ის მუდმივ რეჟიმში ახდენს ქვეყნის დისკრედიტაციას, აკეთებს ქვეყნის ინტერესების საწინააღმდეგო განცხადებებს, – ამის შესახებ პარლამენტის ვიცე-სპიკერმა ნინო წილოსანმა პრეზიდენტზე საუბრისას განაცხადა.

დეპუტატი გამოეხმაურა სალომე ზურაბიშვილის მიერ საერთაშორისო მედიასაშუალებებთან ინტერვიუებში გაკეთებულ განცხადებებს.

„ადგილობრივი თუ საერთაშორისო მედიისთვის უფრო საინტერესო გახდა მას შემდეგ, რაც მმართველ გუნდს ლანძღვა დაუწყო და ეს ალბათ უკავშირდება მის ერთ-ერთ მოტივაციას, რომ თავგამოდებით ებრძოლოს ყველანაირ სახელმწიფოებრივს“, – აღნიშნა ნინო წილოსანმა.

მიკვირს, რომ ამ საზოგადოებაში ჯერ კიდევ არის ყოფილი კოლონიის კომპლექსი, რომელიც იყურება დიდ დედაქალაქებში და ცდილობს თვალებში ამოიკითხოს ვის რა უნდა, ვის რა სურვილები აქვს და რა უნდა აკეთოს, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

შალვა პაპუაშვილის თქმით, ევროკავშირი არის სახელმწიფოების გაერთიანება, ჩვენ იქ არავინ მიგვიღებს როგორც ცალკე ადმინისტრაციულ ერთეულს, სახელმწიფოდ უნდა მიგვიღონ და თუ გვინდა ვიყოთ სახელმწიფო, უნდა ვიცხოვროთ, როგორც სახელმწიფომ.

„ჩვენ გვინდა ამ ურთიერთობაში ვიყოთ უბრალოდ ობიექტი, რომლის შესახებაც დიდები და ძლიერები იღებენ გადაწყვეტილებებს, თუ გვინდა ვიყოთ ამ პროცესის თანაბარუფლებიანი მონაწილე?! ჩვენ რა გვინდა ევროკავშირში ინტეგრირებისგან?! ჩვენ გვინდა ვიყოთ მოლაპარაკების ნაწილი თუ გვინდა რომ მოგვცენ მითითება რა გავაკეთოთ და ჩვენ ამის მხოლოდ აღმსრულებლები უნდა ვიყოთ?! ბოლო პერიოდი ვაკვირდები, როგორ მიდის სიტყვა სუვერენიტეტის დაკნინება. არადა ჩემი ყოველი შეხვედრა უცხოელ პარტნიორებთან იწყება მადლობით ჩვენი ტერიტორიული მთლიანობისა და სუვერენიტეტის მხარდაჭერისთვის. მას შემდეგ, რაც რუსეთმა უკრაინის წინააღმდეგ ომი დაიწყო, ჩვენს პარტნიორებთან ერთად ვსაუბრობთ, თუ რა მნიშვნელობა აქვს სუვერენიტეტს… და რა აღმოჩნდა?! გარკვეული კასტა, რომელიც ჩამოყალიბდა სიმბიოზი „ენჯეოებისა“ და რადიკალური პარტიებისა, ცდილობენ დააკნინონ და ნეგატიურ ჭრილში წარმოაჩინონ სიტყვა სუვერენიტეტი“, – განაცხადა შალვა პაპუაშვილმა „იმედი LIVE” ეთერში.

„არა რუსულ კანონს!“, „არა ქართულ ოცნებას“, „არა ბიძინა ივანიშვილს“ – უკვე ყველა ერთია, – ამის შესახებ “სტრატეგია აღმაშენებლის” ლიდერმა გიორგი ვაშაძემ პარლამენტთან მიმდინარე აქციაზე განაცხადა.

როგორც მან ჟურნალისტებთან აღნიშნა, „ქართულმა ოცნებამ“ რეალობას თვალი უნდა გაუსწოროს, რადგან მათი დრო დასრულდა.

„მე მინდა, „ქართულმა ოცნებამ“ ამ რეალობას თვალი გაუსწოროს. მათი დრო დამთავრებულია. ეს ახალგაზრდები საქართველოს მომავალი არიან, რომლებიც ევროპაში შეგვიყვანენ და ძალიან მაგარ ქვეყანას ააშენებენ. მე მათ გვერდით ვდგავარ და როგორც თქვენ აშუქებთ, ისე ვაშუქებ ჩემი „ფეისბუქ“ ლაივით. ვინც გვაპირისპირებს, ეს ბიძინა ივანიშვილია, ხოლო ეს ახალგაზრდები გვაერთიანებენ.

„არა რუსულ კანონს!“, „არა ქართულ ოცნებას“, „არა ბიძინა ივანიშვილს“ , უკვე ყველა ერთია“, – განაცხადა ვაშაძემ.

უკრაინას სჭირდება ცოცხალი ძალა და საბრძოლო მასალა, ნატოს მოკავშირეებს შეუძლიათ მიაწოდონ საბრძოლო მასალა, თუმცა როდესაც საქმე ეხება ცოცხალ ძალას, ეს უკრაინამ უნდა უზრუნველყოს, – განაცხადა ნატოს გენერალურმა მდივანმა, იენს სტოლტენბერგმა.

„უკრაინას სჭირდება ცოცხალი ძალა და [საბრძოლო] მასალა. ნატოს მოკავშირეებს შეუძლიათ მიაწოდონ [საბრძოლო] მასალა, ნაწილობრივ მეტი მხარდაჭერის გაწევით, როგორც ამას მოკავშირეები ახლა აკეთებენ“, – აღნიშნა ნატოს გენერალურმა მდივანმა.

„რა თქმა უნდა, როდესაც საქმე ეხება ცოცხალ ძალას, ეს უკრაინამ უნდა უზრუნველყოს. უკრაინამ ახლახან მიიღო ახალი კანონი, რომელიც აფართოებს გაწვევის ასაკს. მე არ მევალება დეტალებში შესვლა, მაგრამ, რა თქმა უნდა, ველოდები, დარწმუნებული ვარ, რომ უკრაინა მიიღებს აუცილებელ გადაწყვეტილებებს, რათა მოახდინოს საჭირო რაოდენობის ცოცხალი ძალის მობილიზება და შემდეგ ჩვენ უნდა გავაკეთოთ ჩვენი ნაწილი, როდესაც საქმე ეხება [საბრძოლო] მასალას“, – დასძინა სტოლტენბერგმა.

საქართველოს პარლამენტი 19 აპრილს უსაფრთხოების დამატებითი ზომების შესახებ განცხადებას ავრცელებს.

როგორც პარლამენტის განცხადებაშია აღნიშნული, 19 აპრილს საქართველოს პარლამენტის სასახლეში იმოქმედებს უსაფრთხოების ყვითელი დონე.

„საქართველოს პარლამენტის სასახლეში უსაფრთხოების დაცვის წესის დამტკიცების თაობაზე“ საქართველოს პარლამენტის თავმჯდომარის 2023 წლის 04 სექტემბრის N1/259/23 ბრძანების შესაბამისად, მიმდინარე წლის 19 აპრილს საქართველოს პარლამენტის სასახლეში იმოქმედებს უსაფრთხოების ყვითელი დონე – ვიზიტორებს ეზღუდებათ პარლამენტის სასახლეში შესვლა. დაგეგმილ საპარლამენტო ღონისძიებებზე (მათ შორის კომიტეტის სხდომებზე) დაიშვებიან მხოლოდ შესაბამისი სტრუქტურული ერთეულების მიერ მოწვეული პირები. შეზღუდვა არ შეეხება ტელემაუწყებლების/ტელემედია საშუალებების აკრედიტებულ ჟურნალისტებს.

აღნიშნული ღონისძიების მიზანია საქართველოს პარლამენტის სასახლეში სამუშაო და უსაფრთხო გარემოს უზრუნველყოფა“, – აღნიშნულია პარლამენტის განცხადებაში.

„ევროპული საქართველო“ განცხადებას ავრცელებს, რომლის მიხედვითაც პარტია სხვა ოპოზიციურ ჯგუფებთან იმ შემთხვევაში ითანამშრომლებს, თუ მიმდინარე პროცესებზე მათი ხედვა ერთმანეთს დაემთხვევა.

როგორც „ევროპული საქართველოს“ განცხადებაშია აღნიშნულიო, პროდასავლური პარტიების ნაწილი ხშირად თავად არღვევდა შეთანხმებებს და კოორდინაციის პირობებს.

„რაც შეეხება რამდენიმე პარტიის მიერ გაკეთებულ განცხადებას კოორდინაციასთან დაკავშირებით, რომლის შესახებაც მედიამ კითხვით არაერთგზის მოგვმართა, ისინი წარმოადგენენ პროდასავლური პარტიების მხოლოდ ნაწილს, რომელთაგან უმრავლესობა ხშირად თავად არღვევდა შეთანხმებებს და კოორდინაციის პირობებს.

ამიტომ, “ევროპული საქართველო” მათთან ურთიერთობის ფორმატს განსაზღვრავს იმის მიხედვით, თუ რამდენად დაუახლოვდება ამ პარტიების პოზიციები მიმდინარე პროცესებზე ჩვენს ხედვას და რამდენად თანმიმდევრულები და პრინციპულები იქნებიან ისინი მათ მიერვე დადებული შეთანხმებების შესრულებისას“, – ნათქვამია “ევროპული საქართველოს” განცხადებაში.