Home Blog

როგორი ამინდია მოსალოდნელი სქართველოში

გარემოს ეროვნული სააგენტოს ცნობით, 30 მარტს საქართველოს ზოგიერთ რაიონში სითბოს ფონზე ხანმოკლე წვიმა და ელჭექია მოსალოდნელი, ხოლო 31 მარტს და 1-ელ აპრილს ქვეყნის ტერიტორიის უმეტეს ნაწილზე თბილი და უნალექო ამინდი იქნება.

ამასთან, აღნიშნავენ, რომ თბილისში 30 მარტს სითბოს ფონზე შესაძლოა ხანმოკლე წვიმა და ქარი აღინიშნოს, ხოლო 31 მარტს და 1-ელ აპრილს თბილი და უნალექო ამინდია მოსალოდნელი. ჰაერის ტემპერატურა დღისით +20, +22 გრადუსამდე მოიმატებს.

„სანაპირო რაიონებში (ბათუმი, ქობულეთი, ანაკლია, ფოთი): 30 მარტს სითბოს ფონზე ხანმოკლე წვიმა და ელჭექია მოსალოდნელი, ხოლო 31 მარტს და 1 აპრილს თბილი და უნალექო ამინდი იქნება. ჰაერის ტემპერატურა დღისით +24, +26 გრადუსამდე მოიმატებს.

დასავლეთ საქართველოს დაბლობ რაიონებში (ქუთაისი, ზესტაფონი, ზუგდიდი, მარტვილი, ოზურგეთი): 30 მარტს სითბოს ფონზე ხანმოკლე წვიმა და ელჭექია მოსალოდნელი, ხოლო 31 მარტს და 1-ელ აპრილს თბილი და უნალექო ამინდი იქნება. ჰაერის ტემპერატურა დღისით +23, +25 გრადუსი დაფიქსირდება.

დასავლეთ საქართველოს მთიან რეგიონებში (ამბროლაური, ონი, ცაგერი, შოვი, ჭიათურა, საჩხერე, ხულო): 30 მარტს სითბოს ფონზე ხანმოკლე წვიმაა მოსალოდნელი, ხოლო 31 მარტს და 1-ელ აპრილს თბილი და უნალექო ამინდი იქნება. ჰაერის ტემპერატურა დღისით +21, +23 გრადუსამდე მოიმატებს.

დასავლეთ საქართველოს მაღალმთიან რეგიონებში (მესტია, ბახმარო): 30 მარტს სითბოს ფონზე ხანმოკლე წვიმაა მოსალოდნელი, ხოლო 31 მარტს და 1 აპრილს თბილი და უნალექო ამინდია მოსალოდნელი. ჰაერის ტემპერატურა დღისით +13, +18 გრადუსი დაფიქსირდება.

ქართლში (რუსთავი, ბოლნისი, მარნეული, გარდაბანი, გორი, ცხინვალი): 30 მარტს სითბოს ფონზე ზოგან გაწვიმდება, ხოლო 31 მარტს და 1-ელ აპრილს თბილი და უნალექო ამინდია მოსალოდნელი. ჰაერის ტემპერატურა დღისით +17, +22 გრადუსი იქნება.

კახეთში (საგარეჯო, თელავი, გურჯაანი, სიღნაღი, ლაგოდეხი, ყვარელი, ახმეტა, დედოფლისწყარო): 30 მარტს სითბოს ფონზე ზოგან გაწვიმდება, ხოლო 31 მარტს და 1-ელ აპრილს თბილი და უნალექო ამინდია მოსალოდნელი. ჰაერის ტემპერატურა დღისით +17, +22 გრადუსი იქნება.

აღმოსავლეთ საქართველოს მთიან რეგიონებში (ახალციხე, ბორჯომი, დუშეთი, თიანეთი, ფასანაური, დედოფლისწყარო): 30 მარტს სითბოს ფონზე ზოგან გაწვიმდება, ხოლო 31 მარტს და 1-ელ აპრილს თბილი და უნალექო ამინდია მოსალოდნელი. ჰაერის ტემპერატურა დღისით +15, +20 გრადუსი იქნება.

აღმოსავლეთ საქართველოს მაღალმთიან რეგიონებში (ახალქალაქი, წალკა, ბაკურიანი, გუდაური, ომალო): 30 მარტს ზოგან თოვლჭყაპია შესაძლებელი, ხოლო 31 მარტს და 1-ელ აპრილს უნალექო ამინდია მოსალოდნელი. ჰაერის ტემპერატურა დღისით +10, +15 გრადუსი იქნება“,-აღნიშნულია ინფორმაციაში.

“მართალია, „ქართული ოცნება“ იმუქრება, რომ 60%-ის პრობლემა არ აქვს, მაგრამ 40%-იანი ბარიერის გაუქმებით ადასტურებს, რომ შეიძლება, 40%-იც კი სათუო გაუხდეს”

მართალია, „ქართული ოცნება“ იმუქრება, რომ 60%-ის პრობლემა არ აქვს, მაგრამ 40%-იანი ბარიერის გაუქმებით ადასტურებს, რომ შეიძლება, 40%-იც კი სათუო გაუხდეს, – ამის შესახებ პარლამენტის ოპოზიციონერმა დეპუტატმა თამარ კორძაიამ “საარჩევნო კოდექსში” შესატან ახალ ცვლილებებთან დაკავშირებით ჟურნალისტებს განუცხადა.

მისი თქმით, მნიშვნელოვანი იქნება ვენეციის კომისიის მხრიდან ახალი კანონპროექტის შეფასებაც.

“ყოველ ნაბიჯზე დასტურდება, რომ ჩვენი საერთაშორისო პარტნიორები განსაკუთრებულ ყურადღებას აქცევენ საქართველოში 2024 წლის არჩევნებს და მის ჩატარებას სრულფასოვანი პროცესის თვალსაზრისით. ამის ნაწილია საკანონმდებლო ცვლილებებიც, რომელიც ხორციელდება საერთაშორისო, სამოქალაქო საზოგადოების, საქართველოს მოქალაქეების ინტერესების საწინააღმდეგოდ. ამიტომ, ძალით მიღებული ცვლილებები, რომელსაც პრეზიდენტმა ვეტო დაადო, ადასტურებს, რომ საერთაშორისო პარტნიორების და მოქალაქეების მოსაზრებებს საქართველოს ხელისუფლება არ ისმენს. რაც შეეხება მომდევნო დაკვირვებას, ესეც ძალიან მნიშვნელოვანია. მართალია, “ქართული ოცნება” იმუქრება, რომ 60%-ის პრობლემა არ აქვს, მაგრამ 40%-იანი ბარიერის გაუქმებით ადასტურებს, რომ მას 40%-იც კი შეიძლება სათუო გაუხდეს”, – განაცხადა თამარ კორძაიამ.

ცნობისთვის, საარჩევნო სიების ფორმირებისას, ესა თუ ის დეპუტატობის კანდიდატი შესაძლოა, ერთი ან რამდენიმე მუნიციპალიტეტის დელეგატად განისაზღვროს.

ასეთია ინიციატივა, რომელიც „ქართულმა ოცნებამ“ მოამზადა და პარლამენტის ბიუროს უახლოეს სხდომაზე წარედგინება. კერძოდ, მომზადებული კანონპროექტის გათვალისწინებით “საარჩევნო კოდექსს“ ახალი მუხლი ემატება, რომლის თანახმად, პარტიას უფლება ექნება პარტიული სიის შედგენისას, პარლამენტის წევრობის კანდიდატი საარჩევნო ოლქის ტერიტორიაზე რეგისტრირებულ ამომრჩეველთა დელეგატად განსაზღვროს.

ამავე კანონპროექტით, “ქართული ოცნება“ საკრებულოს მაჟორიტარობის კანდიდატებისთვის დაწესებული 40%-იანი საარჩევნო ბარიერის გაუქმებას გეგმავს. „საარჩევნო კოდექსის“ ჯერ კიდევ მოქმედი რედაქციის თანახმად, მაჟორიტარული წესით არჩეულად ის კანდიდატი ითვლება, რომელიც ხმების 40%-ზე მეტს მიიღებს. წინააღმდეგ შემთხვევაში, არჩევნების მეორე ტური ინიშნება.

„ქართული ოცნების“ პროექტის მიღების შედეგად, საკრებულოს არჩევნების მეორე ტური აღარ გაიმართება.

„ნატოს არ შევუტევთ, მაგრამ უკრაინაში “ეფ-16”-ებს ჩამოვაგდებთ“ – Reuters

ბრიტანული საინფორმაციო-ანალიტიკური სააგენტო „როიტერი“ (Reuters) ავრცელებს სტატიას სათაურით „ნატოს არ შევუტევთ, მაგრამ უკრაინაში “ეფ-16”-ებს ჩამოვაგდებთ“ (ავტორები – გაი ფოლკონბრიჯი და რონ პოპესკი), რომელშიც რუსეთის პრეზიდენტის ვლადიმერ პუტინის განცხადებაა კომენტირებული.

გთავაზობთ პუბლიკაციას:

რუსეთის სამიზნე ნატოს არცერთი ქვეყანა არ არის და მოსკოვი არ დაესხმება თავს პოლონეთს, ბალტიისპირეთის ქვეყნებს, თუ ჩეხეთს. თუმცა, თუკი დასავლეთი უკრაინას “ეფ-16” (F-16) გამანადგურებლებით მოამარაგებს, მათ რუსეთის ძალები ჩამოაგდებენ, – თქვა რუსეთის პრეზიდენტმა ვლადიმირ პუტინმა 27 მარტს.

რუსეთის თავდასხმამ მეზობელ სუვერენულ უკრაინაზე, ქვეყანაში 2022 წელს განმეორებით შეჭრამ და იქ ფართომასშტაბიანი ომის დაწყებამ, რუსეთს და დასავლეთს შორის ისტორიული კრიზისი გამოიწვია, რომლის მსგავსი 1962 წლის კუბის სარაკეტო კრიზისის შემდეგ არ ყოფილა. ევროპის კონტინენტს კი მსგავსი მასშტაბის საომარი მოქმედებები მეორე მსოფლიო ომის შემდეგ არ ახსოვს.

ვლადიმერ პუტინმა ეს განცხადება რუსეთის საჰაერო ძალებთან შეხვედრის დროს გააკეთა. პილოტებთან საუბრის დროს მან თქვა, რომ შეერთებული შტატების ლიდერობით მოქმედი სამხედრო ალიანსი 1991 წელს, საბჭოთა კავშირის დანგრევის შემდეგ, აღმოსავლეთის მიმართულებით გაფართოვდა.

მაგრამ, ამ ყველაფრის მიუხედავად, მოსკოვს ნატოს ქვეყნებზე თავდასხმის გეგმები არ აქვს, აღნიშნა რუსეთის პრეზიდენტმა. “ჩვენ არ გვაქვს აგრესიული მიზნები ამ ქვეყნების მიმართ” – თქვა ვლადიმერ პუტინმა, 28 მარტს, კრემლის მიერ გამოქვეყნებული პრესრელიზის მიხედვით. პრეზიდენტის თქმით, “ის იდეა, რომ ჩვენ შევუტევთ პოლონეთს, ბალტიისპირეთის ქვეყნებს, და რომ ჩეხებიც შეშინებულები არიან – სრული აბსურდია, უბრალოდ სისულელეა”.

რუსეთი შეერთებულ შტატებს რუსეთთან მარიონეტული ბრძოლის წარმოებაში ადანაშაულებს, რადგან ვაშინგტონი უკრაინას მხარს უჭერს დაფინანსებით, შეიარაღებით და დაზვერვის მონაცემებით. კრემლის თქმით, ამერიკასთან ურთიერთობა ამაზე უარესი არასდროს ყოფილა.

როცა პუტინს კითხვა დასავლეთის მიერ უკრაინისთვის დაპირებულ “ეფ-16” გამანადგურებელზე დაუსვეს, მან თქვა, რომ ამგვარი თვითმფრინავები უკრაინაში სიტუაციას ვერ შეცვლის. “თუ ისინი მიაწოდებენ “ეფ-16″-ებს, საუბრობენ ამაზე და აშკარად ამზადებენ პილოტებს, ეს არ შეცვლის სიტუაციას ბრძოლის ველზე”, – თქვა პუტინმა.

რუსეთის პრეზიდენტის თქმით, რუსები ჩამოაგდებენ ამ თვითმფრინავებს ისევე, როგორც ანადგურებენ ტანკებს, ჯავშანტექნიკას და სხვა მოწყობილობებს, მათ შორის სარაკეტო დანადგარებს. პუტინმა იქვე აღნიშნა, რომ ამ თვითმფრინავებს ატომური რაკეტების გადატანაც შეუძლიათ.

წყარო

“პუტინს „დიდი ოცეულის“ სამიტზე მხოლოდ სამიტის მონაწილეთა საერთო თანხმობის შემთხვევაში მოიწვევენ” – მაკრონი

ბრაზილიაში ნოემბერში დაგეგმილ „დიდი ოცეულის“ სამიტზე რუსეთის პრეზიდენტს, ვლადიმერ პუტინს მხოლოდ იმ შემთხვევაში მოიწვევენ, თუ მასში მონაწილე ქვეყანა ამაზე თანხმობას განაცხადებს, – ამის შესახებ საფრანგეთის პრეზიდენტმა, ემანუელ მაკრონმა ბრაზილიაში ვიზიტისას განაცხადა.

მისი თქმით, „დიდი ოცეულის“ განვითარებული და განვითარებადი ქვეყნების გაერთიანების აზრი იმაში მდგომარეობს, რომ „აუცილებლად იქნას მიღწეული კონსენსუსი დანარჩენ 19 ქვეყანასთან, ეს იქნება ბრაზილიური დიპლომატიის ამოცანა“.

„დიდი ოცეული“ ვალდებულია, იმოქმედოს, „ემსახუროს მსოფლიოსა და საერთო ინტერესებს“, – აღნიშნა მაკრონმა.

მაკრონის თქმით, 2019 წელს საფრანგეთში გამართულ „დიდი შვიდეულის“ სამიტზე ვლადიმერ პუტინი სწორედ კონსენსუსის არარსებობის გამო არ მიიწვია. სანაცვლოდ, მან რუსეთის პრეზიდენტთან ცალკე შეხვედრა მოაწყო.

აღსანიშნავია, რომ უკრაინაში ფართომასშტაბიანი ომის დაწყების შემდეგ, ვლადიმერ პუტინი არ ესწრებოდა 2022 წელს ინდონეზიაში, 2023 წელს კი ინდოეთში გამართული „დიდი ოცეულის“ სამიტებს. მის მიმართ სისხლის სამართლის საერთაშორისო სასამართლომ დაკავების ორდერიც გამოსცა.

მუნიციპალური ტრანსპორტის სხვადასხვა მარშრუტს 30 მარტიდან ავტობუსები დაემატება

დედაქალაქში მოქმედ მუნიციპალური ტრანსპორტის ხუთ მარშრუტს 30 მარტიდან ავტობუსები დაემატება და მოცდის ინტერვალი შემცირდება.

ავტობუსების რაოდენობა N309, N310, N370, N381 და N388 მარშრუტებზე იზრდება. პირველი ორი მარშრუტის შემთხვევაში, მოლოდინის დრო შემცირდება 8 წუთამდე, N370-ზე – 15 წუთამდე, N381-ზე – 17 წუთამდე, ხოლო N388-ზე – 10 წუთამდე.

აღსანიშნავია, რომ მას შემდეგ, რაც დედაქალაქის მოსახლეობას 50 ერთეული 18-მეტრიანი ავტობუსი ემსახურება, გამოთავისუფლებული რესურსი სწორედ იმ მარშრუტებზე ნაწილდება, სადაც ყველაზე დიდი დატვირთვა ფიქსირდება. ეს ის 12-მეტრიანი ავტობუსებია, რომლებიც მანამდე N301, N302, N308-სა და N314-ზე მოძრაობდნენ.

24 სხვადასხვა მარშრუტზე ავტობუსების დამატების პროცესი 23 მარტიდან დაიწყო და 6 აპრილს დასრულდება.

“ქართველი ადამიანი ამბობს, რომ არ სურს ლგბტ პროპაგანდა, სახელმწიფომ უნდა იკისროს ვალდებულება და კონსტიტუციის დონეზე გაამყაროს პროპაგანდის აკრძალვა”

ქართველი ადამიანი ამბობს, რომ მას არ სურს ლგბტ პროპაგანდა, კაცის კაცზე ქორწინება და სურს ქართული იდენტობის შენარჩუნება, მგონი, ეს სახელმწიფომ თავის თავზე უნდა აიღოს და ვალდებულება იკისროს, რომ კონსტიტუციის დონეზე გაამყაროს პროპაგანდის აკრძალვა, – ამის შესახებ „ხალხის“ ძალის წევრმა, გურამ მაჭარაშვილმა განაცხადა.

მისი თქმით, ვისაც განსხვავებული მოსაზრება აქვს, პირდაპირ უნდა თქვას, არიან თუ არა ლგბტ პროპაგანდის მომხრე.

„ჩვენ უკვე ამდენი უსაფუძვლო შეშფოთებებით შეშფოთებული ვართ, რადგან როცა ქართველი ადამიანი ამბობს, რომ მას არ სურს ლგბტ პროპაგანდა, კაცის კაცზე ქორწინება და სურს ქართული იდენტობის შენარჩუნება, მგონი, ეს სახელმწიფომ თავის თავზე უნდა აიღოს და ვალდებულება იკისროს, რომ კონსტიტუციის დონეზე გაამყაროს პროპაგანდის აკრძალვა. სხვათა შორის, ეს ბევრმა სხვა ქვეყანამ გააკეთა. რომის პაპმა კაცობრიობას მიმართა, რომ ლგბტ პროპაგანდა საშიშია. ასევე, დიდი ბრიტანეთის პრემიერმა თქვა „ქალი ქალია,“ „კაცი კაცი“ და ამერიკის პრეზიდენტმაც იგივე გაიმეორა. საქართველო უფრო მოწყვლადი ქვეყანაა და ჩვენი ინტერესია ქართული იდენტობა დაცული იყოს. ვისაც რაიმე განსხვავებული მოსაზრება აქვს, პირდაპირ თქვას და არა ენის მოჩლექით, მხარს არ ვუჭერო. პირდაპირ თქვან, არიან თუ არა ლგბტ პროპაგანდის მომხრე“, – განაცხადა გურამ მაჭარაშვილმა.

“თებერვალში საქართველოს ეკონომიკა 9.5 პროცენტით გაიზარდა” – საქსტატი

სტატისტიკის ეროვნული სამსახურის წინასწარი შეფასებით, 2024 წლის თებერვალში, წინა წლის შესაბამის პერიოდთან შედარებით, რეალური მთლიანი შიდა პროდუქტის ზრდამ 9.5 პროცენტი შეადგინა, ხოლო იანვარი-თებერვლის საშუალო მაჩვენებელი 7.7 პროცენტია.

საქსტატის ცნობით, 2024 წლის თებერვალში, წინა წლის შესაბამის პერიოდთან შედარებით, ზრდის მიმართულებით მნიშვნელოვანი წვლილი შეიტანა ისეთმა დარგებმა, როგორიცაა დამამუშავებელი მრეწველობა, მშენებლობა, პროფესიული, სამეცნიერო და ტექნიკური საქმიანობები, ინფორმაცია და კომუნიკაცია, ტრანსპორტი და დასაწყობება.

კლების ტენდენცია დაფიქსირდა ენერგეტიკის და სამთომოპოვებითი მრეწველობის სექტორებში.

ახალი სამაშველო ვერტმფრენი გერმანიიდან საქართველოში ჩამოიყვანეს

საქართველოს შინაგან საქმეთა სამინისტროს სასაზღვრო პოლიციის თანამედროვე, ახალი, ევროპული ტიპის „H 145“ ვერტმფრენი უკვე საქართველოშია.

სასაზღვრო პოლიციის სპეციალური დანიშნულების ავიაციის დეპარტამენტის მფრინავებმა ვერტმფრენი გერმანიიდან საქართველოში ჩამოიყვანეს.
ახალი ბორტი სრულად დაკომპლექტებულია ხანძართან ბრძოლისა და სამთო-სამაშველო აღჭურვილობით.

სამაშველო ვერტმფრენს აქვს ორი ძრავა, რაც ზრდის ფრენის უსაფრთხოებას, ასევე, განსხვავებული, ფენენსტრონის ტიპის კუდა ხრახნი. იგი გაუმჯობესებულია, როგორც აეროდინამიკური, ასევე, ფრენის უსაფრთხოების თვალსაზრისით.

აღნიშნული ტიპის შვეულმფრენები მაღალ სიმაღლეზე ოპერირებისა და მანევრის შესაძლებლობებით გამოირჩევა, რაც, საქართველოს მაღალმთიანი რელიეფის გათვალისწინებით, არსებულ ამოცანებთან სრულად თავსებადია.

სასაზღვრო პოლიციის სპეციალური დანიშნულების ავიაციის დეპარტამენტის მფრინავებმა და ბორტ-ტექნიკოსებმა თეორიული და პრაქტიკული მომზადება გერმანიაში, „Airbus Helicopters“-ის სასწავლო აკადემიაში გაიარეს.

თანამედროვე, ევროპული ტიპის „H 145“, ვერტმფრენი, ფრანგული კომპანია „Airbus Helicopters” -ის მიერ წარმოებული ერთ-ერთი უახლესი მოდელია, რომლის გადმოცემა გერმანიაში, „Airbus Helicopters“-ის საწარმოში განხორციელდა.

შემდეგი ორი ბორტის გადმოცემა ქართული მხარისთვის 2024 წლის ივნისამდე იგეგმება.

“ოცნება“ ღია ტექსტით აღიარებს, რომ მათთვის 40 პროცენტი სერიოზული გამოწვევაა და საარჩევნო ბარიერის გადალახვა არ შეუძლიათ”

ფაქტობრივად, „ქართული ოცნება“ გვეუბნება, მათ 60%-იანი მხარდაჭერა აქვთ და 40%-ზეც კი არ არიან. „ოცნება“ ამ კანონპროექტით და არა მხოლოდ ამ კანონპროექტით, თვითაღიარების რეჟიმშია და გვეუბნება, რომ 60%-იანი მხარდაჭერა კი არ აქვთ, არამედ 40%-იანი მხარდაჭერაც სერიოზული პრობლემაა მათთვის, – ამის შესახებ პარტია „საქართველოსთვის“ წევრმა, მიხეილ დაუშვილმა საკრებულოს მაჟორიტარობის კანდიდატებისთვის დაწესებული 40-პროცენტიანი საარჩევნო ბარიერის შესაძლო გაუქმებასთან დაკავშირებით განაცხადა.

დაუშვილის თქმით, „ოცნება“ ხვდება, რომ ძველი, მაჟორიტარული სისტემის გარეშე, მათთვის ძალაუფლების შენარჩუნება შეუძლებელია.

„ამიტომ ცდილობენ, რაღაც ფორმით ძველი სისტემა დააბრუნონ, თუმცა ვერ დააბრუნებენ, რადგან ის კონსტიტუციასთან წინააღმდეგობაშია. ეს სისტემაც რამდენად თანხვედრაში და შესაბამისობაშია, ცალკე განხილვის საგანია. მთავარი ის არის, რომ „ოცნება“ ღია ტექსტით აღიარებს, რომ მათთვის 40% სერიოზული გამოწვევაა და ბარიერის გადალახვა არ შეუძლიათ“, – აღნიშნა მიხეილ დაუშვილმა.

შესაძლოა, საკრებულოს მაჟორიტარობის კანდიდატებისთვის დაწესებული 40-პროცენტიანი საარჩევნო ბარიერი გაუქდეს. შესაბამისი ცვლილებების ინიცირებას „ქართული ოცნება“ მიმდინარე კვირას გეგმავს. პარლამენტში წარდგენილი ცვლილებებით, მაჟორიტარული საარჩევნო სისტემის საფუძველზე საკრებულოში არჩეულად ის კანდიდატი ჩაითვლება, რომელიც სხვებზე მეტ ხმას მიიღებს.

ილია დარჩიაშვილი არგენტინის რესპუბლიკის ვიცე-პრეზიდენტს შეხვდა

არგენტინის რესპუბლიკაში ვიზიტის ფარგლებში, საქართველოს საგარეო საქმეთა მინისტრმა, ილია დარჩიაშვილმა, შეხვედრა გამართა არგენტინის რესპუბლიკის ვიცე-პრეზიდენტთან, არგენტინის სენატის პრეზიდენტ ვიქტორია ვილარუელთან.

შეხვედრაზე მხარეებმა კმაყოფილებით აღნიშნეს არგენტინასა და საქართველოს შორის ისტორიულად ჩამოყალიბებული მეგობრული და პარტნიორული ურთიერთობები, რომლებსაც საფუძველი ჯერ კიდევ საქართველოს პირველი დემოკრატიული რესპუბლიკის პერიოდიდან ჩაეყარა და საქართველოს დამოუკიდებლობის აღდგენის შემდგომ წარმატებით გაგრძელდა. არგენტინის ვიცე-პრეზიდენტი მიესალმა საქართველოს საგარეო საქმეთა მინისტრის ვიზიტს არგენტინასა და ზოგადად სამხრეთ ამერიკის რეგიონში, რაც გაგრძელებაა იმ ინტენსიური დიალოგისა, რომელსაც საქართველო აწარმოებს ლათინური ამერიკისა და კრიბის ზღვის აუზის ქვეყნებთან.

მხარეებმა პოზიტიური შეფასება მისცეს საქართველო-არგენტინის საპარლამენტო თანამშრომლობას და გამოთქვეს მზადყოფნა, აქტიურად იმუშაონ საპარლამენტო დონეზე კავშირების კიდევ უფრო გასაღრმავებლად. შეხვედრაზე მიმოხილულ იქნა ევროპის კონტინენტზე არსებული ვითარება, საქართველოს საგარეო პოლიტიკური მისწრაფებები და ქვეყანაში მიმდინარე დემოკრატიული პროცესები. ყურადღება გამახვილდა საქართველოს გაზრდილ რეგიონულ როლზე კანდიდატის სტატუსის მინიჭების შემდგომ, რაც კიდევ უფრო აუცილებელს ხდის აქტიურ კომუნიკაციას მსოფლიოს სხვადასხვა რეგიონის ქვეყნებთან საქართველოს საერთაშორისო პოზიციების განმტკიცებისა და ქვეყნის შესაძლებლობათა პოზიციონირების თვალსაზრისით. ასევე, განხილულ იქნა რეგიონში არსებული უსაფრთხოების გარემო; ხაზი გაესვა არგენტინის მხრიდან საქართველოს სუვერენიტეტისა და ტერიტორიული მთლიანობის მტკიცე მხარდაჭერას; შეფასდა ქვეყნებს შორის სხვადასხვა სფეროში თანამშრომლობის მზარდი პოტენციალი. განსაკუთრებული ყურადღება დაეთმო ხალხთაშორისი და კულტურული კავშირების გაღრმავების მნიშვნელობას.

“ევროპის საბჭოს მხრიდან მოსკოვში მომხდარ თავდასხმაზე რეაგირების არქონა სირცხვილია” – მარია ზახაროვა

ევროპის საბჭოს ხელმძღვანელობის მხრიდან მოსკოვის საკონცერტო დარბაზში მომხდარ ტერაქტზე რეაგირების არქონა ორგანიზაციის სირცხვილია, – ამის შესახებ რუსეთის საგარეო საქმეთა სამინისტროს პრესსპიკერმა, მარია ზახაროვამ განაცხადა.

„ეს არის კიდევ ერთი სამარცხვინო ფურცელი ორგანიზაციის ისტორიაში, რომელიც ამაოდ ცდილობს თავის თავს „ევროპის სინდისი“ უწოდოს და ევროპის კონტინენტზე ადამიანის უფლებების მთავარ დამცველობაზე ჰქონდეს პრეტენზია. სტრასბურგის ეს ხაზი კიდევ ერთხელ ადასტურებს დღევანდელი ევროპის საბჭოს ღრმა დეგრადაციას, რომელიც ჩაძირულია პოლიტიკურ ფარისევლობასა და „ორმაგ სტანდარტებში“, – განაცხადა ზახაროვამ.

მისი თქმით, მშვიდობიანი მოსახლეობის წინააღმდეგ განხორციელებულ ბარბაროსულ თავდასხმაზე რეაგირების არქონა აჩენს კითხვებს იმასთან დაკავშირებით, შეუძლია თუ არა ევროპის საბჭოს წვლილი შეიტანოს საერთაშორისო სტაბილურობაში, ტერორიზმის წინააღმდეგ ბრძოლაში და ადამიანის უფლებების დაცვაში.

შეგახსენებთ, 22 მარტს რუსეთის ოლქში მდებარე საკონცერტო დარბაზ „კროკუს სითი ჰოლზე“ შეიარაღებულ თავდასხმას, ბოლო მონაცემებით, 140-ზე მეტი ადამიანი ემსხვერპლა. თავდასხმაზე პასუხისმგებლობა ე.წ. „ისლამურმა სახელმწიფომ“ აიღო.

OneRepublic კონცერტზე დასასწრები ბილეთების გაყიდვა დაიწყო

OneRepublic-ის კონცერტზე დასასწრები ბილეთების გაყიდვა დაიწყო. Black Sea Arena-ს ცნობით, ბილეთები უკვე ხელმისაწვდომია ვებ-გვერდზე TKT.ge და BSA.ge. მათი ფასი 145 ლარიდან 550 ლარამდე მერყეობს, თუმცა Starring Georgia -ს, TBC-სა და VISA-ს პარტნიორობის ფარგლებში რამდენიმე ტიპის ფასდაკლება მოქმედებს.

„10 მაისს Black Sea Arena ამერიკულ ბენდს OneRepublic უმასპინძლებს. ალტერნატიული როკის და პოპ მუსიკის ესთეტიკით გაჯერებული კოლექტივის საქართველოში ვიზიტი რამდენიმე წლის წინ დაიგეგმა და ძალიან გვიხარია, რომ წელს შესაძლებლობა გვეძლევა მათ სრულყოფილად ვუმასპინძლოთ Starring Georgia-ს ფარგლებში.

ბილეთები უკვე ხელმისაწვდომია ვებ-გვერდზე TKT.ge და BSA.ge. მათი ფასი 145 ლარიდან 550 ლარამდე მერყეობს, თუმცა Starring Georgia -ს, TBC-სა და VISA-ს პარტნიორობის ფარგლებში რამდენიმე ტიპის ფასდაკლება მოქმედებს:

-20% ყველა კატეგორიის ბილეთზე “თიბისის” Visa ბარათებით შეძენისას;

-30% II იარუსის კატეგორიის ბილეთებზე „თიბისის“ მოსწავლის და სტუდენტის Visa ბარათებით შეძენისას;

-30% VIP კატეგორიის ბილეთებზე „თიბისი კონცეპტის“ და WM-ის Visa ბარათებით შეძენისას;

-15% ყველა კატეგორიის ბილეთზე “თიბისის” განაწილებით შეძენისას;

-ფასდაკლება არ მოქმედებს BSA.ge-ზე შეძენის შემთხვევაში.

ფასდაკლება იმოქმედებს 28 მარტიდან 11 აპრილის ჩათვლით. აღსანიშნავია, რომ 1 მომხმარებელს მაქსიმუმ 4 ბილეთის შეძენა შეუძლია. TKT.ge-ზე ყველა კატეგორიის ბილეთის ყიდვას შეძლებთ, BSA.ge-ზე კი მხოლოდ Star Ring- ის კატეგორიის ბილეთები დაგხვდებათ. BSA.ge – ზე არ იმოქმედებს TBC VISA ფასდაკლება.

One Republic ამერიკული პოპ-როკ ბენდია, რომელიც 2002 წელს შეიქმნა, თუმცა პირველ მნიშვნელოვან წარმატებას 5 წლის შემდეგ, კომპოზიციით Apologize მიაღწია. ამერიკული ჯგუფისთვის განსაკუთრებით წარმატებული აღმოჩნდა 2013 წლის სტუდიური კრებული Native, რაც პირველ რიგში If I Lose Myself და Counting Stars-ის დამსახურებაა. 3 მილიარდი მოსმენით და ჩარტში დამყარებული რეკორდების წყალობით Counting Stars დეკადის ერთ-ერთი ყველაზე წარმატებული ჰიტი გახდა, რისი დამსახურებითაც ბენდი ახალი თაობის საყვარელი პროექტიც გახდა. პარალელურად, ჯგუფის ფრონტმენი რაიან ტედერი სხვადასხვა წარმატებული პროექტის მონაწილე გახდა: მის მიერ დაწერილი სიმღერები Beyonce, Adele, Maroon 5 დისკოგრაფიაში მოხვდა.

თანამედროვეობის ერთ-ერთი საუკეთესო ლაივ შემსრულებელი ბენდი Black Sea Arena-ს 10 მაისს ეწვევა.

უკვე მე-2 წელია, საქართველოს პრემიერ-მინისტრის ინიციატივით , Black Sea Arena საქართველოში მასშტაბურ კამპანიას – Starring Georgia – ს აგრძელებს. კამპანიის მთავარი მიზანია ხელმისაწვდომი გახადოს ქართველი ახალგაზრდებისთვის საკუთარ ქვეყანაში მათი საყვარელი მუსიკოსების მოსმენა, განავითაროს ქვეყნის გასართობი ინდუსტრია და ხელი შეუწყოს საქართველოს პოპულარიზაციას. Starring Georgia-ს 2023 წლის სეზონზე საქართველომ არაერთ მეგა-ვარსკვლავს უმასპინძლა. როგორც თბილისში, ასევე შეკვეთილში, მსმენელს საშუალება ჰქონდა მოესმინა ისეთი ცნობილი მუსიკოსებისთვის როგორებიც არიან: „Bruno Mars“, „Imagine Dragons “„The Killers“, „Damian Lazarus“, “All Day I Dream“,-აღნიშნულია ინფორმაციაში.