Powered by Jasper Roberts - Blog

 

 

15:08 10.02.2019
„როგორ გაჩნდა ფრანგულ ვებ-გვერდზე ის განცხადება, რადგან, ასეთი რამის ფალსიფიცირება წარმოუდგენელია ქართველმა მოახერხოს“ - გიორგი ფოფხაძე საქართველოს ეროვნული მუზეუმის პასუხს ეხმაურება

საქართველოს ეროვნული მუზეუმი ეხმიანება სოციალურ ქსელებში გავრცელებულ ინფორმაციას ვანში აღმოჩენილი ძვ.წ. V საუკუნით დათარიღებული ყელსაბამის შესახებ, თითქოს სამკაულს "აკლდა 12 ცალი კუს გამოსახულებიანი ფიგურა“, რომელიც სოსო თოფურიძის ხელშეწყობით საფრანგეთში გაიყიდა:

 

„გაცნობებთ, რომ აღნიშნული ინფორმაცია არ შეესაბამება სიმართლეს. მსგავსი ცრუ ინფორმაცია გასულ წლებშიც ვრცელდებოდა და საზოგადოების მაღალი ინტერესიდან გამომდინარე 2013 წელს საქართველოს კულტურისა და ძეგლთა დაცვის მინისტრის ბრძანებით შეიქმნა „საქართველოს ეროვნული მუზეუმიდან 2004-2012 წლებში ექსპონატების გატანა-შემოტანის საკითხის შემსწავლელი დროებითი კომისია“, რომელიც დაკომპლექტდა დარგის მაღალკვალიფიციური სპეციალისტებით. კომისიის მუშაობის შედეგად მიღებულ დასკვნაში ვკითხულობთ: „კომისიის მიერ ექსპონატების თანმხლები დოკუმენტაციის, შენახვა-დაცვის პირობებისა და მათი მდგომარეობის ვიზუალური შესწავლით დადგინდა, რომ ყველა ექსპონატი ადგილზეა და მათი ავთენტურობა ეჭვს არ იწვევს“. როგორც ფართო საზოგადოებისთვისაა ცნობილი, ვანის ყელსაბამი წარმოდგენილია სიმონ ჯანაშიას სახელობის საქართველოს მუზეუმის საგანძურის მუდმივმოქმედ გამოფენაზე, ამჟამად კი გამოფენილია ფრანკფურტის ლიბიგჰაუსის მუზეუმში ფრანკფურტის საერთაშორისო წიგნის ბაზრობის საპატიო სტუმრის პროგრამის ფარგლებში, რომელიც საქართველოს მთავრობის დადგენილებით და საქართველოს განათლების, მეცნიერების კულტურისა და სპორტის სამინისტროს ინიციატივით მიმდინარეობს. გამოფენის დასრულების შემდეგ, 5 მარტიდან, კი კვლავ გამოიფინება სიმონ ჯანაშიას სახელობის საქართველოს მუზეუმის საგანძურში“, ნათქვამია მუზეუმის განცხადებაში.

 

საქართველოს ეროვნული მუზეუმის პასუხს გამოეხმაურა ჟურნალისტი გიორგი ფოფხაძე, რომელიც დიდი ხანია საფრანგეთში ცხოვრობს: „აჰაა, ესეც ეროვნული მუზეუმის განცხადება, გუშინ გავრცელებული განცხადება ქართული საგანძურის ფრანგულ ინტერნეტ აუქციონზე გაყიდვის შესახებ არის სიცრუე, კარგი ბატონო და მშვენიერი და ამასთანავე ახლა მართლა ძლიან და დიდის ინტერესით მაინტერესებს, როგორ გაჩნდა ფრანგულ ვებ-გვერდზე ის განცხადება, რადგან, ასეთი რამის ფალსიფიცირება წარმოუდგენელია ქართველმა მოახერხოს, იმიტომ რომ, 1. განცხადება დაწერილია ფრანგის მიერ და ფრანგულად, ორთოგრაფიული შეცდომების გარეშე. 2. მითითებული მობილური ტელეფონის ნომერი ნამდვილად ფრანგული მობილური ოპოერატორის სიმ-ბარათია 3. მისამართზე, რომელიც ამ განცხადებაშია მითითებული, ნამდვილად არსებობს და ფუნქციონირებს პარიზში ცნობილი ანტიკვარიატის მაღაზია... ამიტომ, ხომ არ ჯობია, კარგი გამოძიება დაიწყოს, მათ შორის, ჟურნალისტური გამოძიებაც და გაირკვეს მტყუან-მართალი?!“, წერს გიორგი ფოფხაძე.

ავტორ(ებ)ი : geotimes.ge