Home Blog

ლგბტ პროპაგანდას „ქართული ოცნება“ აწესებს და ამკვიდრებს -მამუკა ხაზარაძე

პარტია „ლელოს“ ლიდერის, მამუკა ხაზარაძის განცხადებით, ლგბტ-ს პროპაგანდას „ქართული ოცნება“ აწესებს და ამკვიდრებს.

„ეს არის ახლა თემა, როცა გმირებზე ვსაუბრობთ? ლგბტ პროპაგანდას „ქართული ოცნება“ აწესებს და ამკვიდრებს. ასევე, „ქართული ოცნების“ „ლიდერშიპი“. ეს არის თემა, რომელიც მათ ძალიან აწუხებთ“, – განაცხადა ხაზარაძემ.

მისი თქმით, ერთ-ერთი პრობლემა ქვეყანაში არის ის, რომ საქართველოში „შობადობა მცირდება და ოჯახები ინგრევა”.

„შობადობა რომ მცირდება და ოჯახები რომ ინგრევა, ოჯახებს და შვილებს, რომ „სკაიპით” ზრდიან ჩვენი თანამოქალაქეები, რომლებიც უცხოეთში ემიგრაციაში არიან, აი, ეს არის პრობლემა. უმუშევრობა რომ არის, ეს არის პრობლემა. შემოსავალი რომ არ აქვს ხალხს, ეს არის პრობლემა. ამიტომ ძალიან გთხოვთ ყველაზე მთავარი, რაც არის იმაზე გავაკეთოთ {აქცენტი}”, – აღნიშნა ხაზარაძემ.

მაინტერესებს, იმ ექსპერტების კეთილსინდისიერებაზე ვინ არის პასუხისმგებელი, ვინც ევროკავშირმა გამოაგზავნა საქართველოში სააკაშვილის ჯანმრთელობის მდგომარეობის შესამოწმებლად -ლევან ნიკოლეიშვილი

შეიძლება ყველაფერზე უფრო არა, მაგრამ ძალიან მაინტერესებს, იმ ექსპერტების კეთილსინდისიერებაზე ვინ არის პასუხისმგებელი, ვინც ევროკავშირმა გამოაგზავნა საქართველოში სააკაშვილის ჯანმრთელობის მდგომარეობის შესამოწმებლად! – წერს ექსპერტი ლევან ნიკოლეიშვილი სოციალურ ქსელში.

ექსპერტის თქმით, ჩნდება კითხვა მართლაც ასეთ სასწაულებს ახდენენ კლინიკა „ვივამედში”, თუ საერთაშორისო თაღლითობასთან ერთად ჩვენი ქვეყნის წინააღმდეგ მიმართულ ბოროტმოქმედებასთანაც გვქონდა საქმე?!

„შეიძლება ყველაფერზე უფრო არა, მაგრამ ძალიან მაინტერესებს, იმ ექსპერტების კეთილსინდისიერებაზე ვინ არის პასუხისმგებელი, ვინც ევროკავშირმა გამოაგზავნა საქართველოში სააკაშვილის ჯანმრთელობის მდგომარეობის შესამოწმებლად! როგორც მახსოვს გარდა იმისა, რომ საავადმყოფოში დედისა და უამრავი მნახველის ზედამხედველობის ქვეშ მყოფ დამნაშავეზე გვითხრეს, რამდენიმე უკურნებელი სენისა და წამების მსხვერპლიც იყო, მისი სიცოცხლეც ბეწვზე ეკიდა. ლოგიკურად ჩნდება კითხვა მართლაც ასეთ სასწაულებს ახდენენ კლინიკა „ვივამედში”, რომლის ექიმების პროფესიონალიზმში მე პირადად ეჭვიც არ მეპარება თუ საერთაშორისო თაღლითობასთან ერთად ჩვენი ქვეყნის წინააღმდეგ მიმართულ ბოროტმოქმედებასთანაც გვქონდა საქმე?!“-წერს ლევან ნიკოლეიშვილი.

ქართველი მოსამართლე ლამის დაასანქცირეს და ამერიკის შეერთებულ შტატებში არ გაუშვეს- ბექა ოდიშარია

„ეს არის ე.წ. ვეტინგი. ქართველი მოსამართლე „გააშავეს“, ლამის იყო დაასანქცირეს და ამერიკის შეერთებულ შტატებში არ გაუშვეს ამ გადაწყვეტილების გამო. აღმოჩნდა, რომ ევროპული სასამართლო მას მხარს უჭერს და აბსოლუტურად არ შეაქვს ეჭვი მისი გადაწყვეტილების სისწორეში და სამართლიანობაში. ეს არის კეთილსინდისიერებაზე შემოწმება. ხოლო, გვარამიას კიდევ ერთხელ უთხრეს რომ გაძარცვავ ბანკს, შენს ტელევიზიას თუ შენს ოჯახს, დამნაშავე დამნაშავეა“, – ასე გამოეხმაურა პარლამენტის დიასპორისა და კავკასიის საკითხთა კომიტეტის თავმჯდომარე ბექა ოდიშარია ადამიანის უფლებათა ევროპული სასამართლოს მიერ ნიკა გვარამიას საქმეზე მიღებულ გადაწყვეტილებას.

მისი თქმით, სტრასბურგის სასამართლოს გადაწყვეტილება ადასტურებს, რომ ნიკა გვარამიას საქმეზე თბილისის საქალაქო სასამართლოს მოსამართლის ლაშა ჩხიკვაძის მიერ მიღებული გადაწყვეტილება სამართლიანი იყო.

პოლიტიკური პარტია „ახალის“ ერთ-ერთი ლიდერის ნიკა გვარამიას ინფორმაციით, სტრასბურგის ადამიანის უფლებათა სასამართლომ მისი სარჩელი განსახილველად არ მიიღო.

ბაკურიანში, თოვლის მასამ 1 ადამიანი მოიყოლა

შინაგან საქმეთა სამინისტროს საგანგებო სიტუაციების მართვის სამსახურის ცნობით, დაბა ბაკურიანში მთის ფერდობიდან თოვლის მასა ჩამოიშალა.

მათი განცხადებით, ზვავში, სავარაუდოდ, მოყოლილია ერთი ადამიანი, რომლის ძებნა-შველის ოპერაციაში ჩართულია სამაშველო დრონები და საგანგებო სიტუაციების მართვის სამსახურის განსაკუთრებულ სიტუაციებზე რეაგირების მთავარი სამმართველოს მაშველები.

უწყების განცხადებითვე, სამაშველო ოპერაციაში ჩართვის მიზნით, დამატებით სამაშველო ჯგუფთან ერთად, თბილისიდან უკვე გაფრინდა შინაგან საქმეთა სამინისტროს სასაზღვრო პოლიციის ვერტმფრენი.

არ ვაპირებ, დეპუტატებს სააკაშვილთან შესვლის უფლება მივცე, რადგან კარგი შედეგია -შალვა პაპუაშვილი

შალვა პაპუაშვილი აცხადებს, რომ არ აპირებს დეპუტატებს მიხეილ სააკაშვილთან შესვლის უფლება მისცეს. ამ თემაზე პარლამენტის თავმჯდომარე ჟურნალისტებს ესაუბრა.

„როგორც ჩანს, პატიმარს მოუხდა, რომ ყოველდღე არ ჰყავდა პოლიტიკოსები, როგორც ეს წესად ჰქონდა ჩამოყალიბებული და ზედმეტად ემოციურად არ ტვირთავდნენ. მაშინ ამ გადაწყვეტილების მიღების ერთ-ერთი მიზეზიც სწორედ ეს იყო“, – აღნიშნა პაპუაშვილმა.

ის დეპუტატ თამარ კორძაიას განცხადებასაც გამოეხმაურა, რომელმაც სააკაშვილთან მისი შესვლის თაობაზე სარჩელი პოლიტიკური ჩარევის მაგალითად დაასახელა.

„ვფიქრობ, მისთვისვე კარგია, რომ ჯერ არ ჩანიშნულა სასამართლოს სხდომა. როგორც კი ჩაინიშნება, მას ხომ მოუწევს არგუმენტების წარდგენა. მის ადგილას ვინატრებდი, სხდომა რაც შეიძლება დიდი ხანი არ ჩაინიშნოს, რათა საზოგადოებამ არ დაინახოს, რამდენად აბსურდულია მისი მოთხოვნა“, – განაცხადა პაპუაშვილმა.

პარლამენტის თავმჯდომარემ ასევე განმარტა დეპუტატების პენიტენციურ დაწესებულებაში შესვლის წესი.

„რეგლამენტში წერია, რომ ნებართვის გარეშე [პენიტენციურ დაწესებულებაში] შესვლის უფლება აქვს პარლამენტის თავმჯდომარეს. პარლამენტის თავმჯდომარეს შეუძლია მიანიჭოს რომელიმე წევრს ეს უფლება. მიანიჭებს თუ არ მიანიჭებს, ეს პარლამენტის თავმჯდომარის გადაწყვეტილებაა. არ ვაპირებ [ამ უფლების მინიჭებას], რადგან ფაქტია, რომ შედეგია კარგი – მიხეილ სააკაშვილი, როგორც თავად ამტკიცებდა, განუკურნებელი დაავადებებისგანაც კი განიკურნა, როგორც ჩანს. კარგი გადაწყვეტილებაა და პირიქითი, მგონი უნდა მიესალმონ ამ გადაწყვეტილებას“, – განაცხადა პაპუაშვილმა.

ლაზარე გრიგორიადისის საქმეზე სასამართლო პროცესი 8 აპრილამდე გადაიდო

მარტის აქციებზე პოლიციელების ჯანმრთელობის ხელყოფისა და სახელმწიფო ქონების განადგურების ბრალდებით დაკავებულ 21 წლის ლაზარე გრიგორიადისის საქმეზე სასამართლო პროცესი 8 აპრილამდე გადაიდო.

სასამართლო პროცესის გადადების მიზეზი ბრალდებულის სხდომაზე გამოუცხადებლობა გახდა.

როგორც მოსამართლე ზვიად შარაძემ აღნიშნა, ბრალდებულმა სასამართლო პროცესზე დისტანციურად დასწრების სურვილი გამოთქვა, თუმცა აღნიშნული მოთხოვნა არ დაკმაყოფილდა.

მოსამართლის განმარტებით, ბრალდებით ლაზარე გრიგორიადისს ჯანმრთელობის პრობლემა ან სხვა მიზეზი არ გააჩნია, რის გამოც შესაძლოა ის სხდომაზე არ გამოცხადდეს და ამიტომ, ონლაინ მოხდეს მისი ჩართვა.

„ბრალდებული გამოცხადდება სხდომაზე, წინააღმდეგ შემთხვევაში, სასამართლო ჩათვლის, რომ ის თავს არიდებს სხდომას და შესაბამისად, პროცესი მისი მონაწილეობის გარეშე გაგრძელდება”, – განაცხადა ზვიად შარაძემ.

ცნობისთვის, ლაზარე გრიგორიადისს, რომელსაც პოლიციელების ჯანმრთელობის ხელყოფისა და სახელმწიფო ქონების განადგურების ფაქტებზე ედება ბრალი, აღკვეთის ღონისძიების სახით პატიმრობა 31 მარტს შეეფარდა. გამოძიების ინფორმაციით, ბრალდებულმა 7 მარტს, რუსთაველის გამზირზე გამართული აქციის მიმდინარეობისას, 9 აპრილის ქუჩაზე შს სამინისტროს განსაკუთრებულ დავალებათა დეპარტამენტის თანამშრომლების მიმართულებით, რომლებიც სამსახურებრივ მოვალეობას ასრულებდნენ, ორჯერ ისროლა ე.წ. „მოლოტოვის კოქტეილი“. ასევე, ბრალდებულმა 9 მარტს, ჭანტურიას ქუჩაზე, განზრახ წაუკიდა ცეცხლი შინაგან საქმეთა სამინისტროს კუთვნილ „ტოიოტა კოროლას“ მოდელის ავტომანქანას, რომელიც ადგილზე დაიწვა. ამ ქმედების შედეგად, სახელმწიფო ბიუჯეტს 39 500 ლარის ქონებრივი ზიანი მიადგა. ლაზარე გრიგორიადისს ბრალდება საქართველოს სისხლის სამართლის კოდექსის 353-ე პრიმა მუხლის მეორე ნაწილით (პოლიციელის ჯანმრთელობის ხელყოფა მის სამსახურებრივ საქმიანობასთან დაკავშირებით) და 187-ე მუხლის მეორე ნაწილის „ა“ ქვეპუნქტით (სხვისი ნივთის განადგურება, ცეცხლის წაკიდებით) წარედგინა, რაც სასჯელის ზომად 7-დან 11 წლამდე თავისუფლების აღკვეთას ითვალისწინებს. 7-8 მარტის საქმეზე სისხლის სამართლის კოდექსით ჯამში, 6 პირი დააკავეს, მათგან 5 ბრალდებული გირაოს სანაცვლოდ არის გათავისუფლებული.

ირაკლი კობახიძე ესტონეთის ელჩს შეხვდა

საქართველოს პრემიერ-მინისტრი ირაკლი კობახიძე საქართველოში ესტონეთის საგანგებო და სრულუფლებიან ელჩს, რიინა კალიურანდს შეხვდა.

შეხვედრაზე ორ ქვეყანას შორის არსებული მრავალწლიანი ურთიერთობები და პარტნიორობის კიდევ უფრო გაღრმავების პერსპექტივები განიხილეს. საუბარი შეეხო თანამშრომლობის გააქტიურებას ეკონომიკისა და ინვესტიციების მიმართულებებით.

დიპლომატმა მთავრობის მეთაურს საქართველოს სუვერენიტეტისა და ტერიტორიული მთლიანობის, აგრეთვე – ევროპული და ევროატლანტიკური ინტეგრაციისადმი ესტონეთის მხარდაჭერა დაუდასტურა.

ინფორმაციას მთავრობის ადმინისტრაცია ავრცელებს.

ვინც თავს ესხმის ქართულ მართლმსაჯულებას, იქნება ეს უცხოელი თუ ქართველი აქტორი, მათი განზრახვები არ არის კეთილი -შალვა პაპუაშვილი

ეს მეტყველებს იმაზე, რომ საქართველო თავის სიმართლეში არის მართალი და წელგამართული და ეს მეტყველებს იმაზე, რომ ამ სიმართლეს ჩვენ აუცილებლად გავიტანთ. ვინც თავს ესხმის ქართულ მართლმსაჯულებას, იქნება ეს უცხოელი თუ ქართველი აქტორი, მათი განზრახვები არ არის კეთილი, – ასე გამოეხმაურა შალვა პაპუაშვილი „დემოკრატიის მრავალფეროვნების“ მიერ გამოქვეყნებულ სასამართლოზე სახელისუფლებო თავდასხმების ინდექსს, რომელიც სასამართლოს კეთილსინდისიერებაზე ხელისუფლების შეტევებს იკვლევს.

„ყველა კვლევა, მათ შორის ეს ბოლო კვლევა, როდესაც არგუმენტებსა და მტკიცებულებებზე არის დამყარებული, აჩვენებს, რომ არა თუ არ არსებობს რაღაც სისტემური პრობლემები და გამოწვევები (რომლებზეც სამწუხაროდ საუბრობს ზოგიერთი უცხოელი აქტორი საქართველოში, რაც არის დეზინფორმაცია საქართველოს წინააღმდეგ), პირიქით, საქართველო ლიდერია არა თუ რეგიონში და კანდიდატ ქვეყნებს შორის, ხანდახან ლიდერია ევროკავშირის ზოგიერთ ქვეყანასთან მიმართებაშიც. ასე რომ, ამ მხრივ არანაირი კითხვის ნიშანი არ არსებობს.

სწორედ ის ფაქტი, რომ მიუხედავად ამ, მტკიცებულებებზე დამყარებული ბევრი კვლევისა, ზოგიერთი უცხოელი აქტორი დაჟინებით საუბრობს სისტემურ პრობლემებზე არგუმენტების გარეშე, ჩვენში აჩენს კითხვებს თუ რა მოტივაციები დგას ამის უკან. თან ამ დაჟინებული განცხადებების უკან დგას [შემდეგი] – იცით რა, რეფორმა ჩაატარეთ, ოღონდ თქვენ კი არ ჩაატაროთ, თქვენ ამისი უნარი, ცოდნა არ გაქვთ, თქვენ არ ხართ სანდო ხალხი. ჩამოვალთ ჩვენ, ჩამოვიყვანთ ჩვენს ექსპერტებს (როგორც პოლონელი ექიმები ჩამოიყვანეს), დაგინიშნავთ მოსამართლეებს, ჩვენ დაგინიშნავთ ქართველ ხალხს, ვინ იყოს თქვენი მოსამართლე. მერე გვეტყვიან ალბათ ვინ უნდა იყოს პროკურორი, მერე იმასაც გვეტყვიან, ვინ იყოს ჩვენი დეპუტატი და ა.შ. ამიტომ, რა თქმა უნდა, მნიშვნელოვანია, რომ ასეთი სახის უსამართლო თავდასხმები ქართულ დემოკრატიაზე შეჩერდეს.

დააკვირდით ნებისმიერ განცხადებას, იქნება ეს ელჩი, „ენჯეო“ თუ ოპოზიციონერი, ყოველ ჯერზე, როდესაც ისინი საუბრობენ სისტემურ გამოწვევებზე ქართულ მართლმსაჯულებაში, დაუსვით მარტივი კითხვა – რით დასტურდება ეს სისტემური გამოწვევები? ამ მარტივ კითხვას ვსვამ მე პირადად, როგორც დახურულ, ისე ღია შეხვედრებზე. ვერავინ მცემს პასუხს. არის დახურული მანკიერი წრე. ერთი მიუთითებს ვენეციის კომისიის რაღაც ანგარიშზე, ვენეციის კომისია მიუთითებს „ენჯეოებზე“, „ენჯეოები“ მიუთითებენ ოპოზიციაზე, ოპოზიცია მიუთითებს რაღაცაზე. ასე, დახურულ ლაბირინთებში აბნევენ ქართულ საზოგადოებას, რაც არის არასწორი ქმედება და მნიშვნელოვანია, ყველა დაუბრუნდეს მტკიცებულებებით საუბარს და არა თავდასხმას ქართულ მართლმსაჯულებაზე“, – განაცხადა პაპუაშვილმა.

დემოკრატიის კვლევის მსოფლიოს მოწინავე ცენტრმა, ორგანიზაციამ „დემოკრატიის მრავალფეროვნება“ (V-DEM) სასამართლოზე სახელისუფლებო თავდასხმების ინდექსი გამოაქვეყნა (Government attacks on judiciary). სასამართლო მართლმსაჯულებაზე სახელისუფლებო თავდასხმებისგან თავისუფლებით საქართველო მსოფლიოში 27-ე ადგილზე, ევროპის საუკეთესო ათეულში მე-9 პოზიციაზე, პოსტსაბჭოთა სივრცეში კი საუკეთესო სამეულშია.

„სასტუმრო „სტამბა“ თბილისის „ბუტიკ“- სასტუმროების ტრენდულ სახეს განსაზღვრავს“ – უცხოური პრესა

ამერიკულ „ფორბსში“ (Forbes) რუბრიკით „მოგზაურობა და ცხოვრების სტილი“ გამოქვეყნებულია სტატია სათაურით „სასტუმრო „სტამბა“ თბილისის „ბუტიკ“-სასტუმროების ტრენდულ სახეს განსაზღვრავს“ (ავტორი – ლორენ მოუერი), რომელშიც გადმოცემულია საქართველოს დედაქალაქის ერთ-ერთი ულტრამოდური სასტუმროს – „სტამბის“ დიზაინი და მომსახურების სერვისი.

„ათი წლის წინ თბილისში ძნელად თუ იპოვიდით საშუალო სტატიკურ უცხოელ ტურისტს. მართალია, ისინი ამჟამადაც არ წარმოადგენენ მეინსტრიმულს, მაგრამ ისეთი მცოდნე მოგზაურებისათვის, რომლებსაც უყვართ საჭმელები, ღვინო და დიზაინი, საქართველო დღეს „სწორედ ის ადგილია, სადაც 2024 წელს უნდა იმოგზაურონ“, – ნათქვამია სტატიაში.
თბილისი ტურისტების რაოდენობით ლიდერობს. დღეს საქართველოს დედაქალაქს შეუძლია თავი მოიწონოს ისეთი ფეშენებელური ობიექტებით, რომლებშიც „სიცოცხლე სჩქეფს“. მათ შორის არის ბუტიკ-სასტუმრო „სტამბაც“, რომელმაც ოფიციალურად ჩაუყარა საფუძველი ამგვარ ტენდენციას. „სტამბა“შედარებით უფრო ძველი სასტუმროს – Rooms Hotel Tbilisi-ს თანამედროვე მაღალი კლასის მემკვიდრეს წარმოადგენს, რომელიც განთავსებულია 1930-იან წლებში აგებულ შენობაში და რომელსაც ოდესღაც ცნობილი სახელისუფლო-პარტიული გამომცემლობა ფლობდა.

ისტორიული ფონი სასტუმროს განსაკუთრებულ ვიზუალურ ხიბლს მატებს, რომელსაც ემატება ისეთი ელემენტები, როგორებიცაა ცენტრალურ ატრიუმში დარგული ხეები, ნომრების ეგზოტიკური გაფორმება და სხვა. სასტუმრო, რომლის კაფეები საოცარი ბროლის ჭაღითაა დამშვენებული, პოპულარული ღირსშესანიშნაობად იქცა როგორც უცხოელი მოგზაურებისთვის, ასევე ადგილობრივი მოსახლეობისთვისაც“, – წერს ავტორი, – „სასტუმროს კაფეებში შეხვდებით ცნობილ მოდელებს, გავლენიან პირებს და შეძლებულ რუსებს… დღისით კაფეებში იკრიბებიან ამერიკელები და მდიდარი „ციფრული მომთაბარეები“, ღამით კი ადგილობრივი მცხოვრებლები“.

„სასტუმრო „სტამბა“ წარმოადგენს გაეროს მიერ შემუშავებული პროგრამის 17 მიზნის განხორციელებას მდგრადი განვითარების სფეროში, რომელიც, სხვა მომენტებთან ერთად, მოიცავს ყოფილი საბჭოთა გამომცემლობის პროფილის შეცვლას ორიგინალური სტრუქტურის, ფასადისა და ისტორიული მნიშვნელობის მქონე დეტალების შენარჩუნებით. სასტუმროში განთავსებულია ფერმა – პირველად საქართველოში – რომელშიც მოჰყავთ ბოსტნეული და სხვა კულტურები.

„სტამბა“ მდებარეობს თბილისის ყველაზე ცნობილ რუსთაველის გამზირზე, სადაც სხვადასხვა ეპოქის შენობები გვერდი-გვერდ დგანან – მე-19 საუკუნეში აგებულ სახლებს ზემოდან თანამედროვე სტილით აშენებულები დაჰყურებენ. „სტამბის“ ახლოს მდებარეობენ დედაქალაქის ღირსშესანიშნაობები – საქართველოს ეროვნული მუზეუმი, ოპერისა და ბალეტის სახელმწიფო თეატრი, პარლამენტი… „სტამბას“ მართავს დიდი მიზნების მქონე „აჭარა-ჯგუფი“ (Adjara Group), რომელმაც თბილისის ვერის უბანი ამბიციურად გარდაქმნა გასტრონომიის, რესტორნების, მოდებისა და ხელოვნების ცენტრად. „სტამბიდან“ გამოსვლისას ყველა მიმართულებით დაინახავთ ნატურალური ღვინის მაღაზიებს, ტანსაცმლის ბუტიკებს და თანამედროვე რესტორნებს, მაგალითად, როგორიც არის „ქეთო და კოტე“, – აღნიშნულია სტატიაში.

პუბლიკაციაში გადმოცემულია აგრეთვე „სტამბის“ რესტორნის მენიუ (განსაკუთრებით ყურადღება ეთმობა ქართული ეროვნული სამზარეულოს კერძებს), ხაზგასმულია სერვისის მაღალი დონე – ინოვაციური სივრცის არსებობა სტარტაპერებისათვის, ინვესტორებისათვის და კულტურის სფეროს სპეციალისტებისათვის.

წყარო

“გაგრძელდება თუ არა უკრაინის ომი კიდევ რამდენიმე წლის განმავლობაში? ალბათ, არა”-Die Welt

უკრაინა მიმდინარე წელს იძულებულია თავდაცვით პოზიციაში იყოს და შეტევა არ განახორციელოს – დიდწილად გერმანიის კანცლერის ოლაფ შოლცის და სხვა დასავლელი პოლიტიკოსების უპასუხისმგებლო მოქმედების გამო, – ნათქვამია გაზეთ „დი ველტის“ (Die Welt) მიერ გამოქვეყნებულ სტატიაში სათაურით „გაგრძელდება თუ არა უკრაინის ომი კიდევ რამდენიმე წლის განმავლობაში? ალბათ, არა“ (ავტორი – ქრისტოფ შილცი). „სულ უფრო მეტი ნიშნები ჩნდებისა იმისა, რომ კონფლიქტი გაიყინება, რაც იმას ნიშნავს, რომ რუსეთი უპირატესობას მოიპოვებს“, – წერს „დი ველტის“ კორესპონდენტი.

გთავაზობთ პუბლიკაციას:

გერმანიის სოციალ-დემოკრატიული პარტიის ფრაქციის ლიდერმა როლფ მიუტცენიხმა ბუნდესტაგში კანონმდებლებს მოუწოდა, რომ უკრაინის კონფლიქტი გაიყინოს. მას საკმაოდ სერიოზული მიზეზები აქვს. ერთ-ერთი იმაში გამოიხატება, რომ არც უკრაინას და არც რუსეთს აშკარა უპირატესობა არ აქვს, ორივე ერთმანეთის გამოფიტვას ცდილობს და საბოლოო ჯამში ორივე მოლაპარაკების მაგიდასთან მივლენ.

კიდევ ერთი მიზეზი: წაგებული მხარე, როგორც ჩანს, უკრაინა იქნება, ამიტომ კიევისათვის უმჯობესია სამხედრო მოქმედებები შეაჩეროს, იმიჯი შეინარჩუნოს და არ მიიღოს სტატუსი „გამარჯვებულის“ ან დამარცხებულის“ შესახებ.

ამ შემთხვევაში რუსეთის შეიარაღებული ძალებს შეუძლიათ უკრაინის ტერიტორიაზე დარჩნენ, დასავლური იარაღის მიწოდება შეწყდება, ხოლო კიევის მოლაპარაკება ნატოში და ევროკავშირში შესვლისათვის შეჩერდება:

დასავლეთი ყველაფერს გააკეთებს, რათა კონფლიქტი გაიყინოს და აღარ განახლდეს. ასეთი სახით სიტუაცია „ფეთქებად სიწყნარეს“ დაემსგავსება, მაგრამ კრემლისათვის აშკარად უპირატესობით და მომგებიანობით.

დიპლომატიური მოლაპარაკება შეიძლება უკვე მიმდინარე წელს განხორციელდეს:

პირველ რიგში იმიტომ, რომ უკრაინას პერსპექტივა არ აქვს დაკარგული (ოკუპირებული) ტერიტორიების დაბრუნების თვალსაზრისით. პირიქით – უახლოეს კვირებში მოსალოდნელია რუსეთის ჯარების ახალი შეტევები და უკრაინის მიერ კიდევ უფრო მეტი ტერიტორიის დაკარგვა;

მეორე მხრივ – დასავლეთმა სათანადოდ ვერ შეაფასა რუსეთის სამხედრო პოტენციალი და მისი გლობალური მოკავშირეების შესაძლებლობები. მოსკოვს საკმარისი რესურსები და გლობალური მხარდაჭერა აღმოაჩნდა, რაც უზრუნველყოფს ბრძოლების გაგრძელებას რამდენიმე წლის განმავლობაში.

მესამე – დასავლეთი ხშირად აცხადებს, რომ უკრაინა მის თავისუფლებასაც იცავს, მაგრამ სულ უფრო მეტი ეგოისტური გადაწყვეტილებები მიიღება უკრაინის საზიანოდ. მაგალითად, ანტირუსულ სანქციებს არასრული, სანახევრო ხასიათი აქვთ და არ ვრცელდება თხევადი გაზისა და ურანის ექსპორტზე, ხოლო ვაშინგტონი კიევ მოუწოდებს შეწყვიტოს შეტევები რუსეთის ნავთობგადამამუშავებელ ქარხნებზე – იმისთვის, რომ აშშ-ის საპრეზიდენტო არჩევნების დროს ნავთობზე მსოფლიო ფასები არ გაიზარდოს.

მთლიანობაში, შეიძლება ვივარაუდოთ, რომ უკრაინის მოლაპარაკებითი პოზიცია სამომავლოდ ბევრად გაუარესდება დღევანდელთან შედარებით – დასავლელი პოლიტიკოსების უპასუხისმგებლო მოქმედების შედეგად. ეს ისტორიული ტრაგედიაა, მაგრამ იმავდროულად ხელს უწყობს ცეცხლის შეწყვეტას და გზას უკვლევს ამ საშინელი ომის „გაყინვას“.

წყარო:

“ცეცხლის წაკიდება თუ თქვენთვის ევროპაა, მაშინ ძალიან ცდებით იმასთან დაკავშირებით, თუ რა არის ევროპა” – შალვა პაპუაშვილი

ჩვენს სისხლის სამართლის კოდექსში არ არსებობს მუხლი – ევროპული მომავლისთვის დასჯა, არსებობს მუხლი – მეორე ადამიანისთვის ზიანის მიყენებისა. ცეცხლის წაკიდება თუ თქვენთვის ევროპაა, მაშინ ძალიან ცდებით იმასთან დაკავშირებით, თუ რა არის ევროპა, – ამის შესახებ პარლამენტის თავმჯდომარემ, შალვა პაპუაშვილმა განაცხადა.

აღნიშნულით იგი გამოეხმაურა მარტის აქციებზე პოლიციელების ჯანმრთელობის ხელყოფისა და სახელმწიფო ქონების განადგურების ბრალდებით დაკავებული ლაზარე გრიგორიადისის დღევანდელ სასამართლო პროცესს, სადაც განაჩენი შესაძლოა, დღეს გამოცხადდეს.

პაპუაშვილის თქმით, პროკურატურის მხრიდან მყარი პოზიციაა, იმასთან დაკავშირებით, რომ ლაზარე გრიგორიადისი მეორე ადამიანს ცეცხლს უკიდებდა.

“თუკი ვინმე იტყვის, რომ არსებობს რაიმე მიზანი, რომელმაც შეიძლება გაამართლოს ერთი ადამიანის მხრიდან მეორეს მიმართ ცეცხლის წაკიდება, თქვან, რომ ხანდახან შეიძლება გამართლდეს ცეცხლის წაკიდება მეორე ადამიანისთვის და მისი განწირვა სიკვდილისთვის. ეს არის მორალის დაკარგვის პირველი ნაბიჯი.

ჩვენს სისხლის სამართლის კოდექსში არ არსებობს მუხლი – ევროპული მომავლისთვის დასჯა, არსებობს მუხლი – მეორე ადამიანისთვის ზიანის მიყენებისა. ცეცხლის წაკიდება თუ თქვენთვის ევროპაა, მაშინ ძალიან ცდებით იმასთან დაკავშირებით, თუ რა არის ევროპა. ევროპა ზუსტად საწინააღმდეგოა ძალადობისა, ერთი ადამიანის მხრიდან მეორისთვის ცეცხლის წაკიდებისა“, – განაცხადა პაპუაშვილმა.

ამასთან, პაპუაშვილმა ისაუბრა იმაზე, არსებობს თუ არა შანსი, რომ საქართველოს პრეზიდენტმა, სალომე ზურაბიშვილმა ბრალდებული გრიგორიადისი შეიწყალოს და აღნიშნა, რომ „სალომე ზურაბიშვილი გააკეთებს ზუსტად იმას, რასაც დაავალებენ.“

„სალომე ზურაბიშვილი გააკეთებს ზუსტად იმას, რასაც დაავალებენ. ამას ჩვენ მივხვდით უკვე დიდი ხანია და ეს დადასტურდა გუშინწინ სტრასბურგის გადაწყვეტილებითაც, როდესაც გამოჩნდა, რომ ეს იყო ჩვეულებრივი დავალება, რომელიც მან შეასრულა, ვინაიდან არ არსებობდა არანაირი კითხვის ნიშანი ნიკა გვარამიას დამნაშავეობასთან დაკავშირებით. ჩვენ, ფაქტობრივად, გუშინწინ მივიღეთ უმაღლესი ევროპული ინსტანციისგან კიდევ ერთხელ დასტური მათთვის, ვისაც ეს არ სჯეროდა, რომ ის(გვარამია) არის სისხლის სამართლის დამნაშავე – ეს ერთი და მეორე, არ არსებობდა არანაირი პოლიტიკური გამართლება მისი შეწყალებისა ვითომ დეპოლარიზაციის მიზნით. ეს ჩანდა კიდეც, ვინაიდან განმარტებაც არ გააკეთა, რადგან ხვდებოდა, რომ განმარტების მიუხედავად უარგუმენტო იქნებოდა და არავინ დაიჯერებდა.

ჯერ ჩვენ არ ვიცით სასამართლოს განაჩენი, იქნება თუ არა ცნობილი [ლაზარე გრიგორიადისი] დამნაშავედ. თუმცა პროკურატურის მხრიდან მყარი პოზიციაა, იმასთან დაკავშირებით, რომ ეს ადამიანი მეორე ადამიანს ცეცხლს უკიდებდა, ვნახოთ რას იტყვის სასამართლო და შემდეგ გამოჩნდება. ზუსტად ისე მოიქცევა [სალომე ზურაბიშვილი], როგორიც იქნება დავალება“, – აღნიშნა პაპუაშვილმა.

რაც შეეხება NGO სექტორისა და ოპოზიციის განცხადებებს ამ საკითხთან დაკავშირებით, რომ ლაზარე გრიგორიადისი პოლიტიკური მოტივებით დააკავეს, პაპუაშვილმა აღნიშნა, რომ მათ მიმართ ნდობა არ არსებობს.

„რაც შეეხება „ენჯეოებს“, ოპოზიციას და ა.შ., მათი კეთილსინდისიერება ბევრჯერ დადგა კითხვის ნიშნის ქვეშ.

მათ მიმართ ნდობა არ არსებობს, ყოველ ჯერზე – „რუსთავი 2“-ის, მელიას, გვარამიას საქმეზე ამბობდნენ ერთი და იმავეს, რომ ეს არის პოლიტიკური მოტივირება და ყოველ ჯერზე აღმოჩნდა, რომ ისინი არიან სამართლის არ მცოდნე ადამიანები, ვერ ერკვევიან და არ ჰყოფნით ცოდნა, ან განზრახ ატყუებდნენ და შეცდომაში შეჰყავთ საზოგადოება. მე მგონია, რომ ეს არის მეორე – განზრახ მოტყუება და რა თქმა უნდა, ეს პრობლემურია ვინაიდან ეს ორგანიზაციები ფინანსდებიან უცხოეთიდან. როცა უცხოური ფული იხარჯება იმაში, რომ მოხდეს ქართული მართლმსაჯულების დისკრედიტირება და საზოგადოებაში გავრცელდეს დეზინფორმაცია, ეს ძალიან ცუდია“, – განაცხადა შალვა პაპუაშვილმა.

ცნობისთვის, მარტის აქციებზე პოლიციელების ჯანმრთელობის ხელყოფისა და სახელმწიფო ქონების განადგურების ბრალდებით დაკავებულ 21 წლის ლაზარე გრიგორიადისის საქმეზე განაჩენი შესაძლოა, დღეს გამოცხადდეს.

დღევანდელ სასამართლო პროცესზე დაცვის მხარე დასკვნით სიტყვას წარმოთქვამს და ასევე, ბრალდებული ლაზარე გრიგორიადისი საბოლოო სიტყვით ისარგებლებს. აღნიშნულის შემდეგ, სასამართლო განაჩენის გამოსატანად სათათბიროდ გავა.

“სტრასბურგის გადაწყვეტილებით დავრწმუნდით, რამხელა ფარსს ჰქონდა ადგილი, როცა გვარამიას შეწყალებაზე ევროპელი პოლიტიკოსების მოწოდებებს ვისმენდით” – შალვა პაპუაშვილი

პარლამენტის თავმჯდომარის, შალვა პაპუაშვილის განცხადებით, ნიკა გვარამიას სარჩელთან დაკავშირებით სტრასბურგის სასამართლოს გადაწყვეტილებით დადასტურდა, რომ გვარამია სისხლის სამართლის დამნაშავეა და ციხიდან მის გამოყვანას პოლიტიკური მოტივაცია ჰქონდა, რათა “ის რადიკალური დღის წესრიგის შემქმნელი ყოფილიყო”.

მისივე თქმით, აღნიშნული გადაწყვეტილება კიდევ ერთი დადასტურებაა, თუ რამხელა ფარსს ჰქონდა ადგილი, როდესაც გვარამიას შეწყალებაზე ევროპელი პოლიტიკოსების მოწოდება ისმოდა.

“კიდევ ერთხელ დავრწმუნდით, თუ რამხელა ფარსს ჰქონდა ადგილი, როდესაც ვნახეთ მოწოდებები ნიკა გვარამიას შეწყალებაზე სხვადასხვა ევროპელი პოლიტიკოსისგან; შემდეგ ვნახეთ სალომე ზურაბიშვილის მიერ გვარამიას შეწყალება, მან ვერც კი გაბედა აეხსნა, რა იყო საფუძველი შეწყალებისა; ვნახეთ ზოგიერთი ევროპელი პოლიტიკოსის გამოხმაურებები, რომელიც იწონებდა ამ გადაწყვეტილებას, როგორც დეპოლარიზაციის ნაბიჯს და ვხედავთ, სად ვართ ახლა. ახლა ხომ მიხვდა საზოგადოება, რომ ეს ყველაფერი ფარსი იყო. არავითარი დეპოლარიზაციისკენ გადადგმული ნაბიჯი ეს არ იყო.

ადამიანი, რომელიც სტრასბურგის სასამართლოსაც კი გამოეკიდა და ალბათ, ახლა სტრასბურგის სასამართლოს “ვეტინგს” მოითხოვს და იმუქრება, რომ ხელისუფლება შეიცვლება, სასამართლოს გაყრიან და საკუთარ მოსამართლეებს მოიყვანენ, ეს ადამიანი გამოაყვანინა ზოგიერთმა ევროპელმა პოლიტიკოსმა სალომე ზურაბიშვილს გარეთ.

ასევე დადასტურდა, რომ ის არის სისხლის სამართლის დამნაშავე. სტრასბურგის სასამართლომ არც კი განიხილა, ჩახედა რა დოკუმენტაციას,

მიხვდა, რომ საქმე ჰქონდა დამნაშავესთან და არანაირი კითხვის ნიშნები არ არსებობდა.

სტრასბურგის სასამართლოს გადაწყვეტილებით დადასტურდა, რომ ნიკა გვარამია სისხლის სამართლის დამნაშავეა და მისი ციხიდან გამოყვანას ჰქონდა პოლიტიკური მოტივაცია, რათა ის ყოფილიყო რადიკალური დღის წესრიგის შემქმნელი.

საბოლოოდ, ამ ძალებმა გააერთიანა ნიკა გვარამია და ნიკა მელია – ორი კრიმინალი, ორივე უცხოეთიდან ქართულ მართლმსაჯულებაში ჩარევის შედეგად არის გარეთ. ორივე შემთხვევაში უცხოეთიდან გვიმტკიცებდნენ, რომ ამ ორი კრიმინალის გარეთ გამოშვების ნაბიჯი მნიშვნელოვანია, რათა დეპოლარიზაცია მოხდეს. ეს ყველაფერი იყო ტყუილი. ვხედავთ, რა არის მათი დღის წესრიგი – თავს ესხმიან სასამართლოს და მართლმსაჯულებას, ასევე იმ კურსს, რომელიც საქართველოს ხელისუფლებას აქვს, ქვეყნის მშვიდობიანი განვითარების. ეს ჯერ კიდევ ჟურნალია, კინო წინაა. ვნახავთ ამ ორ რადიკალს, რომ ზუსტად იქნებიან იმ დავალების შემსრულებლები, რასაც ქვეყანაში სიტუაციის არევა ჰქვია”, – განაცხადა შალვა პაპუაშვილმა.

ცნობისთვის, პოლიტიკური პარტია „ახალის“ ერთ-ერთი ლიდერმა ნიკა გვარამიამ სოციალურ ქსელში გაავრცელა ინფორმაცია, რომ სტრასბურგის ადამიანის უფლებათა სასამართლომ მისი სარჩელი განსახილველად არ მიიღო.

ნიკა გვარამიას თქმით, მას შემდეგ, რაც საქართველოში ხელისუფლება და სასამართლო შეიცვლება, პოლიტიკური საქმეების შესახებ სიმართლეს ყველა გაიგებს.

შეგახსენებთ, რომ ნიკა გვარამიამ სტრასბურგის სასამართლოს იმის მერე მიმართა, რაც მისი სარჩელი უზენაესმა სასამართლომ არ მიიღო და ძალაში სააპელაციო სასამართლოს გადაწყვეტილება დატოვა, რომლის მიხედვითაც, ნიკა გვარამია პატიმრობაში რჩებოდა.