Home Blog

“ოპოზიცია გეგმავდა გამოეყვანა ხალხი ქუჩაში და იმედოვნებდა, რომ მოეწყობოდა გადატრიალება, მაგრამ გამოუვიდათ ფალსტარტი”

საქართველოში ფინანსები შემოდის დასავლეთიდან და არა მხოლოდ დასავლეთიდან. ძალიან ბევრი ორგანიზაციაა, რომელიც პირდაპირ რუსეთიდან ან ევროპის გავლით რუსული ფულით ფინანსდება. თუმცა, როდესაც დასავლური დაფინანსება ხდება, ამ შემთხვევაში, ჩვენ ესეც უნდა ვიცოდეთ, – განაცხადა ჟურნალისტებთან საუბრისას „ხალხის ძალის“ თავმჯდომარემ სოზარ სუბარმა და დასძინა, რომ საქართველოში შემოსული თანხების გამჭვირვალობისათვის აუცილებელია საფრანგეთის ეროვნული ასამბლეის მიერ მხარდაჭერილი „გარე ჩარევასთან ბრძოლის კანონპროექტის“ მსგავსი კანონის მიღება.

სოზარ სუბარის თქმით, დასავლეთის მხრიდან იყო მცდელობა იმის, რომ ხალხს დაეჯერებინა გამჭვირვალობის შესახებ კანონის მავნებლობის, თუმცა ამ მცდელობამ, საბოლოოდ აჩვენა ის, რომ რადიკალური ოპოზიცია მოქმედებდა ქვეყნის საწინააღმდეგოდ. ოპოზიციის ქმედებას, „ხალხის ძალის“ ლიდერის თქმით, ფარდა აეხადა და ახლა მოსახლეობას მათი ტყუილების აღარ სჯერა.

„უტიფრები, თავხედები და მატყუარები არიან ჩვენი ოპოზიციის წარმომადგენლები და ამიტომაცაა მათი ნდობა ქართულ საზოგადოებაში დასულია ნულის დონეზე. რაც შეეხება კანონს, დიახ ეს კანონი (საფრანგეთის ეროვნული ასამბლეის მიერ მხარდაჭერილი „გარე ჩარევასთან ბრძოლის კანონპროექტის“ მსგავსი კანონი) გვჭირდება იმიტომ, რომ პირველ რიგში, თუ ვინმეს ცუდი მიზნები აქვს საქართველოში, ამის შესახებ ვიცოდეთ და მეორე, ხალხმა იცოდეს კარგი მიზნების შესახებაც. საქართველოში ფინანსები შემოდის დასავლეთიდან და არა მხოლოდ დასავლეთიდან.

ძალიან ბევრი ორგანიზაციაა, რომელიც პირდაპირ რუსეთიდან ან ევროპის გავლით რუსული ფულით ფინანსდება. თუმცა, როდესაც დასავლური დაფინანსება ხდება, ამ შემთხვევაში, ჩვენ ესეც უნდა ვიცოდეთ. მადლობას ვეტყვით ორგანიზაციას, რომელიც ვთქვათ, იტყვის, რომ დააფინანსებს მცხეთის ჯვრის რეაბილიტაციის პროექტს, ან დაეხმარება უქონელ ბავშვებს, ან გასცემს სხვადასხვა დაავადებული ბავშვებისთვის გრანტებს და ა.შ. მეორე მხრივ, უნდა ვიცოდეთ ვინ აფინანსებს ტრენინგებს სახელმწიფო გადატრიალების შესახებ, ესწრება თუ არა ამ ტრენინგებს აშშ-ს ელჩი (ამ შემთხვევაში ეჭვი გვაქვს ყოფილ ელჩზე, კელი დეგნანზე, რომელიც ესწრებოდა აკერმანის ტრენინგებს ბაკურიანში), ფინანსდება თუ არა ჩვენი მეგობარი სახელმწიფოების ფულით ისეთი ტრენინგები, სადაც ასწავლიან ახალგაზრდებს როგორ შეიჭრან პარლამენტში ბულდოზერების გამოყენებით, როგორ ესროლონ „მოლოტოვის კოქტეილები“ პოლიციელებს, როგორ დაწვან პოლიციის მანქანები და ა.შ. ეს ყველაფერი უნდა ვიცოდეთ, რათა მადლობა ვუთხრათ მეგობრებს, იმ ორგანიზაციებს და დონორებს, რომლებიც კარგ საქმეებს აკეთებენ და ისიც უნდა ვიცოდეთ, საქართველოში სახელმწიფო გადატრიალების მოწყობას ვინ ცდილობს.

გასული წლის მარტში ძალიან ცუდი იყო ის, რომ ხალხს დააჯერეს თითქოს არასწორი რამ კეთდებოდა. ადამიანებმაც დაიჯერეს ეს ისე, რომ არც წაუკითხავთ კანონი. ესეც იმიტომ, რომ აშშ-ს სახელმწიფო მდივნის პრესსპიკერი ივიწყებდა იმას, რაც უკრაინაში ხდებოდა, საზარელ სისხლისღვრას, ომს და დღეში სამჯერ ბრიფინგს ატარებდა უწყინარ, მაგრამ საქართველოსთვის ძალიან საჭირო კანონის თემაზე. ხალხმა დაიჯერა, რომ რაღაც ძალიან ცუდი ხდებოდა და 7 და 8 აპრილის გამოსვლების შემდეგ, გადაწყდა კანონპროექტის გაწვევა. თუმცა, პირდაპირ ვამბობ, რომ ეს იყო პიროსის გამარჯვება მაშინდელი ოპოზიციისთვის და რადიკალური NGO-ებისთვის, იმიტომ, რომ ზუსტად ამ უკან დახევამ მოგვცა საშუალება ფარდა ჩამოგვეხსნა მათი ანტისახელმწიფოებრივი საქმიანობისთვის. მას შემდეგ ხალხი ასე ადვილად არ იჯერებს მათ ტყუილებს და კიდევ ერთი მთავარი საკითხი, რის გამოც ეს იყო პიროსის გამარჯვება – ისინი ცდილობდნენ დაეგროვებინათ მუხტი გასული წლის ბოლოსათვის, რათა თუ საქართველო არ მიიღებდა კანდიდატის სტატუსს, ეს დაებრალებინათ ხელისუფლებისათვის, რის შემდეგაც გეგმავდნენ გამოეყვანათ ხალხი ქუჩაში და იმედოვნებდნენ, რომ მოეწყობოდა გადატრიალება, მაგრამ გამოუვიდათ ფალსტარტი, გამოუვიდათ პიროსის გამარჯვება და ვერაფერსაც ვერ მიაღწიეს. საბოლოოდ საქართველომ მიიღო დამსახურებულად კანდიდატის სტატუსი,” – განაცხადა სოზარ სუბარმა.

“ვემზადებით რაფაჰში შესასვლელად” – ნეთანიაჰუ

ტერორისტული ორგანიზაცია „ჰამასის“ მიერ მძევლად აყვანილი ისრაელელი ჯარისკაცების ოჯახებთან შეხვედრისას ისრაელის პრემიერ-მინისტრმა, ბენიამინ ნეთანიაჰუმ პირობა დადო, რომ მთავრობა არავის მიატოვებს.

„ვიცი, რომ ყოველი დღე ჯოჯოხეთია. თქვენი შვილები ჩვენი გმირები არიან. ისრაელის გმირები“, – აღნიშნა ისრაელის მთავრობის მეთაურმა.

ბენიამინ ნეთანიაჰუმ მძევლების ოჯახებს განუცხადა, რომ მხოლოდ სამხედრო ზეწოლა უზრუნველყოფს მძევლების გათავისუფლებას და აღნიშნა, რომ ისრაელი „ემზადება რაფაჰში შესასვლელად“.

“საქართველოს რელიგიური მრავალფეროვნება ჩვენი ქვეყნის ერთ-ერთი უმთავრესი სიმდიდრეა” – ირაკლი კობახიძე

საქართველოს რელიგიური მრავალფეროვნება ჩვენი ქვეყნის ერთ-ერთი უმთავრესი სიმდიდრეა, – ამის შესახებ საქართველოს პრემიერ-მინისტრმა ირაკლი კობახიძემ მუსლიმი თემის პატივსაცემად გამართულ იფთარზე სიტყვით გამოსვლისას განაცხადა.

მთავრობის მეთაურმა მუსლიმ თემს რამადანის ერთთვიანი მარხვის დასრულება მიულოცა და ბედნიერება, კეთილდღეობა, წარმატებები უსურვა.

„მუსლიმ თემს,  ჩვენს განუყოფელ ნაწილს, ძალიან დიდი წვლილი შეაქვს ჩვენი ქვეყნის  აღმშენებლობაში და ჩვენს ძმობას ძალიან დიდი ისტორია უმაგრებს ზურგს. საქართველო უნიკალური ქვეყანაა, სადაც ქართველი და აზერბაიჯანელი, შიიტი და სუნიტი მუსლიმები ერთსა და იმავე მეჩეთში ლოცულობენ. ჩვენთვის ძალიან ძვირფასია მშვიდობიანი თანაცხოვრების, ძმობის  ეს ტრადიცია და ამას საქმითაც ვამტკიცებთ. სახელმწიფომ მუსლიმ თემს დღემდე გადასცა 237 მეჩეთი, გადასაცემად გამზადებულია კიდევ 20. სახელმწიფომ მუსლიმ თემს დაფინანსება გაუზარდა 4 150 000 ლარამდე და ეკონომიკური ზრდის კვალდაკვალ ეს მხარდაჭერა კიდევ უფრო მეტად გაიზრდება. საქართველოს რელიგიური მრავალფეროვნება ჩვენი ქვეყნის ერთ-ერთი უმთავრესი სიმდიდრეა. დღესაც, თანამედროვე ქართული სახელმწიფოს შენებისას, საზოგადოების ყველა ჯგუფს, ყველა რელიგიურ თემს, თითოეულ ინდივიდს უნდა ჰქონდეს განცდა, რომ ამ პროცესის სრულფასოვანი მონაწილეა და ამისთვის ჩვენ, სახელმწიფო, მომავალშიც ყველაფერს გავაკეთებთ,”- განაცხადა პრემიერმა.

იფთარზე შეკრებილ მუსლიმ თემს სიტყვით მიმართეს რელიგიის საკითხთა სახელმწიფო სააგენტოს თავმჯდომარე ზაზა ვაშაყმაძემ, საქართველოს მუსლიმთა შეიხმა ფაიგ ნაბიევმა, დასავლეთ საქართველოს მუფთმა ადამ შანთაძემ და აღმოსავლეთ საქართველოს მუფთმა ეტიბარ ემინოვმა.

საქართველოს პრემიერ-მინისტრის სახელით მუსლიმი თემის პატივსაცემად გამართულ იფთარს სახელმწიფო მინისტრი შერიგებისა და სამოქალაქო თანასწორობის საკითხებში თეა ახვლედიანი, დიპლომატიური კორპუსის წარმომადგენლები და სხვა ოფიციალური პირები დაესწრნენ.

“უკრაინისთვის სასიცოცხლოდ მნიშვნელოვანია, რომ კონგრესმა სწრაფად დაამტკიცოს სამხედრო დახმარების ახალი პაკეტი კიევისთვის”

უკრაინისთვის სასიცოცხლოდ მნიშვნელოვანია, რომ კონგრესმა სწრაფად დაამტკიცოს სამხედრო დახმარების ახალი პაკეტი კიევისთვის, – ამის შესახებ უკრაინის პრეზიდენტმა, ვოლოდიმირ ზელენსკიმ აშშ-ის წარმომადგენელთა პალატის სპიკერს, მაიკ ჯონსონს სატელეფონო საუბრისას განუცხადა.

„კონგრესის მიერ უკრაინისთვის ამერიკის შეერთებული შტატების დახმარების სწრაფი გადაცემა სასიცოცხლოდ მნიშვნელოვანია. ჩვენ ვაღიარებთ, რომ წარმომადგენელთა პალატაში არსებობს განსხვავებული შეხედულებები იმის თაობაზე, თუ როგორ უნდა მოიქცნენ, მაგრამ მთავარია, უკრაინის დახმარების საკითხი გამაერთიანებელ ფაქტორად დარჩეს“, – წერს ზელენსკი „ტვიტერზე“.

ზელენსკიმ განაცხადა, რომ ჯონსონს მიაწოდა ინფორმაცია ბრძოლის ველზე არსებული ვითარების შესახებ და ასევე ისაუბრა „რუსეთის საჰაერო ტერორის დრამატულ ზრდაზე“.

ბაკურიანში, ზვავსაშიშროების გამო, სამძებრო სამუშაოები შეწყდა

ბაკურიანში, თოვლის მასაში მოყოლილი პირის ძებნა-შველის ოპერაცია ზვავსაშიშროების გამო, დროებით შეწყვეტილია.

ამის შესახებ საგანგებო სიტუაციების მართვის სამსახურში აცხადებენ.

მათი ინფორმაციით, სამძებრო სამუშაოები შესაძლებლობისთანავე გაგრძელდება.

შეგახსენებთ, რომ ბაკურიანში თოვლის მასა დღეს ჩამოიშალა და ზვავში, სავარაუდოდ, ერთი ადამიანია მოყოლილია. მის ძებნა-შველის ოპერაციაში სამაშველო დრონები და საგანგებო სიტუაციების მართვის სამსახურის განსაკუთრებულ სიტუაციებზე რეაგირების მთავარი სამმართველოს მაშველები არიან ჩართული.

“ჩემი საქმით მივდივარ გაეროს ადამიანის უფლებათა კომიტეტში” – ნიკა გვარამია

მივიღე გადაწყვეტილება და ჩემი საქმით მივდივარ გაეროს ადამიანის უფლებათა კომიტეტში, – ამის შესახებ პოლიტიკური პარტია „ახალის“ ერთ-ერთი ლიდერი, ნიკა გვარამია სოციალურ ქსელში წერს.

როგორც გვარამია წერს, გაეროს ადამიანის უფლებათა კომიტეტის მანდატი მთელ მსოფილოზე ვრცელდება და მას ნაკლებად აინტერესებს ევროპული სასამართლოს გადაწყვეტილებები.

„ჩემს (გაოგნებულ) ამერიკელ და ბრიტანელ იურისტებთან კონსულტაციის შემდეგ, მივიღე გადაწყვეტილება და ჩემი საქმით მივდივარ გაეროს ადამიანის უფლებათა კომიტეტში, რომლის მანდატი მთელ მსოფილოზე ვრცელდება და რომელსაც ნაკლებად აინტერესებს ევროპული სასამართლოს გადაწყვეტილებები. კომიტეტის გადაწყვეტილება შესასრულებლად სავალდებულოა საქართველოსთვის და მის პრაქტიკაში მრავლადაა საქმეები, სადაც სტრასბურგის გადაწყვეტილება (მით უმეტეს, ერთი მოსამართლის გადაწყვეტილება დასაშვებობაზე) სრულიად უგულვებელყოფილია და სხვა შინაარსის დასკვნებია გაკეთებული.

მეტი კომენტარი ამ საკითხზე ჩემგან აღარ იქნება. სხვა თუ არაფერი, სამართლებრივი ეთიკის საკითხია, რომ უფრო მეტად აღარ განვავრცო ეს საკთხი“,- წერს გვარამია.

ინფორმაციისათვის, „რუსთავი2“-ის საქმესთან დაკავშირებით სტრასბურგის ადამიანის უფლებათა სასამართლომ განსახილველად არ მიიღო ნიკა გვარამიას სარჩელი. ამის შესახებ თავად გვარამიამ სოციალურ ქსელში დაწერა.

გვარამიამ სტრასბურგის სასამართლოს მაშ დემდეგ მიმართა, რაც მისი სარჩელი უზენაესმა სასამართლომ არ მიიღო და ძალაში სააპელაციო სასამართლოს გადაწყვეტილება დატოვა, რომლის მიხედვითაც, ნიკა გვარამია პატიმრობაში რჩებოდა.

“რუსეთის შეტევა მაისის ბოლოს ან ივნისში შეიძლება დაიწყოს, ხოლო უცხოური დახმარება უკრაინას ახლა სჭირდება”

უკრაინას დახმარება სჭირდება, რათა რუსეთის შეტევისთვის მოემზადოს. ამის შესახებ უკრაინის პრეზიდენტმა ვოლოდიმირ ზელენსკიმ ამერიკულ ტელეარხ CBS-თან ინტერვიუში განაცხადა.

ზელენსკის თქმით, რუსეთის შეტევა მაისის ბოლოს ან ივნისში შეიძლება დაიწყოს, ხოლო უცხოური დახმარება უკრაინას ახლა სჭირდება, რათა ვითარების სტაბილიზება მოახდინოს.

უკრაინის პრეზიდენტმა ინტერვიუ სუმის ოლქში მისცა, რომელიც მუდმივი საარტილერიო დაბომბვების პირობებშია.

“ჩვეულებრივ, როდესაც არტილერიით უტევენ და სოფლებს ანადგურებენ, ამის შემდეგ ისინი ყოველთვის მათ ოკუპირებას ცდილობენ”, – განაცხადა ზელენსკიმ.

ასევე, მან სასაცილო უწოდა მოსკოვში ტერაქტის მომზადებაში უკრაინის დადანაშაულების მცდელობებს.

“მას [პუტინს] არ აღელვებს ეს ტერორისტული აქტია, ეკონომიკური აქტია, ნავთობის მრეწველობაა თუ ამ სფეროებიდან რომელიმე… [ის] გამოიყენებს ამას თავისი საზოგადოების მაქსიმალურად გასაერთიანებლად – მიუხედავად იმისა, რომ მოსკოვში მსხვერპლისა და დაჭრილების ასეთი რაოდენობაა, ის ამ ყველაფერს მხოლოდ ერთი მიზნისთვის იყენებს – გაამართლოს, რომ უკრაინა არ არსებობს”, – განაცხადა ზელენსკიმ.

უკრაინის პრეზიდენტმა აღნიშნა, რომ პუტინის მიზანია საბჭოთა კავშირს მისი იმპერიული დიდება და გეოგრაფიული საზღვრები დაუბრუნოს.

“მისთვის ჩვენ რუსეთის ფედერაციის სატელიტი ვართ. ამ მომენტისთვის ეს ჩვენ ვართ, შემდეგ – ყაზახეთი, შემდეგ ბალტიის ქვეყნები, შემდეგ პოლონეთი, შემდეგ გერმანია. როგორც მინიმუმ გერმანიის ნახევარი…

ეს აგრესიაა და პუტინის არმია შეიძლება ევროპაში მივიდეს, და მაშინ შეერთებული შტატების მოქალაქეებს, შეერთებული შტატების ჯარისკაცებს ევროპის დაცვა მოუწევთ, ვინაიდან ნატოს წევრი არიან”, – განაცხადა ზელენსკიმ.

„მთიანი ყარაბაღიდან დევნილი მთავრობის ზოგიერთი წარმომადგენელი, ნებსით თუ უნებლიეთ, საფრთხეს უქმნის სომხეთის ეროვნულ უსაფრთხოებას“

სომხეთის პრემიერ-მინისტრი ნიკოლ ფაშინიანი აცხადებს, რომ მთიანი ყარაბაღიდან დევნილი გარკვეული წრეები ნებსით თუ უნებლიეთ დგამენ ისეთ ნაბიჯებს, რომლებიც საფრთხეს უქმნის სომხეთის ეროვნულ უსაფრთხოებას. ამის შესახებ ნიკოლ ფაშინიანმა მთავრობის სხდომაზე განაცხადა.

„მინდა, მკაფიოდ განვაცხადო, რომ სომხეთს ერთი მთავრობა ჰყავს და ის ახლა ამ დარბაზშია. მინდა, ეს გზავნილი მკაფიოდ დააფიქსიროთ და საჭიროების შემთხვევაში, უნდა იყოს მიღებული შესაბამისი ზომები, რომ გარე ძალების გარკვეულმა წრეებმა ასევე არ გამოიყენონ ეს სომხეთის ეროვნული უსაფრთხოებისთვის საფრთხის შესაქმნელად. რა გამოდის, რომ ყველას შეუძლია ბინის დაქირავება და აბრის ჩამოკიდება წარწერით – „რაღაც მთავარობა“. უკაცრავად, მაგრამ მსგავსი ქმედებები სახელმწიფოს მისამართით პატივისცემის ხაზს კვეთს, სხვა ლოგიკას იძენს და არ შეიძლება, უპასუხოდ დარჩეს სომხეთის მხრიდან“, – განაცხადა ფაშინიანმა.

ეს განცხადება ფაშინიანმა მას შემდეგ გააკეთა, რაც ფრანგულ გამოცემა „ლე ფიგაროში“ გამოქვეყნდა ინტერვიუ სამველ შახრამანიანთან, რომელმაც ჟურნალისტის კითხვაზე „არსებობს თუ არა მთიანი ყარაბაღის სახელმწიფო და მისი გახიზნული მთავრობა“, ასე უპასუხა: „დიახ, შენობაში, სადაც თქვენ ახლა გმასპინძლობთ, ერევანში, მდებარეობს არცახის პრეზიდენტის ოფისი, ასევე სასამართლო და საკანონმდებლო სტრუქტურების ოფისები“.

ცნობისთვის, შახრამანიანმა შარშან სექტემბერში ხელი მოაწერა ბრძანებას თვითგამოცხადებული მთიანი ყარაბაღის ყველა უწყების თვითლიკვიდაციის შესახებ.

“პოლონეთი და უკრაინა სოფლის მეურნეობის იმპორტთან დაკავშირებული შეთანხმების მიღწევასთან ახლოს არიან” – დონალდ ტუსკი

პოლონეთი და უკრაინა სოფლის მეურნეობის იმპორტთან დაკავშირებული შეთანხმების მიღწევასთან ახლოს არიან, – ამის შესახებ პოლონეთის პრემიერ-მინისტრმა, დონალდ ტუსკმა მთავრობათაშორისი მოლაპარაკებების შემდეგ პრესკონფერენციაზე განაცხადა.

როგორც „როიტერი“ წერს, მოლაპარაკებების შედეგად ამ ეტაპისთვის ვერ გადაიჭრა ის საკითხები, რომლებმაც ფერმერების პროტესტი გამოიწვია.

„რა თქმა უნდა, არც პრემიერ-მინისტრი შმიგალი და არც მე არ ვიქნებით 100%-ით კმაყოფილი, მაგრამ ეს არის ის, რაც თანამედროვე პოლიტიკაშია – გადაწყვეტილებების ძიება, რომელიც, შესაძლოა, ყველა მხარისთვის არ იყოს სასიამოვნო, მაგრამ ის დაიცავს პოლონელი ფერმერების, პოლონელი მწარმოებლების და მეორე მხრივ, უკრაინელთა ძირითად ინტერესებს“, – აღნიშნა დონალდ ტუსკმა უკრაინის პრემიერ-მინისტრ, დენის შმიგალთან ერთად გამართულ პრესკონფერენციაზე.

“გვაქვს მოლოდინი წელსაც, რომ უფრო მეტ ოჯახს დავუბრუნებთ პასუხს მათი გაუჩინარებული ახლობლის ხვედრის თაობაზე” – თეა ახვლედიანი

შერიგებისა და სამოქალაქო თანასწორობის საკითხებში სახელმწიფო მინისტრი თეა ახვლედიანი, პრემიერ-მინისტრ ირაკლი კობახიძესთან, პარლამენტის თავმჯდომარე შალვა პაპუაშვილთან, მინისტრთა კაბინეტისა და პარლამენტის წევრებთან ერთად, ოკუპირებული აფხაზეთის რეგიონიდან გადმოსვენებული, 1990-იანი წლების შეიარაღებული მოქმედებების დროს უგზო-უკვლოდ დაკარგულ პირთა სამოქალაქო პანაშვიდს დაესწრო.

სახელმწიფო მინისტრის აპარატისა და წითელი ჯვრის საერთაშორისო კომიტეტის ერთობლივი თანამშრომლობით, ქართველი და აფხაზი მონაწილეებისგან შემდგარი საკოორდინაციო მექანიზმის ფარგლებში, ამჯერად უგზო-უკვლოდ დაკარგული 12 იდენტიფიცირებული პირის გადმოსვენება და ოჯახებისთვის დაბრუნება მოხერხდა, მათგან 10 სამხედრო და 2 მშვიდობიანი მოქალაქეა.

შეიარაღებული მოქმედებების დროს დაღუპულთა სამოქალაქო პანაშვიდი ორი დღის განმავლობაში სამების საკათედრო ტაძარში მიმდინარეობდა. 5 მებრძოლი დიღმის ძმათა სასაფლაოზე, სხვა იდენტიფიცირებულ პირები კი, ოჯახების გადაწყვეტილებით, სხვადასხვა ლოკაციაზე, მათ შორის საგვარეულო სასაფლაოებზე სამხედრო პატივით დაკრძალეს.

„პირველ რიგში მინდა აღვნიშნო, რომ დღეს განსაკუთრებით მძიმე დღეა აფხაზეთში უგზო-უკვლოდ დაკარგულად მიჩნეული კიდევ 12 გადმოსვენებული პირის, აქედან 10 სამხედრო მოსამსახურის, ოჯახებისთვის, რომლებიც 30-წლიანი მოლოდინის ფონზე, კიდევ ერთხელ განიცდიან თავიანთი ახლობლის გარდაცვალების დადასტურებით გამოწვეულ ტკივილს და მე, კიდევ ერთხელ მინდა, მათ თანაგრძნობა გამოვუხატო და გამოვთქვა რწმენა, რომ ამ ხანგრძლივი გაურკვევლობის დასრულება, მცირედ შვებას მაინც მიანიჭებს მათ. საქართველოში 1990-იანი წლების შეიარაღებული მოქმედებებისა და 2008 წლის რუსეთ-საქართველოს ომის შედეგად უგზო-უკვლოდ დაკარგულთა მოძიების სახელმწიფო პროგრამა გრძელდება მთავრობის კიდევ უფრო გაძლიერებული ძალისხმევით და წითელი ჯვრის საერთაშორისო კომიტეტის მხარდაჭერით, რომლის ფარგლებში, გასული წლის განმავლობაში უკვე გაზრდილი დინამიკის გათვალისწინებით, ჩვენ გვაქვს მოლოდინი წელსაც, რომ უფრო მეტ ოჯახს დავუბრუნებთ პასუხს მათი გაუჩინარებული ახლობლის ხვედრის თაობაზე. ჩვენი ხელისუფლების უმთავრესი მიზანი კი არის, რომ განვამტკიცოთ მშვიდობა და მხოლოდ მშვიდობიანი გზით მივაღწიოთ კონფლიქტის მოგვარების ჩვენს ეროვნულ მიზნებს, რათა არასდროს განმეორდეს ჩვენ ქვეყანაში მსგავსი ტრაგედია,”- განაცხადა სახელმწიფო მინისტრმა თეა ახვლედიანმა.

1990-იანი წლების შეიარაღებული მოქმედებებისა და 2008 წლის აგვისტოს ომში უგზო-უკვლოდ დაკარგულთა მოძიების მექანიზმების ფარგლებში, პირველი იდენტიფიცირება და გადმოსვენება 2013 წელს განხორციელდა. ამ დრომდე, მექანიზმების ფარგლებში, ნაპოვნია 604 ადამიანის ნეშტი, მათგან იდენტიფიცირებულია 300. დაახლოებით 2000 ადამიანი ჯერ კიდევ უგზო-უკვლოდ დაკარგულად მიიჩნევა.

ინფორმაციას ამის შესახებ სახელმწიფო მინისტრის აპარატი ავრცელებს.

“პოლონეთის საზღვართან ბლოკადის მოხსნის მხრივ პროგრესი ნამდვილად გვაქვს” – დენის შმიგალი

პოლონეთის საზღვართან ბლოკადის მოხსნის მხრივ პროგრესი ნამდვილად გვაქვს. ამის შესახებ უკრაინის პრემიერ-მინისტრმა დენის შმიგალმა უკრაინულ-პოლონური სამთავრობო კონსულტაციების შემდეგ გამართულ ბრიფინგზე განაცხადა.

“დღეს შემიძლია ვთქვა, რომ ნამდვილად გვაქვს პროგრესი ბლოკადის მოხსნასთან დაკავშირებით, მთავარია – ყველა კრიტიკული საკითხის მოგვარება, რომლებსაც ასეთ ბლოკადებამდე მივყავართ”, – განაცხადა შმიგალმა.

მან აღნიშნა, რომ აღნიშნული საკითხების მოგვარების გეგმა სრულდება, თუნდაც ისე სწრაფად არა, როგორც უკრაინულ მხარეს სურს.

“ერთმნიშვნელოვნად გვაქვს პოზიტიური ტენდენციები და პოზიტიური დინამიკა, მნიშვნელოვანია ეს დინამიკა შევინარჩუნოთ და სვლა გავაგრძელოთ”, – დასძინა მან.

ცნობისთვის, აქამდე პოლონეთის პრემიერ-მინისტრმა დონალდ ტუსკმა აღნიშნა, რომ კიევი და ვარშავა სოფლის მეურნეობის პროდუქციის იმპორტთან დაკავშირებით შეთანხმებასთან ახლოს არიან.

პარლამენტმა ცესკო-ს თავმჯდომარეობისა და წევრობის კანდიდატების შესარჩევ კონკურსში მონაწილე პირთა მიერ წარმოსადგენი დოკუმენტების ნუსხა გამოაქვეყნა

საქართველოს პარლამენტის თავმჯდომარე შალვა პაპუაშვილმა გამოსცა ბრძანება ცენტრალური საარჩევნო კომისიის თავმჯდომარეობის კანდიდატისა და წევრობის სამი კანდიდატის შესარჩევი ღია კონკურსის ჩატარებისა და ცენტრალური საარჩევნო კომისიის თავმჯდომარეობის კანდიდატისა და წევრობის კანდიდატების შესარჩევი საკონკურსო კომისიის შექმნის შესახებ.

დოკუმენტების წარდგენა შესაძლებელია როგორც პირადად (საქართველოს პარლამენტი, რუსთაველის გამზირი 8), ისე ელექტრონული ფოსტის (contact@parliament.ge) საშუალებით 2024 წლის 9 აპრილის ჩათვლით.

წარსადგენი დოკუმენტების სრული ჩამონათვალის ნახვა პარლამენტის ვებგვერდზეა შესაძლებელი.