რუსთაველის გამზირზე, პარლამენტთან ახალგაზრდების აქცია, სახელწოდებით „არა რუსულ კანონს” მიმდინარეობს.

საკანონმდებლო ორგანოსთან აქციას “ქალთა მარშის” მონაწილეებიც შეუერთდნენ.

მათ მსვლელობა რესპუბლიკის მოედნიდან დაიწყეს და პარლამენტთან დაასრულეს. რუსთაველის გამზირზე საავტომობილო მოძრაობა გადაკეტილია.

ცნობისთვის, ახალგაზრდები გუშინ, თავდაპირველად პარლამენტის შენობასთან შეიკრიბნენ, ამის შემდგომ კი, მსვლელობით იუსტიციის სახლთან გადაინაცვლეს, რის შემდეგაც, ასევე მსვლელობით გაემართნენ გმირთა მოედანზე. მათ გმირთა მოედანზე ფიცი დადეს, რაც მათივე თქმით, არის პირობა იმისა, რომ “უცხოური გავლენის გამჭვირვალობის შესახებ” კანონპროექტს ხელისუფლება ვერ მიიღებს. გმირთა მოედნის შემდეგ აქცია პარლამენტთან დაასრულეს.

ექსპერტი მაია ნიკოლეიშვილი გადაცემაში „დღის ქრონიკა“ პატიმარი მიხეილ სააკაშვილის განცხადებას გამოეხმაურა, სადაც ის „ნაციონალურ მოძრაობას“ სთხოვს შექმნას პარტიის ბორდი და თავმჯდომარედ მისი, ხოლო თავმჯდომარის მოადგილედ სოფო ჯაფარიძის კანდიდატურა განხილონ.

„სააკაშვილმა გააკეთა დღეს განცხადება რომ თურმე ბორდის თავმჯდომარე უნდა რომ იყოს. როგორც სასამართლოს სამედიცინო ექსპერტი ვაცხადებ, სააკაშვილმა ჯერ საზოგადოებას უნდა წარუდგინოს მისი ჯანმრთელობის მდგომარეობის შესახებ ცნობა, იგივე კომისიის, რომ ის არის ჯანმრთელი ფსიქიკურად, რომ მას არ აქვს დემენცია, არ აქვს 40, თუ 50 დაავადება, რომ სწორად აზროვნებს, ფიზიკურად შეუძლია ამ ყველაფრის მართვა [ბორდის თავმჯდომარეობა] და ამის შემდეგ გააკეთოს ასეთი განცხადებები. სხვა შემთხვევაში, მისი ყველა განცხადება მიიღება სამწუხაროდ არასერიოზულად. თუ მას სერიოზულად უნდა რომ მივიღოთ, მაშინ ჯანმრთელობის შესახებ ცნობა უნდა წარადგინოს. აქ მთავარი მაინც დემენციაა, რომლის დიაგნოზსაც ძალიან ბევრი ადგილობრივი და უცხოელი ექსპერტი აწერდა ხელს“, – აღნიშნა ნიკოლეიშვილმა.

დღეს არის ძალიან კონკრეტული მოთხოვნა – კანონის გაწვევა და პასუხი აგონ იმ სამართალდამცავებმა, რომლებმაც უკანონო ქმედება ჩაიდინა მომიტინგეთა წინააღმდეგ, ვინც მოროდიორივით იქცეოდა, – ამის შესახებ „სტრატეგია-აღმაშენებლის“ ლიდერმა გიორგი ვაშაძემ „ევროპული პარადიგმის“ ორგანიზებით დაგეგმილი შეხვედრის დასრულების შემდეგ განაცხადა.

მისი შეფასებით, მმართველმა პარტიამ კანონპროექტის დაინიცირებითა და წამოწევით ავტორიტარიზმისკენ ნაბიჯი გადადგა, რომლის მთავარი მიზანი, მისივე შეფასებით, ქვეყნის დასავლური სამყაროსგან იზოლირებაა.

„ვიქნებით წინა პლანზე ყველგან, სადაც ჩვენი ეროვნული ინტერესების დაცვა იქნება საჭირო. მივიტანთ ახალგაზრდებისა და ქართველი ერის სათქმელს კომიტეტზე. ეს ჩვენი ვალდებულებაა. გავუმაგრებთ ზურგს ახალგაზრდებს, რომელსაც ყველაზე დიდი ევროკავშირის დროშა უჭირავთ. დღეს არის ძალიან კონკრეტული მოთხოვნები – კანონის გაწვევა და პასუხისგება იმ სამართალდამცავებისა, რომლებმაც უკანონო ქმედებები ჩაიდინეს მომიტინგეთა წინააღმდეგ, ვინც მაროდიორივით იქცეოდა და თქვენ ნახეთ მხდალი შინაგან საქმეთა მინისტრი, რომელიც პარლამენტში იყო მოსული და ლაპარაკის მოსმენაც კი არ შეუძლია. ჩვენთვის მნიშვნელოვანია საქართველო წავიდეს ევროკავშირისკენ და ყველაფერი, რაც ევროკავშირისკენ საქართველოს სვლას დაეხმარება ვუგულშემატკივრებთ. არ არსებობს ადამიანი, ვისაც საქართველოსთვის კარგი უნდა უნდა, რომ არ ამბობდეს – „ეს კანონი და ევროკავშირი შეუთავსებელია ერთმანეთთან“. ამის წინააღმდეგ არიან მარტო ივანიშვილი, კობახიძე, მდინარაძე, დუგინი, ლავროვი და პუტინი, ეს საუკეთესო ექვსეული. დანარჩენი სამყარო ქართველი ხალხის გვერდით არის. ყველამ გავიაზრეთ, თუ რა პროცესში ვართ და დარწმუნებული ვარ, რომ ეს დიდი ცვლილებებით დასრულდება, რომელიც საქართველოს ევროკავშირში ინტეგრაციას დააჩქარებს. ივანიშვილი ხვდებოდა რომ ეს არჩევნები წაგებული ჰქონდა, ცვლილებები უნდოდა ხალს, გადაწყვიტა, რომ ამ კანონის წამოწევით ავტორიტარიზმისკენ ნაბიჯი გადადგას და ქვეყანა დასავლური სამყაროსგან იზოლაციაში მოაქციოს. შესაძლოა, კანდიდატის სტატუსი და უვიზო მიმოსვლაც დავკარგოთ. ამისთვის, თუ რუსეთის მხარდაჭერა დასჭირდება უარს არ იტყვის. ეს არის სცენარი, რომელიც მან საკუთარი თავისთვის შექმნა. ივანიშვილმა რუსეთში კი დიდი ფული გააკეთა მაგრამ, რუსეთს აქ ვერ გადმოიტანს. 11 რუსული მუხლი დაწერეს ამ ადამიანებმა, რომლის მიზანია საქართველო ააცდინოს ევროინტეგრაციის გზას. პუტინის არგუმენტაცია და მდინარაძე-კობახიძის არგუმენტაცია ერთი ხელითაა დაწერილი. გახრწნილობის სიმბოლო დღეს საქართველოში არის ღარიბაშვილი, სიტყვა გამჭვირვალობას როგორ ახსნებს, ეს თაღლითი კორუმპირებული“, – განაცხადა გიორგი ვაშაძემ.

გიორგი ვაშაძე „უცხოური გავლენის გამჭვირვალობის შესახებ” კანონპროექტის გარდა, ასევე სუს-ის 2023 წლის ანგარიშსაც გამოეხმაურა და აღნიშნა, რომ ხელისუფლების ცვლილების შემდეგ სახელმწიფო უსაფრთხოების სამსახური საბჭოთა წარსულს ჩაბარდება.

„სუს-ის ანგარიშის მიხედვით, მათთვის პრიორიტეტი არის პოლიტიკური ოპონენტების წინააღმდეგ ბრძოლა, ადამიანების დაშინება, დატერორება, ძალადობრივი ჯგუფების შექმნა, რომლებიც თავს ესხმიან ქუჩაში ადამიანებს, ამიტომ სად სუს-ი და სად საქართველოს ეროვნული ინტერესები. სუს-ი არის ბიძინას ეროვნული ინტერესი, ბიძინას ხრწნის ინტერესი, მეტი არაფერია სუს-ი. მერწმუნეთ, როგორც კი დიდი ცვლილებები იქნება, სუს-ი ჩაბარდება საბჭოთა წარსულს, აღარ იარსებებს ასეთი ორგანიზაცია ამ ქვეყანაში”, – განაცხადა გიორგი ვაშაძემ.

საპარლამენტო უმრავლესობის დეპუტატი ბექა ოდიშარია „დღის ქრონიკაში“ მიხეილ სააკაშვილის განცხადებას გამოეხმაურა, რომელიც რადიკალური ოპოზიციის წარმომადგენლებისგან შემდგარი, ბორდის შექმნას ითვალისწინებს.

„ადამიანი საერთოდ აცდენილია – ვის მოუწოდებს? რას მოუწოდებს? თუ კაცობა ეყოფა, მან იცით რა გაიმეოროს? წინა მიტინგზე რომ თქვა, იქნებ მოკვდეს ვინმეო და უკეთესი იქნება, თუ ქალი მოკვდება და კიდევ უკეთესი იქნება, თუ ფეხმძიმე მოკვდებაო. ეს იქნება ახლა შესატყვისი ამ კონტენტთან, თორემ დანარჩენ შემთხვევაში მიხეილ სააკაშვილმა რა უნდა ისაუბროს, ჩვენ რაზე უნდა მოგვიწოდოს?! დედიკოს ბიჭი იხდის სასჯელს – გავიგეთ!“, – განაცხადა ოდიშარიამ.

„ქართული ოცნების“ აღმასრულებელი მდივანი, მამუკა მდინარაძე ექსპრეზიდენტ მიხეილ სააკაშვილის განცხადებას გამოეხმაურა, სადაც ის„ნაციონალურ მოძრაობას“ მიმართავს, პარტიის ბორდის თავმჯდომარედ აირჩიონ, სოფო ჯაფარიძე კი მისი მოადგილე და საარჩევნო სიის პირველი ნომერი იყოს.

მდინარაძის თქმით, მიხეილ სააკაშვილი არის რეალური ლიდერი „ნაცმოძრაობის“ თავისი წარსული ბოროტებით, მძიმე ცოდვებით, რაც ამ ადამიანს კისერზე ადევს.

„უცხო სახელმწიფოს, ჩვენი მეგობარი უკრაინის, რომლის ხელისუფლების წარმომადგენლების დიდი ნაწილი არ მეგობრობს დღეს ჩვენთან და ცალმხრივი მეგობრობის რეჟიმში ვართ, მოქალაქედ დარეგისტრირებული მიხეილ სააკაშვილი უცხო ქვეყნის წარმომადგენელია. მან თავად თქვა საქართველოს მოქალაქეობაზე უარი და მას არ აქვს პოლიტიკურ საქმიანობაში ჩარევის უფლება. ეს ერთი საკითხია. მეორეა, რომ ის მაინც განსაზღვრავს, რადგან მისი ფინანსებიც არის. მას მოუნდება, იქნება სოფო ჯაფარიძე, მოუნდება იქნება ხაბეიშვილი ან სხვა, არ აქვს მნიშვნელობა, შესაკრებთა გადანაცვლებით ჯამი არ იცვლება“, – აცხადებს მდინარაძე.