Powered by Jasper Roberts - Blog

13:00 09.09.2017
კახეთის რეგიონში დღეის მდგომარეობით გადამუშავებულია 13,2 ათასი ტონა ყურძენი

სოფლის მეურნეობის მინისტრი ლევან დავითაშვილი რთველის მიმდინარეობას გაეცნო. 


როგორც სოფლის მეურნეობის სამინისტრო იუწყება, მინისტრი ლევან დავითაშვილი თელავში რთველის საკოორდინაციო შტაბის წევრებს შეხვდა და ღვინის ეროვნული სააგენტოს თავმჯდომარისგან, გიორგი სამანიშვილისგან რთველის მიმდინარეობის შესახებ დეტალური ინფორმაცია მოისმინა. შეხვედრას კახეთის მხარეში სახელმწიფო რწმუნებული-გუბერნატორი ირაკლი ქადაგიშვილი და ადგილობრივი ხელისუფლების სხვა წარმომადგენლები დაესწრნენ. 

მინისტრის შეფასებით, რთველი 2017 ორგანიზებულად და წარმატებით მიმდინარეობს. 

„კახეთის რეგიონში უკვე გადამუშავებულია 10 ათას ტონაზე მეტი ყურძენი, თუმცა რთველის პროცესი აქტიურ ფაზაში ახლა შედის. წელს მევენახეობის მიმართულებით განსაკუთრებით კარგი კონიუნქტურა გვაქვს, რეკორდულად მაღალია ღვინის ექსპორტის მონაცემები. ყველა წინაპირობა არსებობს, რომ ყურძნის ფასი მაღალი იყოს და მევენახეების შრომა მაქსიმალურად დაფასდეს. აქედან გამომდინარე, ვფიქრობთ, რთველს ძალიან წარმატებით ჩავატარებთ. სახელმწიფომ ყველაფერი გააკეთა რთველის პროცესის შეუფერხებლად წარმართვისათვის, რაც ბოლო წლებში მევენახეობა-მეღვინეობის მიმართულებით გატარებული რეფორმის მნიშვნელოვანი მიღწევაა“, - აღნიშნა სოფლის მეურნეობის მინისტრმა.

კახეთის გუბერნატორის განცხადებით კი, რთველის ორგანიზების პროცესში ადგილობრივი ხელისუფლების წარმომადგენლები აქტიურად არიან ჩართული.

„რთველი პირველად ტარდება სუბსიდიის გარეშე და ჩამბარებელი მეღვინე ზუსტად იმ ფასს უხდის მევენახეს, რაც რეალურად პროდუქციის საბაზრო ღირებულებაა. მე ვფიქრობ, რომ მეღვინეებსა და მევენახეებს, ასევე სახელმწიფოს შორის, რომელიც არის დარგში პოლიტიკის გამტარებელი, ეს კონსენსუსი შედგა. ეს ძალიან მნიშვნელოვანია არა მარტო 2017 წლის რთველისთვის, არამედ ზოგადად დარგის ხანგრძლივი განვითარების პერსპექტივისთვის“, - აღნიშნა ირაკლი ქადაგიშვილმა.

სოფლის მეურნეობის სამინისტროს ინფორმაციით, კახეთის რეგიონში დღეის მდგომარეობით გადამუშავებულია 13,2 ათასი ტონა ყურძენი. აქედან, 4,7 ათას ტონამდე რქაწითელი, 6,5 ათას ტონამდე საფერავი, 750 ტონა კახური მწვანე, დანარჩენი კი სხვადასხვა ჯიშის ყურძენია. ყურძნის რეალიზაციის შედეგად შემოსავლების სახით 11,6 მლნ ლარია მიღებული. ამ ეტაპისთვის რთველის საკოორდინაციო შტაბში 115 ღვინის კომპანიაა დარეგისტრირებული. ყურძნის გადამუშავების პროცესში უკვე 54 ღვინის კომპანიაა ჩართული. დღეღამური გადამუშავების მაჩვენებელმა 2,1 

 
ათას ტონას მიაღწია.


„გადამუშავებული ყურძნის რაოდენობით მუნიციპალიტეტების მიხედვით შემდეგი მდგომარეობაა: ყვარელი - 5,3 ათასი ტონა, თელავი - 2,2 ათასი ტონა, სიღნაღი - 2,8 ათასი ტონა, დედოფლისწყარო - 1,2 ათასი ტონა, გურჯაანი - 997 ტონა, ახმეტა - 504 ტონა, ლაგოდეხი - 154 ტონა და საგარეჯო - 132 ტონა“, - აცხადებენ სამინისტროში.
მათივე ინფორმაციით, დაინტერესებულ პირებს რთველთან დაკავშირებული ინფორმაციის მიღება სოფლის მეურნეობის სამინისტროს ცხელი ხაზზე - 1501 შეუძლიათ.

სამინისტროში აცხადებენ, რომ მეღვინეობის დარგის არსებული მდგომარეობის გათვალისწინებით, კახეთის რეგიონში 2017 წლის რთველზე ხარისხიან, კონდიცირებულ ყურძენზე სუბსიდიის გაცემის საჭიროება აღარ არსებობს და შესაბამისად, მთავრობის განკარგულების თანახმად, აღარ გაიცემა. ამასთან ერთად, ბრენდის წარმოების განვითარების ხელშესაწყობად, ღვინის კომპანიები, რომლებიც საბრენდე სპირტისა და კონცენტრირებული ყურძნის ტკბილის წარმოების მიზნით რქაწითელსა და კახური მწვანის ჯიშის 1 კგ ყურძენს არანაკლებ 70 თეთრად შეისყიდიან, სახელმწიფოსგან კომპენსაციის სახით 35 თეთრს მიიღებენ.

ავტორ(ებ)ი : bpn.ge