პროტესტი არ შეჩერდება – ყაიმით ეს პროცესი ვერ დასრულდება, ეს პროცესი დამთავრდება ხალხის გამარჯვებით, – ამის შესახებ პარტია „ახალის“ ერთ-ერთმა ლიდერმა, ნიკა მელიამ მთავრობის ადმინისტრაციის წინ მიმდინარე აქციაზე განაცხადა.

ნიკა მელიას განცხადებით, აქციის მონაწილეების გეგმაა, რომ პროცესი სახელმწიფოს გამარჯვებით დასრულდეს.

„სამოქმედო გეგმა არის ის, რომ დასრულდება პროცესი სიმშვიდით, სიმტკიცით და სახელმწიფოს გამარჯვებით. ივანიშვილი ქვეყანას საგარეო პოლიტიკურ კურსს ვერ შეუცვლის. გეგმაა, რომ ქვეყანა, როგორც სახელმწიფო შედგეს და ევროპული და ეროვნული იდეა იყოს გამარჯვებული ამაზე მეტი იდეა და გეგმა რა უნდა არსებობდეს?

პროტესტი არ შეჩერდება, რასაც ხედავთ ასე იქნება. ნებისმიერი საქართველოს მოქალაქის, სახლი, ოჯახი, სამსახური არის რუსთაველის გამზირი, სანამ არ იქნება სახელმწიფოებრივი საფრთხე განეიტრალებული. ყაიმით ეს პროცესი ვერ დასრულდება, ეს პროცესი დამთავრდება ხალხის გამარჯვებით“, – განაცხადა ნიკა მელიამ.

პარლამენტთან და მთავრობის ადმინისტრაციასთან აქცია დასრულებულია. ამ დროისთვის ადგილზე მოქალაქეთა მცირე ჯგუფი რჩება.

როგორც აქციის ორგანიზატორები აცხადებენ, სამომავლო გეგმების შესახებ საზოგადოებას წინასწარ აცნობებენ.

მათი თქმით, პრობლემის კონსტიტუციურად გადაწყვეტისთვის ყველა რესურსს გამოიყენებენ.

„აქ ჩვენ გვესმოდა, როგორ აბრალებდნენ საზოგადოებას, თურმე რადიკალების შეკრებაა. ვინმემ რამე ნახა დღეს რადიკალური? ეს მშვიდობიანი მსვლელობა იყო დიალოგის მოთხოვნით. პასუხად დუმილი და მშიშარა ადამიანები მივიღეთ. პრემიერ-მინისტრი ამბობდა, რომ მზად იყო ყველასთან ესაუბრა. საუბარია, როდესაც კანცელარიიდან გარბიხარ, პარლამენტში ხალხს არ უსმენ, მიკროფონებს თიშავ? დღეს ვაჩვენეთ ის, რომ საზოგადოება, რომელიც აქ იკრიბება მშვიდობიანია, საქართველოს ბედი აინტერესებს და არა რომელიმე პარტიის ან რომელიმე ორგანიზაციის პერსპექტივა. აქ შეკრებილები ვართ იმისთვის, რათა უზრუნველვყოთ, რომ საქართველო ევროკავშირის წევრი ძალიან მალე გახდეს. ჩვენ ამ პრობლემის კონსტიტუციურად გადაწყვეტისთვის ყველა რესურსს გამოვიყენებთ. ეს გრძელი ბრძოლაა, მაგრამ არსებობს სამი რამ, რაც არ უნდა გავაკეთოთ: არ უნდა დაგვეზაროს, არ უნდა შეგვეშინდეს და არ უნდა დავიღალოთ. დღეს ეს სამივე პირობა დაკმაყოფილებულია. ამისთვის დიდი მადლობა. მართლები ვართ და ამ სიმართლის ხმა მთავრობის ადმინისტრაციაშიც, პარლამენტშიც და ყველა ოფისშიც შეაღწევს. ყველა გეგმის შესახებ, რაც კი გვექნება, ინფორმაციას აუცილებლად გავასაჯაროებთ“, – განაცხადა „საქართველოს ევროპული პლატფორმის“ თანადამფუძნებელმა ლევან ცუცქირიძემ.

აქციის მონაწილეების მოთხოვნა მმართველ გუნდისგან „უცხოური გავლენის გამჭვირვალობის შესახებ“ კანონპროექტის უკან გატანა და აქციებზე დაკავებული მოქალაქეების გათავისუფლებაა.

შეგახსენებთ, რომ პარლამენტის პლენარულ სხდომაზე „უცხოური გავლენის გამჭვირვალობის შესახებ“ კანონპროექტი დღეს პირველი მოსმენით მიიღეს. კანონპროექტის განხილვა მესამე დღეა საკანონმდებლო ორგანოში ხმაურისა და დაპირისპირების ფონზე მიმდინარეობდა.

არსებობს არჩევნები და შეუძლია ნებისმიერს, ვინც ბოლო-ბოლო მაინც ვერ დარწმუნდება, რომ საქართველო მიდის ევროპული გზისკენ, თავისი არჩევანი დემოკრატიულ, თავისუფალ გარემოში დააფიქსიროს, – ამის შესახებ პარლამენტის ვიცე-სპიკერმა, არჩილ თალაკვაძემ „ღამის კურიერის“ ეთერში განაცხადა, რითაც უპასუხა წამყვანის კითხვებს, თუ როგორ განვითარდება მოვლენები გამჭვირვალობის კანონპროექტთან და მიმდინარე საპროტესტო აქციებთან დაკავშირებით.

მისივე თქმით, პროტესტის მიუხედავად, მმართველი გუნდი თავის გასაკეთებელს გააკეთებს.

„გამოხატვის თავისუფლება, შეკრების მანიფესტაციის უფლება არის დაცული სახელმწიფოს მხრიდან. თუ გადავლენ იმ ჩარჩოს და წესებს, რომელიც დემოკრატიულ ქვეყნებში და მათ შორის საქართველოში არის გაწერილი და უნდა იყოს დაცული, მაშინ, რასაკვირველია, იქნება შესაბამისი რეაგირება სახელმწიფო ინსტიტუტების მხრიდან. თუ პროტესტი არ შეჩერდა, პროტესტის ფონზე ჩვენ მზად ვართ, რომ გავაკეთოთ საქმე, რომელიც საქართველოს სჭირდება. ამ პროტესტში მონაწილეობს საზოგადოების ერთი ნაწილი, [თუმცა] არის საზოგადოების დიდი ნაწილი, რომელიც მხარს უჭერს საქართველოს სუვერენიტეტს, რომელიც დარწმუნებულია, რომ საქართველომ აქამდე იარა ევროპული გზით და ეს გზა გვიკავშირდება ჩვენს ხელისუფლებას.

არსებობს არჩევნები და შეუძლია ნებისმიერს, ვინც ბოლო-ბოლო მაინც ვერ დარწმუნდება, რომ საქართველო მიდის ევროპული გზისკენ, თავისი არჩევანი დემოკრატიულ, თავისუფალ გარემოში დააფიქსიროს, მაგრამ ქვეყნის დესტაბილიზაციის, არჩევნების საბოტაჟისა და ხალხის ემოციებზე თამაშის საშუალებას ჩვენ არ მივცემთ. ამ დღეებში კიდევ უფრო მეტი კომუნიკაცია გვექნება ჩვენ მოქალაქეებთან“, – აღნიშნა არჩილ თალაკვაძემ.

ხალხს უნდა გასცეს პრემიერ-მინისტრმა პასუხი, ის ვალდებულია, – ამის შესახებ მთავრობის ადმინისტრაციასთან „ნაციონალური მოძრაობის“ თავმჯდომარემ ლევან ხაბეიშვილმა ჟურნალისტებთან განაცხადა.

მისი თქმით, მთავრობის ადმინისტრაციაში არის ადამიანი, რომელის ხელმძღვანელობითაც „უცხოური გავლენის გამჭვირვალობის შესახებ“ კანონპროექტი შეიქმნა და სწორედ მან უნდა გასცეს საზოგადოებას პასუხი.

„აქ ზის ადამიანი, რომლის ხელმძღვანელობითაც ეს კანონი შეიქმნა და მიიღეს, შესაბამისად, ხალხს უნდა გასცეს პრემიერ-მინისტრმა პასუხი, ის ვალდებულია.

მე ვიცი, რომ მას ეშინია, ხომ თქვა მდინარაძემ, მე რომ გამოვიდე და რამე მომივისდეს, აბა, ახლა თავს ხო არ შევწირავო, ეშინიათ. მე მზად ვარ, ვაჟა [სირაძე] მოვიდა, არაფერი არ დამიშავებია, შევახსენე, რომ ქურდია და გაიქცა. მე მარტო ვარ, ვაჟას, რომ ველაპარაკე, არ შემიჭამია“, – განაცხადა ხაბეიშვილმა და დასძინა, რომ კვლავ მზად არის შეხვდეს კობახიძეს:

“ვაჟა სირაძემ თქვა, აბა წამოდი და შეგიყვანო, შენ მარტო წამოხვალ კობახიძესთან სალაპარაკოდო? კი- მეთქი. წავედი და შუა გზაში გადაიფიქრა და იქ დადგა და ახლა ვერაო, არ გამოვაო. ძალიან მარტივი ჭეშმარიტება, რაზეც ყველა ჩამოყალიბებულია – ეს არის კანონი, რომელიც ხელს უშლის საქართველოს ევროინტეგრაციას. ამიტომ მნიშვნელოვანია, რომ ეს კანონი წაიღონ უკან. მე მართლა მზად ვარ, პრემიერ-მინისტრს თუ არ ეშინია, ხილვები თუ არ აქვთ, არაფერს არ დავუშავებ. საუბარი მინდა ერთადერთ რამეზე, ის ხელს უშლის საქართველოს ევროპულ მომავალს, ასი ათასობით მოქალაქეს აყენებს ამ მდგომარეობაში და აპირისპირებს პოლიციასთან. ეს არ არის კარგი და ამიტომ ეს კანონი უნდა წაიღონ უკან. მაგრამ მათი ამოცანაა არეულობა. როგორც კი კორუფციაზე დავუწყე საუბარი ვაჟა სირაძეს და ფულზე- ის კანონს კი არ იცავს, მის ფულს იცავს, სირაძეც, გომელაურიც, კობახიძე – მაშინვე დატოვა ტერიტორია და გაიქცა ისიც. ალეკო ელისაშვილზეც ვკითხე და თქვა, რომ მას განვარიდებთო, მაგრამ ალეკოს ფიზიკურადაც უსწორდებოდნენ, ესეც დავინახეთ ყველამ, მაგრამ თქვეს არ ვაკავებთო, მაგრამ მატყუარა, აფერისტია, ვაჟა სირაძის სიტყვა დაიჯერება ამ ქვეყანაში, თუ კობახიძის?!”, – აღნიშნა მან.

ცოტა ხნის წინ მთავრობის ადმინისტრაციასთან ლევან ხაბეიშვილსა და სამართალდაცველებს შორის დაპირისპირება იყო. ხაბეიშვილი ტერიტორიიდან საპატრულო პოლიციის დეპარტამენტის უფროსმა ვაჟა სირაძემ გაიყვანა

კონკრეტული პოლიტიკოსები, პოლიტიკური პარტიები და არასამთავრობო ორგანიზაციები არიან ფაშისტები, რომლებიც ახალისებენ ძალადობასა და ბულინგს , – ამის შესახებ დედაქალაქის მერმა, კახა კალაძემ განაცხადა.

მისი თქმით, ბოლო დღეებში სპორტსმენების, მსახიობების, მედიისა და სხვადასხვა დარგის წარმომადგენლების მიმართ ბულინგი ხორციელდება.

„ჩვენთვისაც, ყველასათვის მნიშვნელოვანია მშვიდობა. ჩვენი მიზანი, რომლისკენაც მივისწრაფვით, არის ევროპული მომავალი. ჩვენი ფეხბურთელების, ზოგადად სპორტსმენების, მსახიობებისა და სხვადასხვა დარგის წარმომადგენლების მიმართ უდიდესი ბულინგი ხორციელდება. ვერ წარმოიდგენთ რა ხდება მათ პირად შეტყობინებებში, რას წერენ, როგორ შეურაცხყოფას აყენებენ. ვინ აკეთებს ამას და ვინ დგას ამის უკან, საზოგადოებისთვის ყველაფერი ცხადია. ეს ადამიანები თავის ხელწერას ინარჩუნებენ – ჩვეულებრივი ფაშისტები არიან. ლიბერალიზმთან, დემოკრატიასთან და ევროპულ ღირებულებებთან საერთოდ კავშირი არ აქვთ. ანალოგიური ბულინგი ხორციელდება მედიის წარმომადგენლების მიმართ. ერთი ადამიანი არ გამოსულა, რომ ეს ყველაფერი და ეს ზოგადი ბულინგი დაეგმო. თუნდაც მამუკა მდინარაძეს ელისაშვილი რომ მიეპარა, ხომ ნახეთ, ამას რა განცხადებები მოჰყვა. ძალადობის წახალისება მიმდინარეობდა“, – განაცხადა კახა კალაძემ.

მისივე თქმით, ვისაც ხელისუფლების არ სჯერა, თავად შეუძლია წაიკითხოს კანონპროექტი და დარწმუნდეს, რომ ის ევროპულ მომავალს არ ეწინააღმდეგება.

„კონკრეტული პოლიტიკოსები, პოლიტიკური პარტიები და კონკრეტული არასამთავრობო ორგანიზაციები არიან ფაშისტები. მე ყველაზე არ ვსაუბრობ და არ მინდა ყველამ თავის თავზე მიიღოს. არიან ადამიანები, რომლებსაც გულწრფელად სჯერათ, გაურკვევლობაში არიან ან არ აქვთ სწორი ინფორმაცია. ამიტომ ყველას მინდა ვთხოვო, ახალგაზრდებს მათ შორის, ჩვენც ნუ დაგვიჯერებთ. თქვენ თვითონ ნახეთ, წაიკითხეთ და გამოიტანთ დასკვნას, რომ აღნიშნული კანონპროექტი ევროპულ მომავალს არ ეწინააღმდეგება“, – აღნიშნა კახა კალაძემ „იმედის“ ეთერში.