სომხეთის პრემიერ-მინისტრი ნიკოლ ფაშინიანი და აზერბაიჯანის პრეზიდენტი ილჰამ ალიევი ერთმანეთს ირლანდიის დედაქალაქ დუბლინში ევროპის პოლიტიკური საზოგადოების მეცხრე სამიტის ფარგლებში შეხვდნენ.

სომხეთის პრემიერ-მინისტრის ადმინისტრაციის ცნობით, ლიდერებმა გაცვალეს მოსაზრებები სომხეთსა და აზერბაიჯანს შორის სამშვიდობო დღის წესრიგის წინსვლის შესახებ, 2025 წლის 8 აგვისტოს ვაშინგტონში გამართული სამშვიდობო სამიტის შედეგებსა და სამიტზე ხელმოწერილ ვაშინგტონის ერთობლივ დეკლარაციაზე დაყრდნობით. მათივე ცნობით, მოლაპარაკებები ფოკუსირებული იყო ორ ქვეყანას შორის მშვიდობის განმტკიცების პრაქტიკულ ნაბიჯებზე.

ამასთან, ის მოიცავდა სატრანსპორტო და სატრანზიტო კავშირების განვითარებას, ეკონომიკური და სავაჭრო ურთიერთობების გაძლიერებას, საზღვრის დელიმიტაციას და ნდობის აღდგენის ზომების განხორციელებას.

როგორც ცნობილია, ლიდერებმა განიხილეს ტრამპის საერთაშორისო მშვიდობისა და კეთილდღეობის მარშრუტის (TRIPP) პროგრესი. მხარეებმა ასევე გაცვალეს მოსაზრებები ეკონომიკური და სავაჭრო ურთიერთობების შემდგომი განვითარების შესაძლებლობებზე, მათ შორის მათი ელექტროქსელების დაგეგმილ ურთიერთდაკავშირებაზე.

აზერბაიჯანული მედია წერს, რომ ალიევიმა და ფაშინიანმა კიდევ ერთხელ დაადასტურეს სამშვიდობო პროცესში პოზიტიური იმპულსის შენარჩუნებისა და რეგიონში მშვიდობის, სტაბილურობისა და კეთილდღეობის განმტკიცებისკენ მიმართული დიალოგის გაგრძელების მნიშვნელობა.