Home Blog

„რატომ არის თურქეთი მნიშვნელოვანი ენერგიით მდიდარი ქვეყნებისთვის?“ – TRT

თურქეთის ტელერადიომაუწყებლობის TRT-ის (Türkiye Radyo ve Televizyon) ვებ-გვერდზე გამოქვეყნებულია სტატია სათაურით „რატომ არის თურქეთი მნიშვნელოვანი ენერგიით მდიდარი ქვეყნებისთვის?“, რომელშიც განხილულია თურქეთის როლი ევროპაში ერაყული, ირანული, თურქმენული, რუსული, კატარული და აზერბაიჯანული ენერგეტიკული რესურსების მიწოდების თვალსაზრისით.

გთავაზობთ პუბლიკაციას შემოკლებით:

თურქეთი, ევრაზიისა და ახლო აღმოსავლეთის ენერგეტიკული რეზერვების ევროპაში მიწოდებისთვის გზაჯვარედინზე მდებარეობს.

ამ მიზეზით დაიწყო თურქეთის ენერგოცენტრად ქცევის პროექტი. ამ კონტექსტში თრაკიაში ენერგოსადგური შენდება. ასევე იგეგმება ენერგო ბირჟის დაარსება სტამბოლში, ათაშეჰირის ფინანსურ ცენტრში. პროექტით თურქეთი აღარ იქნება მხოლოდ ბუნებრივი გაზისა და ნავთობის სატრანზიტო ქვეყანა. ის გახდება ქვეყანა, რომელიც უშუალოდ აწარმოებს ენერგეტიკულ ვაჭრობას.

თურქეთის გარშემო არსებულ ყველა ქვეყანას სურს მონაწილეობა მიიღოს ზემოთ აღნიშნულ პროექტში, რადგან რესურსების არსებობის გარდა, მყიდველთა რაოდენობის გაზრდა თანაბრად მნიშვნელოვანია ენერგორესურსების მფლობელ ქვეყნებისთვის.

ერაყი: ქვეყანას აქვს 9 ნავთობის უდიდესი მარაგი მსოფლიოში, დაახლოებით 150 მილიარდი ბარელი ნავთობის მარაგით. ბუნებრივი აირის მარაგი შეესაბამება მსოფლიო მარაგის 1,9%-ს. ერაყისა და თურქეთის მიერ ერთობლივად განხორციელებული განვითარების გზისა და ფავის პორტის პროექტები დიდ გავლენას მოახდენს საერთაშორისო კონიუნქტურაზე. 2028 წელს დაგეგმილი პროექტის დასრულება, სუეცის არხისა და კეთილი იმედის კონცხის ხაზებს დაემატება. ერაყის ნახშირწყალბადების რესურსების გარდა, ყურის რეგიონის ენერგორესურსების ტრანსპორტირება შესაძლებელია ევროპასა და აღმოსავლეთ ხმელთაშუა ზღვაში თურქეთის გავლით. განვითარების გზის პროექტის დასრულების შემდეგ, შესაძლოა, დღის წესრიგში დადგეს ერაყსა და თურქეთს შორის ბუნებრივი აირისა და ნავთობის ახალი მილსადენების მშენებლობაც.

ირანი: თეირანის მთავრობას აქვს დაახლოებით 156 მილიარდი ბარელი ნედლი ნავთობის მარაგი და 34 ტრილიონი კუბური მეტრი ბუნებრივი აირის მარაგი. ამჟამად თურქეთსა და ირანს შორის გადის ბუნებრივი აირის მილსადენი, რომელიც ყოველწლიურად საშუალოდ 6 მილიარდ კუბურ მეტრ ბუნებრივ აირს ატარებს. თუმცა, ირანის ადმინისტრაცია დიდი ენთუზიაზმით არის დაინტერესებული თავისი ბუნებრივი აირის ევროპაში თურქეთის გავლით ტრანსპორტირებასთან დაკავშირებით. ენერგეტიკული ცენტრის შექმნის შემდეგ, ანკარა დარწმუნებულია, რომ თეირანი კარზე დააკაკუნებს ევროპაში ნავთობის მიყიდვის მიზნით.

აზერბაიჯანი: ქვეყანას აქვს 1,5 მილიარდი ტონა ნავთობი და 2,2 ტრილიონი კუბური მეტრი ბუნებრივი აირის მარაგი, რომელიც დადასტურებულია დღევანდელი ტექნოლოგიით. არსებული ბუნებრივი გაზსადენით თურქეთში ყოველწლიურად 12 მილიარდი კუბური მეტრი ბუნებრივი აირი იგზავნება. ამ გაზის 6 მილიარდი კუბური მეტრი ევროპის ქვეყნებში TAP-ის მილსადენით ტრანსპორტირდება. უახლოეს წლებში მილსადენის გამტარუნარიანობის გაორმაგება იგეგმება. მოგვიანებით, შესაძლოა დღის წესრიგში დადგეს ახალი მილსადენების მშენებლობაც.

რუსეთი: რუსეთი, დაახლოებით 38,9 ტრილიონი კუბური მეტრი მარაგით, მსოფლიოში ყველაზე მდიდარი ქვეყანაა ბუნებრივი აირით. რუსეთი ასევე მეექვსე ადგილზეა მსოფლიოში 107 მილიარდ 804 მილიონი ბარელი ნავთობის მარაგით. რუსეთს სურს იყოს თურქეთის ენერგეტიკული ჰაბის მთავარი მიმწოდებელი. ომის დროს, „ჩრდილოეთის ნაკადის“ ფუნქციონირების დაკარგვამ რუსეთი აიძულა მთლიანად თურქეთს მიბრუნებდა. რუსეთს, რომელიც ამ გზით მთლიანად გვერდს აუვლის უკრაინას, სურს გაზარდოს ბუნებრივი აირის ევროპაში გაყიდვები თურქეთის გავლით. რუსეთი თავისი ენერგეტიკული ცენტრის მსოფლიოსთვის გადაცემასთან ერთად „თურქული ნაკადი 2“-ის განხორციელებას გეგმავს.

თურქმენეთი: შეფასებულია, რომ 15 ტრილიონი კუბური მეტრი ბუნებრივი აირის უდიდესი მარაგით მე-4 ქვეყანაა. ქვეყანა ყოველწლიურად თითქმის 100 მილიარდ კუბურ მეტრ ბუნებრივ აირს აწარმოებს. თურქმენეთი თითქმის მთელ ბუნებრივ აირს ყიდის ჩინეთს. ამ მიზეზით, ქვეყანა მიზნად ისახავს საკუთარი რესურსების დივერსიფიკაციას. ცოტა ხნის წინ თურქეთსა და თურქმენეთს შორის ბუნებრივ გაზზე თანამშრომლობის ხელშეკრულება გაფორმდა. ორ ქვეყანას შორის პროექტი მიზნად ისახავს თურქმენეთის ბუნებრივი აირის ბაქოში ტრანსპორტირებას ტანკერებით და TANAP-ის ხაზით მისი ჯერ თურქეთში, შემდეგ კი ევროპის ქვეყნებში გადატანას.

კატარი: ნავთობის მთლიანი მარაგი შეფასებულია 25,2 მილიარდ ბარელად. ქვეყანას, რომელიც ყოველდღიურად აწარმოებს 75,9 მილიონ ტონა ნავთობს, ასევე აქვს 24,7 ტრილიონი კუბური მეტრი ბუნებრივი აირის მარაგი. კატარი, რომელიც ყურის ერთ-ერთი ქვეყანაა, რომელიც ახორციელებს დიდი რაოდენობით ბუნებრივ აირს ექსპორტს ევროპაში, 2020 წლის შემდეგ გაზარდა თავისი ექსპორტი ევროპის ქვეყნებში 65 პროცენტზე მეტი რაოდენობით. ერაყის, ფავის პორტის პროექტს ასევე მოუთმენლად ელის კატარი. ფავის პორტის პროექტის წყალობით, ქვეყანა მიზნად ისახავს გააგზავნოს თავისი ბუნებრივი აირი და ნავთობი ევროპის ქვეყნებში თურქეთის გავლით ტრანსპორტირების ხარჯების შემცირებით.

საუდის არაბეთი: საუდის არაბეთი მეორე ადგილზეა ნავთობის ყველაზე მაღალი მარაგის მქონე ქვეყნებს შორის. საუდის არაბეთს აქვს 266 მილიარდი ბარელი ნავთობის მარაგი. ქვეყანა ყოველდღიურად დაახლოებით 10 მილიონ ბარელ ნედლ ნავთობს აწარმოებს და ამ ნავთობის 7 მილიონი ექსპორტზე გადის. საუდის არაბეთს ასევე აქვს დაახლოებით 9 ტრილიონი კუბური მეტრი ბუნებრივი აირის მარაგი. საუდის არაბეთი მჭიდროდ არის დაინტერესებული ერაყის ფავის პორტით და განვითარების გზების პროექტებით, რაც ხელს შეუწყობს მის გახსნას ევროპაში თურქეთის გავლით.

აღმოსავლეთ ხმელთაშუა ზღვა: შეფასებულია, რომ აღმოსავლეთ ხმელთაშუა ზღვაში არის 1,7 მილიარდი ბარელი ნავთობი და 3,5 ტრილიონი კუბური მეტრი ბუნებრივი აირის მარაგი, სადაც ამჟამად დიდი დავებია სამხრეთ კვიპროსის ბერძნული ადმინისტრაციის ცალმხრივი ნაბიჯების გამო.

წყარო

“სტრასბურგის სასამართლოს ვენდობი, მაგრამ ნიკა გვარამია პოლიტიკური პატიმარი იყო” – პაატა მანჯგალაძე

არაფერი ვიცი, ნიკა გვარამია გაერო-ში რატომ მიდის ან სტრასბურგში რა მოხდა, – ამის შესახებ „სტრატეგია აღმაშენებლის“ წევრმა, პაატა მანჯგალაძემ განაცხადა.

პაატა მანჯგალაძის თქმით, საფუძველი არ აქვს, სტარსბურგის სასამართლოს არ ენდოს.

„საქმის პოლიტიკურობის თაობაზე აზრს ასე მარტივად არ ვიცვლი და იმავე აზრზე ვრჩები, მიუხედავად იმისა, სტრასბურგის სასამართლოში რა პროცედურული შეცდომები დაუშვეს ადვოკატებმა. ავტომობილის გადაადგილების გამო ადამიანს როცა აკავებენ, რა თქმა უნდა, ეს პოლიტიკურია. ხელისუფლებას უნდა, ვთქვა, რომ სტრასბურგის სასამართლოს არ ვენდობი, რასაც ასე არ ვიტყვი. ნიკა გვარამიას იურისტების კარგი ჯგუფი ჰყავს და ამ საქმეს მიხედავენ. სტრასბურგთან არანაირი გამოცდილება არ მქონია, ამიტომ ვერ გეტყვით, უნდა ვენდო თუ – არა, მაგრამ საფუძველი არ მაქვს, არ ვენდო. სტრასბურგის სასამართლოს ვენდობი, მაგრამ ნიკა გვარამია პოლიტიკური პატიმარი იყო. ეს ჩვეულებრივი და მარტივი ლოგიკაა“, – განაცხადა პაატა მანჯგალაძემ.

სტრასბურგის სასამართლომ ნიკა გვარამიას სარჩელი განსახილველად არ მიიღო.

თბილისის საქალაქო სასამართლომ 2022 წლის 16 მაისს ნიკა გვარამიას სამი წლითა და ექვსი თვით პატიმრობა მიუსაჯა ტელეკომპანია „რუსთავი 2“-ის ხელმძღვანელობის პერიოდში უფლებამოსილების ბოროტად გამოყენების საქმეზე. 2022 წლის 2 ნოემბერს სააპელაციო სასამართლომ ნიკა გვარამიას პატიმრობის ვადის ნაწილში გადაწყვეტილება არ შეცვალა. განაჩენი ადვოკატებმა უზენაეს სასამართლოში გაასაჩივრეს. უზენაესმა სასამართლომ კი გვარამიას საქმე განსახილველად არ მიიღო. ნიკა გვარამია სტრასბურგის სასამართლოში სწორედ ამ საქმეს ასაჩივრებდა.

საქართველოს პრეზიდენტმა, სალომე ზურაბიშვილმა ნიკა გვარამია 2023 წლის 22 ივნისს შეიწყალა.

ამასთან, ნიკა გვარამიამ სოციალურ ქსელში დაწერა, რომ მიიღო გადაწყვეტილება, თავისი საქმით „გაერო-ს ადამიანის უფლებათა კომიტეტში წავიდეს“.

„ჩემს (გაოგნებულ) ამერიკელ და ბრიტანელ იურისტებთან კონსულტაციის შემდეგ, მივიღე გადაწყვეტილება და ჩემი საქმით მივდივარ გაერო-ს ადამიანის უფლებათა კომიტეტში, რომლის მანდატი მთელ მსოფლიოზე ვრცელდება და რომელსაც ნაკლებად აინტერესებს ევროპული სასამართლოს გადაწყვეტილებები“, – აღნიშნა გვარამიამ.

“ნაკრების გამარჯვება აჩვენებს, რომ სადაც არის ქვეყნის სიყვარული, ბრძოლის ჟინი და გამარჯვების რწმენა, იქ ყველაფერია შესაძლებელი”

მართლაც ისტორიული გამარჯვება გვაჩუქეს ჩვენმა ბიჭებმა, ნაკრების წევრებმა, – ამის შესახებ საქართველოს პრემიერ-მინისტრმა ირაკლი კობახიძემ ქუთაისის აკაკი წერეთლის სახელობის სახელმწიფო უნივერსიტეტში, რეგიონების სახელმწიფო უნივერსიტეტების სტუდენტებთან შეხვედრისას განაცხადა.

მთავრობის მეთაურმა სტუდენტებს საფეხბურთო წარმატება მიულოცა და აღნიშნა, რომ ემოციები ჯერ არ განელებულა.

„ვისარგებლებ შემთხვევით და მოგილოცავთ საფეხბურთო წარმატებას. ემოციები ჯერ არ განელებულა და არც განელდება კიდევ დიდი ხანი. მართლაც ისტორიული გამარჯვება გვაჩუქეს ჩვენმა ბიჭებმა, ნაკრების წევრებმა და ეს გამარჯვება აჩვენებს, რომ სადაც არის ქვეყნის სიყვარული, ბრძოლის ჟინი და გამარჯვების რწმენა, იქ ყველაფერია შესაძლებელი. აქვე მინდა გისურვოთ მომავალში, თქვენს პროფესიულ ცხოვრებაში ძალიან დიდი წარმატება და გამარჯვებები,”- განაცხადა პრემიერმა.

“ნიკა გვარამიას საქმის დასრულებას ვურჩევდი, მისი საქმე არც სტრასბურგში იყო წასაღები”- იაგო ხვიჩია

ნიკა გვარამიას საქმე პოლიტიკური იყო. როგორ შეიძლება, „ნაცმოძრაობის“ მთავარი პროპაგანდისტის საქმე პოლიტიკური არ ყოფილიყო, რომელიც იმ მუხლით დაიჭირეს, რომლითაც ციხეში სხვა არავინ ზის და არც მჯდარა, თუმცა სტრასბურგის სასამართლო განსახილველად ყველა პოლიტიკურ საქმეს არ იღებს, – ამის შესახებ „გირჩის“ წევრმა, იაგო ხვიჩიამ განაცხადა.

მისი თქმით, ნიკა გვარამიას ადგილზე რომ ყოფილიყო, ამ საქმეს არ გაასაჩივრებდა.

„ნიკა გვარამიას ვურჩევდი, რომ ამ საქმის დასრულება სჯობს. ეს საქმე არც სტრასბურგში არ იყო წასაღები. ჩვენ პოლიტიკოსები ვართ და ამ ქვეყანაში უნდა ვცდილობდეთ, სასამართლო ავაწყოთ. ჩემი აზრით, ჩვეულებრივი ადამიანები საერთაშორისო სასამართლოების იმედად ვერ იქნებიან. საქმეების უდიდესი ნაწილი სხვადასხვა მოტივით განსახილველად არ მიიღება. ვფიქრობ, „გასაჩივრე ისევ“ ასე შეიძლება დასრულდეს არა იმიტომ, რომ გვარამია მტყუანია ან მართალი, არამედ იმიტომ, რომ ასეთი სახის ისტორიები ეფექტური არ არის. მის ადგილზე, ამ საქმეს არ გავასაჩივრებდი. გვარამიამ უნდა გადაწყვიტოს, სამართლებრივ დავაზე რა სამართლებრივ სტრატეგიას აირჩევს. სტრასბურგში განსახილველად ჩვეულებრივი საქმეები არ მიიღება და არ ვიცი, გვარამიას და მის ადვოკატებს რომელ შემთხვევასთან ჰქონდათ საქმე. რა თქმა უნდა, ნიკა გვარამიას საქმე პოლიტიკური იყო. როგორ შეიძლება, „ნაცმოძრაობის“ მთავარი პროპაგანდისტის საქმე პოლიტიკური არ ყოფილიყო, რომელიც იმ მუხლით დაიჭირეს, რომლითაც ციხეში სხვა არავინ ზის და არც მჯდარა. როგორ შეიძლება, ეს საქმე თავისი შინაარსით პოლიტიკური არ ყოფილიყო, თუმცა სტრასბურგის სასამართლო განსახილველად ყველა პოლიტიკურ საქმეს არ იღებს“, – განაცხადა იაგო ხვიჩიამ.

სტრასბურგის სასამართლომ ნიკა გვარამიას სარჩელი განსახილველად არ მიიღო.

თბილისის საქალაქო სასამართლომ 2022 წლის 16 მაისს ნიკა გვარამიას სამი წლითა და ექვსი თვით პატიმრობა მიუსაჯა ტელეკომპანია „რუსთავი 2“-ის ხელმძღვანელობის პერიოდში უფლებამოსილების ბოროტად გამოყენების საქმეზე. 2022 წლის 2 ნოემბერს სააპელაციო სასამართლომ ნიკა გვარამიას პატიმრობის ვადის ნაწილში გადაწყვეტილება არ შეცვალა. განაჩენი ადვოკატებმა უზენაეს სასამართლოში გაასაჩივრეს. უზენაესმა სასამართლომ კი გვარამიას საქმე განსახილველად არ მიიღო. ნიკა გვარამია სტრასბურგის სასამართლოში სწორედ ამ საქმეს ასაჩივრებდა.

საქართველოს პრეზიდენტმა, სალომე ზურაბიშვილმა ნიკა გვარამია 2023 წლის 22 ივნისს შეიწყალა.

ამასთან, ნიკა გვარამიამ გუშინ სოციალურ ქსელში დაწერა, რომ მიიღო გადაწყვეტილება, თავისი საქმით „გაერო-ს ადამიანის უფლებათა კომიტეტში წავიდეს“.

“სტაჟირების პროგრამის მთავარი ამოცანაა, კურსდამთავრებულებს გაუადვილდეთ პროფესიულ ცხოვრებაში შესვლა, რაც მათ ხელს შეუწყობს შემდგომ კარიერულ ზრდაში”

სტაჟირების პროგრამის მთავარი ამოცანაა, კურსდამთავრებულებს გაუადვილდეთ პროფესიულ ცხოვრებაში შესვლა, რაც მათ ხელს შეუწყობს შემდგომ კარიერულ ზრდაში, – ამის შესახებ საქართველოს პრემიერ-მინისტრმა ირაკლი კობახიძემ ქუთაისის აკაკი წერეთლის სახელობის სახელმწიფო უნივერსიტეტში, რეგიონების უნივერსიტეტების სტუდენტებთან შეხვედრისას განაცხადა.

მთავრობის მეთაურმა აღნიშნა, რომ პროგრამის ფარგლებში მთავრობა ითანამშრომლებს როგორც ადგილობრივი თვითმმართველობის ორგანოებთან, ისე კერძო სექტორთან.

„სტაჟირების პროგრამის ძირითად მონახაზზე უკვე გვქონდა საუბარი. საპილოტე რეჟიმში უკვე წელსვე უნდა ამოქმედდეს ეს პროგრამა, 3 000 – ზე მეტი კურსდამთავრებული უნდა იყოზ მიღებული სტაჟირებაზე, პროგრამის ფარგლებში. ჩვენი წარმოდგენით, დაახლოებით 4-თვიანი უნდა იყოს ეს პროგრამა და კურსდამთავრებულები მიღებულნი იქნებიან სტაჟირების პროგრამაზე სხვადასხვა სახელმწიფო უწყებაში. ასევე ჩვენ გვექნება თანამშრომლობა ადგილობრივი თვითმმართველობის ორგანოებთან, რაც განსაკუთრებით საინტერესო შეიძლება იყოს რეგიონების უნივერსიტეტების სტუდენტებისთვის და ვითანამშრომლებთ კერძო სექტორთან, რათა ზოგადად კერძო სტრუქტურებში იყოს უზრუნველყოფილი კურსდამთავრებულების მიღება. ამ პროგრამის მთავარი ამოცანა არის ის, რომ კურსდამთავრებულებს გაუადვილდეთ პროფესიულ ცხოვრებაში შესვლა, რაც მათ ხელს შეუწყობს შემდგომ კარიერულ ზრდაში. ეს არის მთავარი ამოცანა. პარლამენტმა მიიღო ამ საკითხთან დაკავშირებით კანონი ჯერ კიდევ შარშან და სწორედ ამ კანონის საფუძველზე წელს მთავრობამ დააანონსა ეს ახალი პროგრამა,”- განაცხადა პრემიერმა,

ირაკლი კობახიძის თქმით, პროგრამა სტუდენტებთან გამართული კონსულტაციების საფუძველზე, მათი რჩევების გათვალისწინებით ამოქმედდება.

„ბევრი რამ იქნება დამოკიდებული დეტალებზე. ჩვენ არ გვინდა, რომ ცალმხრივად შევიმუშაოთ პროგრამა. ამ პროგრამის მთავარი მოსარგებლეები არიან კურსდამთავრებულები, სტუდენტები და თუ თქვენგან არ მოვისმენთ იმას, თუ როგორ იქნება უკეთესი ამ პროგრამის ჩამოყალიბება, შეიძლება „სტარტი”, დასაწყისი არ გამოვიდეს წარმატებული. ამიტომ გვინდა, კონსულტაციები გავიაროთ, თქვენგან მივიღოთ რჩევები. გავაგრძელებთ კონსულტაციებს და გვინდა, რომ სწორედ ასეთი კონსულტაციების საფუძველზე მივცეთ საბოლოო სახე ანაზღაურებადი სტაჟირების პროგრამას, რომელიც უკვე სექტემბრიდან უნდა ამოქმედდეს.

დარწმუნებული ვარ, რომ დღეს გვექნება ნაყოფიერი დისკუსია ყველა საკითხთან დაკავშირებით. ძალიან ნაყოფიერი იყო სტუდენტებთან წინა შეხვედრა. ველოდებით, რა თქმა უნდა, ასეთივე საინტერესო დისკუსიას თქვენთან,”- აღნიშნა მთავრობის მეთაურმა.

“ფედერაცია ნაკრების წევრებს უქმნის ყველა პირობას, რომ მინდორზე საუკეთესოდ ითამაშონ” – კახა კალაძე

თბილისის მერის განცხადებით, საქართველოს ეროვნული საფეხბურთო ნაკრების წარმატება საერთო ძალისხმევის შედეგია.

კახა კალაძე მავნებლური უწოდა ზოგიერთი პოლიტიკოსის განცხადებებს იმის შესახებ, რომ საქართველოს ეროვნული ნაკრების ისტორიული გამარჯვება ფეხბურთელების დამსახურებაა და არა ფეხბურთის ფედერაციის.

„აქედანაც კარგად ჩანს, თუ ვინ არიან ეს ადამიანები. დარწმუნებული ვარ, მათ ნამდვილად არ გაუხარდათ ეროვნული ნაკრების გამარჯვება და წინსვლა. რა თქმა უნდა, ეს ყველაფერი არის ფეხბურთელების დამსახურება. თუმცა, მხოლოდ ისინი ვერაფერს გააკეთებდნენ, ერთიანი გუნდი რომ არ იყოს. ფეხბურთში მთელი ჩემი ცხოვრება მაქვს გატარებული და ძალიან კარგად ვიცი, რამდენად დიდი მნიშვნელობა აქვს იმას, რომ ფეხბურთელმა, რომელიც ჩამოდის ეროვნულ ნაკრებში, იფიქროს მხოლოდ და მხოლოდ იმაზე, როგორ ითამაშოს საუკეთესოდ მინდორზე. ამისთვის მთლიანად ხელისუფლება და ზოგადად ფედერაცია არის ერთ-ერთი ორგანო, რომელიც ამ ყველაფერს კურირებს. ხელისუფლებამ ამ წლების განმავლობაში, მოახერხა ის, რომ ქვეყანაში შეინარჩუნა მშვიდობა. ამას უდიდესი გავლენა აქვს ყველაფერზე, მათ შორის სპორტზეც. ნახეთ, ბოლო წლებში სპორტში რამდენი გამარჯვება, წარმატება და მედალი გვაქვს. ეს იმ პოლიტიკის დამსახურებაა, რომელსაც „ქართული ოცნების“ ხელისუფლება ატარებს“, – განაცხადა კახა კალაძემ.

მისივე თქმით, ფეხბურთის ფედერაციამ ნაკრების რამდენიმე ფეხბურთელი ჩარტერული რეისით ჩამოაფრინა, რომ გუნდთან ერთად დროულად მომზადებულიყვნენ. ასეთ დამოკიდებულებებს კი, მოაქვს შედეგი.

„ფედერაცია ყველა პირობას ქმნის ფეხბურთის ხელშეწყობისა და განვითარებისთვის – ინფრასტრუქტურის მოწყობა, ახალი მოედნები, ბავშვთა საფეხბურთო სკოლები და ა.შ. არ ვიცი, საერთოდ ვინ არის ეს ადამიანი, რა შეხება აქვს ფეხბურთთან ან იცის თუ არა, რა არის ფეხბურთი. მინდა, ვუთხრა მას, რომ ყველა ამ დეტალს მნიშვნელობა აქვს. საზოგადოებამ არ იცის და ვიტყვი, იყო რამდენიმე ფეხბურთელი, რომელსაც თავის კლუბში ცოტა გვიან ჰქონდა თამაში. იმისთვის, რომ ისინი სწრაფად ჩამოსულიყვნენ და სანაკრებო თამაშებისთვის მომზადებულიყვნენ, ფედერაციამ ჩარტერით ჩამოაფრინა. ეს დამოკიდებულება არსებობს ფედერაციის მხრიდან და სწორედ ამ ყველაფერს მოაქვს შედეგი. გულშემატკივრებს მივმართავ – არ მიაქციოთ ასეთ ბოროტ ადამიანებს ყურადღება. კანდიდატის სტატუსი რომ მივიღეთ, ხომ გახსოვთ მათი სახეები? ახლაც იმავე დღეში არიან. მათ არცერთი გაუხარდათ და არც – მეორე. საქართველო კიდევ ბევრჯერ იზეიმებს და ჩვენი ერთობით, ქვეყნის ტერიტორიულ გამთლიანებასაც მალე მიაღწევს“, – აღნიშნა კახა კალაძემ

“მაკრონის დაპირება უკრაინისათვის დასახმარებლად საფრანგეთის ბიუჯეტს პრობლემებს უქმნის“ – Le Monde

ფრანგული გაზეთი „ლე მონდი“ (Le Monde) აქვეყნებს სტატიას სათაურით „მაკრონის დაპირება უკრაინისათვის დასახმარებლად საფრანგეთის ბიუჯეტს პრობლემებს უქმნის“ (ავტორი – ელიზ ვინსენტი).

გთავაზობთ პუბლიკაციის შინაარსს:

პარიზისა და კიევის შეთანხმება უკრაინისათვის 3 მილიარდი ევროს მოცულობით სამხედრო დახმარების გაწევის თაობაზე, რომელსაც ხელი მიმდინარე წლის 16 თებერვალს მოეწერა, საფრანგეთის მთავრობისათვის თავის ტკივილად იქცა: მი

ნისტრთა კაბინეტი იძულებულია ხარჯები შეამციროს და სხვადასხვა საბუღალტრო „ეშმაკობებს“ მიმართოს.
ჯერ კიდევ თებერვალში ფინანსთა მინისტრმა განაცხადა, რომ საჭიროა ხარჯების შემცირება 10 მილიარდის ევროს მოცულობით, მოგვიანებით ამას კიდევ 3 მილიარდი ევრო დაემატა. ბუნებრივია, ამომრჩევლებს კითხვები ებადებათ – სად მიდის საბიუჯეტო თანხები და რაში იხარჯება თანხა?

განსაკუთრებით დაინტერესებულები არიან ამ კითხვის პასუხით ფრანგი ფერმერები, რომლებიც საპროტესტო აქციებს აწყობდნენ პარიზის ქუჩებში. „იცით, მე ისინი ასეთ კითხვას მისვამდნენ – რატომ ვაძლევთ უკრაინას თანხებს, როცა უფრო მეტი ფული ჩვენ, მოსახლეობას, საფრანგეთის მოქალაქეებს გვჭირდება?“, – ამბობს „ლე მონდთან“ საუბარში მატიე ლეფევრი, ეროვნული კრების დეპუტატი.

საბოლოო ჯამში მთავრობა შეიძლება ისეთ სიტუაციაში აღმოჩნდეს, რომ იძულებული გახდეს პარლამენტში საბიუჯეტო ცვლილებებით წარსდგეს. ოპოზიციური პარტიები პრინციპულად გამოდიან მთავრობის ყოველგვარი საბიუჯეტო ცვლილების წინააღმდეგ. ერთ-ერთმა დეპუტატმა ბასტონ ლაშომ – ულტრამემარცხენე პარტიიდან „დაუმორჩილებელი საფრანგეთი“ – „ლე მონდს“ განუცხადა, რომ უკრაინისადმი საფრანგეთის დახმარების პაკეტს შეიძლება საფრანგეთის პარლამენტში იგივე დაემართოს, რაც ამერიკული დახმარების პაკეტს მოუვიდა კონგრესში, როცა რესპუბლიკელებმა პრეზიდენტ ჯო ბაიდენის ადმინისტრაციის მიერ წარდგენილი კანონპროექტი არ დაამტკიცეს.

საფრანგეთში არსებობს საკონსტიტუციო მექანიზმი, რომელიც 49-ე მუხლის მესამე პუნქტშია განსაზღვრული – პრეზიდენტს შეუძლია კანონები პარლამენტის თანხმობის გარეშეც მიიღოს – ისე, როგორც ემანუელ მაკრონმა საპენსიო რეფორმა განახორციელა. მაგრამ ახლა თუ უკრაინის დახმარების თაობაზეც მაკრონი და მისი მთავრობა იმავენაირად მოიქცევა, ამ შემთხვევაში პრეზიდენტის იმიჯი დარტყმის ქვეშ მოექცევა, საბოლოოდ კი შეიძლება მთავრობის უნდობლობის ვოტუმიც დადგეს.

წყარო

“ატმოსფერულ ჰაერში ფიქსირდება მყარი ნაწილაკების შემცველობის მატება, რაც ძირითადად სამხრეთიდან უდაბნოს მტვრის მასების გავრცელებით არის განპირობებული”

გარემოს ეროვნული სააგენტოს ინფორმაციით, საქართველოს ზოგიერთ რაიონში, ასევე, დედაქალაქში, 29 მარტიდან ატმოსფერულ ჰაერში ფიქსირდება მყარი ნაწილაკების (PM10, PM2.5) შემცველობის მატება, რაც ძირითადად ტრანსსასაზღვრო დაბინძურებას უკავშირდება და სამხრეთიდან და სამხრეთ-აღმოსავლეთიდან უდაბნოს მტვრის მასების გავრცელებით არის განპირობებული.

როგორც გარემოს ეროვნულ სააგენტოში აღნიშნავენ, ტრანსსასაზღვრო დაბინძურება წლის განმავლობაში გარკვეულ დღეებში ფიქსირდება ანალოგიური სინოპტიკური სიტუაციის დროს.

„საქართველოს გარემოს დაცვისა და სოფლის მეურნეობის სამინისტროს სსიპ გარემოს ეროვნული სააგენტო აგრძელებს ატმოსფერული ჰაერის ხარისხის უწყვეტ მონიტორინგს ავტომატური სადგურების საშუალებით. ნებისმიერ დაინტერესებულ პირს შესაძლებლობა აქვს, გაეცნოს ინფორმაციას ჰაერის ხარისხის მდგომარეობის შესახებ და მიიღოს ჯანდაცვითი რეკომენდაციები ატმოსფერული ჰაერის ხარისხის პორტალზე – www.air.gov.ge“, – აღნიშნულია ინფორმაციაში.

“საკონსტიტუციო ცვლილებებთან დაკავშირებით ხალხისთვის მრავლისმთქმელია რადიკალური ოპოზიციისა და კოლექტიური „ნაცმოძრაობის“ სირაქლემას პოზიციაში ყოფნა”

ოჯახურ ღირებულებათა და არასრულწლოვანთა დაცვის შესახებ საკონსტიტუციო ცვლილებებთან დაკავშირებით ხალხისთვის მრავლისმთქმელია რადიკალური ოპოზიციისა და კოლექტიური „ნაცმოძრაობის“ სირაქლემას პოზიციაში ყოფნა, – ამის შესახებ საპარლამენტო უმრავლესობის წევრმა, ალუდა ღუდუშაურმა განაცხადა.

ღუდუშაურის თქმით, საკონსტიტუციო ცვლილებებთან დაკავშირებით საჯარო განხილვებზე ყველას ექნება საშუალება, თავისი პოზიცია დააფიქსიროს და არგუმენტი წარმოადგინოს.

„აღნიშნულ საკითხთან დაკავშირებით აღარ ვაპირებ იმაზე მეტის თქმას, რაც უკვე ითქვა. ჩვენი სათქმელი ვთქვით, ქართულმა საზოგადოებამ ძალიან კარგად იცის, რაზეც არის საუბარი. შემდეგ უკვე გაგრძელდება საჯარო განხილვები, სადაც ყველას ექნება საშუალება, თავისი პოზიცია ან არგუმენტი მოიტანოს და ღია მსჯელობაში დააფიქსიროს. მგონია, რომ აღნიშნულ საკითხთან დაკავშირებით ხალხისთვის მრავლისმთქმელია რადიკალური ოპოზიციისა და კოლექტიური „ნაცმოძრაობის“ სირაქლემას პოზიციაში ყოფნა“, – განაცხადა ალუდა ღუდუშაურმა.

პარტია „ქართულმა ოცნებამ“ ოჯახურ ღირებულებათა და არასრულწლოვანთა დაცვის შესახებ საკონსტიტუციო ცვლილებები მოამზადა.

“მისი განცხადებები რეალობას ძალიან აცდენილია” – კახა კალაძე გახარიაზე

დედაქალაქის მერმა კახა კალაძემ  რეალობას აბსოლუტურად აცდენილი უწოდა გიორგი გახარიას განცხადებას  „ქართული ოცნების“ მომავალ არჩევნებში დამარცხებასა და ოპოზიციაში გადანაცვლებასთან  დაკავშირებით, როდესაც მას ჟურნალისტმა ამის თაობაზე კითხვა დაუსვა.

„არ ვიცი, გახარიამ რა თქვა, მაგრამ  „ქართული ოცნება“ ვერ გაიმარჯვებსო,   არ ვიცი  მაგ განცხადებაზე  რა კომენტარი უნდა გავაკეთო.   პოლიტიკოსი რომ დღევანდელ მოცემულობაში ამ ტიპის განცხადებას აკეთებს, ერთი რამ ცხადია – ან სერიოზული პრობლემები აქვს ან რეალურად ვერ აღიქვამს, რა ხდება ქვეყანაში, რეალობას ძალიან აცდენილია“, – განაცხადა კახა კალაძემ.

რაც შეეხება ჟურნალისტის კითხვას, გახდა თუ არა ირაკლი ღარიბაშვილი თავდაცვის მინისიტრი სწორედ გახარიას ინიციატივით და  არა შინაგან საქმეთა მინისტრი, როგორც ეს პარტიაში იყო დაგეგმილი, კახა კალაძემ უპასუხა, რომ არ აპირებს  გუნდის შიგნით მიმდინარე   მსჯელობებზე საჯაროდ  საუბარს.

„გუნდში ძალიან ბევრ რამეზე მიმდინარეობს მსჯელობა, საუბარი. ამ ყველაფრის სააშკაროზე გამოტანა მე არ მიმაჩნია სწორად და არ ვთვლი საჭიროდ და თუ მას აქვს სურვილი, ისაუბროს რაღაცეებზე, შეიძლება ტყუილი იყოს რაღაცა, შეიძლება რაღაცეები მოიგონოს, მე ნამდვილად არ მაქვს ამ თემაში შესვლის სურვილი“, – განაცხადა თბილისის მერმა.

“ის, რომ კონკრეტული ადამიანები იბრძვიან, როგორმე საარჩევნო ბარიერი გადალახონ, საზოგადოების პასუხია მათ რადიკალიზმზე” – კახა კალაძე

ბოროტების და რადიკალიზმის ადგილი ქართულ პოლიტიკაში არ არის, – ასე უპასუხა თბილისის მერმა კახა კალაძემ ჟურნალისტის მიერ დასმულ კითხვას, ქართული სასამართლოს მიერ გასამართლებული ისეთი ადამიანები, როგორებიც ნიკა მელია და ნიკა გვარამია არიან, უნდა იყვნენ თუ არა პოლიტიკაში.

მისივე განმარტებით, პოლიტიკოსებს, რომლებსაც ბოროტება ამოძრავებთ, საქართველოს მოსახლეობა შესაბამის ადგილს მიუჩენს.

„ის, რომ დღეს ეს კონკრეტული ადამიანები იბრძვიან, როგორმე საარჩევნო ბარიერი გადალახონ, საზოგადოების პასუხია მათ რადიკალიზმზე. დროთა განმავლობაში ყველაფერი დალაგდება. არავის უნდა მიეცეს იმის უფლება ბოროტებით დაიმკვიდროს თავი პოლიტიკაში.  როდესაც გაქვს ამბიცია იყო პოლიტიკაში და საარჩევნო კამპანიის ერთ-ერთი ხაზი მუქარაა, ემუქრები კონკრეტულ ადამიანებს, რომ არჩევნების შემდეგ ისინი ქვეყანაში ვერ იცხოვრებენ, არ არის სწორი. ვინც არის ბოროტებით გაჯერებული, ჩვენი ქვეყნის მოსახლეობა შესაბამის ადგილს მიუჩენს“, – განაცხადა კახა კალაძემ.

როგორი ამინდია მოსალოდნელი სქართველოში

გარემოს ეროვნული სააგენტოს ცნობით, 30 მარტს საქართველოს ზოგიერთ რაიონში სითბოს ფონზე ხანმოკლე წვიმა და ელჭექია მოსალოდნელი, ხოლო 31 მარტს და 1-ელ აპრილს ქვეყნის ტერიტორიის უმეტეს ნაწილზე თბილი და უნალექო ამინდი იქნება.

ამასთან, აღნიშნავენ, რომ თბილისში 30 მარტს სითბოს ფონზე შესაძლოა ხანმოკლე წვიმა და ქარი აღინიშნოს, ხოლო 31 მარტს და 1-ელ აპრილს თბილი და უნალექო ამინდია მოსალოდნელი. ჰაერის ტემპერატურა დღისით +20, +22 გრადუსამდე მოიმატებს.

„სანაპირო რაიონებში (ბათუმი, ქობულეთი, ანაკლია, ფოთი): 30 მარტს სითბოს ფონზე ხანმოკლე წვიმა და ელჭექია მოსალოდნელი, ხოლო 31 მარტს და 1 აპრილს თბილი და უნალექო ამინდი იქნება. ჰაერის ტემპერატურა დღისით +24, +26 გრადუსამდე მოიმატებს.

დასავლეთ საქართველოს დაბლობ რაიონებში (ქუთაისი, ზესტაფონი, ზუგდიდი, მარტვილი, ოზურგეთი): 30 მარტს სითბოს ფონზე ხანმოკლე წვიმა და ელჭექია მოსალოდნელი, ხოლო 31 მარტს და 1-ელ აპრილს თბილი და უნალექო ამინდი იქნება. ჰაერის ტემპერატურა დღისით +23, +25 გრადუსი დაფიქსირდება.

დასავლეთ საქართველოს მთიან რეგიონებში (ამბროლაური, ონი, ცაგერი, შოვი, ჭიათურა, საჩხერე, ხულო): 30 მარტს სითბოს ფონზე ხანმოკლე წვიმაა მოსალოდნელი, ხოლო 31 მარტს და 1-ელ აპრილს თბილი და უნალექო ამინდი იქნება. ჰაერის ტემპერატურა დღისით +21, +23 გრადუსამდე მოიმატებს.

დასავლეთ საქართველოს მაღალმთიან რეგიონებში (მესტია, ბახმარო): 30 მარტს სითბოს ფონზე ხანმოკლე წვიმაა მოსალოდნელი, ხოლო 31 მარტს და 1 აპრილს თბილი და უნალექო ამინდია მოსალოდნელი. ჰაერის ტემპერატურა დღისით +13, +18 გრადუსი დაფიქსირდება.

ქართლში (რუსთავი, ბოლნისი, მარნეული, გარდაბანი, გორი, ცხინვალი): 30 მარტს სითბოს ფონზე ზოგან გაწვიმდება, ხოლო 31 მარტს და 1-ელ აპრილს თბილი და უნალექო ამინდია მოსალოდნელი. ჰაერის ტემპერატურა დღისით +17, +22 გრადუსი იქნება.

კახეთში (საგარეჯო, თელავი, გურჯაანი, სიღნაღი, ლაგოდეხი, ყვარელი, ახმეტა, დედოფლისწყარო): 30 მარტს სითბოს ფონზე ზოგან გაწვიმდება, ხოლო 31 მარტს და 1-ელ აპრილს თბილი და უნალექო ამინდია მოსალოდნელი. ჰაერის ტემპერატურა დღისით +17, +22 გრადუსი იქნება.

აღმოსავლეთ საქართველოს მთიან რეგიონებში (ახალციხე, ბორჯომი, დუშეთი, თიანეთი, ფასანაური, დედოფლისწყარო): 30 მარტს სითბოს ფონზე ზოგან გაწვიმდება, ხოლო 31 მარტს და 1-ელ აპრილს თბილი და უნალექო ამინდია მოსალოდნელი. ჰაერის ტემპერატურა დღისით +15, +20 გრადუსი იქნება.

აღმოსავლეთ საქართველოს მაღალმთიან რეგიონებში (ახალქალაქი, წალკა, ბაკურიანი, გუდაური, ომალო): 30 მარტს ზოგან თოვლჭყაპია შესაძლებელი, ხოლო 31 მარტს და 1-ელ აპრილს უნალექო ამინდია მოსალოდნელი. ჰაერის ტემპერატურა დღისით +10, +15 გრადუსი იქნება“,-აღნიშნულია ინფორმაციაში.