საქართველოს ინტერესებში არ შედის, რომ ორ დიდ თუ ნებისმიერ სახელმწიფოთა შორის დაპირისპირების ინსპირატორი იყოს – ჩვენ არ ვართ დაინტერესებული ანტიჩინური ან, მითუმეტეს, ანტიამერიკული პროპაგანდის ადგილი გავხდეთ – ოპოზიციას ფუნდამენტური პრობლემა აქვს, მათ არ აქვთ ქვეყნის შიგნით არანაირი პოზიტიური დღის წესრიგი, ვერ შექმნეს და ვერც საგნობრივი კრიტიკა მოახერხეს, – ამის შესახებ საპარლამენტო უმრავლესობის წევრმა, ირაკლი ქადაგიშვილმა განაცხადა.

მისი თქმით, მმართველი პარტიის ინტერესებში ორ დიდ ქვეყანას შორის დაპირისპირების ინსპირატორის როლის მორგება არ შედის, არამედ „ქართული ოცნების“ ინტერესია, საქართველომ როგორც დემოკრატიული, ისე ეკონომიკური განვითარება მოახერხოს, რაც, მისივე შეფასებით, გამოქვეყნებულ რეიტინგებშიც ნათლად ჩანს.

„რა თქმა უნდა, აშშ ჩვენი სტრატეგიული პარტნიორია და მასთან ურთიერთობა ჩვენთვის მნიშვნელოვანია. მოგეხსენებათ, ურთიერთობის გადატვირთვაზე განცხადება, სწორედ ქართულმა მხარემ გააკეთა. იგივე NED-თან დაკავშირებით, ის კანონი, [„უცხოური გავლენის გამჭვირვალობის შესახებ“] რომელიც ჩვენ მივიღეთ გამჭვირვალობასა და ღიაობას ითვალისწინებს. როცა იქნება გამჭვირვალობა და ღიაობა მაშინ აღარ იქნება საფრთხე, საშიშროება და სპეკულაცია, იმასთან დაკავშირებით, აფინანსებს თუ არა ეს ორგანიზაცია სხვადასხვა არასამთავრობო ორგანიზაციებს, მათ შორის არაკონსტიტუციური მიზნების მიღწევის უზრუნველსაყოფად. ამიტომ გამჭვირვალობა არის ყველაზე კარგი პრევენცია. NED-ს თავისი სახელმწიფოს, აშშ-ს წინაშე, სრული გამჭვირვალობა აქვს, სრულად ინფორმირებულია ამერიკის ყველა ინსტიტუტი, აქედან გამომდინარე ჩვენი კანონი რას სთხოვს? რა ანგარიშვალდებულებაც მათ აქვთ საკუთარი ქვეყნის მიმართ, დაახლოებით იმის 10%-იანი ვალდებულება გვინდა რომ საქართველოში იყოს, რომ ელემენტარული გამჭვირვალობა არსებობდეს და არასამთავრობო სექტორი არ იყოს მუდმივად ეჭვების ქვეშ.

ჩვენთვის ძალიან მნიშვნელოვანია ევროპული, ატლანტიკური და ცივილიზაციური ფასეულობები და საქართველო, იმიტომაც არის, რომ ყველა საერთაშორისო რეიტინგებით, დემოკრატიის განვითარების კუთხით, ადამიანების უფლებებისა თუ ბიზნესის, ეკონომიკისა თუ მმართველობის გამჭვირვალობის კუთხით, აშკარად წამატებას აღწევს. ასეთ შემთხვევაში გვინდა, რომ დიდ სახელმწიფოთა ურთიერთობაშიც, მათ შორის, ფასეულობების გავრცელების კუთხით, იყოს პარტნიორული და გამჭვირვალე ურთიერთობა.

საქართველოს ინტერესებში არ შედის, რომ ორ დიდ თუ ნებისმიერ სახელმწიფოთა შორის დაპირისპირების ინსპირატორი იყოს. ერთი მარტივი მიზეზის გამო იმიტომ, რომ ორ დიდ სახელმწიფოს შორის დაპირისპირების ინსპირირება ნიშნავს, რომ თუ ერთი არა, ორივე ერთად „გაგჭყლეტს“. ამიტომ ჩვენს ინტერესებში ეს არ შედის. ჩვენს ინტერესებში შედის, რომ საქართველო განვითარების, იდეების კონცენტრაციის, ევროპასა და აზიას შორის ლოჯისტიკური კავშირის დამამყარებელი, თავისუფლებისა და დემოკრატიის ადგილი იყოს. ჩვენ არ ვართ დაინტერესებული ანტიჩინური ან, მითუმეტეს, ანტიამერიკული პროპაგანდის ადგილი გავხდეთ.

ოპოზიციას ფუნდამენტური პრობლემა აქვს, მათ არ აქვთ ქვეყნის შიგნით არანაირი პოზიტიური დღის წესრიგი, ვერ შექმნეს და ვერც საგნობრივი კრიტიკა მოახერხეს. ისინი მუდმივად თამაშობენ, საქართველოს დასავლეთთან დაპირისპირების პარადიგმას. დასავლეთიდან ამა თუ იმ ძალების მიერ გაკეთებული კრიტიკული განცხადებები, მათთვის სიცოცხლის მთავარი წყაროა. გარე კვებაზე არის რადიკალური ოპოზიცია ჩამოკიდებული“, – განაცხადა ირაკლი ქადაგიშვილმა.

პარლამენტის ფრაქცია „ქართული ოცნების“ თავმჯდომარის მოადგილე, ირაკლი კირცხალია ჩინეთის საგარეო საქმეთა სამინისტროს მიერ „დემოკრატიის ეროვნული ფონდის“ შესახებ გამოქვეყნებულ სტატიას ეხმიანება, სადაც ნათქვამია, რომ „დემოკრატიის ეროვნული ფონდი (NED) მოქმედებს, როგორც აშშ ხელისუფლების „თეთრი ხელთათმანები“, ის დიდი ხანია, დაკავებულია სხვა ქვეყნებში ხელისუფლებების დამხობით, სხვა ქვეყნების შიდა საქმეებში ჩარევით, უთანხმოებისა და კონფრონტაციის გაღვივებით, საზოგადოების შეცდომაში შეყვანით და იდეოლოგიური ინფილტრაციით.

„The New York Times-ის ამერიკული ავტორიტეტული გამოცემის ყოფილი რეპორტიორი სტივენ კინზერი, თუ სწორად მახსოვს, სტატიას აქვეყნებდა NED-თან დაკავშირებით და პირდაპირ აფრთხილებდა უცხოურ მთავრობებს, რომ ვაშინგტონი იყენებს NED-ს გლობალურად, რომ მისთვის არასასურველ მთავრობებს შეუქმნას პრობლემა და მოაწყოს გადატრიალებები. მხოლოდ საქართველოს ჭრილში რომ განვიხილოთ ეს თემა, დავიწყოთ ISFED-ით. გახსოვთ რა ჩაიდინა ESFED-მა პარალელური დათვლის ჭრილში, როგორ შეიყვანა ჩვენი საზოგადოება შეცდომაში და თვე ნახევარი როგორი ოლიმპიური სიმშვიდით და ასევე, ოლიმპიური გულშემატკივრობით აკვირდებოდა ჩვენს დესტრუქციულ ოპოზიციას, რომ როგორმე დესტრუქცია და გადატრიალება მომხდარიყო ქვეყანაში, რაც არ გამოუვიდათ. ასევე, შევახსენებ კანვასის ტრენინგებს, სადაც ჩამობრძანებული აგენტი ტრენერები როგორ ატრენინგებდნენ ჩვენს ახალგაზრდობას და კოლექტიური „ნაცმოძრაობის“ პარტაქტივს, თუ როგორ უნდა შეუტიონ სამთავრობო შენობებს და ა.შ. ბოლოს, „გამჭვირვალობის კანონს“, როდესაც მთლიანად მათი დონორები, აბსოლუტურად სულ ყველა, რა დღეში ჩავარდნენ, რა აჟიოტაჟი ატეხეს გამჭვირვალობის წინააღმდეგ, როდესაც მათი ფარი იყო ყოველთვის ევროკავშირი და გამჭვირვალობა. თურმე, ჩამოეხსნათ ნიღაბი და ყველამ ანახა თავისი სახე, რომ ისინი რეალურად არ არიან არასამთავრობო ორგანიზაციები და სამოქალაქო საზოგადოება, არამედ ესენი არიან ჩვეულებრივი დესტრუქციული პარტიებისთვის ამოფარებული შავი ფულის დასაფინანსებელი წყარო, გამტარები“-განაცხადა ირაკლი კირცხალიამ.

ანალიტიკოსი ზაალ ანჯაფარიძე ჩინეთის საგარეო საქმეთა სამინისტროს ანგარიშს ეხმიანება, სადაც აღნიშნულია, რომ დემოკრატიის ეროვნული ფონდი (NED) მოქმედებს, როგორც აშშ-ის ხელისუფლების „თეთრი ხელთათმანები”, რომელიც დიდი ხანია დაკავებულია სხვა ქვეყნებში ხელისუფლების დამხობით.

„ამერიკული დონორი ორგანიზაცია National Endowment for Democracy რამდენიმე ხნის წინ ჩვენი ხელისუფლების განხილვის და კრიტიკის ობიექტი იყო, საქართველოში გაცემული გრანტების გაუმჭვირვალობის გამო.

ახლახან ჩინეთის საგარეო საქმეთა სამინისტრომ გამოაქვეყნა ვრცელი მასალა ამ ორგანიზაციაზე, რომელიც დახასიათებულია, როგორც აშშ-ის ხელისუფლების „თეთრი ხელთათმანები,“ რომელიც დაკავებულია სხვა ქვეყნებში ხელისუფლებების დამხობით, სხვა ქვეყნების შიდა საქმეებში ჩარევით და ა.შ. მასალა საკმაოდ ვრცელია და აქ შეგიძლიათ გაეცნოთ, ვფიქრობ ღირს გაცნობა.

საკუთარი თავის აღწერაში NED-ს უწერია, რომ ის „ეხმარება დემოკრატიებს დახურულ საზოგადოებებში“, ანუ თავად განსაზღვრავს თუ რომელი საზოგადოებაა დახურული, რომ იქ სიტუაცია გამოასწოროს…..

პირველივე კომენტარში იხილეთ NED-ს მიერ ბოლო წლებში საქართველოში გაცემული გრანტები და თავად შეგიძლიათ იმსჯელოთ თუ ვინ და რისთვის იღებს გრანტს და რამდენად ამომწურავია ინფორმაცია.

საინტერესოა, ისიც, რომ NED საქართველოს რატომღაც არა ევროპას, არამედ ევრაზიის რეგიონს მიაკუთვნებს“, – წერს ზაალ ანჯაფარიძე.

26 ოქტომბრის არჩევნებში მონაწილეობას ვერც კოალიცია და ვერც ბლოკი ვერ მიიღებს. კანონმდებლობით არჩევნებში პოლიტიკური პარტიების მონაწილეობაა დადგენილი, შესაბამისად, თუ ვინმეს სურს, სხვა პოლიტიკური პარტიის სიაში იყოს, მან თავისი პარტია უნდა დატოვოს, – ამის შესახებ ცესკო-ს პრესსპიკერმა, ნათია იოსელიანმა განაცხადა.

მისი თქმით, ცენტრალურმა საარჩევნო კომისიამ 16 აგვისტოს გამართულ სხდომაზე 26 ოქტომბრის პარლამენტის არჩევნებისთვის საარჩევნო სუბიექტებს რიგითი ნომრები მიანიჭა.

„17 პოლიტიკურ გაერთიანებას რიგითი ნომერი მიენიჭა წილისყრით, ხოლო 13 უფლებამოსილ პარტიას – კანონმდებლობით დადგენილი პროცედურების და ვადების დაცვით. მომართული განცხადების საფუძველზე მათ მოითხოვეს გასულ არჩევნებში გამოყენებული რიგითი ნომრის დატოვება, მათ ეს რიგითი ნომრები დარჩათ და ჩვენ ვფიქრობთ, რომ ეს არის ძალიან მნიშვნელოვანი ხელშეწყობა საარჩევნო ადმინისტრაციის მხრიდან არჩევნების მზადების პროცესში, რათა ყველა საარჩევნო სუბიექტისთვის იყოს თანაბარი საარჩევნო გარემო და თანაბარი პირობები. 26 ოქტომბრის პარლამენტის არჩევნებისთვის კოალიციები, ბლოკები არ არის გათვალისწინებული, არჩევნებში მონაწილეობას მხოლოდ და მხოლოდ პოლიტიკური გაერთიანებები იღებენ და თუ ვინმეს სურს, არჩევნებში მონაწილეობა მიიღოს სხვა პოლიტიკური პარტიის სიით, ამ შემთხვევაში მან უნდა დატოვოს საკუთარი პარტია. ასე რომ, არჩევნები წინ არის, არჩევნების დანიშვნის შემდეგ ეს ყველაფერი გახდება უკვე ცხადი, ვინ ვის პარტიულ სიაში იქნება და როგორ მიიღებენ არჩევნებში მონაწილეობას“, – განაცხადა ნათია იოსელიანმა.