ლისაბონში მიმდინარე Web Summit-ი არის უმსხვილესი საერთაშორისო პლატფორმა, რომელიც ტექნოლოგიების, ინოვაციების, სტარტაპების სფეროში ყოველწლიურად დაახლოებით 100 000 პროფესიონალს, ინვესტორს აერთიანებს და აქ საქართველო მეოთხე წელია, ეროვნული პავილიონითაა წარმოდგენილი, - აცხადებს ეკონომიკისა და მდგრადი განვითარების მინისტრის მოადგილე ირაკლი ნადარეიშვილი, რომელიც პორტუგალიის დედაქალაქში Web Summit 2026-ს ესწრება.

ეკონომიკისა და მდგრადი განვითარების სამინისტროს ინფორმაციით, გამოფენაზე საქართველო წარმოდგენილია მასშტაბური პავილიონით StartUP in Georgia ინიციატივის ფარგლებში, რომელიც საქართველოს ეკონომიკისა და მდგრადი განვითარების სამინისტროს სსიპ საქართველოს ინოვაციებისა და ტექნოლოგიების სააგენტოსა და სსიპ ინვესტიციების სააგენტოს თანამშრომლობით ხორციელდება.

როგორც ირაკლი ნადარეიშვილმა აღნიშნა, სამიტის ფარგლებში უმსხვილეს საერთაშორისო ტექნოლოგიურ კორპორაციებთან დაგეგმილია ორმხრივი შეხვედრები.

„Web Summit-ზე საქართველო წარმოდგენილია ეროვნული პავილიონით - აქ არიან ქართული სტარტაპები. ღონისძიების განმავლობაში იმართება მთელი რიგი დამატებითი ღონისძიებები ქართული სტარტაპებისა და ეკოსისტემის შესახებ.

ჩვენ გვაქვს ორმხრივი შეხვედრები უმსხვილეს საერთაშორისო ტექნოლოგიურ კორპორაციებთან, რომლებიც ასევე არიან წარმოდგენილი ამ პლატფორმაზე", - განაცხადა მინისტრის მოადგილემ.

Web Summit-ი წარმოადგენს გლობალურ პლატფორმას ინოვაციებისა და ტექნოლოგიური იდეების გასაზიარებლად, პარტნიორული ურთიერთობების დასამყარებლად და ეკოსისტემების გასაერთიანებლად. როგორც ეკონომიკისა და მდგრადი განვითარების სამინისტროში აღნიშნავენ, სამიტი უნიკალური შესაძლებლობაა ქვეყნისთვის, საერთაშორისო ასპარეზზე წარადგინოს საკუთარი სტარტაპ ეკოსისტემა, მოიზიდოს საერთაშორისო ინვესტორები და შექმნას ახალი თანამშრომლობის შესაძლებლობები გლობალურ მასშტაბზე.