Powered by Jasper Roberts - Blog

23:30 14.02.2017
უვიზო რეჟიმის შეჩერება შესაძლებელია თავშესაფრის მთხოვნელთა მკვეთრად მატების, ან უსაფრთხოების მწვავე პრობლემების დროს

ევროპარლამენტმა მხარი დაუჭირა ევროკავშირის არაწევრი ქვეყნებისათვის უვიზო რეჟიმის შეჩერების მექანიზმის ახალ წესებს, რაც საკვანძო მნიშვნელობის ნაბიჯია, მაგალითად, საქართველოს მოქალაქეებისათვის უვიზო მიმოსვლის შემოღების გზაზე. ევროკავშირის კანონმდებლები დეკემბერში მიემხრნენ უვიზო მიმოსვლის შეჩერების მექანიზმს, 13 თებერვალს კი გამოცხადდა ამ მექანიზმის საბოლოო ვერსიის შესახებ მას შემდეგ, რაც ის ევროკავშირის ყველა ენაზე გადაითარგმნა და სამართლის ექსპერტების მიერ იქნა შემოწმებული. ახალი წესებით, არაწევრ ქვეყნებთან ევროკავშირის უვიზო რეჟიმის შეჩერება უფრო სწრაფად იქნება შესაძლებელი გარკვეულ შემთხვევებში. მათ შორის შეიძლება იყოს თავშესაფრის დაუსაბუთებელი თხოვნის შემთხვევების მკვეთრად მატება, ან უსაფრთხოების მწვავე პრობლემა. ასევე მიმდინარე თვეში, 3 თებერვალს ევროპარლამენტის წევრების დიდი უმრავლესობა მიემხრო საქართველოსთან სავიზო რეჟიმის ლიბერალიზაციას, რომლის ძალაში შესვლაც შესაძლებელი ხდება ახლა, უვიზო რეჟიმის შეჩერების მექანიზმის დამტკიცების შემდეგ. ევროკავშირის წარმომადგენელი დიპლომატების ვარაუდით, საქართველოსათვის უვიზო რეჟიმი მარტის ბოლოს ამოქმედდება.

ავტორ(ებ)ი : geotimes.ge