს გასცემს.

„მინდა, გამოვეხმაურო იმ მოღალატეობრივ განცხადებას, რომელიც გააკეთა ივანიშვილის კრიმინალური ბანდის წარმომადგენელმა და რუსეთის ფედერაციის წარმომადგენელმა გაერო-ში გამოიყენა საქართველოს წინააღმდეგ. გუშინ ვიხილეთ „ქართულ ოცნებად“ წოდებული ამ კრიმინალური ბანდის რეაქცია, რომლებმაც კი არ აღიარეს, რომ შეცდომა მოუვიდათ და შეეშალათ, არამედ კვლავ დაიწყეს იმავეს ლაპარაკი და გააგრძელეს საქართველოს დადანაშაულება რუსეთის საამებლად, პუტინის დავალების შესაბამისად, რუსეთისთვის სისხლიანი ხელების მოსაწმენდად. ამით კიდევ ერთხელ დამტკიცდა, რომ ისინი კი არ ცდებიან და შემთხვევით კი არ მოსდით რაიმე, არამედ პუტინის რეჟიმმა მოღალატეთა ბანდა მოიყვანა ხელისუფლებაში, რადგან სწორედ ეს ღალატი ჩაედინა და სტრასბურგისა და ჰააგის სასამართლოების ერთმნიშვნელოვანი ვერდიქტების მიუხედავად, რომელიც, ცხადია, პუტინს არ მოეწონა, ამ ბანდამ, როგორც საქართველოს ხელისუფლებამ, ილაპარაკოს, რომ არა რუსეთი, არამედ საქართველოს ხელისუფლებაა დამნაშავე ომის გაჩაღებაში საქართველოსვე ტერიტორიაზე. ეს არის მიზანი, რისთვისაც მოიყვანა პუტინმა ეს ბანდა ხელისუფლებაში და ეს არის მიზეზი, რატომაც ზის დღეს პრეზიდენტი მიხეილ სააკაშვილი ციხეში, რატომაც ჰყავთ ბიძინა ივანიშვილსა და პუტინს ტყვედ.

ყველამ დავინახეთ, რომ პრეზიდენტი სააკაშვილი არის ადამიანი, რომელსაც უფრთხის ბიძინა ივანიშვილი, რადგან ის არის მთავარი პრობლემა, ამ მოღალატეთა ბანდის მთავარი პოლიტიკური საპირწონე. ამიტომ ივანიშვილს ეშინია, დაკარგოს ხელისუფლება, პუტინს ეშინია, დაკარგოს მეხუთე კოლონა, რომელიც აქამდე შეინახა შავი ფულით, კრემლის მიერ მართული ცილისწამებითა და დეზინფორმაციის ნიაღვრით, მოღალატეთა და კორუმპირებულ ადამიანთა ჯგუფი, რომელსაც არ აქვს ფასეულობა და, როგორც ყველამ ვნახეთ, ორ შაურად გაყიდის საქართველოს ეროვნულ ინტერესებს; რომელსაც არც კი რცხვენია, რუსეთი მათ განცხადებას სიტყვასიტყვით რომ იყენებს მსოფლიოში ყველაზე დიდი და გავლენიანი ორგანიზაციის ტრიბუნიდან. ეს არის არა გამოცხადებული, არამედ უკვე დადასტურებული ღალატის ფაქტი. დარწმუნებული ვარ, ქართულმა საზოგადოებამ კარგად დაინახა და 26 ოქტომბერს საკადრის პასუხს გასცემს ამ მოღალატეთა ბანდას. საქართველო 27 ოქტომბერს გაიღვიძებს თავისუფალი, მიხეილ სააკაშვილი იქნება თავისუფალი, საზოგადოება იქნება თავისუფალი კრემლის მარწუხებისგან, ყველანი დავუბრუნდებით საქართველოს ნატო-სა და ევროკავშირში გაერთიანების გზას, რომელიც მიგვიყვანს მშვიდობიან გამთლიანებამდე, იმ ცხოვრებამდე, რომელიც ჩვენი საზოგადოების მიზანია: დევნილების დაბრუნება, უკეთესი საცხოვრებელი პირობები, მაღალი პენსია, დაბალი ფასები, მაღალი ხელფასები, ღირსეული სამუშაო ადგილები. ეს არის, რასაც წინ ეღობება მოღალატეთა ბანდა და რასაც 26 ოქტომბერს წერტილს დაუსვამს ქართველი ხალხი“, – განაცხადა გიორგი ბარამიძემ.

2008 წლის ომის დროს „ნაციონალური მოძრაობის“ მიერ ჩადენილი დანაშაულების შესახებ ფრაქცია „ქართული ოცნების“ თავმჯდომარის მოადგილე ლევან მაჭავარიანმა ისაუბრა. მისი თქმით, დადგა დრო, რომ ამ პარტიამ კითხვებზე პასუხი გასცეს.

„ჩვენთვის აუცილებელი იყო, რომ მოგვეგო ის პროცესები, რომლებიც სტრასბურგში და ჰააგაში მოვიგეთ და ყველანაირი რისკი მოხსნილიყო, რომ ჩვენს სამხედროებს რაიმე დაჰბრალებოდათ. ჩვენ ეს ყველაფერი გადავაზღვიეთ და ახლა დადგა დრო, როდესაც „ნაციონალურმა მოძრაობამ“ ძალიან ბევრ კითხვას უნდა გასცეს პასუხი“, – აღნიშნა მაჭავრიანმა.

მმართველი გუნდი „ნაციონალური მოძრაობისთვის“ სამართლებრივი პასუხისმგებლობის დაკისრებისთვის ემზადება. ფორმა ჯერ გადაწყვეტილი არ არის, თუმცა, „ქართულ ოცნებაში“ ამბობენ, რომ 2008 წლის აგვისტოს ომის დანაშაულებისთვის ყოფილმა სახელისუფლებო ძალამ პასუხი სწორედ სამართლებრივად უნდა აგოს.