კანდიდატი ქვეყანა თუ ხმას აძლევს კანონპროექტებს, რომლებიც ძირითად პრინციპებსა და ღირებულებებს არ შეესაბამება, ამას გავლენა ექნება გაწევრიანების პროცესზე, – ამის შესახებ ევროპული საბჭოს პრეზიდენტმა შარლ მიშელმა Euronews-თან საუბარში განაცხადა.

„მინდა ნათლად ვთქვა: კანონპროექტი, რომელსაც კენჭს უყრიან პარლამენტში – ეს არ აახლოებს საქართველოს ევროკავშირთან. ეს საპირისპიროა.

იმედგაცრუებულები ვართ, რომ ამ მთავრობამ ეს გადაწყვეტილება მიიღო“, – განაცხადა მიშელმა.

იმაზე საუბრისას, გაიყინება თუ არა საქართველოს ევროკავშირში გაწევრიანების პროცესი ამ სადავო კანონპროექტის შედეგად, მიშელმა აღნიშნა, რომ ნებისმიერ გადაწყვეტილებებს, რომლებიც ევროკავშირის სტანდარტებს ეწინააღმდეგება, „გავლენა ექნებათ იმაზე თუ როგორ აფასებს ბრიუსელი ასპირანტი ქვეყნის შანსებს“.

„გაფართოების პროცესი დამსახურებებზე დამყარებული პროცესია და აზრი კანდიდატი ქვეყნებისთვის – მათთვისაც, ვისაც ევროკავშირში შესვლა სურს – ის არის, რომ ისინი პატივს სცემენ საერთო ძირითად პრინციპებსა და ღირებულებებს.

თუ ხმას აძლევენ კანონპროექტებს, რომლებიც ამ პრინციპებსა და ღირებულებებს არ შეესაბამება, ამას გავლენა აქვს პროცესზე”. – განაცხადა მიშელმა.

მჯერა, რომ აქ იქნება არა გამოძიება, არამედ ჩაფარცხვა და „ძაღლობის“ წარმომადგენელი პოლიციელებისთვის მაქსიმალურად ხელის დაფარება, – ამის შესახებ „მოქალაქეების“ ლიდერმა, დეპუტატმა ალეკო ელისაშვილმა ჟურნალისტებს სპეციალურ საგამოძიებო უწყებაში მისი გამოკითხვის დასრულების შემდგომ განუცხადა.

როგორც ელისაშვილმა აღნიშნა, მისი გამოკითხვა 4 საათის განმავლობაში გაგრძელდა, სადაც აბსოლუტურად სტანდარტული, სრულიად ფორმალური პროცედურა გაიარა.

მისივე თქმით, საგამოძიებო უწყებაში დეტალურად გაარჩიეს ის კადრები, სადაც ჩანს, თუ როგორ ძალადობენ სამართალდამცველები მასზე. მიუხედავად ამისა, დეპუტატის თქმით, 17 აპრილის აქციაზე მასსა და სამართალდამცველებს შორის მომხდარ დაპირისპირების ობიექტურად გამოძიების იმედი არ აქვს.

„გამოკითხვა იყო, მაგრამ ჩვენება მივეცი პრინციპში. მათ ისედაც ჰქონდათ ის ექსკლუზიური კადრები. ძალიან სტანდარტული პროცედურა იყო. ძალიან გულმოდგინედ და აშკარად კვალიფიციური გამომძიებელი იყო, გოგონა. პირდაპირ შემიძლია ვთქვა, რომ მე მასთან პრეტენზია არ მექნება იმიტომ, რომ დარწმუნებული ვარ, ეს ამბავი მის დონეზე არ გადაწყდება. მჯერა, რომ აქ იქნება არა გამოძიება, არამედ ჩაფარცხვა, რეალურად და „ძაღლობის” წარმომადგენელი პოლიციელებისთვის მაქსიმალურად ხელის დაფარება. შესაბამისად, აქ მოვედი აბსოლუტურად ფორმალურად. მიუხედავად ჩვენი რუსული ხელისუფლებისა, აქ მოვედი იმისთვის, რომ ჩემ საქართველოს ვცემ პატივს. კადრების გარჩევა იყო მაქსიმალურად, ეს კადრები გამომძიებელს ჰქონდა და არაერთხელ ჰქონდა ნანახი. კი, ამ კადრებზე დეტალურად ვისაუბრეთ. ზემოთ ეცდებიან ჩაფარცხონ ეს საქმე.(კადრებში) სახეზე ჩანან პოლიციელები, ვინც დაგდებულს მირტყამენ, მათ შორის პატრულის, კრიმინალური პოლიციის თანამშრომლები, ის ადამიანი, რომელსაც მიზანმიმართულად მივყავარ და დროშის სადგარ, ბოძს პირდაპირ სახით მანარცხებს. პირდაპირ ჩანან და მათი დაკითხვის გარეშე ანუ ისე უღმერთოდ ვერ ჩაფარცხავენ, რომ ისინი არ დაიბარონ. მაშინ მათი გამოძიება აბსოლუტურად სასაცილო იქნება“, – განაცხადა ელისაშვილმა.

დეპუტატის ადვოკატის, გიორგი რეხვიაშვილის თქმით, გამოძიებას მიაწოდეს ინფორმაცია დეპუტატის მიმართ არსებულ ძალადობაზე. მისი თქმით, ამ ეტაპზე მიმდინარეობს გამოძიება შსს-ს იმ თანამშრომლების მიმართ, რომლებმაც სისხლის სამართლებრივი დანაშაული ჩაიდინეს. ადვოკატის თქმით, გამოძიების წარმატებით წარმართვის შემთხვევაში ელოდებიან, რომ სისხლის სამართლებრივი პასუხისმგებლობა დადგება, ყველა იმ სამართალდამცველის მიმართ, რომლებმაც ელისაშვილზე ფიზიკურად იძალადეს.

თქვენ ხართ ჩვენი გმირი მებრძოლების მოღალატეების პარტია, ჩვენ გმირ მებრძოლებს და ჩვენს ქვეყანას ომის დაწყება დააბრალეთ. არის თუ არა ეს რუსული საქმე? – ასე მიმართა იურიდიული კომიტეტის თავმჯდომარემ ანრი ოხანაშვილმა პარლამენტის პლენარულ სხდომაზე „ნაციონალურ მოძრაობას“.

მისი თქმით, „ნაციონალურმა მოძრაობამ“ მხარი დაუჭირა და ხელი მოაწერა ევროსაბჭოს 1633 რეზოლუციას და ვიდრე ეს საკითხები ჯერ კიდევ არ არის სრულად გამოძიებული, “ეს ხალხი კიდევ იკადრებს და სხვას დააბრალებს რუსების ინტერესების სასარგებლოდ მოქმედებას”.

„ეს არის 2008 წლის 1633 რეზოლუცია აგვისტოს ომის საქმეზე. რეზოლუციის მე-5 პუნქტი, რასაც „ნაციონალურმა მოძრაობამ“ ხელი მოაწერა და მხარი დაუჭირა, რომ 2008 წლის 7 აგვისტოს, საქართველოს სამხედრო ძალების მიერ ცხინვალის დაბომბვის გაუფრთხილებლად დაწყებით, ესკალაცია ახალ, კერძოდ, ღია და სრულმასშტაბიანი საომარი მოქმედებების საფეხურზე გადავიდა, მძიმე არტილერიისა და კასეტური ბომბების გამოყენება, რამაც სერიოზული საფრთხე შეუქმნა სამოქალაქო მოსახლეობას, წარმოადგენდა სამხედრო ძალის არაპროპორციულ გამოყენებას საქართველოს მხრიდან, მიუხედავად იმისა, რომ აღნიშნული ხდებოდა მისი ტერიტორიის ფარგლებში და როგორც ასეთი, საერთაშორისო ჰუმანიტარული სამართლისა და საქართველოს მიერ აღებული ვალდებულების დარღვევას – კონფლიქტების გადაწყვეტას მშვიდობის საშუალებით, ხელს უშლიდა.

ამას მოაწერეთ თქვენ ხელი, ჩვენ გმირ მებრძოლებს და ჩვენს ქვეყანას დააბრალეთ ომის დაწყება. არის თუ არა ეს რუსული საქმე? ამიტომ, ვიდრე ეს საკითხები ჯერ კიდევ სრულმასშტაბიანად და სრულად არ არის გამოძიებული, ეს ხალხი კიდევ იკადრებს და სხვას და ჩვენ დაგვაბრალებენ რუსების ინტერესების სასარგებლოდ მოქმედებას – ხალხი, რომელიც მტკიცებულებებით პირდაპირ მხილებულია ოკუპანტი ქვეყნის ინტერესების გატარებაში, მოსკოვში ჩასვლით, რეზოლუციის მხარდაჭერით და იმ განცხადებებით და ქმედებებით რასაც აგრძელებს”, – განაცხადა ანრი ოხანაშვილმა.

შეიძლება, პოლიციის მხრიდან არის რაღაც გადაცდომები, რომელსაც სამინისტრო გააანალიზებს, მაგრამ დამოკიდებულება ადამიანებს შორის არ იცვლება. მეორე წუთში ის პოლიციელი, რომელიც იქ იმყოფება, სიცოცხლეს დათმობს ნებისმიერი ახალგაზრდისათვის. ეს არ არის ლიტონი სიტყვა. ის პოლიციელებიც ჩვენი შვილები არიან და როცა საჭირო იქნება, ჩვენი სიცოცხლის დასაცავად დადგებიან, – ამის შესახებ პარლამენტის თავმჯდომარის პირველმა მოადგილემ, გია ვოლსკიმ პლენარულ სხდომაზე განაცხადა, სადაც ინტერპელაციის წესით შინაგან საქმეთა მინისტრის გამოსვლას მოუსმინეს.

მისი თქმით, შედეგით უნდა ვიმსჯელოთ, ვინ არის პრორუსული ძალა.

„რა შედეგს ვხედავთ? სიყალბეს, პირფერობას, ვითომ პროდასავლურობას და უნდათ, რომ ახალგაზრდების ზურგზე შემომჯდარი შემოვიდნენ სახელისუფლო სისტემაში. არცერთი ახალგაზრდა, ვინც აქციაზე იყო, არ იტყვის, რომ ლევან ხაბეიშვილს წაჰყვება იმ ბრძოლაში, რასაც პოლიტიკური ბრძოლა ჰქვია“, – განაცხადა გია ვოლსკიმ.

ვოლსკიმ გამოსვლაში „უცხოური გავლენის გამჭვირვალობის შესახებ“ კანონპროექტზე და განვითარებულ მოვლენებზე გაამახვილა ყურადღება.

„ეს საქართველოა, რომელსაც თავისი ღირსება, თავისი პოზიცია და წონა უნდა გააჩნდეს საერთაშორისო ასპარეზზე. ასე რომ, მართლაც, ჩვენი გზა არის ევროპისკენ, რასაკვირველია, არა რუსულ კანონს, მშვიდობა საქართველოს. სწორედ ისე უნდა იყოს ყველაფერი, როგორც ჩვენი ერის, ახალგაზრდების და თითოეული ჩვენგანისთვის აჯობებს“, – განაცხადა გიორგი ვოლსკიმ.

ბატონო ვახტანგ, დღეს საქართველოს წინაშე თქვენი სახით არ დგას საქართველოს შინაგან საქმეთა მინისტრი, დღეს თქვენი სახით აქ დგას ყოფილი პროფესიული როლიდან ვერგამოსული რუსი ოლიგარქის, ბიძინა ივანიშვილის პირადი მცველი, რომელიც მზად არის, „რუსული კანონის“ დასაცავად ჩვენი ქვეყნის ევროპული ინტერესის წინააღმდეგ ქართველი ხალხის და ახალგაზრდების წინააღმდეგ აღმართოს პოლიციის ხელი, რომელიც სულ უფრო და უფრო ემსგავსება რუსულ „ომონს“, – ამის შესახებ საპარლამენტო ფრაქცია „ერთიანი ნაციონალური მოძრაობის“ თავმჯდომარემ, თინა ბოკუჩავამ პარლამენტის პლენარულ სხდომაზე განაცხადა, სადაც შს მინისტრს ინტერპელაციის წესით უსმენენ.

მისივე თქმით, მარადიულია ამ ქვეყნის სწრაფვა ევროპისკენ, რომელიც აუცილებლად გამარჯვებით დასრულდება.

„ბატონო ვახტანგ, დღეს, საქართველოს პარლამენტში მოწვეული ხართ ინტერპელაციის წესით და ჩვენ დღეს უნდა გვესაუბრა ფემიციდის უმძიმეს პრობლემაზე, რომელიც მართლა ძალიან საგანგაშოა, მაგრამ დღეს არ შეგვიძლია ვისაუბროთ ამ თემაზე და არ შევეხოთ „რუსული კანონის“ ირგვლივ განვითარებულ მოვლენებს, რომლის მიღებითაც ცდილობთ სწორედ ის სამოქალაქო საზოგადოების წარმომადგენლები და სწორედ ის სამოქალაქო ორგანიზაციები შეზღუდოთ, რომლებიც ამ ქვეყანაში ქალთა უფლებების დასაცავად იბრძვიან, რომლებიც იბრძვიან ამ ქვეყანაში ქალთა მიმართ ძალადობის ფაქტების გამოსავლენად და იბრძვიან ამ ქვეყანაში იმისთვის, რომ შემცირდეს ქალთა მიმართ ძალადობა. მაშინ, როდესაც სახელმწიფო, მათ შორის, შინაგან საქმეთა სამინისტრო ხშირ შემთხვევაში სრულიად უმოქმედოა და მაშინ, როდესაც, მათ შორის პარლამენტის სპიკერი პაპუაშვილი, რომელიც თავად არ ერიდება ქალთა წინააღმდეგ ძალადობას, ისევე, როგორც გენდერული საბჭო წილოსანის თავმჯდომარეობით, რომელიც არასოდეს არ აკეთებს შესაბამის განცხადებებს ქალთა მიმართ ძალადობის ფაქტებზე. პარლამენტი, რომელიც დუმს და რომელიც სრულიად უმოქმედოა ქალთა მიმართ ძალადობის შესახებ. სწორედ ამ კონტექსტში აუცილებელია, რომ დღეს ჩვენ ვისაუბროთ იმ მოვლენებზე, რაც საზოგადოებამ იხილა „რუსული კანონის“ პირველი მოსმენით მიღების შემდეგ იმიტომ, რომ დიახ, ეს მათ შორის, ქალთა უფლებებს ეხება.

ბატონო ვახტანგ, დღეს საქართველოს წინაშე თქვენი სახით არ დგას საქართველოს შინაგან საქმეთა მინისტრი, დღეს თქვენი სახით აქ დგას ყოფილი პროფესიული როლიდან ვერ გამოსული რუსი ოლიგარქის, ბიძინა ივანიშვილის პირადი მცველი, რომელიც მზად არის, „რუსული კანონის“ დასაცავად ჩვენი ქვეყნის ევროპული ინტერესის წინააღმდეგ ქართველი ხალხის და ახალგაზრდების წინააღმდეგ აღმართოს პოლიციის ხელი, რომელიც სულ უფრო და უფრო ემსგავსება რუსულ „ომონს“. დიახ, ეს ადამიანი დგას დღეს საქართველოს პარლამენტის წინაშე.

ივანიშვილის პარტიის დეპუტაციას დღეს აქ ძალიან მოგხვდათ გულზე, როდესაც შეგახსენეთ, რამ გამოიწვია პირველი ძალადობა ახალგაზრდების წინააღმდეგ 16 აპრილის ღამეს. პლენარული სხდომის დასრულებისას, თქვენი მალულად და მოღალატეობრივად პარლამენტის შენობიდან გაპარების აუცილებლობამ. აი, ამან გამოიწვია პირველი ძალადობა ახალგაზრდების წინააღმდეგ. ჩემი შეფასება არ მოგწონთ? ბატონებო და ქალბატონებო ივანიშვილის პარტიიდან, მაშინ წაგიკითხავთ ერთ-ერთი სპორტული და სრულიად აპოლიტიკური კომენტატორის შეფასებას, რომელიც წერს: „83 მონა მივიდა პარლამენტში. არაფერია ამ ცხოვრებაში მუდმივი არც თანამდებობა, არც პარლამენტში ყოფნა მითუმეტეს, ბატონებს სჩვევიათ მონების მარტივად მოშორება. გავა დრო და უსახო მონები რამენაირად გაძვრებიან სადმე, მაგრამ სახიან და სახელიან მონებს ძალიან გაგიჭირდებათ საზოგადოების აქეთ ჩვეულებრივ, უძალაუფლებო ნაწილში ცხოვრება“. ეს არის სრულიად აპოლიტიკური სპორტული კომენტატორის შეფასება თქვენს შესახებ.

მე კი მინდა იცოდეთ თითოეულმა თქვენგანმა, 83-ვე ივანიშვილის პარტიის წევრმა, ვინც ხმა მისცა „რუსულ კანონს“, თქვენც ბატონო ვახტანგ, როგორც ივანიშვილის მსახური და რაც მთავარია თავად ბიძინა ივანიშვილმა, რომ თქვენი დროებითი ძალაუფლებისგან განსხვავებით, იმ ადამიანების ძალაუფლება, რომლებიც რუსთაველზე დგანან და რომლებიც იცავენ ჩვენს ქვეყანას, ჩვენი ქვეყნის ევროპულ მომავალს, მათი ძალაუფლება, ქართველი ხალხის ძალაუფლება მარადიულია, მარადიულია ამ ქვეყნის სწრაფვა ევროპისკენ, რომელიც აუცილებლად დასრულდება გამარჯვებით“, – განაცხადა თინა ბოკუჩავამ.