Powered by Jasper Roberts - Blog

 

 

13:13 02.06.2018
მოკლულთა ამბოხი საქართველოში

«Radio Voice of America - რადიო ამერიკის ხმა» (აშშ), 02 ივნისი, 2018 წელი

https://www.amerikiskhma.com/a/protest-calls-for-justice-in-tbilisi/4420028.html

 

ნინო დალაქიშვილი


არა მარტო სისტემა, არამედ ხელისუფლებაც დაგვეტაკა ჩვენ. პრემიერი მოვიდა არა იმიტომ, რომ თანაეგრძნო ჩემთვის; არა იმიტომ, რომ აუცილებლად დღესვე დაკავებული იქნებოდნენ ჩემი შვილის მკვლელები და მისი მფარველები, არამედ კიდევ უნდოდა, რომ მოვეტყუებინე, 6 თვე მატყუებენ, - ეს განცხადება რუსთაველზე მრავალათასიან მიტინგზე ზაზა სარალიძემ, ხორავას ქუჩაზე გასული წლის პირველ დეკემბერს მოკლული ერთერთი არასრულწლოვანის მამამ გააკეთა მას შემდეგ, რაც აქციაზე პრემიერ-მინისტრი გიორგი კვირიკაშვილი მივიდა.


მთავრობის მეთაურის გამოჩენა სამართლიანობის მოთხოვნით ქუჩაში გამოსული ადამიანების წინაშე წარუმატებლად დასრულდა. პრემიერ-მინისტრი რამდენიმე წუთის განმავლობაში ელოდა სიტყვით გამოსვლის შესაძლებლობას აღელვებული ადამიანების წინაშე. პატივი ვცეთ ზაზა სარალიძეს და მივცეთ პრემიერს სიტყვ გამოსვლის შესაძლებლობა“, - ამგვარი შეგონებებით ცდილობდა აქციის ზოგიერთი მონაწილე პრემიერის გამოხატვის თავისუფლების უფლების დაცვას. მართალია, გიორგი კვირიკაშვილს საბოლოოდ მიეცა სიტვყით გამოსვლის შესაძლებლობა, თუმცა მხოლოდ ორიოდე წუთით, რადგან მის მიმართ აგრესია იმდენად ძლიერი აღმოჩნდა, რომ მხოლოდ სიტყვიერი პროტესტით არ შემოფარგლულა. აქციის მონაწილეებმა მის მიმართ სხვადასხვა ნივთი ისროლეს, რის შემდგომაც პრემიერმა პარლამენტის მიმდებარე ტერიტორია დატოვა და საკუთარი მოსაზრება მთავრობის კანცელარიიდან გააჟღერა.


'ჩემი თანამდებობა არცერთი ადამიანის უბედურებად არ მიღირს, როგორც კი დავრწმუნდები, რომ თანამდებობის დატოვება წაადგება ქვეყანას, თუნდაც ოდნავ გააუმჯობესებს სიტუაციას და განმუხტავს, მე არც ერთი წამით ამ ნაბიჯის გადადგმაზე არ დავფიქრდები. დღეს ეს სიტუაცია არ არის და ეს მომენტი არ დამდგარა“, - განაცხადა პრემიერმა, რომელმაც პირობა დადო, რომ გამოძიების ყველა ნაბიჯს გააკონტროლებს, - პირადად გავაკონტროლებ აბსოლუტურად ყველა ნაბიჯს და ვიღებ პასუხიმგებლობას, რომ დროის ტექნიკურად შესაძლებელ უმცირეს მომენტში, ხვალ დილიდან მე მექნება საუბარი თუ რა პერიოდში დავდებთ შედეგს. ეს იქნება პასუხი საზოგადოების მიერ დასმულ ყველა კითხვაზე და ამ გამოწვევაზე. ასევე მინდა დაღუპულის ოჯახის წევრებს ვუთხრათ, რომ რა ხარისხითაც მოინდომებენ გამოძიებაში ჩართვას, ისინი ჩაერთვებიან“.


გიორგი კვირიკაშვილის თქმით, შინაგან საქმეთა სამინისტრო მკვლელობის საქმეს პროკურატურისგან დაიბრუნებს. გამოძიების პროცესს ვიცე-პრემიერი გიორგი გახარია უხელმძღვანელებს. გიორგი კვირიკაშვილმა აქციაზე შეკრებილი მოქალაქეების მისდამი დამოკიდებულება პოლიტიკურად ანგაჟირებული ადამიანების არსებობით ახსნა:


არასოდეს მოვრიდებივარ ხალხთან პირდაპირ კომუნიკაციას და სწორედ ამის გამო გადავწყვიტე მივსულიყავი აქციის მონაწილეებთან. მოკლული ახალაგაზრდა კაცის მამასთან. გავაკეთე ეს, მიუხედავად იმისა, რომ პროვოკაციები იყო მოსალოდნელი. ყველამ დაინახა, რომ ჩემი მისვლა იქ მდგომი ადამიანების აბსოლუტურმა უმრავლესობამ მიიღო პოზიტიურად. ხოლო პოლიტიკურად ანგაჟირებული ადამიანების მცირე ჯგუფმა არ მომცა საშუალება, გამეკეთებინა ჩემი განცხადება - განაცხადა პრემიერ-მინისტრმა.


პრემიერის გამოსვლის შემდგომ რუსთაველზე შეკრებილმა მომიტინგეებმა პოლიტიკური შინაარსის მოთხოვნები გააჟღერეს. მათ შორის მოთხოვნა მთავრობის დათხოვნის შესახებაც: „მისმა უდიდებულესობა ქართველმა ხალხმა პრემიერად წოდებული კვირიკაშვილი გააძევა. ძალიან მალე, ჩვენ გავაძევებთ მთელ მთავრობას. მივმართავ ივანიშვილს, სანამ გაგვიზრდია ჩვენი მოთხოვნები და გადავსულვართ კონკრეტულ ქმედებებზე და გეგმებზე, დროულად მიიღოს გადაწყვეტილება მთავრობის დათხოვნის შესახებ, წინააღმდეგ შემთხვევაში, ვპირდები, რომ მას 100 ათასი ადამიანი აუტალახებს ეზოს“, - განაცხადა ზაზა სარალიძის ადვოკატმა ზვიად კუპრავამ.


მთავარმა პროკურორმა ირაკლი შოთაძემ გადადგომის შესახებ განცხადება გააკეთა, რომელსაც მინისტრი წულუკიანი არ დაეთანხმა, მაგრამ დააკმაყოფილა. ეს აქციის მონაწილეების ერთერთი პირველი მოთხოვნა გახლდათ.


უკვე დღეს მომიტინგეებთან პრეზიდენტი გიორგი მარგველაშვილი მივიდა, ის საგანგებოდ განთავსებულ კარავში ესაუბრა ზაზა სარალიძეს. ჟურნალისტებთან პრეზიდენტს პოლიტიკური ხასიათის განცხადებები არ გაუკეთებია.


მთავარია იმ ტკივილის გაზიარება, რომლითაც სავსეა ამ კაცის გული და რომელიც ბევრ ადამიანს შეეხო. ანალოგიური განცდა ბევრ ადამიანს აქვს. ჩემი მიზანია, ვეურთიერთო როგორც ზაზას, ასევე სხვა ადამიანებს, ვისაც აქვს ასეთი გულისტკივილი იმისთვის, რომ მშვიდი, წყნარი და სტაბილური პროცესი იყოს უზრუნველყოფილი, ქვეყანა დამშვიდდეს. ამ მოტივაციით მაქვს ურთიერთობა ხელისუფლებასთანაც და არ დავიღლები მუშაობით იმისთვის, რომ საქართველო ყველასთვის იყოს ის ქვეყანა, სადაც ადამიანები პოულობენ სამართლიანობას და ამავე დროს, ქვეყანა ინარჩუნებს სტაბილურობას“,– უთხრა პრეზიდენტმა ჟურნალისტებს.


მთელი დღის განმავლობაში პარლამენტის მიმდებარე ტერიტორია უამრავი ისეთი ადამიანის თავშეყრის ადგილად იქცა, რომელთაც საერთო ტკივილი აერთიანებდათერთის მრივ, ახლობლის მკვლელობა და მეორეს მხრივ, ამ მკვლელობაში დამნაშავის მიმართკანონისან ცალკეული ჩინოვნიკების კანონგარეშეჩარევითდამდგარი შედეგი: უსამართლობის განცდა. ზაზა სარალიძის გვერდით პანკისის ხეობაში მოკლული თემირლან მაჩალიკაშვილის მამა მალხაზ მაჩალიკაშვილი მთელი დღის განმავლობაში იდგა და აღნიშნავდა, რომ სამართალი ვერც მან იპოვა. აქციას მოკლული მოზარდების თანასკოლელებიც შეუერთდნენ.


ამერიკის ხმაპარლამენტის წევრს ევროპული საქართველოდან, საერთაშორისო სამართლის სპეციალისტს გიორგი ტუღუშს ესაუბრა, რომელმაც მოვლენების შეფასებისას ხელისუფლებისადმი ნდობის კრიზისის თაობაზე გაამახვილა ყურადღება.


ეს მრავალრიცხოვანი აქციები მიანიშნებს იმაზე, რომ საზოგადოებას არ აქვს ნდობა სახელმწიფო ინსტიტუტების მიმართ. ამ შემთხვევაში ესაა პროკურატურა,სასამართლო და შინაგან საქმეთა სამინისტრო. ფაქტობრივად, ამან გამოიყვანა ხალხი ქუჩაში. თუმცა, უკმაყოფილება გროვდებოდა წლების განმავლობაში და ეს არაა ახალი. 2012 წელს მოსულმა ხელისუფლებამ ადამიანებს ვერანაირად ვერ შეუქმნა სამართლიანობის განცდა. ყველანაირი საფუძველი არსებობს, ვიფიქროთ, რომ გამოძება გაყალბებულია. ესაა მთავარი პრობლემა. როდესაც ასეთი რეზონანსული საქმეა, ქალაქის ცენტრში, ორი მოკლული ახალგაზრდაა, სისხლის გუბეები დგას და ჩვენ ვიგებთ, რომ ამის გამოძიებაც ვერ შეძლო ხელისუფლებამ, ეს მიანიშნებს სისტემურ ლპობაზე, მათ შორის პროკურატურის და მისი ორგანოების.“


კითხვაზე იმის შესახებ, თუ რა ნაბიჯები იქნებოდა რელევანტური ხელისუფლების მხრიდან არსებულ ვითარებაში, ტუღუში შემდეგნაირად პასუხობს: „ეს არ იყო ისეთი რთული გამოსაძიებელი საქმე, რომლისთვისაც, შეიძლებოდა, თავი ვერ გაერთმიათ, კიბერდანაშაული ან სხვა... ესაა ტიპური სისხლის სამართლის საქმე, სადაც არის უამრავი მოწმე და მონაწილე. შედეგად კი ვიღებთ გამოძიებაში აბსოლუტურ ფარსს. ხელისუფლებას შეუძლია, გამოავლინოს ყველა დამნაშავე, როგორც უშუალოდ მკვლეობაში, ასევე ამ საქმის გამოძიების დამახინჯებაში. ხელისუფლებას მოუწევს დათმოს, როგორც დათმო მთავარი პროკურორი. ფაქტია, მუხტი მიანიშნებს, რომ ხალხს ყელში ამოუვიდა გახრწნილი სახელმწიფო ინსტიტუციები. თუმცა ეს ხელისუფლება ამის გამკეთებელი ნაკლებადაა. ეს უნდა გააკეთოს უკვე ახალმა ხელისუფლებამ.“


საზოგადოება ხორავას ქუჩაზე მოკლული მოზარდის მშობლის ზაზა სარალიძის მოწოდებაზე ქუჩაში მას შემდგომ გამოვიდა, რაც სასამართლომ მისი შვილის მკვლელობაში ეჭვმიტანილი უდანაშაულოდ ცნო. აქცია რუსთაველის გამზირზე ამ დრომდე გრძელდება და მონაწილეთა მოთხოვნები სულ უფრო რადიკალური ხდება.

 

მოამზადა სიმონ კილაძემ

ავტორ(ებ)ი : Geotimes.ge