შეიძლება, პოლიციის მხრიდან არის რაღაც გადაცდომები, რომელსაც სამინისტრო გააანალიზებს, მაგრამ დამოკიდებულება ადამიანებს შორის არ იცვლება. მეორე წუთში ის პოლიციელი, რომელიც იქ იმყოფება, სიცოცხლეს დათმობს ნებისმიერი ახალგაზრდისათვის. ეს არ არის ლიტონი სიტყვა. ის პოლიციელებიც ჩვენი შვილები არიან და როცა საჭირო იქნება, ჩვენი სიცოცხლის დასაცავად დადგებიან, – ამის შესახებ პარლამენტის თავმჯდომარის პირველმა მოადგილემ, გია ვოლსკიმ პლენარულ სხდომაზე განაცხადა, სადაც ინტერპელაციის წესით შინაგან საქმეთა მინისტრის გამოსვლას მოუსმინეს.

მისი თქმით, შედეგით უნდა ვიმსჯელოთ, ვინ არის პრორუსული ძალა.

„რა შედეგს ვხედავთ? სიყალბეს, პირფერობას, ვითომ პროდასავლურობას და უნდათ, რომ ახალგაზრდების ზურგზე შემომჯდარი შემოვიდნენ სახელისუფლო სისტემაში. არცერთი ახალგაზრდა, ვინც აქციაზე იყო, არ იტყვის, რომ ლევან ხაბეიშვილს წაჰყვება იმ ბრძოლაში, რასაც პოლიტიკური ბრძოლა ჰქვია“, – განაცხადა გია ვოლსკიმ.

ვოლსკიმ გამოსვლაში „უცხოური გავლენის გამჭვირვალობის შესახებ“ კანონპროექტზე და განვითარებულ მოვლენებზე გაამახვილა ყურადღება.

„ეს საქართველოა, რომელსაც თავისი ღირსება, თავისი პოზიცია და წონა უნდა გააჩნდეს საერთაშორისო ასპარეზზე. ასე რომ, მართლაც, ჩვენი გზა არის ევროპისკენ, რასაკვირველია, არა რუსულ კანონს, მშვიდობა საქართველოს. სწორედ ისე უნდა იყოს ყველაფერი, როგორც ჩვენი ერის, ახალგაზრდების და თითოეული ჩვენგანისთვის აჯობებს“, – განაცხადა გიორგი ვოლსკიმ.

ბატონო ვახტანგ, დღეს საქართველოს წინაშე თქვენი სახით არ დგას საქართველოს შინაგან საქმეთა მინისტრი, დღეს თქვენი სახით აქ დგას ყოფილი პროფესიული როლიდან ვერგამოსული რუსი ოლიგარქის, ბიძინა ივანიშვილის პირადი მცველი, რომელიც მზად არის, „რუსული კანონის“ დასაცავად ჩვენი ქვეყნის ევროპული ინტერესის წინააღმდეგ ქართველი ხალხის და ახალგაზრდების წინააღმდეგ აღმართოს პოლიციის ხელი, რომელიც სულ უფრო და უფრო ემსგავსება რუსულ „ომონს“, – ამის შესახებ საპარლამენტო ფრაქცია „ერთიანი ნაციონალური მოძრაობის“ თავმჯდომარემ, თინა ბოკუჩავამ პარლამენტის პლენარულ სხდომაზე განაცხადა, სადაც შს მინისტრს ინტერპელაციის წესით უსმენენ.

მისივე თქმით, მარადიულია ამ ქვეყნის სწრაფვა ევროპისკენ, რომელიც აუცილებლად გამარჯვებით დასრულდება.

„ბატონო ვახტანგ, დღეს, საქართველოს პარლამენტში მოწვეული ხართ ინტერპელაციის წესით და ჩვენ დღეს უნდა გვესაუბრა ფემიციდის უმძიმეს პრობლემაზე, რომელიც მართლა ძალიან საგანგაშოა, მაგრამ დღეს არ შეგვიძლია ვისაუბროთ ამ თემაზე და არ შევეხოთ „რუსული კანონის“ ირგვლივ განვითარებულ მოვლენებს, რომლის მიღებითაც ცდილობთ სწორედ ის სამოქალაქო საზოგადოების წარმომადგენლები და სწორედ ის სამოქალაქო ორგანიზაციები შეზღუდოთ, რომლებიც ამ ქვეყანაში ქალთა უფლებების დასაცავად იბრძვიან, რომლებიც იბრძვიან ამ ქვეყანაში ქალთა მიმართ ძალადობის ფაქტების გამოსავლენად და იბრძვიან ამ ქვეყანაში იმისთვის, რომ შემცირდეს ქალთა მიმართ ძალადობა. მაშინ, როდესაც სახელმწიფო, მათ შორის, შინაგან საქმეთა სამინისტრო ხშირ შემთხვევაში სრულიად უმოქმედოა და მაშინ, როდესაც, მათ შორის პარლამენტის სპიკერი პაპუაშვილი, რომელიც თავად არ ერიდება ქალთა წინააღმდეგ ძალადობას, ისევე, როგორც გენდერული საბჭო წილოსანის თავმჯდომარეობით, რომელიც არასოდეს არ აკეთებს შესაბამის განცხადებებს ქალთა მიმართ ძალადობის ფაქტებზე. პარლამენტი, რომელიც დუმს და რომელიც სრულიად უმოქმედოა ქალთა მიმართ ძალადობის შესახებ. სწორედ ამ კონტექსტში აუცილებელია, რომ დღეს ჩვენ ვისაუბროთ იმ მოვლენებზე, რაც საზოგადოებამ იხილა „რუსული კანონის“ პირველი მოსმენით მიღების შემდეგ იმიტომ, რომ დიახ, ეს მათ შორის, ქალთა უფლებებს ეხება.

ბატონო ვახტანგ, დღეს საქართველოს წინაშე თქვენი სახით არ დგას საქართველოს შინაგან საქმეთა მინისტრი, დღეს თქვენი სახით აქ დგას ყოფილი პროფესიული როლიდან ვერ გამოსული რუსი ოლიგარქის, ბიძინა ივანიშვილის პირადი მცველი, რომელიც მზად არის, „რუსული კანონის“ დასაცავად ჩვენი ქვეყნის ევროპული ინტერესის წინააღმდეგ ქართველი ხალხის და ახალგაზრდების წინააღმდეგ აღმართოს პოლიციის ხელი, რომელიც სულ უფრო და უფრო ემსგავსება რუსულ „ომონს“. დიახ, ეს ადამიანი დგას დღეს საქართველოს პარლამენტის წინაშე.

ივანიშვილის პარტიის დეპუტაციას დღეს აქ ძალიან მოგხვდათ გულზე, როდესაც შეგახსენეთ, რამ გამოიწვია პირველი ძალადობა ახალგაზრდების წინააღმდეგ 16 აპრილის ღამეს. პლენარული სხდომის დასრულებისას, თქვენი მალულად და მოღალატეობრივად პარლამენტის შენობიდან გაპარების აუცილებლობამ. აი, ამან გამოიწვია პირველი ძალადობა ახალგაზრდების წინააღმდეგ. ჩემი შეფასება არ მოგწონთ? ბატონებო და ქალბატონებო ივანიშვილის პარტიიდან, მაშინ წაგიკითხავთ ერთ-ერთი სპორტული და სრულიად აპოლიტიკური კომენტატორის შეფასებას, რომელიც წერს: „83 მონა მივიდა პარლამენტში. არაფერია ამ ცხოვრებაში მუდმივი არც თანამდებობა, არც პარლამენტში ყოფნა მითუმეტეს, ბატონებს სჩვევიათ მონების მარტივად მოშორება. გავა დრო და უსახო მონები რამენაირად გაძვრებიან სადმე, მაგრამ სახიან და სახელიან მონებს ძალიან გაგიჭირდებათ საზოგადოების აქეთ ჩვეულებრივ, უძალაუფლებო ნაწილში ცხოვრება“. ეს არის სრულიად აპოლიტიკური სპორტული კომენტატორის შეფასება თქვენს შესახებ.

მე კი მინდა იცოდეთ თითოეულმა თქვენგანმა, 83-ვე ივანიშვილის პარტიის წევრმა, ვინც ხმა მისცა „რუსულ კანონს“, თქვენც ბატონო ვახტანგ, როგორც ივანიშვილის მსახური და რაც მთავარია თავად ბიძინა ივანიშვილმა, რომ თქვენი დროებითი ძალაუფლებისგან განსხვავებით, იმ ადამიანების ძალაუფლება, რომლებიც რუსთაველზე დგანან და რომლებიც იცავენ ჩვენს ქვეყანას, ჩვენი ქვეყნის ევროპულ მომავალს, მათი ძალაუფლება, ქართველი ხალხის ძალაუფლება მარადიულია, მარადიულია ამ ქვეყნის სწრაფვა ევროპისკენ, რომელიც აუცილებლად დასრულდება გამარჯვებით“, – განაცხადა თინა ბოკუჩავამ.

მშიშარა და ლაჩარმა მამუკა მდინარაძემ რომ ვერ გაბედა ჩემთვის პასუხი დაებრუნებინა, პოლიციელები დამასია ტურებივით. ბოდიშს ვიხდი, ისინი პოლიციელები არ არიან – ვინც მე მირტყამდა, არის “ძაღლობა”, – ამის შესახებ “მოქალაქეების” ლიდერმა, დეპუტატმა ალეკო ელისაშვილმა ჟურნალისტებს სპეციალურ საგამოძიებო სამსახურთან განუცხადა, სადაც ის მისი ცემის ფაქტთან დაკავშირებით გამოკითხვაზე მივიდა.

ელისაშვილმა ისაუბრა 17 აპრილის ღამეს, მთავრობის ადმინისტრაციასთან გამართულ აქციაზე, მასსა და სამართალდამცველებს შორის მომხდარ დაპირისპირებაზე. როგორც დეპუტატმა აღნიშნა, მას არ აქვს იმედი, რომ სპეციალური საგამოძიებო სამსახური ამ დაპირისპირებას ობიექტურად გამოიძიებს.

“აქ, აბსოლუტური ფორმალობა გველის, იქნება წყალ-წყალა პროცედურა, რომ ვითომ რამეს აკეთებენ, ვითომ ვინმეს დაკავება უნდათ. ამ საქმეზე ვარ მოსული. ამათი გამოძიებული არ გაიშვას, მაგრამ მე მოვედი იმის გამო, რომ პატივს ვცემ ჩემ სახელმწიფოს და ზოგადად კანონმდებლობას. არ ვარ მე კანონმორჩილი, მაგრამ მე ვარ კანონის პატივისმცემელი ადამიანი, ამ ფორმალობასაც დავიცავ, თორემ რამის გამოძიება თუ უნდათ, გადაღებულია კადრები, სადაც ყველაფერი ხელისგულზე დევს და სახეები ჩანს, რომ აქციაზე არანაირი დაკავება არ ხდებოდა. ეს იყო გაჩაღებული ცემა-ტყეპა და სადამსჯელო ოპერაცია. მშიშარა და ლაჩარმა მდინარაძემ რომ ვერ გაბედა ჩემთვის პასუხი დაებრუნებინა, პოლიციელები დამასია ტურებივით. ბოდიშს ვიხდი, ისინი პოლიციელები არ არიან – ვინც მე მირტყამდა, არის “ძაღლობა”. საბჭოთა დროს რომ პოლიციელებს “ძაღლობას” ეძახდნენ, იმათი მენტალური შთამომავლები და იდეის გამგრძელებლები არიან ესენი, თორემ მე პატიოსან, კანონის მორჩილ პოლიციელებს პატივს ვცემ.

კადრები რომ ვნახე, კიდევ უფრო დავიძაბე. მაგდენი თუ მომხვდა, არ მახსოვდა იმიტომ, რომ იქ ისე ვიყავი, ადრენალინია, სტრესია და თურმე, კიდევ უფრო შემზარავი ყოფილა რაც გავიარე, მაგრამ პასუხს ვის მოსთხოვენ? აქ რომ გულმოდგინედ მიუდგნენ, 18-წლიანი მუხლი ემუქრებათ, რადგან ეს არის ჯგუფური, ორგანიზებული დანაშაული, ძალადობა პოლიციის მხრიდან. გამოძვრნენ საყვედურებით. ბოდიში ყველასთან, მაგრამ “ქუნემ” ამათი გამოძიება. ვისაც ესმის, გაიგებს, რაც ვიგულისხმე”, – განაცხადა ელისაშვილმა.

ელისაშვილის თქმით, მან პოლიციელებს აუხსნა, რომ მისი დაკავების უფლება არ ჰქონდათ, რადგანაც მას სადეპუტატო მანდატი იცავდა, რაზეც პოლიციამ უპასუხა, რომ ეს დაკავება არ იყო, ეს იყო განრიდება. ელისაშვილის თქმით, სინამდვილეში კი, ეს იყო დაკავება და დაკავების ოქმიც შედგენილი აქვს პოლიციას.

გარდა ამისა, დეპუტატის თქმით, მას სამართალდამცველებისთვის შეურაცხყოფა არ მიუყენებია. როგორც მან აღნიშნა, როდესაც ის მთავრობის ადმინისტრაციაში შეიყვანეს სამართალდამცველებმა, მას სახელმწიფო დაცვის სპეციალური სამსახურის უფროსი ანზორ ჩუბინიძე შეხვდა, რომელთანაც ცხარე საუბარი ჰქონდა.

“მისგან არანაირი აგრესია არ იყო, მისმენდა და მეუბნებოდა, დამშვიდდი, დაწყნარდი, ყველაფერი გაირკვევაო. ამ ცოდვას ვერ დავიდებ, ნაღდად ვერ მოვიტყუები.

თავიდან აგრესიული იყო საპატრულო პოლიციის დეპარტამენტის ხელმძღვანელი, ვაჟა სირაძე. სირაძეს ფიზიკური შეურაცხყოფა არ მოუყენებია, მაგრამ შეურაცხმყოფელ სიტყვებს ამბობდა, აგრესიული იყო და პირველად მისგან გაისმა “შეათრიეთო” და დამთავრებული არ ჰონდა ეს სიტყვა, რომ გავქრი იმ პოლიციელების ფეხებში”, – განაცხადა ელისაშვილმა.

დედაქალაქის მერმა, კახა კალაძემ „უცხოური გავლენის გამჭვირვალობის შესახებ“  კანონპროექტის გაწვევასთან დაკავშირებით მედიის კითხვას უპასუხა და განაცხადა, რომ აღნიშნული კანონპროექტის გაწვევის საფუძველს ვერ ხედავს.

კახა კალაძის თქმით, დასავლეთისგან მითითებები სახელმწიფოს ინტერესებისთვის საზიანო ისეთ საკითხებსაც ეხებოდა, როგორიცაა ყოფილი პრეზიდენტის, მიხეილ სააკაშვილის პატიმრობიდან გათავისუფლება და ქვეყანაში მეორე ფრონტის გახსნა.

„რატომ უნდა გაიწვიოს აღნიშნული კანონპროექტი? საფრთხეს უქმნის ჩვენს სახელმწიფოებრიობას?! ჩვენ იმასაც გვეუბნებოდნენ, რომ სააკაშვილს თუ არ გამოვუშვებდით, ეს იქნებოდა ევროკავშირისგან  დაშორება, რომ კანდიდატის სტატუსს არ მივიღებდით, თუ სანქციებს არ შევუერთდებოდით და მეორე ფრონტი არ გაიხსნებოდა.

ერთი რამე გავითვალისწინოთ – ყველამ უნდა ვიფიქროთ სახელმწიფოს ინტერესებზე, ჩვენი სუვერენიტეტის გაძლიერებაზე. ჩვენ თუ დანგრეული და გაუბედურებულები, დაჩაჩანაკებული ვიქნებით, რომელ ევროპაზეა საუბარი? რომელ ევროპას მოუნდება ასეთი საქართველო? პირიქით, ძლიერები უნდა ვიყოთ და ძლიერი საქართველო არის ევროპისთვისაც მნიშვნელოვანი. არამარტო ჩვენთვის, ევროპისთვისაც, ძლიერი საქართველოს შესვლა ევროკავშირში არის მნიშვნელოვანი“, – განაცხადა კახა კალაძემ.

თუ ვინმე არის პროვოკატორი და მოძალადე, ეს არის ხელისუფლება, რომელმაც იცოდა რა მოჰყვებოდა რუსული კანონის თავიდან შემოტანას და რომელსაც უკვე ნანახი ჰქონდა ეს ყველაფერი. მათ არ უნდათ ევროპული მომავალი და რუსული კანონის შემოტანაც არის ამის დასტური, – ამის შესახებ „ერთიანი ნაციონალური მოძრაობის“ თავმჯდომარემ, ლევან ხაბეიშვილმა განაცხადა.

მისივე თქმით, უნდათ რომ სპეცრაზმსა და მოსახლეობას შორის იყოს დაპირისპირება და მუდმივ დაძაბულ რეჟიმში ამყოფონ ხალხი.

„თუ ვინმე არის მოძალადე, თუ ვინმე არის პროვოკატორი, ეს არის ხელისუფლება, რომელმაც იცოდა რა მოჰყვებოდა ამ კანონს და ნანახიც ჰქონდა. ხალხს უთხრა, რომ არ შემოიტანდა, მოატყუა, შემოიტანა ეს კანონი, ზუსტად იცოდა რა მოჰყვებოდა. მთელი საქართველო რომ ბედნიერი იყო ფეხბურთელები ევროპის ჩემპიონატზე გავიდნენ და გაიღიმეს, რამდენიმე დღე არ აცადეს, ამიტომ თუ ვინმეა მოძალადე და პროვოკატორი, ეს არის ხელისუფლება და საზოგადოება ამას ძალიან კარგად ხვდება. წინააღმდეგ შემთხვევაში ხუთი თვეა დარჩენილი არჩევნებამდე, აცალონ ადამიანებს მშვიდად არჩევანის გაკეთების შესაძლებლობა, რა საჭირო იყო ახლა შემოტანა, მაგრამ რუსეთისგან მიიღეს დავალებები, უნდოდათ არეულობა, უნდათ რომ სპეცრაზმსა და მოსახლეობას შორის იყოს დაპირისპირება და მუდმივ დაძაბულ რეჟიმში ამყოფონ ხალხი. მათ არ უნდათ ევროპული მომავალი და ამ კანონის შემოტანაც არის ამის დასტური”, – განაცხადა ლევან ხაბეიშვილმა.

არანაირი მნიშვნელობა არ აქვს, ოპოზიცია გაერთიანდება თუ ცალკეულ მარტივ მამრავლებად დაიშლება. შესაკრებთა გადაცვლებით ჯამი არ იცვლება, – ასე უპასუხა თბილისის მერმა, კახა კალაძემ კითხვას, აქვს თუ არა ოპოზიციურ პოლიტიკურ პარტიებს გაერთიანების პოტენციალი.

კახა კალაძის განმარტებით, ოპოზიციის ერთადერთი საზრუნავი ბარიერის გადალახვა იქნება. თბილისის მერის თქმით, ძალიან დიდია ზეწოლა და შემოტევები, რომ ხელისუფლებამ რაღაცები არასწორად გააკეთოს.

„მათი ერთადერთი საზრუნავი იქნება, როგორმე მოახერხონ ბარიერის გადალახვა. „ქართული ოცნება“ არის ის გუნდი, ვინც ქვეყანაში იცავს მშვიდობას, ჩვენი ქვეყნის სახელმწიფოებრიობას, სუვერენიტეტს. ხედავთ, რა ხდება მსოფლიოში, რამდენად მძიმე მდგომარეობაა რეგიონში, ახლო აღმოსავლეთში. ურთულესი სიტუაციაა და უმძიმეს რეალობაში გვიწევს ცხოვრება. ძალიან ფრთხილად გვიწევს ნაბიჯების გადადგმა, რომ პირველ რიგში, მშვიდობა იყოს ჩვენს ქვეყანაში. ძალიან დიდია ზეწოლა და შემოტევები, რომ რაღაცები არასწორად გაკეთდეს. წარმოგიდგენიათ, ჩვენ რომ შეცდომა დაგვეშვა, გადაგვედგა არასწორი ნაბიჯი სანქციებთან მიერთებით, „მეორე ფრონტთან“ დაკავშირებით, დღეს რა მდგომარეობა გვექნებოდა ქვეყანაში, ამის წარმოდგენაც კი არ მინდა. ჩვენ გვჭირდება მშვიდობა და განვითარება“, – განაცხადა კალაძემ.