დღეს ქვეყანაში დემოკრატიაა და ყველა მოქალაქეს აქვს კონსტიტუციით გარანტირებული უფლება, გამოხატოს საკუთარი აზრი და პროტესტი, – ამის შესახებ „ქართული ოცნების“ თავმჯდომარემ, ირაკლი ღარიბაშვილმა ჟურნალისტებს გორში განუცხადა.

ღარიბაშვილის თქმით, ადამიანების უფლებას მთავრობა, ხელისუფლება იცავს და მომავალშიც ასე იქნება.

„მინდა, მივმართო ახალგაზრდებს: თუ ვინმემ, რომელიმე მმართველმა პარტიამ ევროპული ინტეგრაციის გზაზე მოიტანა მართლაც ხელშესახები პროგრესი და შედეგი, ეს არის „ქართული ოცნება“. იქნება ეს ასოცირების შეთანხმება, უვიზო რეჟიმი, ჩემი პრემიერ-მინისტრობის დროს დაიხურა ეს საკითხი და მაშინ გამოცხადდა, რომ ქვეყანა მიიღებდა უვიზო რეჟიმს. ახალგაზრდებს მივმართავ და მინდა, თქვენ, ყველას შეგახსენოთ, არ გახსოვთ, რა მდგომარეობა იყო?! 2012 წლამდე მარტო ელიტა მოგზაურობდა ევროპაში, მმართველი ელიტა, რომელიც იყო გაპარპაშებული. ჩვეულებრივ მოქალაქეს ევროპაში გადაადგილება არ შეეძლო. დღეს ნებისმიერ მოქალაქეს შეუძლია, აიღოს ბილეთი და გაფრინდეს ევროპაში. ვინ მოიტანა ეს შედეგი?! ეს შედეგი მოიტანა ბიძინა ივანიშვილმა და „ქართულმა ოცნებამ“. ვინ მოიტანა თავისუფალი ვაჭრობა?! დღეს ქვეყანა არის ევროკავშირის კანდიდატი ქვეყანა, დამთავრდა საუბარი, არ მივიღებ არანაირ კრიტიკას, რომ ჩვენ ძალისხმევა დავაკელით. ყველაფერი გავაკეთეთ და მივაღწიეთ, რომ ქვეყანას დღეს კანდიდატის სტატუსი აქვს.

პროცესი გრძელდება. აუცილებელია ჩვენს ევროპელ მეგობრებთან დიალოგი, ეს ცოცხალი პროცესი უნდა იყოს. გუშინ მქონდა ძალიან კარგი საუბარი ევროკავშირის ელჩთან. მთავრობას აქვს დიალოგი, ეს პროცესი უნდა გაგრძელდეს, უნდა ვესაუბროთ მეგობრებს, ამერიკელ და ევროპელ პარტნიორებს, რომ არასწორი აღქმები და განცდები არ დარჩეთ. დანარჩენს გვიჩვენებს ყველაფერი“, – განაცხადა ირაკლი ღარიბაშვილმა.

ვინმე თუ არის შემძლე მშვიდობისა და სტაბილურობის შენარჩუნების, ეს ბიძინა ივანიშვილი და „ქართული ოცნებაა“, – ამის შესახებ „ქართული ოცნების“ თავმჯდომარემ, ირაკლი ღარიბაშვილმა ჟურნალისტებს გორში განუცხადა.

მისივე თქმით, ყველამ კარგად იცის, რომ ყველა მმართველის დროს ქვეყანაში იყო ომები, ტერიტორიების დაკარგვა, გმირი ჯარისკაცების განადგურება, ამიტომ საკითხი ძალიან სერიოზულია.

„ხალხს დაავიწყდა, რომ მსოფლიოში არაპროგნოზირებადი უსაფრთხოების პოლიტიკური გარემოა. ის წესრიგი, რომელიც მსოფლიოში არსებობდა, დღითი დღე ირღვევა და არავინ იცის, ახალი წესრიგი როდის ჩამოყალიბდება, რა კონფიგურაცია დაჯდება. ომი უკრაინაში გრძელდება. იცით, რომ 250 მილიარდი დოლარი არის გამოყოფილი უკრაინისთვის მას შემდეგ, რაც ომი დაიწყო. ამბობენ, 200 მილიარდი არის დახარჯული რუსეთის მხრიდანაც. ახლა, დამატებით, ამერიკიდან 50 თუ 60 მილიარდი გამოიყოფა. ეს ომი გრძელდება. არავინ იცის, როდის დასრულდება.

საფრთხე, რომელზეც ვსაუბრობდით, რომ არსებობს რეალური საფრთხე ამ ომის ჩვენს ქვეყანაში გადმოტანის, არსად წასულა. უპასუხისმგებლო ძალებს, რომლებიც ცდილობდნენ, ჩვენი ქვეყანა ჩაეთრიათ ომში, მინდა, მივმართო: რომელი იქნება პასუხისმგებლობის ამღები, ქვეყანაში რომ ვითარება ისე არ განვითარდეს, როგორიც დღესაა? ერთადერთი პოლიტიკური ძალა, რომელმაც დღეს ქვეყანაში მშვიდობა და სტაბილურობა შეინარჩუნა – „ქართული ოცნებაა“. თუ ვინმე შემძლეა ამ მშვიდობისა და სტაბილურობის შენარჩუნების, ეს ბიძინა ივანიშვილი და „ქართული ოცნებაა“. კარგად ვიცით, ყველა მმართველის დროს ქვეყანაში იყო ომები, სამოქალაქო ომი, რუსეთთან ომი, ტერიტორიების დაკარგვა, გმირი ჯარისკაცების განადგურება, ამიტომ საკითხი ძალიან სერიოზულია.

გადახედეთ, რა ხდება ახლო აღმოსავლეთში. ისრაელი-პალესტინის ომს ვგულისხმობ, ირანსა და ისრაელს შორის ვითარება ფეთქებადსაშიშია. დაბრუნდა რიტორიკა ბირთვული ომის. საუბრობენ როგორც ნატო-ს წევრი სახელმწიფოები, ასევე რუსეთი. მოხდება დემონსტრირება ბირთვული შეიარაღების და ამ დროს ჩვენ დროს ვხარჯავთ შიდა კინკლაობაზე. იცოდეთ, არ დავუშვებთ არავითარ დესტაბილიზაციას. ვინმეს თუ რაიმე პოზიციის გამოხატვა სურს, კანონის ფარგლებში გამოხატოს. არჩევნები გვიახლოვდება, ყველამ კეთილი ინებოს, მშვიდად დააფიქსიროს თავისი პოზიცია“, – განაცხადა ირაკლი ღარიბაშვილმა.

გლობალურად რომ შევხედოთ, ამ ეტაპზე, საქართველოზე ძლიერი ზეწოლა არ არის, რომ ომში ჩაერთოს, მაგრამ ეს საფრთხე არ გამქრალა და დღითი დღე იზრდება, – ამის შესახებ მედიასთან „ხალხის ძალის“ საერთაშორისო ურთიერთობების მდივანმა, დეპუტატმა, ეკა სეფაშვილმა განაცხადა.

მისი თქმით, საქართველოს ტერიტორია გლობალური ომის პარტიას აინტერესებს იმიტომ, რომ კავკასიის რეგიონში მნიშვნელოვან გეოპოლიტიკურ და გეოგრაფიულ მდებარეობას იკავებს.

„უკრაინის ომი ჯერ არ დამთავრებულა და მის დამთავრებას პირიც არ უჩანს; ახლო აღმოსავლეთშიც, იმის ნაცვლად, რომ სამხედრო ესკალაცია შეამცირონ, პირიქით, ეს კონფლიქტი უფრო ფართოვდება და ახალ-ახალი მოთამაშეები ერთვებიან. შესაბამისად, საქართველოს მიმართ ინტერესი, როგორც ტერიტორიისადმი და არა როგორც სახელმწიფოს მიმართ, სულ უფრო იზრდება.

ასეთი არგუმენტებიც მომისმენია – ხომ იციან, რომ საქართველო წააგებს და რაში უნდა აწყობდეს ვინმეს მისი ომში ჩართვაო. ვის რაში აინტერესებს წააგებს თუ არა, ან ერთი ქართველი მაინც თუ დარჩება საქართველოს ტერიტორიაზე?! ეს ტერიტორია არის გლობალური ომის პარტიისთვის ძალიან საინტერესო, რადგან კავკასიის რეგიონში მნიშვნელოვან გეოპოლიტიკურ და გეოგრაფიულ მდებარეობას იკავებს. სწორედ ეს აინტერესებთ. ახლანდელი ხელისუფლება არ დაუშვებს ჩვენი ქვეყნის ომში ჩართვას და სწორედ ამიტომ ცდილობენ მის შეცვლას ყველანაირი გზით“, – განაცხადა ეკა სეფაშვილმა.

დღეს გორში, „ქართული ოცნების“ თავმჯდომარე ირაკლი ღარიბაშვილი, პარტიის აღმასრულებელი მდივანი მამუკა მდინარაძე და რეგიონული მდივანი დიმიტრი სამხარაძე და საპარლამენტო უმრავლესობის წევრები შიდა ქართლის მხარის ადგილობრივი ორგანიზაციების ხელმძღვანელებს და პარტიულ აქტივს შეხვდებიან.

შეხვედრა გორის დრამატულ თეატრში 13:00 საათზე გაიმართება და მას დაესწრება სახელმწიფო რწმუნებული შიდა ქართლის მხარეში ლევან ხარაბაძე.

„ქართული ოცნების“ თავმჯდომარისა და პარტიის ლიდერების შეხვედრები რეგიონებში 2 მარტს დაიწყო. შეხვედრები გაიმართა აჭარაში, სამეგრელო-ზემო სვანეთის, გურიის, იმერეთისა და რაჭა-ლეჩხუმ-ქვემო სვანეთის მხარეში.

ირაკლი ღარიბაშვილი პარტიულ აქტივს 100 დღის განმავლობაში, 10 რეგიონში შეხვდება.

პარლამენტთან ახალგაზრდების აქცია, სახელწოდებით „არა რუსულ კანონს” დასრულდა. როგორც მათ განაცხადეს, აქციას პარლამენტთან 20 აპრილსაც გამართავენ, კვლავ 19:00 საათზე. ახალგაზრდების თქმით, პროტესტს არ შეწყვეტენ იქამდე, ვიდრე ხელისუფლება უკან არ გაიწვევს კანონპროექტს „უცხოური გავლენის გამჭვირვალობის შესახებ“.

„განვაგრძობთ ბრძოლას სტუდენტები. გამოდით ლექტორებო, გამოდით ყველა. ეს ქვეყანა ჩვენია, დასაკარგი არ გვაქვს. საქართველოს გაუმარჯოს, ვისია ეს ქვეყანა? ჩვენია.

არანაირი კოორდინაცია არ ყოფილა, ყველა საკუთარი ინიციატივით, საკუთარი გონებით, საკუთარი სულით და გულით გამოვიდა. არ დავიშლებით, ვიდრე ეს მთავრობა ამ მახინჯ კანონს არ გაიწვევს, იქამდე აქ ვიქნებით“, – აცხადებენ ახალგაზრდები.

ცნობისთვის ახალგაზრდები დღეს, თავდაპირველად პარლამენტის შენობასთან შეიკრიბნენ, ამის შემდგომ კი, მსვლელობით იუსტიციის სახლთან გადაინაცვლეს, რის შემდეგაც ასევე მსვლელობით გაემართნენ გმირთა მოედანზე. მათ გმირთა მოედანზე ფიცი დადეს, რაც მათივე თქმით, არის პირობა იმისა, რომ “უცხოური გავლენის გამჭვირვალობის შესახებ” კანონპროექტს ხელისუფლება ვერ მიიღებს. გმირთა მოედნის შემდეგ აქცია პარლამენტთან დაასრულეს.